ᤀᤕᤢᤒ 14 - LIFOTNT

¹ ᤔᤧᤴᤇᤢᤔᤠᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ ᤔᤏᤠ᤺ᤸᤗᤧ ᤁᤢᤎᤠ᤺ᤰ ᤛ᤹ᤖᤥ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ ᤗᤠᤰᤂᤣ ᤋᤢᤔᤢᤖᤥ॥

² ᤂᤢᤏᤧ᤹ ᤑᤢᤱ ᤜᤧᤰᤁᤣ ᤑᤧᤰᤁᤠᤱ ᤀᤡᤖᤧᤶ ᤐᤣ᤺ᤰᤗᤥ. ᤂᤢᤏᤧ᤹ ᤛᤠᤶᤔᤡ᤺ᤰᤂᤢᤱᤒᤠ ᤁᤢᤀᤡᤛᤡᤰ ᤔᤠᤒᤣ᤺ᤰᤗᤥ॥

³ ᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣ ᤂᤢᤏᤧ᤹ ᤕᤠᤖᤃᤧᤈᤥᤃᤢᤒᤡ᥅ ᤜᤧᤰᤁᤩᤠᤱ ᤋᤢᤕᤧᤴ ᤏᤠᤶᤗᤠ ᤁᤧᤃᤢ᤺ᤳᤋᤢᤀᤠᤱ ᤂᤧᤴ ᤂᤠᤛᤧᤴ ᤁᤧᤗᤥ᤺ᤴᤍᤢ ᤁᤧᤒᤡᤖᤢᤒᤡ᥅

⁴ ᤀᤠᤛᤢᤳᤌᤥ ᤜᤡᤱᤔᤴᤗᤠᤶᤒᤠ ᤀᤠᤵᤑᤠᤸᤗᤧᤀᤠᤱ ᤛᤢᤳᤌᤥ ᤐᤠᤴ ᤔᤧᤗ᤺ᤴᤏᤧᤸᤗᤥ. ᤀᤠᤳᤋᤡᤸᤗᤧᤀᤠᤱ ᤗ᤺ᤵᤔᤠ ᤔᤧᤛᤢᤰᤋᤢᤴᤗᤥ॥

⁵ ᤔᤏᤠ᤺ᤸᤗᤧ ᤁᤢᤜᤡᤱᤔᤠ ᤕᤧᤴᤜᤠ᤹ ᤂᤧᤏᤧ᤹ ᤁᤧᤒᤠ᤺ᤳᤋᤢ ᤁᤧᤒᤡᤖᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤱᤔᤠ ᤗᤠᤜᤠ᤹ ᤁᤧᤕᤢᤰᤂᤢ ᤁᤧᤒᤡᤖᤢᤀᤠᤱ ᤘᤠ᤹ᤖᤥ॥ ᤋᤃᤡᤏᤢᤀᤣ ᤂᤧᤸᤗᤧ ᤁᤢᤀᤡ᤺ᤴᤍᤥᤴ ᤋᤥᤰ ᤁᤧᤈᤥᤃᤢ ᤁᤧᤒᤡᤀᤠᤱ ᤘᤠ᤹ᤖᤥ. ᤂᤧᤴ ᤂᤧᤏᤧ᤹ᤀᤣ ᤋᤥᤰ ᤁᤧᤈᤥᤃᤢᤒᤠᤖᤥ. ᤂᤧᤴ ᤀᤠᤳᤋᤡᤸᤗᤧᤀᤠᤱ ᤁᤠ᤺ᤰᤔᤠ ᤔᤧᤛᤢᤰᤋᤢᤴᤗᤥ॥

⁶ ᤂᤢᤏᤧ᤹ᤗᤠᤶᤒᤠ ᤁᤧᤏᤠᤖᤠᤴ ᤜᤡᤛᤧ᤹ᤀᤥ ᤛᤠᤱᤔᤏᤠᤒᤠ ᤕᤠ᤺ᤸᤗᤣ᤺ᤰ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤡᤴ ᤁᤢᤈᤢ᤺ᤳᤆᤢ᤺ᤳ ᤁᤢᤕᤠᤶᤍᤠᤍᤠ ᤗᤧᤖᤧᤍᤣᤛᤧ᤹ᤀᤥ॥

⁷ ᤋᤠᤱᤔᤏᤠᤒᤠ ᤛᤡᤱᤒᤢᤱᤅᤡᤴ ᤕᤠᤶᤔᤥ ᤜᤡᤱ ᤁᤧᤗ᤹ᤒᤠ ᤏᤡᤱᤛᤠᤱ ᤐᤥᤱᤗᤥ. ᤂᤧᤵᤔᤥ ᤕᤠᤶᤔᤥ ᤁᤢᤛᤱ ᤁᤢᤏ᤺ᤰ ᤌᤠᤱᤗᤥ॥

⁸ ᤂᤧᤸᤗᤧ ᤁᤢᤛᤠ᤺ᤵᤜᤠ᤹ ᤋᤢᤶᤔᤠᤱ ᤁᤠᤵᤐᤥᤒᤠ ᤐᤥᤱᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤢ᤺ᤳᤜᤠ᤹ ᤀᤡᤰᤋᤠᤵᤐᤥ ᤛᤡᤗᤠ᤺ᤳᤗᤥ.

⁹ ᤜᤧᤰᤁᤣᤛᤠᤱ ᤔᤡᤛᤠᤰ ᤆᤫᤠ᤺ᤳᤋᤡᤴ ᤂᤥᤛᤢᤀᤠᤱ ᤕᤠᤶᤔᤥ ᤁᤢᤏ᤺ᤰ ᤗᤡᤱᤗᤥ. ᤂᤧᤒᤩᤠᤱ ᤁᤢᤏ᤺ᤴᤍᤪᤢᤰ ᤛᤡᤱᤒᤢᤱ ᤁᤢᤛᤡᤱ ᤁᤢᤈ᤺ᤰ ᤗ᤺ᤴᤗᤥ॥

¹⁰ ᤁᤖ ᤔᤧᤴᤇᤠᤶ ᤕᤠᤵᤔᤡᤴ ᤛᤡᤖᤥ. ᤜᤧᤰᤁᤩᤠᤱ ᤂᤧᤵᤔᤥᤀᤣ ᤂᤧᤴ ᤏᤢᤵᤗᤥ. ᤏᤢᤵ ᤐᤣ᤺ᤰᤁᤠᤱᤃ ᤘᤣ᤹ ᤏᤡᤱᤛᤠᤱ ᤌᤣᤀᤠᤱ ᤔᤧᤒᤥᤱᤏᤧᤸᤗᤥ॥

¹¹ ᤕᤠᤰᤛᤠᤱᤘᤠ ᤏᤢ ᤘᤖᤰᤁᤥᤒᤠ ᤆᤫᤠ᤺ᤳᤋᤡᤴ ᤆᤵᤐᤪᤧᤰ ᤆᤵᤐᤣ᤺ᤰᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠᤴ ᤛᤡᤖᤥ ᤜᤧᤰᤁᤩᤠᤱ ᤕᤠᤶᤔᤥ ᤔᤧᤒᤥ᤺ᤰᤏᤧᤴᤗᤥ॥

¹² ᤀᤠᤑᤠᤸᤗᤧ ᤌᤠᤖᤡᤰᤛᤠᤱ ᤋᤠᤱᤛᤠᤰᤐᤠᤴ ᤜᤠᤒᤠ ᤐᤳᤗᤥ. ᤂᤧᤶᤔᤩᤠᤰ ᤌᤠᤖᤡᤰ ᤂᤧᤴ ᤀᤠᤒᤠᤅᤣ ᤁᤢᤔᤡᤰᤕᤢᤔᤥᤗᤠᤶ ᤔᤧᤛᤥᤏᤧᤴᤗᤥ॥

¹³ ᤂᤧᤔᤠᤍᤡᤱ ᤕᤱᤛᤱᤅᤥ ᤆᤡᤰᤂᤠᤱᤅᤧ᤹ᤀᤥ. ᤂᤧᤏᤧ᤹ ᤁᤧᤛᤡᤰ ᤔᤧᤴᤈᤡ᤺ᤰᤁᤣ ᤌᤠᤖᤡᤰ ᤀᤠᤱᤃᤠ᤹ ᤔᤠ᤹ᤖᤠᤱᤅᤧ᤹ᤀᤥ॥ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤂᤧᤏᤧ᤹ ᤁᤧᤕᤧᤶᤔᤡᤴ ᤋᤥᤰ ᤆᤥᤃᤧ᤹ᤀᤥ॥

¹⁴ ᤔᤧᤴᤇᤠᤶ ᤕᤠᤵᤔᤡᤴ ᤛᤡᤀᤠᤱ ᤕᤠᤶᤔᤥ ᤂᤧᤸᤗᤧ ᤜᤡᤱᤔᤴ ᤂᤥᤔᤠ ᤛᤢᤰᤋᤢᤒᤡ᥅ ᤁᤖ ᤀᤠᤱᤃᤠ᤹ᤃ ᤛᤢᤰᤂᤣᤘᤠ ᤕᤧᤶᤜᤠ᤹ ᤕᤠᤶᤔᤥ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤁᤴ ᤕᤧᤳᤋᤢᤰᤂᤣᤒᤠ ᤕᤧᤴᤜᤠ᤹ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤀᤠᤱᤃᤠ᤹ ᤗᤠᤶ ᤀᤥᤔᤧᤳᤋᤢᤱᤅᤠᤱ ᤘᤠ᤹ᤀᤠᤖᤥ॥

¹⁵ ᤂᤧᤒᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤁᤧᤀᤢ᤺ᤳᤋᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢᤃᤵ ᤐᤡᤏᤧᤖᤥ॥ ᤂᤧᤏᤧ᤹ ᤀᤠᤒᤠᤅᤣ ᤁᤧᤜᤢᤰᤁᤡᤸᤗᤧ ᤁᤧᤈᤥᤃᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤧᤴ ᤂᤧᤏᤧ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤖᤥ॥

¹⁶ ᤂᤧᤶᤒᤩᤠᤱ ᤂᤧᤏᤧ᤹ ᤁᤧᤖᤧᤰ ᤀᤠᤱᤃᤠ᤹ ᤀᤠᤗᤠᤱᤕᤥ᤺ᤰᤜᤠ᤹ ᤀᤥᤃᤧᤔᤧᤳᤋᤢᤖᤥ. ᤁᤖ ᤀᤠᤗᤠᤕᤥᤜᤠ᤹ᤃ ᤕᤥᤰ ᤁᤧᤴᤎᤰᤋᤢᤴᤗᤥ॥

¹⁷ ᤔᤏᤠ᤺ᤸᤗᤧ ᤆᤡᤃᤰᤘᤠᤴ ᤛᤢᤰᤘᤠᤀᤥ ᤆᤡᤰᤂᤢᤒᤠ ᤁᤢᤀᤡᤛᤡᤰ ᤀᤠᤗᤠᤕᤥᤴ ᤁᤧᤈᤡᤰᤂᤢᤖᤥ॥

¹⁸ ᤁᤖ ᤏᤠᤱᤈᤱᤗᤢᤱᤜᤠ᤹ ᤗᤢ᤺ᤶᤔᤠᤒᤣ᤺ᤰᤔᤠ ᤕᤔᤠᤒᤣ᤺ᤰᤔᤠ ᤕᤧᤶᤜᤠ᤹ ᤋᤠᤖᤥ ᤜᤧᤰᤁᤩᤠᤱ ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤜᤠ᤹ ᤆᤳᤇᤡᤱ ᤐᤣ᤺ᤰᤗᤥ.

¹⁹ ᤜᤧᤰᤁᤩᤠᤱ ᤘᤃᤣ᤺ᤰᤔᤠ ᤘᤠᤜᤡᤳᤋᤡᤸᤗᤧ ᤗᤢᤱᤜᤠ᤹ ᤂᤥ᤺ᤴᤍᤢᤖᤥ ᤂᤧᤒᤩᤠᤱ ᤂᤠᤶᤔᤡᤴ ᤐᤰᤂᤢᤍᤣ᤹ᤖᤢᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠ᤺ᤸᤗᤧ ᤏᤡᤱᤛᤠᤱ ᤆᤥᤃᤢᤒᤠᤴ ᤁᤧᤔᤧᤰᤂᤢ ᤁᤧᤒᤡᤖᤢᤖᤥ॥

²⁰ ᤂᤧᤏᤧ᤹ ᤔᤧᤴᤇᤠᤶ ᤕᤠᤵᤔᤡᤴ ᤁᤧᤏᤠ᤺ᤴᤍᤢᤀᤠᤱ ᤂᤢᤏᤧ᤹ ᤛᤡᤄᤧᤳᤗᤥ. ᤂᤢᤏᤧ᤹ ᤁᤢᤏᤠᤖᤠᤴᤏᤠᤱ ᤛᤡᤔᤠ ᤏᤠᤖᤠᤀᤥ ᤗᤧᤱᤒᤣ᤺ᤰᤁᤠᤱ ᤘᤠ᤹ᤖᤥ॥

²¹ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤄᤥᤛᤢᤖᤥ. ᤁᤖ ᤂᤧᤸᤗᤧ ᤂᤧᤴ ᤏᤡᤱᤘᤠ᤹ ᤔᤧᤄᤥᤛᤢᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤐᤣ᤺ᤰᤗᤥ. ᤁᤖ ᤂᤧᤴᤏᤠᤱ ᤂᤧᤸᤗᤧ ᤏᤡᤱᤘᤠ᤹ ᤔᤧᤄᤥᤛᤢᤴᤗᤥ॥

²² ᤂᤧᤸᤗᤧ ᤐᤖᤢᤔᤠᤸᤗᤧ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤋᤢᤰᤔᤧᤸᤗᤰ ᤏᤡᤱᤘᤠ᤹ ᤂᤥᤛᤢᤖᤥ ᤂᤧᤒᤩᤠᤱ ᤏᤡᤱᤘᤠ᤹ᤀᤥᤒᤠ ᤔᤧᤖᤡᤱ ᤌᤰᤔᤧᤸᤗᤰ ᤏᤡᤱᤘᤠ᤹ ᤂᤥᤛᤢᤖᤥ॥