ᤂᤠᤛᤧᤴᤗᤥ᤺ᤶᤒᤠ 9 - LIFOTNTᤀᤒᤡᤔᤣᤗᤣᤁᤧᤴ ᤛᤁᤣᤔᤀᤥ ᤕᤢᤰᤛᤠᤒᤠ ᤐᤥᤱ 1 ᤕᤖᤢᤒ-ᤒᤠᤗᤖᤧ ᤁᤢᤛ᤻ᤛᤠ ᤀᤒᤡᤔᤣᤗᤣᤁᤧᤴ ᤛᤁᤣᤔᤀᤥ ᤂᤢᤏᤧ᤹ ᤁᤢᤱᤃᤫᤠᤛᤡᤖᤥ ᤐᤣ. ᤜᤧᤰᤁᤩᤠᤱ ᤁᤢᤱᤃᤫᤠᤛᤡᤀᤥᤒᤠ ᤜᤡᤶᤛᤕᤱᤜᤠ᤹ ᤁᤧᤖᤧᤰ ᤂᤢᤏᤧ᤹ ᤔᤧᤳᤋᤢᤛᤡ. 2 “ᤛᤁᤣᤔᤒᤠ ᤁᤧᤖᤧᤰ ᤋᤢᤶᤔᤩᤠᤱᤜᤠᤱᤜᤠ᤹ ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤛᤣ᤺ᤴᤍᤥᤛᤠᤶᤛᤧ᤹—‘ᤕᤖᤢᤒ-ᤒᤠᤗᤖᤧ ᤏᤢᤒᤥᤱ ᤁᤢᤛ᤻ᤛᤠᤜᤠ᤹ᤖᤧ ᤂᤡᤏᤡ᤹ ᤛᤶᤎᤠᤱ ᤕᤢᤰ ᤆᤥ᤺ᤰᤔᤠ ᤏᤢᤒᤠᤒᤡ ᤀᤡ ᤌᤡᤰᤐᤠᤖᤧᤰ ᤕᤢᤰ ᤆᤥ᤺ᤰᤔᤠ ᤏᤢᤒᤠᤒᤡ᥅’ ᤀᤠᤱᤃᤠ᤹ ᤂᤡᤏᤡ᤹ᤀᤣ ᤔᤧᤶᤓᤧᤰᤔᤏᤠᤒᤠ ᤁᤠ᤹ᤀᤡᤀᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥” 3 ᤀᤠᤸᤗ ᤂᤢᤏᤧ᤹ ᤁᤢᤱᤃᤫᤠᤛᤡᤖᤧ ᤂᤢᤏᤧ᤹ ᤗᤧᤵᤔᤠᤱ ᤛᤁᤣᤔᤒᤠ ᤁᤧᤖᤧᤰ ᤋᤢᤶᤔᤩᤠᤱᤜᤠᤱᤜᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤔᤧᤳᤋᤢᤛᤡᤸᤗᤧ. ᤂᤧᤱᤜᤠ᤹ ᤀᤒᤡᤔᤣᤗᤣᤁ ᤗᤧᤵᤔᤠᤱ ᤐᤵᤔᤠᤖᤧ ᤗᤠᤃᤡ ᤔᤧᤔᤢᤴᤇᤡᤱ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠᤳᤋᤢ. “ᤂᤢᤏᤧ᤹ᤃ ᤀᤠᤏᤡ᤹ ᤀᤠᤵᤑᤣᤰ ᤁᤠ᤹ᤀᤡᤖᤥ॥” 4 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤒᤠᤗ-ᤒᤖᤡᤋᤒᤠ ᤔᤠᤱᤜᤡᤶᤔᤥᤗᤠᤶ ᤏᤢᤒᤥᤱ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤋᤣ᤹ᤖᤢᤀᤠᤱ ᤁᤢᤛᤢᤶᤔᤧᤴᤍᤶᤔᤏᤠ ᤑᤧᤰᤁᤧᤗᤠ᤹ᤒᤠ ᤔᤏᤠᤜᤠ᤹ ᤕᤠ᤺ᤸᤗᤣᤰ ᤛᤠᤅᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤀᤣᤃᤠᤱ ᤔᤧᤎᤠᤛᤡᤱ॥ 5 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤜᤡᤶ ᤀᤥᤐᤪᤠ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤒᤥᤱ ᤁᤢᤶᤓᤢ᤹ ᤁᤢᤴᤛᤠ᤹ ᤕᤖᤢᤒ-ᤒᤠᤗᤖᤧ ᤁᤢᤛ᤻ᤛᤠᤜᤠ᤹ ᤗᤳᤇᤠ ᤗᤢᤱᤈᤱᤅᤥ ᤛᤧᤖᤢᤛᤡ॥ ᤁᤖ ᤕᤖᤢᤒ-ᤒᤠᤗᤖᤧ ᤁᤢᤛ᤻ᤛᤠ ᤑᤥ᤺ᤰᤘᤠᤒᤠ ᤕᤥᤋᤠᤔᤧᤴ ᤆᤡᤱᤛᤡᤱᤅᤠᤱ ᤜᤡᤅᤧ ᤕᤠ᤺ᤰᤋᤧ॥ 6 ᤂᤧᤒᤩᤠᤱ ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤜᤠ᤹ ᤏᤢ ᤒᤣᤌ-ᤔᤡᤸᤗᤥᤒᤠ ᤔᤏᤠᤜᤠ᤹ ᤁᤧᤖᤧᤰ ᤔᤧᤈᤢᤵᤛᤧᤀᤠᤱ ᤛᤁᤣᤔᤀᤥ ᤁᤧᤕᤢᤱᤒᤠ ᤕᤶᤒᤠ ᤕᤜᤡᤒᤠ ᤛᤡᤱᤒᤢᤱ ᤐᤣᤛᤠᤱᤒᤠ ᤛᤡᤳᤗᤠᤱᤅᤥ ᤀᤒᤡᤔᤣᤗᤣᤁᤧᤴ ᤜᤠᤱ ᤔᤧᤈᤥᤃᤢᤖᤥ॥ ᤕᤥᤋᤠᤔᤖᤧ ᤁᤢᤍᤠ᤹ᤍᤡ ᤂᤧᤍᤠ᤹ 7 ᤀᤠᤸᤗ ᤁᤴ ᤐᤠ᤺ᤴᤏᤡᤴ ᤕᤥᤋᤠᤔᤧᤴ ᤔᤧᤔᤧᤳᤋᤢᤸᤗᤧ ᤂᤢᤏᤧ᤹ ᤐᤣᤀᤠᤱ ᤃᤡᤖᤡᤈ᤻ᤈᤡᤔ ᤁᤥ᤺ᤰᤔᤠᤸᤗᤧ ᤁᤢᤛᤶᤎᤠᤱ ᤕᤧᤶᤛᤡᤱ. ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖᤥ. “ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤛᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤐᤠ᤺ᤴᤏᤡᤴ ᤂᤧᤵᤛᤢᤖᤖᤥ॥ 8 ᤀᤠᤵᤑᤣᤰ ᤗᤠᤃᤡ ᤌᤡᤰᤗᤧᤱ ᤛᤡᤱᤒᤢᤱᤜᤠ᤹ ᤗᤳᤇᤠ ᤜᤠᤱ ᤕᤢᤰᤋᤡᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤈᤢᤵᤛᤧᤖᤥ. ᤜᤧᤰᤁᤩᤠᤱ ᤂᤧᤴ ᤛᤡᤱᤒᤢᤱᤜᤠ᤹ᤖᤧ ᤆᤤᤋᤢᤏᤧᤴ ᤔᤧᤔᤧᤳᤋᤢᤖᤥ. ‘ᤂᤧᤏᤧ᤹ ᤋᤩᤧ᤹ᤀᤠᤱ ᤀᤠᤏᤡᤃᤣ ᤜᤠᤱ ᤐᤥ᤺ᤰᤂᤧ᤹ᤀᤥ॥’ 9 ᤁᤖ ᤆᤤᤋᤢᤏ ᤛᤡᤱᤒᤢᤱᤅᤡᤸᤗᤧ ᤔᤧᤳᤋᤢᤛᤡᤖᤥ. ‘ᤔᤠᤱᤜᤠ᤹ ᤏᤢ ᤔᤏᤠᤜᤠ᤹ ᤀᤡᤱᤎᤠᤱ ᤁᤧᤒᤡᤒᤠ ᤀᤡᤔᤧᤸᤗᤢᤱᤒᤠ ᤀᤠᤱᤃᤠ᤹ ᤀᤠᤏᤡ᤺ᤱᤃᤣᤴ ᤗᤧᤖᤢᤱᤒᤠᤒᤡ ᤜᤧᤰᤁᤩᤠᤱ ᤛᤡᤱᤒᤢᤱᤜᤠ᤹ᤀᤥ ᤕᤢᤰ ᤆᤥᤃᤢᤱᤒᤠᤒᤡ᥅’ 10 “ᤂᤧᤒᤩᤠᤱ ᤛᤡᤱᤒᤢᤱᤜᤠ᤹ᤖᤧ ᤐ᤺ᤳᤇᤣ᤹ᤒᤢᤱᤔᤠᤴ ᤔᤧᤔᤧᤳᤋᤢᤖᤥ. ‘ᤂᤧᤏᤧ᤹ ᤋᤩᤧ᤹ᤀᤠᤱ ᤀᤠᤏᤡᤃᤣ ᤜᤠᤱ ᤐᤥ᤺ᤰᤂᤧ᤹ᤀᤥ॥’ 11 ᤁᤖ ᤐ᤺ᤳᤇᤣ᤹ᤒᤢᤱᤔᤠᤸᤗᤧ ᤔᤧᤳᤋᤢᤛᤡᤖᤥ. ‘ᤁᤧᤗᤡᤶᤒᤠ ᤏᤢ ᤁᤢᤈᤠ ᤁᤧᤏᤢ᤹ᤒᤠ ᤁᤢᤈᤠ᤹ᤀᤡᤴ ᤀᤠᤱᤃᤠ᤹ ᤗᤧᤖᤢᤱᤒᤠᤒᤡ ᤜᤧᤰᤁᤩᤠᤱ ᤛᤡᤱᤒᤢᤱᤜᤠ᤹ᤀᤥ ᤕᤢᤰ ᤆᤥᤃᤢᤱᤒᤠᤒᤡ᥅’ 12 “ᤂᤧᤒᤩᤠᤱ ᤛᤡᤱᤒᤢᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ᤒᤢᤱᤔᤠᤴ ᤔᤧᤔᤧᤳᤋᤢᤖᤥ. ‘ᤂᤧᤏᤧ᤹ ᤋᤩᤧ᤹ᤀᤠᤱ ᤀᤠᤏᤡᤃᤣ ᤜᤠᤱ ᤐᤥ᤺ᤰᤂᤧ᤹ᤀᤥ॥’ 13 ᤁᤖ ᤆᤧᤸᤗᤧᤰᤛᤣ᤹ᤒᤢᤱᤅᤡᤸᤗᤧ ᤔᤧᤳᤋᤢᤛᤡᤖᤥ. ‘ᤔᤠᤱᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤔᤠ ᤀᤠᤱᤃᤠ᤹ ᤀᤠᤈᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤗᤧᤖᤢᤱᤒᤠᤒᤡ ᤜᤧᤰᤁᤩᤠᤱ ᤛᤡᤱᤒᤢᤱᤜᤠ᤹ᤀᤥ ᤕᤢᤰ ᤆᤥᤃᤢᤱᤒᤠᤒᤡ᥅’ 14 “ᤁᤢᤏᤢᤵᤔᤥ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤖᤧ ᤋᤡᤱᤃᤪᤣᤰ ᤐᤢᤱᤅᤡᤴ ᤔᤧᤔᤧᤳᤋᤢᤖᤥ. ‘ᤂᤧᤏᤧ᤹ ᤋᤩᤧ᤹ᤀᤠᤱ ᤀᤠᤏᤡᤃᤣ ᤜᤠᤱ ᤐᤥ᤺ᤰᤂᤧ᤹ᤀᤥ॥’ 15 ᤋᤡᤱᤃᤪᤣᤰ ᤐᤢᤱᤅᤡᤸᤗᤧ ᤛᤡᤱᤒᤢᤱᤜᤠ᤹ ᤔᤧᤳᤋᤢᤛᤡᤖᤥ. ‘ᤛᤧᤰᤂᤠᤀᤣ ᤂᤡᤏᤡ᤹ ᤀᤠᤱᤃᤠ᤹ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤐᤡᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧᤓᤃᤪ ᤀᤠᤱᤃᤠ᤹ ᤀᤠᤛᤡᤃᤠᤱ ᤀᤡ᤺ᤵᤋᤢᤱᤒᤠᤍᤧᤴᤏᤥ ᤀᤡ᤺ᤶᤛᤡᤱᤛᤧ ᤋᤩᤧᤶᤔᤧ᤹ᤀᤥ॥ ᤔᤣ᤺ᤴᤏᤧᤓᤃᤪ. ᤋᤡᤱᤜᤠ᤹ᤀᤥᤗᤠᤶ ᤔᤡ ᤗ᤺ᤴᤗᤖᤥ ᤜᤧᤰᤁᤩᤠᤱ ᤗᤧᤒᤏᤠᤏᤒᤠ ᤛᤠᤶᤔᤠᤱᤛᤡᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤖᤥ॥’ 16 “ᤀᤒᤡᤔᤣᤗᤣᤁᤧᤴ ᤜᤠᤱ ᤁᤧᤈᤥᤃᤢᤶᤔᤠᤱ ᤂᤡᤏᤡ᤹ ᤛᤧᤰᤂᤠ ᤏᤢ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤒᤡ᥅ ᤜᤧᤰᤁᤩᤠᤱ ᤕᤖᤢᤒ-ᤒᤠᤗ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ᤏᤢ ᤁᤧᤘᤠ᤹ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤒᤡ᥅ ᤂᤧᤸᤗᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤏᤢᤖᤡᤰ ᤁᤧᤔᤧᤳᤋᤢᤶᤛᤡᤶᤔᤠᤱ ᤁᤧᤘᤕᤡᤒᤡ᥅ 17 ᤀᤠᤱᤃᤠ᤹ ᤀᤠᤶᤒᤠᤖᤧ ᤂᤡᤏᤡ᤹ ᤗᤠᤃᤡ ᤌᤱ ᤌᤰᤋᤧ ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤔᤠᤗᤡᤱᤍᤥ ᤌᤠᤖᤡᤰᤐᤠ ᤁᤧᤛᤠᤰᤐᤥ ᤌᤩᤧᤀᤠᤱ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤂᤡᤏᤡ᤹ ᤁᤧᤛᤧ᤺ᤵᤋᤡ. 18 ᤁᤖ ᤀᤠᤀᤡᤴ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤂᤡᤏᤡ᤹ ᤁᤧᤒᤥᤃᤡᤀᤠᤱ ᤁᤧᤘᤕᤡ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤒᤥᤱ ᤁᤢᤛ᤻ᤛᤠᤜᤠ᤹ ᤗᤳᤇᤠ ᤗᤢᤱᤈᤱᤅᤥ ᤁᤧᤈᤩᤧᤵᤋᤢᤶ ᤁᤧᤛᤧᤖᤢᤶᤛᤡᤶᤔᤠᤱ ᤘᤠ᤹. ᤂᤧᤒᤩᤠᤱ ᤂᤢᤏᤧ᤹ ᤁᤢᤕᤥ᤺ᤃ᤻ᤔᤠᤸᤗᤧ ᤁᤢᤛ᤻ᤛᤠ ᤀᤒᤡᤔᤣᤗᤣᤁᤧᤴ ᤀᤠᤏᤡ᤹ ᤁᤠ᤹ᤀᤡ ᤑᤠ᤹ᤀᤠᤱ ᤛᤁᤣᤔᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤁᤧᤈᤥᤃᤢᤶᤔᤠᤱ ᤘᤠ᤹— 19 “ᤂᤡᤏᤡ᤹ ᤀᤠᤀᤡᤴ ᤕᤖᤢᤒ-ᤒᤠᤗ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤛᤧᤰᤂᤠ ᤏᤢ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤏᤧᤓᤃᤪ. ᤀᤒᤡᤔᤣᤗᤣᤁᤧᤴᤏᤢ ᤂᤡᤏᤡ᤹ ᤏᤡᤱᤘᤠ᤹ ᤋᤠᤛᤧᤶᤔᤧ᤹ ᤂᤧᤒᤩᤠᤱ ᤂᤢᤏᤧ᤹ ᤂᤡᤏᤡ᤹ᤏᤢ ᤁᤢᤏᤡᤱᤘᤠ᤹ ᤋᤠᤖᤖᤥ᥄ 20 ᤔᤣ᤺ᤴᤏᤧᤓᤃᤪ. ᤀᤒᤡᤔᤣᤗᤣᤁᤥᤗᤠᤶ ᤔᤡ ᤗ᤺ᤴᤗ ᤜᤧᤰᤁᤩᤠᤱ ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤜᤠ᤹ ᤏᤢ ᤒᤣᤌ-ᤔᤡᤸᤗᤥᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤖ᥄ ᤛᤣᤁᤣᤔᤒᤠ ᤏᤢ ᤒᤣᤌ-ᤔᤡᤸᤗᤥᤒᤠ ᤋᤢᤶᤔᤩᤠᤱᤜᤠᤱᤜᤠ᤹ᤗᤠᤶᤒᤠᤀᤠᤱ ᤔᤡ ᤗ᤺ᤴᤏᤠᤱ ᤀᤒᤡᤔᤣᤗᤣᤁᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤖ᥄” 21 ᤂᤧᤴ ᤀᤣᤃᤠᤱ ᤕᤥᤋᤠᤔᤧᤴ ᤛᤢᤸᤗᤡ ᤂᤧᤳᤇᤡᤱᤅᤠᤱ ᤂᤢᤏᤧ᤹ ᤒᤣᤀᤖ ᤔᤧᤵᤔᤏᤠᤒᤠᤍᤧᤴᤏᤥ ᤁᤧᤖᤧ. ᤜᤧᤰᤁᤩᤠᤱ ᤂᤧᤵᤔᤥᤀᤣ ᤕᤢᤱᤔᤠ ᤜᤣ᤺ᤰᤋᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤶᤓᤢ᤹ ᤀᤒᤡᤔᤣᤗᤣᤁᤧᤴᤏᤢ ᤁᤡᤛᤧᤖᤥ॥ ᤛᤁᤣᤔᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤀᤒᤡᤔᤣᤗᤣᤁᤧᤴ ᤔᤧᤀᤳᤋᤢ 22 ᤀᤒᤡᤔᤣᤗᤣᤁᤧᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠ ᤐᤥ᤺ᤰᤂᤧᤒᤠ ᤋᤱᤒᤣ ᤛᤢᤶᤛᤡ ᤀᤣᤃᤠᤱ 23 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤡᤔᤣᤗᤣᤁᤧᤴ ᤏᤢ ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤧᤔᤧᤴᤍᤱ ᤋᤠᤵᤑᤧ᤺ᤶᤒᤠ ᤛᤠᤶᤎᤡᤰ ᤐᤠᤱᤄᤢ ᤋᤠᤛᤢ. ᤜᤧᤰᤁᤩᤠᤱ ᤛᤁᤣᤔᤒᤠ ᤔᤏᤠᤜᤠ᤹ᤖᤧ ᤀᤒᤡᤔᤣᤗᤣᤁᤧᤴ ᤀᤡᤱᤗᤧᤰᤁᤥ ᤔᤧᤎᤠᤛᤢ॥ 24 ᤕᤖᤢᤒ-ᤒᤠᤗᤖᤧ ᤏᤢᤒᤥᤱ ᤁᤢᤛ᤻ᤛᤠᤜᤠ᤹ ᤔᤧᤛᤧᤖᤢᤛᤡᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤂᤧᤱᤜᤠ᤹ ᤁᤧᤛᤧᤵᤐᤠ ᤂᤢᤴᤇᤡ᤹ ᤏᤢᤛᤠ᤹ ᤀᤒᤡᤔᤣᤗᤣᤁᤀᤥ ᤜᤧᤰᤁᤩᤠᤱ ᤂᤧᤴ ᤁᤧᤜᤢᤒᤠ ᤁᤧᤒᤱᤒᤠ ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤜᤠ᤹ᤀᤥ ᤁᤢᤗᤧᤰᤘᤠ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤆᤥᤃᤢᤀᤠᤱ ᤘᤕᤧ॥ 25 ᤀᤒᤡᤔᤣᤗᤣᤁᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤁᤥ᤺ᤰᤔᤠᤸᤗᤧ ᤁᤢᤛᤶᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤁᤧᤖᤧᤰ ᤛᤢᤰᤔᤠᤛᤡ ᤏᤢ ᤏᤠᤵᤔᤠᤛᤡᤖᤧ ᤗᤠᤃᤡ ᤔᤏᤠᤜᤠ᤹ ᤔᤧᤕᤢᤰᤂᤢᤛᤡ. ᤜᤧᤰᤁᤩᤠᤱ ᤁᤴ ᤀᤡᤱᤄᤱᤅᤡᤴ ᤀᤒᤡᤔᤣᤗᤣᤁᤖᤥ ᤔᤧᤃᤧᤳᤋᤢ॥ 26 ᤀᤠᤸᤗ ᤀᤣᤒᤣᤍᤖᤧ ᤁᤢᤛ᤻ᤛᤠ ᤃᤠᤗᤧᤴ ᤂᤢᤏᤧ᤹ ᤁᤢᤴᤛᤠ᤹ ᤁᤢᤶᤓᤢ᤹ᤜᤠ᤹ᤏᤢ ᤛᤁᤣᤔᤀᤥ ᤑᤧᤖᤧ. ᤜᤧᤰᤁᤩᤠᤱ ᤛᤁᤣᤔᤒᤠ ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠᤴ ᤂᤢᤏᤧ᤹ ᤗᤧᤵᤔᤠᤱ ᤔᤧᤜᤡᤛᤢ॥ 27 ᤂᤧᤱᤜᤠ᤹ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥ ᤔᤧᤒᤣᤀᤠᤱ ᤁᤧᤍᤢᤶᤒᤠ ᤁᤢᤈᤠ᤹ᤜᤠ᤹ ᤔᤧᤍᤢᤒᤢ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤔᤧᤀᤣ᤺ᤵᤛᤢ॥ ᤂᤧᤴ ᤀᤣᤃᤠᤱ ᤂᤢᤴᤇᤡ᤹ ᤔᤠᤱᤅᤡᤸᤗᤧᤴ ᤔᤠᤱᤜᤡᤶᤔᤥ ᤋᤱᤏᤠᤶ ᤋᤥᤛᤧ ᤔᤧᤒᤣ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤁᤢᤈᤠᤜᤠ᤹ ᤔᤧᤈ ᤔᤧᤎᤢᤅᤢᤀᤠᤱ ᤀᤒᤡᤔᤣᤗᤣᤁᤧᤴ ᤛᤠᤰᤔᤢᤖᤠ ᤔᤧᤔᤧᤳᤋᤢ॥ 28 ᤂᤧᤒᤩᤠᤱ ᤀᤣᤒᤣᤍᤖᤧ ᤁᤢᤛ᤻ᤛᤠ ᤃᤠᤗᤖᤧ ᤔᤧᤳᤋᤢᤛᤡ. “ᤀᤒᤡᤔᤣᤗᤣᤁᤧᤴ ᤜᤠ᤺ᤵᤐᤣ᥅ ᤜᤧᤰᤁᤩᤠᤱ ᤌᤣᤀᤠᤱ ᤀᤠᤏᤡ᤹ ᤛᤁᤣᤔᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤰ ᤆᤥ᤺ᤰᤔᤏᤠ ᤐᤡᤔᤏᤠᤒᤠᤒᤣ᥅ ᤌᤣ ᤂᤢᤏᤧ᤹ ᤕᤖᤢᤒ-ᤒᤠᤗᤖᤧ ᤁᤢᤛ᤻ᤛᤠ ᤔᤣ᤺ᤶᤒᤡ᥅ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠ᤹ᤒᤠᤱᤅᤡᤴ ᤈᤒᤢᤗᤧᤴ ᤔᤣ᤺ᤶᤒᤡ᥅ ᤂᤧᤴᤏᤢ᤺ᤸᤗᤧᤃ ᤛᤁᤣᤔᤖᤧ ᤁᤢᤶᤒᤠ ᤜᤔᤥᤖᤖᤧ ᤁᤢᤔᤏᤠᤜᤠ᤹ ᤀᤠᤏᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤡᤔᤠᤛᤡᤸᤗᤧ ᤏᤢᤒᤠ ᤐᤥᤱ᤹॥ ᤀᤠᤏᤡ᤹ ᤌᤣᤀᤠᤱ ᤀᤒᤡᤔᤣᤗᤣᤁᤧᤴ ᤕᤠ᤺ᤶᤒᤰ ᤆᤥ᤺ᤰᤔᤏᤠ ᤐᤡᤔᤏᤠᤒᤠᤒᤣ᥅ 29 ᤁᤴ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤕᤢᤰᤁᤥ ᤔᤧᤘᤕᤧᤒᤠ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤀᤒᤡᤔᤣᤗᤣᤁᤧᤴ ᤗᤠ᤺ᤳᤗᤠ᤺ᤳ ᤆᤥᤃᤢᤱᤒᤠ ᤘᤕᤧᤔᤧᤴ॥ ᤀᤠᤱᤃᤠ᤹ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤱᤒᤠ ᤘᤕᤧ. ‘ᤂᤧᤏᤧ᤹ ᤁᤧᤎᤰᤛᤢᤒᤠᤜᤠ᤹ ᤁᤧᤖᤧᤰ ᤀᤢ᤺ᤳᤋᤧᤛᤧ᤹ᤀᤠᤱ ᤌᤱ ᤆᤥᤃᤧ᤹॥’” 30 ᤀᤠᤸᤗ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠ ᤈᤒᤢᤗᤖᤧ ᤀᤣᤒᤣᤍᤖᤧ ᤁᤢᤛ᤻ᤛᤠ ᤃᤠᤗᤖᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤖᤧ॥ 31 ᤂᤢᤏᤧ᤹ ᤛᤫᤠ᤺ᤳᤋᤠᤱ ᤀᤒᤡᤔᤣᤗᤣᤁᤀᤥ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. “ᤀᤣᤒᤣᤍᤖᤧ ᤁᤢᤛ᤻ᤛᤠ ᤃᤠᤗᤧᤴ ᤏᤢ ᤂᤧᤸᤗᤧ ᤁᤢᤴᤛᤠ᤹ᤁᤢᤶᤓᤢ᤹ᤜᤠ᤹ ᤛᤁᤣᤔ ᤔᤧᤓᤧᤖᤧᤀᤠᤱ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤔᤧᤜᤢᤛᤢᤛᤡ ᤔᤧᤒᤰᤂᤢᤛᤡᤖ ᤔᤧᤕᤠᤰ॥ 32 ᤁᤸᤗᤧᤆᤥᤃᤢᤸᤗᤧ ᤛᤧᤴᤍᤡᤰᤛᤠ ᤐᤥᤃᤧ᤹ᤀᤠᤱ ᤂᤧᤏᤧ᤹ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤀᤡᤰᤋᤠᤵᤜᤠ᤹ᤀᤥ ᤛᤢᤃᤧᤶᤛᤡᤶᤔᤧ᤹ᤀᤠᤱ ᤕᤢᤅᤧᤶᤔᤧ᤹॥ 33 ᤂᤧᤴ ᤀᤣᤃᤠᤱ ᤋᤠᤏᤠᤶ ᤏᤠᤶ ᤁᤧᤳᤏᤢᤔᤧ᤺ᤴᤏᤣ ᤕᤧᤰᤕᤰᤁᤡᤴ ᤑᤳᤋᤧᤶᤔᤧ᤹. ᤜᤧᤰᤁᤩᤠᤱ ᤀᤠᤸᤗ ᤂᤧᤴ ᤏᤢ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤔᤧᤗ᤺ᤴᤏᤡᤸᤗᤧ ᤌᤣ ᤆᤥ᤺ᤰᤔᤠ ᤐᤥᤱ᤹ ᤂᤧᤴ ᤆᤥᤃᤧᤶᤔᤧ᤹॥” 34 ᤁᤸᤗᤧᤆᤥᤃᤢᤸᤗᤧ ᤀᤒᤡᤔᤣᤗᤣᤁᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤧᤴᤍᤡᤰᤛᤠ ᤔᤧᤒᤥᤃᤧ. ᤜᤧᤰᤁᤩᤠᤱ ᤁᤢᤗᤰ ᤗᤡᤛᤡ ᤔᤧᤒᤥ᤺ᤰᤂᤧᤀᤠᤱ ᤛᤁᤣᤶᤔᤡᤴ ᤑᤵᤔᤠᤖᤧ ᤗᤠᤃᤡ ᤔᤧᤈᤡᤱᤛᤡᤱᤅᤠᤱ ᤔᤧᤕᤢᤅᤧ॥ 35 ᤀᤠᤸᤗ ᤀᤣᤒᤣᤍᤖᤧ ᤁᤢᤛ᤻ᤛᤠ ᤃᤠᤗᤧᤴ ᤗᤠ᤺ᤰᤁᤠᤳ ᤐᤣᤀᤠᤱ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤗᤠ᤺ᤵᤔᤠᤍᤧᤴᤏᤥ ᤕᤧᤒᤧᤃᤖᤧ. ᤜᤠᤒᤠ ᤂᤧᤴ ᤕᤧᤶᤔᤥ ᤀᤒᤡᤔᤣᤗᤣᤁᤧᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤔᤧᤈᤡᤱᤛᤡᤱᤒᤠᤍᤧᤴᤏᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ॥ 36 ᤃᤠᤗᤖᤧ ᤂᤧᤱᤜᤠ᤹ ᤏᤡᤛᤢᤛᤡᤀᤠᤱ ᤈᤒᤢᤗᤧᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤁᤥ᤺ᤰᤔᤠᤸᤗᤧ ᤁᤢᤛᤶᤔᤥᤗᤠᤶ ᤔᤏᤠᤜᤠ᤹ ᤕᤥ ᤔᤧᤕᤢᤖ ᤔᤧᤒᤳ॥” ᤈᤒᤢᤗᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤡᤛᤢᤛᤡᤒᤠᤜᤠ᤹ᤃ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤖᤧ ᤀᤡ᤺ᤵᤋᤢᤒᤠᤍᤧᤴᤜᤠ᤹ᤖᤥ. ᤔᤏᤠᤜᤠ᤹ ᤜᤧᤰᤋᤱᤒᤠᤀᤣ ᤂᤧᤴ ᤏᤡᤎᤠ᤺ᤵᤗ ᤐᤳ॥” 37 ᤁᤖ ᤕᤠᤶᤔᤥ ᤃᤠᤗᤖᤧ ᤔᤧᤳᤋᤢ. “ᤁᤥ᤺ᤰᤔᤠᤜᤠ᤹ᤖᤧ ᤁᤢᤗᤢᤶᤔᤥᤒᤠ ᤋᤧᤴᤜᤠ᤹ᤀᤥᤗᤠᤶ ᤔᤏᤠᤜᤠ᤹ ᤕᤥ ᤔᤧᤕᤢᤖ ᤔᤧᤒᤳ. ᤜᤧᤰᤁᤩᤠᤱ ᤁᤢᤗᤢᤵ ᤌᤡᤰ ᤆᤤᤲ ᤌᤢᤶᤕᤠ ᤁᤧᤀᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤜᤡᤒᤠ ᤛᤡᤱᤒᤢᤱ ᤗᤧᤵᤔᤠᤱᤗᤠᤶ ᤔᤧᤕᤢᤖ ᤔᤧᤒᤳ॥” 38 ᤂᤧᤒᤩᤠᤱ ᤈᤒᤢᤗᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤕᤶᤒᤕᤶᤒᤠ ᤐᤠ᤺ᤴᤜᤠ᤹ ᤀᤠᤸᤗ ᤀᤠᤳᤋᤡ ᤘᤠ᤹᥅ ᤂᤧᤏᤧ᤹ ᤁᤧᤒᤠ᤺ᤳᤋᤢᤀᤠᤱ ᤘᤕᤧ. ‘ᤀᤒᤡᤔᤣᤗᤣᤁᤧᤴ ᤜᤠ᤺ᤳᤋᤠᤱ ᤀᤠᤏᤡ᤹ ᤂᤢᤏᤧ᤹ ᤁᤢᤕᤢᤰᤁᤥ ᤘᤠ᤹ᤔᤠᤒᤣ᥅’ ᤂᤧᤏᤧ᤹ ᤌᤣᤏᤠᤎᤣᤒᤠ ᤁᤧᤗᤣ᤺ᤳᤋᤢᤛᤡᤀᤠᤱ ᤔᤧᤘᤕᤧᤒᤠ ᤔᤏᤠᤜᤠ᤹ ᤜᤠᤒᤠ ᤁᤴᤜᤠ᤹ᤀᤣ ᤔᤧ᤺ᤴᤇᤡᤒᤡ᥅ ᤀᤠᤸᤗ ᤐᤣᤃᤧ᤹ᤀᤠᤱ ᤂᤧᤱᤜᤠ᤹ᤏᤢ ᤌᤰᤋᤧ᤹॥” 39 ᤁᤸᤗᤧᤆᤥᤃᤢᤸᤗᤧ ᤃᤠᤗᤖᤧ ᤛᤁᤣᤔᤒᤠ ᤕᤰᤕᤢᤱᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤀᤒᤡᤔᤣᤗᤣᤁᤧᤴ ᤌᤱᤅᤥ ᤑᤳᤋᤢ. 40 ᤁᤖ ᤀᤒᤡᤔᤣᤗᤣᤁᤖᤧ ᤂᤢᤏᤧ᤹ ᤜᤠᤖᤡᤈᤠ᤺ᤳᤋᤢᤀᤠᤱ ᤂᤧᤴ ᤂᤧᤳᤇᤡᤱ॥ ᤕᤶᤒᤠ ᤗᤠᤶᤎᤣ᤺ᤳᤋᤥ ᤗᤠ᤺ᤵᤔᤠᤍᤧᤴ ᤌᤠᤖᤡᤰᤁᤣ ᤗᤠᤶ ᤁᤢᤗᤧ᤺ᤶ ᤆᤣᤜᤠ᤹ ᤔᤧᤛᤧᤖᤧᤀᤠᤱ ᤔᤧᤏᤧᤛ᤻ᤛᤧ॥ 41 ᤀᤒᤡᤔᤣᤗᤣᤁᤧᤴ ᤐᤣᤀᤠᤱ ᤀᤖᤢᤔᤠᤜ ᤔᤧᤵᤔᤏᤠᤒᤠᤍᤧᤴᤏᤥ ᤀᤠᤵᤑᤣᤰ ᤕᤢᤱᤛᤡᤱ. ᤂᤶᤓᤩᤠᤱ ᤈᤒᤢᤗᤖᤧ ᤃᤠᤗ ᤏᤢ ᤂᤢᤏᤧ᤹ ᤁᤢᤴᤛᤠ᤹ᤁᤢᤶᤓᤢ᤹ᤜᤠ᤹ ᤛᤁᤣᤔᤗᤠᤶ ᤗ᤺ᤳᤋᤢᤍᤣᤛᤢᤛᤡ॥ 42 ᤁᤢᤍᤠ᤺ᤴᤍᤡᤰᤔᤠ ᤛᤁᤣᤔᤒᤠ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤋᤠᤶᤍᤠᤶᤒᤠᤍᤧᤴᤏᤥ ᤔᤧᤒᤣ. ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤒᤡᤔᤣᤗᤣᤁᤧᤴ ᤔᤧᤈᤧᤰᤋᤢ॥ 43 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤁᤢᤗᤢᤵ ᤛᤢᤶᤛᤡ ᤆᤥᤃᤢᤛᤡ. ᤜᤧᤰᤁᤩᤠᤱ ᤕᤧᤰᤕᤰ ᤗᤠ᤺ᤰᤁᤠᤳ ᤋᤠᤶᤍᤠᤶᤒᤠᤍᤧᤴᤏᤥ ᤛᤢᤃᤢᤛᤡᤀᤠᤱ ᤕᤢᤅᤧ॥ ᤀᤠᤸᤗ ᤂᤢᤏᤧ᤹ ᤔᤏᤠᤜᤠ᤹ ᤕᤧᤰᤕᤰ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ ᤔᤧᤓᤧᤖᤧᤒᤠ ᤏᤡᤛᤢᤛᤡ. ᤂᤧᤒᤩᤠᤱ ᤂᤢᤏᤧ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤌᤱᤅᤥ ᤑᤳᤋᤢᤛᤡ॥ 44 ᤀᤒᤡᤔᤣᤗᤣᤁ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤛᤢᤶᤜᤠ᤹ ᤔᤧᤈᤠᤳᤋᤧᤖ ᤋᤃᤡ ᤔᤧᤒᤥᤖᤧ ᤜᤧᤰᤁᤩᤠᤱ ᤕᤧᤰᤕᤰᤁᤥ ᤗᤠ᤺ᤵᤔᤠᤍᤧᤴ ᤕᤶᤒᤠ ᤗᤠᤶᤎᤣ᤺ᤵᤐᤥ ᤌᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧ॥ ᤂᤧᤒᤩᤠᤱ ᤘᤣ᤹ ᤁᤢᤗᤢᤵ ᤏᤧᤳᤇᤡ ᤔᤏᤠᤜᤠ᤹ ᤔᤧᤓᤧᤖᤧᤀᤠᤱ ᤋᤠᤶᤍᤠᤶᤒᤠᤍᤧᤴᤏᤥ ᤁᤧᤘᤠ᤹ᤒᤠᤜᤠ᤹ ᤔᤧᤓᤳᤋᤢ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛᤧᤖᤢᤛᤡ॥ 45 ᤀᤒᤡᤔᤣᤗᤣᤁᤖᤧ ᤏᤠᤶᤎᤠᤎᤠ ᤂᤧᤴ ᤕᤧᤰᤕᤰᤁᤥ ᤌᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤜᤢᤰᤁᤠᤵ ᤆᤥᤃᤢ॥ ᤂᤢᤏᤧ᤹ ᤂᤧᤵᤔᤥᤒᤠ ᤔᤏᤠᤜᤠ᤹ ᤛᤧᤖᤢᤛᤡ. ᤕᤧᤰᤕᤰᤁᤡᤴ ᤔᤧᤕᤴᤇᤢ ᤔᤧᤍᤣᤛᤢ. ᤂᤧᤒᤩᤠᤱ ᤂᤧᤴ ᤋᤧᤴᤏᤥ ᤕᤢᤶᤔᤡᤴ ᤛᤧᤛᤢ॥ 46 ᤀᤠᤸᤗ ᤛᤁᤣᤔᤒᤠ ᤆᤱᤜᤡᤶᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢ. ᤂᤧᤒᤩᤠᤱ ᤂᤧᤱᤜᤠ᤹ ᤀᤣᤗ-ᤒᤖᤡᤋ ᤔᤠᤱᤜᤡᤶᤔᤥᤒᤠ ᤜᤠᤱᤕᤰᤁᤥ ᤔᤧᤒᤣ॥ 47 ᤂᤧᤱᤜᤠ᤹ ᤂᤧᤵᤔᤥ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤔᤧᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤒᤡᤔᤣᤗᤣᤁᤧᤴ ᤔᤧᤈᤧᤰᤋᤢ॥ 48 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤸᤔᤥᤏ ᤁᤥ᤺ᤰᤔᤠᤀᤥ ᤔᤧᤎᤥ᤺ᤰᤛᤡᤱ॥ ᤂᤢᤏᤧ᤹ ᤋ᤺ᤴᤍᤣᤴ ᤕᤠᤱᤛᤡᤱᤅᤠᤱ ᤛᤡᤱᤒᤥᤖᤠ᤺ᤰᤁᤡᤴ ᤀᤠ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤰᤋᤠᤱᤅᤥ ᤐᤰᤂᤢ॥ ᤂᤢᤏᤧ᤹ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤌᤣ ᤆᤥᤃᤢᤱᤗ ᤐᤳᤋᤠ ᤀᤥᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤜᤠᤖᤠᤜᤠᤖᤠ ᤂᤡᤏᤡ᤹ᤀᤠᤱ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥” 49 ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤡᤱᤒᤥᤖᤠ᤺ᤰᤜᤠ᤹ ᤔᤧᤀᤠ᤺ᤳᤋᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤒᤡᤔᤣᤗᤣᤁᤧᤴ ᤔᤧᤍᤡᤶᤍᤢ. ᤜᤧᤰᤁᤩᤠᤱ ᤛᤡᤱᤒᤥᤖᤠ᤺ᤰᤜᤠ᤹ ᤜᤠᤱᤕᤰ ᤁᤧᤖᤧᤰ ᤐᤡᤛᤠᤱ ᤔᤧᤗᤢᤵᤛᤢᤀᤠᤱ ᤔᤡ ᤔᤧᤕᤠᤰᤋᤢ॥ ᤂᤶᤓᤩᤠᤱ ᤛᤁᤣᤔ ᤆᤱᤜᤡᤶᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤛᤩᤧ. ᤂᤧᤱᤜᤠ᤹ ᤜᤵᤔᤧᤴ ᤜᤧᤴᤇᤡᤱ ᤌᤡᤰ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤔᤧᤘᤕᤧ॥ 50 ᤂᤧᤴ ᤀᤣᤃᤠᤱ ᤀᤒᤡᤔᤣᤗᤣᤁᤧᤴ ᤋᤣᤒᤣᤛ ᤕᤧᤰᤕᤰᤁᤥ ᤐᤣ. ᤜᤧᤰᤁᤩᤠᤱ ᤂᤧᤴ ᤁᤒᤪᤡᤱ ᤁᤡᤷᤃᤵ ᤁᤒᤢᤀᤠᤱ ᤜᤢᤰᤁᤠᤵ ᤆᤥᤃᤢ॥ 51 ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥ ᤌᤎᤵ ᤔᤧᤸᤗ᤹ᤔᤏᤠᤒᤠ ᤜᤠᤱᤕᤰ ᤌᤡᤰ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹. ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤂᤧᤵᤔᤥ ᤔᤧᤛᤧ᤺ᤵᤛᤡᤱᤅᤠᤱ ᤔᤧᤕᤢᤅᤧ॥ ᤂᤧᤱᤜᤠ᤹ᤖᤧ ᤜᤠᤱᤕᤰᤁᤡᤴ ᤔᤧᤛᤢᤒᤢᤀᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤔᤧᤒᤣ॥ 52 ᤀᤒᤡᤔᤣᤗᤣᤁᤧᤴ ᤜᤠᤱᤕᤰᤁᤥ ᤐᤣᤀᤠᤱ ᤂᤧᤴ ᤌᤱᤅᤥ ᤑᤳᤋᤢ॥ ᤀᤠᤸᤗ ᤂᤧᤴ ᤜᤠᤱᤕᤰᤁᤥ ᤔᤡ ᤁᤣ᤺ᤵᤔᤠ ᤑᤠ᤹ᤀᤠᤱ ᤂᤧᤵᤔᤥᤒᤠ ᤗᤠᤶᤎᤣᤳ ᤐᤣᤛᤠᤱ ᤐᤣ᤺ᤸᤗᤧ. 53 ᤔᤧᤴᤇᤢᤔᤠ ᤌᤡᤰᤗᤧ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤗᤢᤱᤛᤢᤶᤔᤡᤴ ᤗᤢᤶ ᤔᤰᤌᤠ᤺ᤴᤍᤢᤀᤠᤱ ᤂᤧᤸᤗᤧ ᤁᤢᤔᤡᤰᤂᤥ᤺ᤰᤁᤡᤴ ᤕ᤺ᤵᤛᤢ ᤐᤡᤖᤢ॥ 54 ᤀᤒᤡᤔᤣᤗᤣᤁᤖᤧ ᤂᤡᤔᤥ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤌᤠᤱᤒᤧᤴᤏᤡᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤜᤠᤖᤠ ᤁᤧᤍᤠᤓᤣ᤺ᤴ ᤋᤖᤵ ᤑᤡ᤺ᤰᤂᤧᤀᤠᤱ ᤀᤠᤱᤃᤠ᤹ ᤛᤧᤖᤠᤱᤅᤧ᤹. ᤔᤣ᤺ᤴᤏᤧᤓᤃᤪ ᤔᤧᤴᤇᤢᤔᤠ ᤌᤡᤰᤗᤧ ᤂᤢᤏᤧ᤹ ᤛᤧᤖᤢ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤴ ᤌᤠᤱᤒᤧᤴᤏᤡᤸᤗᤧ ᤆᤡᤎᤢᤵ ᤌᤢᤒᤢᤀᤠᤱ ᤂᤧᤴ ᤛᤩᤧ॥ 55 ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤒᤡᤔᤣᤗᤣᤁᤧᤴ ᤛᤩᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥ ᤔᤧᤏᤢ᤺ᤰᤂᤧ॥ 56 ᤁᤶᤓᤗ᤹ᤖᤡᤰᤁᤣ ᤀᤒᤡᤔᤣᤗᤣᤁᤖᤧ ᤂᤢᤏᤧ᤹ ᤏᤢᤒᤥᤱ ᤁᤢᤶᤓᤢ᤹ᤁᤢᤴᤛᤠ᤹ᤜᤠ᤹ ᤛᤧᤖᤢᤛᤡᤀᤠᤱ ᤁᤢᤶᤒᤠᤖᤧ ᤁᤢᤍᤰᤗᤧᤱᤘᤠᤀᤥ ᤆᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤥ ᤏᤢ᤺ᤰᤋᤢ. 57 ᤜᤧᤰᤁᤩᤠᤱ ᤛᤁᤣᤔᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ᤺ᤰᤋᤢ ᤐᤡᤖᤢᤛᤡᤀᤠᤱ ᤂᤢᤴᤇᤡ᤹ᤀᤣ ᤌᤧᤃᤣ᤺ᤰᤐᤥ ᤌᤠᤛᤢ ᤐᤡᤖᤢᤛᤡ॥ ᤕᤖᤢᤒ-ᤒᤠᤗᤖᤧ ᤁᤢᤛ᤻ᤛᤠ ᤕᤥᤋᤠᤔᤖᤧ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢᤛᤡᤒᤠᤴ ᤂᤧᤱᤜᤠ᤹ᤀᤥ ᤛᤧᤰᤂᤠᤀᤣ ᤌᤩᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.