ᤂᤠᤛᤧᤴᤗᤥ᤺ᤶᤒᤠ 6 - LIFOTNTᤃᤡᤍᤥᤏᤧᤴ ᤀᤡᤛᤪᤠᤀᤡᤗᤒᤠ ᤂᤠᤛᤧᤴᤗᤥ᤺ᤶᤒᤠ ᤐᤥᤱ 1 ᤕᤠᤶᤔᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤋᤱᤒᤣ ᤏᤢᤛᤡ ᤌᤠᤖᤡᤰ ᤌᤠᤛᤢᤛᤡ॥ 2 ᤔᤡᤍᤩᤠᤏᤡᤜᤠ᤹ ᤛᤠ᤹ᤖᤡᤰ ᤔᤢᤰᤛᤠᤶᤛᤠᤒᤠ ᤔᤧᤈᤥᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤥ᤺ᤰᤔᤠᤜᤠ᤹ᤀᤥ. ᤗᤢᤱᤑᤢᤰᤁᤥᤜᤠ᤹ᤀᤥ ᤏᤢ ᤛᤧ᤺ᤵᤛᤡᤱᤔᤠᤍᤧᤴᤜᤠ᤹ᤀᤥ ᤐᤣ᤺ᤰᤔᤠᤀᤠᤱ ᤕᤢᤱᤔᤠ ᤐᤥ᤺ᤰᤂᤧ॥ 3 ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤈᤠ ᤔᤧᤜᤣ᤹ᤖᤢ ᤔᤧᤗᤣ᤺ᤳᤋᤢᤸᤗᤧ ᤔᤡᤍᤩᤠᤏᤡᤜᤠ᤹ ᤏᤢ ᤀᤔᤠᤗᤧᤁᤡᤜᤠ᤹ ᤜᤧᤰᤁᤩᤠᤱ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤓᤧᤖᤧ॥ 4 ᤂᤧᤱᤜᤠ᤹ᤖᤧ ᤗᤠᤈᤣ᤹ᤀᤥ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤈᤥᤃᤢᤀᤠᤱ ᤔᤧᤕᤢᤱᤛᤡᤱ ᤜᤧᤰᤁᤩᤠᤱ ᤃᤠᤈᤠ ᤁᤢᤕᤠ ᤌᤠᤖᤡᤰᤐᤠ ᤁᤢᤈᤠ ᤀᤡᤰᤋᤠᤵᤜᤠ᤹ ᤔᤧᤜᤥ᤺ᤵᤋᤢ ᤔᤧᤍᤣᤛᤢ. ᤁᤶᤔᤩᤠᤰᤗᤰ ᤔᤣ᤺ᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤔᤧᤸᤗᤢᤰ. ᤐᤡᤳ ᤏᤢ ᤀᤍᤱ ᤘᤣ᤹ ᤁᤢᤜᤡᤱᤘᤧᤳ ᤌᤧᤔᤠᤀᤠᤱ ᤔᤧᤸᤗᤧᤖᤢᤛᤡᤴ॥ 5 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤵᤔᤠ ᤐᤡᤳ ᤗᤢᤵᤜᤠ᤹ ᤏᤢ ᤛᤠ᤺ᤱᤃᤠᤜᤡᤶ ᤁᤢᤄᤠᤵᤔᤠᤜᤠ᤹ ᤔᤧᤍᤠᤖᤢᤀᤠᤱ ᤏᤡ᤺ᤱᤄᤢᤰᤘᤠ᤺ᤸᤗᤧ ᤁᤢᤒᤴᤈᤩᤠᤱᤔᤠ ᤁᤢᤀᤡᤛᤡᤰ ᤔᤧᤍᤩᤧ॥ ᤔᤏᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤢᤔᤣᤜᤠ᤹ ᤏᤡ᤺ᤵᤔᤧᤴᤍᤧᤳ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤗᤠᤈᤣᤴ ᤘᤖᤧᤱᤗᤧᤱ ᤔᤧᤱᤔᤠᤖᤧ ᤗᤠᤃᤡ ᤔᤧᤓᤳᤋᤢ॥ 6 ᤁᤶᤓᤗ᤹ᤖᤡᤰᤁᤣ ᤔᤡᤍᤩᤠᤏᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤕᤠᤱᤃᤧᤛᤠ᤹ᤒᤠ ᤔᤧᤈᤥᤃᤢᤛᤡ. ᤜᤧᤰᤁᤩᤠᤱ ᤁᤢᤓᤠ᤹ᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ॥ 7 ᤔᤡᤍᤩᤠᤏᤡᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢᤸᤗᤧ. 8 ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤌᤡᤰ ᤐᤠᤱᤄᤢ ᤋᤠᤛᤢ. ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤔᤡᤛᤪᤒᤠ ᤕᤥᤰ ᤗᤠᤈᤣ᤹ᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱ॥ 9 ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤏᤢ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤐᤡᤏᤡᤱ॥ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤡᤏᤡ᤹ ᤐᤡᤏᤡᤱ॥ 10 ᤀᤠᤱᤃᤠ᤹ ᤔᤧᤳᤏᤡᤱ. ‘ᤀᤠᤱᤃᤠ᤹ ᤕᤜᤘᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤂᤡᤏᤡ᤹ ᤁᤧᤕᤢᤅᤡᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤒᤠ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹॥’ ᤁᤖ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤡᤏᤡ᤹ ᤔᤧᤱᤄᤧᤶᤔᤣ ᤁᤧᤘᤕᤡ᤹॥” 11 ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤕᤧᤀᤠᤱ ᤀᤒᤡᤀᤣᤈᤣᤖᤡ ᤕᤥᤀᤠᤛᤖᤧ ᤀᤥᤐᤪᤠ ᤔᤧᤵᤔᤏᤠᤒᤠ ᤁᤢᤗᤠᤈᤣ᤹ᤀᤥᤒᤠ ᤕᤜᤡᤒᤠ ᤛᤡᤱᤒᤢᤱ ᤛᤡᤃᤠᤱ ᤕᤢᤱᤛᤡᤱ॥ ᤕᤥᤀᤠᤛᤖᤧ ᤁᤢᤛ᤻ᤛᤠ ᤃᤡᤍᤥᤏᤧᤴᤃ ᤔᤡᤍᤩᤠᤏᤡᤜᤠ᤹ᤗᤠᤶ ᤆᤡᤱᤛᤡᤱᤔᤠᤖᤧ ᤗᤠᤃᤡ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤔᤠᤛᤡ ᤜᤡᤵᤏᤢ ᤕᤠᤃᤧ॥ 12 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤃᤡᤍᤥᤏᤖᤥ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤔᤢᤰᤁᤧᤃᤢᤒᤠ ᤌᤰᤛᤢᤒᤠᤏᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ᤏᤢ ᤘᤠ᤹ᤖᤥ॥” 13 ᤃᤡᤍᤥᤏᤖᤧ ᤂᤧᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤵᤛᤧ᤹ᤀᤥ. ᤕᤜᤘᤣ ᤍᤠᤱᤒᤧᤴ ᤛᤧᤰᤂᤠᤀᤣ ᤀᤠᤏᤡᤃᤧᤏᤢ ᤘᤠ᤹ᤏᤧᤓᤃᤪ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤌᤣᤀᤠᤱ ᤋᤢᤔᤢᤶᤒᤧᤒᤣ᥅ ᤂᤧᤴ ᤁᤧᤖᤧᤰ ᤏᤡᤱᤘᤠ᤹ ᤁᤧᤔᤠᤒᤠ ᤂᤢᤏᤧ᤹ ᤁᤢᤕᤠ᤺ᤶᤒᤰᤜᤠ᤹ ᤌᤧᤔᤠ ᤐᤥ᤺ᤰᤂᤧᤒᤣ. ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤗᤠᤶ ᤂᤧᤴ ᤂᤧᤶᤛᤢᤶᤒᤧᤀᤠᤱ ᤘᤠ᤹. ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤘᤕᤧ. ‘ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪ ᤗᤠᤈᤣ᤹ᤗᤠᤶ ᤀᤠᤏᤡ᤹ ᤀᤠᤗ᤺ᤳᤋᤧ ᤀᤠᤓᤧᤳᤋᤧᤒᤠ ᤔᤣ᤺ᤶᤒᤡ᥅’ ᤁᤖ ᤀᤠᤸᤗᤃ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤀᤠᤏᤠ᤹ᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤏᤡ᤹ ᤜᤢᤰᤀᤠᤛᤢᤵᤋᤧ ᤀᤠᤍᤣᤛᤧᤀᤠᤱ ᤘᤠ᤹॥” 14 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤜᤡᤛᤡᤱᤅᤠᤱ ᤔᤧᤳᤋᤢ. “ᤐᤣᤃᤧ᤹. ᤀᤡᤛᤪᤠᤀᤡᤗᤡᤜᤠ᤹ ᤔᤡᤍᤩᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ᤀᤥ ᤁᤧᤕᤠᤰᤐᤠ ᤁᤴ ᤔᤢᤰᤛᤠᤶᤔᤡᤴ ᤀᤥᤃᤵ ᤆᤥᤃᤧ᤹॥ ᤂᤧᤏᤧ᤹ ᤁᤧᤒᤠᤱᤒᤧᤴ ᤀᤠᤱᤃᤠ᤹ᤀᤣᤖᤥ॥” 15 ᤃᤡᤍᤥᤏᤖᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤵᤛᤧ᤹ᤀᤥ. ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤛᤧ᤺ᤵᤔᤠ ᤛᤢᤰᤋᤢᤱᤛᤡᤱᤒᤣ᥅ ᤀᤠᤱᤃᤠ᤹ ᤀᤠᤎᤠ᤺ᤰᤜᤠ᤹ ᤀᤥᤔᤧᤳᤋᤧᤛᤧ᤹ ᤂᤧᤴ ᤔᤏᤛ᤻ᤛᤣᤀᤥ ᤁᤧᤖᤧᤰᤏᤢ᤺ᤸᤗᤧ ᤔᤧᤴᤎᤢᤶᤔᤏᤠᤒᤠ ᤆᤥᤰ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤛᤕᤱᤅᤥ ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤐᤠ ᤘᤠ᤹ᤀᤠ॥” 16 ᤕᤜᤘᤣ ᤍᤠᤱᤒᤧᤸᤗᤧ ᤏᤥᤃᤵ ᤐᤡᤖᤢ. “ᤁᤖ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤖᤧᤰ ᤔᤡᤍᤩᤠᤏᤡᤜᤠ᤹ ᤗᤳᤇᤠ ᤔᤏᤠ ᤁᤢᤀᤡᤛᤡᤰ ᤆᤡᤎᤰ ᤆᤡᤎᤰ ᤁᤧᤎᤃᤢᤛᤡ᤹॥” 17 ᤃᤡᤍᤥᤏᤖᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤏᤧᤓᤃᤪ. ᤂᤧᤏᤧ᤹ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤧᤴ ᤕᤜᤘᤣ ᤍᤠᤱᤒᤠᤏᤧ ᤁᤧᤗ᤹ᤒᤠ ᤔᤡᤰᤛᤣᤴ ᤐᤡᤖᤠᤱᤅᤧ᤹॥ 18 ᤐᤣᤗᤡ ᤑᤠᤰᤏᤧ. ᤀᤠᤱᤃᤠ᤹ ᤀᤠᤜᤢᤰᤘᤠᤴ ᤋᤠᤖᤢᤱᤅᤠᤱ ᤂᤧᤏᤧ᤹ ᤁᤧᤍᤃᤡ ᤔᤧᤴᤍᤥ᤺ᤴ ᤔᤧᤴᤏᤧᤀᤣ ᤌᤠᤖᤡᤰ ᤂᤧᤏᤧ᤹ ᤁᤵᤔᤥᤗᤠᤶ ᤔᤧᤒᤣᤃᤧᤴᤏᤧ᤹ᤀᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤧᤴᤍᤠᤏᤧᤴᤗ ᤌᤠᤖᤡᤰ ᤀᤠᤱᤃᤠ᤹ ᤀᤠᤶᤓᤠ ᤁᤵᤔᤥ ᤜᤠᤱᤏᤧ॥” 19 ᤂᤧᤒᤩᤠᤱ ᤃᤡᤍᤥᤏᤧᤴ ᤜᤡᤶᤔᤥ ᤐᤣᤀᤠᤱ ᤔᤧ᤺ᤴᤍᤛᤠ᤺ᤳ ᤛᤠ ᤌᤥ᤺ᤰᤋᤢ. ᤜᤧᤰᤁᤩᤠᤱ ᤀᤣᤑᤠᤎᤡᤰ ᤑᤣ᤹ᤖᤢᤶ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤗᤧ᤺ᤱᤛᤢ॥ ᤂᤢᤏᤧ᤹ ᤛᤠᤴᤃ ᤗᤳᤇᤠ ᤏᤠ᤹ᤀᤡᤔᤠᤀᤥ ᤕᤠᤰᤋᤢ ᤜᤧᤰᤁᤩᤠᤱ ᤁᤢᤘᤠᤴᤃ ᤗᤳᤇᤠ ᤂᤥᤷᤕᤠᤀᤥ ᤁᤣ᤺ᤳᤋᤢᤀᤠᤱ ᤕᤜᤡᤒᤠ ᤛᤡᤱᤒᤢᤱ ᤛᤡᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤁᤢᤍᤃᤡ ᤋᤠᤖᤢᤀᤠᤱ ᤋᤥ᤺ᤴᤍᤢ॥ 20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤴ ᤛᤠᤴ ᤏᤢ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱᤅᤡᤴ ᤁᤴ ᤗᤢᤱᤈᤱᤅᤥ ᤕᤢᤰᤂᤧ᤹. ᤜᤧᤰᤁᤩᤠᤱ ᤁᤢᤘᤠᤴᤃ ᤜᤢᤰᤂᤧᤍᤣᤛᤧ᤹॥” ᤂᤧᤒᤩᤠᤱ ᤃᤡᤍᤥᤏᤖᤧ ᤜᤧᤰᤁᤣᤀᤣ ᤆᤥᤃᤢ॥ 21 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤜᤢᤰᤁᤥ ᤁᤳᤋᤢᤒᤠ ᤋᤰᤁᤠ᤺ᤳᤋᤡᤴ ᤛᤴᤇᤢᤀᤠᤱ ᤁᤢᤛᤶᤔᤡᤸᤗᤧ ᤂᤧᤴ ᤛᤠᤴ ᤏᤢ ᤂᤖᤧ᤺ᤱᤅᤡᤴ ᤛᤢᤛᤢ॥ ᤂᤧᤒᤩᤠᤱ ᤗᤢᤱᤈᤱᤅᤥᤗᤠᤶ ᤔᤡ ᤋᤡᤖᤧᤀᤠᤱ ᤂᤧᤴ ᤛᤠᤴ ᤏᤢ ᤂᤖᤧ᤺ᤱᤅᤡᤴ ᤌᤩ᤺ᤱ ᤔᤡᤎᤡᤰᤂᤢᤍᤣᤛᤢ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤔᤕᤧᤒᤣ॥ 22 ᤂᤧᤒᤩᤠᤱ ᤃᤡᤍᤥᤏᤖᤧ ᤂᤧᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠ ᤀᤡᤱᤒᤠᤖᤧᤳᤇ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤐᤠ᤺ᤳᤋᤢ. “ᤀᤠᤶᤒᤡ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤣ᥄ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤏᤠᤍᤢᤶᤍᤢᤶᤒᤠ ᤏᤡᤛᤢᤱ᥄” 23 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤛᤏᤠᤖᤢᤱ᥄ ᤔᤧᤃᤡᤛᤧᤴᤏᤧ᤹. ᤂᤧᤏᤧ᤹ ᤁᤧᤴᤇᤡᤏᤧᤴ॥” 24 ᤃᤡᤍᤥᤏᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤵᤔᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤱ ᤕᤜᤘᤣ ᤍᤠᤱᤒᤧᤴ ᤛᤏᤠᤖᤢᤱᤍᤠᤱᤒᤠ ᤕᤢᤰᤂᤢ॥ ᤂᤧᤴ ᤀᤠᤀᤡᤴ ᤌᤠᤖᤡᤰᤁᤠᤱ ᤀᤒᤡᤀᤣᤈᤣᤖᤡᤖᤧ ᤁᤢᤗᤠᤈᤣ᤹ ᤀᤥᤐᤪᤠᤀᤥ ᤏᤧᤖᤥ॥ 25 ᤀᤠᤶᤓᤠ ᤂᤧᤴ ᤛᤧᤴᤍᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤃᤡᤍᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤎᤰᤛᤠ ᤗᤢᤵᤐᤥᤗᤠᤶ ᤋᤱᤒᤣ ᤏᤢᤛᤡ ᤁᤧᤃᤧᤵᤐᤠ ᤏᤡᤛᤡᤃᤣᤰᤐᤠ ᤛᤧᤃᤶᤒᤠ ᤐᤡᤳ ᤌᤡᤰ ᤋᤠᤖᤧ᤹. ᤁᤧᤶᤒᤠᤖᤧ ᤁᤢᤒᤠᤗ ᤔᤠᤱᤅᤡᤸᤗᤧ ᤁᤧᤗ᤺ᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤴᤇᤧᤍᤣᤛᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤴ ᤛᤥ᤺ᤴᤍᤧ᤹॥ 26 ᤂᤧᤒᤩᤠᤱ ᤜᤠᤒᤠ ᤂᤧᤴ ᤆᤴᤈᤶᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤢᤀᤡ᤺ᤳ ᤁᤧᤍᤠᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤴ ᤏᤡᤛᤡᤃᤣᤰᤐᤠ ᤛᤧᤃᤶᤒᤠ ᤐᤡᤳᤋᤧᤴ ᤕᤠᤱᤛᤡᤱᤅᤧ᤹ᤀᤠᤱ ᤂᤧᤏᤧ᤹ ᤁᤧᤛᤥ᤺ᤴᤍᤢᤒᤠ ᤀᤛᤣᤖᤠ ᤏᤠᤘᤠᤀᤡᤳᤗᤠ ᤛᤡᤱᤅᤡᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤧ᤹॥” 27 ᤂᤧᤒᤩᤠᤱ ᤃᤡᤍᤥᤏᤖᤧ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ᤀᤥᤒᤠ ᤌᤡᤒᤥᤱ ᤔᤏᤠᤜᤠ᤹ ᤕᤠᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢᤒᤠ ᤁᤢᤀᤡᤛᤡᤰ ᤆᤥᤃᤢ॥ ᤁᤖ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤜᤡᤶᤛᤕᤱ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤏᤢ ᤁᤡᤛᤧ. ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤴ ᤕᤠ᤺ᤶᤒᤰᤁᤡᤴ ᤗᤧᤴᤍᤡᤰ ᤔᤣ᤺ᤴ ᤁᤖ ᤛᤧᤴᤍᤡᤰ ᤆᤥᤃᤢ॥ 28 ᤀᤠᤸᤗ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤋᤠᤏᤠᤶ ᤔᤧᤒᤥᤃᤧᤸᤗᤧ ᤂᤧᤱᤜᤠ᤹ᤖᤧ ᤒᤠᤗ ᤔᤠᤱᤅᤡᤸᤗᤧ ᤁᤧᤗ᤺ᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤔᤧᤕᤛ᤻ᤛᤢᤀᤠᤱ ᤏᤧᤛ᤻ᤛᤧᤒᤠ ᤏᤢ ᤂᤧᤸᤗᤧ ᤁᤢᤒᤣᤛᤠᤱ ᤁᤧᤕᤢᤱᤒᤠ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤴ ᤔᤧᤛᤥ᤺ᤴᤍᤢᤀᤠᤱ ᤏᤧᤛ᤻ᤛᤧᤒᤠ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤂᤧᤴ ᤏᤡᤛᤡᤃᤣᤰᤐᤠ ᤛᤧᤃᤶᤒᤠ ᤐᤡᤳᤋᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤒᤠ ᤔᤧᤏᤡᤛᤢ॥ 29 ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤡᤱ. “ᤁᤴ ᤜᤠ᤺ᤳᤗᤧ ᤆᤥᤃᤢᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤢᤖᤡᤰᤁᤠᤱ ᤕᤥ᤺ᤰᤔᤧᤎᤰᤋᤢᤛᤡᤀᤠᤱ ᤀᤣᤃᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ. “ᤕᤥᤀᤠᤛᤖᤧ ᤁᤢᤛ᤻ᤛᤠ ᤃᤡᤍᤥᤏᤖᤧ ᤆᤥᤃᤢᤒᤠᤖᤥ॥” 30 ᤂᤧᤒᤩᤠᤱ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤕᤥᤀᤠᤛᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤛ᤻ᤛᤠᤴ ᤗᤠ᤺ᤰᤁᤠᤳ ᤗ᤺ᤳᤋᤧ᤹॥ ᤂᤧᤸᤗᤧ ᤒᤠᤗ ᤔᤠᤱᤅᤡᤸᤗᤧ ᤁᤧᤗ᤺ᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤕᤴᤇᤢᤍᤣᤛᤢᤖᤧᤳᤇ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤣᤛᤠᤱ ᤁᤧᤕᤢᤱᤒᤠ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠ᤺ᤴᤏᤠᤱ ᤛᤥ᤺ᤴᤍᤢᤍᤣᤛᤢᤖᤧᤳᤇ॥ ᤂᤢᤏᤧ᤹ ᤛᤧᤵᤔᤠᤀᤣ ᤐᤥᤱ᤹॥” 31 ᤁᤖ ᤕᤥᤀᤠᤛᤖᤧ ᤁᤢᤍᤃᤡ ᤁᤧᤖᤧᤰ ᤐᤡᤛᤠᤱᤒᤠ ᤁᤧᤕᤧᤵᤐᤠ ᤁᤧᤀᤵᤐᤠ ᤜᤕᤱ ᤁᤡᤸᤗᤡᤱᤜᤠ᤹ ᤔᤧᤳᤋᤢᤛᤡ. “ᤌᤣ ᤂᤡᤏᤡ᤹ ᤒᤠᤗ ᤔᤠᤱᤅᤡᤸᤗᤧ ᤗᤠᤃᤡ ᤁᤧᤎᤰᤋᤡᤒᤠᤒᤡ᥅ ᤒᤠᤗ ᤔᤠᤱᤅᤡᤴ ᤋᤠᤱᤛᤧ᤺ᤵᤔᤠ ᤕᤠ᤺ᤶᤒᤰᤁᤡᤴ ᤀᤠᤏᤡᤃᤧᤴ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤡ᥅ ᤒᤠᤗ ᤔᤠᤱᤅᤡᤸᤗᤧ ᤗᤠᤃᤡ ᤐᤠ᤺ᤴᤎᤱ ᤁᤧᤈᤥ᤺ᤰᤐᤠᤜᤠ᤹ ᤋᤠᤏᤠᤶ ᤌᤠᤖᤡᤰᤗᤧ ᤔᤧᤛᤧᤖᤢᤛᤡ᤹᥅ ᤒᤠᤗ ᤔᤠᤱᤅᤡᤴ ᤔᤠᤱᤅᤣᤏᤧᤓᤃᤪ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤗ᤺ᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤁᤢᤓᤠᤖᤧ ᤔᤧᤕᤛ᤻ᤛᤢ ᤔᤧᤒᤡᤖᤢᤒᤠᤏᤧᤓᤃᤪ. ᤂᤧᤴ ᤁᤢᤗᤠᤃᤡ ᤀᤠᤵᤑᤣᤰ ᤐᤠ᤺ᤴᤎᤱ ᤆᤥ᤺ᤰᤗ॥” 32 ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤱᤜᤠ᤹ᤖᤧ ᤃᤡᤍᤥᤏᤖᤧ ᤁᤢᤔᤡᤱ ᤕᤖᤢᤒ-ᤒᤠᤗ ᤔᤧᤔᤧᤳᤋᤢ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤒᤠᤗᤖᤧ ᤁᤧᤗ᤺ᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤂᤢᤏᤧ᤹ᤀᤣ ᤕᤛ᤻ᤛᤢᤀᤠᤱ ᤏᤧᤖᤥ. ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤔᤡᤱ ᤔᤧᤘᤠ᤺ᤳᤋᤢ. ᤂᤧᤸᤗᤧ ᤁᤢᤒᤣᤴ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤒᤠᤗ ᤔᤠᤱᤅᤡᤴ ᤀᤠᤵᤑᤣᤰ ᤌᤰᤗ॥” ᤃᤡᤍᤥᤏᤖᤧ ᤗᤳᤇᤠ ᤔᤡᤰᤛᤣᤴ ᤏᤠ᤺ᤰᤋᤢ 33 ᤁᤧᤖᤧᤰ ᤔᤡᤍᤩᤠᤏᤡᤜᤠ᤹. ᤀᤔᤠᤗᤧᤁᤡᤜᤠ᤹ ᤏᤢ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤕᤷᤍᤏ ᤘᤜ᤺ᤱᤅᤡᤴ ᤔᤧᤃᤠ᤺ᤰᤋᤢᤀᤠᤱ ᤕᤡᤈᤖᤣᤗᤒᤠ ᤏᤧᤏᤧᤒᤠᤍᤧᤴᤏᤥ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ॥ 34 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤃᤡᤍᤥᤏᤖᤥ ᤕᤧ॥ ᤂᤢᤏᤧ᤹ ᤛᤠᤍᤠᤱᤅᤡᤴ ᤔᤢ᤺ᤳᤋᤢᤀᤠᤱ ᤀᤒᤡᤀᤣᤈᤣᤖᤡᤜᤠ᤹ ᤂᤢᤏᤧ᤹ ᤋᤡᤶᤔᤠᤖᤧ ᤗᤠᤃᤡ ᤀᤢ᤺ᤳᤋᤢᤛᤡ॥ 35 ᤂᤢᤏᤧ᤹ ᤔᤏᤛ᤻ᤛᤣ ᤁᤧᤖᤧᤰ ᤐᤡᤛᤠᤱ ᤀᤡᤱᤄᤱ ᤁᤧᤍᤣ᤹ᤒᤠ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤛᤡ॥ ᤂᤢᤏᤧ᤹ ᤀᤠᤛᤣᤖ. ᤈᤒᤢᤗᤢᤏ ᤏᤢ ᤏᤵᤋᤠᤗᤡ ᤜᤧᤱᤄᤠᤳᤋᤡᤀᤠᤱ ᤀᤡᤱᤄᤱ ᤁᤧᤍᤣ᤹ᤒᤠ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤀᤠᤱ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤍᤩᤧ॥ 36 ᤃᤡᤍᤥᤏᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤁᤧᤛᤧ᤺ᤵᤋᤢᤛᤡᤒᤠᤏᤧᤓᤃᤪ. 37 ᤀᤠᤸᤗ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤔᤧᤸᤗᤢᤰ ᤔᤢᤖᤡᤰᤜᤠ᤹ ᤆᤠᤏᤢᤰᤔᤠᤍᤧᤴᤏᤥ ᤏᤧᤛ᤻ᤛᤢᤱ᤹॥ ᤔᤧᤸᤗᤢᤰ ᤔᤢᤖᤡᤰᤁᤥᤖᤰ ᤛᤣ᤺ᤰᤘᤠ ᤌᤠᤛᤢᤀᤠᤱ ᤂᤧᤴ ᤁᤧᤖᤧᤰ ᤐᤡᤛᤠᤱ ᤂᤠᤶᤒᤠᤱᤅᤡᤴ ᤛᤧᤱᤛᤧᤱ ᤗ᤹ᤏᤧᤓᤃᤪ. ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤁᤧᤛᤧ᤺ᤵᤋᤢᤛᤡ᤹ ᤁᤧᤗ᤹ᤒᤠ ᤀᤠᤱᤃᤠ᤹ ᤛᤧᤰᤂᤠᤀᤣ ᤏᤡᤱᤘᤠ᤹ ᤏᤡ᤺ᤴᤎᤥ ᤂᤥᤛᤢᤱ᤹॥” 38 ᤂᤧᤒᤩᤠᤱ ᤜᤧᤰᤁᤣᤀᤣ ᤐᤥ᤺ᤰᤂᤧ॥ ᤂᤢᤏᤧ᤹ ᤋᤠᤏᤠᤶ ᤐᤥᤃᤧᤀᤠᤱ ᤂᤧᤴ ᤛᤠᤔᤢᤖᤡᤰᤁᤡᤴ ᤕ᤹ᤖᤢ. ᤜᤧᤰᤁᤩᤠᤱ ᤛᤠᤔᤢᤖᤡᤰᤁᤥᤗᤠᤶ ᤂᤥᤷᤕᤠᤎᤡᤰ ᤁᤢᤍᤡᤶᤍᤡᤶ ᤛᤣ᤺ᤰᤘᤠ ᤗ᤺ᤴᤍᤧ॥ 39 ᤂᤧᤒᤩᤠᤱ ᤃᤡᤍᤥᤏᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤁᤧᤕᤠ᤺ᤰ ᤔᤧᤗᤧ᤹ᤖᤧᤴᤏᤧ᤹ᤀᤥ. ᤁᤖ ᤀᤠᤸᤗᤛᤠᤱ ᤀᤠᤱᤃᤠ᤹ ᤐᤠ᤺ᤵᤔᤠ ᤑᤠ᤺ᤰᤋᤠᤱᤅᤧ᤹॥ ᤐᤣᤗᤡ ᤑᤠᤰᤏᤧ. ᤀᤠᤱᤃᤠ᤹ ᤕᤠᤶᤔᤥ ᤌᤡᤰᤗᤧᤱ ᤁᤴ ᤛᤠᤔᤢᤖᤡᤰᤁᤡᤴ ᤛᤠ᤹ᤔᤠ ᤐᤡᤖᤠᤱᤅᤧ᤹॥ ᤁᤴᤇᤗᤠᤶᤒᤠᤃ ᤂᤧᤴ ᤛᤠᤔᤢᤖᤡᤰᤁᤡᤴᤗᤰ ᤛᤧᤱᤛᤧᤱ ᤗ᤹ᤖᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱ ᤂᤠᤶᤒᤠᤱᤅᤡᤴ ᤛᤣ᤺ᤰᤘᤠ᤺ᤸᤗᤧ ᤘᤠᤒᤡ᤺ᤴᤗ॥” 40 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤧᤴᤍᤡᤰᤁᤠᤱ ᤜᤠᤒᤠ ᤜᤧᤰᤁᤣᤀᤣ ᤆᤥᤃᤢ॥ ᤛᤠᤔᤢᤖᤡᤰᤁᤡᤴᤗᤰ ᤛᤧᤱᤛᤧᤱ ᤗ᤹ᤖᤧ. ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤐᤡᤛᤠᤱᤒᤠ ᤂᤠᤶᤒᤠᤱᤅᤥ ᤛᤣ᤺ᤰᤘᤠ ᤌᤠᤛᤢᤀᤠᤱ ᤏᤧᤛ᤻ᤛᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.