ᤀᤕᤢᤒ 12 - LIFOTNT

ᤀᤕᤢᤒᤖᤧ ᤐᤠ᤺ᤳᤋᤢ—

^1-2 ᤀᤥᤖᤥ᥄ ᤀᤥᤖᤥ᥄ ᤂᤡᤏᤡ᤹ᤀᤣ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠᤏᤡᤱᤗᤥ॥ ᤀᤥᤖᤥ. ᤂᤡᤏᤡ᤹ ᤁᤧᤛᤩᤧ᤹ᤀᤡᤸᤗᤧ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴᤏᤠᤱ ᤔᤧᤰᤗᤥ॥

³ ᤁᤖ ᤀᤠᤱᤃᤠ᤹ᤀᤠᤱ ᤂᤡᤏᤡ᤹ ᤁᤢᤀᤡᤛᤡ᤺ᤰᤁᤣ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤀᤠᤱᤃᤠ᤹ ᤌᤧᤔᤠ ᤐᤠ᤺ᤴᤏᤥᤀᤠᤱ ᤂᤡᤏᤡ᤹ᤏᤢ᤺ᤸᤗᤧ ᤀᤣᤃᤠᤱ ᤜᤥ᤺ᤵᤐᤠᤀᤠᤖᤥ॥ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤐᤠ᤺ᤴᤏᤡᤴ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥

⁴ ᤀᤠᤸᤗ ᤀᤠᤱᤃᤠ᤹ ᤀᤠᤴᤈᤢᤶᤜᤠ᤹ᤖᤧᤀᤠᤱ ᤀᤠᤱᤃᤠ᤹ ᤔᤧᤕᤣ᤺ᤳᤋᤠᤖᤥ॥ ᤀᤠᤱᤃᤠ᤹ ᤛᤠᤶᤕᤥᤒᤠ ᤏᤢ ᤑᤥᤋᤩᤠ ᤔᤣ᤺ᤴᤏᤣᤒᤠ ᤘᤠ᤹ᤀᤠᤖᤥ. ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤁᤡᤏᤠ᤺ᤴᤍᤡ ᤔᤧᤒᤡᤀᤠᤖᤥ॥ ᤁᤖ ᤁᤢᤓᤠ ᤀᤰᤋᤱᤒᤠ ᤕᤧᤶᤔᤠᤱ ᤘᤕᤧᤖᤥ. ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤢ᤺ᤳᤋᤢᤱᤅᤡᤸᤗᤧ ᤂᤢᤏᤧ᤹ ᤏᤥᤃᤵ ᤐᤡᤖᤠᤱᤗᤥ॥

⁵ ᤂᤡᤏᤡ᤹ ᤋᤢᤰᤂᤣ ᤔᤧᤴᤍᤢᤶᤔᤣ ᤁᤧᤘᤕᤡᤖᤥ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤡᤏᤠ᤺ᤴᤍᤡ ᤁᤧᤒᤡᤖᤡᤖᤥ॥ ᤆᤥ᤺ᤶᤔᤠ ᤁᤧᤀᤡ᤺ᤵᤐᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤡᤏᤡ᤹ ᤁᤧᤜᤡᤵᤋᤢᤶᤛᤡᤶᤗᤥ॥

⁶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠᤜᤠ᤹ ᤜᤧᤰᤁᤩᤠᤱ ᤑᤠ᤺ᤴᤍᤠᤜᤠ᤹ ᤛᤏᤠᤖᤢᤱᤅᤥ ᤔᤧᤘᤠ᤹ᤖᤥ॥ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤂᤢᤴᤇᤡ᤹ ᤌᤢᤶᤔᤠᤴᤏᤣ ᤔᤠᤱᤗᤥ॥

⁷ ᤁᤖ ᤁᤢᤒᤢ ᤌᤰᤛᤠᤜᤠ᤹ ᤛᤣ᤺ᤴᤍᤥᤛᤧᤶᤛᤡᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤜᤢ᤹ᤔᤠ ᤁᤧᤶᤛᤢᤰᤋᤡᤖᤥ. ᤀᤡᤃᤪ ᤋᤠᤱᤛᤠᤱᤒᤥᤒᤠ ᤐᤢᤛᤠᤜᤠ᤹ ᤛᤧᤴᤗᤠᤵᤋᤠᤶᤛᤡᤶᤔᤧ᤹ᤀᤥ ᤂᤧᤶᤒᤠᤱ ᤂᤧᤱᤜᤠ᤹ᤖᤧ ᤁᤧᤶᤔᤧᤳᤋᤡᤖᤥ॥

⁸ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤏᤢ ᤐᤠᤖᤠᤶᤔᤧ᤹ᤀᤥ ᤜᤧᤰᤁᤩᤠᤱ ᤜᤧᤸᤗᤧ ᤁᤧᤜᤢ᤹ᤖᤡᤖᤥ. ᤀᤡᤃᤪ ᤘᤖ᤺ᤱᤅᤥᤒᤠ ᤅᤠᤜᤠ᤹ᤗᤠᤶ ᤛᤡᤰᤁᤢᤶ ᤏᤡᤱᤘᤠ᤹ ᤁᤥ᤺ᤳᤋᤧᤶᤔᤧ᤹ᤀᤥ॥

⁹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤸᤗᤧ ᤁᤧᤖᤧᤰ ᤆᤥᤃᤢᤒᤠᤖᤥ ᤁᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

¹⁰ ᤁᤧᤖᤧᤰ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤴ ᤂᤢᤏᤧ᤹ ᤁᤢᤜᤢᤰᤁᤥ ᤘᤠ᤹ᤖᤥ॥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤢ ᤛᤰᤔᤠᤴ ᤂᤢᤏᤧ᤹ ᤁᤢᤜᤢᤰᤁᤥ ᤘᤠ᤹ᤖᤥ॥

¹¹ ᤗᤧᤛᤥ᤺ᤵᤐᤠᤸᤗᤧ ᤁᤢᤈᤠᤴ ᤁᤢᤈᤠᤏᤢ᤹ᤖ ᤛᤠ᤹ᤖᤢᤖᤥ ᤂᤧᤴ ᤜᤧᤰᤁᤣ ᤂᤡᤏᤡ᤹ ᤏᤧᤰᤂᤥ᤹ᤒᤠᤸᤗᤧ ᤐᤠ᤺ᤴᤏᤡᤴ ᤂᤧᤵᤛᤢᤖᤥ॥

^12-13 ᤂᤍᤠᤰᤔᤡᤜᤠ᤹ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤘᤠ᤹ᤖᤥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢᤃ ᤛᤡᤰᤁᤢᤍᤡᤱ ᤏᤡᤱᤘᤠ᤹ ᤏᤢ ᤔᤢᤰᤛᤠᤶ ᤘᤠ᤹ᤖᤥ॥ ᤂᤍᤠᤰᤔᤡᤜᤠ᤹ᤏᤢᤃ ᤛᤢᤈᤠ ᤏᤢ ᤂᤠᤛᤡᤱᤏᤡ᤺ᤵᤔᤠᤴ ᤘᤠ᤹ᤖᤥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤢᤈᤠ ᤏᤢ ᤏᤧᤜᤡᤏᤡᤱᤘᤠ᤹ ᤘᤠ᤹ᤖᤥ॥

¹⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤴᤇᤢᤏᤧᤓᤃᤪ ᤜᤠ᤺ᤳᤗᤧᤀᤠᤱ ᤂᤧᤴ ᤕᤠᤶᤔᤥ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤏᤧᤓᤃᤪ ᤀᤣ᤺ᤸᤗᤧᤀᤠᤱ ᤂᤧᤴ ᤗᤧᤵᤔᤠ ᤔᤧᤛᤢᤰᤋᤢᤴᤗᤥ॥

¹⁵ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤠᤜᤡᤳᤋᤡᤴ ᤛᤠᤰᤋᤢᤸᤗᤧ ᤏᤠᤶᤗᤠ᤺ᤱᤔᤠ ᤐᤥ᤺ᤰᤗᤥ॥ ᤂᤢᤏᤧ᤹ ᤐᤠᤱᤃᤧᤴᤍᤡᤱ ᤘᤠᤜᤡᤳᤋᤡᤴ ᤐᤠᤱᤄᤢᤸᤗᤧ ᤁᤢᤱᤅᤠᤱ ᤌᤢᤰᤘᤠ ᤐᤣ᤺ᤰᤗᤥ॥

¹⁶ ᤔᤢᤰᤁᤡᤴ ᤏᤢ ᤌᤱ ᤏᤠ᤺ᤶᤔᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤣᤖᤥ॥ ᤀᤡᤱᤃᤧᤗᤧᤰᤐᤠᤴ ᤏᤢ ᤀᤡᤱᤗᤧᤰᤁᤥ ᤁᤧᤎᤠᤒᤠᤴ ᤏᤧᤵᤔᤠᤱ ᤂᤢᤏᤧ᤹ ᤁᤢᤜᤢᤰᤁᤥ ᤘᤠ᤹ᤛᤡᤖᤥ॥

¹⁷ ᤂᤢᤏᤧ᤹ ᤛᤢᤈᤠᤍᤠᤱᤒᤠᤜᤠ᤹ ᤂᤢᤏᤡ᤹ ᤌᤏᤠ ᤗᤧᤰᤂᤢ ᤐᤡᤖᤢᤛᤡᤖᤥ ᤜᤧᤰᤁᤩᤠᤱ ᤂᤠᤛᤧᤴᤍᤠᤱᤒᤠᤜᤠ᤹ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤆᤥᤃᤢᤛᤡᤖᤥ॥

¹⁸ ᤂᤢᤏᤧ᤹ ᤜᤠᤱᤜᤠ᤹ ᤜᤠᤱᤕᤢᤰᤏᤠᤀᤥᤗᤠᤶᤒᤠ ᤂᤧᤳᤋᤢᤛᤡᤀᤠᤱ ᤕᤥᤃ᤻ᤒᤠ ᤆᤥᤃᤢᤛᤡᤖᤥ॥

¹⁹ ᤂᤢᤏᤧ᤹ ᤕᤰᤕᤠᤒᤠᤜᤠ᤹ ᤂᤢᤏᤡ᤹ ᤏᤠᤎᤠᤛᤢ ᤐᤡᤖᤢᤛᤡᤖᤥ॥ ᤕᤢᤰᤛᤠᤒᤠᤜᤠ᤹ᤖᤧ ᤕᤖᤡᤰ ᤕᤧᤶᤔᤠᤱᤎᤥ ᤔᤧᤃᤳᤋᤢᤒᤠ ᤂᤢᤴᤇᤡ᤹ ᤕᤢᤰᤁᤡᤴ ᤗᤠᤵᤑᤢᤛᤢ ᤐᤡᤖᤢᤛᤡᤖᤥ॥

²⁰ ᤂᤢᤏᤧ᤹ ᤏᤛᤠ᤺ᤴᤛᤠᤒᤠ ᤔᤏᤠᤜᤠ᤹ ᤔᤧᤶᤒᤠ᤺ᤳᤏᤧᤸᤗ ᤆᤥᤃᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤵᤐᤥ ᤋᤢᤶᤛᤠᤜᤠ᤹ ᤂᤠᤛᤡᤱ ᤔᤧᤴᤏᤡ᤺ᤳᤏᤧᤸᤗ ᤕᤠ᤺ᤴᤍᤢᤛᤡᤖᤥ॥

²¹ ᤂᤢᤏᤧ᤹ ᤜᤠᤱᤕᤢᤰᤐᤠᤜᤠ᤹ ᤛᤶᤎᤠᤱ ᤆᤠ᤺ᤳᤌᤡ ᤐᤣ᤺ᤰᤔᤠ ᤐᤠ᤺ᤴᤜᤠ᤹ ᤋᤠᤖᤢ ᤐᤡᤖᤢᤛᤡᤖᤥ ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤔᤢᤰᤛᤠᤶᤔᤡᤴ ᤂᤢᤏᤧ᤹ ᤔᤧᤶᤓᤤ ᤆᤥᤃᤢ ᤐᤡᤖᤢᤛᤡᤖᤥ॥

²² ᤂᤠᤔᤠᤰᤔᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ. ᤜᤧᤰᤁᤩᤠᤱ ᤔᤠᤰᤛᤍᤡ᤺ᤱᤃᤩᤠ᤺ᤵᤐᤥ ᤛᤧᤍᤡᤱᤍᤡᤱ ᤂᤠᤀᤥ᤺ᤵᤔᤠᤴ ᤋᤠᤖᤢ ᤐᤡᤖᤢᤛᤡᤖᤥ॥

²³ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤴᤇᤡ᤹ ᤔᤡᤱ ᤁᤧᤍᤡ᤺ᤵᤐᤠ ᤏᤢ ᤔᤢᤰᤛᤠᤶᤒᤠ ᤆᤥᤃᤢᤛᤡᤖᤥ. ᤁᤖ ᤂᤢᤏᤧ᤹ ᤂᤧᤱᤜᤠ᤹ ᤕᤠᤶᤔᤥ ᤕᤥ ᤔᤰᤌᤠᤛᤢᤛᤡᤀᤠᤱ ᤔᤧᤶᤓᤤ ᤆᤥᤃᤢᤛᤡᤖᤥ॥

²⁴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ ᤁ᤺ᤴᤍᤢᤷᤒᤠ ᤛᤎ᤺ᤰᤐᤠ ᤆᤥᤃᤢᤛᤡᤖᤥ ᤜᤧᤰᤁᤩᤠᤱ ᤗᤠᤶ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤂᤢᤏᤡ᤹ ᤌᤏᤠ ᤁᤧᤗᤧᤱᤒᤠ ᤔᤧᤒᤥᤱᤅᤠᤱ ᤋᤠᤵᤁᤧᤒᤧ᤹ᤒᤠ ᤆᤥᤃᤢᤛᤡᤖᤥ॥

²⁵ ᤂᤠᤎᤠᤶᤔᤥ ᤂᤧᤱᤜᤠ᤹ᤖᤧ ᤛᤛᤵ ᤛᤛᤵ ᤗ᤹ᤖᤡᤰ ᤔᤧᤛᤵᤛᤢᤖ ᤗᤠᤱᤔᤧᤄᤣ᤺ᤰᤗᤥ ᤜᤧᤰᤁᤩᤠᤱ ᤌᤡ᤺ᤸᤗᤧ ᤁᤧᤔᤒᤠ ᤜᤧᤰᤁᤣ ᤆᤥᤏᤠ᤺ᤶ ᤆᤥᤏᤠ᤺ᤶ ᤔᤧᤗ᤹ᤖ ᤗᤠᤱᤔᤧᤄᤣ᤺ᤰᤗᤥ॥