ᤕᤷᤔᤡᤕᤠ 52 - LIFOTNTᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤔᤧᤃᤧ ( ᥈ ᤜᤠᤱ ᥈᥊:᥇᥎–᥈᥋:᥍ ) 1 ᤛᤡᤍᤁᤡᤕᤠᤜ᤺ᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤁᤧᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤜᤔᤢᤋᤗ ᤘᤕᤧ. ᤂᤧᤴ ᤗᤡᤒ᤻ᤏᤠ ᤁᤧᤕᤢᤱᤒᤠ ᤕᤷᤔᤡᤕᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 2 ᤁᤖ ᤕᤜᤥᤕᤠᤁᤡᤔᤖᤧ ᤆᤥᤃᤢᤀᤠᤱ ᤘᤕᤧᤒᤠ ᤜᤧᤰᤁᤣᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤛᤡᤍᤁᤡᤕᤠᤜ᤺ᤸᤗᤧᤀᤠᤱ ᤑᤧᤴᤕᤠ᤺ᤶᤒᤰ ᤆᤥᤃᤢ॥ 3 ᤕᤖᤢᤛᤗᤧᤔ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤆᤥᤃᤢᤸᤗᤧ. ᤁᤢᤏᤢᤵᤔᤥ ᤂᤢᤏᤧ᤹ ᤁᤢᤍᤃᤡᤗᤠᤶ ᤂᤧᤱᤜᤠ᤹ ᤘᤣ᤹ ᤗᤠᤈᤣ᤹ᤀᤥ ᤔᤧᤗ᤺ᤳᤋᤢᤴ ᤔᤧᤍᤣᤛᤢᤛᤡᤴᤗ ᤜᤧᤰᤁᤩᤠᤱ ᤔᤧᤴᤍᤧᤶᤛᤢᤴ ᤔᤧᤴᤍᤣ᤹ᤖᤢᤛᤡᤴᤗ ᤌᤠᤖᤡᤰ ᤁᤴ ᤐᤠ᤺ᤴᤜᤠ᤹ ᤐᤥ᤺ᤰᤂᤧ॥ ᤛᤡᤍᤁᤡᤕᤠᤜ᤺ᤸᤗᤧ ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥᤃᤢ॥ 4 ᤂᤧᤸᤗᤧᤆᤥᤃᤢᤸᤗᤧ ᤛᤡᤍᤁᤡᤕᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤑᤠᤱᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤌᤡᤒᤥᤱ ᤗᤠ ᤁᤧᤖᤧᤒᤠ ᤌᤡᤒᤥᤱ ᤕᤧᤴᤏᤥ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤑᤧᤳᤋᤢᤛᤡᤀᤠᤱ ᤑᤧᤖᤧ॥ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤁᤡᤷᤃᤵ ᤔᤧᤃᤒᤢ ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ ᤗᤢ᤺ᤶᤔᤠᤖᤧ ᤗᤠᤃᤡ ᤆᤴᤈᤶᤒᤠᤍᤧᤴᤜᤠ᤹ ᤔᤧᤈᤥᤃᤢ॥ 5 ᤛᤡᤍᤁᤡᤕᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤌᤧᤶᤒᤠ ᤕᤧᤰᤕᤰᤁᤡᤴ ᤔᤧᤃᤒᤢᤀᤠᤱ ᤏᤧᤛ᤻ᤛᤧ॥ 6 ᤛᤡᤍᤁᤡᤕᤠᤜᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤗᤠᤀᤥᤒᤠ ᤑᤠᤱᤛᤡᤃᤣᤰᤐᤠ ᤕᤧᤴᤏᤥ ᤕᤧᤰᤕᤰᤁᤥ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤐᤥᤃᤧᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤆᤠᤜᤠ᤹ ᤁᤧᤖᤧᤰ ᤔᤠᤖᤧᤀᤠᤱ ᤜᤥ᤺ᤵᤋᤧ॥ 7 ᤂᤧᤒᤩᤠᤱ ᤕᤧᤰᤕᤰᤁᤥᤒᤠ ᤁᤢᤕᤠᤎᤡᤰ ᤗᤢᤱᤎᤠᤰᤜᤠ᤹ ᤐᤢᤖᤢ᤺ᤱ ᤗᤢ᤺ᤴᤍᤧᤒᤣ. ᤜᤧᤰᤁᤩᤠᤱ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤔᤧᤄᤧᤳᤇᤡᤱ ᤔᤧᤄᤧᤖᤧ॥ ᤒᤣᤒᤡᤗᤥᤏᤡᤜᤠ᤹ᤖᤧ ᤕᤧᤰᤕᤰᤁᤡᤴ ᤔᤧᤃᤒᤢᤀᤠᤱ ᤏᤧᤛ᤻ᤛᤧᤀᤠᤱᤎᤥᤀᤣ. ᤂᤧᤱᤜᤠᤖᤧ ᤛᤧᤴᤍᤡᤰ ᤂᤠᤎᤠᤶᤔᤠᤴ ᤔᤧᤜᤠᤱᤄᤢᤀᤠᤱ ᤘᤕᤧ॥ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤓᤢᤱᤀᤡᤰ ᤀᤣᤃᤠᤱ ᤗᤧᤵᤔᤠᤱᤒᤠ ᤏᤠᤜᤠᤱ ᤁᤳᤏᤠᤜᤠᤱ ᤏᤧᤳᤇᤡ ᤗᤢᤱᤎᤠᤰᤜᤠ᤹ᤖᤧ ᤁᤢᤗᤢᤶᤔᤥᤒᤠ ᤋᤠ᤺ᤰᤜᤴᤏᤥᤗᤠᤶ ᤂᤧᤱᤜᤠ᤹ ᤔᤧᤓᤡ᤺ᤴᤇᤡᤱ ᤔᤧᤒᤣ ᤜᤧᤰᤁᤩᤠᤱ ᤕᤷᤍᤏ ᤗᤧᤵᤔᤠᤱᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤎᤠᤛᤡᤱ ᤔᤧᤒᤣ॥ 8 ᤁᤖ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤛᤡᤍᤁᤡᤕᤠᤜ ᤜᤠᤱᤅᤡᤴ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤕᤖᤡᤜᤥᤒᤠ ᤋᤧᤶᤒᤣ᤹ᤀᤥ ᤂᤢᤏᤧ᤹ ᤔᤧᤍᤧᤶᤛᤢ॥ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤗᤧᤖᤢᤀᤠᤱ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧ ᤔᤧᤒᤣᤀᤠᤱ ᤔᤧᤘᤕᤧ॥ 9 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤜᤔᤠᤋ ᤗᤠᤈᤣ᤹ᤒᤠ ᤖᤡᤒ᤻ᤗᤠᤀᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤥ ᤔᤧᤍᤣ᤹ᤖᤢ॥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤵᤔᤥᤀᤣ ᤛᤡᤍᤁᤡᤕᤠᤜ᤺ᤴ ᤂᤠᤛᤧᤴ ᤗᤥ᤺ᤶᤔᤠ ᤀᤢᤘᤠ ᤆᤥᤃᤢ॥ 10 ᤖᤡᤒ᤻ᤗᤠᤀᤥ ᤛᤡᤍᤁᤡᤜ᤺ᤸᤗᤧ ᤁᤢᤔᤡᤰᤗᤧ ᤏᤡᤛᤢᤖᤀᤣ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤛᤧᤖᤢᤛᤡ. ᤜᤧᤰᤁᤩᤠᤱ ᤕᤜᤢᤍᤠᤒᤠ ᤘᤣ᤹ ᤁᤧᤖᤧᤰ ᤛᤢᤜᤠᤱᤃᤧᤶᤒᤠᤜᤠ᤹ᤀᤠᤱ ᤂᤧᤸᤗᤧ ᤛᤧᤖᤢᤛᤡ॥ 11 ᤂᤧᤒᤩᤠᤱ ᤛᤡᤍᤁᤡᤕᤠᤜᤖᤧ ᤁᤢᤔᤡᤰᤜᤠ᤹ ᤗᤡᤃᤰ ᤗ᤺ᤳᤋᤢᤍᤣᤛᤢ ᤐᤡᤖᤢ. ᤁᤠᤛᤠ ᤌᤰᤁᤪᤱᤅᤡᤸᤗᤧ ᤀᤡᤄᤣ᤺ᤰᤂᤢᤀᤠᤱ ᤒᤣᤒᤡᤗᤥᤏᤀᤥ ᤋᤡ᤺ᤰᤋᤢᤍᤣ᤹ᤖᤢ॥ ᤛᤡᤍᤁᤡᤕᤠᤜ᤺ᤴ ᤁᤢᤛᤡᤔᤠ ᤕᤧᤴ ᤌᤠᤖᤡᤰ ᤒᤣᤒᤡᤗᤥᤏᤒᤠ ᤐᤢᤱᤗᤠᤜᤡᤶᤔᤥᤀᤣ ᤕᤠᤃᤧᤖᤥ॥ ᤔᤠᤱᤜᤡᤶᤔᤡᤴ ᤔᤧᤃᤧᤒᤠ ( ᥈ ᤜᤠᤱ ᥈᥋:᥎-᥇᥍ ) 12 ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤅᤠᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤒᤥᤱ ᤕᤧᤴᤏᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤃᤧᤶᤒᤠ ᤌᤰᤔᤥᤒᤠ ᤏᤒᤢᤈᤖᤍᤠᤏ ᤁᤶᤒᤪᤠᤱᤒᤠᤴ ᤕᤖᤢᤛᤗᤧᤔᤀᤥ ᤁᤧᤖᤧᤓᤧᤖᤧ॥ 13 ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤒᤠ ᤁᤧᤖᤧᤰ ᤜᤡᤶᤜᤠ᤹ᤀᤥ ᤔᤡᤓᤠ᤺ᤳᤋᤪᤠ ᤁᤣ᤺ᤳᤋᤢ॥ ᤁᤧᤖᤧᤰ ᤕᤶᤒᤕᤶᤒᤠ ᤁᤧᤕᤧᤰᤐᤠ ᤜᤡᤶᤜᤠ᤹ ᤂᤢᤏᤧ᤹ ᤔᤡᤎᤡᤰᤂᤢᤍᤣᤛᤢ॥ 14 ᤂᤧᤒᤩᤠᤱ ᤕᤖᤢᤛᤗᤧᤔᤒᤠ ᤁᤠᤰ ᤐᤡᤛᤠᤱᤒᤠ ᤗᤢᤱᤎᤠᤰᤜᤠ᤹ ᤒᤣᤒᤡᤗᤥᤏᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤗᤢ᤺ᤴᤍᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤁᤧᤖᤧᤰ ᤗᤠᤶᤗᤥᤔᤠᤛᤡ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧ॥ 15 ᤂᤧᤒᤩᤠᤱ ᤁᤶᤒᤪᤠᤱᤒᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ ᤕᤧᤰᤕᤰᤁᤥ ᤁᤢᤓᤠ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤏᤢ ᤁᤧᤖᤧᤰᤏᤢ᤺ᤸᤗᤧ ᤕᤠᤱᤃᤧᤛᤠ᤹ᤒᤠ. ᤂᤢᤴᤇᤡ᤹ ᤛᤠᤰᤌᤡᤶ ᤁᤧᤗᤧᤵᤐᤠᤀᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤗᤧᤵᤔᤠᤱ ᤁᤧᤒᤵᤐᤠ ᤔᤏᤠᤜᤠ᤹ ᤏᤢ ᤘᤣ᤹ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤆᤥᤒᤣᤃᤢᤜᤠ᤹ ᤋᤧᤶᤛᤢᤍᤣ᤹ᤖᤢᤛᤡ॥ 16 ᤁᤖ ᤏᤒᤢᤈᤖᤍᤠᤏᤖᤧ ᤁᤢᤓᤠ ᤛᤠ᤹ᤖᤡᤰ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤏᤢ ᤀᤡᤰᤋᤠᤵᤜᤠ᤹ᤀᤥ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤢᤍᤠᤀᤥᤀᤣ ᤘᤠ᤹ᤔᤠ ᤕᤠ᤺ᤰᤔᤠ ᤑᤠ᤺ᤰᤋᤢᤛᤡ॥ 17 ᤒᤣᤒᤡᤗᤥᤏᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤋᤃᤡ ᤁᤧᤕᤧᤵᤐᤠ ᤁᤠᤛᤠ ᤛᤡᤳᤗᤠᤱᤜᤠ᤹. ᤆᤫᤠ᤺ᤳ ᤀᤢ᤺ᤱᤔᤠ ᤁᤠᤛᤠ ᤗᤠᤎᤠᤜᤠ᤹ ᤏᤢ ᤘᤠᤜᤵᤛᤡᤱᤔᤠ ᤛᤠ᤹ᤖᤡᤰ ᤕᤶᤒᤠ ᤆᤫᤠ᤺ᤳ ᤕᤠᤱᤔᤠ ᤁᤠᤛᤠ ᤑᤛᤡᤴ ᤑᤕ᤺ᤵᤑᤕ᤺ᤵ ᤔᤧᤕ᤺ᤵᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤖᤧᤰ ᤁᤠᤛᤠᤜᤠ᤹ ᤒᤣᤒᤡᤗᤥᤏᤀᤥ ᤔᤧᤃᤢᤕᤢ ᤔᤧᤍᤣ᤹ᤖᤢ॥ 18 ᤂᤧᤱᤜᤠ᤹ᤖᤧ ᤂᤠᤵᤐᤢ ᤕᤠᤱᤔᤠ ᤂᤵᤐᤩᤠᤜᤠ᤹. ᤂᤷᤆᤢᤜᤠ᤹. ᤛᤣᤔᤡ ᤜᤠ᤺ᤶᤔᤠᤜᤠ᤹. ᤘᤠᤜᤵᤛᤡᤱᤔᤠ ᤂᤵᤐᤩᤠᤜᤠ᤹. ᤛᤠᤔᤠ ᤐᤢᤔᤠᤜᤠ᤹ ᤏᤢ ᤔᤠᤱᤜᤡᤶᤔᤥ ᤛᤡᤍᤢᤱᤈᤓᤠ ᤆᤥ᤺ᤰᤔᤧᤸᤗᤧ ᤕᤠᤱᤔᤏᤠᤒᤠ ᤁᤧᤖᤧᤰ ᤁᤠᤛᤠ ᤛᤠᤔᤠᤐᤢᤔᤠᤜᤠ᤹ᤀᤠᤱ ᤔᤧᤍᤣ᤹ᤖᤢ॥ 19 ᤌᤰᤔᤥᤒᤠ ᤁᤶᤒᤪᤠᤱᤒᤠ ᤏᤒᤢᤈᤖᤍᤠᤏᤖᤧ ᤆᤢᤈᤢᤰᤛᤠ ᤇᤧ᤺ᤱᤃᤩᤠᤜᤠ᤹. ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱᤜᤠ᤹. ᤘᤠᤜᤵᤛᤡᤱᤔᤠ ᤑᤛᤡᤜᤠ᤹. ᤂᤵᤐᤩᤠᤜᤠ᤹. ᤛᤣᤔᤡᤕᤢᤱᤍᤧᤴᤜᤠ᤹. ᤛᤠᤔᤠᤐᤢᤔᤠᤜᤠ᤹. ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤕᤠᤱᤔᤏᤠᤒᤠ ᤇᤧ᤺ᤱᤃᤩᤠᤜᤠ᤹. ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤏᤢ ᤕᤢᤵᤐᤠᤗᤠᤶ ᤌᤰᤔᤏᤠᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ᤀᤠᤱ ᤋᤣ᤹ᤖᤢ॥ 20 ᤏᤧᤳᤇᤡ ᤛᤡᤳᤗᤠᤱᤜᤠ᤹ᤗᤠᤶ ᤁᤧᤗᤡ᤺ᤵᤐᤠ ᤁᤠᤛᤠ ᤁᤢᤎᤠᤱᤔᤠ. ᤁᤢᤛᤡᤃᤠᤱ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤠᤛᤠ ᤛᤧᤃᤶᤒᤠᤜᤠ᤹ᤏᤢ ᤛᤥᤖᤡᤰᤐᤠ ᤛᤠ᤹ᤖᤡᤰ ᤕᤶᤒᤠ ᤆᤫᤠ᤺ᤳ ᤕᤠᤱᤔᤠ ᤁᤠᤛᤠ ᤑᤛᤡᤴ. ᤜᤧᤰᤁᤩᤠᤱ ᤆᤫᤠ᤺ᤳ ᤀᤢ᤺ᤱᤔᤠ ᤗᤠᤎᤠᤜᤠ᤹ᤀᤠᤱ ᤌᤠᤱᤔᤠᤖᤧ ᤗᤠᤃᤡ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤆᤥᤃᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤛᤥᤗᤥᤔᤏᤖᤧ ᤁᤢᤕᤧᤶᤔᤥ ᤁᤴ ᤆᤡᤃᤰᤘᤠᤜᤠ᤹ ᤔᤧᤈᤥᤃᤢᤀᤠᤱ ᤘᤕᤧ॥ 21 ᤛᤡᤳᤗᤠᤱᤜᤠ᤹ᤖᤧ ᤁᤢᤗᤡᤱᤃᤧᤴ ᤕᤧᤳᤇᤡ ᤔᤡᤋᤖ ᤕᤠᤖᤡᤰ ᤁᤣ᤺ᤶᤒᤠ ᤆᤥᤃᤧ ᤜᤧᤰᤁᤩᤠᤱ ᤁᤒᤪᤡᤱᤒᤠ ᤁᤢᤗ᤺ᤵᤗᤠ᤺ᤴ ᥋:᥉ ᤔᤡᤋᤖ ᤕᤥᤖᤧ॥ ᤂᤧᤱᤜᤠ᤹ ᤁᤢᤜᤥ᤺ᤴᤍᤪᤠ ᤁᤧᤒᤵᤐᤠ ᤀᤠᤀᤡᤆᤡ ᤛᤢᤶᤛᤡ ᤕᤠᤖᤡᤰ ᤁᤧᤎᤢᤱᤒᤠ ᤆᤥᤃᤧ॥ 22 ᤁᤧᤖᤧᤰ ᤛᤡᤳᤗᤠᤱᤜᤠ᤹ᤖᤧ ᤁᤢᤛᤶᤎᤠᤱᤒᤠ ᤁᤠᤛᤠ ᤔᤧ᤺ᤌᤜᤠ᤹ ᥈:᥈ ᤔᤡᤋᤖ ᤁᤣ᤺ᤶᤒᤠ ᤔᤧᤃᤠᤶᤛᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤒᤪᤡᤱ ᤐᤡᤛᤠᤱ ᤁᤠᤛᤠ᤺ᤸᤗᤧᤴ ᤑᤢ᤹ᤗᤧᤛᤣ᤹ ᤁᤧᤓᤛᤡᤱᤒᤠ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧ॥ 23 ᤁᤢᤕᤠ ᤁᤢᤕᤠᤀᤥ ᤑᤠᤱᤒᤥᤱᤅᤠᤱ ᤋᤢᤰᤛᤡ ᤑᤢ᤹ᤗᤧᤛᤣ᤹ ᤐᤳᤇᤧ. ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱ ᤁᤧᤓᤛᤡᤱᤒᤠᤸᤗᤧ ᤁᤢᤛᤶᤎᤠᤱ ᤁᤧᤖᤧᤰᤗᤧ ᤁᤡᤵ ᤌᤡᤰ ᤐᤳᤇᤧ॥ 24 ᤁᤶᤒᤪᤠᤱᤒᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ. ᤂᤢᤏᤧ᤹ᤏᤢ ᤛᤥᤛᤥᤖᤡᤰ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤖᤠᤕᤠᤜ᤺ᤴ. ᤋᤠᤰᤑᤠ ᤏᤡᤛᤡᤃᤣᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤐᤏᤩᤠᤜ᤺ᤴ ᤏᤢ ᤛᤢᤶᤛᤡ ᤁᤢᤎᤧᤃᤣᤰ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤐᤢᤱᤗᤠᤎᤠᤒᤠ ᤜᤧᤰᤋᤱᤒᤠ ᤆᤥᤃᤢᤍᤣ᤹ᤖᤢᤛᤡ॥ 25 ᤜᤧᤰᤁᤩᤠᤱ ᤕᤧᤰᤕᤰᤁᤥ ᤀᤠᤸᤗᤛᤠᤱ ᤁᤧᤘᤠ᤹ᤒᤠᤜᤠ᤹ ᤗᤢᤶᤔᤥᤗᤠᤶ. ᤕᤜᤢᤍᤡ ᤌᤰᤛᤢᤒᤠᤜᤠ᤹ ᤀᤥᤃᤧᤔᤧᤵᤐᤠ ᤛᤢᤜᤠᤱᤃᤧᤶᤒᤠ ᤌᤡᤰ. ᤜᤠᤱᤅᤡᤸᤗᤧ ᤏᤢᤛᤡ ᤁᤢᤛᤢᤈᤠᤛᤠᤒᤠᤜᤠ᤹. ᤌᤰᤛᤢᤒᤠ ᤐᤥᤱᤔᤠᤖᤧ ᤗᤠᤃᤡ ᤁᤧᤜᤢ᤹ᤒᤠ ᤌᤰᤔᤥᤒᤠᤸᤗᤧ ᤔᤠ ᤁᤢᤛᤢᤜᤠᤱᤔᤡᤒᤠᤴ ᤏᤢ ᤘᤣ᤹ ᤋᤢᤰᤐᤥᤱ ᤕᤰᤕᤢᤱᤒᤠᤜᤠ᤹ ᤂᤢᤏᤧ᤹ ᤋᤣ᤹ᤖᤢᤛᤡᤀᤠᤱ ᤐᤣ॥ 26 ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤸᤗᤧ. ᤂᤧᤱᤜᤠ᤹ ᤁᤧᤖᤧᤰ ᤖᤡᤒ᤻ᤗᤠ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤥ ᤋᤣ᤹ᤖᤢᤛᤡ॥ 27 ᤜᤧᤰᤁᤩᤠᤱ ᤂᤧᤵᤔᤥ ᤜᤔᤠᤋ ᤗᤠᤈᤣ᤹ᤒᤠ ᤖᤡᤒ᤻ᤗᤠᤀᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤛᤧᤵᤔᤠ ᤐᤠᤱᤄᤢᤛᤡ॥ ᤀᤰᤂᤣᤗ᤹ᤖᤡᤰ ᤕᤜᤢᤍᤠᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤗᤠᤈᤣ᤹ᤗᤠᤶ ᤋᤧᤶᤔᤠ ᤋᤣ᤹ᤔᤠᤛᤡᤖᤧ ᤗᤠᤃᤡ ᤔᤧᤒᤠᤱᤄᤢᤛᤡ॥ 28 ᤏᤒᤢᤁᤍᤏᤣᤛᤖᤧᤸᤗᤧ ᤋᤧᤶᤛᤢ ᤋᤣ᤹ᤖᤢᤛᤡᤒᤠ ᤔᤏᤠ ᤂᤠᤏᤡ᤺ᤳᤋᤡᤴ ᤜᤠᤒᤠ ᤁᤴᤜᤠ᤹ᤖᤥ— ᤏᤢᤛᤡᤃᤣᤰᤐᤠ ᤋᤱᤒᤣᤀᤥ. ᥉.᥆᥈᥉ ᤕᤜᤢᤍᤠᤒᤠ ᤔᤏᤠᤜᤠ᤹. 29 ᤏᤒᤢᤁᤍᤏᤣᤛᤖᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤒᤥᤱᤅᤠᤱ ᤕᤧᤳᤇᤡᤃᤣᤰᤐᤠ ᤋᤱᤒᤣᤀᤥ ᤕᤖᤢᤛᤗᤧᤔᤗᤠᤶ ᤂᤢᤏᤧ᤹ ᤀᤠᤖᤛᤠᤱ ᤕᤖᤡᤰ ᥎᥉᥈ ᤔᤏᤠᤜᤠ᤹ ᤋᤧᤶᤛᤢᤍᤣ᤹ᤖᤢᤛᤡ॥ 30 ᤏᤒᤢᤁᤍᤏᤣᤛᤖᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤁᤶᤒᤪᤠᤱᤒᤠ ᤌᤰᤔᤥᤒᤠ ᤏᤒᤢᤈᤖᤍᤠᤏᤧᤴ ᤐᤠᤱᤄᤢ ᤑᤧᤴᤇᤢ. ᤂᤧᤸᤗᤧ ᤀᤠᤖᤛᤠᤱ ᤕᤖᤡᤰ ᥍᥊᥋ ᤕᤜᤢᤍᤠᤒᤠ ᤔᤏᤠᤜᤠ᤹ ᤋᤧᤶᤛᤢᤍᤣ᤹ᤖᤢᤛᤡ॥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤁᤧᤖᤧᤰᤗᤧ ᥊.᥌᥆᥆ ᤔᤧᤘᤕᤧᤖᤥ॥ ᤜᤠᤱ ᤜᤡᤶᤛᤕᤱᤗᤧ ᤗᤠᤃᤡ ᤀᤡᤛᤪᤠᤀᤡᤗᤖᤧ ᤁᤢᤏᤡᤱᤛᤠᤱ 31 ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤛᤢᤶᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣᤀᤥ. ᤀᤣᤒᤡᤗ-ᤔᤖᤥᤍᤁᤧᤴ ᤒᤣᤒᤡᤗᤥᤏᤒᤠ ᤜᤠᤱ ᤐᤥ᤺ᤰᤂᤧ॥ ᤂᤧᤸᤗᤧ ᤕᤜᤥᤕᤠᤁᤡᤏᤧᤴ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤧ ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤗᤠ᤺ᤸᤗᤧ ᤏᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤐᤢᤱᤗᤠᤜᤡᤶᤔᤥᤗᤠᤶ ᤗᤧᤖᤢ॥ 32 ᤂᤧᤸᤗᤧ ᤕᤜᤥᤕᤠᤁᤡᤏᤧᤴ ᤏᤢᤖᤡᤰ ᤐᤠ᤺ᤴᤇᤠ᤺ᤳᤋᤢ ᤜᤧᤰᤁᤩᤠᤱ ᤒᤣᤒᤡᤗᤥᤏᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤘᤣ᤹ ᤜᤠᤱᤜᤠ᤹ᤏᤢ᤺ᤸᤗᤧ ᤂᤢᤏᤧ᤹ ᤌᤥᤎᤥᤰᤐᤠ ᤋᤠᤰᤑᤠ ᤐᤡᤖᤢ॥ 33 ᤂᤢᤏᤧ᤹ ᤕᤜᤥᤕᤠᤁᤡᤏᤖᤧ ᤐᤢᤱᤗᤠᤜᤡᤶᤔᤥ ᤆᤠᤰᤂᤢᤒᤠ ᤆᤠᤱᤅᤡᤴ ᤗᤧᤰᤔᤠᤖᤧ ᤗᤠᤃᤡ ᤁᤢᤛᤱ ᤆᤠᤱᤜᤠ᤹ ᤐᤡᤖᤢ ᤜᤧᤰᤁᤩᤠᤱ ᤁᤢᤜᤡᤱᤜᤡᤱ ᤌᤠᤖᤡᤰ ᤜᤠᤱᤅᤡᤸᤗᤧ ᤁᤢᤍᤃᤡ ᤕᤢᤱᤔᤠᤀᤠᤱ ᤁᤢᤈᤠ ᤆᤠᤔᤠ ᤑᤠ᤺ᤰᤋᤢ॥ 34 ᤜᤧᤰᤁᤣᤗ᤹ᤖᤡᤰ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤁᤢᤈᤠ ᤆᤠᤔᤠᤖᤧ ᤗᤠᤃᤡ ᤁᤢᤕᤢᤱᤕᤢᤱ ᤌᤠᤖᤡᤰ ᤁᤢᤓᤠ᤹ᤕᤠᤱ ᤐᤡᤖᤢ॥ ᤁᤴ ᤂᤢᤏᤧ᤹ ᤁᤢᤛᤡᤔᤠ ᤕᤧᤴ ᤌᤠᤖᤡᤰ ᤆᤰᤔᤧᤗ᤹ᤖᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.