ᤕᤷᤔᤡᤕᤠ 50 - LIFOTNTᤒᤣᤒᤡᤗᤥᤏᤖᤧ ᤗᤠᤃᤡ ᤀᤡᤱᤄᤱ 1 ᤒᤣᤒᤡᤗᤥᤏ ᤏᤢ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤀᤥ ᤁᤧᤖᤧ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤧᤛᤧ᤹ᤀᤥ. ᤜᤧᤰᤁᤩᤠᤱ ᤌᤧᤔᤠ ᤐᤠ᤺ᤴᤏᤡᤴᤏᤠᤱ ᤔᤧᤔᤠ᤹ᤖᤧᤴᤏᤧ᤹ᤀᤥ॥ ᤒᤣᤒᤡᤗᤥᤏᤧᤴ ᤜᤢᤰᤁᤠᤵ ᤐᤥᤱ᤹ ᤑᤠ᤹ᤀᤠᤱ ᤁᤧᤖᤧᤰ ᤔᤏᤠᤜᤠ᤹ ᤔᤧᤵᤔᤠᤛᤡᤖᤧ ᤗᤠᤃᤡ ᤔᤡᤰᤛᤣᤴ ᤐᤡᤔᤠ ᤏᤡᤛᤠᤏ ᤕᤧᤵᤛᤧ᤹ᤀᤥ᥄ ᤂᤧᤸᤗᤧ ᤁᤢᤈᤀᤡ᤺ᤳᤜᤠ᤹ ᤏᤢ ᤏᤠᤘᤠᤀᤡᤳᤗᤠᤜᤠ᤹ ᤁᤢᤶᤈᤡᤰᤔᤠ ᤔᤧᤒᤥᤱᤗᤥ॥ ᤂᤧᤸᤗᤧ ᤁᤢᤔᤠᤱ ᤒᤣᤗ ᤏᤢ ᤔᤖᤥᤍᤁᤜᤠ᤹ ᤛᤠ᤹ᤖᤡᤰ ᤁᤢᤏᤠᤔᤧᤴᤇᤠ᤹ ᤔᤧᤒᤥᤱᤗᤥ॥ 3 ᤌᤣᤀᤠᤱᤓᤧᤸᤗᤧ ᤌᤠᤱᤃᤧᤳ ᤗᤠᤶᤒᤠ ᤗᤳᤇᤠ ᤛᤢᤘᤠᤱ ᤌᤡᤰᤗᤧ ᤂᤢᤏᤧ᤹ ᤑᤳᤋᤢᤖᤥ ᤂᤧᤒᤩᤠᤱ ᤂᤧᤵᤔᤥ ᤕᤠᤶᤔᤥ ᤜᤠ᤺ᤳᤋᤠᤱ ᤔᤧᤴᤕᤢᤱᤔᤏᤠᤒᤠ ᤔᤢᤖᤧᤰ ᤂᤠᤖᤧᤰ ᤂᤠᤵᤐᤢᤌᤩ᤺ᤱ ᤐᤥᤱᤗ ᤆᤥᤃᤢᤖᤥ॥ ᤁᤧᤖᤧᤰ ᤔᤏᤠᤜᤠ᤹ ᤔᤧᤒᤣ᤺ᤰ ᤔᤧᤄᤧᤳᤗᤥ. ᤔᤧᤴᤇᤠᤶ ᤕᤠᤵᤔᤡ ᤏᤢ ᤌᤰᤛᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ॥” ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤢ᤺ᤱ ᤔᤧᤍᤠ᤹᤺ 4 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤴ ᤁᤧᤍᤠᤒᤠ ᤕᤧᤴᤜᤠ᤹ᤀᤥ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤏᤢ᤺ᤱ ᤔᤧᤍᤠᤖᤥ॥ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤃᤥ᤺ᤳᤋᤢᤖ ᤂᤧᤱᤜᤠ᤹ ᤔᤧᤜᤠ᤺ᤵ ᤔᤧᤈᤡ᤺ᤱᤗ ᤔᤧᤍᤠᤖᤥ॥ 5 ᤂᤧᤱᤜᤠ᤹ᤖᤧ ᤕᤖᤢᤛᤗᤧᤔ ᤐᤣ᤺ᤰᤔᤠ ᤗᤠᤶ ᤛᤣ᤺ᤴᤔᤧᤍᤥᤛᤢᤖᤥ ᤜᤧᤰᤁᤩᤠᤱ ᤕᤠᤶᤔᤥ ᤜᤡᤶᤔᤥ ᤏᤢ᤺ᤱᤔᤠ ᤔᤧᤜᤣ᤺ᤰᤗᤥ॥ ᤂᤧᤱᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤶᤔᤢ᤺ᤶᤔᤏᤠᤒᤠ ᤔᤧᤴᤏᤢᤵᤔᤏᤠᤒᤠ ᤔᤠᤱᤜᤢᤵ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴᤏᤢ ᤔᤧᤈᤥᤃᤢᤖᤥ॥ 6 “ᤀᤠᤔᤏᤠᤜᤠ᤹ ᤁᤧᤔᤠᤒᤠ ᤔᤧᤸᤗᤢᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤧᤱᤜᤠ᤹ ᤗᤠᤶᤔᤧᤓᤥ᤺ᤳᤇᤢᤛᤡᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤧᤱᤜᤠ᤹ ᤔᤧᤔᤕᤧᤖ ᤔᤧᤜᤡᤛᤢ ᤔᤧᤍᤣᤛᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤔᤧᤔᤠᤛᤢ ᤔᤧᤍᤣᤛᤢᤖᤥ ᤂᤧᤒᤩᤠᤱ ᤀᤠᤵᤑᤣᤰ ᤔᤧᤸᤗᤢᤰ ᤗᤢᤵᤐᤥ ᤏᤢ᤺ᤱᤔᤠ ᤋᤠᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤗᤠᤶᤔᤡᤴ ᤏᤡᤱᤘᤠ᤹ ᤀᤡ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥ 7 ᤂᤧᤱᤜᤠ᤹ ᤁᤧᤍᤢᤶᤒᤠ ᤁᤧᤖᤧᤰᤗᤧ ᤂᤧᤱᤜᤠ᤹ ᤔᤧᤗᤖᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. ‘ᤀᤠᤏᤡᤃᤣ ᤂᤧᤱᤜᤠ᤹ ᤑᤳᤋᤢᤶᤛᤡᤶᤒᤧᤒᤠᤀᤥ ᤜᤧᤴᤏᤠᤱ ᤑᤧᤴ ᤕᤠ᤺ᤶᤒᤰ ᤆᤥᤃᤢᤶᤒᤧᤒᤠ ᤜᤥᤵᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤧᤰᤂᤠᤒᤠ ᤂᤢᤴᤇᤡ᤹ ᤏᤠ᤺ᤶᤛᤡᤱᤔᤠᤍᤧᤴ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤛᤠᤱᤅᤡᤸᤗᤧ ᤋᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥’ 8 “ᤁᤖ ᤀᤠᤸᤗ. ᤒᤣᤒᤡᤗᤥᤏᤗᤠᤶ ᤂᤧᤳᤋᤠᤛᤡᤶᤔᤧ᤹ᤀᤥ᥄ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤗᤧᤖᤧᤶᤔᤧ᤹ᤀᤥ᥄ ᤌᤰᤛᤠ ᤗᤢᤵᤐᤥ ᤗᤠᤶᤗᤥᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤁᤢᤀᤡᤛᤡᤰ. ᤀᤠᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤶᤔᤥ ᤕᤠᤶᤔᤥ ᤗᤠᤶᤗᤥᤛᤧᤶᤛᤡᤶᤔᤧ᤹ᤀᤥ॥ 9 ᤌᤣᤀᤠᤱᤓᤧᤸᤗᤧ ᤌᤠᤱᤃᤧᤳ ᤗᤧᤵᤔᤠᤱᤗᤠᤶ ᤕᤶᤒᤠ ᤛᤢᤘᤠᤱᤒᤠ ᤌᤰᤛᤢᤒᤠᤜᤠ᤹ ᤑᤥ᤺ᤰᤂᤢᤱᤛᤡᤱᤗ ᤐᤳᤋᤠᤖᤥ॥ ᤒᤣᤒᤡᤗᤥᤏᤧᤴ ᤑᤵᤔᤠᤖᤧ ᤗᤠᤃᤡ ᤌᤰᤛᤢᤒᤠᤜᤠ᤹ᤀᤥ ᤂᤧᤱᤜᤠ᤹ ᤔᤧᤓᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤴ ᤗᤠᤈᤣᤴ ᤜᤢᤰᤁᤥ ᤔᤧᤎᤠᤛᤢᤖᤥ॥ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤥ᤺ᤱᤜᤠ᤹ ᤁᤢᤍᤥ᤺ᤵᤔᤠ ᤐᤣ᤺ᤰᤗᤥ. ᤂᤧᤱᤜᤠ᤹ᤖᤧ ᤔᤧᤛᤥ᤺ᤰᤋᤢᤒᤠᤴ ᤔᤧᤴᤕᤠᤱᤅᤣ ᤔᤧᤴᤀᤠᤒᤢᤴᤗᤥ᥄ 10 ᤔᤧᤏᤠᤵᤋᤢᤛᤡᤒᤠ ᤐᤠ᤺ᤴᤜᤠ᤹ᤖᤧ ᤂᤢᤴᤇᤡ᤹ ᤏᤡᤱ ᤔᤧᤗᤧ᤹ᤖᤢᤴᤗ ᤌᤠᤖᤡᤰ ᤁᤧᤓᤵᤐᤠᤜᤠ᤹ᤖᤧ ᤒᤣᤒᤡᤗᤥᤏᤡᤕᤠᤜᤠ᤹ ᤔᤧᤏᤠᤵᤋᤢᤛᤡᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” ᤒᤣᤒᤡᤗᤥᤏᤧᤴ ᤔᤧᤰ 11 “ᤛᤣᤃᤢᤱᤛᤡᤱᤒᤠ ᤀᤠᤔᤏᤠᤜᤠ᤹ ᤁᤧᤏᤠᤵᤋᤢᤶᤛᤡᤶᤗᤥ. ᤂᤡᤏᤡ᤹ ᤁᤧᤛ᤺ᤳᤋᤡ᤹ ᤜᤧᤰᤁᤩᤠᤱ ᤕᤧᤕᤧ ᤁᤧᤗ᤹ᤖᤡᤖᤥ॥ ᤏᤧᤏᤧᤒᤠᤍᤧᤴ ᤐᤡᤳ ᤆᤠᤖᤠᤶᤍᤧᤴᤏᤥ ᤐᤡᤳᤛᤠᤳᤋᤡᤴ ᤜᤧᤰᤁᤣ ᤂᤡᤏᤡ᤹ ᤐᤡᤳᤆᤠᤰ ᤐᤡᤳᤆᤠᤰ ᤁᤧᤒᤡᤴᤍᤡᤖᤥ ᤜᤧᤰᤁᤩᤠᤱ ᤁᤢᤶᤒᤠᤒᤠ ᤀᤴᤏᤡᤴ ᤜᤧᤰᤁᤣ ᤀᤡᤜᤧᤜᤧ ᤁᤧᤗ᤹ᤖᤡᤖᤥ॥ 12 ᤁᤖ ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤺ᤱᤃ ᤛᤡᤖᤡᤱᤔᤔᤠ ᤏᤢ ᤏᤠᤎᤠᤔᤥ ᤌᤠᤖᤥ॥ ᤂᤡᤏᤡ᤹ᤃ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ. ᤆᤫᤠ᤺ᤳ ᤁᤧᤜᤥᤵᤐᤠ ᤏᤢ ᤆᤡᤈᤡ ᤂᤰᤂᤰᤐᤠ ᤗᤠᤈᤣ᤹ᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤢ᤺ᤰᤐᤠ ᤛᤢᤘᤠᤱ ᤁᤧᤒᤥᤰᤂᤡᤖᤥ॥ 13 “ᤕᤜᤘᤣ ᤍᤠᤱᤒᤠᤴ ᤁᤢᤛᤠᤰᤁᤧᤴ ᤐᤥᤃᤧᤒᤠᤸᤗᤧ ᤆᤥᤃᤢᤸᤗᤧ. ᤒᤣᤒᤡᤗᤥᤏᤧᤴ ᤔᤢᤖᤧᤰ ᤂᤠᤖᤧᤰᤐᤠ ᤌᤣᤏᤠᤎᤣᤒᤠ ᤗᤠᤈᤣ᤹ ᤐᤥᤱᤗᤥ॥ ᤂᤧᤵᤔᤥᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤂᤧᤱᤜᤠ᤹ ᤁᤧᤖᤧᤰ ᤆᤡᤈᤡᤱ ᤕᤱᤔᤠ ᤔᤧᤛᤡᤖᤥ ᤜᤧᤰᤁᤩᤠᤱ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤒᤠᤴ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤜᤠ ᤔᤧᤔᤧᤳᤋᤢᤖᤥ॥ 14 “ᤀᤥᤘᤠ. ᤂᤡᤏᤡ᤹ ᤁᤧᤖᤧᤰ ᤐᤡᤛᤠᤱᤒᤠ ᤛᤢᤘᤠᤱᤛᤣ. ᤒᤣᤒᤡᤗᤥᤏᤧᤴ ᤑᤵᤔᤠᤖᤧ ᤗᤠᤃᤡ ᤔᤢᤴᤏᤠᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤋᤥᤱ ᤗᤡ ᤁᤧᤀᤠᤵᤐᤠᤜᤠ᤹ᤖᤧ ᤂᤧᤴ ᤔᤧᤀᤠᤒᤢᤖᤖᤥ. ᤋᤥ᤺ᤱᤜᤠ᤹ ᤗᤳᤇᤠᤀᤠᤱ ᤔᤧᤴᤏᤴᤇᤢᤴᤗᤖᤥ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤸᤗᤧ ᤗᤠᤕᤥ ᤗᤠᤛᤥᤳ ᤆᤥᤃᤢᤀᤠᤱ ᤘᤠ᤹ᤖᤥ॥ 15 ᤁᤧᤖᤧᤰ ᤐᤡᤛᤠᤱᤗᤠᤶ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠ ᤀᤡᤰᤗᤠᤴ ᤗ᤺ᤳᤋᤧᤶᤔᤧ᤹ᤀᤥ᥄ ᤀᤥᤔᤧᤳᤋᤧᤶᤔᤧ᤹᥄ ᤂᤢᤏᤧ᤹ ᤂᤡᤏᤡ᤹ ᤜᤢᤰᤁᤥ ᤜᤢᤰᤛᤢᤵᤛᤡᤱᤗᤥ᥄ ᤂᤧᤸᤗᤧ ᤁᤢᤗᤢᤱᤎᤠᤰᤜᤠ᤹ ᤗᤢ᤺ᤴᤍᤧᤀᤠᤱ ᤏᤧᤖᤥ॥ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤒᤠᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤂᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤧᤶᤔᤧ᤹ᤀᤥ॥ ᤂᤧᤸᤗᤧ ᤘᤣ᤹ᤜᤠ᤹ ᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤂᤧᤴ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤧᤶᤔᤧ᤹ᤀᤥ᥄ 16 ᤁᤢᤈᤠ ᤁᤧᤜᤣ᤹ᤒᤠᤜᤠ᤹ ᤁᤧᤖᤧᤰ ᤒᤣᤒᤡᤗᤥᤏᤗᤠᤶ ᤑᤧᤳᤋᤧᤶᤛᤡᤶᤔᤧ᤹ᤀᤥ. ᤁᤢᤈᤠ ᤁᤧᤛᤢᤶᤒᤠᤜᤠ᤹ ᤁᤧᤖᤧᤰ ᤐᤠᤱᤄᤧᤶᤍᤣᤛᤧᤶᤛᤡᤶᤔᤧ᤹ᤀᤥ॥ ᤏᤡᤱᤔᤡ᤺ᤸᤗᤧ ᤁᤢᤍᤠᤓᤣ᤺ᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤈᤣ᤹ᤜᤠ᤹ᤀᤥ ᤂᤧᤱᤜᤠ᤹ ᤕᤠᤶᤔᤥ ᤔᤧᤏᤢ᤺ᤱ ᤔᤧᤒᤣ᤺ᤰᤗᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤛᤠᤱ 17 “ᤀᤡᤛᤪᤠᤀᤡᤗᤡᤜᤠ᤹ᤃ ᤂᤡᤖᤡᤱᤒᤠᤜᤠ᤹ᤖᤧ ᤔᤧᤛᤧᤛᤢᤛᤡᤀᤠᤱ ᤁᤧᤘᤠ᤹ᤒᤠ ᤔᤧᤸᤗᤢᤰᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ ᤋᤃᤡ ᤂᤧᤱᤜᤠ᤹ ᤀᤛ᤻ᤛᤢᤖᤛᤔᤠ ᤜᤠᤱᤅᤡᤸᤗᤧ ᤆᤛᤡᤖᤥ॥ ᤕᤠᤱᤛᤡ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤕ᤺ᤵᤛᤢ ᤐᤡᤖᤢᤛᤡᤖᤥ॥” 18 ᤂᤧᤸᤗᤧᤆᤥᤃᤢᤸᤗᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤂᤢᤶᤍᤡᤱ ᤐᤡᤖᤢᤱᤒᤠ ᤜᤧᤰᤁᤣ ᤀᤠᤸᤗ ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤗᤠᤈᤣ᤺ᤴᤏᤠᤱ ᤂᤢᤶᤍᤡᤱ ᤐᤡᤖᤢᤱᤗᤥ॥ 19 ᤁᤷᤔᤣᤗ ᤏᤢ ᤒᤠᤛᤠᤏᤒᤠ ᤆᤠᤖᤠᤶᤔᤠᤍᤧᤴᤜᤠ᤹ᤀᤥ ᤁᤢᤈᤠ ᤆᤠᤔᤠᤖᤧ ᤗᤠᤃᤡ ᤕᤠᤶᤔᤥ ᤌᤡᤰᤗᤧᤱ ᤂᤢᤏᤧ᤹ ᤁᤢᤛᤡᤰ ᤀᤣ᤺ᤵᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤀᤣᤑᤪᤠᤀᤡᤔ ᤏᤢ ᤃᤡᤗᤠᤍᤒᤠ ᤁᤥ᤺ᤰᤔᤠ ᤑᤠᤱᤈᤱᤅᤥ. ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ᤀᤥ ᤀᤠᤱᤃᤠ᤹ ᤕᤠᤶᤔᤥ ᤏᤢ᤺ᤰᤋᤢᤱ ᤋᤠᤖᤢᤱᤗᤥ॥” 20 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤴ ᤕᤧᤴᤜᤠ᤹ᤀᤥ ᤀᤡᤛᤪᤠᤀᤡᤗᤀᤥ ᤀᤡᤃᤪ ᤕᤜᤢᤍᤠᤀᤥ ᤗᤠᤕᤥ ᤗᤠᤛᤥᤳ ᤌᤧᤔᤠᤀᤠᤱ ᤂᤥᤔᤧᤍᤧᤳᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤋᤠᤱᤄᤢᤱᤛᤡᤱᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤀᤠᤱᤃᤠ᤹ ᤗᤧᤵᤔᤡ ᤐᤡᤖᤢᤱᤛᤡᤱᤗᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤣᤒᤡᤗᤥᤏᤧᤴ ᤂᤢᤶᤍᤡᤱ ᤐᤡᤖᤢ 21 “ᤔᤖᤠᤋᤤᤔᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤏᤢ ᤐᤁᤥᤍᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ. ᤀᤠᤱᤃᤠ᤹ ᤀᤠᤎᤰᤛᤢᤒᤠᤛᤣ. ᤂᤡᤏᤡ᤹ ᤌᤥ ᤐᤣᤃᤧᤶᤔᤧ᤹ᤀᤥ॥ ᤀᤠᤱᤃᤠ᤹ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤢᤀᤡᤛᤡᤰ. ᤂᤧᤱᤜᤠ᤹ ᤏᤠ᤺ᤳᤋᤧᤶᤛᤡᤶᤔᤧ᤹. ᤛᤧᤖᤧᤶᤛᤡᤶᤔᤧ᤹ᤀᤥ. ᤂᤧᤶᤒᤩᤠᤱ ᤂᤧᤱᤜᤠ᤹ ᤂᤰᤐᤧᤳ ᤔᤧᤰᤂᤧᤶᤛᤡᤶᤔᤧ᤹ᤀᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 22 “ᤔᤧᤰᤔᤠᤛᤡᤔᤠ ᤐᤕᤶ ᤕᤶᤒᤠ ᤀᤡᤰᤗᤠ ᤏᤢ ᤌᤱᤅᤥᤒᤠ ᤜᤕᤱ ᤁᤡᤸᤗᤡᤱᤅᤡᤴ ᤗᤠᤈᤣ᤹ᤀᤥ ᤂᤧᤶᤍᤧᤳᤗᤖᤥ॥ 23 ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠ ᤌᤘᤠ ᤒᤣᤒᤡᤗᤥᤏᤧᤴ. ᤜᤧᤖᤧᤀᤠᤱ ᤁᤢᤶᤈᤡᤰᤔᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤒᤣᤒᤡᤗᤥᤏᤧᤴ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤐᤥᤱᤗᤥ᥄ 24 ᤒᤣᤒᤡᤗᤥᤏᤣ. ᤂᤧᤏᤧ᤹ ᤂᤧᤵᤛᤧ᤹ᤀᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤆᤧᤴ ᤁᤧᤛᤢᤱᤅᤠᤱ ᤏᤧᤖᤥ॥ ᤂᤧᤏᤧ᤹ ᤁᤧᤶᤍᤧᤶᤛᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤋᤧᤴᤎᤱ ᤁᤧᤈᤥᤃᤧᤀᤠᤱ ᤘᤠ᤹ᤖᤥ॥ 25 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤓᤧᤕᤢᤶᤜᤠ᤹ ᤑᤡ᤺ᤰᤂᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤥ ᤂᤧᤴ ᤑᤧᤈᤠᤑᤧᤕᤢᤶᤜᤠ᤹ ᤗ᤺ᤳᤋᤢᤀᤠᤱ ᤘᤠ᤹ᤖᤥ॥ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤳᤋᤢᤖᤥ॥ 26 ᤀᤥᤘᤠ. ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤗᤠᤶ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤩᤧᤶᤔᤧ᤹ᤀᤥ॥ ᤂᤧᤸᤗᤧ ᤁᤢᤈᤠ ᤕᤢᤱᤔᤠ ᤌᤠ᤺ᤱᤜᤠ᤹ ᤕᤛᤧᤶ ᤐᤡᤖᤧᤶᤔᤧ᤹ᤀᤥ॥ ᤂᤧᤸᤗᤧ ᤁᤢᤜᤡᤶᤜᤠ᤹ ᤏᤢ ᤁᤢᤗᤢᤱᤎᤠᤰᤜᤠ᤹ ᤀᤢ᤺ᤰᤐᤧᤳ ᤗᤢᤶᤛᤡᤱᤅᤠᤱ ᤏᤧᤖ ᤗᤢ᤺ᤴᤍᤧᤶᤍᤣᤛᤧᤶᤔᤧ᤹ᤀᤥ॥ ᤂᤧᤴ ᤕᤢᤔᤪᤧᤰ ᤔᤧᤰᤂᤧᤶᤔᤧ᤹ᤀᤥ. ᤂᤧᤒᤩᤠᤱ ᤁᤢᤎᤧᤔᤠᤎᤡᤰᤁᤠᤱ ᤔᤧᤗᤧᤖᤧᤶᤔᤡᤴᤏᤧ᤹ᤀᤥ᥄ 27 ᤂᤧᤸᤗᤧ ᤁᤢᤶᤒᤠᤒᤠ ᤁᤢᤒᤡᤳᤜᤠ᤹ᤀᤠᤱ ᤔᤧᤰᤂᤧᤶᤛᤡᤶᤔᤧ᤹ᤀᤥ ᤂᤧᤱᤜᤠ᤹ᤀᤠᤱ ᤂᤢᤴᤇᤡ᤹ ᤗᤠᤃᤡ ᤁᤡᤵᤔᤠ ᤁᤧᤄᤢᤒᤠ ᤆᤥᤰᤗᤥ᥄ ᤂᤧᤱᤜᤠ᤹ ᤁᤧᤖᤧᤰ ᤛᤧᤖᤠᤶᤛᤡᤶᤔᤧ᤹ᤀᤥ᥄ ᤂᤧᤱᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤖᤧ ᤁᤢᤕᤧᤴᤏᤡᤴ ᤏᤡ᤺ᤵᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥ 28 ᤂᤢᤏᤧ᤹ ᤁᤢᤜᤡᤶ ᤁᤧᤗᤢ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤁᤢᤗᤧᤰᤘᤠ ᤏᤢ᤺ᤰᤋᤢ ᤐᤡᤖᤢᤛᤡᤀᤠᤱ ᤘᤠ᤹. ᤂᤧᤱᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤥ ᤔᤧᤒᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤒᤣᤒᤡᤗᤥᤏᤗᤠᤶ ᤁᤧᤄᤧᤳᤇᤡᤱᤒᤠ ᤔᤏᤠᤜᤠ᤹ ᤂᤧᤵᤛᤧᤶᤛᤡᤶᤔᤧ᤹ᤀᤥ॥ 29 “ᤋᤥᤱ ᤗᤡ ᤁᤧᤕᤠᤱᤒᤠᤜᤠ᤹ ᤒᤣᤒᤡᤗᤥᤏ ᤔᤧᤍᤠᤖ ᤑᤠ᤹ᤀᤠᤱ ᤂᤡᤏᤡ᤹ ᤀᤡᤱᤄᤱ ᤜᤠᤰᤋᤧᤶᤛᤡᤶᤔᤧ᤹ᤀᤥ॥ ᤕᤧᤰᤕᤰᤁᤡᤴ ᤁᤒᤪᤡᤱ ᤁᤡᤷᤃᤵ ᤁᤒᤧᤶᤔᤧ᤹ᤀᤥ ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴᤏᤠᤱ ᤂᤧᤳᤇᤡᤱᤔᤠ ᤔᤧᤴᤇᤢᤰᤏᤧᤴᤗᤖᤥ॥ ᤂᤧᤸᤗᤧ ᤘᤣ᤹ᤜᤠ᤹ ᤔᤧᤳᤋᤢᤛᤡᤀᤠᤱ ᤘᤕᤧᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤀᤠᤱ ᤂᤧᤴ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤛᤢᤳᤌᤥ ᤆᤥᤃᤢᤀᤠᤱ ᤘᤠ᤹ᤖᤥ॥ 30 ᤂᤧᤸᤗᤧ ᤌᤠᤱᤒᤧᤴ ᤁᤢᤔᤏᤠᤜᤠ᤹ ᤔᤠᤖᤠᤶᤜᤠ᤹ᤀᤥ ᤔᤧᤈᤥᤴᤗᤥ. ᤂᤧᤴ ᤕᤧᤴᤏᤥ ᤂᤧᤸᤗᤧ ᤁᤢᤎᤰᤛᤢᤒᤠᤜᤠ᤹ ᤔᤧᤛᤧᤖᤢᤛᤡᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 31 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤛᤣ. ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤔᤡᤀᤠᤖᤥ. ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤐᤡᤔᤠ ᤕᤧᤴᤏᤡᤴ ᤏᤡ᤺ᤵᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥ 32 ᤀᤠᤱᤍᤡᤱ ᤁᤧᤗ᤹ᤒᤠ ᤗᤠᤈᤣ᤹ᤀᤣ. ᤂᤧᤏᤧ᤹ ᤁᤧᤍᤥ᤺ᤰᤁᤠᤱ ᤁᤧᤈᤥ᤺ᤴᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤳᤋᤡᤸᤗᤧᤀᤠᤱ ᤁᤧᤶᤓᤥ᤺ᤱᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤒᤠ ᤁᤧᤕᤧᤰᤕᤰᤜᤠ᤹ᤀᤥ ᤀᤠᤱᤃᤠ᤹ ᤔᤡᤓᤠ᤺ᤳᤋᤪᤠ ᤁᤣ᤺ᤳᤋᤢᤱᤗᤥ ᤂᤧᤸᤗᤧ ᤂᤧᤱᤜᤠ᤹ ᤂᤡᤷᤗᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤡᤎᤡᤰᤂᤢᤖᤥ॥” 33 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ ᤐᤡᤷᤒᤣ᤺ᤶᤒᤠ ᤔᤧᤈᤠ᤺ᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤜᤢᤰᤁᤥ ᤁᤧᤎᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤍᤧᤶᤛᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣ᤺ᤰᤔᤠ ᤔᤧᤶᤓᤠ᤺ᤰᤋᤢᤛᤡᤴᤗᤥ॥ 34 ᤁᤖ ᤂᤧᤱᤜᤠ᤹ ᤁᤧᤎᤧ᤹ᤒᤠᤴ ᤁᤧᤎᤢᤶᤒᤠ ᤆᤥᤰᤗᤥ॥ ᤂᤢᤏᤧ᤹ ᤁᤢᤔᤡᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤌᤣ᤺ᤰᤋᤢ ᤏᤠᤅᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤀᤥ ᤕᤠᤶᤔᤥ ᤂᤢᤏᤧ᤹ ᤏᤠ᤺ᤶᤛᤡᤱᤔᤠ ᤐᤡᤖᤢᤛᤡᤖᤥ॥ ᤁᤖ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤏᤠ᤺ᤶᤛᤡᤱᤔᤠ ᤜᤥᤵᤗᤥ᥄” 35 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤔᤧᤱᤔᤧᤱᤒᤠ ᤋᤠᤓᤣ᤺ᤸᤗᤧ ᤒᤣᤒᤡᤗᤥᤏᤡᤜᤠ᤹ ᤆᤩᤧᤵᤋᤢᤛᤡᤖᤥ. ᤁᤸᤗᤧ ᤒᤣᤒᤡᤗᤥᤏᤒᤠ ᤔᤏᤠᤜᤠ᤹ ᤆᤩᤧᤵᤋᤢᤛᤡᤖᤥ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤛᤡᤰᤁᤢᤶᤏᤡᤒᤠ ᤁᤢᤔᤏᤠᤜᤠ᤹ᤀᤠᤱ ᤆᤩᤧᤵᤋᤢᤛᤡᤖᤥ॥ 36 ᤛᤡᤰᤁᤢᤶᤛᤠᤒᤠ ᤁᤢᤛᤢᤈᤠᤛᤠᤒᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤍᤱ ᤔᤧᤒᤥᤱᤗᤥ॥ ᤂᤧᤸᤗᤧ ᤁᤧᤎᤢᤶᤒᤠ ᤁᤢᤎᤰᤛᤢᤒᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤢᤛᤡᤖᤥ. ᤂᤧᤒᤩᤠᤱ ᤂᤧᤱᤜᤠ᤹ ᤁᤡᤔᤠ ᤕᤱᤔᤧᤸᤗᤧ ᤋᤧᤶᤛᤢᤛᤡᤖᤥ॥ 37 ᤋᤠᤓᤣ᤺ᤸᤗᤧ ᤁᤢᤀᤴᤜᤠ᤹ ᤆᤩᤧᤵᤋᤢᤛᤡᤖᤥ ᤜᤧᤰᤁᤩᤠᤱ ᤁᤢᤀᤴᤗᤠᤎᤠᤜᤠ᤹ ᤏᤢ ᤘᤣ᤹ ᤗᤠᤈᤣ᤹ᤜᤠ᤹ ᤗᤠᤶᤒᤠᤒᤠ ᤁᤢᤴᤈᤢᤶᤜᤠ᤹ ᤆᤩᤧᤵᤋᤢᤛᤡᤖᤥ. ᤂᤶᤓᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤔᤧᤴᤇᤢᤔᤠ ᤜᤧᤰᤋᤱᤔᤠ ᤔᤧᤒᤥᤱᤗᤥ॥ ᤋᤠᤓᤣ᤺ᤸᤗᤧ ᤂᤧᤸᤗᤧ ᤁᤢᤕᤠᤱ ᤁᤧᤕᤢᤱᤒᤠᤜᤠ᤹ ᤆᤩᤧᤵᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤔᤧᤏᤠᤵᤋᤢᤛᤡᤖᤥ॥ 38 ᤂᤧᤸᤗᤧ ᤁᤢᤈᤫᤠ᤺ᤳᤜᤠ᤹ ᤛᤠᤱᤕᤠᤰᤔᤧᤸᤗᤧ ᤋᤖᤢᤖᤥ. ᤁᤴ ᤛᤷᤃᤧᤱ ᤜᤣᤀᤠᤱ ᤆᤵᤗ ᤕᤠ᤺ᤴᤍᤢᤖᤥ॥ ᤜᤧᤰᤁᤩᤠᤱ ᤌᤣᤀᤠᤱᤒᤣ᥅ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤗᤠᤈᤣᤴ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤋᤡᤶᤛᤧᤀᤠᤱ ᤏᤧᤖᤥ॥ ᤂᤧᤒᤩᤠᤱ ᤔᤏᤠᤜᤠ᤹ ᤂᤧᤱᤜᤠ᤹ᤏᤢ ᤔᤧᤏᤠᤱᤗ ᤌᤠᤖᤡᤰ ᤗᤢᤱᤔᤠ᤹ᤜᤡ᤺ᤶᤔᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ॥ 39 “ᤜᤠᤖᤠᤀᤣ ᤒᤣᤒᤡᤗᤥᤏᤧᤴ ᤋᤠᤶᤓᤢᤱ ᤁᤥ᤺ᤳᤆᤥᤜᤠ᤹ ᤏᤢ ᤔᤢᤖᤧᤰ ᤂᤠᤖᤧᤰ ᤋᤧᤴᤏᤥᤒᤠ ᤌᤰᤛᤠᤜᤠ᤹ᤖᤧ ᤔᤧᤕᤢᤰᤋᤢᤖᤥ॥ ᤁᤴ ᤑᤰᤌᤡ᤺ᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤎᤥ᤺ᤰᤍᤧᤴ ᤐᤥᤱᤗᤥ॥ ᤂᤧᤵᤔᤥ ᤕᤠᤶᤔᤥ ᤔᤏᤠᤜᤠ᤹ ᤔᤧᤴᤕᤢᤱᤏᤧᤴᤗᤥ. ᤁᤴ ᤀᤠᤓᤧᤸᤗᤧᤛᤠᤱ ᤆᤡᤈᤡ ᤂᤰᤂᤰ ᤐᤥᤱᤗᤥ॥” 40 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤛᤍᤥᤔ. ᤃᤔᤥᤖᤠ᤺ᤴ ᤏᤢ ᤁᤢᤒᤣᤛᤠᤱᤒᤠ ᤕᤧᤰᤕᤰᤜᤠ᤹ ᤀᤠᤱᤃᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤒᤠ ᤁᤢᤀᤡᤛᤡᤰ. ᤀᤠᤱᤃᤠ᤹ ᤁᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ. ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤘᤠ᤹ᤏᤧᤴᤗᤥ. ᤁᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤕᤢᤱᤏᤧᤴᤗᤥ॥ 41 “ᤀᤥᤔᤧᤳᤋᤧᤶᤔᤧ᤹᥄ ᤌᤠᤱᤃᤧᤳ ᤗᤧᤵᤔᤠᤱᤗᤠᤶ ᤛᤠ᤹ᤖᤡᤰ ᤕᤖᤡᤰ ᤌᤰᤛᤢᤒᤠᤜᤠ᤹ ᤔᤧᤕᤢᤖ ᤔᤧᤒᤳᤗᤥ. ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤗᤠᤶ ᤁᤧᤍᤰᤗᤧᤱᤘᤠᤀᤥ ᤕᤖᤡᤰ ᤜᤠᤱᤜᤠ᤹ ᤏᤢ ᤕᤖᤡᤰ ᤛᤢᤘᤠᤱᤜᤠ᤹ ᤔᤧᤒᤥ᤺ᤰᤗ ᤔᤧᤒᤳᤗᤥ॥ 42 ᤂᤧᤱᤜᤠ᤹ᤖᤧ ᤗᤡᤜᤠ᤹ ᤏᤢ ᤗᤠ᤺ᤰᤜᤠ᤹ ᤑᤧᤈᤢᤶᤓᤧᤕᤠ ᤔᤧᤃᤳᤋᤢᤖᤥ॥ ᤂᤧᤱᤜᤠ᤹ ᤁᤧᤀᤠ᤺ᤶᤒᤠ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤈᤥᤰᤗᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤗ᤹ᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤀᤴᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤋᤃᤡ ᤔᤧᤓᤧᤴᤗᤥ. ᤜᤧᤰᤁᤣ᤺ᤸᤗᤧ ᤘᤖ᤺ᤱᤅᤡᤴ ᤛ᤺ᤰᤐᤠ ᤜᤧᤰᤁᤣ ᤗ᤹ᤖᤥ॥ ᤂᤧᤱᤜᤠ᤹ ᤌᤱ ᤁᤧᤈᤥ᤺ᤰᤐᤠ ᤐᤖᤡᤰᤗᤧ ᤔᤧᤓᤧᤴᤗᤥ. ᤂᤧᤏᤧ᤹ ᤒᤣᤒᤡᤗᤥᤏᤧᤴ ᤔᤧᤱᤔᤠ ᤑᤠ᤹ᤀᤠᤱ ᤔᤧᤔᤢᤴᤇᤡᤱᤗᤥ॥ 43 ᤏᤡᤱᤔᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤀᤡᤱᤄᤱᤅᤡᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤡᤔᤠ ᤕᤱᤔᤠᤖᤧ ᤁᤢᤛᤠ᤹ᤀᤡ ᤕᤃᤧᤖᤥ॥ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤕᤱᤔᤠᤛᤡᤔᤠ ᤋᤢᤰᤂᤣ᤺ᤸᤗᤧ ᤂᤢᤏᤧ᤹ ᤋᤧᤶᤛᤢᤀᤠᤱ ᤘᤠ᤹ᤖᤥ॥ 44 “ᤆᤠᤖᤠᤶᤔᤠᤍᤧᤴᤏᤥᤒᤠ ᤔᤧᤸᤗᤢᤰᤜᤠ᤹ ᤐᤡᤳᤆᤠᤰ ᤐᤡᤳᤆᤠᤰ ᤐᤡᤳᤋᤢᤛᤡᤖ ᤕᤷᤍᤏᤒᤠ ᤋᤢᤶᤓᤢᤱᤗᤠᤜᤠ᤹ᤀᤥᤗᤠᤶ ᤂᤡᤖᤡᤱᤒᤠᤴ ᤗ᤺ᤶᤓᤧᤶᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤋᤠᤀᤠᤖᤥ॥ ᤒᤣᤒᤡᤗᤥᤏᤧᤴ ᤁᤢᤗᤠᤈᤣ᤹ᤗᤠᤶ ᤏᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤛᤣᤃᤢᤱᤒᤠ ᤗᤠᤶᤗᤥᤒᤠᤴ ᤕᤢᤰᤋᤡᤱ ᤆᤥᤃᤢᤱᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤜᤧᤰᤋᤱᤒᤠ ᤜᤠᤳ ᤘᤠ᤹ᤒᤣ᥅ ᤂᤧᤒᤩᤠᤱ ᤜᤠ᤺ᤳᤗᤧ ᤀᤠᤱᤃᤠ᤹ ᤂᤧᤔᤠ᤹ ᤛᤠ᤺ᤵᤔᤠ ᤛᤢᤰᤁᤠᤒᤣ᥅ ᤀᤠᤳᤋᤡᤴ ᤕᤢᤰᤛᤠᤒᤧᤸᤗᤧ ᤀᤠᤏᤡᤱᤘᤠᤴ ᤀᤵᤔᤠ ᤛᤢᤰᤋᤢᤒᤣ᥅ 45 “ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤏᤢ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤸᤗᤧ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤛᤣ᤺ᤰᤁᤡᤴ ᤂᤧᤵᤛᤧᤶᤔᤧ᤹ᤀᤥ॥ ᤆᤢᤈᤢᤰᤛᤠ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤀᤠᤱ ᤔᤧᤸᤗᤢᤰ ᤁᤢᤀᤡᤛᤡᤰ ᤔᤧᤀᤢ᤺ᤰᤂᤢ ᤔᤧᤎᤧᤔᤢᤛᤡᤖᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤔᤧᤔᤧᤰᤂᤢᤖᤥ॥ 46 ᤀᤰᤋᤱᤒᤠ ᤀ᤺ᤰᤔᤠ ᤀᤡᤰᤗᤠ᤺ᤸᤗᤧ ᤕᤥ᤹ᤒᤠᤴ ᤕᤱᤗᤥ. ᤒᤣᤒᤡᤗᤥᤏᤧᤴ ᤔᤧᤍᤣ᤹ᤖᤢᤀᤠᤱ ᤘᤠ᤹ᤖᤥ᥄ ᤜᤧᤰᤁᤩᤠᤱ ᤁᤸᤗᤧ ᤁᤢᤃᤡᤔᤠ ᤁᤢᤕᤱᤔᤠ ᤀᤡᤰᤗᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤂᤧᤶᤍᤧᤳᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.