ᤀᤕᤢᤒ 10 - LIFOTNT

¹ ᤀᤠᤱᤃᤠ᤹ ᤜᤡᤱᤔᤴᤏᤢ ᤆᤠ᤹ᤖᤡᤰ ᤀᤠᤕᤠᤶᤛᤡᤰᤂᤧᤀᤠᤱ ᤘᤠ᤹ᤀᤠᤖᤥ. ᤀᤠᤱᤃᤠ᤹ ᤀᤠᤍᤢᤰᤂᤣᤴ ᤀᤠᤏᤡᤱᤘᤠ᤹ᤀᤥ ᤔᤧᤴᤈᤡᤱᤅᤣ ᤋᤥ᤺ᤴᤍᤢᤱᤗᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤐᤠ᤺ᤳᤋᤠᤖᤥ॥

² ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤑᤥᤋᤩᤠᤒᤠ ᤔᤧᤀᤡ᤺ᤳᤋᤠᤱᤅᤡᤴᤏᤧ᤹ᤀᤥ᥄ ᤀᤠᤱᤃᤠ᤹ ᤀᤠᤀᤠᤵᤋᤡᤰ ᤌᤣ ᤘᤠ᤹᥅ ᤀᤥᤛᤣ᤺ᤴ ᤎᤠᤰᤋᤠᤱᤅᤧ᤹ᤀᤥ॥

³ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤁᤧᤈᤥᤃᤢᤒᤠ ᤔᤏᤠᤴ ᤜᤡᤗᤠᤵᤑᤢ ᤁᤧᤀᤡ᤺ᤳᤋᤢᤖᤥ. ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤐᤠ᤺ᤴᤏᤥ ᤂᤧᤏᤧ᤹ ᤁᤧᤍᤧᤴᤗᤥ. ᤀᤰᤋᤱᤒᤠ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠᤒᤠ ᤐᤥᤱᤔᤠ ᤌᤣ ᤂᤧᤏᤧ᤹ ᤁᤧᤗᤠ᤹ᤒᤡ᥅

⁴ ᤌᤣ ᤂᤧᤏᤧ᤹ᤀᤠᤱ ᤀᤠᤏᤡᤃᤣ ᤔᤧᤴᤇᤠᤶ ᤕᤠᤵᤔᤡ ᤜᤧᤰᤁᤣᤀᤣ ᤀᤥᤃᤧᤔᤒᤡ᥅ ᤏᤠᤛᤡᤱᤃᤧᤴ ᤌᤰᤗᤠᤀᤥᤒᤠ ᤔᤏᤠ ᤜᤧᤰᤁᤣ ᤌᤣ ᤂᤧᤏᤧ᤹ ᤀᤥᤃᤧᤔᤧᤳᤋᤢᤒᤡ᥅

⁵ ᤌᤣ ᤂᤧᤏᤧ᤹ ᤁᤧᤜᤡᤱᤔᤴᤏᤡᤴᤏᤠᤱ ᤀᤠᤏᤡᤃᤣ ᤜᤧᤰᤁᤣ ᤋᤠᤱᤛᤠ ᤆᤥ᤺ᤰᤐᤡ᥅ ᤀᤡᤃᤪ ᤂᤧᤏᤧ᤹ ᤁᤧᤎᤠ᤺ᤰᤁᤡᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤴ ᤜᤧᤰᤁᤣ ᤗ᤹ᤒᤡ᥅

⁶ ᤌᤣᤀᤠᤱ ᤂᤧᤏᤧ᤹ ᤀᤠᤱᤃᤠ᤹ ᤁᤧᤖᤧᤰ ᤀᤠᤗᤠᤕᤥᤜᤠ᤹ ᤁᤧᤕᤃᤢ ᤁᤧᤗ᤺ᤳᤋᤢᤒᤠᤒᤣ᥅ ᤌᤣᤀᤠᤱ ᤀᤠᤱᤃᤠ᤹ ᤁᤠᤰ ᤀᤠᤀᤠᤵᤋᤡᤰᤜᤠ᤹ ᤁᤧᤃᤥ᤺ᤳᤋᤢᤒᤠᤒᤣ᥅

⁷ ᤀᤠᤱᤃᤠ᤹ ᤑᤥᤋᤩᤠ ᤔᤣ᤺ᤴᤏᤣᤒᤠ ᤆᤥ᤺ᤰᤁᤠᤒᤠᤴ ᤂᤧᤏᤧ᤹ ᤁᤧᤏᤡᤛᤢᤖᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤀᤠᤱᤃᤠ᤹ ᤂᤧᤏᤧ᤹ᤗᤠᤶᤒᤠ ᤋᤠᤱᤛᤧ᤺ᤵᤔᤠ ᤔᤧᤛᤢᤰᤁᤠᤴᤗᤥ॥

⁸ ᤂᤧᤏᤧ᤹ ᤀᤠᤒᤠᤅᤣ ᤁᤧᤜᤢᤰᤁᤡᤸᤗᤧ ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤠᤱᤗᤥ. ᤜᤧᤰᤁᤩᤠᤱ ᤌᤰᤗᤠ ᤗᤡᤱᤃᤧᤴ ᤁᤧᤒᤡᤖᤠᤱᤗᤥ. ᤀᤠᤸᤗ ᤜᤠᤒᤠ ᤂᤧᤴ ᤜᤢᤰᤁᤡᤸᤗᤧ ᤁᤧᤔᤧᤱᤅᤠᤖᤥ॥

⁹ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤂᤧᤏᤧ᤹ ᤀᤠᤱᤃᤠ᤹ ᤂᤠᤶᤔᤡᤸᤗᤧ ᤁᤧᤈᤥᤃᤠᤱᤗᤥ॥ ᤌᤣ ᤀᤠᤸᤗ ᤂᤠᤶᤜᤡ᤺ᤰ ᤐᤥᤱᤅᤠᤖ ᤁᤧᤕᤢ᤺ᤳᤋᤠᤀᤠᤱ ᤂᤠᤶᤔᤥᤀᤣ ᤁᤧᤏᤢ᤺ᤰᤅᤠᤒᤠᤒᤡ᥅

¹⁰ ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤐᤠᤏᤢᤍᤡᤱ ᤀᤠᤶᤒᤠ ᤔᤢᤰᤛᤠᤶ ᤁᤧᤒᤡᤖᤢᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤐᤥ ᤀᤠᤱᤃᤠ᤹ ᤕᤶᤒᤠ ᤁᤧᤈᤥᤃᤠᤱᤗᤥ॥

¹¹ ᤂᤧᤏᤧ᤹ ᤕᤧᤵᤐᤠ ᤏᤢ ᤏᤧᤰᤛᤠ᤺ᤸᤗᤧ ᤁᤧᤈᤥᤃᤠᤱᤗᤥ ᤜᤧᤰᤁᤩᤠᤱ ᤂᤧᤴ ᤕᤧᤵᤐᤠᤜᤠ᤹ ᤏᤧᤰᤛᤠ ᤏᤢ ᤜᤥᤖᤡᤰᤐᤠᤸᤗᤧ ᤁᤧᤒᤴᤇᤢᤖᤥ॥

¹² ᤂᤧᤏᤧ᤹ ᤜᤡᤱᤔᤴ ᤁᤧᤒᤡᤖᤠᤱᤗᤥ ᤂᤧᤶᤒᤩᤠᤱ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤁᤧᤍᤢᤰᤋᤠᤱᤗᤥ॥ ᤂᤧᤏᤧ᤹ ᤕᤠᤖᤃᤧᤈᤥᤃᤠᤱᤅᤠᤱ ᤀᤠᤱᤃᤠ᤹ ᤋᤠᤱᤃᤧᤛᤧ᤺ᤵᤋᤠᤱᤗᤥ॥

¹³ ᤁᤖ ᤀᤠᤸᤗ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ ᤂᤧᤏᤧ᤹ᤃ ᤁᤠᤰ ᤕᤧᤶᤔᤥ ᤀᤠᤱᤃᤠ᤹ ᤛᤫᤠ᤺ᤳᤋᤠᤱ ᤔᤧᤱᤔᤠ ᤑᤠ᤹ᤀᤠᤱ ᤗᤠᤶ ᤀᤥᤃᤧᤔᤧᤳᤋᤢᤖ ᤁᤧᤘᤕᤧᤖᤥ॥

¹⁴ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤒᤡ ᤑᤠ᤹ᤀᤠᤱ ᤂᤧᤏᤧ᤹ ᤀᤠᤶᤓᤠ ᤀᤥᤃᤧᤔᤧᤳᤋᤠᤱᤅᤠᤱ ᤁᤧᤘᤕᤧᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤒᤠ ᤁᤢᤛᤡᤱᤅᤡᤸᤗᤧᤃ ᤗᤧᤵᤔᤡ ᤁᤧᤶᤒᤡᤖᤠᤅᤧᤴᤒᤠᤖᤥ॥

¹⁵ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱᤏᤢᤔᤧ᤺ᤴᤏᤣ ᤂᤧᤏᤧ᤹ ᤂᤢᤶᤍᤡᤱ ᤁᤧᤒᤡᤀᤠᤖᤥ. ᤁᤖ ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤆᤥᤃᤢᤱᤅᤡᤸᤗᤧ ᤌᤣᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤄᤥᤀᤠᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤠᤎᤩᤧᤖᤥ ᤜᤧᤰᤁᤩᤠᤱ ᤐᤵᤐᤪᤠ᤹ᤔᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤖᤥ॥

¹⁶ ᤀᤠᤱᤃᤠ᤹ ᤀᤠᤎ᤻ᤃᤣᤰ ᤑᤥ᤺ᤰᤂᤢᤱᤏᤧᤓᤃᤪ ᤂᤡᤖᤡᤱᤒᤠᤸᤗᤧ ᤛᤠ ᤏᤠ᤺ᤳᤋᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤐᤢᤒᤣᤗᤠᤵᤛᤠ ᤁᤧᤏᤠ᤺ᤳᤋᤠᤖᤥ॥ ᤀᤠᤱᤃᤠ᤹ ᤜᤠᤴᤋᤡ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤠᤱ ᤁᤧᤈᤥᤃᤢᤖᤥ॥

¹⁷ ᤂᤧᤏᤧ᤹ ᤛᤍᤠᤍᤡᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤢᤓᤠ ᤌᤣᤀᤡ ᤁᤢᤛᤱ ᤐᤠ᤺ᤴᤜᤠ᤹ ᤁᤧᤗ᤺ᤳᤋᤢᤖᤥ॥ ᤀᤠᤱᤃᤠ᤹ᤏᤢ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤛᤡᤰ ᤐᤥ᤺ᤰᤗᤏᤧᤖᤥ. ᤁᤢᤓᤠ ᤁᤢᤛᤱ ᤐᤖᤡᤰᤗᤧ ᤀᤠᤱᤃᤠ᤹ ᤂᤠ᤺ᤶᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠᤓᤧᤸᤗᤧᤛᤠᤱ ᤗᤠᤶ ᤀᤥᤃᤧᤔᤧᤳᤋᤢᤖ ᤁᤧᤘᤠ᤹ᤖᤥ॥

¹⁸ ᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣᤀᤠᤱ ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤔᤠ ᤁᤧᤒᤠᤱᤄᤠᤱᤒᤠᤀᤡᤖᤥ᥅ ᤀᤠᤳᤋᤡᤸᤗᤧᤀᤠᤱ ᤔᤧᤴᤏᤡᤀᤣ ᤀᤠᤱᤃᤠ᤹ ᤛᤡᤔᤠ ᤁᤧᤒᤥᤱᤒᤠ ᤘᤕᤧᤖᤥ॥

¹⁹ ᤀᤠᤱᤃᤠ᤹ ᤀᤠᤗᤠᤃᤡ ᤀᤠᤵᤑᤠᤸᤗᤧᤀᤠᤱ ᤛᤠᤔᤧᤘᤠ᤺ᤴᤇᤡᤱᤅᤠᤱᤅᤡᤸᤗᤧ ᤏᤢᤒᤠ ᤐᤥ᤺ᤰᤂᤧᤒᤠᤖᤥ॥ ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥᤗᤠᤶ ᤁᤢᤍᤥ᤺ᤵᤔᤠ ᤀᤡ᤺ᤵᤐᤢᤱᤅᤥ ᤔᤧᤒᤰᤂᤠᤱ ᤔᤧᤍᤣ᤹ᤖᤠᤱᤅᤡᤸᤗᤧ ᤏᤢᤖᤧᤒᤠᤖᤥ॥

²⁰ ᤌᤣ ᤀᤠᤱᤃᤠ᤹ ᤋᤠᤱᤛᤠ ᤀᤠᤎᤠ᤺ᤰᤁᤡᤴ ᤀᤠᤸᤗ ᤔᤧᤰᤔᤠ ᤔᤧᤈᤥ᤺ᤰᤏᤧᤶᤒᤡ᥅ ᤀᤠᤱᤃᤠ᤹ ᤕᤠᤵᤔᤡ ᤀᤠᤗᤧᤖᤧ᤹ᤀᤥ᥄ ᤁᤧᤏᤶᤒᤠ ᤁᤢᤓᤠ ᤕᤧᤴᤏᤥ ᤀᤠᤱᤃᤠ᤹ ᤛᤢᤰᤂᤣᤘᤠᤀᤥ ᤘᤠ᤹ᤔᤠ ᤂᤥᤛᤢᤱᤏᤡᤖᤥ॥

²¹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤸᤗ ᤜᤠᤖᤠᤀᤣ ᤐᤣ᤺ᤰᤁᤠᤖ ᤐᤳᤋᤠᤖᤥ ᤜᤧᤰᤁᤩᤠᤱ ᤔᤧᤏᤢ᤺ᤱᤅᤠᤴ ᤔᤧᤍᤠᤀᤠᤴᤗᤥ॥ ᤗᤳᤇᤠ ᤂᤠᤔᤠᤰᤔᤠᤸᤗᤧ ᤌᤡᤶᤛᤢᤒᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤌᤠᤛᤡᤱᤅᤠᤖᤥ॥

²² ᤔᤠᤰᤁᤧᤗ᤹ᤒᤠ. ᤔᤠᤰᤛᤡ᤺ᤱᤃᤩᤠᤵᤐᤠ ᤛᤠᤶᤔᤡ᤺ᤰᤂᤢᤱᤒᤠ ᤏᤢ ᤀᤠᤏᤠᤰᤏᤠᤰᤐᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤐᤣ᤺ᤰᤁᤠᤖᤥ. ᤂᤧᤵᤔᤥ ᤛᤧᤍᤡᤱᤍᤡᤱ ᤂᤠᤀᤥ᤺ᤵᤔᤠᤴᤏᤣ ᤂᤠᤃᤧᤎᤠᤶᤒᤠ ᤆᤥᤰᤗᤥ. ᤂᤧᤵᤔᤥᤀᤣ ᤀᤠᤱᤃᤠ᤹ ᤐᤣ᤺ᤰᤁᤠᤖ ᤐᤳᤋᤠᤖᤥ॥