ᤂᤠᤛᤧᤴᤗᤥ᤺ᤶᤒᤠ 17 - LIFOTNT

ᤔᤡᤁᤠᤖᤧ ᤁᤢᤏᤠᤘᤠᤀᤡᤳᤗᤠᤜᤠ᤹

¹ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤔᤡᤁᤠ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤘᤕᤧ॥

² ᤂᤢᤏᤧ᤹ ᤁᤢᤶᤔᤠ ᤔᤧᤳᤋᤢ. “ᤂᤧᤏᤧ᤹ ᤁᤧᤔᤠᤛᤢᤒᤠ ᤂᤧᤴ ᥇.᥇᥆᥆ ᤕᤢᤵᤐᤠ ᤕᤠᤱᤀᤡᤳᤇᤣ᤹ᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ. ᤀᤠᤱᤃᤠ᤹ ᤂᤧᤵᤛᤢᤱᤗ ᤂᤧᤏᤧ᤹ ᤂᤧᤴ ᤁᤧᤄᤢ᤺ᤵᤐᤧᤴ ᤔᤠᤱᤍᤣ ᤛᤠᤱᤃᤪᤠ ᤁᤧᤔᤧᤳᤋᤢᤀᤠᤱ ᤘᤕᤧ. ᤂᤧᤴ ᤕᤢᤵᤐᤠ ᤕᤠᤱᤀᤡᤳᤇᤣ᤹ᤜᤠ᤹ ᤀᤠᤱᤃᤠ᤹ ᤁᤳᤋᤢᤱ᤹. ᤂᤧᤴ ᤀᤠᤱᤃᤠ᤹ ᤋᤣ᤹ᤖᤢᤱᤅᤠᤱ ᤘᤕᤧ॥” ᤂᤢᤏᤧ᤹ ᤁᤢᤶᤔᤠᤖᤧ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤖᤥ᥄”

³ ᤂᤢᤏᤧ᤹ ᤂᤧᤴ ᤁᤡᤵ ᤌᤡᤒᤥᤱᤅᤠᤱ ᤌᤡᤰ ᤕᤢᤵᤐᤠ ᤕᤠᤱᤀᤡᤳᤇᤣ᤹ᤜᤠ᤹ ᤁᤢᤶᤔᤠ ᤏᤢ᤺ᤰᤋᤢ ᤐᤡᤖᤢᤀᤠᤱ ᤀᤣᤃᤠᤱ. ᤂᤢᤏᤧ᤹ ᤁᤢᤶᤔᤠᤖᤧ ᤐᤠ᤺ᤳᤋᤢ. “ᤀᤠᤸᤗ ᤁᤴ ᤀᤠᤱᤃᤠ᤹ ᤀᤠᤕᤢᤵᤐᤠᤴ ᤀᤠᤛ᤻ᤛᤠ᤺ᤸᤗᤧ ᤁᤢᤏᤢ᤹ᤔᤠ ᤁᤢᤍᤠᤔᤠᤖᤧ ᤗᤠᤃᤡ ᤗᤳᤇᤠ ᤗᤰᤔᤏᤠᤒᤠ ᤀᤡᤳ ᤌᤡᤰ ᤏᤢ ᤕᤢᤵᤐᤠᤴ ᤕᤥ᤺ᤶᤔᤠᤀᤠᤱ ᤗᤳᤇᤠ ᤏᤠᤘᤠᤀᤡᤳᤗᤠ ᤆᤥ᤺ᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢᤱ᤹॥”

⁴ ᤁᤶᤓᤗ᤹ᤖᤡᤰ ᤂᤧᤴ ᤕᤢᤵᤐᤠᤴ ᤂᤢᤏᤧ᤹ ᤁᤢᤶᤔᤠ ᤏᤢ᤺ᤰᤋᤢ ᤐᤡᤖᤢ॥ ᤜᤧᤰᤁᤩᤠᤱ ᤂᤧᤸᤗᤧ ᥈᥆᥆ ᤕᤢᤵᤐᤠ ᤕᤠᤱᤀᤡᤳᤇᤣ᤹ᤜᤠ᤹ ᤕᤠᤱᤛᤡᤱᤅᤠᤱ ᤗᤳᤇᤠ ᤕᤢᤵᤐᤠ ᤆᤥᤒᤣᤃᤢᤴ ᤐᤡᤖᤢ. ᤂᤧᤸᤗᤧ ᤂᤧᤴ ᤕᤠᤱᤀᤡᤳᤇᤣ᤹ᤜᤠ᤹ ᤕᤥ᤺ᤴᤍᤢᤀᤠᤱ ᤀᤡᤳ ᤌᤡᤰ ᤏᤢ ᤗᤳᤇᤠ ᤏᤠᤘᤠᤀᤡᤳᤗᤠ ᤆᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤡᤁᤠ᤺ᤸᤗᤧ ᤁᤢᤜᤡᤶᤔᤥ ᤔᤧᤕᤢᤰᤂᤢ॥

⁵ ᤁᤴ ᤔᤡᤁᤠ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤗᤳᤇᤠ ᤁᤢᤔᤠᤱᤎᤠ᤺ᤴ ᤏᤧᤛ᤻ᤛᤧ॥ ᤂᤢᤏᤧ᤹ ᤗᤳᤇᤠ ᤀᤣᤐᤥᤍ ᤏᤢ ᤜᤡᤶᤛᤠᤶᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤆᤥᤃᤢᤛᤡ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤀᤥᤗᤠᤶ ᤗᤳᤇᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤣ᤺ᤴᤍᤢ॥

⁶ ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤜᤠ᤺ᤳᤋᤠᤱ ᤜᤠᤱ ᤜᤥ᤺ᤵᤋᤧ. ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤢᤏᤡᤔᤠᤀᤥ ᤌᤣ᤺ᤴ ᤏᤢᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ॥

⁷ ᤀᤠᤸᤗ ᤕᤜᤢᤍᤠᤒᤠ ᤒᤣᤌᤗᤧᤜᤧᤔᤗᤠᤶ ᤕᤜᤢᤍᤠᤒᤠ ᤜᤡᤶᤛᤕᤱ ᤗᤢᤶᤔᤥ ᤁᤧᤕᤢᤱᤒᤠ ᤌᤠᤱᤒᤧᤴ ᤗᤧᤒᤡ ᤌᤡᤰ ᤘᤕᤧ॥

⁸ ᤂᤢᤏᤧ᤹ ᤒᤣᤌᤗᤧᤜᤧᤔ ᤕᤧᤰᤕᤰᤁᤡᤴ ᤗᤧᤖᤢᤀᤠᤱ ᤘᤣ᤹ ᤕᤢᤱᤔᤠᤍᤧᤴ ᤁᤥ᤺ᤳᤇᤧ ᤌᤠᤅᤧᤀᤠᤱ ᤘᤕᤧ॥ ᤗᤠᤶᤍᤡᤰ ᤆᤥᤃᤧᤸᤗᤧ ᤂᤢᤏᤧ᤹ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤔᤡᤁᤠᤖᤧ ᤁᤢᤜᤡᤶᤔᤥ ᤁᤧᤖᤧᤍᤩᤧ॥

⁹ ᤔᤡᤁᤠᤖᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤡᤗᤠᤶ ᤁᤧᤍᤩᤧᤒᤠᤃ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤢᤍᤠᤀᤥᤒᤠ ᤒᤣᤌᤗᤧᤜᤧᤔᤒᤠ ᤗᤧᤒᤡᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤳᤇᤠ ᤕᤢᤱᤔᤠᤍᤧᤴ ᤁᤥ᤺ᤳᤋᤢᤱᤗ ᤘᤠ᤹ᤀᤠ॥”

¹⁰ ᤂᤧᤒᤩᤠᤱ ᤔᤡᤁᤠᤖᤧ ᤂᤧᤴ ᤔᤧᤳᤋᤢ. “ᤀᤠᤱᤃᤠ᤹ᤏᤢ ᤛᤥᤖᤡᤰ ᤕᤢᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤶᤒᤠ ᤐᤥ᤺ᤰᤂᤧ᤹ ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧ᤹॥ ᤀᤠᤱᤃᤠ᤹ ᤋᤱᤒᤣ ᤌᤰᤔᤠ ᤂᤧᤏᤧ᤹ ᤌᤡᤒᤥᤱ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤐᤡᤏᤧ. ᤂᤶᤓᤩᤠᤱ ᤂᤧᤏᤧ᤹ ᤆᤠᤱᤔᤠ ᤆᤠᤱ ᤐᤡᤏᤧ ᤜᤧᤰᤁᤩᤠᤱ ᤆᤠᤔᤠ ᤁᤢᤈᤠᤀᤠᤱ ᤐᤡᤏᤧᤖᤥ॥”

¹¹ ᤁᤸᤗᤧᤆᤥᤃᤢᤸᤗᤧ ᤗᤧᤒᤡᤴ ᤔᤡᤁᤠ᤺ᤴᤏᤢ ᤛᤥᤖᤡᤰ ᤕᤢᤱᤔᤠ ᤋᤧᤴᤍᤧ. ᤜᤧᤰᤁᤩᤠᤱ ᤔᤡᤁᤠᤖᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤛ᤻ᤛᤠ ᤁᤢᤀᤣᤜᤠ᤹ᤀᤥᤒᤠ ᤌᤡᤰᤐᤠ ᤜᤧᤰᤁᤣ ᤔᤧᤳᤋᤢ॥

¹² ᤔᤡᤁᤠᤖᤧ ᤂᤧᤴ ᤗᤧᤒᤡᤴ ᤕᤠ᤺ᤶᤒᤰᤁᤥ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤂᤧᤴ ᤌᤠᤱᤒᤧᤴ ᤔᤏᤠᤴ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤕᤢᤅᤧ॥

¹³ ᤔᤡᤁᤠᤖᤧ ᤐᤠ᤺ᤳᤋᤢ. “ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤏᤢ᤹ᤀᤠ ᤋᤠᤀᤠᤖ ᤆᤥᤃᤢ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱ᤹. ᤌᤣᤀᤠᤱᤓᤧᤸᤗᤧ ᤗᤧᤒᤡ ᤌᤡᤰ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”