ᤂᤠᤛᤧᤴᤗᤥ᤺ᤶᤒᤠ 19 - LIFOTNTᤗᤧᤒᤡ ᤏᤢ ᤂᤢᤏᤧ᤹ ᤁᤢᤈᤰᤔᤣ᤺ᤳ 1 ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤜᤠ᤺ᤳᤋᤠᤱ ᤜᤠᤱ ᤜᤥ᤺ᤵᤋᤧ॥ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ ᤛᤡᤃᤠᤱ ᤛᤠ᤹ᤖᤡᤰ ᤔᤠ᤺ᤱᤄᤠ ᤗᤧᤒᤡ ᤌᤡᤰ ᤕᤢᤅᤧ. ᤂᤢᤏᤧ᤹ ᤕᤜᤢᤍᤠᤒᤠ ᤒᤣᤌᤗᤧᤜᤧᤔᤗᤠᤶ ᤂᤢᤏᤧ᤹ ᤁᤢᤗᤠᤃᤡ ᤆᤰᤔᤣᤳ ᤌᤡᤰ ᤌᤠᤰᤋᤢᤀᤠᤱ ᤁᤳᤋᤢ॥ 2 ᤁᤖ ᤂᤧᤴ ᤔᤧᤴᤇᤢᤔᤠᤴ ᤆᤧᤸᤗᤧᤰᤗᤧᤰᤔᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤏᤠ᤹ᤖᤢ ᤜᤧᤰᤁᤩᤠᤱ ᤘᤣ᤹ ᤕᤧᤶᤒᤡᤳᤇᤠᤜᤠ᤹ᤏᤢ ᤀᤡᤵᤛᤧᤀᤠᤱ ᤕᤜᤢᤍᤠᤒᤠ ᤒᤣᤌᤗᤧᤜᤧᤔ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤐᤣᤀᤠᤱ ᤘᤕᤧ॥ ᤂᤢᤏᤧ᤹ ᤂᤧᤵᤔᤥ ᤐᤣᤀᤠᤱ ᤘᤕᤧᤒᤠ ᤗᤠ ᤗᤡᤛᤡ ᤁᤧᤖᤧ ᤆᤢᤖᤧᤀᤠᤱ ᤘᤕᤧ. 3 ᤂᤧᤒᤩᤠᤱ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤁᤢᤛᤧᤘᤠᤖᤥᤒᤠᤴ ᤏᤢ ᤀᤍᤱ ᤏᤧᤳᤇᤡ ᤋᤣ᤹ᤖᤢᤛᤡᤀᤠᤱ ᤂᤧᤴ ᤗᤧᤶᤔᤠᤀᤠᤱ ᤏᤢ᤺ᤰᤔᤠ ᤌᤠᤰᤔᤠᤖᤧ ᤗᤠᤃᤡ ᤁᤢᤔᤣ᤺ᤳᤋᤡᤸᤗᤧ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤐᤣ॥ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤋᤣ᤹ᤖᤢ ᤜᤧᤰᤁᤩᤠᤱ ᤁᤢᤴᤏᤢ᤺ᤵᤐᤧᤸᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤗᤢᤱᤔᤧᤴᤍᤡᤱ ᤗᤠᤶᤍᤠ᤺ᤰ ᤔᤧᤳᤋᤢ॥ 4 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤶᤒᤠ. ᤁᤢᤴᤏᤢ᤺ᤵᤐᤧᤸᤗᤧ ᤂᤢᤏᤧ᤹ ᤕᤧ᤺ᤰᤁᤠᤱ ᤕᤧ᤺ᤰ ᤔᤧᤳᤋᤢᤸᤗᤧ ᤂᤧᤴ ᤂᤢᤏᤧ᤹ᤏᤢ ᤛᤢᤶᤕᤠᤴ ᤕᤢᤅᤧ॥ ᤂᤧᤒᤩᤠᤱ ᤂᤢᤏᤧ᤹ ᤁᤢᤴᤏᤢ᤺ᤵᤐᤧᤴᤏᤢ ᤁᤢᤈᤠ ᤆ. ᤌᤢᤅᤢᤀᤠᤱ ᤂᤧᤵᤔᤥ ᤀᤡᤵᤛᤧ॥ 5 ᤗᤡᤕᤠᤴ ᤁᤧᤖᤧᤸᤗᤧ ᤂᤧᤱᤜᤠ᤹ ᤀᤠᤴᤍᤣᤴ ᤋᤠᤏᤠᤶᤛᤠ ᤔᤧᤒᤥᤃᤧᤀᤠᤱ ᤛᤧᤔᤠ ᤕᤠᤖᤡᤵ ᤔᤧᤒᤥ᤺ᤰᤂᤧ. ᤁᤖ ᤂᤢᤏᤧ᤹ ᤁᤢᤶᤒᤠᤱᤔᤡᤴ ᤔᤧᤳᤋᤢ. “ᤂᤧᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤁᤢᤓᤠ ᤗᤠᤶᤎᤠᤛᤡᤱᤔᤠ ᤁᤢᤈᤠᤈᤡ ᤆᤩᤧ᤹ᤀᤠᤱ ᤁᤧᤕᤠᤶ ᤆᤠᤱᤈᤠᤱ ᤔᤧᤳᤋᤧ᤹॥” 6 ᤁᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤏᤧᤵᤔᤠᤱ ᤕᤢᤱᤏᤧᤳᤇᤡ. ᤜᤧᤰᤁᤩᤠᤱ ᤛᤥᤖᤡᤰ ᤁᤢᤈᤠ ᤔᤧᤈᤩᤧ ᤔᤧᤎᤢᤅᤧ॥ ᤂᤧᤒᤩᤠᤱ ᤔᤧᤴᤇᤢᤔᤠ᤺ᤸᤗᤧ ᤁᤢᤶᤒᤠᤖᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤸᤗᤛᤠᤱ ᤌᤡᤰ ᤛᤧᤴ ᤕᤠ᤺ᤰᤋᤧ᤹ᤀᤠᤱ ᤛᤥᤛᤥᤳᤗᤖᤠᤱ ᤆᤥᤃᤧ᤹॥” 7 ᤀᤠᤸᤗ ᤂᤢᤏᤧ᤹ ᤐᤣ᤺ᤰᤔᤠᤖᤧ ᤗᤠᤃᤡ ᤐᤥᤃᤧᤸᤗᤧ ᤁᤢᤴᤏᤢ᤺ᤵᤐᤧᤸᤗᤧ ᤂᤢᤏᤧ᤹ ᤕᤠ᤺ᤰᤔᤠᤖᤧ ᤗᤠᤃᤡ ᤗᤧᤔᤢ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤌᤡᤰ ᤛᤧᤴ ᤕᤠ᤺ᤰᤋᤧ॥ 8 ᤅᤠᤛᤡ ᤕᤧᤴ ᤁᤧᤖᤧᤸᤗᤧ ᤂᤢᤏᤧ᤹ ᤗᤠᤶ ᤌᤠᤛᤡᤱᤔᤠᤖᤧ ᤗᤠᤃᤡ ᤀᤠᤴᤍᤣᤴ ᤋᤠᤏᤠᤶᤛᤠ ᤐᤥᤃᤧ॥ ᤁᤖ ᤔᤧᤴᤇ᤻ᤕᤠ᤺ᤸᤗᤧ ᤁᤢᤶᤒᤠᤖᤧ ᤔᤧᤳᤋᤢ. “ᤂᤧᤏᤧ᤹ ᤋᤃᤡ ᤌᤧᤔᤠᤀᤡᤈᤡ ᤆᤩᤧ᤹ᤀᤠᤱ ᤗᤧᤴᤈᤥ ᤌᤠᤖᤡᤰ ᤕᤢᤅᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤢᤴᤇᤡ᤹ ᤛᤥᤖᤡᤰ ᤆᤩᤧᤛᤢ ᤌᤢᤅᤧᤛᤢ॥ 9 ᤂᤧᤒᤩᤠᤱ ᤂᤧᤴ ᤔᤏᤠᤴ ᤂᤢᤏᤧ᤹ ᤁᤢᤈᤰᤔᤣ᤺ᤳᤋᤧᤴ ᤜᤧᤰᤁᤩᤠᤱ ᤁᤢᤛᤧᤘᤠᤖᤥᤒᤧᤴᤏᤢ ᤐᤣ᤺ᤰᤔᤠᤖᤧ ᤗᤠᤃᤡ ᤐᤥᤃᤧ॥ ᤁᤖ ᤂᤢᤏᤧ᤹ ᤁᤢᤴᤏᤢ᤺ᤵᤐᤧᤸᤗᤧ ᤔᤧᤳᤋᤢ. “ᤀᤥᤔᤧᤳᤋᤧᤛᤠ᤹ᤖᤧ. ᤕᤢ᤺ᤴᤇᤡᤰ ᤐᤥᤱᤔᤠ ᤆᤥᤰ॥ ᤀᤠᤀᤡᤴ ᤛᤧᤴᤍᤡᤰ ᤀᤠᤶᤓᤠ ᤁ᤹ᤕᤥ ᤕᤠ᤺ᤰᤋᤧ᤹ᤀᤠᤱ ᤁᤧᤏᤡᤱᤘᤠ᤹ ᤋᤠᤛᤧ᤹. ᤜᤧᤰᤁᤩᤠᤱ ᤋᤠ᤺ᤴᤍᤡᤰ ᤋᤠᤏᤠᤶᤛᤠ ᤐᤥᤃᤧ᤹ᤀᤠᤱ ᤜᤡᤶᤔᤥ ᤐᤣᤃᤧ᤹॥” 10 ᤁᤖ ᤂᤧᤴ ᤔᤏᤠ᤺ᤴ ᤂᤧᤴ ᤛᤧᤴᤍᤡᤰ ᤕᤠ᤺ᤰᤔᤠ ᤔᤧᤍᤧᤴᤍᤧᤴ॥ ᤂᤢᤏᤧ᤹ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤌᤠᤛᤡᤱᤒᤣ. ᤜᤧᤰᤁᤩᤠᤱ ᤂᤢᤏᤧ᤹ ᤁᤰ ᤁᤢ᤺ᤳᤋᤢᤛᤡᤒᤠ ᤏᤧᤳᤇᤡ ᤀᤍᤱᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤰᤔᤧ᤺ᤳᤋᤧᤴᤏᤢ ᤕᤒᤢᤛ. ᤀᤡᤃᤪ ᤕᤖᤢᤛᤗᤧᤔ ᤗᤧᤵᤔᤠᤱ ᤌᤠᤛᤡᤱ॥ 11 ᤀᤠᤸᤗ ᤂᤧᤱᤜᤠ᤹ ᤕᤒᤢᤛ ᤏᤡ᤺ᤳᤋᤠᤱ ᤔᤧᤃᤧᤖᤧᤸᤗᤧ ᤕᤖᤡᤰ ᤏᤠᤶᤎᤩᤧ ᤆᤢᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤥ᤺ᤃ᤻ᤒᤧᤸᤗᤧ ᤁᤢᤴᤍᤠᤱᤒᤧᤴ ᤔᤧᤳᤋᤢ. “ᤀᤠᤸᤗ ᤀᤠᤏᤡ᤹ ᤐᤣᤃᤡᤀᤠᤱ ᤕᤒᤢᤛᤡᤜᤠ᤹ᤖᤧ ᤂᤢᤴᤇᤡ᤹ ᤁᤴ ᤕᤧᤰᤕᤰᤁᤥ ᤕᤠᤱᤎᤥ᤺ᤰᤋᤡ॥” 12 ᤁᤖ ᤁᤢᤴᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤣ᤺ᤴ. ᤀᤡᤛᤪᤠᤀᤡᤗᤡᤜᤠ᤹ ᤔᤧᤜᤥ᤺ᤵᤐᤠ ᤁᤴ ᤀᤣᤕᤠᤱᤒᤠ ᤕᤧᤰᤕᤰᤁᤥ ᤕᤠ᤺ᤰᤋᤡᤔᤧ᤺ᤴ॥ ᤐᤖᤢᤔᤠᤸᤗᤧ ᤀᤠᤏᤡ᤹ ᤃᤡᤒᤠ ᤐᤣᤃᤡ॥” 13 ᤂᤢᤏᤧ᤹ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤃᤡᤒᤠ ᤀᤡᤃᤪ ᤖᤠᤔᤠ ᤌᤠᤖᤡᤰ ᤁᤧᤵᤔᤠ ᤋᤶᤛᤡᤱ ᤆᤥᤃᤢᤶ᤹. ᤜᤧᤰᤁᤩᤠᤱ ᤛᤧᤴᤍᤡᤰ ᤂᤧᤵᤔᤥ ᤕᤠ᤺ᤰᤋᤡ॥” 14 ᤁᤶᤓᤗ᤹ᤖᤡᤰ ᤂᤧᤱᤜᤠ᤹ ᤋᤃᤡ ᤔᤧᤒᤣᤀᤠᤱ ᤏᤠᤶᤎᤩᤧ᤺ᤸᤗᤧ ᤂᤧᤱᤜᤠ᤹ ᤒᤣᤏᤩᤠᤔᤡᤏ ᤃᤡᤒᤠ ᤏᤡ᤺ᤳᤋᤠᤱ ᤔᤧᤘᤕᤧ॥ 15 ᤂᤧᤱᤜᤠ᤹ ᤜᤠᤒᤠ ᤂᤧᤵᤔᤥ ᤛᤧᤴᤍᤡᤰ ᤕᤠᤱᤎᤥ᤺ᤰᤔᤠᤖᤧ ᤗᤠᤃᤡ ᤔᤧᤗᤠᤛᤧ. ᤜᤧᤰᤁᤩᤠᤱ ᤔᤧᤒᤣᤀᤠᤱ ᤕᤧᤰᤕᤰᤁᤥᤒᤠ ᤗᤠᤶᤍᤥᤀᤥ ᤔᤧᤕᤢᤱᤛᤡᤱ॥ ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤕᤠᤱᤎᤥ᤺ᤰᤔᤠᤖᤧ ᤗᤠᤃᤡ ᤜᤡᤶᤔᤥ ᤔᤧᤴᤍᤣ᤹ᤖᤢᤛᤡᤴ॥ 16 ᤜᤠᤒᤠ ᤁᤴ ᤕᤧᤶᤔᤥ ᤁᤠᤵᤐᤥᤒᤠ ᤔᤏᤠ ᤌᤡᤰ ᤁᤢᤀᤡᤰᤋᤠᤵᤐᤥᤗᤠᤶ ᤕᤢ᤺ᤴᤇᤡᤰ ᤁᤢᤜᤡᤶᤔᤥ ᤏᤢ᤺ᤰᤂᤧᤖ ᤐᤳᤇᤧ॥ ᤂᤢᤏᤧ᤹ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ ᤁᤧᤕᤢᤱᤒᤠ ᤔᤏᤠ ᤘᤕᤧ. ᤁᤖ ᤂᤢᤏᤧ᤹ ᤃᤡᤒᤠ ᤕᤢᤅᤧᤖ ᤘᤕᤧ. ᤂᤧᤵᤔᤥᤒᤠ ᤘᤣ᤹ ᤔᤏᤠᤜᤠ᤹ ᤒᤣᤏᤩᤠᤔᤡᤏᤡ ᤔᤧᤘᤕᤧ॥ 17 ᤂᤢᤏᤧ᤹ ᤀᤰᤂᤣ ᤌᤥ ᤀᤥᤔᤕᤧᤸᤗᤧ ᤕᤧᤰᤕᤰᤁᤥᤒᤠ ᤗᤠᤶᤍᤥᤀᤥ ᤂᤧᤴ ᤗᤠᤶᤍᤡ᤺ᤵᤐᤠᤱᤜᤠ᤹ ᤏᤡᤛᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤠᤳᤋᤡᤗᤠᤶ ᤁᤧᤍᤩᤧ᤹ᤀᤡᤒᤠ ᤏᤢ ᤀᤠᤳᤋᤡ ᤁᤧᤒᤣᤃᤡᤒᤠ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥ 18 ᤗᤧᤒᤡ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤕᤜᤢᤍᤠᤒᤠ ᤒᤣᤌᤗᤧᤜᤧᤔᤗᤠᤶ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤒᤠ ᤛᤡᤃᤠᤱ ᤔᤠ᤺ᤱᤄᤠ ᤏᤢ᤺ᤰᤛᤡᤃᤧ ᤐᤣᤃᤡᤃᤧᤖ ᤐᤳᤇᤡᤃᤧ॥ ᤀᤠᤱᤃᤠ᤹ ᤕᤜᤢᤍᤠᤒᤠ ᤒᤣᤌᤗᤧᤜᤧᤔ ᤐᤣᤃᤠᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ᤺ᤱᤅᤠᤖ ᤐᤳᤋᤠ॥ ᤁᤖ ᤜᤠ᤺ᤳᤗᤧᤀᤠᤱ ᤀᤠᤱᤃᤠ᤹ ᤜᤡᤶᤔᤥ ᤔᤧᤴᤍᤣ᤹ᤀᤣ ᤁᤳᤋᤠ॥ 19 ᤀᤍᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤡᤗᤠᤱ. ᤀᤠᤱᤃᤠ᤹ ᤀᤠᤗᤠᤃᤡ. ᤀᤠᤱᤃᤠ᤹ ᤁᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤗᤠᤃᤡ ᤏᤢ ᤛᤧᤘᤠᤖᤥᤒᤧᤸᤗᤧ ᤁᤢᤗᤠᤃᤡ ᤁᤢᤈᤠ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤁᤳᤋᤢᤱ᤹॥ ᤀᤠᤏᤡᤃᤣ ᤆᤠᤜᤠ ᤁᤧᤈᤥ᤺ᤰᤐᤠ ᤁᤢᤈᤠᤜᤠ᤹ ᤀᤠᤏᤡᤃᤧᤀᤣ ᤁᤳᤋᤢᤶᤒᤧ. ᤀᤠᤍᤠᤱᤒᤣ॥” 20 ᤂᤧᤴ ᤁᤠᤵᤐᤥᤒᤠ ᤔᤏᤠ᤺ᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤜᤡᤶᤔᤥ ᤑᤧᤖᤧᤶᤔᤧ᤹. ᤂᤡᤏᤡ᤹ ᤆᤠᤜᤠ ᤁᤧᤈᤥᤃᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤐᤡᤏᤡᤱ᤹॥ ᤁᤖ ᤗᤠᤶᤍᤥᤀᤥᤀᤣ ᤛᤧᤴᤍᤡᤰ ᤂᤡᤏᤡ᤹ ᤕᤠ᤺ᤰᤔᤠ ᤔᤧᤒᤥᤱᤏᤧᤴᤗ॥” 21 ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤜᤡᤶᤔᤥ ᤋᤣ᤹ᤖᤢᤛᤡᤀᤠᤱ ᤀᤍᤱᤜᤠ᤹ ᤁᤢᤈᤠ ᤆᤫᤠ᤺ᤳ ᤐᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤘᤠᤔᤧᤜᤵᤋᤢᤀᤠᤱ ᤔᤧᤈ ᤔᤧᤎᤢᤅᤢ॥ 22 ᤀᤠᤸᤗ ᤂᤧᤱᤜᤠ᤹ ᤁᤶᤓᤗ᤹ᤖᤡᤰ ᤏᤡᤱᤘᤠ᤹ ᤜᤠᤱᤜᤠᤱ ᤔᤧᤕᤠᤃᤧ ᤔᤧᤃᤖᤧᤸᤗᤧ. ᤂᤧᤴ ᤕᤧᤰᤕᤰᤁᤥᤒᤠ ᤁᤢᤓᤠ ᤂᤠᤷᤔᤧᤴᤍᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤧᤴ ᤜᤡᤶᤔᤡᤴ ᤁᤡᤷᤃᤵ ᤔᤧᤃᤒᤢ. ᤜᤧᤰᤁᤩᤠᤱ ᤂᤧᤴ ᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤡᤴ ᤂᤴᤍᤪᤱᤅᤠᤱ ᤂᤴᤍᤪᤱ ᤔᤧᤔᤧᤳᤋᤢᤖ ᤂᤧᤴ ᤜᤡᤶᤍᤠᤱᤒᤧᤴ ᤔᤧᤓᤧ᤺ᤰᤋᤢᤀᤠᤱ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤜᤡᤶᤔᤥ ᤕᤠᤱᤃᤧᤎᤥ᤺ᤰᤐᤠ ᤔᤏᤠᤴ ᤗᤠ᤺ᤰᤁᤠᤳ ᤗ᤺ᤳᤋᤧ᤹॥ ᤀᤠᤏᤡᤃᤣ ᤂᤧᤴ ᤔᤣ᤺ᤳ ᤔᤧᤳᤋᤢᤶᤒᤧ॥” 23 ᤂᤧᤴ ᤜᤡᤶᤍᤠᤱᤒᤧᤴ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤣ᤺ᤴ. ᤋᤣ᤺ᤱᤈᤢᤶᤛᤣ. ᤀᤰᤋᤱᤒᤠ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ ᤁᤱᤃ ᤀᤠᤱᤃᤠ᤹ ᤀᤠᤍᤖᤣᤒᤠ ᤔᤏᤠ. ᤀᤰᤋᤱᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥ 24 ᤁ᤹ᤕᤥ ᤀᤠᤱᤃᤠ᤹ ᤛᤡᤛᤠᤃᤧᤴ ᤀᤠᤛ᤻ᤛᤠ ᤔᤧᤴᤇ᤻ᤕᤠᤴ ᤏᤢ ᤁᤴ ᤔᤏᤠ᤺ᤸᤗᤧ ᤁᤢᤈᤰᤔᤣ᤺ᤳᤋᤧᤴ ᤘᤠ᤹ᤛᤡ॥ ᤀᤠᤱᤃᤠ᤹ ᤂᤧᤴᤜᤠ᤹ ᤂᤡᤏᤡ᤹ ᤗᤢᤶᤔᤥ ᤑᤧᤳᤋᤢᤱᤛᤡᤱ ᤐᤡᤏᤡᤱ᤹॥ ᤂᤧᤴᤜᤠ᤹ ᤔᤣ᤺ᤳ ᤔᤧᤳᤋᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤳᤐᤠ᤺ᤳ ᤆᤥ᤺ᤰᤔᤠ ᤁᤧᤛᤢᤰᤋᤢᤶ᤹॥ ᤁᤖ ᤁᤴ ᤔᤏᤠ᤺ᤴᤏᤢᤃ ᤀᤰᤋᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥” 25 ᤁᤖ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤂᤧᤶᤔᤠᤀᤣ ᤔᤧᤱᤄᤧᤵᤛᤢᤴ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤗᤠᤶᤍᤡ᤺ᤵᤐᤠᤱᤅᤡᤸᤗᤧ ᤂᤢᤏᤧ᤹ ᤁᤢᤈᤰᤔᤣ᤺ᤳᤋᤧᤴ ᤕᤠᤱᤛᤡᤱᤅᤠᤱ ᤂᤧᤱᤜᤠ᤹ᤀᤥ ᤐᤠᤱᤄᤢ॥ ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠᤴ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤂᤠᤔᤧᤴᤀᤥ᤺ᤳᤋᤣ ᤌᤠᤖᤡᤰ ᤔᤣ᤺ᤳ ᤔᤧᤔᤧᤳᤋᤢᤀᤠᤱ ᤂᤧᤴᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤜᤧᤰᤁᤩᤠᤱ ᤋᤠᤏᤠᤶ ᤂᤠᤀᤥ᤺ᤳᤋᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢ॥ 26 ᤂᤧᤴ ᤆᤢᤰᤔᤧᤴ ᤋᤠᤏᤠᤶ ᤑᤍᤡᤘᤍᤡ᤹ ᤗ᤹ᤖᤧᤸᤗᤧ ᤏᤢ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤕᤧᤶᤒᤠᤴ ᤏᤧᤛ᤻ᤛᤧᤒᤠ ᤜᤡᤶᤔᤧᤸᤗᤧ ᤗᤠᤶᤎᤣ᤺ᤵᤐᤥ ᤆᤥ᤺ᤴᤍᤧ. ᤜᤧᤰᤁᤩᤠᤱ ᤂᤠᤔᤧᤴᤀᤥ᤺ᤳᤋᤣ ᤌᤠᤖᤡᤰ ᤜᤠᤒᤠ ᤂᤧᤵᤔᤥ ᤏᤧᤛ᤻ᤛᤧᤃᤖᤧ॥ 27 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤕᤧᤶᤒᤠ᤺ᤴ ᤋᤠᤏᤠᤶ ᤐᤥᤃᤧ. ᤜᤧᤰᤁᤩᤠᤱ ᤗᤠᤶ ᤌᤠᤛᤡᤱᤔᤠᤖᤧ ᤗᤠᤃᤡ ᤜᤡᤶᤔᤥᤒᤠ ᤗᤠᤶᤎᤣ᤺ᤳᤋᤧᤴ ᤜᤴᤍᤢ॥ ᤂᤶᤓᤩᤠᤱ ᤂᤢᤏᤧ᤹ ᤁᤢᤈᤰᤔᤣ᤺ᤳᤋᤧᤴ ᤗᤠᤶᤎᤣ᤺ᤵᤐᤢᤱᤅᤥ ᤁᤢᤜᤢᤰᤜᤠ᤹ ᤛᤴᤇᤢᤀᤠᤱ ᤆᤥ᤺ᤴᤍᤧᤀᤠᤱ ᤏᤧᤛ᤻ᤛᤧᤒᤠ ᤏᤡᤛᤢ॥ 28 ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤐᤥᤃᤧ᤹. ᤐᤣᤃᤡ॥” ᤁᤖ ᤂᤢᤏᤧ᤹ ᤌᤣᤀᤠᤱ ᤏᤥᤃᤵ ᤔᤧᤄᤥᤛᤢᤴ॥ ᤂᤢᤏᤧ᤹ ᤂᤧᤴ ᤑᤥ᤺ᤰᤂᤢᤀᤠᤱ ᤀᤍᤱᤅᤡᤸᤗᤧ ᤁᤢᤛᤶᤎᤠᤱ ᤕᤢᤰᤂᤢ ᤜᤧᤰᤁᤩᤠᤱ ᤜᤡᤶᤗᤧᤵᤔᤠᤱ ᤌᤠᤛᤢ॥ 29 ᤀᤠᤸᤗ ᤂᤢᤏᤧ᤹ ᤜᤡᤶᤔᤥ ᤁᤧᤖᤧᤀᤠᤱ ᤑᤧᤈᤠᤎᤡᤰ ᤕᤠᤱᤛᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤰᤔᤣ᤺ᤳᤋᤧᤴ ᤐᤠᤰᤗᤧ ᤐᤠᤰᤗᤧ ᤆᤩᤧᤵᤋᤢᤀᤠᤱ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤃᤠᤰᤔᤠ ᤆᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤐᤡᤛᤠᤱ ᤜᤠᤅᤢᤍᤣᤛᤢ॥ 30 ᤂᤧᤴ ᤁᤧᤏᤡᤒᤠ ᤁᤧᤖᤧᤰᤗᤧ ᤔᤧᤒᤠ᤺ᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤓᤧᤖᤧᤒᤠ ᤕᤧᤶᤔᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤀᤰᤋᤱᤒᤠ ᤀᤠᤓᤧᤸᤗᤧᤀᤠᤱ ᤔᤧᤶᤒᤥᤱᤅᤣ ᤘᤠ᤹॥ ᤂᤧᤴ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤌᤣ ᤆᤥ᤺ᤰᤔᤠ ᤐᤥᤱ᤹ ᤋᤠ᤹ᤈᤧᤰᤂᤧᤶᤔᤧ᤹ᤀᤠᤱ ᤐᤠ᤺ᤳᤋᤠᤶᤔᤧ᤹ᤀᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.