ᤂᤠᤛᤧᤴᤗᤥ᤺ᤶᤒᤠ 18 - LIFOTNTᤔᤡᤁᤠ ᤏᤢ ᤍᤠᤏᤖᤧ ᤁᤢᤎᤠ᤺ᤰᤜᤠ᤹ 1 ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤜᤠ᤺ᤳᤋᤠᤱ ᤜᤠᤱ ᤜᤥ᤺ᤵᤋᤧ॥ ᤍᤠᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤁᤢᤓᤠ ᤋᤧᤱᤃᤵᤐᤥ ᤕᤢᤱᤔᤠᤖᤧ ᤗᤠᤃᤡ ᤛᤢᤕᤧᤶ ᤀᤥᤔᤧᤔᤧᤳᤋᤢᤖ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤘᤣ᤹ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ᤖᤧ ᤔᤧᤄᤥᤛᤢᤒᤠ ᤁᤢᤀᤡᤛᤡᤰ ᤋᤧᤱᤃᤵᤜᤠ᤹ᤀᤥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤗᤰᤜᤠ᤹ ᤔᤧᤱᤄᤥᤀᤣ ᤔᤧᤘᤕᤧ॥ 2 ᤁᤸᤗᤧᤆᤥᤃᤢᤸᤗᤧ ᤍᤠᤏ ᤌᤠ᤺ᤰᤁᤥᤒᤠᤜᤠ᤹ᤖᤧ ᤅᤠᤛᤡ ᤌᤰᤗᤡᤜᤠᤱᤜᤠ᤹ ᤛᤥᤖᤠ ᤏᤢ ᤀᤣᤛ᤻ᤋᤥᤗᤗᤠᤶ ᤔᤧᤒᤠᤱᤄᤢᤛᤡ॥ ᤁᤴ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤗᤠᤃᤡ ᤕᤠ᤺ᤶᤒᤰ ᤔᤧᤈᤥᤃᤢ᤹॥ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤂᤡᤏᤡ᤹ ᤐᤣᤃᤧᤶᤔᤧ᤹. ᤗᤠᤈᤣᤴ ᤌᤥ᤺ᤵᤛᤧᤶᤔᤧ᤹ᤀᤠᤱ ᤁᤥ᤺ᤳᤋᤧᤶᤔᤧ᤹॥” ᤂᤧᤱᤜᤠ᤹ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤒᤠ ᤔᤡᤁᤠᤖᤧ ᤁᤢᤜᤡᤶᤔᤥ ᤔᤧᤃᤧᤖᤧ ᤔᤧᤍᤩᤧᤀᤠᤱ ᤂᤧᤴ ᤛᤧᤴᤍᤡᤰ ᤜᤠᤒᤠ ᤂᤧᤵᤔᤥ ᤔᤧᤀᤡᤵᤛᤧ॥ 3 ᤀᤠᤸᤗ ᤂᤧᤱᤜᤠ᤹ ᤔᤡᤁᤠᤖᤧ ᤁᤢᤜᤡᤶᤔᤥ ᤔᤧᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤌᤠᤱᤒᤧᤴ ᤗᤧᤒᤡ᤺ᤸᤗᤧ ᤁᤢᤀᤡᤰᤗᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ॥ ᤂᤧᤱᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤵᤔᤥ ᤜᤠ᤺ᤳᤗᤧ ᤁᤧᤍᤠᤖᤧ᥅ ᤂᤧᤏᤧ᤹ ᤁᤵᤔᤥ ᤌᤣ ᤁᤧᤈᤥ᤺ᤰᤗ ᤁᤧᤘᤠ᤹᥅ ᤂᤧᤏᤧ᤹ ᤁᤵᤔᤥ ᤌᤣ ᤁᤧᤕᤠ᤺ᤶᤒᤰ ᤘᤠ᤹᥅” 4 ᤔᤡᤁᤠ᤺ᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤌᤣᤎᤣ ᤆᤥᤃᤢ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤠᤶᤕᤠᤰᤁᤥ ᤕᤢᤰᤂᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥” 5 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤜᤧᤰᤁᤣᤏᤧᤓᤃᤪ. ᤀᤠᤏᤡᤃᤣ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤏᤡᤃᤣ ᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳᤋᤡ ᤔᤧᤃᤧᤳᤏᤧᤴᤏᤡ ᤑᤠ᤹ᤀᤠᤱ ᤛᤣ᤺ᤴᤍᤥᤛᤧ ᤀᤠᤒᤡᤖᤧ᤹॥” 6 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤏᤢᤖᤡᤰᤁᤠᤱ ᤐᤣᤃᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤗᤠᤶᤃᤧᤗᤥᤛᤡ᤹॥” 7 ᤂᤧᤴ ᤅᤠᤛᤡ ᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤗᤣᤛ ᤕᤧᤰᤕᤰᤁᤥ ᤔᤧᤃᤧᤖᤧ॥ ᤂᤧᤱᤜᤠ᤹ᤖᤧ ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠ ᤛᤡᤍᤥᤏᤡᤜᤠ᤹ ᤁᤢᤀᤡᤛᤡᤰ ᤛᤏᤠᤖᤢᤱ ᤏᤢ ᤜᤠᤱᤜᤠᤱ ᤗ᤹ᤖᤡᤰ ᤔᤧᤕᤢᤅᤧ ᤔᤧᤘᤕᤧᤒᤠ ᤔᤧᤏᤡᤛᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤁᤧᤖᤧᤰ ᤐᤠ᤺ᤴᤜᤠ᤹ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤏᤢᤖᤧ ᤔᤧᤍᤠᤛᤧᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ ᤛᤡᤍᤥᤏᤗᤠᤶ ᤔᤠ᤺ᤱᤄᤠ ᤔᤧᤘᤕᤧ. ᤜᤧᤰᤁᤩᤠᤱ ᤘᤣ᤹ ᤀᤠᤳᤋᤡᤴᤜᤠ᤹ᤏᤢᤀᤠᤱ ᤋᤢᤶᤔᤠ ᤐᤣ᤺ᤰᤔᤠ ᤜᤥ᤺ᤵᤋᤧ॥ 8 ᤂᤧᤴ ᤅᤠᤛᤡ ᤔᤏᤠᤜᤠ᤹ ᤛᤥᤖᤠ ᤏᤢ ᤀᤣᤛ᤻ᤋᤥᤗ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤀᤣᤃᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤛᤣ᤺ᤴᤔᤧᤍᤢᤛᤢᤛᤡ. “ᤂᤡᤏᤡ᤹ ᤀᤠᤰᤋᤱᤒᤠ ᤀᤡᤱᤄᤱ ᤁᤧᤍᤠᤖᤢᤶ᥅” 9 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤀᤠᤏᤡ᤹ ᤐᤣᤃᤡᤀᤠᤱ ᤂᤧᤱᤜᤠ᤹ ᤌᤱᤅᤥ ᤑᤳᤋᤢᤶᤛᤡᤶ᤹᥄ ᤀᤠᤏᤡᤃᤣ ᤏᤡᤛᤢᤶᤒᤧᤒᤠ ᤂᤧᤴ ᤗᤠᤈᤣᤴ ᤛᤠ᤹ᤖᤡᤰ ᤏᤢᤒᤠ ᤆᤥᤰ॥ ᤌᤣ ᤂᤡᤏᤡ᤹ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤁᤧᤛᤢᤛᤡᤀᤠᤱ ᤁᤧᤘᤕᤡᤒᤡ᥅ ᤀᤠᤸᤗᤥᤀᤣ ᤌᤠᤀᤠᤛᤡᤶᤔᤧ᤹ᤀᤠᤱ ᤂᤧᤴ ᤗᤠᤈᤣᤴ ᤕᤢᤰᤋᤧᤶᤔᤧ᤹॥ 10 ᤀᤠᤸᤗ ᤂᤡᤏᤡ᤹ ᤂᤧᤵᤔᤥ ᤁᤧᤃᤧᤖᤡᤸᤗᤧ. ᤂᤡᤏᤡ᤹ ᤗᤳᤇᤠ ᤕᤶᤒᤠ ᤏᤢ ᤋᤠᤶᤍᤠᤶᤒᤠ ᤗᤠᤈᤣ᤹ᤀᤥ ᤜᤠᤱᤜᤠᤱ ᤗ᤹ᤖᤡᤰ ᤁᤧᤕᤢᤱᤒᤠ ᤁᤧᤘᤠ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤏᤡᤛᤢᤶᤛᤡᤶ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤜᤢᤰᤁᤧᤛᤢᤵᤋᤡᤀᤠᤱ ᤏᤧ. ᤂᤧᤴ ᤗᤠᤈᤣ᤹ᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤥᤃᤧᤍᤧᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤘᤠ᤹॥” 11 ᤁᤸᤗᤧᤆᤥᤃᤢᤸᤗᤧ ᤛᤥᤖᤠ ᤏᤢ ᤀᤣᤛ᤻ᤋᤥᤗᤗᤠᤶ ᤔᤧᤛᤣᤃᤢᤛᤡᤒᤠ ᤍᤠᤏᤖᤧ ᤁᤢᤎᤠ᤺ᤰᤁᤥᤒᤠ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤁᤧᤜᤣᤒᤠ ᥌᥆᥆ ᤔᤏᤠᤜᤠ᤹ ᤔᤧᤗ᤺ᤴᤍᤧ॥ 12 ᤂᤧᤱᤜᤠ᤹ ᤔᤧᤎᤥ᤺ᤰᤛᤡᤱ ᤔᤧᤎᤠᤅᤧᤀᤠᤱ ᤕᤜᤢᤍᤠᤒᤠ ᤁᤡᤷᤕᤋ-ᤕᤠᤖᤡᤔ ᤏᤠᤶᤎᤠ ᤗᤧᤵᤔᤠᤱ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤁᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤀᤠᤀᤡᤴ ᤌᤠᤖᤡᤰ ᤔᤜᤏᤣᤜ-ᤍᤠᤏ ᤔᤧᤔᤧᤳᤋᤢ᤹॥ 13 ᤂᤧᤵᤔᤥᤗᤠᤶ ᤂᤧᤱᤜᤠ᤹ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ ᤗᤧᤵᤔᤠᤱ ᤔᤧᤒᤣᤀᤠᤱ ᤔᤡᤁᤠᤖᤧ ᤁᤢᤜᤡᤶᤔᤥ ᤔᤧᤍᤩᤧ॥ 14 ᤂᤧᤒᤩᤠᤱ ᤗᤣᤛ ᤁᤒᤪᤡᤱ ᤐᤡᤛᤠᤱᤒᤠ ᤗᤠᤈᤣ᤹ᤜᤠ᤹ ᤌᤥ᤺ᤶᤛᤧ ᤁᤧᤒᤣ᤺ᤰᤐᤠ ᤂᤧᤴ ᤅᤠᤛᤡ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤋᤠ᤹ᤔᤧᤈᤧᤰᤋᤢᤛᤡ. “ᤌᤣ ᤁᤴ ᤜᤡᤶᤜᤠ᤹ᤀᤥᤒᤠ ᤗᤳᤇᤠᤀᤥ ᤀᤣᤐᤥᤍ ᤏᤢ ᤜᤡᤶᤛᤠᤶᤔᤠᤱ ᤏᤠᤘᤠᤀᤡᤳᤗᤠᤜᤠ᤹. ᤗᤰᤔᤏᤠᤒᤠ ᤀᤡᤳ ᤏᤢ ᤕᤢᤵᤐᤠ ᤕᤥ᤺ᤶᤔᤏᤠᤒᤠ ᤏᤠᤘᤠᤀᤡᤳᤗᤠ ᤕᤢᤱ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡᤛᤢᤶᤒᤡ᥅ ᤀᤠᤸᤗ ᤀᤠᤰᤂᤣ ᤆᤥ᤺ᤰᤔᤠ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤏᤡᤛᤢᤶ᤹॥” 15 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤔᤧᤜᤡᤛᤡᤱᤅᤠᤱ ᤔᤡᤁᤠᤖᤧ ᤁᤢᤜᤡᤶ ᤗᤧᤵᤔᤠᤱ ᤂᤧᤴ ᤌᤠᤱᤒᤧᤴ ᤗᤧᤒᤡ᤺ᤸᤗᤧ ᤁᤢᤕᤢᤰᤏᤠᤀᤥ ᤔᤧᤒᤣ. ᤜᤧᤰᤁᤩᤠᤱ ᤂᤢᤏᤧ᤹ ᤛᤧᤘᤠ ᤔᤧᤔᤧᤳᤋᤢ॥ 16 ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤁᤧᤜᤣᤒᤠ ᤂᤧᤴ ᤁᤡᤵ ᤋᤢᤰᤛᤡ ᤍᤠᤏᤖᤧ ᤁᤢᤎᤠ᤺ᤰᤜᤠ᤹ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤶᤒᤪᤠᤀᤥ ᤔᤧᤕᤧᤶᤛᤡᤱ॥ 17 ᤗᤠᤈᤣ᤺ᤸᤗᤧ ᤁᤢᤎᤥ᤺ᤶᤛᤧ ᤁᤧᤒᤣ᤺ᤰᤐᤠ ᤂᤧᤴ ᤅᤠᤛᤡ ᤔᤏᤠᤜᤠ᤹ ᤜᤡᤶᤔᤥ ᤔᤧᤗᤠᤛᤧ. ᤜᤧᤰᤁᤩᤠᤱ ᤗᤰᤔᤏᤠᤒᤠ ᤀᤡᤳ. ᤀᤣᤐᤥᤍ. ᤜᤡᤶᤛᤠᤶᤔᤠᤱ ᤏᤠᤘᤠᤀᤡᤳᤗᤠ ᤏᤢ ᤕᤥ᤺ᤶᤔᤏᤠᤒᤠ ᤏᤠᤘᤠᤀᤡᤳᤗᤠᤴ ᤔᤧᤕᤠᤱᤛᤡᤱ॥ ᤜᤠᤒᤠ ᤂᤧᤴ ᤕᤧᤶᤔᤥ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠ ᤁᤧᤜᤣᤒᤠ ᥌᥆᥆ ᤔᤏᤠᤜᤠ᤹ᤏᤢ ᤛᤥᤖᤡᤰ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤶᤒᤪᤠᤀᤥ ᤕᤧᤒᤧᤃᤖᤧ॥ 18 ᤂᤧᤴ ᤅᤠᤛᤡ ᤔᤏᤠᤜᤠ᤹ ᤔᤡᤁᤠᤖᤧ ᤁᤢᤜᤡᤶᤔᤥ ᤔᤧᤗᤠᤛᤧᤀᤠᤱ ᤗᤰᤔᤏᤠᤒᤠ ᤀᤡᤳ. ᤀᤣᤐᤥᤍ. ᤜᤡᤶᤛᤠᤶᤔᤠᤱ ᤏᤠᤘᤠᤀᤡᤳᤗᤠ ᤏᤢ ᤕᤥ᤺ᤶᤔᤏᤠᤒᤠ ᤏᤠᤘᤠᤀᤡᤳᤗᤠᤴ ᤔᤧᤍᤣ᤹ᤖᤢᤸᤗᤧ. ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤌᤣ ᤁᤧᤈᤥᤃᤢᤶᤒᤠᤒᤣ᥅” 19 ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤫᤠ᤺ᤳ ᤔᤧᤒᤠᤖᤧᤴᤏᤧ᤹. ᤐᤠ᤺ᤴᤇᤣ᤺ᤰᤘᤠ ᤌᤡᤰᤁᤠᤱ ᤔᤧᤶᤒᤠ᤺ᤳᤋᤣ॥ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤀᤠᤏᤡᤃᤣ ᤐᤠ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧ᤹॥ ᤗᤳᤇᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠ ᤏᤢᤒᤠᤒᤡ ᤀᤡ ᤀᤡᤛᤪᤠᤀᤡᤗᤒᤠ ᤗᤳᤇᤠ ᤌᤠ᤺ᤰᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠ ᤏᤢᤒᤠᤒᤡ᥅” 20 ᤁᤴ ᤐᤠ᤺ᤴᤏᤡᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤁᤢᤏᤡᤱᤘᤠ᤹ ᤋᤩᤧ॥ ᤂᤢᤏᤧ᤹ ᤂᤧᤴ ᤀᤣᤐᤥᤍ. ᤗᤰᤔᤏᤠᤒᤠ ᤆᤀᤡ᤺ᤳᤋᤧᤴ ᤏᤢ ᤜᤡᤶᤛᤠᤶᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤕᤠᤱᤛᤡᤱ. ᤜᤧᤰᤁᤩᤠᤱ ᤂᤧᤴ ᤔᤏᤠᤛᤢᤶᤔᤥ ᤑ᤺ᤴᤇᤡᤱ॥ 21 ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤔᤧᤒᤣ. ᤂᤶᤓᤩᤠᤱ ᤐᤡᤳᤌᤰᤛᤠᤜᤠ᤹. ᤁᤢᤔᤧᤴ ᤁᤧᤄᤡ᤺ᤰᤐᤠ ᤛᤠᤔᤠᤐᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤂᤢᤴᤇᤡ᤹ ᤋᤃᤡ ᤔᤧᤎᤠᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤒᤣ॥ 22 ᤂᤧᤴ ᤍᤠᤏ ᤌᤠ᤺ᤰᤁᤥᤒᤠᤜᤠ᤹ ᤔᤡᤁᤠᤖᤧ ᤁᤢᤜᤡᤶᤔᤥᤗᤠᤶ ᤀᤠᤈᤧ᤺ᤳᤇᤡᤰ ᤆᤡᤏᤠᤏᤠᤰᤗᤰ ᤔᤧᤃᤧᤖᤧᤖ ᤔᤧᤒᤳᤇᤧᤒᤡᤗᤠ. ᤔᤡᤁᤠᤖᤧ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤍᤠᤏ ᤌᤠ᤺ᤰᤁᤥᤒᤠᤜᤠ᤹ ᤏᤠ᤺ᤳᤋᤢᤛᤡᤀᤠᤱ ᤛᤡ᤹ᤖᤢᤛᤡ. 23 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧ᤺ᤰᤋᤢᤛᤡ. ᤜᤧᤰᤁᤩᤠᤱ ᤍᤠᤏ ᤌᤠ᤺ᤰᤁᤥᤒᤠᤜᤠ᤹ ᤔᤧᤜᤡᤛᤡᤱᤅᤠᤱ ᤔᤡᤁᤠᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤎᤣ ᤛᤰᤛᤰᤐᤣ᥅ ᤌᤣᤀᤠᤱ ᤁᤴ ᤔᤏᤠᤜᤠ᤹ ᤁᤧᤀᤢ᤺ᤳᤋᤢᤛᤡᤒᤠᤒᤣ᥅” 24 ᤔᤡᤁᤠᤖᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤗᤠᤃᤡ ᤆᤥᤃᤢᤱᤛᤡᤱᤒᤠ ᤀᤠᤱᤃᤠ᤹ ᤀᤠᤔᤠᤱᤜᤠ᤹ ᤂᤡᤏᤡ᤹ ᤁᤧᤍᤣ᤹ᤖᤢᤶᤛᤡᤶ॥ ᤂᤡᤏᤡ᤹ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤛᤠᤶᤒᤧᤴᤏᤠᤱ ᤁᤧᤍᤣ᤹ᤖᤢᤶᤔᤠᤱ ᤁᤧᤒᤣᤃᤡ॥ ᤀᤠᤱᤃᤠ᤹ ᤀᤠᤗᤠᤃᤡ ᤌᤣᤎᤡᤰᤁᤠᤱ ᤀᤠᤃᤧᤴᤎᤠ᤹ᤖᤧᤴ. ᤜᤧᤰᤁᤩᤠᤱ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤔᤠᤱ ᤕᤠᤵᤔᤡ ᤐᤠᤴ ᤛᤧ᤺ᤴᤃᤧᤍᤥᤛᤡ. ‘ᤂᤧᤏᤧ᤹ ᤌᤣᤀᤠᤱ ᤁᤧᤍᤶᤒᤠ ᤁᤧᤗᤧᤱᤛᤡᤱᤒᤠᤒᤣ᥅’ ᤗ᤹ᤖᤡᤰ ᤀᤠᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤁᤧᤛᤢᤰᤋᤢᤶᤒᤠᤒᤣ᥅” 25 ᤍᤠᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤀᤠᤏᤡᤃᤣ ᤔᤧᤄᤧᤵᤛᤢᤶᤒᤧᤴᤗᤥ॥ ᤔᤣ᤺ᤴᤏᤧᤓᤃᤪ ᤁᤢᤓᤠ ᤁᤢᤛᤡᤰ ᤁᤧᤈᤶᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤜᤡᤵᤐᤠᤱ ᤂᤧᤏᤧ᤹ ᤁᤧᤴᤜᤡᤱᤏᤧᤴ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ ᤔᤧᤴᤜᤡᤱᤏᤧᤴ॥” 26 ᤁᤶᤓᤩᤠᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤍᤠᤏᤒᤠ ᤌᤠ᤺ᤰᤜᤠ᤹ ᤂᤢᤴᤇᤡ᤹ ᤗᤠᤶ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤔᤡᤁᤠᤖᤧ ᤂᤧᤱᤜᤠ᤹ ᤂᤢᤏᤧ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤁᤧᤎᤢᤶᤒᤠ ᤏᤡᤛᤢᤛᤡᤀᤠᤱ ᤀᤠᤵᤑᤣᤰ ᤁᤢᤜᤡᤶ ᤗᤧᤵᤔᤠᤱ ᤏᤢ᤺ᤰᤛᤧᤀᤠᤱ ᤐᤣ॥ 27 ᤁᤶᤓᤗ᤹ᤖᤡᤰ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤏᤢ ᤔᤡᤁᤠᤖᤧ ᤂᤢᤏᤧ᤹ ᤁᤢᤗᤠᤃᤡ ᤆᤥᤃᤢᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ ᤔᤧᤒᤣ. ᤜᤧᤰᤁᤩᤠᤱ ᤛᤏᤠᤖᤢᤱ ᤏᤢ ᤜᤠᤱᤜᤠᤱ ᤗ᤹ᤖᤡᤰ ᤔᤏᤠᤜᤠ᤹ ᤔᤧᤕᤢᤅᤧᤒᤠ ᤗᤣᤛ ᤕᤧᤰᤕᤰᤁᤡᤴ ᤂᤧᤱᤜᤠ᤹ᤖᤧ ᤌᤱᤅᤥ ᤔᤧᤓᤳᤋᤢ॥ ᤂᤧᤱᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤩᤧᤵᤋᤢᤛᤡᤀᤠᤱ ᤂᤢᤴᤇᤡ᤹ ᤕᤧᤰᤕᤰᤁᤥ ᤔᤡ ᤔᤧᤕᤠᤰᤋᤢ॥ 28 ᤂᤧᤱᤜᤠ᤹ ᤁᤧᤛᤧ᤺ᤵᤐᤠ ᤁᤧᤏᤠᤱᤒᤠ ᤜᤠ᤺ᤳᤋᤠᤱ ᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤡᤍᤥᤏᤗᤠᤶ ᤔᤠ᤺ᤱᤄᤠ ᤔᤧᤘᤕᤧ. ᤜᤧᤰᤁᤩᤠᤱ ᤘᤣ᤹ ᤀᤠᤳᤋᤡᤴᤜᤠ᤹ᤏᤢᤀᤠᤱ ᤋᤢᤶᤔᤠ ᤐᤣ᤺ᤰᤔᤠ ᤜᤥ᤺ᤵᤋᤧ॥ ᤂᤧᤴ ᤕᤧᤰᤕᤰᤁᤡᤴ ᤒᤣᤌ-ᤖᤜᤥᤒ ᤏᤡ᤺ᤳᤋᤠᤱᤒᤠ ᤏᤧᤏᤧᤒᤠᤍᤧᤴᤏᤥ ᤏᤧᤛ᤻ᤛᤧ॥ ᤍᤠᤏᤒᤠ ᤌᤠ᤺ᤰᤜᤠ᤹ᤖᤧ ᤂᤧᤴ ᤕᤧᤰᤕᤰᤁᤡᤴ ᤕᤠᤶᤔᤥ ᤔᤧᤈᤥᤃᤢᤀᤠᤱ ᤂᤧᤵᤔᤥ ᤕᤢᤱᤔᤠ ᤔᤧᤜᤣ᤺ᤰᤋᤧ॥ 29 ᤂᤧᤴ ᤋᤧᤴᤏᤡᤴ ᤀᤡᤛᤪᤠᤀᤡᤗᤖᤧ ᤁᤢᤛ᤻ᤛᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠ ᤍᤠᤏᤖᤧ ᤁᤢᤔᤡᤱᤅᤥ ᤍᤠᤏ ᤔᤡᤱ ᤔᤧᤘᤠ᤺ᤳᤋᤢ॥ ᤂᤧᤴ ᤕᤧᤰᤕᤰᤁᤧᤸᤗᤧ ᤋᤃᤡᤒᤠ ᤁᤢᤔᤡᤱ ᤗᤣᤛ ᤏᤧᤛ᤻ᤛᤧ॥ 30 ᤍᤠᤏᤒᤠ ᤌᤠ᤺ᤰᤜᤠ᤹ᤖᤧ ᤂᤧᤴ ᤗᤰᤔᤏᤠᤒᤠ ᤏᤠᤘᤠᤀᤡᤳᤗᤠᤴ ᤔᤧᤕᤢᤰᤂᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤔᤧᤴᤍᤧᤶᤛᤢᤴ ᤔᤧᤴᤍᤣ᤹ᤖᤢᤛᤡᤴᤗ ᤌᤠᤖᤡᤰ ᤔᤛᤠ᤺ᤸᤗᤧ ᤁᤢᤶᤔᤧᤴᤇᤠ᤹ ᤃᤣᤷᤛᤥᤔᤖᤧ ᤁᤢᤛ᤻ᤛᤠ ᤈᤥᤏᤠᤌᤏ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤍᤠᤏᤖᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥ᤺ᤰᤂᤧ॥ 31 ᤜᤧᤰᤁᤩᤠᤱ ᤛᤡᤗᤥᤀᤥ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤕᤢᤅᤧᤖ ᤌᤠᤖᤡᤰ ᤂᤧᤱᤜᤠ᤹ᤖᤧ ᤔᤡᤁᤠᤖᤧ ᤆᤥᤃᤢᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.