ᤂᤠᤛᤧᤴᤗᤥ᤺ᤶᤒᤠ 5 - LIFOTNTᤍᤒᤥᤖᤠ ᤏᤢ ᤒᤠᤖᤠᤁᤧᤸᤗᤧ ᤂᤢᤴᤇᤡ᤹ ᤛᤧᤘᤠᤛᤠᤶᤗᤥ 1 ᤂᤧᤸᤗᤧ ᤕᤠ᤺ᤴᤍᤡᤰ ᤍᤒᤥᤖᤠ ᤏᤢ ᤀᤒᤡᤏᤥᤀᤔᤖᤧ ᤁᤢᤛ᤻ᤛᤠ ᤒᤠᤖᤠᤁᤧᤸᤗᤧ ᤁᤴ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤳᤋᤧᤛᤢᤖᤥ— 2 “ᤀᤠᤸᤗ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤔᤏᤠᤜᤠ᤹ᤖᤧ ᤗᤠᤶᤗᤥᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ. ᤔᤏᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤔᤧᤍᤥᤴᤇᤡᤱᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ॥ 3 “ᤜᤠᤱᤛᤣ. ᤂᤧᤵᤛᤧᤶᤔᤧ᤹ᤀᤥ᥄ ᤕᤢᤰᤛᤠᤒᤠᤛᤣ. ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ᥄ ᤀᤠᤱᤃᤠ᤹ ᤛᤠᤶᤗᤥᤀᤠᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤢᤱᤗᤥ. ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤧᤘᤠᤛᤠᤶᤗᤥ ᤌᤡᤰ ᤛᤠᤶᤔᤧᤳᤋᤢᤱᤗᤥ॥ 4 “ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤛᤣᤀᤡᤖᤗᤠᤶ ᤋᤃᤡ ᤁᤧᤎᤠᤛᤡᤱᤅᤧᤸᤗᤧ. ᤂᤧᤏᤧ᤹ ᤀᤣᤍᤥᤔᤖᤧ ᤁᤢᤗᤠᤈᤣ᤹ᤗᤠᤶ. ᤋᤃᤡ ᤁᤧᤒᤥᤖᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤕᤰᤂᤧᤖᤥ. ᤋᤠᤱᤛᤠᤱᤒᤧᤸᤗᤧ ᤌᤠᤛᤢᤖᤥ. ᤂᤠ᤹ᤔᤡ᤺ᤳᤋᤡᤸᤗᤧ ᤘᤜᤡᤳ ᤌᤠᤛᤢᤖᤥ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ. ᤀᤥᤖᤥ. ᤛᤡᤏᤤᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ. ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤁᤡᤔᤧᤸᤗᤧ ᤌᤧᤃᤰᤁᤰᤏᤠ ᤕᤰᤂᤧᤖᤥ॥ 6 “ᤀᤏᤠᤋᤖᤧ ᤁᤢᤛ᤻ᤛᤠ ᤛᤔᤃᤖᤖᤧ ᤁᤢᤕᤧᤶᤔᤥ. ᤕᤠᤀᤣᤗᤖᤧ ᤁᤢᤕᤧᤶᤔᤥ ᤗᤠᤶᤍᤡ᤺ᤰᤐᤠᤜᤠ᤹ ᤔᤠᤖᤠᤶᤜᤠ᤹ᤀᤥ ᤗᤠᤱᤔᤧᤱᤄᤣᤃᤧᤴᤗᤥ. ᤔᤏᤠᤜᤠ᤹ ᤀᤡᤗᤠᤶᤜᤠ᤹ᤀᤥ ᤗᤠᤱᤔᤧᤄᤣᤃᤧᤖᤥ॥ 7 ᤀᤠᤱᤃᤠ᤹ ᤍᤒᤥᤖᤠ᤺ᤴ ᤔᤧᤶᤒᤥ᤺ᤰᤁᤣ ᤌᤠᤖᤡᤰ. ᤀᤡᤛᤪᤠᤀᤡᤗ ᤐᤠᤱᤓᤣ᤹ᤒᤠ ᤜᤡᤱᤔᤴ ᤏᤢᤒᤧᤖᤥ. ᤀᤡᤛᤪᤠᤀᤡᤗᤖᤧ ᤔᤠᤏᤢᤍᤡᤱ ᤁᤢᤶᤔᤠ ᤜᤧᤰᤁᤣ ᤐᤥᤃᤠᤱᤗᤥ॥ 8 ᤀᤠᤸᤗ ᤂᤧᤱᤜᤠ᤹ᤖᤧ ᤁᤢᤛᤱ ᤔᤠᤱᤜᤠ᤹ ᤔᤧᤛᤣᤃᤢᤛᤡᤸᤗᤧ. ᤕᤧᤰᤕᤰᤜᤠ᤹ᤀᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤀᤥ ᤋᤧᤴᤎᤱ ᤐᤥ᤺ᤰᤂᤧᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤗᤡᤒᤥᤱ ᤜᤧᤴᤇᤡᤱ ᤌᤰᤗᤡᤜᤠᤱᤜᤠ᤹ᤖᤧ ᤂᤥ ᤀᤡᤃᤪ ᤗᤠ᤺ᤰᤁᤠᤱ ᤔᤧᤃᤳᤋᤢᤒᤠ ᤏᤡᤔᤧᤍᤧᤳᤋᤧᤴᤗᤥ॥ 9 ᤔᤏᤠ ᤗᤢᤶᤜᤠ᤹ᤀᤥᤒᤠ ᤏᤡᤱᤘᤠ᤹ᤗᤠᤶᤒᤠᤒᤠ ᤁᤶᤒᤪᤠᤱᤒᤠᤜᤠ᤹ᤏᤢ ᤀᤠᤱᤃᤠ᤹ ᤀᤠᤛᤡᤰᤗᤢᤱᤔᤠᤴ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤏᤢ ᤘᤠ᤹ᤖᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ 10 “ᤂᤡᤏᤡ᤹. ᤑᤍᤠᤱᤒᤠ ᤀᤍᤱᤜᤠ᤹ ᤁᤧᤕᤢᤰᤐᤠᤜᤠ᤹ᤖᤧ. ᤛᤡᤱ ᤕᤢᤰᤏᤠᤍᤧᤴᤏᤥᤒᤠ ᤋᤠᤖᤡᤜᤠ᤹ ᤁᤧᤕᤢᤰᤋᤢᤶᤔᤠᤱ ᤁᤧᤕᤢᤅᤡᤖᤥ. ᤜᤧᤰᤁᤩᤠᤱ ᤂᤡᤏᤡ᤹. ᤗᤠᤱᤃᤧᤄᤣ᤺ᤰᤐᤠᤀᤠᤱ ᤗᤠᤶᤃᤧᤎᤠᤛᤡᤱᤒᤠᤜᤠ᤹ᤖᤧ. 11 ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤢᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤛᤠᤶᤃᤧᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤂᤧᤶᤍᤧᤳᤗ ᤐᤳᤗᤥ. ᤂᤧᤵᤔᤥ ᤔᤧᤴᤇᤢᤔᤠᤜᤠ᤹ ᤆᤫᤠ᤺ᤳ ᤑᤠ᤺ᤳᤇᤧ ᤔᤧᤍᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤀᤡᤛᤪᤠᤀᤡᤗᤀᤥ ᤔᤢᤰᤁᤧᤃᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤔᤧᤀᤡ᤺ᤳᤋᤢᤀᤠᤱ ᤔᤧᤒᤠ᤺ᤳᤋᤢᤖᤥ॥ “ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤕᤥ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤀᤥ ᤔᤧᤒᤣᤖᤥ॥ 12 “‘ᤍᤒᤥᤖᤠᤀᤣ. ᤂᤧᤏᤧ᤹ ᤀᤠᤵᤑᤣᤰ ᤛᤥᤖᤧ᤹ᤀᤥ. ᤛᤥᤖᤧ᤹ᤀᤥ ᤂᤧᤏᤧ᤹ ᤀᤠᤵᤑᤣᤰ ᤛᤥᤖᤧ᤹ᤀᤥ. ᤛᤥᤖᤧ᤹ᤀᤥ᥄ ᤁᤧᤶᤒᤪᤠ᤺ᤴ ᤜᤴᤍᤧ᤹ᤀᤠᤱ ᤂᤧᤏᤧ᤹ ᤛᤠᤶᤗᤥᤖᤧ᤹ᤀᤥ॥ ᤀᤒᤡᤏᤥᤀᤔᤖᤧ ᤁᤢᤛ᤻ᤛᤠ ᤒᤠᤖᤠᤁᤀᤣ. ᤐᤥᤃᤧ᤹ᤀᤥ. ᤐᤥᤃᤧ᤹ᤀᤥ ᤀᤠᤏᤡ᤹ ᤏᤡᤱᤔᤡᤜᤠ᤹ ᤋᤧᤶᤛᤧ ᤋᤣ᤹ᤖᤧᤛᤧ᤹ᤀᤥ᥄’ 13 “ᤂᤧᤴ ᤕᤧᤶᤔᤥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤋᤢᤶᤔᤩᤠᤱᤜᤠᤱᤜᤠ᤹ᤀᤥ ᤕᤥ ᤔᤧᤕᤧᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤀᤠᤱᤃᤠ᤹ᤀᤥ ᤔᤢᤰᤁᤧᤃᤢᤒᤠ ᤌᤰᤛᤢᤒᤠᤜᤠ᤹ᤏᤢ ᤔᤧᤍᤩᤧᤖᤥ॥ 14 ᤁᤢᤓᤠ ᤀᤣᤑᤪᤠᤀᤡᤔᤗᤠᤶ ᤏᤧᤏᤧᤒᤠᤍᤧᤴᤏᤥ ᤔᤧᤕᤧᤖᤥ. ᤂᤧᤱᤃ ᤌᤡᤰᤗᤧᤱ ᤀᤔᤠᤗᤧᤁᤡᤜᤠ᤹ ᤔᤧᤕᤢᤅᤧᤒᤠᤍᤧᤴ ᤏᤧᤛ᤻ᤛᤧᤖᤥ॥ ᤂᤧᤏᤧ᤹ ᤁᤧᤍᤡᤶᤒᤠᤜᤠ᤹ᤏᤢ ᤛᤥᤖᤡᤰ ᤒᤣᤏᤩᤠᤔᤡᤏᤧᤴᤏᤠᤱ ᤘᤕᤧᤖᤥ. ᤔᤠᤁᤡᤖᤗᤠᤶ ᤌᤰᤐᤣᤒᤠᤜᤠ᤹ ᤔᤧᤕᤧᤖᤥ. ᤈᤒᤢᤗᤢᤏᤗᤠᤶ ᤌᤰᤔᤥᤒᤠᤸᤗᤧ ᤁᤢᤍᤰᤁᤠᤳ ᤁᤧᤒᤱᤒᤠ ᤔᤏᤠᤜᤠ᤹ ᤔᤧᤕᤧᤖᤥ॥ 15 ᤀᤡᤛ᤻ᤛᤠᤂᤠᤖᤖᤧ ᤁᤢᤗᤠᤶᤗᤥᤒᤠᤜᤠ᤹ ᤍᤒᤥᤖᤠ᤺ᤴᤏᤢ ᤔᤧᤕᤧᤖᤥ. ᤀᤥᤖᤥ. ᤀᤡᤛ᤻ᤛᤠᤂᤠᤖᤧᤴ ᤒᤠᤖᤠᤰᤁᤧᤴᤏᤢ ᤘᤕᤧᤖᤥ॥ ᤂᤧᤱᤜᤠ᤹ ᤂᤧᤸᤗᤧ ᤁᤢᤀᤣᤃᤠᤱ ᤕᤥ ᤏᤧᤏᤧᤒᤠᤍᤧᤴᤏᤥ ᤔᤧᤗᤥ᤺ᤰᤋᤧ ᤔᤧᤕᤧᤖᤥ॥ ᤖᤢᤒᤣᤏᤖᤧ ᤁᤢᤎᤠ᤺ᤰᤁᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤢᤶᤜᤠ᤹ᤀᤥ ᤐᤣ᤺ᤰᤔᤠ ᤀᤡ ᤔᤧᤶᤒᤣ᤺ᤰᤔᤠᤀᤡ ᤁᤧᤗ᤹ᤒᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤷᤒᤣ᤺ᤶᤒᤥ ᤔᤧᤎᤩᤧᤖᤥ॥ 16 ᤂᤧᤱᤜᤠ᤹ ᤌᤣᤀᤠᤱ ᤔᤧᤸᤗᤢᤰᤜᤠ᤹ ᤋᤡᤶᤔᤠᤛᤡᤖᤧ ᤗᤠᤃᤡ ᤛᤠ᤺ᤱᤃᤠᤜᤡᤶᤔᤥ ᤔᤧᤕᤢᤅᤧ ᤔᤧᤗᤠᤖᤧᤒᤠᤒᤣ᥅ ᤌᤣ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤔᤧᤸᤗᤢᤰᤜᤠ᤹ ᤑᤡ᤺ᤰ ᤔᤧᤔᤧᤳᤋᤢᤛᤡᤒᤠ ᤀᤡᤰᤗᤠᤴ ᤂᤧᤶᤔᤠᤖᤧ ᤗᤠᤃᤡᤒᤡ᥅ ᤏᤠ᤹ᤖᤠᤱᤗᤥ. ᤖᤢᤒᤣᤏᤖᤧ ᤁᤢᤎᤠ᤺ᤰᤜᤠ᤹ ᤔᤧᤛᤧᤖᤧᤖᤥ. ᤀᤠᤳᤋᤡ ᤗᤧᤵᤔᤠᤱ ᤐᤣ᤺ᤰᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡ᤺ᤴᤎᤥ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥ 17 ᤃᤡᤗᤠᤍᤧᤴ ᤕᤷᤍᤏ ᤏᤠᤎᤠ᤺ᤶᤒᤡᤀᤣ ᤕᤢᤱᤛᤡᤱᤗᤥ. ᤜᤧᤰᤁᤩᤠᤱ ᤘᤠᤗᤠᤎᤠᤜᤠ᤹ᤖᤧ ᤁᤢᤕᤠᤀᤥ ᤍᤠᤏᤖᤧ ᤌᤣᤀᤠᤱ ᤜᤠᤱᤄᤢᤀᤠᤱ ᤕᤢᤅᤧᤒᤠᤒᤣ᥅ ᤀᤠᤛᤣᤖᤧᤴ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤀᤣ ᤕᤢᤅᤧᤖᤥ. ᤂᤢᤏᤧ᤹ᤃ ᤁᤢᤘᤠᤗᤠᤎᤠ ᤕᤧᤶᤔᤠᤍᤧᤴᤏᤥᤀᤣ ᤕᤢᤅᤧᤗᤠᤖᤧᤖᤥ॥ 18 ᤈᤒᤢᤗᤢᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤧᤴᤏᤣ ᤁᤧᤛᤠᤰᤐᤥ ᤔᤧᤎᤠᤛᤢᤖᤥ. ᤏᤵᤋᤠᤗᤡ᤺ᤸᤗᤧᤀᤠᤱ ᤋᤧᤴᤎᤱ ᤆᤥ᤺ᤰᤔᤠᤍᤧᤴᤏᤥ ᤜᤧᤰᤁᤣᤀᤣ ᤆᤥᤃᤢᤖᤥ॥ 19 “ᤜᤠᤱᤜᤠ᤹ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤌᤱ ᤔᤧᤈᤥᤃᤢᤖᤥ. ᤁᤏᤠᤏᤒᤠ ᤜᤠᤱᤜᤠ᤹ᤖᤧ ᤔᤃᤡᤍ᤻ᤍᤥᤒᤠ ᤘᤜ᤺ᤱᤜᤠ᤹ᤖᤧ ᤁᤢᤕᤠᤀᤥᤒᤠ ᤋᤠᤏᤠᤁᤀᤥ ᤋᤧᤴᤎᤱ ᤔᤧᤈᤥᤃᤢᤖᤥ॥ ᤁᤖ ᤂᤧᤱᤜᤠ᤹ᤖᤧ ᤁᤢᤓᤠ ᤕᤢᤵᤐᤠ. ᤁᤢᤓᤠ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤌᤧᤔᤠᤀᤠᤱ ᤔᤧᤴᤍᤣ᤹ᤖᤢᤴᤗᤥ॥ 20 ᤂᤣ᤺ᤶᤛᤡᤰᤐᤠᤜᤠ᤹ᤖᤧᤀᤠᤱ ᤋᤠᤱᤛᤠᤱᤒᤥᤗᤠᤶ ᤌᤱ ᤔᤧᤈᤥᤃᤢᤖᤥ. ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤀᤡᤔᤠᤍᤧᤴᤏᤥᤗᤠᤶ ᤂᤣᤛᤣᤒᤠᤜᤠ᤹ ᤛᤡᤛᤖᤠ᤺ᤴᤏᤢ ᤔᤧᤎᤰᤋᤧᤖᤥ॥ 21 ᤁᤡᤛᤥᤏ ᤀᤢᤴᤇᤣ᤺ᤴᤇᤔᤠ ᤋᤃᤡᤒᤠ ᤘᤜ᤺ᤱ. ᤁᤡᤛᤥᤏ ᤘᤜ᤺ᤱᤅᤡᤸᤗᤧ ᤂᤧᤱᤜᤠ᤹ ᤐᤰᤂᤢᤍᤣ᤹ᤖᤢᤛᤡᤖᤥ. ᤀᤠᤱᤃᤠ᤹ ᤔᤧᤳᤇᤡᤱᤅᤠ. ᤂᤧᤏᤧ᤹ ᤔᤧᤱᤃᤡᤀᤣ ᤗᤠᤱᤄᤣᤃᤧᤀᤥ॥ 22 ᤂᤧᤒᤩᤠᤱ ᤀᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤋᤥ᤹ᤓᤧ᤺ᤳᤜᤠ᤹ ᤔᤧᤎᤠᤵᤛᤢᤖᤥ. ᤂᤧᤵᤔᤥᤒᤠ ᤀᤴᤜᤠ᤹ ᤐᤈᤠᤳ ᤔᤧᤈᤠᤳᤋᤧᤖ ᤔᤧᤗᤥ᤺ᤰᤋᤧᤖᤥ॥ 23 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤔᤣᤖᤥᤈᤧᤴ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤧ᤹ᤀᤥ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤁᤢᤈᤠᤓᤧᤴᤗ ᤔᤠᤱᤍᤣᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤆᤒᤧ᤺ᤳᤇᤡᤰᤁᤠᤱ ᤔᤧᤶᤓᤠ᤹ᤖᤢᤴᤗᤥ. ᤁᤧᤎᤢᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤁᤢᤓᤠ᤹ ᤔᤧᤶᤒᤡᤖᤢᤴᤗᤥ॥’ 24 “ᤁᤣᤏᤡ ᤜᤣᤒᤣᤖᤖᤧ ᤔᤧᤸᤗᤡᤱᤃᤧᤴ ᤁᤢᤔᤣᤳ ᤕᤠᤀᤣᤗᤧᤴ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠ ᤐᤥᤱᤗᤖᤥ॥ ᤛᤠ᤺ᤱᤃᤠᤜᤡᤶᤔᤥ ᤁᤧᤕᤢᤱᤔᤠ ᤔᤧᤴᤇᤢᤔᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤠ᤹ᤖᤡᤰ ᤔᤢ᤹ᤀᤡᤛᤠᤔᤠ ᤐᤥᤱᤗᤖᤥ॥ 25 ᤛᤡᤛᤖᤠ᤺ᤸᤗᤧ ᤆᤫᤠ᤺ᤳ ᤏᤠ᤺ᤰᤋᤢᤖᤥ. ᤁᤖ ᤂᤢᤏᤧ᤹ ᤂᤧᤴ ᤐᤡᤳᤏᤢ ᤐᤡᤖᤢᤖᤥ. ᤋᤢᤶᤔᤩᤠᤱᤜᤠᤱᤜᤠ᤹ᤖᤧ ᤗᤠᤃᤡ ᤔᤧᤕᤠᤖᤢᤒᤠ ᤂᤥᤷᤕᤠᤀᤥ ᤂᤢᤏᤧ᤹ ᤂᤧᤴ ᤏᤢᤍᤠᤰᤘᤠ ᤐᤡᤖᤢᤖᤥ॥ 26 ᤂᤢᤏᤧ᤹ ᤁᤢᤜᤢᤰᤁᤡᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤰᤆᤢᤀᤥ ᤛᤴᤇᤢᤖᤥ. ᤂᤢᤏᤧ᤹ ᤁᤢᤈᤢᤰᤘᤠ ᤜᤢᤰᤁᤥ ᤔᤷᤕᤠᤴ ᤐᤰᤂᤢᤖᤥ॥ ᤂᤢᤏᤧ᤹ ᤛᤡᤛᤖᤠ᤺ᤴ ᤔᤷᤕᤠ᤺ᤸᤗᤧ ᤜᤡᤵᤋᤢᤖᤥ. ᤂᤢᤏᤧ᤹ ᤂᤧᤸᤗᤧ ᤁᤢᤎᤧᤃᤣᤰᤐᤠᤴ ᤕ᤺ᤵᤛᤢᤖᤥ. ᤂᤢᤏᤧ᤹ ᤂᤧᤸᤗᤧ ᤁᤢᤴᤛᤡ᤺ᤶᤒᤧᤴ ᤗᤰᤋᤢᤖᤥ ᤜᤧᤰᤁᤩᤠᤱ ᤕᤧᤳᤆᤪᤡᤱᤔᤠ ᤆᤥᤃᤢᤖᤥ॥ 27 ᤁᤢᤗᤠᤱᤜᤠ᤹ᤖᤧ ᤔᤧᤍᤰᤋᤢᤴᤏᤠᤱ ᤛᤡᤛᤖᤠ᤺ᤴ ᤆᤥ᤺ᤴᤍᤧᤖᤥ. ᤂᤧᤴ ᤐᤣᤷᤈᤢᤛᤠ ᤆᤥ᤺ᤴᤍᤧᤀᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤱᤈᤰᤐᤥ ᤏᤧᤛ᤻ᤛᤧᤃᤖᤧᤖᤥ. ᤁᤢᤗᤠᤱᤜᤠ᤹ᤖᤧ ᤔᤧᤍᤰᤋᤢᤴᤏᤠᤱ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤱᤈᤰᤐᤥ ᤛᤠᤶᤒᤥᤴ ᤐᤳᤇᤧᤖᤥ॥ ᤂᤧᤴ ᤛᤠᤶᤒᤥᤴ ᤆᤢᤰᤋᤧᤒᤠᤍᤧᤴᤏᤥ ᤆᤥ᤺ᤴᤍᤧᤀᤠᤱ ᤛᤩᤧᤖᤥ॥ 28 “ᤛᤡᤛᤖᤠ᤺ᤸᤗᤧ ᤁᤢᤶᤔᤠᤖᤧ ᤜᤱᤜᤱᤍᤠᤱᤒᤠ ᤐᤣᤎᤠ᤺ᤵᤐᤥᤗᤠᤶ ᤌᤥ᤺ᤵᤛᤢᤀᤠᤱ ᤀᤥᤔᤧᤳᤋᤢ. ᤐᤣᤎᤠ᤺ᤵᤐᤥᤗᤠᤶ ᤌᤥ᤺ᤵᤛᤢᤖᤥ ᤜᤧᤰᤁᤩᤠᤱ ᤑᤡ᤺ᤰᤋᤧᤀᤠᤱ ᤀᤰᤂᤣ ᤗ᤹ᤖᤧᤖᤥ. ‘ᤂᤧᤸᤗᤧ ᤁᤢᤀᤴᤗᤠᤎᤠᤴ ᤁᤧᤵᤔᤠ ᤌᤣᤀᤠᤱ ᤁᤶᤔᤩᤠᤰ ᤛᤢᤛᤧᤒᤠᤒᤣ᥅ ᤂᤧᤸᤗᤧ ᤁᤢᤀᤴᤗᤠᤎᤠᤜᤠ᤹ ᤂᤴᤍᤪᤱ ᤂᤴᤍᤪᤱ ᤗ᤹ᤔᤠ ᤀᤡᤰᤗᤠᤴ ᤜᤧᤴᤏᤠᤱ ᤁᤶᤓᤩᤠᤖᤡᤰ ᤐᤛᤢᤛᤢᤒᤠᤒᤣ᥅’ 29 “ᤂᤧᤸᤗᤧ ᤁᤢᤔᤧᤴᤇᤢᤔᤠᤜᤠ᤹ ᤗᤢᤶᤔᤥᤔᤠ ᤁᤧᤖᤧᤰᤏᤢ᤺ᤸᤗᤧ ᤛᤡᤰᤁᤢᤶᤛᤠᤔᤧᤸᤗᤧ ᤀᤰᤋᤱᤒᤠ ᤏᤥᤃᤵ ᤐᤡᤖᤢᤖᤥ. ᤛᤧᤰᤂᤠᤀᤣ ᤂᤢᤏᤧ᤹ ᤀᤠᤵᤑᤣᤰᤁᤠᤱ ᤀᤰᤂᤣ ᤐᤠ᤺ᤳᤋᤢᤖᤥ. 30 ‘ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤔᤧᤃᤥ᤺ᤳᤋᤢᤖ ᤔᤧᤕᤠᤰᤐᤡᤗᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤓ᤺ᤰᤂᤢᤖ ᤔᤧᤕᤠᤰᤐᤡᤗᤠ. ᤁᤧᤖᤧᤰ ᤕᤧᤶᤒᤡᤳᤇᤠ ᤌᤰᤔᤠ ᤔᤧᤴᤇ᤻ᤕᤠ ᤌᤡᤰ. ᤐᤥᤱᤔᤠ ᤛᤢᤰ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤏᤧᤳᤇᤡ. ᤛᤡᤛᤖᤠ᤺ᤸᤗᤧ ᤁᤢᤗᤠᤃᤡ ᤆᤠ᤺ᤶᤔᤏᤠᤒᤠ ᤆᤠᤱᤜᤠ᤹. ᤁᤢᤓᤢᤱ ᤗᤰᤔᤏᤠᤒᤠ ᤆᤠ᤺ᤶᤔᤏᤠᤒᤠ ᤆᤠᤱᤜᤠ᤹. ᤁᤢᤓᤢᤱ ᤀᤡᤛᤣ᤺ᤱ ᤗᤰᤔᤏᤠᤒᤠ ᤋᤣ᤺ᤵᤑᤢᤱᤜᤠ᤹. ᤀᤠᤱᤃᤠ᤹ ᤀᤠᤛᤡᤳᤗᤠᤀᤥ ᤘᤠ᤺ᤵᤔᤠᤖᤧ ᤗᤠᤃᤡ ᤁᤴᤜᤠ᤹ ᤁᤧᤖᤧᤰ ᤏᤠᤵᤔᤏᤠᤛᤡᤒᤠ ᤆᤡᤃᤰᤘᤠ ᤁᤢᤀᤡᤛᤡᤰ ᤐᤥᤱᤗᤥ॥’ 31 “ᤕᤜᤘᤣ ᤍᤠᤱᤒᤠᤀᤣ. ᤁᤶᤓᤗ᤹ᤖᤡᤰᤁᤣ ᤁᤧᤖᤧᤰ ᤁᤧᤏᤡᤱᤔᤡᤜᤠ᤹ ᤔᤧᤔᤧᤰᤗᤖᤥ. ᤁᤖ ᤂᤧᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤏᤠᤶᤗᤠ᤺ᤱᤔᤥ ᤏᤠᤶ ᤁᤧᤃᤧᤵᤐᤠ ᤏᤠᤶ ᤁᤢᤀᤡᤛᤡᤰ ᤔᤧᤒᤥᤱᤗᤖᤥ॥” ᤂᤧᤒᤩᤠᤱ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤗᤠᤈᤣ᤹ᤀᤥ ᤛᤏᤠᤖᤢᤱ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.