ᤀᤕᤢᤒ 13 - LIFOTNT

^1-2 ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤵᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ. ᤂᤧᤏᤧ᤹ ᤕᤠᤖᤡᤰᤁᤣ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤀᤠᤱᤃᤠ᤹ ᤂᤧᤏᤧ᤹ᤏᤢ᤺ᤸᤗᤧ ᤕᤥᤕᤥᤰ ᤜᤥ᤺ᤵᤐᤠᤖᤥ॥

³ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤱᤃᤠ᤹ ᤔᤧᤴᤍᤱᤔᤏᤠᤒᤠ ᤐᤠᤴ ᤐᤠ᤺ᤵᤔᤠ ᤘᤠ᤹ᤖᤥ. ᤁᤖ ᤂᤡᤏᤡ᤹ᤏᤢᤃ ᤔᤣ᤺ᤴᤗᤥ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤂᤢᤏᤧ᤹ᤏᤢ ᤐᤠ᤺ᤴᤎᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥

⁴ ᤂᤡᤏᤡ᤹ ᤀᤠᤒᤠᤅᤣ ᤏᤧᤜᤡ ᤜᤥ᤺ᤵᤔᤠ ᤐᤠ᤺ᤴᤏᤡᤴ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤸᤗᤧ ᤁᤧᤎᤣ᤺ᤰᤋᤢᤶᤗᤥ॥ ᤂᤡᤏᤡ᤹ᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤛᤡᤍᤠ᤹ᤛᤠᤶᤒᤠ ᤜᤧᤰᤁᤣ ᤁᤧᤗ᤹ᤖᤡᤖᤥ॥

⁵ ᤂᤡᤏᤡ᤹ ᤔᤧᤶᤒᤠ᤺ᤳᤋᤣ ᤁᤧᤕᤢᤅᤡᤸᤗᤧ ᤏᤢᤒᤠ ᤐᤥ᤺ᤰᤂᤧᤒᤠᤖᤥ. ᤜᤧᤰᤁᤣ᤺ᤸᤗᤧ ᤔᤏᤠᤜᤠ᤹ᤖᤧ ᤛᤡᤰᤁᤢᤶᤛᤠᤒᤠ ᤁᤧᤶᤀᤡ᤺ᤳᤋᤡᤖᤥ᥄

⁶ ᤀᤠᤏᤡᤱᤘᤠ᤹ ᤔᤧᤴᤍᤠᤔᤠ ᤐᤠ᤺ᤴᤜᤠ᤹ ᤋᤥ᤺ᤴᤍᤢᤱᤗᤥ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥

⁷ ᤂᤡᤏᤡ᤹ ᤌᤣᤀᤠᤱ ᤀᤡᤱᤗᤧᤰ ᤁᤧᤒᤠᤖᤡᤒᤠᤒᤣ᥅ ᤌᤣ ᤂᤡᤏᤡ᤹ ᤀᤡᤱᤗᤧᤰ ᤐᤠ᤺ᤴᤏᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤓᤠ᤹ ᤐᤡᤖᤢᤒᤡ᥅

⁸ ᤌᤣ ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤒᤠᤖᤡᤒᤡ᥅ ᤌᤣ ᤂᤠᤛᤧᤴᤗᤥᤶᤔᤠ ᤜᤡᤶᤔᤥ ᤂᤢᤏᤧ᤹ ᤗᤧᤵᤔᤠᤱ ᤂᤡᤏᤡ᤹ ᤐᤠᤴ ᤁᤧᤎᤰᤋᤡᤒᤡ᥅

⁹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤛᤠ᤹ᤖᤡᤖᤥ ᤜᤧᤰᤁᤣ᤺ᤸᤗᤧ ᤌᤣ ᤂᤢᤏᤧ᤹ ᤂᤡᤏᤡ᤹ᤀᤥ ᤁᤢᤓᤠ ᤏᤢᤒᤠ ᤐᤠᤴ ᤂᤥᤛᤢᤒᤡ᥅ ᤌᤣ ᤔᤏᤠᤜᤠ᤹ ᤁᤢᤀᤡᤛᤡᤰ ᤂᤢᤏᤧ᤹ᤀᤠᤱ ᤀᤡᤱᤗᤧᤰᤔᤠ ᤁᤧᤛᤢᤰᤋᤢᤶᤒᤡ᥅

¹⁰ ᤂᤧᤏᤡ᤹ ᤛᤫᤠ᤺ᤳᤋᤠᤱ ᤀᤣ᤺ᤰ ᤐᤀᤣ᤺ᤰ ᤁᤧᤈᤥᤃᤢᤶᤏᤧᤓᤃᤪ ᤂᤢᤏᤧ᤹ ᤁᤧᤓᤧ᤺ᤰᤋᤡᤖᤥ॥

¹¹ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤸᤗᤧ ᤂᤡᤏᤡ᤹ ᤕᤱᤔᤠ ᤁᤧᤵᤔᤠᤀᤥ ᤁᤧᤎᤠᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤡᤏᤡ᤹ ᤕᤱᤔᤠ ᤁᤧᤛᤩᤧ᤹ᤀᤡᤖᤥ॥

¹² ᤂᤡᤏᤡ᤹ ᤂᤠᤜᤢᤴᤜᤠ᤹ ᤂᤠᤵᤐᤢ ᤜᤧᤰᤁᤣ ᤜᤏᤧ ᤌᤣᤏᤠᤎᤣᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤐᤠ᤺ᤴᤎᤱᤜᤠ᤹ ᤛ᤹ᤔᤏᤠᤒᤠ ᤂᤠᤶ ᤁᤢᤛᤡᤱ ᤆᤥᤰᤗᤥ॥

¹³ ᤂᤡᤏᤡ᤹ ᤔᤧᤶᤒᤠ᤺ᤳᤋᤣ ᤕᤢᤅᤧᤶᤔᤧ᤹ᤀᤠᤱ ᤀᤠᤱᤃᤠ᤹ ᤐᤠ᤺ᤵᤔᤠ ᤛᤢᤕᤧᤶ ᤀᤠᤒᤡᤖᤧᤶᤔᤧ᤹ᤀᤥ॥ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤆᤩᤠ ᤐᤥᤱᤛᤠᤱ ᤐᤥᤱᤗᤖᤥ॥

¹⁴ ᤀᤠᤱᤃᤠ᤹ ᤀᤠᤎᤰᤁᤡᤴ ᤕᤥᤎᤥ ᤐᤥᤱᤔᤠ ᤕᤠᤖᤡᤵ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤀᤠᤛᤰᤔᤠ ᤛᤠᤶᤔᤡᤴ ᤁᤧᤛᤠᤰᤐᤥ ᤌᤠᤛᤢᤱᤗᤥ॥

¹⁵ ᤂᤢᤏᤧ᤹ ᤀᤠᤱᤃᤠ᤹ ᤛᤧᤳᤋᤠᤛᤠᤱ ᤂᤢᤏᤧ᤹ᤀᤥᤀᤣ ᤀᤠᤏᤡᤱᤘᤠ᤹ ᤕᤢᤰᤂᤢᤱᤗᤥ॥ ᤂᤢᤏᤧ᤹ ᤁᤢᤍᤃᤡ ᤀᤠᤒᤠᤅᤣ ᤏᤠᤱᤛᤡᤱᤔᤠ ᤐᤠ᤺ᤴᤏᤡᤸᤗᤧ ᤐᤠ᤺ᤴᤎᤱᤅᤡᤴ ᤛᤧᤰᤂᤠᤀᤣ ᤐᤠ᤺ᤳᤋᤢᤱᤗᤥ॥

¹⁶ ᤏᤡᤛ᤻ᤛᤣᤛᤠᤱ ᤁᤴ ᤀᤠᤏᤠᤎᤡᤱᤔᤠ ᤐᤠ᤺ᤴᤏᤡᤸᤗᤧ ᤀᤠᤱᤃᤠ᤹ ᤋᤠᤱᤛᤧ᤺ᤵᤐᤠᤒᤡᤗᤠᤖᤥ. ᤌᤣᤀᤠᤱᤓᤧᤸᤗᤧ ᤁᤢᤓᤠ ᤗᤠᤕᤥᤒᤠ ᤔᤏᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤕᤧᤵᤔᤠᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ ᤔᤧᤛᤢᤰᤏᤧᤸᤗᤥ॥

¹⁷ ᤂᤧᤵᤛᤠᤶᤔᤧ᤹. ᤀᤠᤸᤗ ᤀᤠᤒᤠ᤺ᤴᤏᤡᤴ ᤛᤡᤱᤛᤡᤱᤅᤠᤱ ᤂᤧᤵᤛᤧᤶᤔᤧ᤹ᤀᤥ. ᤂᤶᤒᤩᤠᤱ ᤀᤠᤱᤃᤠ᤹ ᤐᤥᤎᤰ ᤆᤥᤃᤢᤱᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥

¹⁸ ᤀᤠᤱᤃᤠ᤹ ᤀᤠᤍᤢ᤺ᤴᤍᤣ ᤏᤠᤶᤗᤠ ᤐᤠ᤺ᤴᤜᤠ᤹ ᤋᤥ᤺ᤶᤔᤠ ᤕᤠᤖᤡᤵ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤑᤥᤋᤩᤠ ᤔᤣ᤺ᤴᤏᤣᤒᤠ ᤐᤥᤱᤅᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤛᤢᤱᤗᤥ॥

¹⁹ ᤀᤠᤳᤋᤡᤸᤗᤧ ᤐᤠ᤺ᤴᤎᤡᤰᤔᤠ ᤛᤢᤰᤁᤠᤒᤣ᥅ ᤐᤠ᤺ᤴᤎᤡᤰᤔᤠ ᤕᤠᤵᤔᤡ ᤁᤧᤛᤢᤰᤏᤧᤓᤃᤪ ᤀᤠᤱᤃᤠ᤹ ᤛᤫᤠ᤺ᤳ ᤘᤠ᤹ᤀᤧᤀᤠᤱ ᤛᤡᤀᤠᤖᤥ॥

²⁰ ᤏᤡᤱᤘᤠ᤹ᤑᤢᤔᤠᤱᤅᤣ. ᤐᤖᤢᤔᤠᤸᤗᤧ ᤏᤧᤳᤇᤡ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤶᤔᤠ ᤋᤧᤴᤍᤧ ᤐᤡᤖᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤔᤧᤈᤡᤱᤛᤡᤱᤅᤠᤴᤗᤥ॥

²¹ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤢᤶᤍᤡᤱ ᤐᤡᤔᤠ ᤗᤧᤖᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤡᤒᤢ ᤔᤧᤗᤠᤶᤛᤠᤱᤅᤡᤴᤏᤧ᤹ᤀᤥ॥

²² ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤋᤃᤡ ᤐᤠᤖᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢᤃᤵ ᤐᤡᤏᤧᤖᤥ॥ ᤀᤡᤃᤪ ᤀᤠᤱᤃᤠ᤹ ᤐᤠ᤺ᤵᤔᤠ ᤋᤧᤴᤍᤡᤱ ᤐᤡᤖᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤏᤢᤃᤵ ᤐᤡᤖᤠᤱᤅᤧ᤹ᤀᤥ॥

²³ ᤌᤧᤔᤠ ᤗᤠᤕᤥ ᤗᤠᤛᤥᤳ ᤆᤥᤃᤢᤱᤅᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ ᤌᤣ ᤐᤠᤴ ᤑᤣ᤺ᤴᤍᤢᤱᤅᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ ᤀᤠᤛᤶᤎᤠᤱ ᤌᤧᤔᤠ ᤌᤧᤔᤠ ᤗᤠᤕᤥᤖᤧ ᤀᤠᤵᤋᤡᤰᤜᤠ᤹ ᤘᤠ᤹ᤒᤣ᥅

²⁴ ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ᤗᤠᤶ ᤁᤧᤏᤠᤖᤠᤴ ᤁᤧᤈᤡᤰᤂᤢᤒᤠᤒᤣ᥅ ᤌᤣᤀᤠᤱ ᤀᤠᤱᤃᤠ᤹ ᤏᤡᤱᤔᤡ ᤁᤢᤀᤡᤛᤡᤰ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤳᤋᤠᤒᤠᤒᤣ᥅

²⁵ ᤌᤣ ᤂᤧᤏᤧ᤹ ᤛᤢᤖᤡ᤺ᤳᤋᤡᤸᤗᤧ ᤑᤧᤛᤢᤒᤠ ᤋᤧᤳᤗᤠᤓᤧᤰᤘᤠᤴ ᤋᤢᤰᤂᤣ ᤁᤧᤈᤠ᤺ᤳᤋᤢᤒᤡ᥅ ᤌᤣ ᤂᤧᤏᤧ᤹ ᤁᤧᤜᤣᤒᤠ ᤆᤠᤛᤡᤵᤐᤧᤴ ᤁᤧᤏᤠ᤺ᤳᤋᤢᤀᤡ᥅

²⁶ ᤌᤠᤱᤒᤧᤴ ᤘᤕᤠᤱᤅᤡᤸᤗᤧᤒᤠ ᤀᤠᤗᤠᤕᤥᤸᤗᤧ ᤂᤢᤶᤍᤡᤱ ᤂᤥᤛᤢᤱᤗ ᤁᤧᤕᤠ᤺ᤴᤍᤠᤱᤗᤥ. ᤂᤧᤒᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤐᤠᤴ ᤁᤧᤎᤡᤰᤋᤠᤱᤗᤥ॥

²⁷ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤱᤜᤠ᤹ᤀᤥ ᤑᤧᤴᤈᤣ᤹ ᤌᤰᤁᤪᤱ ᤁᤧᤕᤠᤰᤋᤢᤖᤥ॥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤱᤕᤥ᤺ᤰᤜᤠ᤹ ᤁᤧᤖᤧᤰ ᤕᤥᤰ ᤁᤧᤎᤰᤋᤢᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤥ᤹ᤖᤢᤱᤒᤠ ᤀᤠᤗᤠᤱᤋᤠᤵᤐᤣ᤹ᤜᤠ᤹ ᤁᤧᤖᤧᤰ ᤁᤧᤛᤠ᤹ᤖᤢᤖᤥ॥

²⁸ ᤂᤧᤸᤗᤧᤆᤥᤃᤢᤸᤗᤧ ᤁᤧᤕ᤺ᤵᤐᤠ ᤛᤡᤱᤅᤧᤴ ᤀᤡᤃᤪ ᤆᤠᤱᤅᤡᤴ ᤌᤰᤐᤧᤸᤗᤧ ᤆᤒᤠ ᤜᤧᤰᤁᤣ ᤗ᤹ᤀᤠᤖᤥ. ᤂᤧᤴ ᤁᤢᤀᤡᤛᤡᤰ ᤔᤧᤰᤁᤠ ᤐᤣ᤺ᤰᤁᤠᤖ ᤐᤳᤋᤠᤖᤥ॥