ᤂᤠᤛᤧᤴᤗᤥ᤺ᤶᤒᤠ 8 - LIFOTNTᤔᤡᤍᤩᤠᤏᤡᤜᤠ᤹ ᤁᤢᤏᤢᤵᤔᤥ ᤜᤠᤖᤡᤔᤧᤍᤩᤧ 1 ᤀᤣᤑᤪᤠᤀᤡᤔᤒᤠ ᤔᤏᤠᤜᤠ᤹ᤖᤧ ᤃᤡᤍᤥᤏᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤠᤏᤡᤃᤧᤏᤢ ᤀᤰᤂᤣ ᤁᤧᤈᤥᤃᤢᤒᤠᤒᤣ᥅ ᤔᤡᤍᤩᤠᤏᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤁᤧᤒᤣ᤺ᤸᤗᤧ ᤂᤧᤏᤧ᤹ ᤀᤠᤏᤡᤃᤣ ᤌᤣᤀᤠᤱ ᤕᤠᤵᤔᤡ ᤁᤧᤴᤀᤢ᤺ᤳᤋᤧᤴᤒᤠᤒᤣ᥅” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤢᤖᤠ ᤔᤧᤍᤥᤛᤢᤖ ᤀᤠᤵᤋᤡᤰ ᤔᤧᤃᤢ᤺ᤳᤋᤢ॥ 2 ᤁᤖ ᤃᤡᤍᤥᤏᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤈᤥᤃᤢᤶᤒᤠᤴᤏᤢ ᤋᤱᤔᤧᤸᤗᤧ ᤀᤠᤱᤃᤠ᤹ ᤌᤣ ᤆᤥᤃᤢᤱᤅᤠᤱ ᤘᤠ᤹ᤒᤣ᥅ ᤌᤣ ᤀᤣᤑᤪᤠᤀᤡᤔᤒᤠ ᤆᤧᤸᤗᤧᤰᤛᤣ᤹ᤀᤥ ᤁᤥ᤺ᤵᤔᤏᤠᤒᤠ ᤛᤡᤗᤠᤜᤠ᤹ ᤀᤒᤡᤀᤣᤈᤣᤖᤖᤧ ᤁᤧᤖᤧᤰ ᤁᤢᤈᤧᤸᤗᤧᤰᤛᤣ᤹ ᤛᤢᤶᤔᤏᤠᤒᤠᤴᤏᤢ᤺ᤸᤗᤧ ᤏᤢᤒᤠ ᤔᤧᤈᤥ᤺ᤰᤏᤧᤶᤒᤡ᥅ 3 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤍᤩᤠᤏᤒᤠ ᤕᤢᤰᤛᤠᤒᤠ ᤀᤥᤖᤣᤒ ᤏᤢ ᤈᤀᤣᤒᤧᤴ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤛᤡᤀᤠᤱ ᤘᤠ᤹ᤛᤡ॥ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤌᤣ ᤆᤥ᤺ᤰᤔᤠ ᤛᤢᤰᤋᤢᤱᤅᤠᤱ ᤘᤠ᤹ᤒᤣ᥅” ᤂᤢᤏᤧ᤹ ᤁᤴ ᤁᤢᤒᤠ᤺ᤴᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰ ᤆᤡ᤺ᤰᤋᤢ॥ 4 ᤃᤡᤍᤥᤏᤧᤴ ᤕᤷᤍᤏ ᤘᤜ᤺ᤱᤅᤥ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤡᤵ ᤛᤢᤶᤛᤡ ᤁᤢᤔᤏᤠᤜᤠ᤹ ᤐᤏᤠ ᤔᤧᤏᤠᤛᤧᤀᤠᤱ ᤔᤧᤘᤕᤧᤛᤠᤱ ᤕᤷᤍᤏ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢᤀᤠᤱ ᤏᤡᤱᤔᤡᤜᤠ᤹ ᤔᤧᤏᤠ᤺ᤳᤋᤢᤛᤡᤀᤠᤱ ᤔᤧᤒᤳᤇᤧ॥ 5 ᤂᤢᤏᤧ᤹ ᤛᤢᤰᤁᤥᤋᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤁᤴ ᤀᤠᤔᤏᤠᤜᤠ᤹ ᤁᤢᤓᤠ ᤆᤠᤔᤠ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤏᤠᤛᤧᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤡᤍᤩᤠᤏᤒᤠ ᤜᤠᤱᤜᤠ᤹ ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤏᤠ᤺ᤳᤋᤢᤱᤛᤡᤱᤗ ᤐᤳᤋᤠ॥” 6 ᤁᤖ ᤛᤢᤰᤁᤥᤋᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤌᤣ ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤂᤧᤏᤧ᤹ ᤁᤧᤜᤢᤰᤁᤥ ᤁᤧᤎᤠᤛᤢ ᤁᤧᤛᤢᤖᤢᤛᤡᤀᤠᤱ ᤘᤠ᤹ᤛᤡᤒᤡ᥅ ᤂᤧᤏᤧ᤹ ᤁᤧᤎᤰᤛᤢᤒᤠᤜᤠ᤹ ᤀᤠᤏᤡᤃᤣ ᤌᤣᤀᤠᤱ ᤁᤢᤈᤠ ᤐᤡᤖᤢᤶᤛᤡᤶᤒᤧᤒᤣ᥅” 7 ᤃᤡᤍᤥᤏᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧᤓᤃᤪ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤛᤢᤛᤡ᤹ ᤂᤧᤒᤩᤠᤱ ᤀᤠᤱᤃᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤋᤡᤱᤃᤪᤣᤰ ᤏᤢ ᤀᤠᤗᤰᤗᤰᤐᤠ ᤕᤠ᤺ᤴᤜᤠ᤹ᤖᤧ ᤂᤡᤏᤡ᤹ ᤜᤥᤖᤡᤰᤁᤡᤴ ᤀᤰᤂᤢᤱ᤹॥” 8 ᤂᤢᤏᤧ᤹ ᤂᤧᤵᤔᤥᤗᤠᤶ ᤐᤏᤡᤀᤣᤗ ᤐᤣ. ᤂᤧᤒᤩᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ ᤜᤧᤰᤁᤣᤗ᤹ᤖᤡᤰᤁᤣ ᤐᤣᤗᤡ ᤑᤠᤰᤋᤢᤛᤡ॥ ᤐᤏᤡᤀᤣᤗᤒᤠ ᤔᤏᤠᤜᤠ᤹ᤖᤧᤀᤠᤱ ᤛᤢᤰᤁᤥᤋᤒᤠ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢᤀᤠᤱ ᤘᤕᤧᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤔᤧᤳᤋᤢ॥ 9 ᤂᤢᤏᤧ᤹ ᤐᤏᤡᤀᤣᤗᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤢᤖᤡᤰ ᤋᤠᤖᤡᤰ ᤏᤢ᤺ᤱᤅᤠᤀᤠᤱ ᤂᤡᤏᤡ᤹ ᤁᤴ ᤆᤱᤜᤡᤶᤔᤡᤴ ᤌᤢᤵᤛᤢᤱ ᤐᤡᤏᤡᤱ᤹॥” 10 ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤂᤢᤴᤇᤡ᤹ ᥇᥋.᥆᥆᥆ ᤌᤰᤛᤢᤒᤠᤜᤠ᤹ᤏᤢ ᤁᤷᤁᤥᤖᤀᤥ ᤘᤕᤧᤳᤇᤡ॥ ᤏᤠᤱᤃᤧᤴ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤔᤏᤠᤛᤢᤶᤜᤠ᤹ᤗᤠᤶ ᤁᤧᤏᤶᤒᤠ ᤌᤰᤛᤢᤒᤠᤜᤠ᤹ ᤁᤧᤖᤧᤰ ᤁᤶᤔᤩᤠᤗᤰ ᤔᤧᤘᤕᤧ॥ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤖᤧ ᤁᤠᤵᤋᤢᤛᤡᤒᤠ ᥇.᥈᥆.᥆᥆᥆ ᤔᤏᤠᤜᤠ᤹ ᤋᤧᤴᤎᤱᤅᤥ ᤔᤧᤛᤧᤖᤢᤛᤡᤀᤠᤱ ᤘᤕᤧ॥ 11 ᤏᤥᤒᤜ ᤏᤢ ᤕᤥᤃᤒᤜᤠᤒᤠ ᤏᤠᤱᤃᤧᤴ ᤗᤧᤵᤔᤠᤱ ᤛᤠ᤺ᤱᤃᤠᤜᤡᤶᤔᤥ ᤁᤧᤕᤢᤱᤒᤠᤜᤠ᤹ ᤗᤠᤱᤔᤧᤄᤣᤃᤧᤒᤠ ᤗᤠᤶ ᤐᤥ᤺ᤰᤂᤧᤀᤠᤱ ᤃᤡᤍᤥᤏᤧᤴ ᤋᤃᤡ ᤌᤠᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤡᤱᤛᤡᤱ ᤔᤧᤴᤗ᤹ᤖᤧᤶᤒᤠ ᤕᤧᤶᤔᤥ ᤂᤢᤏᤧ᤹ ᤌᤰᤛᤢᤒᤠᤜᤠ᤹ ᤌᤱᤅᤥ ᤑᤳᤋᤢᤛᤡ॥ 12 ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤂᤧᤳᤏᤧᤛᤡ. ᤁᤖ ᤂᤢᤏᤧ᤹ ᤁᤴ ᤔᤡᤎᤩᤠᤏᤡ ᤜᤠᤱᤜᤠ᤹ ᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤏᤧᤵᤔᤠᤱ ᤋᤧᤶᤛᤢᤛᤡᤀᤠᤱ ᤂᤢᤴᤇᤡ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤜᤠᤖᤡᤔᤧᤍᤩᤧ॥ 13 ᤀᤠᤸᤗ ᤕᤥᤀᤠᤛᤖᤧ ᤁᤢᤛ᤻ᤛᤠ ᤃᤡᤍᤥᤏᤧᤴ ᤋᤧᤴᤎᤱᤅᤥᤗᤠᤶ ᤜᤣᤖᤣᤛᤒᤠ ᤆᤡᤜᤢ᤹ᤜᤢ᤹ᤒᤠᤍᤧᤴ ᤐᤥ᤺ᤰᤂᤧᤀᤠᤱ ᤏᤢ᤺ᤰᤂᤧᤸᤗᤧ. 14 ᤂᤢᤏᤧ᤹ ᤛᤢᤰᤁᤥᤋᤒᤠ ᤏᤠᤗᤡᤃᤧᤴ ᤌᤠᤱᤒᤧᤴ ᤌᤡᤰ ᤋᤧᤶᤛᤢᤀᤠᤱ ᤛᤣ᤺ᤴᤍᤥᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤛᤢᤰᤁᤥᤋᤒᤠ ᤏᤢᤒᤥᤱᤅᤠᤱ ᤏᤢᤛᤡ ᤗᤠᤶᤗᤥᤒᤠᤜᤠ᤹ ᤏᤢ ᤕᤧᤰᤕᤰᤁᤥᤒᤠ ᤋᤢᤶᤓᤠᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤃᤡᤍᤥᤏᤧᤴ ᤛᤠᤵᤋᤢ ᤐᤡᤖᤢ॥ 15 ᤂᤧᤴ ᤀᤣᤃᤠᤱ ᤃᤡᤍᤥᤏᤧᤴ ᤛᤢᤰᤁᤥᤋᤒᤠ ᤔᤏᤠᤜᤠ᤹ᤀᤥ ᤑᤧᤖᤧᤀᤠᤱ ᤔᤧᤳᤋᤢᤛᤡ. “ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤁᤵᤔᤥ ᤘᤠ᤹ᤛᤡ. ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤔᤠᤱ ᤀᤠᤱᤃᤠ᤹ ᤕᤠᤵᤔᤡ ᤐᤠᤴ ᤁᤧᤔᤧᤳᤋᤡᤀᤠᤱ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤳᤋᤧᤀᤠᤱ ᤘᤕᤧ. ‘ᤀᤥᤔᤧᤳᤋᤧ᤹ ᤁᤵᤔᤥ ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤂᤧᤏᤧ᤹ ᤁᤧᤜᤢᤰᤁᤥ ᤌᤩᤧᤈᤢᤖᤧᤛᤡᤀᤠᤱ ᤘᤠ᤹ᤛᤡ ᤜᤧᤰᤁᤩᤠᤱ ᤌᤣᤀᤠᤱ ᤀᤠᤏᤡᤃᤣ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤢᤈᤠ ᤐᤡᤖᤢᤶᤛᤡᤶᤒᤧᤒᤠᤒᤣ᥅’” 16 ᤂᤧᤒᤩᤠᤱ ᤂᤢᤏᤧ᤹ ᤕᤧᤰᤕᤰᤁᤥᤒᤠ ᤂᤧᤴ ᤋᤢᤶᤓᤠᤰᤛᤠᤜᤠ᤹ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤛᤢᤰᤁᤥᤋᤒᤠ ᤔᤏᤠᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤋᤡᤱᤃᤪᤣᤰ ᤏᤢ ᤀᤠᤗᤢᤰᤗᤢᤰᤐᤠ ᤕᤠ᤺ᤴᤜᤠ᤹ᤖᤧ ᤜᤡᤵᤋᤢᤛᤡᤀᤠᤱ ᤂᤢᤶᤍᤡᤱ ᤐᤡᤖᤢᤛᤡ॥ 17 ᤂᤢᤏᤧ᤹ ᤐᤏᤡᤀᤣᤗᤒᤠ ᤆᤱᤜᤡᤶᤔᤡᤴ ᤌᤢᤵᤛᤢᤍᤣᤛᤢ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤛᤧᤖᤢᤛᤡ॥ 18 ᤂᤧᤒᤩᤠᤱ ᤂᤢᤏᤧ᤹ ᤈᤣᤒᤜ ᤏᤢ ᤛᤸᤔᤢᤴᤏᤠ᤺ᤴ ᤔᤧᤳᤋᤢᤛᤡ. “ᤋᤒᤥᤖᤀᤥ ᤂᤡᤏᤡ᤹ ᤁᤧᤛᤧᤖᤢᤶᤛᤡᤶᤒᤠ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤘᤕᤧ᥅” ᤂᤢᤴᤇᤡ᤹ ᤐᤠ᤺ᤳᤋᤧᤛᤢ. “ᤂᤧᤱᤜᤠ᤹ ᤂᤧᤏᤧ᤹ ᤜᤧᤰᤋᤱᤒᤠᤀᤣ ᤔᤧᤘᤕᤧ. ᤁᤧᤖᤧᤰᤗᤧ ᤂᤢᤴᤇᤡ᤹ ᤏᤠᤖᤠᤴ ᤜᤠᤱᤛᤠ ᤜᤧᤰᤋᤱᤒᤠ ᤆᤥᤃᤧ॥” 19 ᤃᤡᤍᤥᤏᤖᤧ ᤔᤧᤳᤋᤢᤛᤡ. “ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤛ᤻ᤛᤠ ᤀᤠᤱᤃᤠ᤹ ᤀᤠᤶᤓᤢ᤹ ᤀᤠᤴᤛᤠ᤹ᤛᤡ ᤔᤧᤘᤕᤧ॥ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤂᤡᤏᤡ᤹ ᤂᤧᤱᤜᤠ᤹ ᤁᤢᤜᤡᤱᤘᤧᤳᤋᤣ ᤁᤧᤗᤧᤖᤢᤶᤛᤡᤶᤒᤠ ᤜᤧᤰᤁᤣ᤺ᤸᤗᤧᤃ ᤀᤠᤱᤃᤠ᤹ ᤂᤧᤴᤇᤡ᤹ ᤔᤧᤛᤧᤳᤏᤧᤛᤡᤱᤅᤡᤴᤒᤠ ᤘᤕᤧ॥” 20 ᤂᤧᤒᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤒᤠ ᤕᤣᤋᤣᤖᤧᤴ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤠᤱ ᤂᤧᤱᤜᤠ᤹ ᤛᤧᤖᤧᤛᤧ᤹᥄” ᤁᤖ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤆᤢᤰᤛᤠ ᤜᤡᤴᤈᤠ᤹ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤠᤓᤣᤴ ᤔᤧᤓᤡ᤺ᤰᤂᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤡᤛᤧ॥ 21 ᤁᤸᤗᤧᤆᤥᤃᤢᤸᤗᤧ ᤈᤣᤒᤜ ᤏᤢ ᤛᤸᤔᤢᤴᤏᤠᤖᤧ ᤃᤡᤍᤥᤏᤧᤴ ᤔᤧᤳᤋᤧᤛᤢ. “ᤀᤠᤍᤠᤱᤒᤠ ᤕᤧᤶᤒᤡᤳᤇᤠᤏᤧᤏᤧᤓᤃᤪ ᤀᤠᤵᤑᤣᤰ ᤑᤧᤖᤧ᤹ᤀᤠᤱ ᤀᤠᤴᤇᤡᤃᤣ ᤀᤠᤛᤧᤖᤧ᤹॥” ᤂᤧᤒᤩᤠᤱ ᤃᤡᤍᤥᤏᤧᤴ ᤐᤥᤃᤧᤀᤠᤱ ᤏᤧᤵᤔᤠᤱ ᤛᤧᤖᤢᤛᤡ. ᤂᤧᤒᤩᤠᤱ ᤂᤢᤴᤇᤡ᤹ ᤀᤢᤔᤣᤜᤠ᤹ᤖᤧ ᤏᤡᤃᤡ᤺ᤱᤔᤥ ᤁᤧᤒᤵᤐᤠ ᤗᤠᤒᤠᤂᤧ᤺ᤰᤘᤠᤜᤠ᤹ ᤑᤧᤴᤍᤢᤀᤠᤱ ᤋᤣ᤹ᤖᤢ॥ 22 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤃᤡᤍᤥᤏᤧᤴ ᤔᤧᤔᤧᤳᤋᤢ. “ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤏᤡᤃᤣ ᤀᤠᤃ᤻ᤛᤧ᤺ᤵᤋᤧᤀᤠᤱ ᤘᤠ᤹॥ ᤀᤠᤸᤗ ᤂᤧᤏᤧ᤹ ᤀᤠᤏᤡᤃᤣ ᤕᤢᤰᤛᤠᤒᤠ ᤐᤥ᤺ᤰᤂᤧ᤹. ᤂᤧᤴ ᤀᤣᤃᤠᤱ ᤁᤧᤛ᤻ᤛᤠ. ᤁᤧᤶᤔᤧᤴᤇᤠ᤹ᤀᤡᤴ ᤀᤠᤏᤡᤃᤣ ᤕᤢᤰᤛᤠᤒᤠ ᤐᤥᤱᤗ॥” 23 ᤁᤖ ᤃᤡᤍᤥᤏᤖᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤡᤃᤪ ᤀᤠᤛ᤻ᤛᤠᤴ ᤔᤣ᤺ᤴ ᤁᤖ ᤕᤜᤘᤣ ᤍᤠᤱᤒᤧᤴᤏᤣ ᤂᤡᤏᤡ᤹ ᤛᤶᤎᤠᤱ ᤕᤢᤰᤛᤠᤒᤠ ᤐᤥᤱ᤹॥” 24 ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤡᤏᤡ᤹ ᤗᤳᤇᤠ ᤐᤠᤴ ᤐᤣᤗᤡ ᤑᤠᤰᤔᤠ ᤀᤠᤏᤡᤱᤘᤠ᤹ ᤘᤠ᤹॥ ᤂᤡᤏᤡ᤹ ᤁᤧᤖᤧᤰᤗᤧ ᤁᤧᤏᤠᤵᤋᤢᤶᤛᤡᤶᤒᤠ ᤂᤡᤏᤡ᤹ ᤆᤡᤃᤰᤘᤠᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤗᤳᤇᤠ ᤁᤢᤴᤍᤢᤸᤗᤥ ᤀᤠᤒᤡᤖᤧᤶᤔᤧ᤹॥” ᤂᤧᤴ ᤏᤡᤱᤔᤡ ᤀᤡᤛ᤻ᤔᤠᤀᤣᤗᤡᤜᤠ᤹ᤀᤥ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤘᤠ᤺ᤵᤔᤠ ᤛᤠᤰᤌᤡᤶ ᤘᤕᤧ॥ 25 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤏᤡᤛ᤻ᤛᤣᤛᤠᤱ. ᤀᤠᤏᤡᤃᤣ ᤂᤧᤴ ᤐᤡᤀᤠᤛᤡᤃᤧ॥” ᤂᤧᤒᤩᤠᤱ ᤆᤡᤖᤡᤰ ᤌᤡᤰ ᤔᤧᤓᤧᤛᤢ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤔᤧᤏᤠᤵᤋᤢᤛᤡᤒᤠ ᤂᤢᤴᤇᤡ᤹ ᤆᤡᤃᤰᤘᤠᤜᤠ᤹ᤗᤠᤶ ᤂᤧᤵᤔᤥ ᤛᤠᤶᤔᤩᤠᤱ ᤁᤢᤴᤍᤢᤸᤗᤥ ᤌᤡᤰᤌᤡᤰ ᤗᤠᤵᤔᤧᤓᤢᤛᤢ ᤔᤧᤒᤡᤖᤢ॥ 26 ᤂᤢᤏᤧ᤹ ᤏᤠ᤺ᤰᤋᤢᤛᤡᤒᤠ ᤛᤠᤶᤔᤩᤠᤱ ᤁᤢᤴᤍᤢᤸᤗᤥᤜᤠ᤹ ᥇.᥍᥆᥆ ᤛᤣᤁᤣᤗ ᤕᤠᤖᤡᤰ ᤐᤥ᤺ᤰᤂᤧ॥ ᤁᤱᤃ ᤗᤠᤒᤠᤂᤧ᤺ᤰᤘᤠ ᤜᤧᤰᤁᤩᤠᤱ ᤘᤣ᤹ ᤘᤠ᤺ᤳᤋᤡ ᤛᤠᤔᤠᤜᤠ᤹ ᤏᤢ ᤔᤡᤎᤩᤠᤏᤡ ᤜᤠᤱᤜᤠ᤹ᤖᤧ ᤔᤧᤈᤠᤰᤂᤢᤒᤠ ᤐᤠᤖᤠᤴᤗᤠ ᤆᤠᤱᤜᤠ᤹ᤏᤢ᤺ᤸᤗᤧ ᤘᤣ᤹ ᤘᤕᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤢᤔᤣᤜᤠ᤹ᤖᤧ ᤏᤡᤃᤡ᤺ᤱᤔᤥ ᤔᤧᤘᤠᤖᤢᤒᤠ ᤛᤡᤁᤪᤡᤜᤠ᤹ᤃ ᤏᤡ᤺ᤵᤔᤠᤀᤣ ᤔᤧᤴᤏᤡᤖᤢᤴ॥ 27 ᤂᤧᤴ ᤛᤠᤶᤔᤩᤠᤱᤜᤠ᤹ᤗᤠᤶ ᤃᤡᤍᤥᤏᤖᤧ ᤗᤳᤇᤠ ᤗᤃᤣ᤺ᤵ ᤆᤥᤃᤢᤀᤠᤱ ᤂᤢᤏᤧ᤹ ᤁᤢᤕᤧᤰᤕᤰ ᤀᤥᤐᤪᤠᤀᤥ ᤂᤧᤴ ᤑᤳᤇᤢ॥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤛᤧᤘᤠ ᤔᤧᤔᤧᤳᤋᤢᤀᤠᤱ ᤁᤴᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤴ ᤃᤡᤍᤥᤏ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ ᤂᤢᤶᤔᤠᤛᤡ ᤗᤳᤇᤠ ᤆᤧᤴ ᤐᤥ᤺ᤰᤂᤧ॥ 28 ᤔᤡᤍᤩᤠᤏᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤔᤧᤎᤩᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤴ ᤆᤠᤱᤈᤠᤱ ᤔᤧᤵᤔᤠ ᤔᤧᤴᤇᤢᤰᤋᤢᤴ॥ ᤃᤡᤍᤥᤏᤖᤧ ᤁᤢᤜᤡᤱᤜᤡᤱ ᤀᤠᤸᤗᤛᤠᤱ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤗᤠᤈᤣ᤹ᤀᤥ ᤛᤏᤠᤖᤢᤱ ᤐᤥ᤺ᤰᤂᤧᤖᤥ॥ ᤃᤡᤍᤥᤏᤧᤴ ᤔᤠᤛᤡᤱ 29 ᤂᤧᤴ ᤀᤣᤃᤠᤱ ᤕᤥᤀᤠᤛᤖᤧ ᤁᤢᤛ᤻ᤛᤠ ᤕᤖᤢᤒ-ᤒᤠᤗᤧᤴ ᤀᤠᤵᤑᤣᤰ ᤁᤢᤜᤡᤶᤔᤥ ᤐᤣᤀᤠᤱ ᤕᤢᤱᤔᤠ ᤜᤣ᤺ᤰᤋᤧ॥ 30 ᤂᤢᤏᤧ᤹ ᤏᤢᤒᤥᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤖᤡᤰ ᤁᤢᤔᤣᤳ ᤔᤧᤘᤕᤧ॥ 31 ᤛᤁᤣᤔᤀᤥᤀᤠᤱ ᤂᤢᤏᤧ᤹ ᤁᤢᤈᤰᤔᤣ᤺ᤳ ᤌᤡᤰ ᤘᤕᤧ. ᤂᤧᤸᤗᤧᤀᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ ᤐᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤱ ᤂᤢᤏᤧ᤹ ᤀᤒᤡᤔᤣᤗᤣᤁ ᤘᤠ᤺ᤳᤋᤢ॥ 32 ᤜᤧᤰᤁᤩᤠᤱ ᤕᤥᤀᤠᤛᤖᤧ ᤁᤢᤛ᤻ᤛᤠ ᤃᤡᤍᤥᤏᤧᤴ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤔᤠᤛᤡᤱ. ᤂᤶᤓᤩᤠᤱ ᤀᤒᤡᤀᤣᤈᤣᤖᤡᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤀᤥᤐᤪᤠ ᤔᤧᤵᤔᤏᤠᤒᤠᤍᤧᤴᤏᤥ ᤔᤧᤈᤡᤰᤂᤢ॥ 33 ᤂᤢᤏᤧ᤹ ᤔᤠᤛᤡᤱᤅᤠᤱ ᤂᤡᤔᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤠᤶᤔᤥ ᤒᤠᤗ ᤔᤠᤱᤜᤠ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤰ ᤔᤧᤜᤣ᤺ᤰᤋᤢ ᤜᤧᤰᤁᤩᤠᤱ ᤒᤠᤗ-ᤒᤖᤡᤋᤧᤴ ᤂᤢᤴᤇᤡ᤹ ᤔᤠᤱ ᤔᤧᤈᤥᤃᤢ॥ 34 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤡᤛᤠᤱᤒᤠ ᤏᤡᤱᤔᤡᤜᤠ᤹ᤖᤧ ᤜᤢᤰᤁᤥᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤢ॥ 35 ᤕᤖᤢᤒ-ᤒᤠᤗ. ᤀᤡᤃᤪ ᤃᤡᤍᤥᤏᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤆᤥᤃᤢᤒᤠ ᤁᤧᤖᤧᤰ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤀᤠᤱ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ ᤏᤢᤖᤡᤰ ᤔᤧᤵᤔᤠᤛᤡ ᤕᤠ᤺ᤶᤒᤰ ᤔᤧᤴᤈᤥᤃᤢᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.