ᤂᤠᤛᤧᤴᤗᤥ᤺ᤶᤒᤠ 20 - LIFOTNTᤀᤡᤛᤪᤠᤀᤡᤗᤡᤜᤠ᤹ ᤏᤢ ᤒᤣᤏᤩᤠᤔᤡᤏ ᤌᤠ᤺ᤰᤜᤠ᤹ ᤌᤱ ᤔᤧᤈᤥᤰ 1 ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹. ᤍᤠᤏᤗᤠᤶ ᤒᤣᤷᤛᤣᤒᤠ ᤌᤠᤖᤡᤰᤐᤠ ᤂᤰᤐᤧᤳ ᤛᤱᤈᤢᤶᤓᤥᤜᤠ᤹. ᤜᤧᤰᤁᤩᤠᤱ ᤃᤡᤗᤠᤍ ᤗᤠᤶᤒᤠᤀᤠᤱ ᤗᤳᤇᤠ ᤔᤏᤠ ᤁᤢᤀᤡᤛᤡᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤜᤡᤶᤔᤥᤗᤠᤶ ᤔᤧᤗ᤺ᤴᤍᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤡᤛ᤻ᤐᤠ ᤔᤧᤈᤢᤵᤛᤧ॥ 2 ᤀᤡᤛᤪᤠᤀᤡᤗᤡ ᤌᤠ᤺ᤰᤁᤥᤒᤠᤜᤠ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹. ᤋᤠᤓᤣ ᤁᤧᤜᤣᤒᤠ ᥊.᥆᥆.᥆᥆᥆ ᤌᤰᤗᤡᤜᤠᤱᤜᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤢᤶᤗᤢᤱᤅᤥ ᤔᤧᤈᤢᤵᤛᤧ॥ 3 (ᤒᤣᤏᤩᤠᤔᤡᤏᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛ᤻ᤐᤠ ᤔᤧᤒᤣᤀᤠᤱ ᤔᤧᤕᤠᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ॥) ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢᤛᤡ. “ᤀᤥᤔᤧᤳᤋᤧ᤹. ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤑᤧᤴᤕᤠ᤺ᤶᤒᤰ ᤀᤠᤰᤂᤣᤀᤠᤱ ᤐᤥ᤺ᤰᤂᤧᤒᤣ᥅” 4 ᤁᤸᤗᤧᤆᤥᤃᤢᤸᤗᤧ ᤂᤧᤴ ᤔᤧᤛᤧᤖᤢᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤕᤧᤶᤒᤠ ᤗᤧᤒᤡ᤺ᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤢ ᤀᤠᤈᤰᤔᤣ᤺ᤳᤋᤧᤴ ᤛᤧᤴᤍᤡᤰ ᤕᤠᤱᤎᤥ᤺ᤰᤔᤠᤖᤧ ᤗᤠᤃᤡ ᤒᤣᤏᤩᤠᤔᤡᤏ ᤃᤡᤒᤠ ᤑᤧᤖᤧᤛᤡᤃᤧᤀᤠᤱ ᤘᤕᤧᤛᤡᤃᤧ॥ 5 ᤂᤧᤴ ᤛᤧᤴᤍᤡᤰ ᤃᤡᤒᤠ ᤁᤧᤕᤢᤱᤒᤠᤜᤠ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤧᤒᤥᤃᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤧᤛ᤻ᤛᤠᤱᤒᤠ ᤜᤡᤶᤔᤡᤴ ᤁᤡᤷᤃᤵ ᤔᤧᤃᤒᤢ. ᤀᤠᤱᤃᤠ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤈᤰᤔᤣ᤺ᤳᤋᤧᤴ ᤔᤣ᤺ᤳ ᤔᤧᤔᤧᤳᤋᤢᤀᤠᤱ ᤂᤧᤴ ᤛᤩᤧ॥ 6 ᤀᤠᤱᤃᤠ᤹ ᤂᤧᤸᤗᤧ ᤁᤢᤈᤣᤴ ᤋᤣ᤹ᤖᤢᤱᤅᤠᤱ ᤁᤢᤃᤠᤰᤔᤠ ᤁᤢᤃᤠᤰᤔᤠ ᤐᤠᤰᤗᤧ ᤐᤠᤰᤗᤧ ᤆᤩᤧᤵᤋᤢᤱ. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤐᤡᤛᤠᤱ ᤜᤠᤅᤢᤱᤍᤣᤛᤢᤱ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤀᤥ ᤀᤰᤋᤱᤒᤠ ᤑᤧᤴᤕᤠ᤺ᤶᤒᤰ ᤏᤢ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤘᤕᤧ॥ 7 ᤀᤠᤸᤗ ᤂᤡᤏᤡ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤐᤠᤖᤧᤶᤔᤧ᤹ᤀᤠᤱ ᤛᤢᤈᤠ ᤃᤠᤶᤔᤡ ᤀᤠᤒᤡᤖᤧᤶᤔᤧ᤹॥” 8 ᤂᤧᤒᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤗᤳᤇᤠ ᤔᤏᤠ ᤁᤢᤀᤡᤛᤡᤰ ᤔᤧᤕᤧᤶᤛᤡᤱᤅᤠᤱ ᤔᤧᤒᤠ᤺ᤳᤋᤢ. “ᤀᤠᤏᤡᤃᤧᤀᤥᤗᤠᤶ ᤗᤳᤇᤠᤀᤠᤱ ᤜᤡᤶᤔᤥ ᤔᤧᤏᤢ᤺ᤰᤂᤡᤃᤧᤴ ᤔᤧᤒᤣᤃᤡᤃᤧᤴ. ᤗᤳᤇᤠᤀᤠᤱ ᤜᤡᤶᤔᤥ ᤔᤧᤏᤢ᤺ᤰᤂᤡᤃᤧᤴ ᤔᤧᤒᤣᤃᤡᤃᤧᤴ॥ 9 ᤀᤠᤸᤗ ᤃᤡᤒᤠ᤺ᤴ ᤀᤠᤏᤡᤃᤣ ᤀᤰᤂᤣ ᤔᤧᤳᤋᤢᤶᤒᤧ. ᤋ᤹ᤕᤠ᤺ᤴᤛᤥᤴ ᤁᤧᤛᤢᤶᤒᤧᤀᤠᤱ ᤂᤧᤴ ᤁᤢᤀᤡᤛᤡᤰ ᤌᤱ ᤆᤥ᤺ᤰᤛᤧ ᤐᤣᤃᤡᤃᤧ॥” 10 ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤗᤠᤶ ᤁᤡᤵ ᤌᤡᤰ ᤌᤰᤔᤠ ᤌᤡᤒᤥᤱ. ᤜᤧᤴᤇᤡᤱ ᤌᤰᤔᤠ ᤁᤡᤵ ᤌᤡᤰ ᤏᤢ ᤌᤡᤒᤥᤱ ᤜᤧᤴᤇᤡᤱ ᤌᤰᤔᤠ ᤜᤧᤴᤇᤡᤱ ᤌᤡᤰ ᤕᤠᤖᤡᤰ ᤀᤡᤛᤪᤠᤀᤡᤗᤀᤥ ᤀᤰᤋᤱᤒᤠ ᤕᤠᤶᤃᤧᤛᤡᤱᤒᤠ ᤁᤧᤈᤥ᤺ᤰᤐᤠ ᤒᤣᤏᤩᤠᤔᤡᤏ ᤃᤡᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤣ᤺ᤰᤐᤠᤜᤠ᤹ᤖᤧ ᤗᤠᤃᤡ ᤔᤏᤠᤜᤠ᤹ᤗᤠᤶ ᤆᤠᤔᤠ ᤁᤢᤈᤠ ᤑᤢᤱᤔᤠ ᤗ᤺ᤵᤔᤠ ᤐᤠᤱᤄᤢᤶᤛᤡᤶᤒᤧ॥ 11 ᤁᤶᤓᤗ᤹ᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤈᤢᤵᤛᤧ ᤜᤧᤰᤁᤩᤠᤱ ᤗᤳᤇᤠ ᤔᤏᤠ ᤁᤢᤀᤡᤛᤡᤰ ᤂᤧᤴ ᤃᤡᤒᤠ ᤕᤧᤰᤕᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤡᤰᤜᤢᤵ ᤔᤧᤒᤥ᤺ᤰᤂᤧ॥ 12 ᤀᤡᤛᤪᤠᤀᤡᤗᤡ ᤌᤠ᤺ᤰᤁᤥ ᤔᤏᤠᤜᤠ᤹ᤖᤧ ᤒᤣᤏᤩᤠᤔᤡᤏ ᤌᤠ᤺ᤰᤁᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤡᤛᤠᤱ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤔᤧᤒᤠᤱᤄᤢᤛᤡ. “ᤂᤡᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤑᤧᤴᤕᤠ᤺ᤶᤒᤰ ᤌᤣᤀᤠᤱ ᤐᤥ᤺ᤰᤂᤧᤒᤠ᥅ 13 ᤃᤡᤒᤠᤒᤠ ᤂᤧᤴ ᤂᤠᤷᤔᤧᤴᤍᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤀᤠᤏᤡᤃᤣ ᤜᤢᤰᤁᤥ ᤌᤠᤛᤠᤶᤛᤡᤶᤔᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤱᤜᤠ᤹ ᤛᤧᤖᤢᤶᤛᤡᤶᤒᤧᤀᤠᤱ ᤀᤡᤛᤪᤠᤀᤡᤗᤀᤥ ᤐᤥ᤺ᤰᤂᤧᤒᤠ ᤁᤴ ᤑᤧᤴᤕᤠ᤺ᤶᤒᤰᤁᤡᤴ ᤗᤠᤵᤑᤢᤛᤢᤶᤒᤧ॥” ᤁᤖ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤱᤄᤧᤶᤛᤢᤴ॥ 14 ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤰᤕᤰᤜᤠ᤹ᤀᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤃᤡᤒᤠ ᤕᤧᤰᤕᤰᤁᤥ ᤔᤧᤈᤢᤵᤛᤧ॥ 15 ᤂᤧᤴ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤡᤔᤥ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤧᤰᤕᤰᤜᤠ᤹ᤀᤥᤗᤠᤶ ᤋᤠᤓᤣ ᤁᤧᤜᤣᤒᤠ ᤏᤡᤒᤥᤱᤅᤠᤱ ᤋᤢᤰᤛᤡ ᤜᤧᤴᤇᤡᤱ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤔᤧᤓᤢᤰᤂᤢᤛᤡ॥ 16 ᤁᤴ ᤔᤏᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤃᤡᤒᤠᤒᤠ ᤁᤡᤵ ᤏᤢᤛᤡ ᤔᤧᤛᤣᤃᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤕᤧ. ᤁᤴ ᤔᤧᤛᤣᤃᤢᤛᤡᤒᤠ ᤔᤏᤠᤜᤠ᤹ ᤁᤧᤖᤧᤰ ᤑᤧᤱᤜᤣ᤺ᤰᤁᤩᤠ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤀᤷᤍᤥ᤺ᤸᤗᤧ ᤔᤧᤛᤥ᤺ᤰᤋᤢᤀᤠᤱ ᤔᤧᤗᤧᤵᤋᤢᤒᤠ ᤌᤧᤃᤣᤰ ᤛᤣ᤺ᤶᤒᤪᤡᤰᤘᤠᤴ ᤔᤧᤕᤠᤱᤄᤢᤶᤒᤠ ᤜᤥ᤺ᤵᤋᤧ॥ 17 ᤒᤣᤏᤩᤠᤔᤡᤏ ᤌᤠ᤺ᤰᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠᤓᤣ ᤁᤧᤜᤣᤒᤠ ᥊.᥆᥆.᥆᥆᥆ ᤔᤏᤠᤜᤠ᤹ ᤔᤧᤓᤢᤰᤂᤢᤛᤡ. ᤂᤧᤱᤜᤠ᤹ ᤁᤧᤖᤧᤰ ᤁᤧᤎᤰᤐᤠ ᤌᤰᤛᤢᤒᤠ ᤔᤧᤘᤕᤧᤖᤥ॥ 18 ᤀᤡᤛᤪᤠᤀᤡᤗᤡᤜᤠ᤹ ᤂᤡᤔᤥ ᤒᤣᤌᤣᤗ ᤗᤧᤵᤔᤠᤱ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤔᤠᤱᤅᤡᤴ ᤀᤰᤂᤣ ᤔᤧᤔᤧᤳᤋᤢᤀᤠᤱ ᤛᤣ᤺ᤴᤔᤧᤍᤥᤛᤢ. “ᤀᤠᤏᤡᤃᤧᤀᤥᤒᤠ ᤀᤠᤳᤋᤡᤴ ᤌᤠ᤺ᤰᤜᤠ᤹ᤖᤧ ᤋᤃᤡ ᤒᤣᤏᤩᤠᤔᤡᤏᤡᤜᤠ᤹ ᤑᤵᤔᤠᤛᤡᤒᤣ᥅” ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤛᤡ. “ᤕᤜᤢᤍᤠᤒᤠ ᤌᤠ᤺ᤰᤜᤠ᤹ᤖᤧ ᤋᤃᤡ ᤔᤧᤓᤳᤋᤢᤛᤡᤖ॥” 19 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤋᤠᤏᤠᤶ ᤀᤠᤴᤍᤣᤴ ᤃᤡᤒᤠ ᤋᤃᤠᤱ ᤗᤧᤵᤔᤠᤱ ᤔᤧᤒᤣᤀᤠᤱ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ 20 ᤃᤡᤒᤠᤀᤥ ᤒᤣᤏᤩᤠᤔᤡᤏᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤕᤠᤖᤡᤵ ᤔᤧᤈᤥᤃᤢᤛᤡ॥ 21 ᤂᤧᤸᤗᤧ ᤕᤠ᤺ᤴᤍᤡᤰ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤃᤡᤒᤠᤗᤠᤶ ᤔᤧᤓᤳᤋᤢᤛᤡᤀᤠᤱ ᥈᥈.᥆᥆᥆ ᤀᤡᤛᤪᤠᤀᤡᤗᤡᤜᤠ᤹ ᤌᤱ ᤁᤧᤒᤥᤱᤒᤠᤍᤧᤴᤏᤥ ᤔᤧᤛᤧᤖᤢᤛᤡ॥ 22 ᤁᤖ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤗᤢᤶᤔᤥ ᤀᤠ᤺ᤴᤇᤡᤱᤔᤠ ᤔᤧᤒᤡᤛᤡᤱ. ᤜᤧᤰᤁᤩᤠᤱ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤀᤠᤳᤋᤡᤍᤡ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤕᤠᤖᤡᤵ ᤔᤧᤈᤥᤃᤢᤛᤡᤀᤠᤱ ᤘᤕᤧ ᤀᤠᤶᤓᤠ ᤂᤧᤵᤔᤥ ᤕᤠᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤕᤠᤖᤡᤵ ᤔᤧᤈᤥᤃᤢᤛᤡ॥ 23 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤌᤥ ᤔᤧᤎᤥ᤺ᤰᤛᤡᤱ ᤔᤧᤒᤣ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤢ᤺ᤴᤇᤡᤰ ᤌᤠᤖᤡᤰ ᤔᤧᤜᤠᤒᤧ. ᤂᤶᤓᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤔᤧᤍᤥᤛᤢ. “ᤌᤣ ᤀᤠᤏᤡᤃᤣ ᤑᤢ᤹ᤏᤢᤛᤠ᤹ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤕᤠᤶᤔᤥ ᤐᤣᤃᤡᤃᤧᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢᤛᤡ. “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤡᤏᤡ᤹ ᤌᤠ᤺ᤱ ᤌᤥ᤺ᤰᤁᤠᤛᤡᤶ ᤐᤣᤃᤧᤶᤔᤧ᤹॥” 24 ᤏᤡᤛᤡᤃᤣᤰᤐᤠ ᤕᤧᤴᤏᤥᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤒᤣᤏᤩᤠᤔᤡᤏᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤋᤃᤡ ᤔᤧᤎᤠᤛᤡᤱ॥ 25 ᤒᤣᤏᤩᤠᤔᤡᤏᤡᤜᤠ᤹ᤀᤠᤱ ᤂᤧᤱᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤃᤡᤒᤠᤗᤠᤶ ᤔᤧᤗ᤺ᤴᤍᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤠᤓᤣ ᤁᤧᤜᤣᤒᤠ ᤘᤣ᤹ ᤜᤧᤴᤇᤡᤱ ᤕᤧᤳᤇᤡ ᤀᤡᤛᤪᤠᤀᤡᤗᤡᤜᤠ᤹ ᤔᤧᤛᤧᤖᤢᤛᤡ॥ 26 ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤒᤣᤌᤣᤗ ᤔᤧᤒᤣ. ᤜᤧᤰᤁᤩᤠᤱ ᤂᤧᤵᤔᤥ ᤂᤧᤱᤜᤠ᤹ ᤕᤢ᤺ᤴᤇᤡᤰ ᤌᤠᤖᤡᤰᤁᤣ ᤔᤧᤖᤡᤱ ᤔᤧᤎᤰᤋᤧᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤋ᤺ᤰᤏᤧᤳ ᤔᤧᤕᤢᤅᤧ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ 27 ᤂᤧᤴ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤜᤠᤒᤠ ᤂᤧᤵᤔᤥ ᤕᤢᤅᤧ. 28 ᤜᤧᤰᤁᤩᤠᤱ ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ ᤜᤠᤖᤢᤏᤖᤧ ᤁᤢᤶᤔᤧᤴᤇᤠ᤹ ᤐᤡᤏᤜᤠᤛᤖᤧ ᤂᤧᤸᤗᤧ ᤁᤢᤒᤣᤛᤠᤱ ᤔᤠᤱᤛᤧᤘᤠ ᤆᤥᤃᤢᤖ ᤘᤕᤧ॥ ᤂᤶᤓᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤔᤧᤍᤥᤛᤢ. “ᤌᤣ ᤀᤠᤏᤡᤃᤣ ᤑᤢ᤹ᤏᤢᤛᤠ᤹ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤛᤧ ᤕᤠᤶᤔᤥ ᤐᤣᤃᤡᤃᤧᤒᤡ ᤀᤡ ᤔᤧᤒᤣᤃᤡᤃᤧᤴᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹. ᤂᤧᤱᤜᤠ᤹ ᤑᤳᤋᤧᤶᤛᤡᤶᤔᤧ᤹॥ ᤋᤠ᤺ᤴᤍᤡᤰ ᤀᤠᤱᤃᤠ᤹ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥ ᤌᤠᤛᤢᤱᤛᤡᤱ॥” 29 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤃᤡᤒᤠ ᤕᤧᤰᤕᤰ ᤁᤧᤖᤧᤰ ᤐᤡᤛᤠᤱ ᤛᤢᤰᤔᤠᤛᤡᤀᤠᤱ ᤕᤢᤱᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤔᤧᤕᤢᤰᤂᤢᤛᤡ॥ 30 ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤃᤡ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤋᤃᤡᤒᤠ ᤜᤧᤰᤁᤣᤀᤣ ᤃᤡᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤕᤠᤖᤡᤵ ᤔᤧᤈᤥᤃᤢᤛᤡ॥ 31 ᤜᤧᤰᤁᤩᤠᤱ ᤒᤣᤏᤩᤠᤔᤡᤏᤡᤜᤠ᤹ᤃ ᤂᤧᤴ ᤌᤰᤛᤢᤒᤠᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ. ᤂᤧᤒᤩᤠᤱ ᤂᤧᤱᤜᤠ᤹ ᤕᤧᤰᤕᤰᤁᤥᤗᤠᤶ ᤔᤠᤱᤓᤠ ᤔᤠ᤺ᤱᤄᤠ ᤔᤧᤃᤧᤖᤧ. ᤜᤧᤰᤁᤩᤠᤱ ᤋᤠᤶᤍᤠᤶᤒᤠᤍᤧᤴᤏᤥ ᤜᤧᤰᤁᤩᤠᤱ ᤒᤣᤌᤣᤗ ᤐᤣ᤺ᤰᤔᤠ ᤔᤠᤖᤠᤶᤜᤠ᤹ᤀᤥ ᤏᤢ ᤃᤡᤒᤠ ᤐᤣ᤺ᤰᤔᤠ ᤗᤠᤶᤔᤥ ᤋᤃᤡᤒᤠ ᤜᤧᤰᤁᤣᤀᤣ ᤁᤢᤓᤠ ᤀᤡᤛᤪᤠᤀᤡᤗᤡᤜᤠ᤹ ᤀᤡᤃᤪ ᤛᤢᤶᤒᤥᤱ ᤔᤏᤠᤜᤠ᤹ ᤛᤧᤵᤔᤠ ᤔᤧᤜᤣ᤺ᤰᤋᤢᤛᤡ॥ 32 ᤂᤧᤒᤩᤠᤱ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤂᤧᤱᤜᤠ᤹ ᤋᤃᤡ ᤜᤧᤰᤁᤣᤀᤣ ᤀᤠᤍᤥᤃᤢᤶᤛᤡᤶᤗ ᤀᤠᤕᤠᤰ॥” ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤁᤧᤄᤧᤳᤇᤡᤱᤒᤠ ᤗᤧᤱᤅᤠᤛᤡᤀᤠᤱ ᤂᤧᤱᤜᤠ᤹ ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤔᤠᤖᤠᤶᤜᤠ᤹ᤀᤥ ᤗ᤺ᤳᤋᤢᤶᤛᤡᤶ᤹॥” 33 ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤋᤧᤴᤜᤠ᤹ ᤔᤧᤗᤧᤖᤢᤀᤠᤱ ᤒᤠᤗ-ᤋᤠᤔᤠᤖᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤛᤠ᤺ᤶᤛᤡᤱ. ᤜᤧᤰᤁᤩᤠᤱ ᤔᤏᤠ ᤁᤧᤛᤢᤰᤐᤠᤀᤠᤱ ᤁᤧᤕᤢᤱᤒᤠᤜᤠ᤹ ᤃᤡᤒᤠᤒᤠ ᤏᤠᤶᤎᤠᤗᤠᤶ ᤗᤡᤃᤰ ᤔᤧᤗ᤺ᤴᤍᤧ ᤔᤧᤓᤧᤖᤧ॥ ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤌᤡᤒᤥᤱ ᤜᤧᤴᤇᤡᤱ ᤔᤧᤛᤣᤃᤢᤛᤡᤒᤠ ᤌᤰᤛᤢᤒᤠᤜᤠ᤹ᤖᤧ ᤋᤃᤡᤗᤠᤶᤒᤠ ᤃᤡᤒᤠ᤺ᤴ ᤔᤧᤓᤳᤋᤢ॥ 34 ᤜᤠᤖᤠᤀᤣ ᤕᤶᤒᤠ ᤋᤧᤴᤎᤱ ᤐᤥ᤺ᤰᤂᤧ॥ ᤁᤖ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤛᤶᤎᤠᤱ ᤁᤧᤍᤠᤒᤠᤖ ᤁᤧᤒᤵᤐᤠ ᤋᤢᤰᤂᤣᤴ ᤆᤒᤧ᤺ᤳᤇᤡᤰᤁᤠᤱ ᤆᤡᤔᤧᤴᤈᤧᤵᤋᤢᤴ॥ 35 ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤑᤧᤈᤢᤶᤓᤧᤕᤠ ᤁᤧᤜᤣᤒᤠ ᤒᤣᤏᤩᤠᤔᤡᤏᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤠᤖᤡ ᤆᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠᤓᤣ ᤁᤧᤜᤣᤒᤠ ᥈᥋.᥇᥆᥆ ᤒᤡᤏᤩᤠᤔᤡᤏᤡᤜᤠ᤹ ᤔᤧᤛᤧᤖᤢᤛᤡ॥ 36 ᤀᤠᤸᤗ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤜᤠᤖᤡᤔᤧᤍᤩᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥᤛᤢ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤃᤡᤒᤠ ᤏᤡ᤺ᤳᤋᤠᤱ ᤔᤏᤠ ᤁᤧᤛᤢᤰᤐᤠ ᤔᤧᤕᤢᤰᤂᤢᤛᤡᤒᤠᤜᤠ᤹ᤀᤥ ᤋᤠᤰᤐᤥ ᤔᤧᤕᤢᤰᤂᤢᤀᤠᤱ ᤀᤠᤵᤑᤣᤰ ᤆᤤᤲ ᤁᤧᤄᤧᤳᤇᤡᤱᤒᤠ ᤁᤧᤒᤣ᤺ᤰᤐᤠ ᤔᤧᤗᤧᤱᤛᤡᤱᤅᤠᤱ ᤔᤧᤘᤕᤧ॥ 37 ᤂᤧᤴ ᤁᤧᤛᤢᤰᤐᤠᤀᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤌᤡᤰᤗᤧᤱᤔᤠᤸᤗᤧ ᤃᤡᤒᤠ ᤕᤧᤰᤕᤰᤁᤡᤴ ᤑᤢᤖᤢᤳ ᤔᤧᤗᤡᤛᤢ. ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡ॥ 38 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤁᤧᤛᤢᤰᤐᤠᤀᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤏᤢ ᤀᤰᤋᤱᤒᤠ ᤐᤠ᤺ᤴᤔᤧᤍᤱᤄᤢᤀᤠᤱ ᤘᤕᤧ॥ ᤕᤧᤰᤕᤰᤁᤥᤗᤠᤶ ᤔᤡ᤺ᤰᤂᤥ᤹ ᤁᤧᤀᤡᤰᤛᤡᤱᤒᤠᤴ ᤐᤥ᤺ᤰᤁᤧᤸᤗᤧ. 39 ᤀᤡᤛᤪᤠᤀᤡᤗᤡᤜᤠ᤹ ᤌᤱᤅᤥ ᤏᤢ᤺ᤱᤔᤠ ᤋᤠᤔᤠ ᤁᤧᤒᤥᤱᤒᤠ ᤘᤕᤧ॥ ᤋᤃᤡᤒᤠ ᤌᤱᤅᤥ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤂᤧᤴ ᤕᤧᤶᤔᤥ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤑᤵᤔᤠ ᤔᤧᤜᤣ᤺ᤰᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤵᤔᤧᤴ ᤛᤢᤶᤒᤥᤱ ᤔᤏᤠᤜᤠ᤹ ᤔᤧᤛᤧᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤋᤃᤡᤒᤠ ᤜᤧᤰᤁᤣᤀᤣ ᤂᤧᤱᤜᤠ᤹ ᤀᤠᤏᤠ᤺ᤴᤍᤢᤶᤛᤡᤶᤗ ᤀᤠᤒᤳ॥” 40 ᤁᤖ ᤀᤠᤸᤗ ᤕᤧᤰᤕᤰᤁᤥᤗᤠᤶ ᤔᤡ᤺ᤰᤂᤥ᤹ ᤁᤧᤀᤡᤰᤛᤡᤱᤒᤠᤴ ᤌᤠ᤺ᤱ ᤐᤥ᤺ᤰᤔᤠ ᤜᤣ᤺ᤰᤋᤧᤸᤗᤧ. ᤒᤣᤏᤩᤠᤔᤡᤏᤡᤜᤠ᤹ᤖᤧ ᤀᤣᤃᤠᤱ ᤔᤧᤜᤡᤛᤡᤱᤅᤠᤱ ᤀᤥᤔᤧᤔᤧᤳᤋᤢ॥ ᤕᤧᤰᤕᤰᤁᤥ ᤁᤧᤖᤧᤰ ᤔᤡ ᤗᤠᤛᤧᤀᤠᤱ ᤔᤡ᤺ᤰᤂᤢᤀᤡᤴ ᤌᤠ᤺ᤱ ᤋᤠᤱᤛᤠᤱᤒᤥ ᤐᤥᤃᤧᤒᤠ ᤔᤧᤏᤡᤛᤢ᥄ 41 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤜᤡᤸᤗᤡᤰ ᤔᤧᤜᤡᤛᤡᤱᤅᤠᤱ ᤂᤧᤱᤜᤠ᤹ ᤔᤧᤓᤳᤋᤢᤛᤡ॥ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤧᤴ ᤋᤩᤧᤒᤠ ᤔᤧᤏᤡᤛᤢᤀᤠᤱ ᤁᤡᤔᤠᤖᤧ ᤂᤢᤴᤇᤡ᤹ ᤕᤱᤔᤠ ᤁᤧᤖᤧ॥ 42 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤗᤠᤶ ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤔᤧᤄᤧᤳᤇᤡᤱ ᤔᤧᤒᤣ. ᤁᤖ ᤌᤱ ᤁᤧᤈᤥ᤺ᤰᤐᤠᤜᤠ᤹ ᤂᤢᤴᤇᤡ᤹ᤀᤥ ᤔᤧᤃᤧᤖᤧ ᤜᤧᤰᤁᤩᤠᤱ ᤕᤧᤰᤕᤰᤁᤥᤗᤠᤶ ᤁᤧᤎᤠᤱᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤁᤢᤗᤢᤶᤔᤥ ᤔᤧᤕᤠᤰᤋᤢᤛᤡᤀᤠᤱ ᤆᤧᤵᤔᤠ ᤛᤧᤵᤔᤠ ᤔᤧᤜᤣ᤺ᤰᤋᤢᤛᤡ॥ 43 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤒᤪᤡᤱ ᤔᤧᤃᤒᤢᤛᤡᤀᤠᤱ ᤐᤢᤒᤣᤗᤠᤵᤛᤠ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤔᤧᤏᤠ᤺ᤳᤋᤢᤛᤡᤀᤠᤱ ᤃᤡᤒᤠᤒᤠ ᤏᤠᤱᤃᤧᤴ ᤐᤡᤛᤠᤱ ᤗᤳᤇᤠ ᤋᤧᤴᤏᤥ ᤔᤧᤛᤧᤖᤢᤛᤡ॥ 44 ᤂᤧᤸᤗᤧ ᤕᤠ᤺ᤴᤍᤡᤰ ᥇᥎.᥆᥆᥆ ᤒᤣᤏᤩᤠᤔᤡᤏᤡᤜᤠ᤹ ᤔᤧᤛᤧᤖᤢᤛᤡ. ᤂᤧᤱᤜᤠ᤹ ᤁᤧᤖᤧᤰ ᤔᤢᤰᤁᤧᤃᤢᤒᤠ ᤌᤰᤗᤡᤜᤠᤱᤜᤠ᤹ ᤔᤧᤘᤕᤧ॥ 45 ᤁᤧᤍᤠᤱᤒᤠᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤖᤡᤶᤔᤥᤏ ᤕᤠᤰᤐᤣ᤹ᤀᤥ ᤔᤧᤄᤧᤳᤇᤡᤱ॥ ᤗᤠᤶᤜᤠ᤹ᤀᤥ ᤏᤠᤏᤠ ᤁᤳᤏᤠ ᤔᤧᤗᤧᤖᤧ ᤔᤧᤕᤠ᤺ᤰᤋᤧᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᥋.᥆᥆᥆ ᤕᤠᤖᤡᤰ ᤔᤏᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤍᤧᤶᤛᤢᤛᤡᤀᤠᤱ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤒᤣᤏᤩᤠᤔᤡᤏᤡᤜᤠ᤹ ᤃᤡᤍᤥᤔ ᤌᤧᤶᤒᤠ ᤔᤧᤏᤠ᤺ᤳᤋᤢᤛᤡ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᥈.᥆᥆᥆ ᤔᤏᤠᤜᤠ᤹ ᤔᤧᤛᤧᤖᤢᤛᤡ॥ 46 ᤂᤧᤸᤗᤧ ᤕᤠ᤺ᤴᤍᤡᤰ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤜᤣᤒᤠ ᥈᥋.᥆᥆᥆ ᤒᤣᤏᤩᤠᤔᤡᤏᤡ ᤌᤰᤗᤡᤜᤠᤱᤜᤠ᤹ ᤔᤧᤛᤧᤖᤢᤛᤡ॥ 47 ᤁᤖ ᤁᤧᤜᤡᤱᤒᤠ ᤁᤡᤵ ᤋᤢᤰᤛᤡᤃ ᤔᤧᤏᤢ᤺ᤰᤂᤧᤀᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤁᤧᤏᤧᤒᤠ ᤖᤡᤶᤔᤥᤏᤒᤠ ᤕᤠᤰᤐᤣ᤹ᤀᤥ ᤔᤧᤄᤧᤳᤇᤡᤱ ᤜᤧᤰᤁᤩᤠᤱ ᤂᤧᤵᤔᤥ ᤗᤠ ᤗᤡᤛᤡ ᤌᤠᤖᤡᤰ ᤔᤧᤕᤢᤅᤧ॥ 48 ᤀᤡᤛᤪᤠᤀᤡᤗᤡᤜᤠ᤹ ᤒᤣᤏᤩᤠᤔᤡᤏ ᤗᤧᤵᤔᤠᤱ ᤔᤧᤏᤢ᤺ᤰᤂᤧᤀᤠᤱ ᤔᤏᤠᤜᤠ᤹ ᤏᤢ ᤐᤡᤳᤌᤰᤛᤠᤜᤠ᤹ ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤔᤧᤍᤢᤔᤢᤛᤡᤒᤠ ᤁᤧᤖᤧᤰ ᤂᤧᤱᤜᤠ᤹ᤖᤧ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡ॥ ᤂᤧᤱᤜᤠ᤹ᤖᤧ ᤔᤧᤗᤡᤛᤢᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥᤀᤠᤱ ᤔᤡ ᤔᤧᤕᤠᤰᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.