ᤕᤷᤔᤡᤕᤠ 49 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤀᤶᤔᤥᤏᤧᤴ ᤂᤢᤶᤍᤡᤱ ᤐᤡᤖᤢ 1 ᤀᤶᤔᤥᤏᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤏᤥ ᤁᤴ ᤀᤡᤱᤄᤱᤅᤡᤴ ᤁᤧᤖᤧᤀᤠᤱ ᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤌᤣ ᤃᤠᤍᤒᤠ ᤗᤠᤈᤣᤴ ᤗᤰᤂᤥᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤜᤥ᤺ᤵᤐᤡ᥅ ᤁᤴ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤔᤥᤗᤣᤂ ᤔᤠᤱᤅᤡᤴ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤠᤱᤛᤧᤘᤠ ᤔᤧᤔᤧᤳᤋᤢᤒᤠᤒᤣ᥅ 2 ᤂᤧᤴ ᤁᤧᤍᤠᤒᤠ ᤕᤧᤴᤜᤠ᤹ᤀᤥ. ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤐᤠᤱ ᤖᤒ᤻ᤒᤠ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱᤅᤥᤒᤠ ᤜᤕᤱ ᤁᤡᤸᤗᤡᤱ ᤐᤥ᤺ᤰᤗ ᤆᤥᤃᤢᤱᤗᤥ॥ ᤆᤡᤈᤡ ᤂᤰᤂᤰ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠᤴ ᤗᤢᤶᤛᤡᤱᤗᤥ. ᤜᤧᤰᤁᤩᤠᤱ ᤁᤢᤒᤣᤛᤠᤱᤒᤠ ᤐᤠᤱᤈᤢᤶᤜᤠ᤹ ᤔᤡᤍᤡᤰᤗᤥ॥ ᤂᤧᤒᤩᤠᤱ ᤂᤡᤏᤡ᤹ ᤁᤧᤍᤣ᤹ᤖᤢᤶᤒᤠ ᤗᤠᤈᤣᤴ ᤀᤡᤛᤪᤠᤀᤡᤗᤖᤧ ᤕᤠᤶᤔᤥ ᤕᤠᤱᤏᤠ ᤋᤣ᤹ᤖᤢᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 3 “ᤜᤣᤛ᤻ᤒᤥᤏ ᤁᤧᤕᤢᤱᤒᤠᤛᤣ. ᤂᤡᤏᤡ᤹ ᤑᤡ᤺ᤰᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤣᤣ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ॥ ᤖᤒ᤻ᤒᤠᤒᤠ ᤔᤠᤏᤠᤛᤣ. ᤂᤡᤏᤡ᤹ ᤜᤠᤒᤧᤶᤔᤧ᤹ᤀᤥ᥄ ᤂᤡᤏᤡ᤹ ᤔᤧᤖᤡᤱ ᤌᤰᤔᤠ ᤆᤠᤱᤜᤠ᤹ ᤆᤠᤰᤂᤧᤶᤔᤧ᤹ᤀᤥ. ᤗᤢᤱᤎᤠᤰᤜᤠ᤹ᤀᤥ ᤏᤠ ᤏᤢ ᤁᤳᤏᤠ ᤗᤥ᤺ᤰᤋᤧᤶᤔᤧ᤹ᤀᤥ. ᤜᤧᤏᤠᤱᤓᤧᤸᤗᤧ ᤔᤥᤗᤣᤂ ᤔᤠᤱᤅᤡᤴ ᤁᤢᤕᤰᤕᤠᤒᤠᤜᤠ᤹ ᤜᤧᤰᤁᤩᤠᤱ ᤁᤢᤛᤢᤜᤠᤱᤃᤧᤶᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤖᤥ॥ 4 ᤆᤠ ᤁᤧᤏᤢ᤹ᤒᤠ ᤂᤡᤏᤡ᤹ ᤏᤧᤏᤧᤒᤠᤍᤧᤴᤜᤠ᤹ᤀᤥ ᤀᤠᤱᤍᤡᤱ ᤁᤧᤗ᤹ᤖᤡᤖᤥ ᤁᤖ ᤂᤧᤱᤜᤠ᤹ ᤜᤠᤖᤠᤀᤣ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥ ᤕᤠᤱᤛᤠᤁᤢᤴᤎᤣᤀᤥ. ᤐᤡᤑᤩᤢᤱ ᤁᤧᤈᤥ᤺ᤰᤔᤠ ᤔᤏᤠᤜᤠ᤹ᤀᤥ ᤂᤡᤏᤡ᤹ ᤏᤡᤱᤘᤠ᤹ ᤁᤧᤕᤢᤰᤂᤢᤶᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤜᤠᤴᤋᤡ ᤆᤥ᤺ᤰᤔᤠ ᤁᤧᤴᤇᤢᤰᤋᤡᤴ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤗᤥ॥” 5 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤖ ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤗᤢᤶᤔᤥ ᤀᤠᤱᤃᤠ᤹ ᤁᤡᤔᤠ ᤕᤱᤔᤠ ᤋᤠᤖᤢᤱᤗᤥ॥ ᤂᤡᤏᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤀᤠᤵᤑᤣᤰ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤶᤏᤠ᤺ᤳᤋᤡ ᤁᤧᤶᤍᤣᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤄᤧᤳᤇᤡᤱᤅᤡᤸᤗᤧ ᤂᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤜᤠ᤺ᤳᤗᤧᤀᤠᤱ ᤔᤧᤓᤢᤰᤂᤢᤴ ᤔᤧᤍᤠᤖᤢᤛᤡᤴᤗᤥ॥ 6 “ᤁᤖ ᤀᤠᤱᤃᤠ᤹ ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤏᤢ᤹ᤔᤠᤍᤠᤔᤧᤴ ᤕᤠᤶᤔᤥ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤀᤣᤍᤥᤔᤧᤴ ᤂᤢᤶᤍᤡᤱ ᤐᤡᤖᤢ 7 ᤁᤴ ᤀᤡᤱᤄᤱᤅᤡᤴ ᤀᤣᤍᤥᤔᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤖᤧᤀᤠᤱ ᤘᤕᤧ॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤋᤣᤔᤠᤏᤀᤥ ᤌᤣ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤜᤥ᤺ᤵᤐᤡ᥅ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤛᤢᤈᤠ ᤁᤧᤒᤡᤒᤠ ᤜᤠ᤺ᤳᤋᤠᤱ ᤜᤥ᤺ᤵᤐᤡ᥅ 8 ᤂᤡᤏᤡ᤹ ᤏᤢ᤺ᤰᤂᤧᤶᤔᤧ᤹ᤀᤠᤱ ᤂᤧᤳᤋᤠᤛᤡᤶᤔᤧ᤹ᤀᤥ᥄ ᤍᤍᤠᤏᤒᤠ ᤔᤏᤠᤛᤣ. ᤁᤣ᤺ᤶᤒᤠ ᤑᤢᤰᤁᤢᤜᤠ᤹ᤀᤥ ᤆᤡᤱᤛᤡᤱᤅᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤔᤧᤰᤔᤧᤴ ᤀᤣᤍᤥᤔᤀᤥ ᤋᤠᤖᤢᤱᤗᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤠᤱ ᤂᤢᤶᤍᤡᤱ ᤐᤡᤏᤡᤱᤗᤥ᥄ 9 ᤆᤧᤸᤗᤧᤰᤛᤣ᤹ ᤁᤧᤍᤢᤵᤐᤠ ᤔᤏᤠᤜᤠ᤹ᤖᤧ ᤀᤠᤓᤧᤸᤗᤧᤛᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤗᤠᤃᤡ ᤀᤠᤈᤧ᤺ᤳᤇᤡᤰ ᤗᤧᤖᤧᤶ ᤌᤩᤧᤶᤔᤧ᤹ᤀᤥ॥ ᤛᤧᤴᤍᤡᤰ ᤂᤢ᤺ᤴᤍᤪᤡᤰᤐᤠᤜᤠ᤹ ᤔᤧᤍᤩᤧᤛᤠᤱ ᤂᤧᤱᤜᤠ᤹ᤖᤧ ᤁᤧᤖᤧᤰᤁ ᤔᤧᤴᤍᤣ᤹ᤖᤢᤴᤒᤠ ᤘᤕᤧᤖᤥ॥ 10 ᤁᤖ ᤀᤠᤱᤃᤠ᤹ ᤀᤣᤍᤥᤔᤒᤠ ᤗᤠᤈᤣᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤔᤣ᤺ᤴᤏᤣ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤂᤧᤵᤔᤥ ᤆᤡᤱᤛᤡᤱᤔᤠᤍᤧᤴ ᤀᤠᤳᤋᤡᤀᤠᤱ ᤔᤧᤏᤧᤏᤧᤴᤗᤥ॥ ᤁᤸᤗᤧ ᤁᤢᤛ᤻ᤛᤠ ᤀᤅᤧ᤺ᤰᤘᤠᤜᤠ᤹. ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹. ᤜᤧᤰᤁᤩᤠᤱ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤁᤧᤖᤧᤰ ᤔᤧᤔᤧᤰᤗᤥ. ᤂᤧᤒᤩᤠᤱ ᤀᤣᤍᤥᤔᤧᤴ ᤀᤠᤵᤑᤣᤰᤁᤠᤱ ᤔᤧᤕᤠ᤺ᤰᤏᤧᤴᤗᤥ॥ 11 ᤁᤖ ᤂᤡᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤕᤧᤳᤇᤠᤒᤠᤜᤠ᤹ ᤀᤠᤱᤃᤠ᤹ ᤛᤧ᤺ᤵᤋᤢᤱᤛᤡᤱᤗᤥ॥ ᤂᤡᤏᤡ᤹ ᤔᤣᤔᤣᤍᤢᤔᤠ ᤔᤣ᤺ᤳᤜᤠ᤹ᤖᤧᤀᤠᤱ ᤁᤢᤓᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤗᤠᤶ ᤀᤥᤔᤧᤵᤔᤠ ᤔᤧᤛᤢᤰᤋᤢᤖᤥ॥” 12 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤋᤢᤰᤂᤣ ᤋᤢᤶᤔᤠ ᤔᤧᤶᤒᤥᤱᤏᤠᤒᤧᤸᤗᤧᤀᤣ ᤋᤢᤰᤂᤣ ᤋᤢᤶᤔᤠ ᤐᤥᤱᤏᤧᤓᤃᤪ. ᤂᤡᤏᤡ᤹ᤃ ᤀᤠᤰᤂᤧᤴ ᤛᤠ᤹ᤖᤡᤰ ᤀᤠᤸᤗᤛᤠᤱ ᤋᤢᤰᤂᤣ ᤋᤢᤶᤔᤠ ᤐᤥᤱ᤹᥄ ᤂᤡᤏᤡ᤹ ᤂᤢᤶᤍᤡᤱ ᤔᤧᤱᤄᤥᤀᤣ ᤐᤣ᤺ᤰᤔᤠᤀᤣ ᤁᤧᤴᤄᤥᤛᤡᤴ᤹᥄ ᤂᤢᤶᤍᤡᤱᤅᤡᤸᤗᤧ ᤂᤥᤷᤕᤠᤀᤥᤗᤠᤶᤒᤠ ᤂᤡᤏᤡ᤹ ᤁᤧᤎᤢᤅᤢᤶᤗᤀᤣ ᤐᤥᤱ᤹᥄” 13 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤡᤱᤅᤥ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤠ᤹. ᤂᤧᤴ ᤒᤥᤈᤪᤠ᤺ᤴ ᤁᤡᤵᤔᤠᤃᤧᤄᤢᤒᤠ ᤏᤡᤃᤧᤍᤧᤵᤐᤠ ᤏᤢ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠᤀᤠᤱ ᤁᤧᤗᤢᤶᤛᤡᤱᤒᤠ ᤐᤥᤱ᤹. ᤁᤴ ᤁᤢᤏᤠᤔᤧᤴᤇᤠ᤹ ᤏᤢ ᤔᤠᤱᤍᤣ ᤛᤠᤱᤃᤪᤠ ᤔᤧᤵᤔᤠ ᤆᤠᤜᤠᤰ ᤐᤥᤱ᤹॥ ᤁᤸᤗᤧ ᤁᤢᤒᤠᤱᤈᤢᤶᤜᤠ᤹ ᤏᤢ ᤁᤢᤒᤠᤱᤓᤣ᤹ᤜᤠ᤹ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰᤐᤠ ᤐᤥᤱᤗᤥ॥” 14 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤰᤂᤣ ᤔᤧᤵᤔᤠᤛᤡᤖᤧ ᤗᤠᤃᤡ ᤜᤠᤱᤗᤠᤀᤡᤱᤒᤠᤎᤡᤰ ᤔᤧᤒᤠᤱᤄᤢᤔᤢ ᤁᤧᤗ᤹ᤒᤠ ᤀᤡᤱᤄᤱᤎᤡᤰ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤵᤛᤢᤱᤅᤠᤱ ᤘᤠ᤹ᤖᤥ. “ᤀᤣᤍᤥᤔᤖᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤌᤢᤰᤁᤠᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ᥄” 15 ᤕᤜᤘᤣ ᤍᤠᤱᤒᤧᤸᤗᤧ ᤀᤣᤍᤥᤔᤧᤴ ᤀᤰᤂᤣ ᤔᤧᤳᤋᤢᤖᤥ. “ᤜᤢᤰᤁᤥ ᤁᤧᤶᤎᤠᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤧᤏᤧ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤢᤶᤔᤥ ᤌᤠᤏᤧᤖᤥ॥ ᤂᤧᤏᤧ᤹ ᤁᤧᤖᤧᤰᤗᤧ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤗᤥ॥ 16 ᤁᤡᤔᤠ ᤕᤱᤔᤠᤗᤠᤶ ᤀᤡᤱᤗᤧᤰᤁᤥ ᤁᤧᤎᤩᤧᤖᤥ. ᤁᤧᤀᤠᤱᤍᤡᤱ ᤁᤧᤗ᤹ᤔᤠᤗᤠᤶ ᤘᤣ᤹ᤜᤠ᤹ ᤁᤧᤗᤡ᤺ᤰᤋᤢᤛᤡᤖᤥ॥ ᤂᤧᤏᤧ᤹ ᤗᤢᤱᤕᤠᤱᤐᤣ᤹ ᤜᤠᤱᤕᤰᤁᤥ ᤁᤧᤕᤢᤱᤗᤥ ᤜᤧᤰᤁᤩᤠᤱ ᤆᤴᤈᤴᤗᤢᤱ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤁᤧᤕᤢᤰᤋᤢᤖᤥ॥ ᤁᤖ ᤂᤧᤏᤧ᤹ ᤁᤡ᤺ᤳᤌᤜᤠ᤹ᤏᤢ ᤛᤥᤛᤥᤖᤡᤰ ᤌᤧᤃᤢ ᤔᤠᤱᤘᤠᤜᤠ᤹ᤖᤧ ᤁᤢᤛᤶᤔᤥ ᤜᤠᤵ ᤁᤧᤈᤥᤃᤢᤛᤠᤱ. ᤀᤠᤱᤃᤠ᤹ ᤕᤥ ᤔᤰᤌᤠ᤺ᤴᤏᤣ ᤌᤠᤏᤧᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 17 “ᤀᤧᤍᤥᤔ ᤗᤠᤈᤣᤴ ᤁᤡᤵᤔᤠ ᤁᤧᤄᤢᤒᤠ ᤏᤡᤕᤠᤖᤠ ᤐᤥᤱᤗᤥ॥ ᤂᤧᤵᤔᤥᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠᤜᤠ᤹ ᤁᤧᤖᤧᤰ ᤔᤧᤃᤡᤀᤠᤱ ᤆᤡᤈᤡᤱ ᤕᤱᤔᤠ ᤔᤧᤛᤡᤖᤥ ᤜᤧᤰᤁᤩᤠᤱ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠᤴ ᤔᤧᤏᤡᤛᤢᤀᤠᤱ ᤂᤢᤴᤇᤡ᤹ ᤔᤢᤖᤠᤴ ᤜᤠ ᤔᤧᤔᤧᤳᤋᤢᤖ ᤛᤰᤔᤠ ᤔᤧᤛᤥ᤺ᤴᤇᤡᤱᤗᤥ॥ 18 ᤛᤍᤥᤔ ᤏᤢ ᤃᤔᤥᤖᤠ᤺ᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤒᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤂᤧᤴ ᤐᤣᤛᤠᤱᤒᤠ ᤐᤠᤱᤈᤢᤶᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤒᤠ ᤁᤢᤀᤡᤛᤡᤰ ᤁᤴ ᤕᤧᤰᤕᤰᤁᤡᤴᤏᤠᤱ ᤂᤠᤵᤐᤢᤌᤩ᤺ᤱ ᤐᤥᤱᤗᤥ.” ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ॥ “ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤘᤠ᤹ᤏᤧᤴᤗᤥ. ᤁᤵᤔᤥ ᤜᤠ᤺ᤳᤇᤡᤀᤠᤱ ᤔᤧᤴᤕᤢᤱᤏᤧᤴᤗᤥ॥ 19 ᤆᤠᤖᤠᤶᤔᤠᤍᤧᤴᤏᤥᤒᤠ ᤔᤧᤸᤗᤢᤰᤜᤠ᤹ ᤐᤡᤳᤆᤠᤰ ᤐᤡᤳᤆᤠᤰ ᤐᤡᤳᤋᤢᤛᤡᤖ ᤕᤷᤍᤏᤒᤠ ᤋᤢᤶᤓᤢᤱᤗᤠᤜᤠ᤹ᤀᤥᤗᤠᤶ ᤌᤧᤖᤡᤱᤒᤧᤴ ᤗ᤺ᤶᤓᤧᤶᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤋᤠᤀᤠᤖᤥ॥ ᤀᤣᤍᤥᤔᤧᤴ ᤁᤢᤗᤠᤈᤣ᤹ᤗᤠᤶ ᤏᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤛᤣᤃᤢᤱᤒᤠ ᤗᤠᤶᤗᤥᤒᤠᤴ ᤕᤢᤰᤋᤡᤱ ᤆᤥᤃᤢᤱᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤜᤧᤰᤋᤱᤒᤠ ᤜᤠᤳ ᤘᤠ᤹ᤒᤣ᥅ ᤂᤧᤒᤩᤠᤱ ᤜᤠ᤺ᤳᤗᤧ ᤀᤠᤱᤃᤠ᤹ ᤂᤧᤔᤠ᤹ ᤛᤠ᤺ᤵᤔᤠ ᤛᤢᤰᤁᤠᤒᤣ᥅ ᤀᤠᤳᤋᤡᤴ ᤕᤢᤰᤛᤠᤒᤧᤸᤗᤧ ᤀᤠᤏᤡᤱᤘᤠᤴ ᤀᤵᤔᤠ ᤛᤢᤰᤋᤢᤒᤣ᥅” 20 ᤀᤧᤍᤥᤔ ᤏᤢ ᤋᤣᤔᤠᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤛᤣ᤺ᤰᤁᤡᤴ ᤂᤧᤵᤛᤧᤶᤔᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤈᤢᤰᤛᤠ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤀᤠᤱ ᤔᤧᤸᤗᤢᤰ ᤁᤢᤀᤡᤛᤡᤰ ᤔᤧᤀᤢ᤺ᤰᤂᤢ ᤔᤧᤎᤧᤔᤢ ᤔᤧᤍᤣ᤹ᤖᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤖᤥ॥ 21 ᤀᤣᤍᤥᤶᤔᤡᤴ ᤔᤧᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤱᤗᤥ ᤂᤧᤸᤗᤧ ᤁᤢᤕᤱᤔᤠ ᤁᤧᤵᤔᤠ ᤀᤡᤰᤗᤠᤴ ᤜᤧ᤺ᤳᤋᤠᤱᤒᤠ ᤘᤖ᤺ᤱ ᤌᤠᤖᤡᤰᤁᤣ ᤂᤧᤶᤍᤧᤳᤗᤥ॥ 22 ᤀᤥᤔᤧᤳᤋᤧᤶᤔᤧ᤹᥄ ᤁᤡ᤺ᤳᤌᤧᤴ ᤜᤧᤰᤁᤣ ᤏᤡᤱᤔᤡᤴ ᤛᤢ᤺ᤰᤌᤠᤖᤥ. ᤒᤥᤈᤪᤠ᤺ᤸᤗᤧ ᤁᤢᤛᤶᤎᤠᤱ ᤁᤢᤗᤠᤵᤐᤡᤴ ᤜᤶᤓᤧ ᤔᤧᤳᤋᤢᤖᤥ॥ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤁᤢᤀᤡᤛᤡᤰ ᤔᤢᤰᤁᤧᤃᤢᤒᤠ ᤌᤰᤛᤢᤒᤠᤜᤠ᤹ᤀᤠᤱ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤍᤔᤛ᤻ᤁᤛᤧᤴ ᤂᤢᤶᤍᤡᤱ ᤐᤡᤖᤢ 23 ᤍᤔᤛ᤻ᤁᤛᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤴ ᤀᤡᤱᤄᤱᤅᤡᤴ ᤁᤧᤖᤧᤀᤠᤱ ᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤜᤔᤠᤋ ᤏᤢ ᤀᤷᤐᤠᤍ ᤕᤧᤰᤕᤰᤜᤠ᤹ ᤁᤡᤔᤠ ᤕᤱᤔᤧᤸᤗᤧ ᤋᤖᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤵᤑᤣᤰ ᤕᤠ᤺ᤶᤒᤣᤀᤥ ᤂᤠᤵᤐᤢᤌᤩ᤺ᤱ ᤐᤥᤱᤔᤠ ᤀᤡᤱᤄᤱ ᤔᤧᤄᤧᤵᤛᤢᤀᤠᤱ ᤘᤠ᤹ᤖᤥ॥ ᤁᤧᤏᤠᤱᤒᤠ ᤘᤖ᤺ᤱᤅᤡᤴ ᤁᤢᤱᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤋᤢᤰᤂᤣ ᤆᤠᤖᤥ॥ 24 ᤍᤔᤛ᤻ᤁᤛᤧᤴ ᤔᤧᤴᤎᤢᤶᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤧᤳᤇᤡᤱᤔᤠᤖᤧ ᤗᤠᤃᤡ ᤔᤧᤏᤢ᤺ᤱᤗᤥ॥ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤂᤧᤱᤜᤠ᤹ ᤁᤡᤔᤠ ᤕᤱᤔᤠ. ᤕᤧᤳᤋᤢᤰᤂᤣ ᤏᤢ ᤋᤢᤰᤔᤠᤸᤗᤧ ᤋᤧᤶᤛᤢᤛᤡᤀᤠᤱ ᤘᤠ᤹ᤖᤥ॥ 25 ᤂᤧᤴ ᤁᤢᤔᤡᤱ ᤁᤧᤀᤡᤱᤒᤠ. ᤁᤧᤛ᤺ᤵᤐᤠ ᤕᤧᤰᤕᤰᤁᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤵᤔᤧᤓᤢᤛᤢᤖᤥ᥄ 26 ᤂᤧᤵᤔᤥᤒᤠ ᤌᤠᤱᤒᤧᤴ ᤕᤧᤶᤒᤡᤳᤇᤠᤜᤠ᤹ ᤔᤠᤖᤠᤶᤔᤥ ᤔᤧᤈᤥᤴᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛᤡᤖᤥ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 27 “ᤜᤧᤰᤁᤩᤠᤱ ᤍᤔᤛ᤻ᤁᤛᤒᤠ ᤗᤢᤱᤎᤠᤰᤜᤠ᤹ᤀᤥ ᤀᤠᤱᤃᤠ᤹ ᤔᤡ ᤑᤠ᤺ᤳᤋᤪᤠ ᤁᤣ᤺ᤳᤋᤢᤱᤗᤥ ᤂᤧᤸᤗᤧ ᤒᤣᤏ-ᤜᤍᤍᤒᤠ ᤜᤠᤱᤜᤡᤶᤜᤠ᤹ ᤔᤡᤎᤡᤰᤂᤢᤖᤥ॥” ᤁᤣᤍᤠᤖ ᤏᤢ ᤜᤠᤛᤥᤖ ᤕᤧᤰᤕᤰᤁᤥ ᤂᤢᤶᤍᤡᤱ 28 ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤌᤱᤅᤥ ᤑᤳᤋᤢᤒᤠ ᤁᤣᤍᤠᤖ ᤏᤢ ᤜᤠᤛᤥᤖᤒᤠ ᤜᤠᤱᤈᤢᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤴ ᤀᤡᤱᤄᤱᤅᤡᤴ ᤁᤧᤖᤧᤀᤠᤱ ᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤁᤣᤍᤠᤖᤖᤧ ᤁᤢᤍᤰᤗᤧᤱᤘᤠᤀᤥ ᤋᤃᤡ ᤐᤣᤃᤧᤶᤔᤧ᤹ᤀᤥ᥄ ᤏᤠᤱᤃᤧᤴ ᤐᤡᤛᤠᤱᤗᤠᤶ ᤌᤰᤛᤢᤒᤠᤜᤠ᤹ ᤔᤧᤰᤂᤧᤶᤛᤡᤶᤔᤧ᤹ᤀᤥ᥄ 29 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤠᤗᤢᤵᤜᤠ᤹ ᤏᤢ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥᤒᤠ ᤛᤠᤔᤠᤜᤠ᤹ ᤏᤢ ᤂᤢᤴᤇᤡ᤹ ᤀᤢᤔᤣᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡᤖᤥ॥ ᤀᤠᤳᤋᤡᤛᤠᤱ ᤀᤰᤂᤣ ᤁᤧᤗ᤹ᤒᤠ ᤋᤢᤰᤂᤣᤘᤠ ᤀᤡᤰᤗᤠ ᤂᤧᤶᤍᤧᤳᤗᤥ. ‘ᤁᤧᤖᤧᤰ ᤐᤡᤛᤠᤱ ᤀᤠᤏᤡᤃᤣ ᤕᤱᤔᤠ ᤔᤧᤛᤧᤖᤡᤃᤧᤖᤥ᥄’” 30 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤡᤏᤡ᤹ ᤜᤡᤱᤔᤠᤖᤧ ᤗᤠᤃᤡ ᤗᤥ᤺ᤰᤋᤧᤶᤔᤧ᤹ᤀᤥ ᤜᤠᤛᤥᤖᤒᤠ ᤔᤏᤠᤛᤣ. ᤁᤣ᤺ᤶᤒᤠ ᤜᤱᤃᤠᤖᤡᤱᤒᤠ ᤗᤢᤱᤑᤢᤰᤁᤥᤜᤠ᤹ᤀᤥ ᤂᤡᤏᤡ᤹ ᤆᤡᤱᤛᤡᤱᤅᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤆᤧᤶᤓᤴ ᤆᤥᤃᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤔᤧᤱᤔᤠᤖᤧ ᤗᤠᤃᤡ ᤔᤢᤴᤇᤡᤱᤗ ᤘᤠ᤹ᤖᤥ॥” 31 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤡᤏᤡ᤹ ᤌᤥ ᤐᤣᤃᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤴ ᤁᤢᤏᤡᤱᤘᤠ᤹ ᤕᤠ᤺ᤴᤍᤡᤰ ᤁᤧᤍᤠᤒᤠ ᤛᤢᤘᤠᤱᤜᤠ᤹ ᤌᤱᤅᤥ ᤑᤳᤋᤧᤶᤛᤡᤔᤧ᤹ᤀᤥ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤢᤱᤎᤠᤰ ᤀᤡᤃᤪ ᤗᤠᤶᤎᤣᤳ ᤔᤣ᤺ᤴᤏᤣ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤱᤜᤠ᤹ ᤀᤣ᤺ᤰ ᤔᤧᤕᤢᤱᤗᤥ॥ 32 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤢᤔᤣᤜᤠ᤹ ᤏᤢ ᤘᤣ᤹ ᤌᤰᤛᤠᤜᤠ᤹ ᤁᤧᤖᤧᤰ ᤂᤡᤏᤡ᤹ᤀᤡᤴ ᤔᤧᤒᤥᤱᤗᤥ॥ ᤁᤴ ᤔᤠ᤺ᤱᤄᤠ ᤔᤠ᤺ᤱᤄᤠ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤛᤠᤶᤔᤡ᤺ᤳ ᤁᤣᤈᤱᤅᤥ ᤛᤧᤛᤢᤱᤛᤡᤱᤗᤥ॥ ᤁᤧᤖᤧᤰ ᤐᤡᤛᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤋᤢᤰᤂᤣ ᤗᤠᤰᤂᤣ ᤋᤠᤖᤢᤱᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 33 “ᤜᤠᤛᤥᤖᤧᤴ ᤛᤩᤠᤗᤠᤜᤠ᤹ᤖᤧ ᤂᤢᤴᤇᤡ᤹ ᤘᤠ᤹ᤔᤠᤍᤧᤴ ᤐᤥᤱᤗᤥ ᤜᤧᤰᤁᤩᤠᤱ ᤁᤴ ᤀᤠᤓᤧᤸᤗᤧᤛᤠᤱ ᤆᤡᤈᤡ ᤂᤰᤂᤰ ᤐᤥᤱᤗᤥ॥ ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤘᤠ᤹ᤏᤧᤴᤗᤥ. ᤁᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤴᤕᤢᤱᤏᤧᤴᤗᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤀᤣᤗᤠᤔᤧᤴ ᤂᤢᤶᤍᤡᤱ ᤐᤡᤖᤢ 34 ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤜᤣ᤺ᤰᤋᤢᤒᤠ ᤕᤧᤶᤔᤥ ᤀᤣᤗᤠᤔᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤠᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠᤀᤥ ᤁᤴ ᤀᤡᤱᤄᤱᤅᤡᤴ ᤁᤧᤖᤧ॥ 35 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤣᤗᤠᤔᤒᤠ ᤋᤥᤱ ᤗᤡ ᤁᤧᤀᤠᤵᤐᤠᤜᤠ᤹ ᤔᤧᤰᤂᤢᤱᤛᤡᤱᤗᤥ ᤂᤧᤵᤔᤥᤒᤠ ᤛᤠ᤹ᤖᤡᤰ ᤁᤧᤎᤢᤶᤒᤠ ᤌᤰᤛᤢᤒᤠᤜᤠ᤹ ᤔᤧᤰᤂᤢᤱᤛᤡᤱᤗᤥ॥ 36 ᤁᤧᤖᤧᤰ ᤐᤡᤛᤠᤱᤗᤠᤶ ᤛᤢᤖᤡᤳ ᤁᤣᤈᤱ ᤜᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤏᤡᤱᤔᤡᤜᤠ᤹ ᤋᤠᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤣᤗᤠᤔᤒᤠ ᤔᤏᤠᤜᤠ᤹ ᤛᤧᤛᤢᤱᤍᤣᤛᤢᤱᤛᤡᤱᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤈᤣ᤹ᤜᤠ᤹ᤀᤥ ᤂᤧᤱᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ॥ 37 ᤂᤧᤴ ᤑᤢᤳᤗᤢᤶ ᤌᤩ᤺ᤱ ᤋᤣᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤣᤗᤠᤔᤖᤧ ᤁᤢᤏᤡᤱᤔᤡᤜᤠ᤹ᤏᤢ ᤛᤥᤖᤡᤰ ᤐᤣ᤺ᤰᤁᤠᤖᤥ॥ ᤛᤠ᤹ᤖᤡᤰ ᤀᤠᤕᤠ᤺ᤰᤗᤧ᤹ᤔᤥ ᤀᤣᤗᤠᤔᤒᤠ ᤔᤏᤠᤜᤠ᤹ᤀᤥ ᤀᤠᤱᤃᤠ᤹ ᤕᤶᤒᤠ ᤔᤧᤰᤔᤠᤛᤡᤔᤧᤴ ᤋᤠᤖᤢᤱᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ “ᤂᤧᤱᤜᤠ᤹ ᤂᤰᤐᤧᤳ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤋᤠᤓᤣᤏᤢ ᤔᤧᤏᤠ᤺ᤳᤋᤢᤛᤡᤖᤥ॥” 38 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤠᤜᤠᤱ ᤕᤢᤰᤏᤠᤴ ᤀᤣᤗᤠᤔᤀᤥ ᤕᤢᤰᤂᤢᤱᤗᤥ. ᤜᤧᤰᤁᤩᤠᤱ ᤜᤠᤱᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ ᤔᤧᤰᤂᤢᤱᤛᤡᤱᤗᤥ॥ 39 ᤁᤖ ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤀᤣᤗᤠᤔᤧᤴ ᤕᤠᤶᤔᤥ ᤏᤢ᤹ᤍᤠᤖ ᤆᤥᤃᤢᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.