ᤂᤠᤛᤧᤴᤗᤥ᤺ᤶᤒᤠ 16 - LIFOTNTᤛᤡᤔᤛᤥᤏᤧᤴ ᤃᤠᤈᤠ ᤕᤧᤰᤕᤰᤁᤥ ᤐᤣᤰ 1 ᤌᤡᤰᤕᤠᤴ ᤛᤡᤔᤛᤥᤏᤧᤴ ᤃᤠᤈᤠ ᤐᤣ. ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤗᤳᤇᤠ ᤕᤧᤶᤒᤠ ᤜᤱᤈᤣᤏᤠ ᤌᤡᤰ ᤏᤡᤛᤢ. ᤜᤧᤰᤁᤩᤠᤱ ᤛᤧᤴᤍᤡᤰ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠᤀᤥ ᤐᤣ॥ 2 ᤃᤠᤈᤠᤒᤠ ᤔᤏᤠᤜᤠ᤹ᤖᤧ ᤛᤡᤔᤛᤥᤏᤧᤴ ᤕᤧᤒᤠ ᤔᤧᤄᤧᤵᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤡᤷᤃᤵ ᤔᤧᤃᤒᤢᤀᤠᤱ ᤂᤧᤴ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤂᤧᤴ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤔᤧᤛᤢᤃᤢᤀᤠᤱ ᤔᤧᤕᤢᤅᤧ॥ ᤛᤧᤴᤍᤡᤰ ᤂᤧᤱᤜᤠ᤹ ᤛᤫᤠ᤺ᤳ ᤔᤧᤕᤢᤅᤧ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤔᤧᤔᤧᤳᤇᤡᤱ. “ᤂᤠᤀᤥ᤺ᤳᤋᤠᤱ ᤀᤠᤏᤡ᤹ ᤂᤢᤏᤧ᤹ ᤛᤧᤖᤢᤶ᤹॥” 3 ᤁᤖ ᤛᤡᤔᤛᤥᤏᤧᤴ ᤛᤧᤴᤍᤡᤰ ᤛᤧᤳᤗᤢᤶ ᤑᤰᤋᤧᤖ ᤌᤠᤖᤡᤰᤗᤰ ᤀᤡᤵᤏᤠᤀᤥ ᤗᤧᤰᤂᤧᤀᤠᤱ ᤏᤧᤛ᤻ᤛᤧ॥ ᤂᤧᤒᤩᤠᤱ ᤂᤢᤏᤧ᤹ ᤛᤧᤳᤗᤢᤶ ᤑᤰᤋᤧᤸᤗᤧ ᤐᤥᤃᤧᤀᤠᤱ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤡᤴ ᤏᤢ ᤏᤧᤵᤔᤠᤱ ᤛᤡᤳᤗᤠᤱᤜᤠ᤹. ᤁᤢᤎᤣ᤺ᤰᤔᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤌᤡᤰᤗᤧᤱᤗᤧ ᤜᤠ᤹ᤕᤠᤰ ᤘᤕᤠᤰ ᤀᤠ᤺ᤰᤂᤢᤍᤣᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤓᤰᤋᤠᤱᤅᤥ ᤁᤣ᤺ᤳᤋᤢᤀᤠᤱ ᤜᤣᤒᤪᤥᤏ ᤋᤃᤠᤱᤒᤠ ᤁᤥ᤺ᤰᤔᤠ ᤛᤶᤎᤠᤱ ᤐᤰᤂᤢ ᤋᤣ᤹ᤖᤢᤖᤥ॥ ᤛᤡᤔᤛᤥᤏ ᤏᤢ ᤍᤗᤡᤗᤠ 4 ᤁᤢᤓᤠ ᤕᤧᤶ ᤀᤣᤃᤠᤱ ᤛᤡᤔᤛᤥᤏᤧᤴ ᤛᤥᤖᤣᤁᤐᤠ ᤏᤧᤏᤧᤒᤠᤍᤧᤴᤏᤥ ᤁᤧᤕᤢᤱᤔᤠ ᤍᤗᤡᤗᤠ ᤔᤡᤱ ᤁᤧᤘᤠ᤺ᤵᤔᤠ ᤔᤧᤴᤇᤢᤔᤠ ᤌᤡᤰᤏᤢ ᤗᤢᤱᤔᤠ᤹ᤜᤡ᤺ᤶᤔᤥ ᤌᤩᤧ॥ 5 ᤐᤗᤡᤛ᤻ᤋᤡᤒᤠ ᤗᤠᤶᤗᤥᤒᤠᤜᤠ᤹ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤁᤢᤍᤢᤶᤛᤧ ᤔᤧᤒᤣᤀᤠᤱ ᤂᤧᤴ ᤔᤧᤔᤧᤳᤋᤢ. “ᤂᤢᤏᤧ᤹ ᤌᤣ᤺ᤸᤗᤧ ᤂᤧᤶᤔᤩᤠᤰ ᤛᤠ᤹ᤖᤡᤰ ᤁᤧᤎᤢᤶᤒᤠ ᤆᤥᤃᤢ. ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰ ᤀᤠᤏᤡᤃᤣ ᤂᤢᤏᤧ᤹ ᤂᤢᤶᤔᤠᤀᤠᤱ ᤀᤡᤄᤣ᤺ᤱᤔᤠ ᤏᤢ ᤔᤧᤴᤎᤢᤶᤔᤏᤠᤒᤠ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤒᤣ. ᤂᤧᤏᤧ᤹ ᤗᤧᤔᤧ᤹ ᤛᤢ᤺ᤴᤍᤧᤀᤠᤱ ᤛᤣ᤺ᤴᤍᤥᤛᤧ᤹ᤀᤥ॥ ᤀᤠᤏᤡᤃᤣ ᤁᤧᤖᤧᤰᤗᤠᤶ ᤂᤧᤏᤧ᤹ ᥇.᥇᥆᥆ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤁᤧᤄᤥᤛᤢ᤹॥” 6 ᤁᤸᤗᤧᤆᤥᤃᤢᤸᤗᤧ ᤍᤗᤡᤗᤠ᤺ᤸᤗᤧ ᤛᤡᤔᤛᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤛᤠ᤹ᤖᤡᤰ ᤁᤧᤎᤢᤶᤒᤠ ᤌᤣ᤺ᤸᤗᤧ ᤁᤧᤈᤥ᤺ᤰᤐᤣ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤀᤡᤄᤣ᤺ᤱᤔᤠᤀᤠᤱ ᤛᤠᤰᤔᤠ ᤛᤢᤰᤁᤧᤍᤧᤵᤐᤣ᥅” 7 ᤛᤡᤔᤛᤥᤏᤖᤧ ᤔᤧᤳᤋᤢ. “ᤁᤢᤓᤠᤖᤧ ᤀᤠᤱᤃᤠ᤹ ᤗᤡ᤺ᤸᤗᤧ ᤁᤢᤔᤠᤱᤘᤠ ᤔᤧᤴᤜᤣᤔᤏᤠᤒᤠ ᤏᤢᤛᤡ ᤐᤧᤖᤧ᤺ᤴᤈᤥᤜᤠ᤹ᤖᤧ ᤀᤡᤄᤣ᤺ᤱᤅᤠᤏᤧᤓᤃᤪ ᤀᤠᤱᤃᤠ᤹ ᤘᤣ᤹ ᤔᤏᤠ ᤜᤧᤰᤁᤣ ᤔᤧᤴᤎᤢᤶᤔᤏᤠᤒᤠ ᤐᤥᤱᤅᤠ ᤐᤣ᤺ᤰᤁᤠ॥” 8 ᤂᤧᤒᤩᤠᤱ ᤐᤗᤡᤛ᤻ᤋᤡᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤗᤡ᤺ᤸᤗᤧ ᤁᤢᤔᤠᤱᤘᤠ ᤏᤢᤛᤡ ᤔᤧᤴᤜᤣᤔᤏᤠᤒᤠ ᤐᤧᤖᤧ᤺ᤴᤈᤥᤜᤠ᤹ ᤂᤢᤏᤧ᤹ ᤔᤧᤍᤠᤖᤢ ᤔᤧᤒᤡᤖᤢ. ᤜᤧᤰᤁᤩᤠᤱ ᤍᤗᤡᤗᤠ᤺ᤸᤗᤧ ᤛᤡᤔᤛᤥᤏᤧᤴ ᤀᤡᤄᤣ᤺ᤰᤂᤢ॥ 9 ᤂᤢᤏᤧ᤹ ᤘᤣ᤹ ᤕᤠᤰᤑᤠᤱᤅᤥ ᤔᤏᤠᤜᤠ᤹ ᤆᤡᤰᤂᤢ ᤕᤢᤰᤂᤢᤛᤡᤀᤠᤱ ᤔᤧᤕᤢᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤂᤧᤴ ᤔᤧᤳᤋᤢ. “ᤛᤡᤔᤛᤥᤏᤣ. ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤏᤧ᤹ ᤁᤧᤶᤓᤳᤋᤧ ᤁᤧᤶᤍᤠᤖᤧᤖᤥ᥄” ᤁᤖ ᤂᤢᤏᤧ᤹ ᤐᤧᤖᤧ᤺ᤴᤈᤥᤜᤠ᤹ ᤔᤡᤃᤧᤍᤡᤰᤐᤠ ᤂᤡᤜᤠ᤹ ᤜᤧᤰᤁᤣ ᤛᤩᤠᤰ ᤘᤕᤠᤰ ᤑᤢ᤹ᤖᤢᤍᤣᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤢᤰᤁᤡᤸᤗᤧ ᤛᤡᤒᤡ᤹ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤔᤠ ᤔᤧᤴᤇᤢᤰᤋᤢᤴ॥ 10 ᤂᤧᤒᤩᤠᤱ ᤍᤗᤡᤗᤠ᤺ᤸᤗᤧ ᤛᤡᤔᤛᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤱᤃᤠ᤹ ᤌᤣᤏᤠᤎᤣᤔᤠ ᤁᤧᤈᤥᤃᤠᤱ ᤂᤶᤓᤩᤠᤱ ᤀᤠᤱᤃᤠ᤹ ᤀᤡᤱᤗᤧᤰ ᤁᤧᤔᤧᤳᤋᤠᤱ॥ ᤁᤴᤇᤢᤔᤥ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹. ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤀᤡᤄᤣ᤺ᤱᤔᤠ ᤛᤢᤰᤁᤧᤍᤧᤵᤐᤣ᥅” 11 ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤁᤢᤓᤠᤖᤧ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤕᤠᤱᤅᤣᤒᤠ ᤁᤢᤛᤱ ᤌᤠᤰᤐᤠᤜᤠ᤹ᤖᤧ ᤆᤡᤃᤧᤰ ᤆᤡᤃᤧᤰ ᤀᤡᤄᤣ᤺ᤱᤅᤠᤏᤧᤓᤃᤪ ᤀᤠᤱᤃᤠ᤹ ᤘᤣ᤹ ᤔᤏᤠ ᤁᤢᤀᤡᤛᤡᤰ ᤔᤧᤴᤎᤢᤶᤔᤏᤠᤒᤠ ᤐᤥᤱᤅᤠ ᤐᤣ᤺ᤰᤁᤠ॥” 12 ᤁᤸᤗᤧᤆᤥᤃᤢᤸᤗᤧ ᤍᤗᤡᤗᤠ᤺ᤸᤗᤧ ᤁᤢᤛᤱ ᤌᤠᤰᤐᤠᤜᤠ᤹ ᤋᤠᤖᤢᤀᤠᤱ ᤂᤢᤏᤧ᤹ ᤀᤡᤄᤣ᤺ᤰᤂᤢ॥ ᤂᤧᤴ ᤕᤧᤶᤔᤥᤀᤠᤱ ᤔᤏᤠᤜᤠ᤹ ᤛᤡᤃᤠᤱ ᤕᤠᤰᤑᤠᤱᤅᤥ ᤔᤧᤈᤡᤱᤛᤡᤱᤅᤠᤱ ᤔᤧᤕᤢᤅᤧ॥ ᤂᤧᤒᤩᤠᤱ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤔᤧᤳᤋᤢ. “ᤛᤡᤔᤛᤥᤏᤣ. ᤐᤗᤛ᤻ᤋᤡᤜᤠ᤹ᤖᤧ ᤂᤧᤏᤧ᤹ ᤁᤧᤶᤓᤳᤋᤧ ᤁᤧᤶᤍᤠᤖᤧᤖᤥ᥄” ᤁᤖ ᤂᤢᤏᤧ᤹ ᤁᤢᤜᤢᤰᤁᤥᤒᤠ ᤌᤠᤰᤐᤠᤜᤠ᤹ ᤂᤡᤍᤥᤖᤠ ᤁᤢᤀᤡᤛᤡᤰ ᤛᤩᤠᤰ ᤘᤕᤠᤰ ᤑᤢ᤹ᤖᤢᤍᤣᤛᤢ॥ 13 ᤍᤗᤡᤗᤠ᤺ᤸᤗᤧ ᤛᤡᤔᤛᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤸᤗᤛᤠᤱ ᤀᤠᤱᤃᤠ᤹ ᤜᤏᤧᤔᤠ ᤁᤧᤈᤥᤃᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤡᤱᤗᤧᤰ ᤐᤠᤴ ᤁᤧᤔᤧᤳᤋᤠᤖ ᤁᤧᤘᤠ᤹॥ ᤐᤠ᤺ᤳᤋᤧ᤹. ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤀᤡᤄᤣ᤺ᤱᤔᤠ ᤛᤢᤰᤁᤧᤍᤧᤵᤐᤣ᥅” ᤛᤡᤔᤛᤥᤏᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤎ᤻ᤃᤣᤰ ᤀᤡᤀᤥᤒᤠ ᤏᤢᤛᤡ ᤁᤧᤄᤠ᤹ᤒᤠᤜᤠ᤹ ᤌᤠᤰᤁᤥ ᤁᤧᤔᤠ᤺ᤳᤋᤢᤀᤠᤱ ᤗᤰᤆᤢ᤺ᤸᤗᤧ ᤀᤡᤃᤧᤛᤡᤰᤂᤢ ᤁᤧᤓᤳᤇᤢᤏᤧᤓᤃᤪ ᤀᤠᤱᤃᤠ᤹ ᤘᤣ᤹ ᤔᤏᤠ ᤁᤢᤀᤡᤛᤡᤰ ᤔᤧᤴᤎᤢᤶᤔᤏᤠᤒᤠ ᤐᤥᤱᤅᤠ ᤐᤣ᤺ᤰᤁᤠ॥” 14 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤀᤡᤵᤛᤧᤸᤗᤧ ᤍᤗᤡᤗᤠ᤺ᤸᤗᤧ ᤂᤧᤸᤗᤧ ᤁᤢᤎ᤻ᤃᤣᤰ ᤀᤡᤀᤥᤒᤠ ᤏᤢᤛᤡ ᤂᤧᤴ ᤁᤧᤄᤠ᤹ᤒᤠᤜᤠ᤹ ᤌᤠᤰᤁᤥ ᤔᤠ᤺ᤳᤋᤢᤀᤠᤱ ᤗᤰᤆᤢ᤺ᤸᤗᤧ ᤀᤡᤛᤡᤰᤂᤢ ᤑᤳᤇᤢ॥ ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤔᤧᤳᤋᤢ. “ᤛᤡᤔᤛᤥᤏᤣ. ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤏᤧ᤹ ᤁᤧᤶᤓᤳᤋᤧ ᤁᤧᤶᤍᤠᤖᤧᤖᤥ᥄” ᤂᤢᤏᤧ᤹ ᤋᤠᤍᤠᤵ ᤛᤥᤖᤧᤀᤠᤱ ᤌᤠᤰᤁᤡᤴᤏᤢ ᤛᤥᤖᤡᤰ ᤗᤰᤆᤢ᤺ᤴ ᤜᤠ᤹ᤕᤠᤰ ᤀᤠ᤺ᤰᤂᤢᤍᤣᤛᤢ॥ 15 ᤂᤧᤒᤩᤠᤱ ᤂᤢᤏᤧ᤹ ᤛᤡᤔᤛᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤡᤱᤘᤠ᤹ᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤔᤧᤵᤔᤠᤀᤣ ᤁᤧᤶᤔᤧᤳᤋᤠᤴᤏᤧᤸᤗᤧ ᤂᤧᤏᤧ᤹ ᤗᤢᤱᤔᤠ᤹ ᤜᤡ᤺ᤵᤏᤧ ᤑᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤁᤧᤒᤠ᤺ᤳᤋᤢᤒᤣ᥅ ᤁᤴ ᤛᤢᤶᤗᤧᤱᤅᤥᤀᤠᤱ ᤂᤧᤏᤧ᤹ ᤀᤠᤱᤃᤠ᤹ ᤌᤣᤏᤠᤎᤣᤔᤠ ᤁᤧᤈᤥᤃᤠᤱ ᤜᤧᤰᤁᤩᤠᤱ ᤂᤧᤏᤧ᤹ ᤌᤣ᤺ᤸᤗᤧ ᤐᤎᤢᤶ ᤁᤧᤎᤢᤶᤒᤠ ᤁᤧᤈᤥᤰ ᤑᤠ᤹ᤀᤠᤱ ᤀᤠᤸᤗᤛᤠᤱ ᤔᤧᤶᤒᤠ᤺ᤳᤋᤣ ᤁᤧᤘᤠ᤹॥” 16 ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤛᤡᤔᤛᤥᤏᤧᤴ ᤁᤴ ᤐᤠ᤺ᤴᤜᤠ᤹ᤖᤧ ᤌᤡᤰᤕᤠ᤺ᤴᤎᤰ ᤕᤧ᤺ᤰᤁᤠᤱ ᤕᤧ᤺ᤰ ᤔᤧᤳᤋᤢᤀᤠᤱ ᤛᤡᤔᤠᤗᤡᤱᤍᤥ ᤁᤧᤖᤧᤖ ᤌᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤢ॥ 17 ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤔᤠ᤹ᤖᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤴ ᤆᤧᤰᤋᤢᤍᤣᤛᤢ॥ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤎ᤻ᤃᤣᤰ ᤀᤡ᤺ᤴ ᤀᤠᤓᤧᤸᤗᤧᤀᤠᤱ ᤔᤧᤴᤏ᤺ᤱᤅᤣ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤠᤘᤠ᤺ᤴᤏᤠᤛᤡᤱᤅᤠᤱᤎᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤣ᤺ᤰ ᤔᤧᤛᤧᤴᤍᤠᤱᤒᤠ ᤏᤠᤈᤡᤖᤡᤀᤠ॥ ᤀᤠᤱᤃᤠ᤹ ᤀᤠᤎ᤻ᤃᤣᤰ ᤀᤡ᤺ᤴ ᤔᤧᤏ᤺ᤰᤂᤢᤏᤧᤓᤃᤪ ᤀᤠᤱᤃᤠ᤹ ᤀᤠᤔᤢᤰᤁᤡᤴ ᤀᤠᤱᤃᤠ᤹ᤗᤠᤶ ᤐᤣ᤺ᤰᤂᤧᤳ. ᤜᤧᤰᤁᤩᤠᤱ ᤀᤠᤱᤃᤠ᤹ ᤘᤣ᤹ ᤔᤏᤠ ᤁᤢᤀᤡᤛᤡᤰ ᤔᤧᤴᤎᤢᤶᤔᤏᤠᤒᤠ ᤐᤥᤱᤅᤠ॥” 18 ᤂᤢᤏᤧ᤹ ᤔᤠ᤹ᤖᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤀᤠᤸᤗ ᤍᤗᤡᤗᤠ᤺ᤸᤗᤧ ᤏᤡᤱᤘᤠ᤹ ᤂᤥᤛᤢ. ᤂᤧᤒᤩᤠᤱ ᤂᤢᤏᤧ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤀᤢ᤺ᤵᤔᤠᤛᤡᤖᤧ ᤗᤠᤃᤡ ᤔᤏᤠ ᤐᤠᤱᤄᤢᤛᤡ. “ᤕᤠᤶᤔᤥ ᤌᤡᤰᤗᤧᤱ ᤋᤩᤧᤶᤔᤧ᤹ᤀᤥ. ᤂᤧᤸᤗᤧ ᤔᤠ᤹ᤖᤢᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹ᤖᤥ॥” ᤁᤸᤗᤧᤆᤥᤃᤢᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤔᤧᤍᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤕᤢᤵᤐᤠᤀᤠᤱ ᤔᤧᤍᤠᤖᤢ॥ 19 ᤍᤗᤡᤗᤠ᤺ᤸᤗᤧ ᤛᤡᤔᤛᤥᤏᤧᤴ ᤁᤢᤓᤰᤋᤢᤱᤔᤥ ᤀᤡᤵᤋᤢ. ᤜᤧᤰᤁᤩᤠᤱ ᤔᤏᤠ ᤌᤡᤰ ᤀᤢ᤺ᤳᤋᤢᤀᤠᤱ ᤏᤢᤛᤡᤀᤣ ᤁᤧᤄᤠ᤹ᤒᤠ ᤁᤢᤎᤧᤃᤣᤰ ᤀᤡᤜᤠ᤹ ᤏ᤺ᤱᤔᤠ ᤐᤠᤱᤄᤢ॥ ᤁᤶᤓᤗ᤹ᤖᤡᤰ ᤍᤗᤡᤗᤠ᤺ᤸᤗᤧ ᤆᤥᤃᤢᤸᤗᤧ ᤛᤡᤔᤛᤥᤏᤧᤴ ᤔᤧᤴᤎᤢᤶᤔᤏᤠᤒᤠ ᤐᤥ᤺ᤰᤂᤧᤖ ᤌᤧᤶᤒᤠ ᤁᤢᤔᤢᤰᤁᤡᤴ ᤔᤕᤧᤒᤣ॥ 20 ᤂᤧᤒᤩᤠᤱ ᤂᤢᤏᤧ᤹ ᤀ᤺ᤰᤋᤧᤀᤠᤱ ᤔᤧᤳᤋᤢ. “ᤛᤡᤔᤛᤥᤏᤣ. ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤏᤧ᤹ ᤁᤧᤶᤓᤳᤋᤧ ᤁᤧᤶᤍᤠᤖᤧᤖᤥ᥄” ᤂᤢᤏᤧ᤹ ᤋᤠᤍᤠᤵ ᤛᤥᤖᤧᤀᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤋᤃᤡ ᤜᤧᤰᤁᤣᤀᤣ ᤀᤠᤎᤰᤁᤧᤴ ᤜᤡᤸᤗᤡᤰ ᤜᤡᤸᤗᤡᤰ ᤜᤡᤰᤛᤢᤱᤅᤠᤱ ᤐᤣ᤺ᤰᤁᤠ॥” ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠ᤹ᤖᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ ᤔᤧᤱᤄᤥᤀᤣ ᤘᤕᤧ॥ 21 ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤁᤢᤔᤡᤰᤜᤠ᤹ ᤗᤡᤃᤰ ᤔᤧᤗ᤺ᤳᤋᤢ ᤔᤧᤍᤣᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤃᤠᤈᤠ ᤕᤧᤰᤕᤰᤁᤥ ᤔᤧᤕᤢᤖᤢ॥ ᤂᤧᤱᤜᤠ᤹ᤖᤧ ᤂᤧᤵᤔᤥ ᤂᤢᤏᤧ᤹ ᤁᤠᤛᤠ ᤛᤡᤁᤪᤡᤜᤠ᤹ᤖᤧ ᤀᤡᤔᤧᤄᤣ᤺ᤰᤂᤢ. ᤂᤶᤓᤩᤠᤱ ᤐᤢᤱᤗᤠᤜᤡᤶᤔᤥ ᤂᤢᤏᤧ᤹ ᤗᤢᤶᤛᤢᤶ ᤕᤢ᤺ᤵᤔᤠ ᤔᤧᤒᤠᤱᤄᤢ॥ 22 ᤁᤖ ᤂᤢᤏᤧ᤹ ᤁᤢᤎᤧᤃᤣᤰ ᤀᤡ᤺ᤴ ᤔᤧᤏ᤺ᤰᤂᤢᤀᤠᤱ ᤀᤣᤃᤠᤱ ᤕᤠᤶᤔᤥ ᤐᤥᤔᤠ ᤜᤣ᤺ᤰᤋᤧᤖᤥ॥ ᤛᤡᤔᤛᤥᤏᤧᤴ ᤔᤠᤛᤡᤱ 23 ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤂᤢᤴᤇᤡ᤹ ᤔᤠᤱ ᤍᤠᤃᤥᤏᤖᤧ ᤁᤢᤗᤠᤃᤡ ᤗᤳᤇᤠ ᤕᤶᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤢ ᤂᤧᤸᤗᤧ ᤁᤢᤍᤃᤡ ᤛᤥᤛᤥᤳᤗᤖᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤔᤠᤱᤅᤡᤸᤗᤧ ᤀᤠᤏᤡ᤹ ᤏᤡᤱᤔᤡ ᤛᤡᤔᤛᤥᤏᤧᤴ ᤀᤠᤏᤡ᤹ ᤜᤢᤰᤀᤠᤛᤢᤵᤋᤧᤀᤠᤱ ᤘᤠ᤹॥” 24 ᤀᤠᤸᤗ ᤔᤏᤠᤜᤠ᤹ᤖᤧ ᤛᤡᤔᤛᤥᤏᤧᤴ ᤔᤧᤏᤡᤛᤢᤀᤠᤱ ᤁᤶᤓᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤂᤢᤴᤇᤡ᤹ ᤔᤠᤱᤅᤡᤴ ᤁᤢᤏᤠᤖᤠ ᤑᤥᤔᤠ ᤔᤧᤜᤣ᤺ᤰᤋᤢᤖᤥ. “ᤀᤠᤏᤡ᤹ ᤏᤡᤱᤔᤡ. ᤀᤠᤏᤡ᤹ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠ. ᤀᤠᤏᤡ᤹ ᤗᤢᤶᤔᤥ ᤕᤖᤡᤰ ᤔᤏᤠ ᤁᤧᤛᤧᤵᤐᤠ ᤀᤠᤏᤡ᤹ ᤏᤡᤱᤔᤡᤴ ᤀᤠᤏᤡ᤹ ᤔᤠᤱᤅᤡᤸᤗᤧ ᤀᤠᤏᤡ᤹ ᤜᤢᤰᤀᤠᤛᤢᤵᤋᤧᤀᤠᤱ ᤘᤠ᤹ᤖᤥ॥” 25 ᤀᤠᤸᤗ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤛᤡᤔᤛᤥᤏᤧᤴ ᤗ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤏᤡ᤹ ᤗᤔᤡᤳᤋᤠ ᤀᤥ᤺ᤴᤀᤠᤎᤠᤰᤗᤖᤥ॥” ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤛᤡᤔᤛᤥᤏᤧᤴ ᤐᤢᤱᤗᤠᤜᤡᤶᤔᤥᤗᤠᤶ ᤔᤧᤗ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤃᤡ ᤗᤔᤡᤳᤋᤠ ᤀᤥ᤺ᤴᤎᤠᤰᤋᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤢᤖᤢᤶ ᤛᤡᤳᤗᤠᤱᤜᤠ᤹ᤖᤧ ᤁᤢᤗᤢᤶᤔᤥ ᤔᤧᤕᤧᤵᤛᤢ. 26 ᤜᤧᤰᤁᤩᤠᤱ ᤛᤡᤔᤛᤥᤏᤖᤧ ᤂᤢᤏᤧ᤹ ᤁᤢᤜᤢᤰ ᤁᤧᤍᤧᤶᤒᤠ ᤆᤢᤰᤐᤧᤴ ᤔᤧᤳᤋᤢ. “ᤔᤠᤱᤜᤡᤶ ᤁᤧᤍᤰᤐᤠᤀᤠᤱ ᤁᤧᤕᤧᤵᤐᤠ ᤔᤢᤖᤢᤶ ᤛᤡᤳᤗᤠᤱᤜᤠ᤹ ᤀᤠᤱᤃᤠ᤹ ᤛᤢᤔᤠ ᤐᤠᤱᤄᤠᤱᤅᤧ᤹. ᤂᤶᤓᤩᤠᤱ ᤀᤠᤱᤃᤠ᤹ ᤂᤧᤵᤔᤥ ᤋᤰᤛᤡᤱᤅᤠᤀᤠᤱ ᤕᤧᤵᤐᤠ॥” 27 ᤀᤠᤸᤗ ᤔᤠᤱᤜᤡᤶᤔᤡᤴ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ᤖᤧ ᤛᤎᤧᤰ ᤋᤡᤶᤛᤧᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ᤀᤠᤱ ᤂᤧᤵᤔᤥ ᤔᤧᤘᤕᤧ. ᤜᤧᤰᤁᤩᤠᤱ ᤜᤧᤴᤇᤡᤱ ᤛᤢᤶᤛᤡ ᤕᤠᤖᤡᤰ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤗᤡᤱᤂᤠᤶᤒᤢ ᤛᤶᤎᤠᤱ ᤔᤧᤕᤢᤅᤧᤀᤠᤱ ᤛᤡᤔᤛᤥᤏᤖᤧ ᤀᤥ᤺ᤴᤎᤠᤰᤋᤢᤛᤡᤒᤠ ᤗᤔᤡᤳᤋᤠᤴ ᤀᤥᤔᤧᤔᤧᤳᤋᤢᤖ ᤔᤧᤕᤢᤅᤧ॥ 28 ᤂᤧᤒᤩᤠᤱ ᤛᤡᤔᤛᤥᤏᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤀᤠᤸᤗᤛᤠᤱ ᤕᤠᤶᤔᤥ ᤌᤡᤰᤗᤧᤱᤎᤡᤰ ᤔᤢᤰᤛᤠᤶ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤰᤜᤠ᤹ ᤔᤧᤗ᤺ᤳᤋᤢ ᤔᤧᤍᤣᤛᤢ ᤔᤧᤒᤡᤖᤠᤱᤒᤠᤸᤗᤧ ᤗᤠᤃᤡ ᤁᤴ ᤐᤗᤡᤛ᤻ᤋᤡᤜᤠ᤹ᤀᤥ ᤌᤡᤰᤗᤧᤱᤔᤠᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠ ᤛᤢᤰᤋᤢᤱᤗᤖᤥ॥” 29 ᤂᤧᤒᤩᤠᤱ ᤂᤢᤏᤧ᤹ ᤁᤢᤜᤢᤰᤁᤡᤴ ᤔᤠᤱᤜᤡᤶ ᤁᤧᤍᤰᤐᤠᤀᤠᤱ ᤁᤧᤕᤧᤵᤐᤠ ᤂᤧᤴ ᤔᤢᤖᤢᤶ ᤛᤡᤳᤗᤠᤱᤜᤠ᤹ᤀᤥ ᤑᤳᤇᤢᤀᤠᤱ. 30 ᤂᤢᤏᤧ᤹ ᤐᤠ᤺ᤳᤋᤢ. “ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ᤏᤢ ᤛᤥᤖᤡᤰ ᤛᤡᤀᤠᤖᤖᤥ॥” ᤂᤧᤒᤩᤠᤱ ᤛᤡᤔᤛᤥᤏᤖᤧ ᤁᤧᤖᤧᤰ ᤁᤢᤔᤢᤰᤛᤠᤶᤔᤡᤴ ᤗ᤺ᤳᤋᤢᤀᤠᤱ ᤛᤡᤳᤗᤠᤱᤜᤠ᤹ ᤀᤡ᤺ᤴᤍᤢ. ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ ᤏᤢ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤠᤱᤜᤡᤶᤔᤡᤴ ᤆᤥ᤺ᤴᤍᤧ॥ ᤁᤶᤓᤗ᤹ᤖᤡᤰ ᤂᤢᤏᤧ᤹ ᤛᤩᤧ᤺ᤸᤗᤧ ᤂᤢᤏᤧ᤹ ᤜᤡᤅᤧᤒᤠ ᤕᤧᤶᤔᤥ ᤛᤧᤖᤢᤛᤡᤒᤠᤏᤢ᤺ᤸᤗᤧ ᤕᤖᤡᤰ ᤔᤏᤠᤜᤠ᤹ ᤛᤧᤖᤢᤛᤡ॥ 31 ᤂᤢᤏᤧ᤹ ᤁᤢᤴᤛᤠ᤹ᤛᤡ ᤏᤢ ᤂᤢᤏᤧ᤹ ᤁᤢᤶᤒᤠᤖᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤕᤥ ᤔᤧᤒᤣ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤎᤠᤰᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤶᤒᤠ ᤔᤠᤏᤥᤜᤖᤧ ᤁᤢᤀᤡᤐᤢᤱᤅᤥ ᤛᤥᤖᤠ ᤀᤣᤛ᤻ᤋᤥᤗᤖᤧ ᤁᤢᤗᤢᤶᤔᤥ ᤔᤧᤈᤡᤰᤂᤢ॥ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤥ ᤛᤡᤔᤛᤥᤏᤧᤴ ᤏᤡᤒᤥᤱ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.