ᤀᤕᤢᤒ 1 - LIFOTNT

ᤀᤕᤢᤒᤖᤧ ᤁᤢᤕᤧᤵᤗᤧᤰ

¹ ᤀᤢᤈ ᤗᤠᤈᤣ᤹ᤀᤥ ᤀᤕᤢᤒ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤧᤘᤠ ᤁᤧᤈᤥ᤺ᤰᤐᤠ ᤏᤢ ᤏᤛᤠ᤺ᤴᤛᤠᤒᤠ ᤘᤕᤧ॥ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤏᤢ ᤏᤢᤒᤠ ᤔᤏᤠ ᤘᤕᤧ ᤂᤧᤒᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤘᤕᤧ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤁᤧᤛᤧ᤺ᤵᤛᤡᤱᤒᤠ ᤆᤥᤃᤧ॥

² ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢᤛᤡ ᤏᤢ ᤁᤢᤛ᤻ᤛᤠ ᤔᤧᤴᤇᤢᤔᤠ ᤛᤢᤶᤛᤡ ᤔᤧᤘᤕᤧ॥

³ ᤂᤢᤏᤧ᤹ ᥍.᥆᥆᥆ ᤔᤧᤸᤗᤢᤰ ᤏᤢ ᥉.᥆᥆᥆ ᤀᤢᤔᤣ. ᥇.᥆᥆᥆ ᤐᤡᤳ. ᥋᥆᥆ ᤀᤍᤱᤜᤠ᤹ ᤁᤳᤋᤢᤛᤡ॥ ᤂᤢᤏᤧ᤹ ᤕᤖᤡᤰ ᤛᤧᤘᤠᤖᤥᤒᤠ ᤛᤧᤘᤠᤖᤥᤔᤠᤜᤠ᤹ ᤁᤳᤋᤢᤛᤡ॥ ᤋ᤹ᤀᤡ ᤏᤠᤱᤃᤧᤴ ᤐᤡᤛᤠᤱᤒᤠ ᤔᤏᤠᤜᤠ᤹ᤀᤥ ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤢ ᤕᤠᤱᤛᤠᤁᤢᤴᤎᤣᤛᤠᤒᤠ ᤘᤕᤧ॥

⁴ ᤀᤕᤢᤒᤖᤧ ᤁᤢᤛ᤻ᤛᤠᤜᤠ᤹ ᤔᤧᤍᤱᤛᤡᤱᤅᤠᤱ ᤜᤡᤶᤔᤥ ᤐᤠ᤺ᤸᤗᤥᤒᤠ ᤔᤧᤈᤩᤧᤖ ᤛᤠᤓ᤺ᤱᤈᤠ ᤔᤧᤒᤡᤛᤡᤱ॥ ᤂᤧᤴ ᤛᤠᤓ᤺ᤱᤈᤠᤀᤥ ᤁᤧᤖᤧᤰ ᤔᤧᤍᤩᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤛᤢᤶᤛᤡ ᤆᤣᤗᤡᤔᤠ ᤏᤢᤛᤠ᤹ᤜᤠ᤹ᤀᤠᤱ ᤛᤠᤓ᤺ᤱᤈᤠᤀᤥ ᤔᤧᤀᤢ᤺ᤳᤋᤢᤛᤡ॥

⁵ ᤛᤠᤓ᤺ᤱᤈᤠ ᤔᤧᤈᤒᤠ ᤕᤧᤴᤏᤡᤸᤗᤧ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤀᤕᤢᤒᤧᤴ ᤐᤥᤃᤧᤀᤠᤱ ᤀᤠᤒᤠᤅᤣ ᤁᤧᤖᤧᤰ ᤁᤢᤛ᤻ᤛᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤥ ᤔᤡᤎᤡᤱᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ ᤕᤠᤃᤧ॥ ᤂᤢᤏᤧ᤹ ᤜᤧᤰᤁᤣᤗ᤹ᤖᤡᤰ ᤀᤠᤒᤠᤅᤣ ᤁᤢᤛ᤻ᤛᤠᤜᤠ᤹ ᤛᤣᤛᤣᤛᤢᤳᤌᤥ ᤆᤥᤃᤢᤛᤡᤖ ᤘᤕᤧ॥ ᤁᤢᤛ᤻ᤛᤠᤜᤠ᤹ᤖᤧ ᤔᤧᤴᤏᤡ ᤔᤧᤴᤎᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤔᤧᤍᤣᤛᤢᤀᤠᤱ ᤗᤠᤕᤥ ᤗᤠᤛᤥᤳ ᤔᤧᤈᤥᤃᤢᤒᤡ ᤑᤠ᤹ᤀᤠᤱ ᤂᤢᤏᤧ᤹ ᤛᤣᤛᤣᤛᤢᤳᤌᤥ ᤆᤥᤃᤢᤛᤡᤖ ᤘᤕᤧ॥

ᤔᤠᤑᤧᤴᤛᤠᤶᤔᤡᤸᤗᤧ ᤀᤕᤢᤒᤧᤴ ᤜᤱᤛᤠ᤹ᤖᤢ

⁶ ᤌᤡᤰᤕᤠᤴ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤩᤧ᤺ᤸᤗᤧ ᤔᤠᤑᤧᤴᤛᤠᤶᤔᤡᤴᤏᤠᤱ ᤂᤧᤱᤜᤠ᤹ᤏᤢ ᤁᤧᤖᤧᤍᤩᤧ॥

⁷ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣᤀᤠᤱ ᤁᤧᤘᤕᤧ᥅” ᤔᤠᤑᤧᤴᤛᤠᤶᤔᤡᤸᤗᤧ ᤏᤢᤃᤵ ᤐᤡᤖᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤏᤠ ᤏᤢ ᤁᤳᤏᤠ ᤋᤠᤰᤁᤴᤏᤡ ᤘᤕᤠᤱ॥”

⁸ ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤣ᤺ᤴᤗᤠᤵᤋᤢ. “ᤌᤣ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤀᤕᤢᤒᤧᤴ ᤂᤧᤏᤧ᤹ ᤁᤧᤏᤡᤛᤢᤒᤡ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤧᤴ ᤜᤧᤰᤋᤱᤒᤠ ᤁᤢᤍᤥ᤺ᤵᤔᤠ ᤏᤢ ᤏᤢᤒᤠ ᤔᤏᤠ ᤜᤠ᤺ᤳᤋᤠᤱ ᤜᤥᤵ॥ ᤂᤧᤸᤗᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤀᤠ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤡᤰ ᤛᤧ᤺ᤵᤛᤡᤱᤅᤠᤱ ᤘᤠ᤹॥”

⁹ ᤔᤠᤑᤧᤴᤛᤠᤶᤔᤡᤸᤗᤧ ᤏᤢᤃᤵ ᤐᤡᤖᤢ. “ᤌᤣ ᤀᤕᤢᤒᤖᤧ ᤌᤣᤏᤠᤎᤣ ᤂᤧᤏᤧ᤹ ᤛᤣᤛᤣ ᤔᤠᤱᤛᤧᤘᤠ ᤁᤧᤔᤧᤵᤐᤡ᥅

¹⁰ ᤛᤍᤠᤍᤡᤱ ᤂᤧᤸᤗᤧ ᤁᤢᤜᤡᤶᤛᤕᤱ ᤏᤢ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤏᤧ᤹ ᤁᤶᤒᤪᤠᤱ ᤁᤧᤔᤧᤳᤋᤢᤀᤠᤱ ᤘᤠ᤹॥ ᤂᤧᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤢᤀᤠᤱ ᤁᤠᤰ ᤗᤠᤈᤣᤴ ᤛᤡᤍᤧᤵ ᤋᤧᤵᤋᤢᤖ ᤐᤡᤳᤌᤰᤛᤠᤜᤠ᤹ ᤁᤧᤒᤡᤖᤢᤀᤠᤱ ᤘᤠ᤹॥

¹¹ ᤁᤖ ᤂᤧᤸᤗᤧ ᤁᤧᤖᤧᤰ ᤁᤧᤈᤡᤃᤰᤘᤠᤜᤠ᤹ ᤏᤠᤵᤋᤧ ᤛᤠ᤹ᤖᤧ. ᤂᤧᤸᤗᤧ ᤂᤧᤏᤧ᤹ ᤁᤧᤍᤃᤡᤀᤣ ᤔᤠᤱᤍᤣ ᤛᤠᤱᤃᤪᤠ ᤁᤧᤔᤧᤳ᥄”

¹² ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤧᤳᤋᤢ. “ᤀᤥᤰ ᤏᤢ᤹. ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤕᤢᤰᤁᤥ ᤐᤡᤏᤧ॥ ᤂᤧᤸᤗᤧ ᤁᤢᤎᤰᤁᤡᤴᤗᤰ ᤂᤧᤏᤧ᤹ ᤜᤢᤰ ᤔᤧᤕᤠᤰᤋᤧᤴᤏᤧ᤹॥” ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡᤗᤠᤶᤒᤠ ᤗ᤺ᤴᤍᤧᤀᤠᤱ ᤐᤣ॥

¹³ ᤌᤡᤰᤕᤧᤴ ᤀᤕᤢᤒᤖᤧ ᤁᤢᤛ᤻ᤛᤠ ᤋᤢᤶᤒᤠᤸᤗᤧ ᤁᤢᤜᤡᤶᤔᤥ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ᤖᤧ ᤛᤠ ᤏᤢ ᤌᤡ ᤔᤧᤈ ᤔᤧᤎᤢᤅᤢᤖ ᤔᤧᤕᤢᤅᤧ॥

¹⁴ ᤗᤳᤇᤠ ᤔᤏᤠᤎᤡᤰ ᤀᤰᤋᤱᤒᤠ ᤀᤡᤱᤄᤱ ᤋᤠᤖᤢᤀᤠᤱ ᤀᤕᤢᤒᤖᤥ ᤗᤥ᤺ᤰᤋᤧᤖ ᤋᤩᤧ. “ᤀᤠᤏᤡᤃᤣ ᤁᤧᤰᤆᤢ ᤌᤥᤱᤏᤢ ᤕᤠᤃᤡᤃᤧ. ᤏᤡ᤺ᤳᤋᤠᤱ ᤀᤍᤱᤜᤠ᤹ᤀᤠᤱ ᤆᤠᤔᤧᤖᤠᤔᤧᤖ ᤔᤧᤘᤕᤧ॥

¹⁵ ᤛᤒᤡ ᤔᤧᤵᤔᤏᤠᤒᤠ ᤛᤢᤘᤠᤱᤜᤠ᤹ᤖᤧ ᤆᤡᤓᤳ ᤔᤧᤓᤳᤋᤡᤃᤧ ᤜᤧᤰᤁᤩᤠᤱ ᤂᤧᤴ ᤌᤰᤛᤠᤜᤠ᤹ ᤔᤧᤍᤣ᤹ᤖᤢᤛᤡ॥ ᤘᤣ᤹ ᤁᤧᤖᤧᤰ ᤁᤧᤛᤧᤘᤠᤖᤥᤒᤠᤜᤠ᤹ ᤔᤧᤛᤧᤖᤢᤛᤡ॥ ᤀᤠᤱᤃᤠ᤹ᤖᤰ ᤂᤧᤳᤇᤡᤱᤅᤠᤀᤠᤱ ᤂᤧᤏᤧ᤹ ᤀᤡᤱᤄᤱ ᤐᤡᤔᤠᤖᤧ ᤗᤠᤃᤡ ᤁᤧᤖᤠᤱ ᤋᤩᤠᤱ॥”

¹⁶ ᤂᤧᤸᤗᤧ ᤐᤠ᤺ᤳᤋᤢᤖ ᤐᤳᤇᤧᤸᤗᤧ ᤘᤣ᤹ᤛᤔᤠ ᤛᤧᤘᤠᤖᤥᤒᤠᤴ ᤑᤧᤖᤧᤀᤠᤱ ᤐᤠ᤺ᤳᤋᤢ. “ᤔᤧᤸᤗᤢᤰᤜᤠ᤹ ᤏᤢ ᤔᤧᤸᤗᤢᤰᤁᤶᤒᤠᤜᤠ᤹ ᤛᤣᤖᤡ᤺ᤸᤗᤧ ᤂᤧᤖᤢ ᤛᤧᤖᤢᤛᤡ॥ ᤂᤧᤏᤧ᤹ ᤀᤡᤱᤄᤱ ᤐᤡᤔᤠᤖᤧ ᤗᤠᤃᤡ ᤀᤠᤱᤃᤠ᤹ᤖᤰ ᤜᤡᤅᤠᤱᤅᤠᤱ ᤋᤩᤠᤱ॥”

¹⁷ ᤂᤧᤸᤗᤧ ᤐᤠ᤺ᤵᤔᤠᤀᤣ ᤔᤧᤴᤇᤢ᤺ᤳᤋᤣ ᤘᤣ᤹ᤛᤔᤠ ᤛᤧᤘᤠᤖᤥᤒᤠᤴ ᤋᤩᤧᤀᤠᤱ ᤐᤠ᤺ᤳᤋᤢ. “ᤁᤢᤗᤢᤵ ᤛᤢᤶᤛᤡ ᤁᤸᤍᤡ ᤂᤢᤴᤍᤪᤡ᤺ᤰᤐᤠᤜᤠ᤹ᤖᤧ ᤀᤠᤏᤡᤃᤣ ᤆᤡᤓᤳ ᤔᤧᤓᤳᤋᤡᤃᤧ ᤜᤧᤰᤁᤩᤠᤱ ᤀᤢᤔᤣᤜᤠ᤹ ᤔᤧᤏᤠᤵᤋᤡᤃᤧᤀᤠᤱ ᤔᤧᤍᤣ᤹ᤖᤢᤛᤡ॥ ᤀᤠᤱᤃᤠ᤹ᤖᤰ ᤋᤠᤅᤠᤱᤅᤠᤱ ᤘᤣ᤹ ᤁᤧᤖᤧᤰ ᤁᤧᤛᤧᤘᤠᤖᤥᤒᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤛᤧᤖᤢᤛᤡ॥ ᤂᤧᤏᤧ᤹ ᤀᤡᤱᤄᤱ ᤐᤡᤔᤠᤖᤧ ᤗᤠᤃᤡ ᤁᤧᤍᤠᤱᤒᤠᤀᤠᤱ ᤁᤧᤍᤠᤒᤠ ᤀᤠᤱᤃᤠ᤹ᤖᤰ ᤐᤥ᤺ᤰᤂᤠᤱ॥”

¹⁸ ᤂᤧᤴᤏᤠᤱ ᤐᤠᤖᤧᤖ ᤐᤳᤇᤧᤸᤗᤧ ᤘᤣ᤹ᤛᤔᤠ ᤛᤧᤘᤠᤖᤥᤒᤠᤴ ᤋᤩᤧᤀᤠᤱ ᤐᤠ᤺ᤳᤋᤢ. “ᤂᤧᤏᤧ᤹ ᤁᤧᤛ᤻ᤛᤠ ᤋᤢᤶᤒᤠᤸᤗᤧ ᤁᤢᤜᤡᤶᤔᤥ ᤁᤧᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ᤖᤧ ᤛᤠ ᤏᤢ ᤌᤡ ᤔᤧᤈ ᤔᤧᤎᤢᤅᤢᤖ ᤔᤧᤕᤢᤅᤧ॥

¹⁹ ᤂᤧᤴ ᤕᤧᤶᤔᤥ ᤕᤧ᤺ᤱᤄᤠᤍᤧᤴᤏᤥᤗᤠᤶ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱ ᤜᤢᤖᤧᤍᤩᤧᤀᤠᤱ ᤜᤡᤶᤔᤡᤴ ᤕᤛ᤻ᤛᤢᤸᤗᤧ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤁᤧᤖᤧᤰ ᤜᤍ᤹ ᤔᤧᤛᤩᤧ॥ ᤂᤧᤏᤧ᤹ ᤀᤡᤱᤄᤱ ᤐᤡᤔᤠᤖᤧ ᤗᤠᤃᤡ ᤀᤠᤱᤃᤠ᤹ᤖᤰ ᤜᤡᤅᤠᤱ॥”

²⁰ ᤂᤧᤴ ᤁᤧᤖᤧᤰ ᤂᤧᤵᤛᤢᤀᤠᤱ ᤀᤕᤢᤒᤧᤴ ᤐᤥᤃᤧ ᤜᤧᤰᤁᤩᤠᤱ ᤔᤡᤱᤘᤠ᤺ᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤖ ᤀᤠᤒᤠᤅᤣ ᤁᤢᤈᤠᤱᤋᤣ᤺ᤳᤋᤡᤴ ᤋᤧᤖᤧᤰ ᤌᤧ᤺ᤰᤂᤢ॥ ᤂᤢᤏᤧ᤹ ᤁᤢᤎᤧᤃᤣᤰᤐᤠᤴ ᤏ᤺ᤰᤂᤢᤀᤠᤱ ᤂᤠᤶᤔᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤔᤠᤱᤛᤧᤘᤠ ᤆᤥᤃᤧ॥

²¹ ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥᤗᤠᤶ ᤗᤧᤰᤆᤠ᤹ᤒᤧᤎᤡᤰ ᤋᤩᤠᤱᤗᤥ ᤜᤧᤰᤁᤩᤠᤱ ᤗᤧᤰᤆᤠᤒᤧᤎᤡᤰᤁᤣ ᤀᤠᤱᤃᤠ᤹ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤠᤱᤗᤥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤋᤣ᤹ᤖᤢᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤥᤱᤗᤖᤥ᥄”

²² ᤁᤴ ᤁᤧᤖᤧᤰ ᤐᤥ᤺ᤰᤂᤧᤛᤠᤱ ᤀᤕᤢᤒᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠ᤺ᤴᤔᤧᤎᤡᤰᤋᤢᤴ ᤜᤧᤰᤁᤩᤠᤱ ᤗᤠᤕᤥ ᤔᤧᤈᤥᤃᤢᤴᤗᤥ॥