ᤕᤷᤔᤡᤕᤠ 51 - LIFOTNT1 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤒᤣᤒᤡᤗᤥᤏ ᤏᤢ ᤒᤣᤒᤡᤗᤏᤡᤕᤠᤒᤠ ᤔᤏᤠᤜᤠ᤹ ᤁᤧᤔᤧᤱᤒᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤢᤛᤢᤱᤗᤥ॥ 2 ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤔᤧᤍᤠᤖᤥ ᤜᤧᤰᤁᤩᤠᤱ ᤆᤠᤛᤡᤵ ᤜᤧᤰᤁᤣ ᤔᤧᤀᤧᤵᤋᤢᤀᤠᤱ ᤂᤧᤴ ᤔᤠ᤺ᤱᤄᤠ ᤔᤧᤓᤧᤛᤢ ᤔᤧᤍᤣᤛᤢᤖᤥ॥ ᤂᤧᤸᤗᤧ ᤁᤢᤍᤢᤰᤂᤣ ᤆᤠᤔᤠ ᤕᤧᤴᤏᤥ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤁᤧᤖᤧᤰ ᤐᤡᤛᤠᤱᤗᤠᤶᤒᤠ ᤔᤧᤍᤠᤖᤥ॥ 3 ᤋᤥᤱ ᤁᤧᤀᤠᤵᤐᤠᤜᤠ᤹ᤖᤧ ᤗᤡᤜᤠ᤹ ᤂᤡᤱᤔᤠ ᤔᤧᤱᤄᤥᤛᤢᤴᤗᤖᤥ ᤀᤡᤃᤪ ᤑᤧᤈᤢᤶᤓᤧᤕᤠ ᤕᤠᤱᤛᤡᤱᤔᤠ ᤔᤧᤱᤄᤥᤏᤧᤴᤗᤖᤥ॥ ᤂᤧᤸᤗᤧ ᤁᤧᤍᤶᤒᤠ ᤁᤢᤎᤰᤛᤢᤒᤠᤜᤠ᤹ᤀᤠᤱ ᤔᤧᤗᤧᤖᤧᤶᤛᤡᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤂᤰᤐᤧᤳ ᤔᤧᤔᤧᤰᤗᤖᤥ॥ 4 ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤈᤥ᤺ᤴᤏᤠᤱ ᤔᤧᤛᤧᤖᤢᤛᤡᤖᤥ. ᤂᤧᤸᤗᤧ ᤁᤢᤔᤠᤖᤠᤶᤜᤠ᤹ᤀᤥ ᤔᤧᤈᤩᤧᤵᤋᤢ ᤔᤧᤛᤧᤖᤢᤛᤡᤖᤥ॥ 5 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤰᤗᤧᤱᤘᤠᤀᤥ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ᤺ᤸᤗᤧ ᤗᤠᤕᤥ ᤆᤥᤃᤧᤇᤢᤀᤠᤱ ᤘᤠ᤹ᤛᤡᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤗᤠᤵᤔᤧᤶᤓᤢᤀᤣ ᤁᤳᤋᤢᤱᤛᤡᤱᤗᤥ॥” 6 ᤒᤣᤒᤡᤗᤥᤏᤗᤠᤶ ᤂᤧᤳᤋᤠᤛᤡᤶᤔᤧ᤹ᤀᤥ᥄ ᤂᤡᤏᤡ᤹ ᤀᤠᤒᤠᤅᤣ ᤛᤧ᤺ᤵᤐᤠᤛᤡᤶᤔᤧ᤹ᤀᤥ᥄ ᤂᤧᤸᤗᤧ ᤁᤢᤄᤢᤶᤍᤡᤱᤅᤥ ᤂᤡᤏᤡ᤹ ᤔᤧᤎᤩᤧᤶᤔᤡᤴᤏᤧ᤹ᤀᤥ᥄ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤕᤧᤶᤗᤥ. ᤂᤧᤸᤗᤧ ᤂᤥᤔᤠ ᤕᤠᤖᤢᤒᤠᤴ ᤂᤢᤏᤧ᤹ ᤏᤢ᤺ᤰᤋᤢ ᤐᤡᤖᤢᤖᤥ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥ ᤒᤣᤒᤡᤗᤥᤏᤧᤴ ᤗᤳᤇᤠ ᤛᤠᤶᤔᤩᤠᤱ ᤂᤥᤷᤕᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤗᤳᤇᤠ ᤂᤥᤷᤕᤠ᤺ᤸᤗᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤛᤢᤀᤠᤱ ᤘᤕᤧᤖᤥ॥ ᤒᤣᤒᤡᤗᤥᤏᤧᤸᤗᤧ ᤁᤢᤛᤣ᤹ᤈ᤺ᤱᤘᤠ᤺ᤸᤗᤧ ᤛᤢᤘᤠᤱᤜᤠ᤹ ᤔᤕᤢᤛᤡᤖᤥ. ᤜᤧᤰᤁᤩᤠᤱ ᤁᤸᤗᤧ ᤁᤧᤖᤧᤰ ᤁᤧᤏᤠᤱᤒᤠ ᤆᤥᤃᤢᤛᤢᤛᤡᤖᤥ॥ 8 ᤁᤖ ᤆᤄᤵ ᤒᤣᤒᤡᤗᤥᤏᤧᤴᤏᤠᤱ ᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤂᤧᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤜᤠᤒᤧᤶᤔᤧ᤹ᤀᤥ॥ ᤂᤧᤴ ᤛᤡᤍᤠ᤹ᤐᤠᤱᤍᤠ᤹ ᤐᤡᤖᤧᤶᤔᤧ᤹ᤀᤥ॥ ᤜᤠᤃ ᤂᤧᤴ ᤀᤠᤸᤗᤛᤠᤱ ᤘᤣ᤺ᤵᤔᤠ ᤛᤢᤰᤐᤡᤖᤥ॥ 9 ᤀᤠᤏᤡᤃᤣ ᤛᤢᤰᤋᤢᤶᤒᤧᤒᤠ ᤜᤧᤰᤁᤣ᤺ᤸᤗᤧᤃ ᤀᤠᤏᤡᤃᤣ ᤂᤧᤴ ᤑᤠ᤹ᤖᤢᤶᤒᤧᤒᤠ ᤘᤕᤧᤔᤧᤴᤗᤥ. ᤁᤖ ᤀᤠᤸᤗ ᤂᤧᤴ ᤌᤣ᤺ᤸᤗᤧᤀᤠᤱ ᤛᤧ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤴ ᤐᤣ᤺ᤰᤗᤖᤥ. ᤗᤠᤵᤑᤢᤛᤧᤶᤔᤧ᤹ᤀᤥ॥ ᤀᤠᤸᤗ ᤂᤧᤏᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥ ᤏᤢ᤺ᤰᤂᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤥᤛᤢᤒᤠ ᤂᤢᤶᤍᤡᤱᤅᤡᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠᤖᤡᤰ ᤁᤧᤳᤗᤥ. ᤁᤴ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤆᤥᤰᤗᤥ ᤁᤴ ᤛᤡ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤀᤠᤗᤣ᤺ᤳᤋᤧᤀᤠᤱ ᤘᤠ᤹ᤖᤥ॥ ᤋᤩᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤗᤠᤃᤡ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤖᤢᤛᤗᤧ᤺ᤶᤔᤥ ᤀᤢᤘᤠ ᤆᤥᤃᤢᤶᤗᤥ॥ 11 ᤋᤥ᤺ᤱᤜᤠ᤹ ᤕᤠᤖᤠᤵᤋᤧᤶᤔᤧ᤹᥄ ᤂᤥᤜᤠ᤹ ᤑᤥ᤺ᤰᤂᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤗᤠᤱᤄᤣ᤺ᤰᤔᤠ ᤏᤢ ᤂᤧᤴ ᤔᤧᤱᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤍᤡᤒᤠ ᤜᤠᤱᤜᤠ᤹ ᤜᤢᤛᤢᤛᤡᤀᤠᤱ ᤘᤠ᤹ᤖᤥ॥ ᤁᤢᤜᤡᤶ ᤀᤠᤛᤢᤳᤌᤥ ᤁᤧᤈᤥ᤺ᤰᤐᤠᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤁᤱᤃ ᤂᤢᤏᤧ᤹ ᤁᤢᤗᤧᤰᤘᤠ ᤏᤢ᤺ᤰᤔᤠ ᤕᤧᤶᤗᤥ॥ 12 ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤏᤡᤛᤠᤏ ᤑᤥ᤺ᤰᤂᤧᤶᤔᤧ᤹ᤀᤥ॥ ᤀᤡᤰᤁᤧᤃᤥᤒᤠᤜᤠ᤹ ᤁᤧᤎᤢᤶᤒᤠ ᤆᤥᤃᤧᤶᤛᤡᤶᤔᤧ᤹ᤀᤥ ᤜᤧᤰᤁᤩᤠᤱ ᤀᤡᤰᤁᤧᤃᤥᤒᤠᤜᤠ᤹ ᤂᤧᤵᤛᤧᤶᤛᤡᤶᤔᤧ᤹ᤀᤥ॥ ᤗᤳᤇᤠ ᤗᤠ᤺ᤰᤕᤢᤰᤔᤠᤍᤧᤴ ᤆᤥᤃᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤘᤠᤀᤥ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤳᤋᤢᤖᤥ॥ 13 ᤂᤧᤏᤧ᤹ᤃ ᤗᤳᤇᤠ ᤕᤶᤒᤠ ᤗᤧᤱᤜᤱᤍᤧᤴᤏᤡᤸᤗᤧ ᤁᤢᤗᤢᤶᤔᤥ ᤕᤶᤒᤠ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤕᤧᤰᤕᤰᤏᤧᤖᤥ. ᤁᤖ ᤁᤧᤔᤧᤰᤔᤠᤴ ᤋᤩᤧᤀᤠᤱ ᤘᤠ᤹ᤖᤥ॥ ᤁᤧᤜᤡᤱᤔᤠ ᤂᤡ᤺ᤴ ᤔᤧᤄᤰᤋᤢᤀᤠᤱ ᤘᤠ᤹ᤖᤥ॥ 14 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤔᤠᤱᤜᤧᤰᤛᤡᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤥ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹ᤖᤥ— “ᤏᤡ᤺ᤱᤄᤢᤰᤘᤠ ᤐᤴᤈᤩᤠᤱᤔᤠᤜᤠ᤹ᤖᤧ ᤀᤡᤰᤋᤠᤵᤜᤠ᤹ ᤔᤧᤒᤴᤇᤢᤒᤠ ᤁᤢᤀᤡᤛᤡᤰ ᤁᤢᤕᤧᤰᤕᤰᤜᤠ᤹ ᤏᤡᤱᤔᤡᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤱ ᤏᤠ᤺ᤶᤔᤠ ᤀᤡᤰᤗᤠᤀᤥ ᤂᤧᤏᤧ᤹ ᤐᤡᤛᤠᤱ ᤋᤡᤕᤠᤜᤠ ᤔᤧᤗ᤹ᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤧᤘᤠᤛᤠᤶᤗᤥ 15 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤢᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤖᤥ॥ ᤂᤢᤏᤧ᤹ ᤀᤠᤵᤑᤣᤰ ᤁᤢᤄᤠᤛᤡᤱᤏᤡ᤺ᤵᤐᤥ ᤂᤢᤏᤧ᤹ ᤋᤠᤱᤛᤠᤱᤒᤠᤴ ᤂᤡᤱᤄᤢᤖᤥ॥ 16 ᤂᤢᤏᤧ᤹ ᤂᤧᤖᤧᤱᤄᤢᤖᤢᤱ ᤁᤧᤗ᤹ᤒᤥ ᤐᤠ᤺ᤳᤋᤧᤸᤗᤧ ᤋᤠᤱᤛᤠᤱᤒᤧᤴ ᤆᤫᤠ᤺ᤳᤋᤡᤸᤗᤧ ᤋᤡᤶᤗᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠ᤹ᤔᤡᤳ ᤐᤥ᤺ᤰᤗ ᤕᤠ᤺ᤴᤍᤢᤖᤥ॥ ᤂᤢᤏᤧ᤹ ᤛᤠ᤺ᤶᤓᤣ᤺ᤴ ᤘᤜᤡᤳᤋᤡᤴᤏᤢ ᤛᤥᤖᤡᤰ ᤐᤠᤱᤄᤢᤖᤥ. ᤜᤧᤰᤁᤩᤠᤱ ᤛᤠᤶᤔᤡ᤺ᤳᤋᤧᤴ ᤁᤢᤕᤠᤱᤔᤠᤍᤧᤴᤜᤠ᤹ᤀᤥᤏᤢ ᤗᤧᤖᤢᤖᤥ॥ 17 ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤍᤱ ᤔᤧᤈᤥᤰᤗᤥ ᤜᤧᤰᤁᤩᤠᤱ ᤛᤡᤰᤁᤢᤍᤡᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ᥄ ᤛᤠᤶᤔᤩᤠᤱ ᤕᤢᤵᤐᤠ ᤁᤧᤎᤰᤐᤠᤜᤠ᤹ ᤂᤢᤴᤇᤡ᤹ ᤔᤧᤈᤥᤃᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤁᤢᤏᤠᤔᤧᤴᤇᤠ᤹ ᤔᤧᤒᤥᤱᤗᤥ. ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤀᤡᤱᤗᤧᤰᤁᤣ ᤆᤥᤰᤗᤥ॥ ᤁᤴ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤛᤰᤔᤠ ᤀᤡᤃᤪ ᤔᤢᤰᤛᤠᤶ ᤔᤧᤕᤠᤰᤏᤧᤴᤗᤥ॥ 18 ᤏᤠᤘᤠᤀᤡᤳᤗᤠᤜᤠ᤹ᤃ ᤌᤣᤏᤠᤎᤣᤒᤠ ᤔᤧᤈᤥᤰᤗᤥ. ᤂᤧᤱᤜᤠ᤹ ᤀᤣ᤺ᤵᤔᤠ ᤁᤧᤕᤢᤒᤠ ᤀᤡᤱᤗᤧᤰᤁᤣ ᤔᤧᤈᤥᤰᤗᤥ᥄ ᤂᤠᤛᤧᤴ ᤐᤥᤱᤔᤠ ᤕᤧᤴᤏᤡᤴ ᤏᤡ᤺ᤵᤔᤠ ᤕᤧᤴᤏᤥ ᤂᤧᤱᤜᤠ᤹ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤥ॥ 19 ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤕᤠᤁᤢᤒᤖᤧ ᤁᤢᤗᤰᤗᤥ ᤂᤢᤏᤧ᤹ᤃ ᤁᤴ ᤏᤠᤘᤠᤀᤡᤳᤗᤠᤜᤠ᤹ ᤜᤧᤰᤋᤱᤒᤠ ᤔᤣ᤺ᤴᤗᤥ᥄ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤀᤠᤒᤠᤅᤣ ᤁᤢᤗᤰ ᤁᤧᤄᤥᤒᤠ ᤔᤏᤠᤜᤠ᤹ᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤠᤖᤥ॥ ᤂᤢᤏᤧ᤹ ᤁᤢᤔᤡᤱᤃ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤎᤘᤠ 20 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤏᤧ᤹ᤃ ᤀᤠᤎᤱ ᤆᤥ᤺ᤰᤔᤠ ᤌᤘᤠᤏᤧᤖᤥ. ᤀᤠᤱᤃᤠ᤹ ᤂᤧᤏᤧ᤹ᤗᤠᤶ ᤛᤢᤘᤠᤱᤜᤠ᤹ ᤆᤡᤎᤰ ᤆᤡᤎᤰ ᤌᤃᤢᤱᤛᤡᤱᤗᤥ ᤜᤧᤰᤁᤩᤠᤱ ᤕᤖᤡᤰ ᤜᤠᤱᤈᤢᤶᤜᤠ᤹ ᤔᤧᤰᤂᤢᤱᤛᤡᤱᤗᤥ॥ 21 ᤀᤠᤱᤃᤠ᤹ ᤂᤧᤏᤧ᤹ᤗᤠᤶ ᤀᤴᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹. ᤜᤧᤰᤁᤩᤠᤱ ᤀᤴᤗᤠᤎᤠ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤆᤡᤎᤰ ᤆᤡᤎᤰ ᤌᤃᤢᤱᤛᤡᤱᤗᤥ॥ 22 ᤀᤠᤱᤃᤠ᤹ ᤂᤧᤏᤧ᤹ᤗᤠᤶ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹. ᤁᤠᤵᤐᤥᤒᤠ ᤁᤠᤶᤔᤢᤔᤠ ᤔᤏᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹. ᤌᤠᤱᤒᤧᤴ ᤔᤏᤠᤜᤠ᤹ ᤏᤢ ᤔᤧᤴᤇ᤻ᤕᤠᤜᤠ᤹ ᤆᤡᤎᤰ ᤆᤡᤎᤰ ᤌᤃᤢᤱᤛᤡᤱᤗᤥ॥ 23 ᤂᤧᤏᤧ᤹ᤗᤠᤶ ᤔᤧᤸᤗᤢᤰᤁᤶᤒᤠᤜᤠ᤹ ᤏᤢ ᤁᤢᤔᤧᤸᤗᤢᤰ ᤗᤢᤵᤜᤠ᤹. ᤕᤠ᤺ᤴᤃᤧᤔᤒᤠ ᤁᤧᤈᤠᤒᤠᤜᤠ᤹ ᤏᤢ ᤛᤧᤃᤶᤒᤠ ᤁᤢᤃᤠᤵᤜᤠ᤹. ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ ᤆᤡᤎᤰ ᤆᤡᤎᤰ ᤌᤃᤢᤱᤛᤡᤱᤗᤥ॥ 24 “ᤕᤖᤢᤛᤗᤧ᤺ᤶᤔᤥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤔᤧᤳᤋᤢᤛᤡᤒᤠ ᤁᤧᤖᤧᤰ ᤔᤧᤴᤘᤠ᤹ᤔᤏᤠ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤒᤣᤒᤡᤗᤥᤏ ᤏᤢ ᤒᤣᤒᤡᤗᤥᤕᤠᤒᤠ ᤔᤏᤠᤜᤠ᤹ᤀᤥ ᤀᤠᤱᤃᤠ᤹ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ॥ 25 “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤔᤧᤱᤒᤠ ᤔᤢᤰᤛᤠᤶᤒᤠ ᤏᤠᤱᤈᤱᤗᤢᤱᤅᤧ. ᤀᤥᤔᤧᤳᤋᤧ᤹ᤀᤥ᥄ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ “ᤆᤴᤈᤶᤒᤠᤍᤧᤴᤜᤠ᤹ᤗᤠᤶ ᤕᤥ ᤜᤡᤵᤔᤠ ᤌᤠᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤧᤍᤰᤗᤧᤱᤘᤠᤀᤥ ᤀᤠᤜᤢᤰᤁᤡᤸᤗᤧ ᤛᤠ᤺ᤶᤏᤧᤖᤥ॥ ᤀᤠᤱᤃᤠ᤹ ᤔᤧᤱᤏᤧᤛᤢ᤺ᤳᤏᤧᤀᤠᤱ. ᤂᤧᤏᤧ᤹ ᤌᤧᤔᤠᤀᤠᤱ ᤁᤧᤶᤒᤥᤱᤏᤧᤴᤗᤥ ᤁᤖ ᤔᤡᤃᤧᤍᤡᤰᤐᤠᤀᤠᤱ ᤁᤧᤗᤢᤶᤛᤡᤱᤒᤠ ᤁᤢᤶᤈᤡᤰ ᤁᤧᤒᤥᤱᤗᤥ॥ 26 ᤂᤧᤏᤧ᤹ ᤛᤍᤠᤍᤡᤱᤗᤧ ᤗᤠᤃᤡ ᤆᤡᤈᤡ ᤂᤰᤂᤰ ᤁᤧᤒᤥᤱᤗᤥ॥ ᤂᤧᤏᤧ᤹ᤀᤥ ᤁᤧᤕᤠᤰᤐᤠ ᤗᤢᤱᤜᤠ᤹ᤀᤠᤱ ᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤓᤧᤸᤗᤧᤀᤠᤱ ᤀᤥᤃᤵ ᤔᤧᤒᤥᤱᤏᤧᤴᤗᤥ॥ ᤂᤧᤏᤧ᤹ ᤘᤖᤧᤱᤗᤧᤱ ᤁᤧᤶᤍᤢ᤺ᤰ ᤁᤧᤶᤍᤣᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ॥ 27 “ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤔᤡᤰᤛᤣᤴ ᤏᤡᤛᤠᤏ ᤑᤥ᤺ᤰᤂᤧᤶᤔᤧ᤹ᤀᤥ॥ ᤌᤱ ᤀᤡᤰᤗᤠᤴ ᤔᤢᤰᤂᤧᤶᤔᤧ᤹ᤀᤥ᥄ ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ ᤁᤧᤖᤧᤰ ᤔᤢᤖᤠ ᤔᤧᤳᤋᤧᤶᤛᤡᤶᤔᤧ᤹ᤀᤥ᥄ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤕᤠᤖᤡᤵ ᤆᤥᤃᤧᤶᤛᤡᤶᤔᤧ᤹ᤀᤥ᥄ ᤀᤠᤖᤠᤖᤠᤋᤒᤠ. ᤔᤡᤴᤏᤡᤒᤠ ᤏᤢ ᤀᤛᤁᤏᤈᤒᤠ ᤌᤰᤛᤢᤒᤠᤜᤠ᤹ ᤂᤡᤏᤡ᤹ ᤑᤧᤳᤋᤧᤶᤛᤡᤶᤔᤧ᤹ᤀᤥ॥ ᤗᤳᤇᤠ ᤌᤰᤔᤥᤒᤠ ᤌᤡᤰ ᤕᤢᤰᤋᤡᤱ ᤆᤥᤃᤧᤶᤔᤧ᤹ᤀᤥ. ᤏᤡ᤺ᤱᤂᤢ᤺ᤰᤘᤠ᤺ᤸᤗᤧ ᤁᤢᤒᤴᤈᤩᤠᤱᤔᤠᤜᤠ᤹ ᤜᤧᤰᤁᤣ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤀᤴᤜᤠ᤹ ᤋᤠᤖᤧᤶᤛᤡᤶᤔᤧ᤹ᤀᤥ᥄ 28 ᤔᤠᤍᤡᤒᤠ ᤜᤠᤱᤜᤠ᤹ᤖᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤗᤠᤶᤔᤧᤗᤥᤛᤢᤛᤡᤒᤠ. ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹. ᤂᤧᤱᤜᤠ᤹ᤖᤧ ᤕᤢᤰ ᤔᤧᤈᤥᤃᤢᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤖᤧᤶᤛᤡᤶᤔᤧ᤹ᤀᤥ॥ 29 “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤌᤢᤖᤢᤵᤗᤢᤵᤏᤠ ᤕᤱᤗᤥ ᤜᤧᤰᤁᤩᤠᤱ ᤁᤢᤍᤢᤰᤔᤥ ᤂᤀᤡᤰ ᤂᤀᤡᤰ ᤀᤡᤰᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤧᤴ ᤔᤧᤸᤗᤧᤱᤛᤡᤱᤅᤣ ᤕᤧᤵᤗ ᤜᤧᤰᤁᤩᤠᤱ ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤴᤕᤢᤱᤏᤧᤸᤗ ᤑᤠ᤹ᤀᤠᤱ ᤁᤢᤍᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤱᤛᤣᤰ ᤆᤥᤃᤢᤀᤠᤱ ᤘᤠ᤹ᤖᤥ॥ 30 ᤂᤧᤸᤗᤧ ᤔᤢᤰᤁᤢᤶᤒᤠ ᤁᤢᤎᤰᤛᤢᤒᤠᤜᤠ᤹ ᤕᤠᤶᤔᤥ ᤌᤱ ᤔᤧᤴᤈᤥ᤺ᤰᤏᤧᤴᤗᤥ॥ ᤂᤧᤱᤜᤠ᤹ ᤌᤰᤛᤢᤒᤠ ᤕᤰᤜᤠ᤹ᤀᤥ ᤔᤧᤕᤢᤱ ᤔᤧᤃᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠᤴ ᤔᤕᤧᤒᤣᤖᤥ॥ ᤂᤧᤱᤜᤠ᤹ ᤔᤧᤴᤇᤢᤔᤠ ᤜᤧᤰᤋᤱᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤗᤠᤈᤣ᤹ ᤁᤧᤗᤡᤒᤠᤜᤠ᤹ᤖᤧ ᤜᤡᤶᤜᤠ᤹ ᤔᤡᤔᤧᤎᤡᤰᤂᤢᤀᤠᤱ ᤏᤧᤖᤥ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤐᤕᤶ ᤗᤠᤶᤎᤣ᤺ᤵᤐᤠᤜᤠ᤹ ᤔᤧᤗᤢ᤺ᤴᤍᤢᤖᤥ॥ 31 ᤁᤢᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢ ᤗ᤹ᤖᤡᤰ ᤜᤠᤱᤅᤡᤴ ᤔᤧᤵᤔᤠᤖᤧ ᤗᤠᤃᤡ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤐᤈᤠᤳ ᤔᤧᤈᤠᤳᤗ ᤗᤳᤇᤠ ᤁᤧᤗᤥ᤺ᤰᤐᤠᤗᤠᤶ ᤘᤣ᤹ᤀᤥ ᤀᤡᤱᤄᤱᤅᤡᤴ ᤔᤧᤛᤧᤛᤢᤖᤥ॥ 32 ᤁᤧᤖᤧᤰ ᤂᤧᤳᤇᤡᤱᤔᤠ ᤗᤠᤶᤜᤠ᤹ ᤔᤧᤛᤠᤰᤋᤢᤀᤠᤱ ᤏᤧᤖᤥ॥ ᤘᤈᤡᤶᤒᤣ᤹ᤜᤠ᤹ᤀᤥ ᤔᤡ ᤔᤧᤃᤣ᤺ᤳᤋᤢᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ ᤛᤠ᤹ᤖᤡᤰ ᤔᤧᤃᤡ ᤔᤧᤕᤱᤗᤥ॥” 33 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤒᤣᤒᤡᤗᤥᤏᤧᤴ ᤂᤠ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤔᤠᤖᤧ ᤗᤠᤃᤡ. ᤆᤠᤎᤠᤶᤔᤠᤍᤧᤴᤏᤥ ᤁᤧᤏᤧᤒᤠ ᤔᤠᤛᤡ ᤜᤧᤰᤋᤱᤒᤠ ᤆᤥᤰᤗᤥ॥ ᤀᤠᤸᤗ ᤛᤵᤑᤠᤎᤡᤰ ᤀᤣᤃᤠᤱᤗᤧ ᤂᤧᤴ ᤆᤠᤛᤢᤶᤔᤠᤴ ᤜᤣ᤺ᤰᤛᤡᤱᤗᤥ॥” 34 “ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤆᤍᤣᤛᤡᤃᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤏᤡᤃᤣ ᤆᤡᤎᤰ ᤆᤡᤎᤰ ᤌᤃᤡᤃᤧᤀᤠᤱ ᤀᤠᤏᤡᤃᤣ ᤌᤢᤶᤔᤡᤴ ᤗ᤺ᤳᤋᤢᤍᤣᤛᤢᤀᤠᤱ ᤘᤠ᤹ᤖᤥ॥ ᤕᤶᤒᤠ ᤀᤠᤈᤠᤈᤠᤒᤧᤸᤗᤧ ᤜᤧᤰᤁᤣ ᤂᤢᤏᤧ᤹ ᤗᤖᤡᤃᤧᤍᤣᤛᤡᤃᤧᤀᤠᤱ ᤘᤠ᤹ᤖᤥ ᤂᤧᤒᤩᤠᤱ ᤂᤢᤏᤧ᤹ ᤁᤢᤛᤠᤵᤐᤥ᤺ᤰᤁᤡᤴ ᤀᤠᤏᤡᤃᤣ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤌᤡᤶᤛᤢᤀᤠᤱ ᤘᤠ᤹ᤖᤥ॥ ᤀᤠᤏᤡᤃᤣ ᤀᤠᤒᤠᤅᤣ ᤗᤠᤈᤣ᤹ᤗᤠᤶ ᤂᤢᤏᤧ᤹ ᤗᤠ᤺ᤰᤁᤠᤳ ᤗᤠᤵᤑᤢᤛᤡᤃᤧᤀᤠᤱ ᤘᤕᤡᤃᤧᤖᤥ.” 35 ᤛᤡᤕᤥᤏᤒᤠ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ॥ “ᤀᤠᤏᤡᤃᤣ ᤋᤢᤰᤂᤣ ᤆᤧᤀᤡᤃᤧᤖ ᤕᤠ᤺ᤴᤍᤡᤃᤧᤒᤠ ᤁᤢᤀᤡᤛᤡᤰ ᤒᤣᤒᤡᤗᤥᤏᤧᤴ ᤋᤢᤰᤂᤣ ᤆᤠᤖ ᤕᤠ᤺ᤴᤍᤧᤶᤔᤧ᤹ᤀᤥ॥ ᤀᤠᤏᤡᤃᤣ ᤔᤠᤰᤂᤡ᤹ ᤘᤠᤕᤢᤛᤢᤒᤠᤸᤗᤧ ᤁᤢᤗᤧᤰᤘᤠᤀᤥ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤧ ᤔᤧᤜᤢᤅᤢᤖ ᤕᤠ᤺ᤴᤍᤧᤶᤛᤧ᤹.” ᤕᤖᤢᤛᤗᤧᤔᤖᤧ ᤐᤠ᤺ᤳᤋᤢᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤑᤠ᤹ᤖᤢ 36 ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤀᤰᤂᤣ ᤔᤧᤳᤋᤢᤖᤥ. “ᤂᤡᤏᤡ᤹ ᤋᤢ᤺ᤴᤍᤣ᤹ ᤀᤥᤃᤧᤔᤧᤵᤐᤠ ᤂᤠᤛᤧᤴᤗᤥ᤺ᤶᤒᤠ ᤐᤥᤱᤅᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ᤗᤠᤶ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ॥ ᤂᤧᤸᤗᤧ ᤁᤢᤘᤠᤒᤢᤴᤍᤠᤰᤘᤠᤜᤠ᤹ᤏᤢ ᤛᤥᤛᤥᤖᤡᤰ ᤂᤧᤸᤗᤧ ᤁᤢᤘᤜ᤺ᤱᤅᤡᤴ ᤆᤵᤐᤪᤧᤰ ᤆᤵᤗ ᤕᤠ᤺ᤴᤍᤢᤱᤗᤥ. 37 ᤜᤧᤰᤁᤩᤠᤱ ᤒᤣᤒᤡᤗᤥᤏᤧᤴ ᤛᤩᤠᤗ ᤕᤠᤱᤍ᤺ᤰᤜᤠ᤹ ᤘᤠ᤹ᤔᤠᤍᤧᤴ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠᤴ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤐᤥᤱᤗᤥ॥ ᤂᤧᤵᤔᤥ ᤋᤠᤶᤓᤢᤱ ᤌᤰᤛᤠᤜᤠ᤹ ᤕᤠᤱᤔᤧᤎᤥ᤺ᤰᤗᤥ॥ ᤂᤧᤴ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤕᤢᤱᤔᤏᤠᤒᤠᤍᤧᤴ. ᤕᤱᤔᤠ ᤀᤠᤛᤡᤛᤡᤒᤠ ᤏᤢ ᤀᤠᤵᤋᤡᤰ ᤆᤠᤜᤠᤰ ᤐᤥᤱᤗᤥ॥ 38 ᤁᤧᤎᤢᤶᤒᤠ ᤂᤡᤖᤡᤱᤒᤠᤜᤠ᤹ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤔᤏᤠᤜᤠ᤹ ᤛᤥᤖᤡᤰ ᤜᤠᤃᤠ᤺ᤰ ᤜᤠᤃᤠ᤺ᤰ ᤔᤧᤗ᤹ᤖᤥ॥ ᤂᤡᤖᤡᤱᤒᤠᤸᤗᤧ ᤁᤢᤛ᤻ᤛᤠᤜᤠ᤹ ᤜᤧᤰᤁᤣ ᤂᤧᤱᤜᤠ᤹ ᤱᤕᤠᤷᤖ ᤱᤕᤠᤷᤖ ᤔᤧᤗ᤹ᤖᤥ॥ 39 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤁᤧᤖᤧᤰ ᤛᤣ᤹ᤈ᤺ᤱᤘᤠ᤺ᤴᤏᤢ ᤂᤢᤴᤇᤡ᤹ ᤛᤠ᤹ᤖᤡᤰ ᤛᤡᤰᤐᤥ᤺ᤰᤁᤠᤱ ᤔᤧᤏᤧ᤺ᤸᤗᤧ. ᤀᤠᤱᤃᤠ᤹ ᤘᤣ᤹ ᤐᤖᤡᤰᤐᤠ ᤛᤠᤓ᤺ᤱᤈᤠ ᤌᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤠᤖᤡᤵ ᤆᤥᤃᤢᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤈᤥ᤺ᤴᤏᤠᤱ ᤔᤧᤀᤡᤶᤗ ᤌᤠᤖᤡᤰ ᤔᤛᤢᤱᤛᤡᤱᤗᤥ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤥᤏᤧᤴᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 40 “ᤌᤢ᤺ᤶᤒᤠᤜᤠ᤹ ᤏᤢ ᤔᤧ᤺ᤴᤍᤠᤜᤠ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤛᤡᤒᤠ ᤜᤧᤰᤁᤣ. ᤔᤧᤸᤗᤢᤰᤛᤠ᤺ᤳᤜᤠ᤹ ᤛᤧᤵᤔᤏᤠᤛᤡᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤱᤜᤠ᤹ ᤕᤥ ᤕᤢᤖᤢᤱᤛᤡᤱᤗᤥ॥ 41 “ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤠᤖᤠ ᤑᤥᤛᤢᤒᤠ ᤐᤕᤶ ᤕᤶᤒᤠ ᤒᤣᤒᤡᤗᤥᤏ. ᤒᤣᤒᤡᤗᤥᤏᤧᤴ ᤀᤠᤰᤂᤩᤠᤱ ᤜᤢᤰᤁᤠᤵ ᤔᤧᤈᤥᤃᤢᤒᤣ᥄ ᤀᤠᤸᤗ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤴ ᤗᤳᤇᤠ ᤁᤡᤵᤔᤠᤃᤧᤄᤢᤒᤠ ᤏᤡᤕᤠᤖᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 42 ᤘᤖ᤺ᤱᤅᤡᤴ ᤒᤣᤒᤡᤗᤥᤏᤧᤸᤗᤧ ᤁᤢᤛᤶᤔᤥ ᤐᤥᤖᤧᤌᤠᤅᤧᤀᤠᤱ ᤏᤧᤖᤥ. ᤁᤧᤜᤢ᤺ᤰᤐᤠ ᤘᤠᤓᤧᤸᤗᤧᤱᤜᤠ᤹ᤖᤧ ᤂᤧᤴ ᤋᤧᤵᤋᤢᤖᤥ॥ 43 ᤂᤧᤵᤔᤥᤒᤠ ᤕᤧᤰᤕᤰᤜᤠ᤹ ᤀᤠᤸᤗᤥ ᤔᤧᤃᤧᤀᤠᤱ ᤏᤧᤖᤥ. ᤜᤠ᤺ᤳᤋᤠᤱ ᤗᤠᤱᤔᤧᤱᤄᤣ᤺ᤰᤔᤏᤠᤒᤠ ᤀᤡᤃᤪ ᤆᤫᤠ᤺ᤳ ᤁᤧᤜᤥᤵᤐᤠ ᤔᤢᤖᤧᤰ ᤂᤠᤖᤧᤰᤐᤠ ᤗᤠᤈᤣ᤹ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 44 ᤜᤧᤰᤁᤩᤠᤱ ᤒᤣᤒᤡᤗᤥᤏᤒᤠ ᤒᤣᤗ ᤔᤠᤱᤅᤡᤴ ᤂᤢᤶᤍᤡᤱ ᤐᤡᤖᤢᤱᤗᤥ ᤂᤧᤒᤩᤠᤱ ᤂᤧᤸᤗᤧ ᤆᤒᤠ ᤁᤧᤖᤧᤰ ᤐᤧᤛᤢᤖ ᤕᤠ᤺ᤴᤍᤢᤱᤗᤥ॥ ᤀᤠᤸᤗᤀᤠᤱᤎᤥ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤴᤍᤠᤏᤧᤴᤗᤥ ᤜᤧᤰᤁᤩᤠᤱ ᤂᤧᤴ ᤛᤧᤘᤠ ᤔᤧᤶᤔᤧᤳᤋᤢᤴᤗᤥ॥ ᤒᤣᤒᤡᤗᤥᤏᤒᤠ ᤗᤢᤱᤎᤠᤰᤜᤠ᤹ ᤗᤢ᤺ᤴᤍᤧᤀᤠᤱ ᤏᤧᤖᤥ᥄ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ᤖᤧ ᤗᤠᤃᤡ ᤀᤡᤱᤄᤱ 45 ᤀᤠᤱᤃᤠ᤹ ᤀᤠᤔᤏᤠᤛᤣ. ᤂᤧᤵᤔᤥᤗᤠᤶ ᤗ᤺ᤴᤍᤧᤶᤔᤧ᤹ᤀᤥ. ᤒᤣᤒᤡᤗᤥᤏᤗᤠᤶ ᤂᤡᤏᤡ᤹ ᤂᤧᤳᤋᤠᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤀᤠᤒᤠᤅᤣ ᤛᤧ᤺ᤵᤐᤠᤛᤡᤶᤔᤧ᤹ᤀᤥᤣ᥄ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤥᤗᤠᤶ ᤐᤡᤴᤍᤧᤶᤔᤧ᤹ᤀᤥ॥ 46 ᤁᤖ ᤂᤡᤏᤡ᤹ ᤕᤱᤔᤠ ᤔᤧᤛᤩᤧᤶᤔᤡᤴᤏᤧ᤹ᤀᤥ. ᤌᤰᤛᤢᤒᤠᤜᤠ᤹ ᤏᤡ᤺ᤳᤋᤠᤱ ᤔᤧᤃᤧᤖᤧ ᤁᤧᤗ᤹ᤒᤠ ᤌᤡᤰᤛᤡᤃᤣᤰᤐᤠ ᤜᤕᤱ ᤁᤡᤸᤗᤡᤱᤒᤠ ᤀᤡᤱᤄᤱᤅᤡᤴ ᤁᤧᤄᤧᤵᤛᤢᤶᤔᤡᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤜᤕᤱ ᤁᤡᤸᤗᤡᤱᤒᤠ ᤀᤡᤱᤄᤱᤜᤠ᤹ ᤋᤱᤒᤣᤎᤰᤔᤠ ᤋᤠᤖᤥ॥ ᤗᤠᤶᤗᤥᤒᤠᤜᤠ᤹ ᤌᤡᤰᤁᤡᤴ ᤘᤣ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤧᤴᤎᤱ ᤔᤧᤈᤥ᤺ᤰᤁᤡᤸᤗᤧ ᤂᤣᤔᤠ ᤌᤰᤔᤠ ᤛᤧᤳᤇᤡᤱᤔᤠᤖᤧ ᤗᤠᤈᤣᤴ ᤐ᤺ᤱᤗᤥ॥ 47 ᤌᤣᤀᤠᤱᤓᤧᤸᤗᤧ ᤁᤴ ᤐᤕᤶ ᤕᤶᤒᤠ ᤒᤣᤒᤡᤗᤥᤏ ᤕᤧᤰᤕᤰᤁᤡᤴ ᤏᤢ ᤂᤧᤸᤗᤧ ᤁᤧᤖᤧᤰ ᤁᤢᤏᤠᤘᤠᤀᤡᤳᤗᤠᤜᤠ᤹ ᤂᤢᤶᤍᤡᤱ ᤐᤡᤔᤠ ᤕᤧᤶᤔᤡᤴ ᤛᤧᤰᤂᤠᤀᤣ ᤋᤠᤖ ᤐᤳᤗᤥ॥ ᤂᤧᤸᤗᤧ ᤁᤠᤰ ᤁᤢᤗᤠᤈᤣᤴ ᤛᤡᤖᤡᤱᤔᤔᤥ ᤌᤠᤖᤥ. ᤜᤧᤰᤁᤩᤠᤱ ᤁᤧᤛᤡᤒᤠ ᤁᤢᤔᤏᤠᤜᤠ᤹ ᤔᤠᤖᤠᤶᤜᤠ᤹ᤀᤥ ᤔᤧᤏᤧᤖᤥ॥ 48 ᤂᤧᤒᤩᤠᤱ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤛ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤌᤠᤱᤃᤧᤳ ᤐᤡᤛᤠᤱᤗᤠᤶ ᤒᤣᤒᤡᤗᤥᤏᤧᤴ ᤁᤧᤔᤧᤱᤒᤠ ᤌᤰᤛᤢᤒᤠᤜᤠ᤹ ᤔᤧᤕᤢᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 49 “ᤒᤣᤒᤡᤗᤥᤏᤧᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤏᤢ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤛᤩᤧᤖᤢᤛᤡᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤸᤗᤧ ᤁᤢᤔᤏᤠᤜᤠ᤹ ᤛᤧᤵᤔᤠᤛᤡᤀᤣ ᤐᤥᤱᤗᤥ॥ 50 ᤋᤠᤓᤣᤗᤠᤶ ᤁᤧᤄᤧᤳᤇᤡᤒᤠᤛᤧ. ᤗᤠ᤺ᤰᤁᤠᤳ ᤗ᤺ᤴᤍᤧᤶᤔᤧ᤹ᤀᤥ᥄ ᤔᤧᤕᤧᤒᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤀᤥᤔᤧᤔᤕᤡᤴᤏᤧ᤹ᤀᤥ. ᤂᤡᤏᤡ᤹ ᤁᤧᤛᤢᤰᤋᤢᤶᤔᤡᤸᤗᤧ ᤂᤧᤳᤋᤠᤛᤡᤶᤔᤧ᤹ᤀᤥ᥄ ᤔᤠ᤺ᤱᤄᤠᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤘᤕᤡᤛᤠᤱ. ᤕᤜᤘᤣ ᤍᤠᤱᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥ ᤁᤧᤏᤧᤒᤠ ᤂᤡᤏᤡ᤹ ᤐᤠᤱᤓᤣ᤹ᤀᤡᤴ ᤏᤡᤱᤘᤠ᤹ ᤗᤡᤱᤄᤧᤶᤔᤧ᤹ᤀᤥ॥” 51 ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. “ᤀᤠᤏᤡᤃᤣ ᤛᤡᤖᤡᤱᤔᤔᤥ ᤌᤩᤧ᤹ᤀᤡᤃᤧᤖᤥ॥ ᤀᤠᤏᤡᤃᤣ ᤔᤧᤈᤧᤰᤂᤡᤃᤧ ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧᤖᤥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤀᤠᤛᤢᤳᤌᤥ ᤔᤧᤈᤥᤃᤢᤀᤠᤱ ᤕᤢᤱᤗᤥ॥” 52 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤐᤥᤱᤗᤥ. ᤁᤖ ᤒᤣᤒᤡᤗᤥᤏᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤰᤂᤢᤱᤛᤡᤱᤅᤡᤸᤗᤧ ᤕᤧᤶᤔᤡᤴ ᤋᤠᤖᤥ॥ ᤁᤧᤃᤠ᤺ᤶᤒᤠ ᤁᤢᤔᤏᤠᤜᤠ᤹ ᤔᤧᤕᤠ᤺ᤵᤐᤠᤴ ᤗᤠᤈᤣ᤹ᤀᤥ ᤁᤧᤖᤧᤰ ᤂᤧᤶᤍᤧᤳᤗᤥ॥ 53 ᤒᤣᤒᤡᤗᤥᤏᤧᤴ ᤛᤠᤱᤃᤪᤠᤶᤐᤣᤍᤠᤱ ᤕᤠᤖᤡᤰ ᤌᤠ᤺ᤱᤎᤠ᤺ᤱ ᤁᤧᤳᤇᤠᤱ ᤜᤧᤰᤁᤩᤠᤱ ᤁᤢᤕᤰᤜᤠ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤆᤥᤃᤢᤛᤠᤱ. ᤂᤧᤴ ᤏᤠᤵᤔᤠᤖᤧ ᤗᤠᤃᤡ ᤀᤠᤸᤗᤛᤠᤱ ᤏᤡᤱᤔᤡᤜᤠ᤹ ᤐᤠᤱᤄᤢᤱᤛᤡᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄” ᤒᤣᤒᤡᤗᤥᤏᤀᤥ ᤘᤣ᤹ ᤔᤧᤰᤔᤠᤛᤡᤔᤠ 54 “ᤂᤧᤵᤛᤧᤶᤔᤧ᤹᥄ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤗᤠᤶ ᤐᤕᤶ ᤕᤶᤒᤠ ᤔᤧᤰᤔᤠᤛᤡᤔᤠ ᤀᤡᤰᤗᤠᤴ. ᤒᤣᤒᤡᤗᤥᤏᤖᤧ ᤁᤢᤜᤠ᤺ᤵᤔᤠ ᤁᤢᤈᤡ᤺ᤱᤔᤠᤴ ᤂᤧᤵᤛᤧᤶᤔᤧ᤹ᤀᤥ॥ 55 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤒᤣᤒᤡᤗᤥᤏᤧᤴ ᤔᤧᤰᤂᤢᤖ ᤐᤳᤗᤥ॥ ᤂᤢᤏᤧ᤹ ᤂᤧᤸᤗᤧ ᤕᤶᤒᤠ ᤁᤢᤀᤡᤰᤗᤠᤴ ᤆᤡᤈᤡ ᤕᤧᤶᤕᤧᤶ ᤆᤥᤃᤢᤖᤥ॥ ᤁᤧᤖᤧᤰ ᤕᤧᤰᤕᤰᤁᤥ ᤌᤱ ᤁᤧᤒᤥᤱᤒᤠ ᤀᤡᤰᤗᤠᤴ. ᤘᤠᤓᤧᤸᤗᤧᤱ ᤜᤧᤰᤋᤱᤒᤠ ᤏᤡᤱᤔᤡᤜᤠ᤹ᤖᤧ ᤑᤢᤳᤗᤢᤶ ᤌᤩ᤺ᤱ ᤔᤧᤈᤥᤃᤢᤖᤥ॥ 56 ᤁᤧᤔᤧᤱᤒᤠ ᤏᤡᤱᤔᤡᤜᤠ᤹ ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤍᤠᤖᤥ. ᤁᤧᤎᤢᤶᤒᤠ ᤁᤢᤎᤰᤛᤢᤒᤠᤜᤠ᤹ ᤔᤧᤍᤧᤶᤛᤢᤛᤡᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤀᤣ ᤔᤧᤀᤧᤰᤂᤢ ᤔᤧᤒᤡᤖᤢᤛᤡᤖᤥ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤒᤠ ᤂᤢᤶᤍᤡᤱ ᤁᤧᤒᤡᤒᤠᤖᤥ. ᤁᤢᤗᤧᤰᤘᤠᤃ ᤀᤠᤓᤧᤸᤗᤧᤛᤠᤱ ᤁᤧᤖᤧᤰ ᤁᤧᤏᤢ᤺ᤰᤐᤠ ᤆᤥᤰᤗᤥ॥ 57 ᤀᤠᤱᤃᤠ᤹ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤏᤢ ᤁᤢᤜᤠᤱᤕᤢᤰᤐᤠᤜᤠ᤹. ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤛᤥᤛᤥᤖᤡᤰ ᤛᤡᤰᤁᤢᤶᤛᤠᤒᤠ ᤁᤢᤔᤏᤠᤜᤠ᤹. ᤔᤛᤢᤱᤛᤡᤱᤗᤥ॥ ᤂᤧᤱᤜᤠ᤹ ᤔᤢᤖᤢᤰ ᤂᤠᤖᤢᤰ ᤔᤡᤰᤕᤢᤔᤥ ᤔᤧᤎᤠᤖᤥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤥᤏᤧᤴᤗᤥ᥄” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ. ᤜᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥ 58 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤒᤣᤒᤡᤗᤥᤏᤒᤠ ᤁᤧᤎᤢᤱᤒᤠ ᤗᤢᤱᤎᤠᤰᤜᤠ᤹ ᤂᤠᤶᤒᤠᤱᤅᤥ ᤁᤢᤍᤱᤒᤠ ᤏᤧᤏᤧ ᤔᤧᤍᤱᤄᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤳᤋᤠᤋᤠᤴᤏᤣ ᤕᤶᤒᤠ ᤁᤢᤗᤠᤶᤎᤣ᤺ᤵᤐᤠᤜᤠ᤹ ᤔᤡᤔᤧᤎᤡᤰᤂᤢᤖᤥ॥ ᤕᤖᤡᤰ ᤗᤠᤈᤣ᤹ᤜᤠ᤹ᤗᤠᤶ ᤜᤡᤶ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤜᤏᤧᤖᤰ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ᥄” ᤒᤣᤒᤡᤗᤥᤏᤀᤥ ᤕᤷᤔᤡᤕᤠ᤺ᤸᤗᤧ ᤀᤡᤱᤄᤱ ᤜᤠᤅᤢ 59 ᤔᤠᤛᤣᤕᤠᤜᤖᤧ ᤁᤢᤶᤔᤧᤴᤇᤠ᤹. ᤏᤣᤖᤡᤕᤠᤜᤖᤧ ᤁᤢᤛ᤻ᤛᤠ ᤛᤢᤜᤠᤱᤃᤧᤶᤒᤠ ᤛᤖᤠᤕᤠᤜᤴ ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴᤏᤢ ᤒᤣᤒᤡᤗᤥᤏ ᤐᤣ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤁᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤔᤧᤳᤋᤢ॥ ᤛᤡᤍᤁᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤁᤴ ᤐᤥ᤺ᤰᤂᤧᤀᤠᤱ ᤘᤕᤧ॥ 60 ᤒᤣᤒᤡᤗᤥᤏᤀᤥ ᤜᤠᤖᤠᤀᤣ ᤋᤠᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤒᤠ ᤁᤵᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤔᤧᤰᤔᤠᤛᤡᤔᤠ ᤁᤡᤵᤔᤠ ᤁᤧᤄᤢᤒᤠ ᤐᤠ᤺ᤴᤜᤠ᤹ ᤕᤷᤔᤡᤕᤠ᤺ᤸᤗᤧ ᤗᤳᤇᤠ ᤛᤠᤵᤗᤠᤌ᤺ᤱᤅᤥ ᤛᤠᤵᤋᤢᤱᤀᤠᤱ ᤘᤕᤧ॥ 61 ᤂᤢᤏᤧ᤹ ᤛᤖᤠᤕᤠᤜᤴ ᤔᤧᤳᤋᤢ. “ᤂᤧᤏᤧ᤹ ᤒᤣᤒᤡᤗᤥᤏ ᤁᤧᤖᤧ᤹ᤀᤠᤱ ᤁᤵᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤏᤡᤖᤧ᤹॥ 62 ᤂᤧᤒᤩᤠᤱ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤒᤠ᤺ᤳᤋᤢᤀᤠᤱ ᤘᤠ᤹. ᤂᤧᤏᤧ᤹ ᤒᤣᤒᤡᤗᤥᤏᤧᤴ ᤁᤧᤔᤧᤰᤂᤢ᤹ ᤂᤧᤸᤗᤧᤆᤥᤃᤢᤸᤗᤧ ᤁ᤹ᤕᤥ ᤔᤏᤠᤜᤠ᤹ᤀᤠᤱ ᤔᤧᤴᤕᤠ᤺ᤰᤏᤧᤴ. ᤌᤰᤛᤠᤜᤠ᤹ᤀᤠᤱ ᤔᤧᤴᤕᤠ᤺ᤰᤏᤧᤴ॥ ᤂᤧᤴ ᤛᤍᤠᤍᤡᤱ ᤌᤣᤀᤠᤱ ᤔᤣ᤺ᤴᤏᤣ ᤁᤢᤄᤠᤗᤧᤶ ᤏᤧᤃᤴ॥’ 63 ᤂᤧᤏᤧ᤹ ᤛᤠᤵᤗᤠᤌ᤺ᤱᤔᤧᤴ ᤁᤧᤏᤡᤖᤢ ᤁᤧᤛᤢᤖᤢᤀᤠᤱ ᤗᤳᤇᤠ ᤗᤢᤱᤎᤡᤰ ᤁ᤹ᤕᤥ ᤀᤡᤄᤣ᤺ᤰᤂᤧ᤹ ᤜᤧᤰᤁᤩᤠᤱ ᤕᤢᤑᤪᤣᤋᤡᤛ ᤘᤜ᤺ᤱᤅᤥ ᤗᤠᤵᤑᤢᤛᤧ ᤕᤠᤰᤋᤧ᤹॥ 64 ᤂᤧᤒᤩᤠᤱ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤂᤧᤸᤗᤧ ᤁᤢᤛᤶᤎᤠᤱ ᤋᤠᤖᤢᤱᤒᤠ ᤔᤧᤰᤔᤠ ᤛᤡᤔᤧᤸᤗᤧ ᤆᤥᤃᤢᤸᤗᤧ ᤀᤠᤶᤓᤠ ᤁᤶᤓᤗ᤹ᤖᤡᤰᤁᤣ ᤀᤠᤓᤧᤸᤗᤧᤀᤠᤱ ᤐᤥ᤺ᤰᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤒᤣᤒᤡᤗᤥᤏᤧᤴ ᤏᤢ ᤁᤢᤔᤏᤠᤜᤠ᤹ ᤔᤧᤏᤡ᤺ᤶ ᤔᤧᤗᤠᤳ॥’” ᤕᤷᤔᤡᤕᤠ᤺ᤸᤗᤧ ᤁᤢᤀᤡᤱᤄᤱᤜᤠ᤹ ᤀᤠᤶᤓᤠ ᤁᤵᤔᤥᤀᤣ ᤏᤢᤵᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.