ᤂᤠᤛᤧᤴᤗᤥ᤺ᤶᤒᤠ 3 - LIFOTNTᤁᤏᤠᤏ ᤁᤧᤕᤢᤱᤒᤠ ᤁᤧᤕᤠ᤺ᤰᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ 1 ᤁᤏᤠᤏ ᤗᤠᤈᤣ᤹ᤀᤥ ᤌᤱ ᤐᤥ᤺ᤰᤂᤧᤒᤠᤴ ᤔᤧᤴᤍᤢᤶ ᤔᤧᤴᤏᤡᤀᤣ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤛᤠ᤹ᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤓᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤢᤱᤔᤠ ᤑᤠ᤺ᤰᤋᤢᤛᤡᤀᤠᤱ ᤘᤕᤧ॥ 2 ᤀᤡᤛᤪᤠᤀᤡᤗᤀᤥ ᤕᤠᤱᤛᤡ ᤁᤧᤃᤧᤵᤐᤠ ᤁᤧᤎᤠᤱᤒᤠ ᤌᤠ᤺ᤰ. ᤀᤡᤃᤪ ᤋᤃᤡ ᤌᤱ ᤆᤥ᤺ᤰᤔᤠ ᤔᤧᤸᤗᤧᤀᤣ ᤁᤧᤘᤠ᤹ᤒᤠᤜᤠ᤹. ᤀᤠᤰᤂᤣᤗ᤹ᤖᤡᤰ ᤌᤱ ᤆᤥ᤺ᤰᤔᤠ ᤜᤢ᤹ᤔᤠᤛᤡ ᤁᤧᤗ᤹ᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤘᤕᤧ॥ 3 ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤃ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤐᤗᤡᤛ᤻ᤋᤡᤒᤠ ᤅᤠᤛᤡ ᤕᤢᤰᤛᤠᤒᤠᤜᤠ᤹. ᤁᤧᤖᤧᤰ ᤁᤏᤠᤏᤡᤜᤠ᤹. ᤛᤡᤍᤥᤏᤡ ᤏᤢ ᤗᤧᤒᤏᤠᤏᤒᤠ ᤁᤥ᤺ᤰᤔᤠᤜᤠ᤹ᤀᤥ ᤒᤠᤗ-ᤜᤣᤷᤔᤥᤏ ᤁᤥ᤺ᤰᤔᤠᤗᤠᤶ ᤗᤧᤒᤥ-ᤜᤔᤠᤋ ᤌᤠᤖᤡᤰ ᤁᤧᤕᤢᤱᤒᤠ ᤜᤡᤒ᤻ᤒᤡᤜᤠ᤹॥ 4 ᤂᤢᤏᤧ᤹ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠᤴ ᤔᤥᤛᤠᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤢᤛᤡᤒᤠ ᤀᤡᤱᤈᤠᤱᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤛᤠ᤹ᤔᤠᤖᤧ ᤗᤠᤃᤡ ᤘᤕᤧ॥ 5 ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤁᤏᤠᤏᤡ. ᤜᤡᤳᤋᤡ. ᤀᤣᤔᤥᤖᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ᤏᤢ ᤛᤥᤖᤡᤰ ᤕᤢᤱᤔᤠ ᤐᤥ᤺ᤰᤂᤧ. 6 ᤂᤧᤱᤜᤠ᤹ᤖᤧ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤔᤣ᤺ᤰᤂᤡᤶ ᤔᤧᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤴᤇᤢᤔᤠ ᤛᤠᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤏᤢ ᤔᤣ᤺ᤰᤂᤡᤶ ᤔᤧᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤠᤱᤜᤠ᤹ᤀᤠᤱ ᤛᤧᤘᤠ ᤔᤧᤵᤔᤠ ᤔᤧᤜᤣ᤺ᤰᤋᤢᤛᤡᤖᤥ॥ ᤀᤥᤳᤏᤡᤀᤣᤗᤧᤴ ᤀᤡᤛᤪᤠᤀᤡᤗᤀᤥ ᤂᤠᤛᤧᤴᤗᤥ᤺ᤶᤒᤠ ᤐᤥᤱ᤹ 7 ᤀᤠᤳᤋᤡᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤋᤠᤵᤑᤧ᤺ᤶᤒᤠ ᤆᤥᤃᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤠᤒᤠ ᤂᤧᤴ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤢ ᤜᤧᤰᤁᤩᤠᤱ ᤒᤠᤗ ᤔᤠᤱᤜᤠ᤹ ᤏᤢ ᤀᤛᤣᤖᤠ ᤛᤠᤶᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡ॥ 8 ᤀᤡᤛᤪᤠᤀᤡᤗᤡᤜᤠ᤹ᤏᤢ ᤘᤜᤘᤣ ᤍᤠᤱᤒᤧᤴ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤖᤠᤔ-ᤏᤠᤜᤠᤖᤤᤔᤒᤠ ᤜᤠᤱ ᤁᤢᤛᤏ-ᤖᤡᤛᤠᤋᤤᤔᤖᤧ ᤁᤢᤜᤢᤰᤁᤥ ᤛᤱᤄᤢᤛᤡ. ᤀᤡᤛᤪᤠᤀᤡᤗᤡᤜᤠ᤹ ᤕᤧᤳᤇᤡ ᤋᤱᤒᤣ ᤌᤠᤖᤡᤰ ᤁᤢᤛᤏ-ᤖᤡᤛᤠᤋᤤᤔᤖᤧ ᤁᤢᤕᤢᤰᤁᤥ ᤔᤧᤘᤕᤧ॥ 9 ᤁᤖ ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤓᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤁᤠᤗᤣᤒᤖᤧ ᤁᤢᤴᤛᤠ᤹ ᤁᤏᤈᤖᤧ ᤁᤢᤛ᤻ᤛᤠ ᤀᤥᤳᤏᤡᤀᤣᤗᤧᤴ ᤑᤥ᤺ᤰᤂᤢ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤱᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤧᤸᤗᤧᤀᤥ ᤕᤧ. ᤜᤧᤰᤁᤩᤠᤱ ᤂᤧᤴ ᤀᤡᤛᤪᤠᤀᤡᤗᤀᤥ ᤗᤠᤶᤗᤥᤒᤠ ᤐᤥ᤺ᤰᤂᤧ॥ ᤂᤧᤴ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤗ᤺ᤴᤍᤧ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤖᤠᤔᤒᤠ ᤜᤠᤱ ᤁᤢᤛᤏ-ᤖᤡᤛᤠᤋᤤᤔᤧᤴ ᤂᤧᤸᤗᤧ ᤁᤢᤜᤢᤰᤁᤥ ᤌᤠᤛᤢ॥ ᤀᤥᤳᤏᤡᤀᤣᤗᤖᤧ ᤂᤧᤴ ᤏᤠ᤺ᤴᤍᤢ॥ 11 ᤁᤶᤓᤗ᤹ᤖᤡᤰ ᤁᤏᤈᤖᤧ ᤁᤢᤛ᤻ᤛᤠ ᤀᤥᤳᤏᤡᤀᤣᤗᤧᤴ ᤔᤧᤴᤇᤡᤀᤣ ᤌᤠᤖᤡᤰ ᤗᤠᤈᤣ᤹ᤀᤥ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤛᤏᤠᤖᤢᤱ ᤐᤥ᤺ᤰᤂᤧᤖᤥ॥ ᤀᤣᤜᤢᤍᤧᤴ ᤀᤡᤛᤪᤠᤀᤡᤗᤒᤠ ᤂᤠᤛᤧᤴᤗᤥ᤺ᤶᤒᤠ ᤐᤥᤱ᤹ 12 ᤕᤠᤶᤔᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴ ᤔᤧᤈᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤀᤠᤒᤒᤠ ᤜᤠᤱ ᤀᤣᤃ᤻ᤗᤥᤏᤧᤴ ᤀᤡᤛᤪᤠᤀᤡᤗᤀᤥ ᤁᤧᤎᤢᤶᤒᤠ ᤆᤥᤃᤢ॥ 13 ᤀᤣᤃ᤻ᤗᤥᤏᤖᤧ ᤀᤶᤔᤥᤏᤡᤜᤠ᤹ ᤏᤢ ᤀᤔᤠᤗᤧᤁᤡᤜᤠ᤹ ᤌᤱᤗᤧ ᤗᤠᤃᤡ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤌᤱᤅᤥ ᤑᤵᤔᤠᤛᤡᤖᤧ ᤗᤠᤃᤡ ᤋᤃᤡ ᤔᤧᤎᤠᤛᤡᤱ. ᤂᤶᤓᤩᤠᤱ ᤂᤧᤒᤰᤛᤡᤱᤜᤠ᤹ ᤁᤧᤕᤢᤱᤒᤠ ᤕᤧᤰᤕᤰᤁᤡᤴ ᤜᤢᤰᤁᤥ ᤔᤧᤎᤠᤛᤢ॥ 14 ᤀᤡᤛᤪᤠᤀᤡᤗᤡᤜᤠ᤹ ᤌᤡᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ ᤌᤠᤖᤡᤰ ᤔᤥᤀᤠᤒᤒᤠ ᤜᤠᤱ ᤀᤣᤃ᤻ᤗᤥᤏᤖᤧ ᤁᤢᤕᤢᤰᤁᤥ ᤔᤧᤘᤕᤧ॥ 15 ᤕᤠᤶᤔᤥ ᤂᤧᤱᤜᤠ᤹ᤖᤧ ᤁᤢᤓᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤗᤳᤇᤠ ᤔᤏᤠ. ᤀᤡᤃᤪ ᤒᤣᤏᤩᤠᤔᤡᤏᤡ ᤃᤣᤖᤠ᤺ᤸᤗᤧ ᤁᤢᤛ᤻ᤛᤠ. ᤑᤧᤱᤜᤢᤁᤩᤠ ᤀᤣᤜᤢᤍᤧᤴ ᤂᤧᤱᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡᤖᤧ ᤗᤠᤃᤡ ᤑᤥ᤺ᤰᤂᤢ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤀᤠᤒᤒᤠ ᤜᤠᤱ ᤀᤣᤃ᤻ᤗᤥᤏᤀᤥ ᤂᤢᤴᤇᤡ᤹ ᤛᤢᤷᤋᤢᤰ ᤜᤢᤱᤛᤧ ᤔᤧᤒᤠᤱᤄᤢᤔᤧᤍᤣᤛᤢ॥ 16 ᤀᤣᤜᤢᤍᤖᤧ ᤀᤠᤵᤑᤣᤰ ᤁᤢᤗᤠᤃᤡ ᤜᤢᤰᤛᤡᤰᤌᤡᤰ ᤕᤠᤖᤡᤰ ᤁᤣ᤺ᤶᤒᤠ ᤏᤧᤵᤔᤠᤱ ᤗᤧᤵᤔᤠᤱ ᤁᤢᤕᤠ ᤁᤧᤒᤵᤐᤠ ᤋᤠᤓᤣᤎᤡᤰ ᤁᤢᤈᤢᤰᤘᤠ ᤁᤢᤃᤧᤱᤅᤥᤏᤢ ᤁᤢᤗᤠᤱ ᤛᤧᤒᤱᤒᤥ ᤁᤢᤍᤣ᤺ᤳᤋᤡᤸᤗᤧ ᤋᤧᤵᤋᤢᤀᤠᤱ ᤜᤣ᤹ᤛᤡᤱ॥ 17 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤥᤀᤠᤒᤒᤠ ᤜᤠᤱ ᤀᤣᤃ᤻ᤗᤥᤏᤀᤥ ᤀᤣ᤺ᤱ ᤋᤣ᤹ᤖᤢᤀᤠᤱ ᤐᤣ॥ ᤀᤣᤃ᤻ᤗᤥᤏᤧᤴ ᤛᤠ᤹ᤖᤡᤰ ᤁᤧᤔᤧ᤹ᤒᤠ ᤔᤏᤠ ᤘᤕᤧ॥ 18 ᤀᤣᤜᤢᤍᤖᤧ ᤀᤣ᤺ᤱᤕᤠᤱᤅᤡᤴ ᤋᤥ᤺ᤴᤍᤢ ᤛᤢᤖᤢᤀᤠᤱ ᤂᤧᤸᤗᤧ ᤀᤣ᤺ᤱ ᤁᤧᤒᤱᤒᤠ ᤁᤧᤓᤧᤵᤐᤠ ᤔᤏᤠᤴ ᤐᤠᤱᤄᤢᤍᤣᤛᤢ॥ 19 ᤂᤢᤏᤧ᤹ᤃ ᤃᤡᤗᤃᤠᤗᤀᤥ ᤁᤧᤕᤢᤱᤒᤠ. ᤏᤠᤘᤠᤀᤡᤳᤗᤠᤜᤠ᤹ ᤁᤧᤕᤢᤱᤒᤠᤍᤧᤴᤀᤥᤗᤠᤶ ᤏᤢ᤺ᤰᤂᤧᤓᤧᤖᤧ. ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢ. “ᤐᤕᤶ ᤜᤠᤱᤅᤣ. ᤀᤠᤱᤃᤠ᤹ ᤀᤠᤍᤠᤱᤒᤠ ᤛᤫᤠ᤺ᤳᤋᤠᤱ ᤌᤧᤔᤠᤀᤡ ᤔᤧᤵᤔᤠ ᤁᤳᤏᤧ॥” ᤂᤧᤒᤩᤠᤱ ᤀᤣᤃ᤻ᤗᤥᤏᤖᤧ ᤔᤧᤶᤒᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤀᤠᤱ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤗᤠ᤺ᤰᤁᤠᤳ ᤐᤠᤱᤄᤢᤛᤡ॥ 20 ᤀᤠᤸᤗ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤁᤦᤛᤡᤀᤥ ᤛᤢᤛᤢ ᤁᤧᤗ᤹ᤒᤠ ᤕᤠᤰᤑᤠᤱᤅᤥ ᤕᤢᤅᤧᤃᤖᤧᤸᤗᤧ ᤀᤣᤜᤢᤍᤧᤴ ᤁᤢᤒᤣᤛᤠᤱ ᤑᤧᤖᤧᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤗᤠᤶ ᤀᤠᤍᤠᤱᤒᤠ ᤀᤠᤱᤃᤠ᤹ ᤌᤧᤔᤠᤀᤡ ᤔᤧᤵᤔᤠ ᤐᤠᤴ ᤘᤠ᤹॥” 21 ᤂᤧᤒᤩᤠᤱ ᤀᤣᤃ᤻ᤗᤥᤏᤧᤴ ᤂᤢᤏᤧ᤹ ᤁᤢᤕᤢᤰᤏᤠᤀᤥᤗᤠᤶ ᤐᤥᤃᤧ. ᤜᤧᤰᤁᤩᤠᤱ ᤀᤣᤜᤢᤍᤖᤧ ᤂᤢᤏᤧ᤹ ᤁᤢᤓᤧᤱᤘᤠ ᤜᤢᤰᤁᤡᤸᤗᤧ ᤁᤢᤈᤢᤰᤘᤠ ᤁᤢᤗᤠᤱᤛᤧᤒᤱᤒᤠ ᤗᤧᤵᤔᤠᤱ ᤁᤧᤒᤵᤐᤠ ᤋᤠᤓᤣᤴ ᤗ᤺ᤳᤋᤢᤀᤠᤱ ᤂᤢᤏᤧ᤹ ᤁᤢᤛᤠᤵᤐᤥ᤺ᤰᤁᤥ ᤑᤏ᤹ ᤌᤢᤒᤢ॥ 22 ᤋᤠᤓᤣᤴ ᤁᤢᤗᤠ᤺ᤴᤏᤢ ᤛᤥᤖᤡᤰ ᤗᤠᤛᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤣ᤺ᤰᤁᤥ ᤐᤷᤍ᤹ ᤗ᤺ᤴᤍᤧ॥ ᤁᤢᤛᤥ᤺ᤳᤋᤡᤸᤗᤧ ᤋᤠᤓᤣᤴ ᤆᤡᤒᤴ ᤐᤴᤇᤢ॥ ᤂᤢᤏᤧ᤹ ᤋᤠᤓᤣᤴ ᤔᤧᤗ᤺ᤳᤋᤢᤴ. ᤁᤖ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤗᤧᤖᤢᤎ॥ 23 ᤂᤧᤒᤩᤠᤱ ᤀᤣᤜᤢᤍᤖᤧ ᤕᤠᤰᤑᤠᤱᤅᤥᤒᤠ ᤗᤠᤶᤎᤣ᤺ᤳᤜᤠ᤹ ᤛᤢᤒᤢᤀᤠᤱ ᤀᤧᤳᤋᤢᤎ ᤜᤧᤰᤁᤩᤠᤱ ᤗᤰᤂᤢᤶᤔᤥ ᤌᤠᤛᤡᤱ ᤕᤧ॥ 24 ᤀᤠᤸᤗ ᤂᤢᤏᤧ᤹ ᤗᤠ᤺ᤰᤁᤠᤳ ᤗ᤺ᤴᤍᤧ ᤆᤢᤖᤧᤀᤠᤱ ᤀᤣᤃ᤻ᤗᤥᤏᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤛᤡᤃᤠᤱ ᤔᤧᤗᤠᤛᤧ. ᤂᤧᤒᤩᤠᤱ ᤗᤠᤶᤎᤣ᤺ᤳᤜᤠ᤹ᤀᤥ ᤋᤡᤔᤡᤰ ᤐᤳᤇᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤜᤠᤱᤅᤡᤴ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤛᤢᤛᤢ ᤁᤧᤗ᤹ᤒᤠ ᤌᤠ᤺ᤱᤛᤔᤠ ᤕᤠᤰᤑᤠᤱᤅᤥ ᤐᤠᤜᤠᤖᤠ ᤕᤢᤱᤛᤡᤱᤅᤠᤱ ᤕᤢᤱᤒᤡᤗᤠ॥” 25 ᤕᤖᤡᤰ ᤕᤧᤶ ᤌᤠᤖᤡᤰ ᤂᤧᤱᤜᤠ᤹ᤖᤧ ᤔᤧᤜᤠᤱᤄᤢᤀᤠᤱ ᤔᤧᤕᤢᤅᤧᤸᤗᤧ ᤂᤢᤴᤇᤡ᤹ ᤏᤡᤱᤛᤡᤛᤡ ᤗ᤹ᤖᤧ. ᤜᤧᤰᤁᤣᤛᤠᤱ ᤀᤣᤃ᤻ᤗᤥᤏᤖᤧ ᤌᤠ᤺ᤱᤛᤔᤠ ᤕᤠᤰᤑᤠᤱᤅᤥᤒᤠ ᤗᤠᤶᤎᤣ᤺ᤳᤜᤠ᤹ ᤔᤧᤴᤜᤴᤍᤢᤴ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤋᤡᤔᤡᤰᤜᤠ᤹ ᤔᤧᤍᤣ᤹ᤖᤢᤀᤠᤱ ᤗᤠᤶᤎᤣ᤺ᤳᤜᤠ᤹ ᤔᤧᤜᤴᤍᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤍᤠᤱᤒᤠᤴ ᤂᤠᤶᤒᤠᤱᤅᤥ ᤛᤩᤧᤀᤠᤱ ᤏᤧᤛ᤻ᤛᤧᤒᤠ ᤔᤧᤍᤢᤔᤢ॥ 26 ᤂᤧᤱᤜᤠ᤹ᤖᤧ ᤔᤧᤜᤠᤱᤄᤢᤀᤠᤱ ᤔᤧᤕᤢᤅᤧᤸᤗᤧ ᤀᤣᤜᤢᤍᤧᤴ ᤑᤡ᤺ᤴᤇᤡᤱᤅᤠᤱ ᤂᤧᤳᤇᤡᤱ॥ ᤂᤢᤏᤧ᤹ ᤏᤠᤘᤠᤀᤡᤳᤗᤠᤜᤠ᤹ ᤁᤧᤕᤢᤱᤒᤠᤍᤧᤴ ᤗᤠᤶᤒᤠ ᤗᤡ᤺ᤴᤇᤡᤱ ᤐᤣᤀᤠᤱ ᤛᤡᤖᤠ ᤔᤧᤵᤔᤏᤠᤒᤠ ᤋᤧᤴᤏᤥ ᤁᤧᤖᤧ॥ 27 ᤜᤧᤰᤁᤩᤠᤱ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤁᤧᤖᤧᤀᤠᤱ ᤂᤢᤏᤧ᤹ ᤛᤠᤍᤠᤱᤅᤡᤴ ᤔᤢ᤺ᤳᤋᤢ. ᤂᤶᤓᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤁᤥ᤺ᤰᤔᤠᤀᤥᤗᤠᤶ ᤂᤢᤏᤧ᤹ᤏᤢ ᤔᤧᤕᤧᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤋᤃᤡ ᤋᤣ᤹ᤖᤢᤛᤡ॥ 28 ᤀᤣᤜᤢᤍᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤀᤣᤃᤠᤱ ᤑᤧᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤏᤡᤱᤔᤡ ᤔᤥᤀᤠᤒᤡᤜᤠ᤹ ᤂᤡᤏᤡ᤹ ᤜᤢᤰᤁᤧᤛᤢᤵᤋᤡᤀᤠᤱ ᤘᤠ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤔᤧᤎᤠᤛᤡᤱᤅᤠᤱ ᤔᤧᤕᤧ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤥᤀᤠᤒ ᤁᤳᤏᤠᤜᤠᤱ ᤕᤷᤍᤏ ᤘᤜ᤺ᤱ ᤁᤢᤕᤠᤀᤥᤒᤠ ᤗᤢᤱᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤀᤠᤳᤋᤡᤴᤜᤠ᤹ᤀᤠᤱ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠ ᤔᤧᤶᤓᤠ᤺ᤰᤋᤢᤛᤡᤴ॥ 29 ᤂᤧᤱᤜᤠ᤹ᤖᤧ ᤂᤧᤸᤗᤧ ᤕᤠ᤺ᤴᤍᤡᤰ ᤂᤵᤔᤧᤴ ᤜᤧᤴᤇᤡᤱ ᤌᤡᤒᤥᤱ ᤔᤥᤀᤠᤒᤡᤜᤠ᤹ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ ᤁᤧᤖᤧᤰ ᤁᤧᤎᤢᤶᤒᤠ ᤏᤢ ᤔᤢᤰᤁᤧᤃᤢᤒᤠ ᤕᤧᤶᤒᤡᤳᤇᤠ ᤔᤧᤘᤕᤧ॥ ᤗᤳᤇᤠᤀᤠᤱ ᤂᤧᤳᤇᤡᤱᤔᤠ ᤔᤧᤱᤄᤥᤛᤧᤴ॥ 30 ᤁᤶᤓᤗ᤹ᤖᤡᤰ ᤂᤧᤸᤗᤧ ᤕᤠ᤺ᤴᤍᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤀᤠᤒᤧᤴ ᤂᤢᤴᤇᤡ᤹ ᤕᤢᤰᤁᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤕᤧᤵᤐᤥᤱ ᤋᤱᤒᤣ ᤌᤠᤖᤡᤰ ᤛᤏᤠᤖᤢᤱ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧᤖᤥ॥ ᤛᤔᤃᤖᤧᤴ ᤀᤡᤛᤪᤠᤀᤡᤗᤀᤥ ᤂᤠᤛᤧᤴᤗᤥ᤺ᤶᤒᤠ ᤐᤥᤱ᤹ 31 ᤀᤣᤜᤢᤍᤖᤧ ᤁᤢᤀᤣᤃᤠᤱ ᤀᤏᤠᤋᤖᤧ ᤁᤢᤛ᤻ᤛᤠ ᤛᤔᤃᤖᤧᤴ ᤗᤠᤶᤗᤥᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤁᤡᤵ ᤋᤢᤰᤛᤡ ᤐᤗᤡᤛ᤻ᤋᤡᤜᤠ᤹ ᤐᤡᤳ ᤏᤠ᤺ᤵᤔᤠ ᤋᤰᤁᤠ᤺ᤳᤋᤡᤸᤗᤧ ᤛᤧᤖᤢᤛᤡ॥ ᤂᤧᤸᤗᤧᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.