ᤂᤠᤛᤧᤴᤗᤥ᤺ᤶᤒᤠ 7 - LIFOTNTᤃᤡᤍᤥᤏᤖᤧ ᤔᤡᤍᤩᤠᤏᤡᤜᤠ᤹ ᤏᤠ᤺ᤴᤍᤢᤛᤡ 1 ᤕᤖᤢᤒ-ᤒᤠᤗ. ᤂᤢᤏᤧ᤹ ᤃᤡᤍᤥᤏ ᤔᤧᤔᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤠᤴᤍᤣᤴ ᤋᤠᤏᤠᤶᤛᤠ ᤔᤧᤒᤥᤃᤧᤀᤠᤱ ᤜᤖᤥᤍᤒᤠ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠᤀᤥ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤄᤡᤱᤄᤢ॥ ᤔᤡᤍᤩᤠᤏᤡᤜᤠ᤹ᤖᤧᤃ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤥᤜᤠᤱ ᤗᤧᤵᤔᤠᤱ ᤔᤥᤖᤣ ᤁᤥ᤺ᤰᤔᤠᤒᤠ ᤏᤧᤏᤧᤒᤠᤍᤧᤴᤏᤥ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤈᤥᤃᤢ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤃᤡᤍᤥᤏᤧᤴ ᤔᤧᤳᤋᤢ. “ᤔᤡᤍᤩᤠᤏᤡᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤆᤠᤜᤠ᤹ ᤆᤥ᤺ᤰᤁᤠᤒᤠᤏᤢ᤺ᤸᤗᤧ ᤕᤖᤡᤰ ᤔᤧᤘᤠ᤹. ᤂᤧᤸᤗᤧᤆᤥᤃᤢᤸᤗᤧ ᤔᤡᤍᤩᤠᤏᤡᤜᤠ᤹ ᤀᤠᤱᤃᤠ᤹ ᤁᤧᤜᤢᤰᤁᤥ ᤌᤠᤔᤠᤛᤡ ᤔᤧᤛᤢᤰᤁᤠᤴ ᤔᤣ᤺ᤴᤏᤧᤓᤃᤪ ᤀᤡᤛᤪᤠᤀᤡᤗᤡᤜᤠ᤹ ᤀᤠᤱᤍᤡᤱ ᤔᤧᤗ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤔᤢᤰᤛᤠᤶᤔᤡᤸᤗᤧ ᤁᤴ ᤌᤱᤅᤡᤴ ᤏᤠ᤺ᤴᤍᤢᤶᤒᤧᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹॥ 3 ᤀᤠᤸᤗ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤕᤠᤖᤡᤰ ᤗᤳᤇᤠ ᤀᤡᤱᤓᤴ ᤆᤥᤃᤧ᤹. ᤜᤧᤰᤁᤣᤗ᤹ᤖᤡᤰ ᤁᤵᤔᤥ ᤁᤡᤔᤧᤸᤗᤧ ᤁᤧᤕᤱᤒᤠ ᤁᤢᤓᤠ ᤔᤧᤘᤠ᤹ᤏᤧᤓᤃᤪ ᤂᤧᤱᤜᤠ᤹ ᤃᤡᤗᤠᤍ ᤁᤥ᤺ᤰᤔᤠᤗᤠᤶᤔᤣ ᤂᤡᤔᤥ ᤂᤢᤴᤇᤡ᤹ ᤜᤡᤶᤔᤥ ᤔᤧᤏᤢ᤺ᤱ ᤔᤧᤒᤣ᤺ᤰᤗ॥” ᤁᤶᤓᤗ᤹ᤖᤡᤰ ᤏᤡᤒᤥᤱᤅᤠᤱ ᤏᤧᤳᤇᤡ ᤜᤧᤴᤇᤡᤱ ᤔᤧᤏᤢ᤺ᤰᤂᤧ ᤔᤧᤒᤣ. ᤜᤧᤰᤁᤩᤠᤱ ᤌᤡᤒᤥᤱ ᤜᤧᤴᤇᤡᤱ ᤔᤧᤘᤕᤧ ᤔᤧᤕᤠ᤺ᤰᤋᤧ॥ 4 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤃᤡᤍᤥᤏᤧᤴ ᤔᤧᤳᤋᤢ. “ᤀᤠᤸᤗᤛᤠᤱ ᤔᤏᤠᤜᤠ᤹ ᤕᤖᤡᤰ ᤔᤧᤘᤠ᤹॥ ᤂᤧᤱᤜᤠ᤹ ᤕᤥ ᤘᤜ᤺ᤱᤅᤥ ᤋᤣ᤹ᤖᤧᤛᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤃᤡ ᤂᤧᤱᤜᤠ᤹ᤗᤠᤶ ᤀᤠᤱᤃᤠ᤹ ᤛᤧᤴᤍᤢᤱᤛᤡᤱ᤹॥ ᤀᤠᤸᤗ ᤀᤠᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱ᤹. ‘ᤁᤴ ᤔᤏᤠᤴᤃ ᤂᤧᤏᤧ᤹ᤏᤢ ᤐᤣᤰ॥’ ᤂᤧᤒᤩᤠᤱ ᤂᤧᤴ ᤐᤣᤰ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱ. ‘ᤁᤴ ᤔᤏᤠᤴ ᤂᤧᤏᤧ᤹ᤏᤢ ᤔᤧᤒᤣ᤺ᤰᤏᤧᤴ॥’ ᤂᤶᤓᤩᤠᤱ ᤂᤧᤴ ᤔᤧᤒᤣ᤺ᤰᤏᤧᤴ॥” 5 ᤁᤸᤗᤧᤆᤥᤃᤢᤸᤗᤧ ᤃᤡᤍᤥᤏᤖᤧ ᤔᤏᤠᤜᤠ᤹ ᤕᤥ ᤘᤜ᤺ᤱᤅᤥ ᤕᤢᤖᤢᤛᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤩᤠᤒᤠ ᤁᤢᤀᤡᤛᤡᤰ ᤂᤢᤴᤇᤡ᤹ ᤗᤧᤛᤥ᤺ᤵᤐᤠᤸᤗᤧ ᤆᤫᤠ᤺ᤳ ᤁᤧᤗᤠᤰᤐᤠᤀᤠᤱ ᤁᤧᤎᤢᤱᤒᤠᤜᤠ᤹ ᤁᤧᤖᤧᤰ ᤌᤡᤰᤗᤧᤵᤔᤠᤱ ᤕᤧᤵᤛᤧᤛᤧ᤹. ᤜᤧᤰᤁᤩᤠᤱ ᤌᤡᤰᤏᤠᤜᤠᤱ ᤗᤧᤵᤔᤠᤱ ᤆᤤᤲ ᤌᤢᤱᤒᤥ᤺ᤸᤗᤧ ᤁᤧᤍᤰᤛᤡᤱᤒᤠᤀᤠᤱ ᤆᤫᤠ᤺ᤳ ᤁᤧᤎᤢᤱᤒᤠᤜᤠ᤹ ᤕᤧᤵᤛᤧᤛᤧ᤹॥” 6 ᤜᤢᤰᤁᤡᤸᤗᤧ ᤔᤧᤒᤠᤃᤢᤀᤠᤱ ᤆᤫᤠ᤺ᤳ ᤁᤧᤗᤠᤰᤐᤠᤀᤠᤱ ᤁᤧᤎᤢᤱᤒᤠᤜᤠ᤹ ᤁᤡᤵ ᤛᤢᤶᤛᤡ ᤔᤧᤕᤥᤖᤧ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤌᤢᤱᤒᤥᤜᤒᤳ ᤔᤧᤓᤴᤇᤡᤱᤅᤠᤱ ᤆᤫᤠ᤺ᤳ ᤔᤧᤎᤢᤅᤢ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤃᤡᤍᤥᤏᤧᤴ ᤔᤧᤳᤋᤢ. “ᤁᤴ ᤁᤡᤵ ᤛᤢᤶᤛᤡ ᤀᤠᤳᤋᤡᤴᤜᤠ᤹ᤖᤧ ᤔᤧᤗᤠᤃᤢᤀᤠᤱ ᤆᤫᤠ᤺ᤳ ᤔᤧᤎᤢᤅᤢ ᤜᤠᤒᤠ ᤁᤴᤜᤠ᤹ᤗᤠᤶᤒᤠᤀᤣ ᤀᤠᤱᤃᤠ᤹ ᤂᤡᤏᤡ᤹ ᤛᤧ᤺ᤵᤏᤡᤱ᤹. ᤜᤧᤰᤁᤩᤠᤱ ᤔᤡᤍᤩᤠᤏᤡᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱ᤹॥ ᤘᤣ᤹ᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤧᤴᤜᤠ᤹ᤀᤥ ᤔᤧᤒᤣ᤺ᤰᤗ॥” 8 ᤁᤸᤗᤧᤆᤥᤃᤢᤸᤗᤧ ᤃᤡᤍᤥᤏᤖᤧ ᤁᤴ ᤘᤣ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤐᤠᤱᤄᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤧᤴ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ ᤗᤠᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤔᤏᤠᤜᤠ᤹ᤖᤧ ᤔᤧᤃᤳᤋᤢᤒᤠ ᤆᤠᤔᤠ ᤁᤢᤈᤠᤜᤠ᤹ ᤏᤢ ᤛᤠᤍᤠᤱᤜᤠ᤹ ᤔᤧᤗᤠᤖᤢ॥ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ ᤕᤥᤜᤠᤱ ᤗᤧᤵᤔᤠᤱ ᤏᤧᤏᤧᤒᤠᤍᤧᤴᤏᤥ ᤏᤧᤛ᤻ᤛᤧ॥ 9 ᤂᤧᤴ ᤛᤧᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤕᤥ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱᤅᤠᤱ ᤔᤧᤘᤠ᤹॥ 10 ᤜᤧᤰᤁᤣ ᤆᤥ᤺ᤰᤔᤠ ᤂᤧᤏᤧ᤹ ᤁᤧᤃᤡᤏᤧᤑᤃᤪ ᤋᤃᤡ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤐᤢᤖᤠᤜ᤺ᤴᤏᤢ ᤕᤥ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤐᤣᤃᤧ᤹. 11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤧᤔᤠ ᤔᤧᤒᤠ᤺ᤳᤋᤢᤖ ᤔᤧᤕᤠᤰᤐᤡ ᤂᤧᤵᤛᤧ᤹॥ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴ ᤁᤧᤄᤧᤵᤛᤢᤀᤠᤱ ᤀᤣᤃᤠᤱ ᤛᤠ᤺ᤱᤃᤠᤜᤡᤶᤜᤠ᤹ ᤑᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠ᤺ᤴᤇᤡᤱᤔᤠ ᤁᤧᤄᤥᤛᤢ᤹॥” ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤏᤢ ᤂᤧᤴ ᤁᤢᤛᤧᤘᤠᤖᤥᤒᤠ ᤐᤢᤖᤠᤜ᤺ᤴ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤔᤧᤕᤢᤅᤧ ᤔᤧᤃᤖᤧᤒᤠ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤕᤠᤀᤥ ᤌᤰᤛᤢᤒᤠ ᤕᤧᤵᤏᤠᤀᤥ ᤐᤣᤛᤧᤳᤇᤡ॥ 12 ᤀᤠᤸᤗ ᤔᤡᤎᤩᤠᤏᤡ. ᤀᤔᤠᤗᤧᤁᤡ ᤏᤢ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤖᤡᤰ ᤏᤡ᤺ᤱᤄᤢᤰᤘᤠ ᤁᤢᤀᤡᤛᤡᤰ ᤛᤎᤧᤰ ᤏᤧᤏᤧᤒᤠᤍᤧᤴᤏᤥ ᤔᤧᤏᤧᤛ᤻ᤛᤧ॥ ᤀᤢᤔᤣᤜᤠ᤹ᤃ ᤏᤡ᤺ᤵᤔᤠᤀᤣ ᤔᤧᤴᤏᤡ᤺ᤳᤇᤣ ᤔᤧᤘᤕᤧ॥ ᤂᤠᤏᤡ᤺ᤳᤋᤥ ᤂᤧᤱᤜᤠ᤹ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠ ᤆᤣᤰ ᤕᤠᤖᤡᤰ ᤔᤧᤘᤕᤧ॥ 13 ᤀᤠᤸᤗ ᤃᤡᤍᤥᤏᤧᤴ ᤏᤡ᤺ᤳᤋᤠᤱ ᤁᤧᤖᤧᤒᤠ ᤕᤧᤶᤔᤥᤀᤣ ᤔᤏᤠᤎᤡᤰᤗᤧ ᤁᤢᤴᤈᤢᤶᤔᤡᤴ ᤂᤢᤏᤧ᤹ ᤁᤢᤛᤧᤵᤔᤠᤱᤅᤡᤴ ᤆᤧᤰᤋᤢᤖ ᤕᤢᤅᤧ॥ ᤂᤧᤸᤗᤧ ᤔᤧᤳᤋᤢ. “ᤀᤥᤔᤧᤳᤋᤧ᤹ ᤀᤠᤱᤃᤠ᤹ ᤛᤧᤵᤔᤠᤱᤔᤥ ᤗᤧᤵᤐᤧᤵᤐᤠ ᤜ᤺ᤰᤛᤡ ᤂᤖᤧ᤺ᤱ ᤌᤡᤰ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤗᤥ᤺ᤰᤋᤧᤖ ᤁᤧᤅᤧᤖ ᤋᤩᤧᤒᤠ ᤔᤠᤰᤋᤢᤱ॥ ᤂᤧᤴ ᤂᤖᤧ᤺ᤱᤅᤡᤸᤗᤧ ᤛᤠ᤺ᤱᤃᤠᤜᤡᤶᤜᤠ᤹ ᤗᤧᤰᤂᤢᤀᤠᤱ ᤆᤥ᤺ᤴᤍᤧᤖ ᤌᤠᤖᤡᤰ ᤂᤧᤴ ᤂᤖᤧ᤺ᤱᤅᤡᤴ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤛᤠ᤹ᤖᤡᤰ ᤋᤥ᤺ᤰᤋᤧ॥” 14 ᤂᤢᤏᤧ᤹ ᤁᤢᤈᤢᤶᤔᤡᤸᤗᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤛᤠᤱ ᤁᤱᤃ ᤀᤡᤛᤪᤠᤀᤡᤗᤡ ᤕᤥᤀᤠᤛᤖᤧ ᤁᤢᤛ᤻ᤛᤠ ᤃᤡᤍᤥᤏᤖᤧ ᤁᤢᤍᤠᤓᤣᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤍᤩᤠᤏᤡᤜᤠ᤹ ᤏᤢ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤂᤢᤏᤧ᤹ ᤁᤢᤜᤢᤰᤁᤥ ᤌᤠᤛᤢᤛᤡᤀᤠᤱ ᤘᤠ᤹॥” 15 ᤀᤠᤸᤗ ᤃᤡᤍᤥᤏᤖᤧ ᤋᤠ᤹ᤍᤡ ᤛᤧᤵᤔᤠᤱᤅᤡᤴ ᤏᤢ ᤂᤧᤸᤗᤧ ᤁᤢᤒᤣᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤒᤴ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤏᤢ᤺ᤰᤂᤧᤍᤩᤧᤀᤠᤱ ᤔᤧᤳᤋᤢᤛᤡ. “ᤐᤥᤃᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶᤔᤡᤴ ᤂᤡᤏᤡ᤹ ᤜᤢᤰᤁᤧᤛᤢᤵᤋᤡᤀᤠᤱ ᤘᤠ᤹॥” 16 ᤂᤢᤏᤧ᤹ ᤂᤧᤴ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ ᤁᤢᤗᤢᤵ ᤛᤢᤶᤛᤡ ᤆᤥᤃᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤗᤳᤇᤠ ᤗᤳᤇᤠ ᤛᤠᤍᤠᤱ ᤏᤢ ᤛᤡᤃᤠᤱ ᤗᤧᤵᤔᤠᤱ ᤔᤡᤈᤥᤳ ᤁᤧᤍᤡ᤺ᤵᤐᤠ ᤌᤣᤀᤠᤱ ᤔᤧᤴᤕᤠᤰᤔᤏᤠᤒᤠ ᤑᤢᤈᤡᤰ ᤌᤡᤰᤌᤡᤰ ᤐᤡᤖᤢᤛᤡ॥ 17 ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤥᤀᤠᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤀᤠᤍᤡᤶᤍᤧᤶᤔᤧ᤹॥ ᤀᤠᤸᤗ ᤀᤠᤱᤃᤠ᤹ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤕᤠᤀᤥ ᤁᤧᤳᤋᤠᤀᤠ. ᤂᤧᤒᤩᤠᤱ ᤀᤠᤱᤃᤠ᤹ ᤌᤧᤔᤠ ᤆᤥᤃᤢᤱ᤹ ᤂᤡᤏᤡ᤹ᤀᤠᤱ ᤜᤠᤒᤠ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹॥ 18 ᤀᤠᤸᤗ ᤀᤠᤱᤃᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤀᤠᤔᤏᤠᤜᤠ᤹ᤖᤧ ᤛᤠᤍᤠᤱᤅᤡᤴ ᤔᤢ᤺ᤳᤋᤢᤶᤒᤧ. ᤂᤧᤒᤧᤸᤗᤧ ᤂᤡᤏᤡ᤹ᤀᤠᤱ ᤛᤠ᤺ᤱᤃᤠᤜᤡᤶᤜᤠ᤹ ᤁᤧᤖᤧᤰ ᤐᤡᤛᤠᤱ ᤂᤡᤏᤡ᤹ ᤛᤠᤍᤠᤱᤜᤠ᤹ ᤔᤢ᤺ᤳᤋᤧᤶᤔᤧ᤹. ᤂᤶᤓᤩᤠᤱ ᤀ᤺ᤰᤋᤧᤶᤔᤧ᤹ᤀᤠᤱ ᤐᤠ᤺ᤳᤋᤧᤶᤔᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤢ ᤃᤍᤥᤏᤖᤧ ᤁᤢᤗᤠᤃᤡᤖᤥ᥄’” 19 ᤀᤡᤰᤁᤧᤃᤥᤒᤠ ᤁᤶᤒᤪᤠᤱᤜᤠ᤹ ᤂᤠᤖᤰ ᤔᤧᤗᤧᤰᤛᤡᤱᤅᤠᤱ ᤔᤧᤕᤧᤒᤧ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢ. ᤃᤡᤍᤥᤏ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤡᤵ ᤌᤡᤰ ᤔᤏᤠᤜᤠ᤹ ᤛᤧᤴᤍᤡᤰ ᤌᤡᤒᤥᤱ ᤔᤢᤰᤋᤧᤸᤗᤧ ᤛᤠ᤺ᤱᤃᤠᤜᤡᤶᤜᤠ᤹ᤖᤧ ᤁᤢᤕᤠᤀᤥ ᤔᤧᤃᤧᤖᤧ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤢᤰᤁᤥ ᤔᤧᤃᤳᤋᤢᤒᤠ ᤑᤢᤈᤡᤰᤜᤠ᤹ ᤔᤧᤜᤧᤖᤢ॥ 20 ᤂᤧᤴ ᤛᤢᤶᤛᤡᤀᤣ ᤗᤢᤵ ᤁᤧᤖᤧᤰᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢ ᤂᤧᤒᤩᤠᤱ ᤑᤢᤈᤡᤰᤜᤠ᤹ ᤔᤧᤜᤧᤖᤢ॥ ᤑᤧᤱᤘᤠ ᤜᤢᤰᤁᤥ ᤔᤡᤈᤥᤳ ᤏᤢ ᤆᤢᤰᤘᤠ ᤜᤢᤰᤁᤥ ᤛᤠᤍᤠᤱᤅᤡᤴ ᤔᤧᤕᤠᤱᤛᤡᤱᤅᤠᤱ ᤂᤧᤱᤜᤠ᤹ ᤔᤧᤀ᤺ᤰᤋᤧ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤢ ᤃᤡᤍᤥᤏᤖᤧ ᤁᤢᤗᤠᤃᤡ ᤋᤠᤓᤣ᥄” 21 ᤂᤧᤱᤜᤠ᤹ ᤁᤧᤖᤧᤰ ᤀᤠᤵᤑᤣᤰ ᤔᤧᤕᤧᤶᤛᤡᤱᤒᤠᤍᤧᤴᤏᤥᤀᤣ ᤛᤠ᤺ᤱᤃᤠᤜᤡᤶᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤕᤧᤒᤧ ᤔᤧᤃᤖᤧ. ᤜᤧᤰᤁᤩᤠᤱ ᤁᤧᤖᤧᤰ ᤔᤡᤎᤩᤠᤏᤡ ᤌᤰᤛᤢᤒᤠᤜᤠ᤹ ᤔᤧᤀ᤺ᤰᤋᤧ ᤔᤧᤓᤡ᤺ᤰᤋᤧᤖ ᤔᤧᤄᤧᤳᤇᤡᤱ॥ 22 ᤂᤧᤴ ᤁᤡᤵ ᤛᤢᤶᤛᤡ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤠᤍᤠᤱᤜᤠ᤹ ᤔᤧᤔᤢ᤺ᤳᤋᤢᤸᤗᤧ. ᤕᤜᤘᤣ ᤍᤠᤱᤒᤧᤸᤗᤧ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤁᤢᤗᤧ᤺ᤶ ᤌᤡᤰᤁᤡᤴ ᤘᤣ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤥ᤺ᤰᤂᤢᤛᤡ॥ ᤂᤧᤒᤩᤠᤱ ᤔᤡᤎᤩᤠᤏᤡ ᤌᤰᤛᤢᤒᤠᤜᤠ᤹ ᤛᤛᤣᤖᤠᤒᤠ ᤒᤣᤌ-ᤛᤡᤳᤋᤠᤀᤥ ᤋᤒ᤻ᤒᤠᤋᤖᤧ ᤁᤢᤕᤠᤀᤥᤒᤠ ᤜᤠᤒᤡᤗ-ᤔᤜᤥᤗᤠᤒᤠ ᤀᤡ᤺ᤴᤍᤥᤀᤥ ᤌᤠᤖᤡᤰ ᤔᤧᤄᤧᤳᤇᤡᤱ॥ 23 ᤃᤡᤍᤥᤏᤖᤧ ᤏᤵᤋᤠᤗᤡ. ᤀᤠᤛᤣᤖ ᤌᤠ᤺ᤰᤜᤠ᤹ ᤏᤢ ᤔᤏᤛ᤻ᤛᤣ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤏᤧᤵᤔᤠᤱ ᤗᤧᤵᤔᤠᤱᤒᤠ ᤀᤠᤸᤗᤛᤠᤱ ᤕᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤡᤍᤩᤠᤏᤡᤜᤠ᤹ ᤔᤧᤏᤠ᤺ᤳᤋᤢᤛᤡ॥ 24 ᤃᤡᤍᤥᤏᤖᤧ ᤀᤣᤑᤪᤠᤀᤡᤔᤒᤠ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤜᤠ᤹ᤀᤥ ᤁᤴ ᤀᤡᤱᤄᤱᤅᤡᤴ ᤋᤣ᤹ᤔᤠᤀᤠᤱ ᤛᤧᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤛᤡ. “ᤂᤡᤏᤡ᤹ ᤕᤥ ᤌᤠᤀᤠᤛᤡᤶᤔᤧ᤹ᤀᤠᤱ ᤔᤡᤍᤩᤠᤏᤡᤜᤠ᤹ ᤔᤧᤰᤂᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤒᤣᤌ-ᤒᤖᤠ ᤌᤠᤖᤡᤰ ᤕᤷᤍᤏ ᤘᤜ᤺ᤱᤅᤥ ᤆᤫᤠ᤺ᤳ ᤁᤧᤏᤧᤒᤠᤍᤧᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤢᤰᤁᤠᤵ ᤆᤥᤃᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤀᤣᤑᤪᤠᤀᤡᤔᤡᤜᤠ᤹ ᤔᤧᤀᤢ᤺ᤳᤋᤢᤛᤡ. ᤂᤶᤓᤩᤠᤱ ᤒᤣᤌ-ᤒᤖᤠ ᤌᤠᤖᤡᤰ ᤕᤷᤍᤏ ᤘᤜ᤺ᤱᤅᤥ ᤆᤫᤠ᤺ᤳ ᤁᤧᤏᤧᤒᤠᤜᤠ᤹ ᤂᤧᤱᤜᤠ᤹ᤖᤧ ᤜᤢᤰᤁᤠᤵ ᤔᤧᤈᤥᤃᤢ॥ 25 ᤂᤧᤱᤜᤠ᤹ᤖᤧ ᤏᤧᤵᤑᤢ ᤔᤡᤎᤩᤠᤏᤡ ᤕᤢᤰᤛᤠᤒᤠ ᤀᤥᤖᤣᤒ ᤏᤢ ᤈᤀᤣᤒᤧᤴ ᤔᤧᤍᤧᤶᤛᤢᤛᤡ॥ ᤀᤥᤖᤣᤒᤧᤴ ᤂᤧᤱᤜᤠ᤹ᤖᤧ ᤀᤥᤖᤣᤒᤒᤠ ᤕᤠᤰᤐᤣ᤹ᤀᤥ ᤔᤧᤛᤧᤖᤢ ᤜᤧᤰᤁᤩᤠᤱ ᤈᤀᤣᤒᤧᤴᤃ ᤈᤀᤣᤒᤒᤠ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤔᤧᤛᤧᤖᤢ. ᤂᤧᤒᤩᤠᤱ ᤔᤡᤍᤩᤠᤏᤡᤜᤠ᤹ ᤐᤢᤒᤣᤗᤠᤵᤛᤠ ᤆᤰᤔᤧᤸᤗ᤹ᤀᤣ ᤔᤧᤏᤠ᤺ᤳᤋᤢᤛᤡ॥ ᤕᤠᤱᤛᤡ ᤂᤧᤱᤜᤠ᤹ᤖᤧ ᤀᤥᤖᤣᤒ ᤏᤢ ᤈᤀᤣᤒᤖᤧ ᤂᤢᤴᤇᤡ᤹ ᤌᤧᤃᤣᤰᤐᤠᤜᤠ᤹ ᤕᤷᤍᤏ ᤁᤳᤏᤠᤜᤠᤱᤍᤠᤱ ᤃᤡᤍᤥᤏᤖᤥ ᤔᤧᤓᤧᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.