ᤂᤠᤛᤧᤴᤗᤥ᤺ᤶᤒᤠ 4 - LIFOTNTᤍᤒᤥᤖᤠ ᤏᤢ ᤒᤠᤖᤠᤁ 1 ᤀᤣᤜᤢᤍᤧᤴ ᤔᤠᤛᤡᤱᤅᤠᤱ ᤀᤣᤃᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤌᤧᤔᤠ᤺ᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤕᤠᤶᤔᤥ ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢ॥ 2 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤜᤠᤛᤥᤖᤀᤥ ᤕᤢᤰ ᤁᤧᤈᤥ᤺ᤰᤐᤠ ᤁᤏᤠᤏᤡ ᤜᤠᤱ ᤕᤠᤒᤡᤏᤖᤧ ᤁᤢᤜᤢᤰᤁᤥ ᤛᤱᤄᤢᤛᤡ॥ ᤂᤧᤸᤗᤧ ᤁᤢᤎᤰᤔᤥᤒᤠ ᤛᤡᤛᤖᤠ᤺ᤴ ᤘᤕᤧ. ᤂᤢᤏᤧ᤹ ᤜᤖᤥᤛᤣᤋ ᤜᤃ᤻ᤃᤥᤕᤡᤔᤀᤥ ᤕᤢᤅᤧ॥ 3 ᤛᤡᤛᤖᤠ᤺ᤸᤗᤧ ᤁᤡᤵ ᤑᤠᤱᤛᤡ ᤑᤧᤴᤈᤣ᤹ ᤀᤴᤗᤠᤎᤠᤜᤠ᤹ ᤁᤳᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤏᤡᤒᤥᤱ ᤋᤱᤒᤣ ᤌᤠᤖᤡᤰ ᤛᤠ᤹ᤖᤡᤰ ᤋᤢᤰᤁᤣ ᤆᤠ᤺ᤳᤋᤢᤛᤡ॥ ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤓᤠ᤹ᤖᤧ᤹ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ॥ 4 ᤂᤧᤴ ᤕᤧᤶᤔᤥ ᤗᤵᤐᤡᤍᤥᤋᤖᤧ ᤁᤢᤔᤣᤳ ᤍᤒᤥᤖᤠ᤺ᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤔᤠ ᤘᤕᤧ॥ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤘᤕᤧ॥ 5 ᤂᤢᤏᤧ᤹ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ ᤖᤠᤔᤠ ᤏᤢ ᤒᤣᤌᤣᤗ ᤗᤢᤶᤔᤥ ᤁᤧᤏᤧᤒᤠ ᤍᤒᤥᤖᤠ᤺ᤸᤗᤧ ᤁᤢᤄᤧᤒᤰᤛᤡᤱᤅᤡᤸᤗᤧ ᤁᤢᤛᤡᤃᤠᤱ ᤕᤢᤅᤧᤖ ᤘᤕᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤧ᤹ᤀᤥ ᤂᤠᤛᤧᤴᤗᤧ ᤗᤠᤃᤡ ᤔᤧᤍᤩᤧᤖ ᤔᤧᤘᤕᤧ॥ 6 ᤂᤢᤏᤧ᤹ ᤏᤵᤋᤠᤗᤡᤒᤠ ᤁᤣᤍᤣᤛᤗᤠᤶ ᤀᤒᤡᤏᤥᤀᤔᤖᤧ ᤁᤢᤛ᤻ᤛᤠ ᤒᤠᤖᤠᤁᤧᤴ ᤀᤢ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤀᤰᤋᤱᤒᤠ ᤘᤠ᤹—‘ᤂᤧᤏᤧ᤹ ᤐᤣᤃᤧ᤹ᤀᤠᤱ ᤏᤵᤋᤠᤗᤡ ᤏᤢ ᤈᤒᤢᤗᤢᤏᤒᤠ ᤌᤡᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ ᤑᤢᤰᤂᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤧ᤹ᤏᤢ ᤛᤥᤖᤡᤰ ᤋᤒᤥᤖ ᤁᤥ᤺ᤰᤔᤠᤀᤥ ᤋᤣ᤹ᤖᤧᤛᤧ᤹॥ 7 ᤀᤠᤱᤃᤠ᤹ ᤕᤠᤒᤡᤏᤖᤧ ᤁᤢᤎᤰᤔᤥᤒᤠ ᤛᤡᤛᤖᤠ᤺ᤴ ᤁᤡᤛᤥᤏ ᤘᤜ᤺ᤱᤅᤥ ᤂᤢᤏᤧ᤹ ᤁᤢᤀᤴᤗᤠᤎᤠᤜᤠ᤹ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ᤀᤠᤱ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤐᤡᤏᤧᤖᤥ॥’” 8 ᤒᤠᤖᤠᤁᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ᤏᤢ ᤛᤥᤖᤡᤰ ᤁᤧᤒᤣ᤺ᤰᤏᤧᤓᤃᤪ ᤀᤠᤱᤃᤠ᤹ ᤐᤣ᤺ᤰᤁᤠ. ᤁᤖ ᤂᤧᤏᤧ᤹ ᤁᤧᤶᤒᤣ᤺ᤰᤏᤧᤴᤏᤧᤓᤃᤪ ᤀᤠᤱᤃᤠ᤹ᤀᤠᤱ ᤔᤧᤒᤣ᤺ᤰᤁᤠᤴ॥” 9 ᤍᤒᤥᤖᤠ᤺ᤸᤗᤧ ᤔᤧᤳᤋᤢ. “ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤐᤣ᤺ᤰᤁᤠ. ᤁᤖ ᤂᤧᤏᤧ᤹ ᤁᤧᤒᤣ᤺ᤰᤛᤠᤱ ᤔᤡᤱᤛᤥ ᤀᤡᤱᤎᤠᤱ ᤁᤧᤱᤄᤥᤛᤢᤴ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤛᤖᤠ᤺ᤴ ᤔᤧᤴᤇᤢᤔᤠ ᤌᤡᤰᤗᤧ ᤁᤢᤜᤢᤰᤁᤥ ᤌᤠᤛᤢ᤹॥” ᤂᤧᤒᤩᤠᤱ ᤍᤒᤥᤖᤠ᤺ᤴ ᤐᤥᤃᤧᤀᤠᤱ ᤒᤠᤖᤠᤁᤧᤴᤏᤢ ᤁᤣᤍᤣᤛ ᤌᤠᤛᤡᤱ॥ 10 ᤒᤠᤖᤠᤁᤧᤸᤗᤧ ᤈᤒᤢᤗᤢᤏ ᤏᤢ ᤏᤵᤋᤠᤗᤡᤴ ᤁᤣᤍᤣᤛᤀᤥ ᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤌᤡᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ. ᤜᤧᤰᤁᤩᤠᤱ ᤍᤒᤥᤖᤠ᤺ᤴᤏᤠᤱ ᤂᤢᤏᤧ᤹ᤏᤢ ᤐᤣ॥ 11 ᤀᤠᤸᤗ ᤁᤣᤏᤡ ᤜᤣᤒᤣᤖᤖᤧ. ᤀᤡᤃᤪ ᤔᤥᤛᤠ᤺ᤸᤗᤧ ᤁᤢᤱᤃᤢᤱᤒᤠ ᤜᤥᤒᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠ᤺ᤸᤗᤧ ᤘᤣ᤹ ᤁᤣᤏᤡᤜᤠ᤹ ᤋᤡᤶᤔᤠ ᤏᤠ᤹ᤖᤢᤛᤡᤀᤠᤱ ᤁᤣᤍᤣᤛ ᤁᤢᤒᤣᤛᤠᤱᤒᤠ ᤛᤠᤏᤴᤏᤡᤔᤀᤥ ᤁᤧᤕᤢᤱᤒᤠ ᤕᤜᤡᤒᤠ ᤛᤡᤱᤒᤢᤱ ᤏᤡ᤺ᤳᤋᤠᤱ ᤂᤢᤏᤧ᤹ ᤁᤢᤛᤠ᤺ᤱᤃᤠᤜᤡᤶᤔᤡᤴ ᤂᤡᤱᤄᤢᤀᤠᤱ ᤏᤧᤛ᤻ᤛᤧ॥ 12 ᤀᤒᤡᤏᤥᤀᤔᤖᤧ ᤁᤢᤛ᤻ᤛᤠ ᤒᤠᤖᤠᤁᤧᤴ ᤋᤒᤥᤖ ᤁᤥ᤺ᤰᤔᤠᤀᤥ ᤐᤣᤀᤠᤱ ᤕᤠᤰ ᤁᤧᤗ᤹ᤒᤠ ᤛᤡᤛᤖᤠ᤺ᤴ ᤔᤧᤔᤧᤳᤋᤢ॥ 13 ᤂᤧᤒᤩᤠᤱ ᤂᤢᤏᤧ᤹ ᤁᤡᤵ ᤑᤠᤱᤛᤡ ᤑᤧᤴᤈᤣ᤹ ᤁᤢᤀᤴᤗᤠᤎᤠᤜᤠ᤹ ᤏᤢ ᤁᤢᤎᤰᤛᤢᤒᤠᤜᤠ᤹ ᤜᤖᤥᤛᤣᤋ ᤜᤃ᤻ᤃᤥᤕᤡᤔᤗᤠᤶ ᤁᤡᤛᤥᤏ ᤘᤜ᤺ᤱᤅᤥ ᤑᤢᤰᤂᤢᤛᤡ॥ 14 ᤂᤧᤒᤩᤠᤱ ᤍᤒᤥᤖᤠ᤺ᤸᤗᤧ ᤒᤠᤖᤠᤁᤧᤴ ᤔᤧᤳᤋᤢ. “ᤐᤥᤃᤧ᤹. ᤀᤠᤀᤡᤴᤒᤠ ᤕᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤛᤖᤠ᤺ᤴ ᤂᤧᤏᤧ᤹ ᤁᤧᤜᤢᤰᤁᤥ ᤁᤧᤒᤡᤖᤧᤀᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ ᤁᤧᤍᤃᤡ ᤐᤣᤀᤠᤱ ᤘᤠ᤹॥” ᤁᤸᤗᤧᤆᤥᤃᤢᤸᤗᤧ ᤒᤠᤖᤠᤁᤧᤴ ᤋᤒᤥᤖ ᤁᤥ᤺ᤰᤔᤠᤀᤥᤗᤠᤶ ᤕᤥ ᤌᤠᤛᤡᤱ ᤕᤧ. ᤂᤶᤓᤩᤠᤱ ᤌᤡᤒᤥᤱ ᤜᤧᤴᤇᤡᤱ ᤔᤏᤠᤜᤠ᤹ ᤂᤧᤸᤗᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤔᤧᤕᤧ॥ 15 ᤒᤠᤖᤠᤁᤧᤸᤗᤧ ᤌᤱᤅᤥ ᤑᤵᤔᤠᤛᤡᤏᤢ᤺ᤸᤗᤧ ᤋᤃᤡᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤛᤡᤛᤖᤠ᤺ᤴ. ᤂᤢᤏᤧ᤹ ᤁᤧᤖᤧᤰ ᤁᤢᤀᤴᤗᤠᤎᤠᤜᤠ᤹ ᤏᤢ ᤛᤥᤖᤡᤰ ᤌᤰᤛᤢᤒᤠᤜᤠ᤹ᤀᤠᤱ ᤔᤧᤏᤠᤰᤋᤧᤖ ᤕᤠ᤺ᤴᤍᤢᤛᤡ ᤜᤧᤰᤁᤩᤠᤱ ᤋᤠᤓᤣ᤺ᤸᤗᤧ ᤆᤩᤧᤵᤋᤢᤛᤡ॥ ᤛᤡᤛᤖᤠ᤺ᤴ ᤁᤢᤀᤴᤗᤠᤀᤥᤗᤠᤶ ᤌᤠᤛᤡᤱᤅᤠᤱ ᤗᤠᤱᤄᤣᤃᤧᤀᤠᤱᤅᤣ ᤂᤧᤳᤇᤡᤱ॥ 16 ᤒᤠᤖᤠᤁᤧᤸᤗᤧ ᤀᤴᤗᤠᤎᤠᤜᤠ᤹ ᤏᤢ ᤌᤰᤛᤢᤒᤠᤜᤠ᤹ ᤜᤖᤥᤛᤣᤋ ᤜᤃ᤻ᤃᤥᤏᤡᤕᤔ ᤌᤧᤶᤒᤠ ᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤰᤂᤢᤛᤡ॥ ᤗᤳᤇᤠᤀᤠᤱ ᤔᤧᤴᤜᤡᤅᤧᤴ॥ 17 ᤁᤳᤏᤠ ᤛᤡᤛᤖᤠ᤺ᤴᤃ ᤗᤠᤱᤄᤣᤃᤧᤖ ᤂᤧᤳᤇᤡᤱᤅᤠᤱ ᤁᤣᤏᤡ ᤜᤣᤒᤣᤖᤖᤧ ᤁᤢᤔᤣᤳ ᤕᤠᤀᤣᤗᤖᤧ ᤁᤢᤛᤠ᤺ᤱᤃᤠᤜᤡᤶᤔᤥ ᤗᤠᤛᤧ. ᤌᤣᤀᤠᤱᤓᤧᤸᤗᤧ ᤜᤠᤛᤥᤖᤒᤠ ᤜᤠᤱ ᤕᤠᤒᤡᤏ ᤏᤢ ᤁᤣᤏᤡ ᤜᤣᤒᤣᤖᤖᤧ ᤂᤢᤴᤇᤡ᤹ ᤜᤡᤶᤛᤕᤱ ᤗᤢᤶᤔᤥ ᤔᤧᤍᤅᤧᤀᤠᤱ ᤔᤧᤘᤕᤧ॥ 18 ᤕᤠᤀᤣᤗᤧᤴ ᤛᤡᤛᤖᤠ᤺ᤸᤗᤧ ᤁᤢᤍᤢᤶᤛᤧ ᤗ᤺ᤴᤍᤧ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤗᤧᤵᤔᤠᤱ ᤌᤠᤅᤧ᤹. ᤛᤡᤃᤠᤱ ᤌᤠᤅᤧ᤹॥ ᤔᤧᤃᤡᤛᤧᤴᤏᤧ᤹॥” ᤁᤸᤗᤧᤆᤥᤃᤢᤸᤗᤧ ᤛᤡᤛᤖᤠ᤺ᤴ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤂᤠᤶᤍᤣ᤺ᤳ ᤌᤡᤰᤗᤧ ᤂᤠᤵᤋᤢ॥ 19 ᤛᤡᤛᤖᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤆᤒᤧ᤺ᤳᤇᤡᤰ ᤆᤫᤠ᤺ᤳ ᤌᤢᤱᤔᤠ ᤐᤡᤖᤠᤱᤅᤧ᤹॥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤘᤠᤔᤡ᤺ᤰᤋᤧᤀᤠᤱ ᤘᤠ᤹॥” ᤂᤧᤒᤩᤠᤱ ᤂᤢᤏᤧ᤹ ᤐᤡᤳᤏᤢ᤺ᤸᤗᤧ ᤁᤧᤍᤡᤶᤒᤠ ᤛᤡᤜᤥ᤹ᤒᤠ ᤛᤢᤰᤘᤠᤴ ᤑᤠ᤺ᤰᤂᤢᤀᤠᤱ ᤂᤧᤴ ᤌᤢᤱᤔᤠ ᤐᤡᤖᤢ. ᤂᤶᤓᤩᤠᤱ ᤂᤢᤏᤧ᤹ ᤕᤠᤶᤔᤥ ᤂᤠᤶᤍᤣ᤺ᤳᤋᤡᤸᤗᤧ ᤂᤠᤵᤋᤢ॥ 20 ᤛᤡᤛᤖᤠ᤺ᤸᤗᤧ ᤔᤧᤳᤋᤢ. “ᤛᤠ᤺ᤱᤃᤠᤜᤡᤶ ᤗᤠᤶᤎᤣ᤺ᤳᤋᤥᤀᤣ ᤂᤧᤏᤧ᤹ ᤕᤧᤒᤣᤃᤖᤧ᤹. ᤜᤧᤰᤁᤩᤠᤱ ᤁᤢᤓᤠ ᤔᤧᤍᤠᤀᤠᤱ ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤛᤧ᤺ᤴᤁᤧᤶᤍᤥ᤹. ‘ᤁᤵᤔᤥ ᤁᤢᤓᤠ ᤔᤏᤠ ᤘᤠ᤹ᤒᤡ’ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤔᤧᤳᤋᤧᤛᤧ᤹ ‘ᤜᤥᤵᤗᤥ॥’” 21 ᤁᤖ ᤜᤣᤒᤣᤖᤖᤧ ᤁᤢᤔᤣᤳ ᤕᤠᤀᤣᤗᤖᤧ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤰᤆᤢ ᤌᤡᤰ ᤏᤢ ᤔᤖ᤺ᤱᤃᤩᤠ ᤌᤡᤰ ᤕᤠᤱᤛᤡᤱ ᤜᤧᤰᤁᤩᤠᤱ ᤛᤡᤛᤖᤠᤴ ᤐᤏᤠ ᤏᤠᤛᤧᤀᤠᤱ ᤔᤢᤖᤢᤰ ᤂᤠᤖᤢᤰ ᤀᤡᤵᤛᤧᤒᤠ ᤕᤧᤶᤔᤥ ᤛᤫᤠ᤺ᤳᤋᤠᤱ ᤂᤢᤏᤧ᤹ ᤁᤢᤒᤣᤛᤠᤱ ᤐᤣ॥ ᤕᤠᤀᤣᤗᤖᤧ ᤛᤡᤛᤖᤠ᤺ᤸᤗᤧ ᤁᤢᤴᤛᤡ᤺ᤴᤒᤧᤴ ᤑᤩᤠᤰ ᤗᤛ᤻ᤛᤢᤀᤠᤱ ᤂᤠᤶᤒᤠᤱᤅᤡᤴ ᤛᤢᤛᤢᤖ ᤌᤠᤖᤡᤰ ᤗᤰᤆᤢ᤺ᤴ ᤌᤧᤵᤋᤢ. ᤜᤧᤰᤁᤩᤠᤱ ᤂᤧᤴ ᤛᤩᤧ॥ 22 ᤒᤠᤖᤠᤁᤧᤸᤗᤧ ᤛᤡᤛᤖᤠᤴ ᤏᤠ᤺ᤳᤋᤢᤖ ᤋᤩᤧ᤺ᤸᤗᤧ ᤕᤠᤀᤣᤗᤧᤴ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧᤀᤠᤱ ᤂᤧᤴ ᤔᤧᤳᤋᤢ. “ᤑᤧᤖᤧ᤹. ᤂᤧᤏᤧ᤹ ᤁᤧᤃᤥ᤺ᤳᤋᤢᤒᤠ ᤔᤏᤠᤴ ᤀᤠᤱᤃᤠ᤹ ᤀᤥ᤺ᤴᤎᤠᤰᤏᤧ॥” ᤒᤠᤖᤠᤁᤧᤴ ᤂᤢᤏᤧ᤹ᤏᤢ ᤛᤡᤃᤠᤱ ᤗᤠᤛᤧ. ᤜᤧᤰᤁᤩᤠᤱ ᤛᤡᤛᤖᤠᤴ ᤁᤢᤴᤛᤡ᤺ᤴᤒᤥ ᤗᤰᤆᤢ᤺ᤸᤗᤧ ᤗᤣ᤺ᤳᤋᤢᤀᤠᤱ ᤆᤥ᤺ᤴᤍᤧᤀᤠᤱ ᤛᤩᤧᤀᤠᤱ ᤏᤧᤛ᤻ᤛᤧᤒᤠ ᤏᤡᤛᤢ॥ 23 ᤂᤧᤸᤗᤧ ᤕᤠ᤺ᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤏᤠᤏᤒᤠ ᤜᤠᤱ ᤕᤠᤒᤡᤏᤧᤴ ᤔᤧᤏᤠ᤺ᤴᤍᤢᤖ ᤕᤠ᤺ᤴᤍᤢᤛᤡ॥ 24 ᤂᤧᤴ ᤌᤩ᤺ᤱ ᤔᤧᤴᤍᤣᤀᤣ ᤌᤠᤖᤡᤰ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤕᤠᤒᤡᤏᤖᤧ ᤁᤢᤍᤰᤗᤧᤱᤘᤠᤀᤥ ᤀᤡᤛᤪᤠᤀᤡᤗᤡᤜᤠ᤹ ᤔᤢᤰᤛᤠᤶᤒᤠ ᤔᤧᤒᤥ᤺ᤰᤂᤧᤖ ᤔᤧᤒᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.