ᤂᤠᤛᤧᤴᤗᤥ᤺ᤶᤒᤠ 21 - LIFOTNTᤁᤧᤜᤡᤱᤒᤠ ᤒᤣᤏᤩᤠᤔᤡᤏᤡ ᤌᤠ᤺ᤰᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤔᤣ᤺ᤳᤜᤠ᤹ 1 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤛ᤻ᤐᤠᤀᤥ ᤀᤰᤋᤱᤒᤠ ᤔᤠᤱᤜᤧᤰ ᤔᤧᤈᤥᤃᤢᤀᤠᤱ ᤘᤕᤧ. “ᤀᤠᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤠᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤒᤣᤏᤩᤠᤔᤡᤏᤡᤜᤠ᤹ ᤔᤣ᤺ᤰᤂᤡᤶᤗᤧ ᤗᤠᤃᤡ ᤐᤡᤖᤢᤶᤛᤡᤶ ᤔᤣ᤺ᤴ॥” 2 ᤜᤧᤰᤁᤩᤠᤱ ᤔᤏᤠᤜᤠ᤹ ᤒᤣᤌᤣᤗ ᤔᤧᤒᤣᤀᤠᤱ ᤕᤢ᤺ᤴᤇᤡᤰ ᤌᤠᤖᤡᤰᤁᤣ ᤂᤧᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤧᤕᤢᤅᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤰᤁᤠᤱ ᤀᤢ᤺ᤰ ᤔᤧᤜᤠᤒᤧ॥ 3 ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤌᤣᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤒᤣ᥅ ᤌᤣᤀᤠᤱ ᤀᤠᤀᤡᤴᤒᤠ ᤕᤧᤴᤏᤥ ᤀᤡᤛᤪᤠᤀᤡᤗᤒᤠ ᤌᤠ᤺ᤰ ᤌᤡᤰ ᤔᤕᤧᤒᤣᤒᤠᤒᤣ᥅” 4 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤔᤏᤠᤜᤠ᤹ ᤀᤠᤴᤍᤣᤴ ᤔᤧᤒᤥᤃᤧ. ᤜᤧᤰᤁᤩᤠᤱ ᤂᤧᤵᤔᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤔᤧᤈᤥᤃᤢᤀᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤏᤢ ᤋᤱᤈᤢᤶ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ 5 ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤒᤠ ᤁᤢᤓᤠ ᤌᤠ᤺ᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤴᤍᤩᤧᤏᤧᤶᤒᤡ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤛᤣ᤺ᤴᤔᤧᤍᤥᤛᤡᤱ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤴᤈᤢᤶᤔᤏᤠᤒᤠᤴ ᤛᤧᤵᤔᤠᤀᤣ ᤐᤥᤱ᤹ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤡᤛ᤻ᤐᤠᤀᤥ ᤁᤧᤛᤠᤰᤐᤠ ᤔᤠᤱᤜᤧᤰ ᤔᤧᤈᤥᤃᤢᤀᤠᤱ ᤘᤕᤧ॥ 6 ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤀᤡᤴᤒᤠ ᤕᤧᤴᤏᤥ ᤀᤡᤛᤪᤠᤀᤡᤗᤀᤥ ᤌᤠ᤺ᤰ ᤌᤡᤰᤁᤣ ᤔᤕᤧᤒᤣᤖᤥ॥” 7 ᤂᤧᤱᤜᤠ᤹ ᤛᤣ᤺ᤴᤔᤧᤍᤥᤛᤡᤱ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤔᤣ᤺ᤰᤂᤡᤶᤗᤧ ᤗᤠᤃᤡ ᤂᤧᤱᤜᤠ᤹ ᤐᤡᤔᤠᤛᤡ ᤔᤣ᤺ᤴ ᤑᤠ᤹ᤀᤠᤱ ᤔᤠᤱᤜᤧᤰ ᤀᤠᤈᤥᤃᤢᤶᤔᤠᤱ ᤘᤕᤧ॥ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤔᤣ᤺ᤳ ᤁᤥ᤺ᤵᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤀᤠᤏᤡ᤹ ᤌᤣ ᤆᤥ᤺ᤰᤔᤠ ᤐᤡᤔᤠᤛᤡ ᤀᤠᤛᤢᤰᤋᤢᤶᤒᤣ᥅” 8 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢᤛᤡ. “ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤗᤠᤶ ᤕᤜᤘᤣ ᤍᤠᤱᤒᤠᤀᤥ ᤔᤡᤛ᤻ᤐᤠ ᤔᤧᤶᤒᤣ᤺ᤰᤔᤏᤠᤒᤠ ᤁᤢᤓᤠ ᤔᤧᤘᤠ᤹ᤒᤡ᥅” ᤜᤧᤰᤁᤩᤠᤱ ᤕᤠᤒᤣᤛ-ᤃᤡᤗᤠᤍᤗᤠᤶ ᤀᤠᤳᤋᤡᤴᤜᤠ᤹ᤀᤠᤱ ᤆᤢᤶᤗᤢᤱᤗᤧ ᤗᤠᤃᤡ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤶᤓᤧᤖᤧᤴᤗᤳᤇ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ॥ 9 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤏᤡᤖᤢᤛᤡᤸᤗᤧ ᤕᤠᤒᤣᤛ ᤃᤡᤗᤠᤍᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤓᤧᤖᤧᤒᤠ ᤔᤧᤱᤄᤥᤛᤢᤛᤡᤴ॥ 10 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤈᤢᤶᤓᤥᤜᤠ᤹ᤖᤧ ᤕᤠᤒᤣᤛ ᤃᤡᤗᤠᤍᤒᤠ ᤕᤧᤶᤒᤡᤳᤇᤠ. ᤔᤧᤴᤇᤢᤔᤠ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤋᤠᤓᤣ᤺ᤸᤗᤧ ᤛᤧᤵᤔᤠᤛᤡᤖᤧ ᤗᤠᤃᤡ ᥇᥈.᥆᥆᥆ ᤌᤰᤗᤡᤜᤠᤱᤜᤠ᤹ ᤀᤡᤱᤈᤠᤱ ᤔᤧᤒᤡᤖᤢᤛᤡᤀᤠᤱ ᤔᤧᤒᤠᤱᤄᤢᤛᤡ॥ 11 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤜᤧᤰᤁᤩᤠᤱ ᤕᤧᤶᤒᤡᤳᤇᤠᤏᤢ ᤁᤧᤀᤡᤶᤔᤠ ᤔᤧᤴᤇᤢᤔᤠᤜᤠ᤹ ᤛᤧᤖᤧᤶᤛᤡᤶᤔᤧ᤹. ᤁᤖ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ᤃ ᤗᤧᤖᤧᤶᤛᤡᤶᤔᤧ᤹॥” 12 ᤂᤧᤱᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤕᤠᤒᤣᤛ-ᤃᤡᤗᤠᤍ ᤁᤧᤕᤢᤱᤒᤠᤜᤠ᤹ᤀᤥ ᤁᤡᤵ ᤗᤡᤛᤡ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤔᤧᤍᤢᤔᤢᤛᤡ. ᤂᤧᤱᤜᤠ᤹ ᤀᤠᤳᤋᤡᤴ ᤕᤧᤶᤒᤡᤳᤇᤠᤜᤠ᤹ᤏᤢᤀᤠᤱ ᤔᤧᤴᤀᤡᤶᤔᤣ ᤔᤧᤘᤕᤧ॥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤁᤴᤜᤠ᤹ ᤁᤏᤠᤏ ᤛᤡᤗᤥᤒᤠ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤔᤧᤍᤠᤖᤢᤛᤡ॥ 13 ᤂᤧᤒᤩᤠᤱ ᤁᤧᤖᤧᤰ ᤕᤧᤈᤢᤶᤓᤥᤜᤠ᤹ᤖᤧ ᤖᤡᤶᤔᤥᤏᤒᤠ ᤕᤠᤰᤐᤣ᤹ᤀᤥ ᤁᤧᤕᤠᤰᤐᤠ ᤒᤣᤏᤩᤠᤔᤡᤏᤡᤜᤠ᤹ ᤋᤱᤔᤠ ᤐᤠᤴ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤀᤡᤱᤄᤱ ᤔᤧᤜᤠᤰᤋᤢᤛᤡ॥ 14 ᤁᤸᤗᤧᤆᤥᤃᤢᤸᤗᤧ ᤒᤣᤏᤩᤠᤔᤡᤏᤡᤜᤠ᤹ ᤔᤧᤏᤢ᤺ᤰᤂᤧ ᤔᤧᤕᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤠᤱᤄᤢᤛᤡᤀᤠᤱ ᤁᤧᤘᤠ᤹ᤔᤠ ᤂᤧᤴ ᤕᤠᤒᤣᤛ ᤃᤡᤗᤠᤍᤒᤠ ᤔᤧᤴᤇᤢᤔᤠᤜᤠ᤹ ᤂᤧᤱᤜᤠ᤹ ᤔᤧᤒᤡᤖᤢᤛᤡ. ᤁᤖ ᤂᤧᤱᤜᤠ᤹ ᤁᤴ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤍᤧᤰᤋᤢᤛᤡᤴ॥ 15 ᤔᤏᤠᤜᤠ᤹ ᤀᤠᤸᤗᤛᤠᤱ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤡᤱᤘᤠ᤹ ᤋᤢᤃᤧᤖ ᤘᤕᤧ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤀᤥ ᤁᤴ ᤗᤠ᤺ᤳᤗᤠ᤺ᤳ ᤐᤥᤱᤔᤠ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤀᤠᤱ ᤘᤕᤧ॥ 16 ᤜᤧᤰᤁᤩᤠᤱ ᤕᤧᤈᤢᤶᤓᤥᤀᤥ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤒᤣᤏᤩᤠᤔᤡᤏ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ᤃ ᤔᤧᤛᤧᤖᤢᤛᤡ ᤔᤣ᤺ᤳᤗᤧ ᤔᤧᤴᤍᤧᤰᤔᤏᤠᤒᤠᤜᤠ᤹ ᤔᤣ᤺ᤳ ᤁᤥ᤺ᤵᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤀᤠᤏᤡ᤹ ᤌᤣ ᤀᤠᤈᤥᤃᤢᤶᤒᤠᤒᤣ᥅” 17 ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤧᤄᤧᤳᤇᤡᤱᤒᤠᤀᤠᤱ ᤁᤧᤜᤡᤱᤒᤠ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤧᤄᤥᤒᤠ ᤔᤧᤘᤠ᤹ᤖᤀᤣ ᤐᤥᤱ᤹. ᤔᤣ᤺ᤴᤏᤧᤓᤃᤪ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤀᤥᤗᤠᤶ ᤗᤳᤇᤠ ᤌᤠ᤺ᤰᤁᤡᤸᤗᤧ ᤁᤢᤔᤡᤱ ᤔᤠᤒᤣ᤺ᤰ॥ 18 ᤀᤠᤏᤡ᤹ ᤀᤠᤵᤑᤣᤰ ᤔᤧᤴᤇᤢᤔᤠ ᤛᤠᤜᤠ᤹ ᤂᤧᤱᤜᤠ᤹ᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤵᤔᤠ ᤀᤠᤴᤇᤢᤰᤋᤢᤶᤛᤡᤶᤔᤧᤴ. ᤌᤣᤀᤠᤱᤓᤧᤸᤗᤧ ᤒᤣᤏᤩᤠᤔᤡᤏᤡ᤺ᤴᤏᤢ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤣ᤺ᤰᤂᤡᤶ ᤁᤧᤔᤧᤵᤐᤠ ᤔᤏᤠᤀᤥ ᤔᤠᤱᤍᤣ ᤛᤠᤱᤃᤪᤠ ᤌᤠ ᤑᤠ᤹ᤀᤠᤱ ᤔᤠᤱᤜᤧᤰ ᤀᤠᤈᤥᤃᤢᤶᤔᤠᤱ ᤘᤠ᤹॥” 19 ᤂᤧᤒᤩᤠᤱ ᤒᤣᤌᤣᤗ ᤌᤠᤱᤃᤧᤳ ᤐᤡᤛᤠᤱ. ᤒᤣᤌᤣᤗᤗᤠᤶ ᤛᤣᤁᤣᤔ ᤐᤣ᤺ᤰᤔᤠ ᤔᤠᤖᤠᤶᤔᤥᤏᤢ ᤏᤠᤱᤃᤧᤴ ᤗᤧᤵᤔᤠᤱ ᤜᤧᤰᤁᤩᤠᤱ ᤗᤒᤥᤏᤠᤒᤠ ᤗᤠᤱᤃᤧᤳ ᤗᤧᤵᤔᤠᤱ ᤛᤡᤗᤥᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤱᤒᤣ ᤌᤰᤔᤠ ᤁᤧᤍᤠᤒᤠ ᤋᤱᤏᤠᤶᤔᤡᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤛᤢᤶᤗ᤹ᤖᤧ॥ 20 ᤁᤸᤗᤧᤆᤥᤃᤢᤸᤗᤧ ᤒᤣᤏᤩᤠᤔᤡᤏᤡᤜᤠ᤹ ᤔᤧᤔᤧᤳᤋᤢᤛᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥ ᤆᤡᤱᤅᤠᤛᤡᤶᤔᤧᤀᤠᤱ ᤕᤢᤅᤧᤶᤔᤧ᤹॥ 21 ᤜᤧᤰᤁᤩᤠᤱ ᤛᤡᤗᤥᤒᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤗᤠ᤺ᤱᤛᤧ ᤔᤧᤍᤠ᤺ᤸᤗᤧ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥᤗᤠᤶ ᤂᤡᤏᤡ᤹ ᤗᤡᤃᤰ ᤗ᤺ᤴᤍᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤣ᤺ᤳ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤗᤳᤇᤠ ᤗᤳᤇᤠ ᤔᤧᤴᤇ᤻ᤕᤠ ᤋᤧᤶᤛᤧᤶᤛᤡᤶᤔᤧ᤹॥ ᤂᤧᤒᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤜᤡᤶ ᤒᤣᤏᤩᤠᤔᤡᤏᤖᤧ ᤁᤢᤗᤠᤈᤣ᤹ ᤗᤧᤵᤔᤠᤱ ᤐᤣᤃᤧᤶᤔᤧ᤹॥ 22 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤜᤠ᤹ ᤀᤡᤃᤪ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤍᤠᤀᤠᤱ ᤀᤠᤏᤡᤃᤣ ᤔᤧᤔᤧᤳᤋᤡᤃᤧᤏᤧᤓᤃᤪ. ᤀᤠᤏᤡᤃᤣ ᤔᤧᤳᤋᤢᤶᤛᤡᤶᤒᤧ. ‘ᤀᤠᤏᤡᤃᤣ ᤐᤣᤗᤡᤴ ᤂᤧᤵᤛᤠᤶᤔᤧ᤹ᤀᤠᤱ ᤂᤧᤱᤜᤠ᤹ ᤑᤠ᤹ᤖᤧᤶᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤌᤱᤅᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤣ᤺ᤳ ᤀᤠᤏᤡᤃᤣ ᤋᤠ᤺ᤵᤔᤠ ᤐᤡᤔᤠᤛᤡ ᤔᤧᤛᤢᤰᤋᤢᤶᤒᤧᤴ॥ ᤂᤡᤏᤡ᤹ ᤁᤢᤍᤥ᤺ᤵᤔᤠ ᤁᤧᤈᤥᤃᤡ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤁᤴᤜᤠ᤹ ᤁᤧᤶᤒᤡᤖᤢᤶᤛᤡᤶᤔᤡᤴ॥’” 23 ᤂᤧᤸᤗᤧᤆᤥᤃᤢᤸᤗᤧ ᤔᤧᤴᤇ᤻ᤕᤠᤜᤠ᤹ ᤔᤧᤗᤠ᤺ᤰᤂᤧᤖ ᤔᤧᤕᤠᤃᤧᤒᤠ ᤕᤧᤶᤔᤥ ᤒᤣᤏᤩᤠᤔᤡᤏᤡ ᤕᤧᤶᤒᤡᤳᤇᤠ ᤁᤧᤖᤧᤰᤗᤧ ᤀᤠᤵᤑᤣᤰ ᤀᤠᤵᤑᤣᤰ ᤔᤣ᤺ᤳ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤗᤳᤇᤠ ᤗᤳᤇᤠ ᤔᤧᤴᤇ᤻ᤕᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ॥ ᤂᤧᤴ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤈᤥᤃᤢ॥ ᤂᤧᤒᤩᤠᤱ ᤂᤢᤴᤇᤡ᤹ ᤗᤠᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤗᤧᤵᤔᤠᤱᤒᤠ ᤕᤠᤱᤛᤠᤁᤢᤴᤎᤣ ᤁᤧᤏᤧᤒᤠᤍᤧᤴᤏᤥ ᤔᤧᤒᤣᤀᤠᤱ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤕᤠᤶᤔᤥ ᤔᤧᤈᤥᤃᤢ. ᤂᤶᤓᤩᤠᤱ ᤂᤧᤵᤔᤥ ᤔᤧᤕᤢᤅᤧ॥ 24 ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤡᤜᤠ᤹ᤀᤠᤱ ᤀᤠᤵᤑᤣᤰ ᤀᤠᤵᤑᤣᤰ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤏᤢ ᤜᤡᤶᤛᤕᤱᤜᤠ᤹ ᤔᤧᤛᤧᤖᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤐᤠᤏᤢᤍᤡᤱ ᤐᤠᤗᤧᤵᤔᤠᤱᤒᤠ ᤕᤠᤱᤛᤠᤁᤢᤴᤎᤣ ᤁᤧᤏᤧᤒᤠᤍᤧᤴᤏᤥ ᤔᤧᤒᤣ॥ 25 ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤜᤠ᤺ᤳᤋᤠᤱ ᤜᤠᤱ ᤜᤥ᤺ᤵᤋᤧ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.