ᤀᤕᤢᤒ 11 - LIFOTNT

ᤏᤔᤠᤋᤒᤠ ᤛᤥᤐᤖᤖᤧᤸᤗᤧ ᤐᤠ᤺ᤳᤋᤢ—

^1-2 ᤁᤴ ᤁᤧᤖᤧᤰ ᤁᤢᤒᤢᤱᤏᤠ ᤁᤢᤛᤶᤒᤠ ᤐᤠ᤺ᤴᤜᤠ᤹ᤖᤧ ᤏᤢᤃᤵᤐᤡᤴ ᤌᤣ ᤀᤠᤳᤋᤡᤸᤗᤧᤀᤠᤱ ᤔᤧᤶᤒᤡᤔᤠᤒᤡ᥅ ᤌᤣ ᤕᤖᤡᤰ ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤴ ᤁᤢᤍᤥ᤺ᤵᤔᤠ ᤐᤥᤱᤒᤡ᥅

³ ᤀᤕᤢᤒᤣ. ᤌᤣ ᤀᤠᤏᤡᤃᤣ ᤂᤧᤏᤧ᤹ ᤏᤢᤃᤵ ᤐᤡᤔᤠ ᤔᤧᤛᤢᤰᤁᤠᤛᤡᤃᤧᤴᤒᤡ᥅ ᤌᤣ ᤂᤧᤏᤧ᤹ ᤀᤠᤃᤧ᤹ᤃᤧ᤹ᤒᤠ ᤁᤧᤒᤠ᤺ᤴᤜᤠ᤹ᤖᤧ ᤀᤠᤏᤡᤃᤣ ᤔᤢᤖᤠᤴ ᤛᤠᤰᤋᤢᤒᤡ᥅

⁴ ᤂᤧᤏᤧ᤹ ᤀᤠᤒᤠᤅᤣ ᤁᤧᤒᤠ᤺ᤴᤏᤡᤴ ᤛᤧᤰᤂᤠ ᤆᤥᤰᤗᤥ ᤁᤧᤗ᤹ᤒᤠ ᤁᤧᤀᤡ᤺ᤳᤋᤢᤖᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤛᤢᤳᤌᤥ ᤆᤥ᤺ᤰᤁᤠ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤖᤥ॥

⁵ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤢᤃᤵ ᤁᤧᤒᤡᤖᤖᤥ. ᤂᤧᤒᤩᤠᤱ ᤂᤢᤏᤧ᤹ ᤁᤢᤶᤒᤪᤠ ᤜᤴᤍᤢᤖ ᤁᤧᤗ᤹ᤒᤠ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ᥄

⁶ ᤂᤢᤏᤧ᤹ᤃ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧᤒᤠ ᤘᤕᤧᤖᤥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧᤴ ᤛᤡᤒᤡ᤹ ᤐᤠ᤺ᤴᤜᤠ᤹ ᤕᤖᤡᤰ ᤘᤠ᤹ᤖᤥ॥ ᤂᤶᤒᤩᤠᤱ ᤕᤖᤡᤰ ᤐᤠ᤺ᤴᤜᤠ᤹ ᤔᤏᤠ᤺ᤸᤗᤧ ᤁᤢᤏᤧᤜᤡ ᤁᤢᤏᤡᤱᤘᤠ᤹ᤖᤧ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤔᤏᤠ ᤘᤠ᤹ᤖᤥ॥ ᤂᤧᤵᤛᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤂᤢᤶᤍᤡᤱ ᤁᤧᤒᤡᤖ ᤐᤳᤗᤥ ᤁᤖ ᤂᤧᤏᤧ᤹ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱᤏᤢ᤺ᤸᤗᤧ ᤛᤢ᤺ᤸᤗᤡᤰᤗᤰ ᤂᤢᤶᤍᤡᤱ ᤁᤧᤒᤡᤖᤥ॥

⁷ ᤌᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤒᤡ᥅ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤶᤗᤠᤒᤧᤸᤗᤧ ᤁᤢᤏᤢᤵᤔᤧᤴ ᤁᤧᤏᤡᤛᤢᤀᤠᤱ ᤁᤧᤘᤠ᤹ᤒᤡ᥅

⁸ ᤂᤧᤱᤃ ᤛᤠᤱᤃᤪᤠᤶᤐᤣᤍᤠᤱᤏᤢ᤺ᤸᤗᤧ ᤁᤣ᤺ᤶᤒᤠ ᤆᤥᤰᤗᤥ. ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤁᤧᤛᤢᤰᤋᤢᤒᤣ᥅ ᤂᤧᤱᤃ ᤂᤧᤔᤠᤍᤡᤱ ᤕᤱᤛᤱᤏᤢ᤺ᤸᤗᤧ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠ ᤆᤥᤰᤗᤥ. ᤂᤧᤏᤧ᤹ ᤌᤣ ᤏᤡᤔᤠ ᤁᤧᤛᤢᤰᤋᤢᤒᤣ᥅

⁹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤶᤔᤠ ᤁᤢᤃᤣ᤺ᤶᤔᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤏᤢ᤺ᤸᤗᤧ ᤕᤶᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤘᤖ᤺ᤱᤏᤢ᤺ᤸᤗᤧ ᤑᤧᤓᤧᤒᤠ ᤆᤥᤰᤗᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤍᤧᤶᤔᤠᤱ ᤋᤢᤕᤧᤴ ᤏᤠᤶᤗᤠ ᤁᤧᤃᤢ᤺ᤳᤋᤡᤸᤗᤧ ᤜᤠ᤺ᤳᤗᤧ ᤂᤢᤏᤧ᤹ ᤛᤠᤰᤔᤠ ᤛᤢᤰᤋᤢᤒᤣ᥅

¹¹ ᤀᤠᤳᤋᤡᤴ ᤔᤏᤠᤜᤠ᤹ ᤜᤏᤧᤒᤠ ᤔᤧᤈᤥᤰ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤏᤡᤛᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤏᤡᤛᤢᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤂᤠᤖᤠᤳ ᤕᤢᤰᤂᤢᤖᤥ॥

¹² ᤋᤠᤶᤓᤢᤱ ᤀᤍᤱᤅᤡᤸᤗᤧ ᤔᤧᤴᤇᤠᤶᤛᤠ ᤌᤠᤵᤔᤠ ᤔᤧᤛᤢᤰᤋᤢᤸᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤍᤱ ᤔᤏᤠᤴ ᤆᤠ᤺ᤵᤐᤠ ᤐᤥᤱᤔᤠ ᤔᤧᤛᤢᤰᤏᤧᤸᤗᤥ॥

¹³ ᤀᤕᤢᤒᤣ. ᤁᤧᤛᤡᤰᤗᤢᤱᤔᤠᤴ ᤏᤢᤒᤠ ᤆᤥᤃᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤂᤧᤏᤧ᤹ ᤜᤡᤛᤡᤅᤧ᤹ᤀᤥ॥

¹⁴ ᤁᤧᤜᤡᤶᤔᤥᤗᤠᤶᤒᤠ ᤋᤠᤵᤑᤧ᤺ᤶᤒᤠᤴ ᤗ᤺ᤳᤋᤧᤍᤣᤛᤧ᤹ᤀᤥ. ᤜᤧᤰᤁᤩᤠᤱ ᤗᤠᤕᤥᤴ ᤂᤧᤳᤋᤧᤍᤣᤛᤧ᤹ᤀᤥ॥

¹⁵ ᤂᤧᤒᤩᤠᤱ ᤛᤡᤖᤡᤱ ᤔᤧᤶᤔᤀᤣ ᤂᤧᤏᤧ᤹ ᤁᤧᤎᤧᤃᤣ᤺ᤰᤐᤧᤴ ᤆᤠᤱᤈᤠᤱ ᤔᤧᤵᤔᤠ ᤁᤧᤛᤢᤰᤋᤢᤖᤥ. ᤜᤧᤰᤁᤩᤠᤱ ᤐᤡᤍᤡ᤹ ᤔᤧᤸᤗ᤹ᤔᤏᤠ ᤏᤢ ᤔᤧᤱᤃᤡᤔᤏᤠᤒᤠ ᤁᤧᤒᤥᤱᤗᤥ॥

¹⁶ ᤜᤧᤰᤁᤩᤠᤱ ᤁᤠᤰ ᤁᤧᤕᤧᤳᤋᤢᤰᤂᤣᤜᤠ᤹ ᤂᤧᤏᤧ᤹ ᤏᤡᤱᤘᤠ᤹ ᤁᤧᤔᤢ᤺ᤳᤇᤢᤖᤥ ᤂᤧᤒᤩᤠᤱ ᤆᤫᤠ᤺ᤳᤋᤡᤴ ᤁᤢᤱᤒᤣ᤺ᤰᤐᤠ ᤜᤧᤰᤁᤣᤀᤣ ᤂᤧᤴ ᤐᤠ᤺ᤴᤏᤡᤴ ᤁᤧᤏᤡᤱᤘᤠ᤹ᤛᤢᤶᤔᤥ ᤔᤧᤍᤠᤏᤧᤴᤗᤥ॥

¹⁷ ᤂᤧᤏᤧ᤹ ᤁᤧᤜᤡᤱᤔᤴᤏᤡᤴ ᤗᤧᤴᤍᤡᤰᤐᤠ ᤏᤠᤶᤔᤡᤏᤢ᤺ᤸᤗᤧᤀᤠᤱ ᤛᤧᤍᤡᤍᤡᤱᤒᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤜᤡᤱᤔᤴᤏᤥᤒᤠ ᤂᤠᤃᤧᤎᤠᤶᤔᤠ ᤕᤧᤶᤜᤠ᤹ᤀᤠᤱ ᤋᤠᤏᤠᤶᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤁᤢᤀᤡᤛᤡᤰ ᤀᤥᤛᤣ᤺ᤴᤍᤠᤱ ᤐᤥᤱᤗᤥ॥

¹⁸ ᤂᤧᤏᤧ᤹ ᤁᤧᤖᤧᤰ ᤏᤡᤱᤛᤠᤱ ᤏᤢ ᤋᤠᤱᤛᤧ᤺ᤵᤔᤠ ᤁᤧᤄᤥᤛᤢᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤶᤒᤪᤠᤱ ᤏᤢ ᤏᤠ᤺ᤶᤛᤡᤱᤔᤠ ᤁᤧᤒᤡᤖᤥ॥

¹⁹ ᤂᤧᤏᤧ᤹ ᤏᤡᤱᤔᤡᤜᤠ᤹ᤏᤢ ᤁᤡᤔᤠ ᤕᤱᤔᤠ ᤔᤧᤒᤥᤱᤏᤧᤸᤗᤥ. ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ᤗᤠᤶᤒᤠ ᤁᤢᤓᤠ᤹ ᤂᤥᤔᤠ ᤔᤧᤃᤥ᤺ᤳᤋᤢᤖᤥ॥

²⁰ ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖᤥ ᤜᤧᤰᤁᤩᤠᤱ ᤁᤠᤰ ᤐᤡᤛᤠᤱ ᤂᤢᤏᤡ᤹ ᤔᤡᤰᤁᤡᤴ ᤔᤧᤜᤡᤛᤢᤖᤥ॥ ᤂᤧᤱᤜᤠ᤹ᤖᤧ ᤂᤧᤳᤇᤡᤱᤔᤠ ᤗᤠᤶ ᤀᤠᤳᤋᤠᤴᤏᤠᤱ ᤔᤧᤴᤏᤡᤛᤢᤴᤗᤥ. ᤂᤧᤱᤜᤠ᤹ᤖᤧ ᤗᤠᤶ ᤀᤥᤔᤧᤔᤧᤳᤋᤢᤒᤧᤱᤃ ᤛᤡᤔᤧᤸᤗᤰ ᤐᤥᤱᤗᤥ॥