ᤂᤠᤛᤧᤴᤗᤥ᤺ᤶᤒᤠ 15 - LIFOTNT

¹ ᤁᤢᤓᤠ ᤕᤧᤶ ᤀᤣᤃᤠᤱ ᤔᤠᤛᤡ ᤜᤧᤰᤔᤠ ᤕᤧᤶᤔᤥ ᤛᤡᤔᤛᤥᤏᤖᤧ ᤔᤧ᤺ᤴᤍᤛᤠ᤺ᤳ ᤌᤡᤰ ᤕᤠᤱᤛᤡᤱᤅᤠᤱ ᤁᤢᤔᤣ᤺ᤳᤋᤡᤸᤗᤧ ᤁᤢᤍᤢᤶᤛᤧ ᤐᤣ॥ ᤂᤢᤏᤧ᤹ ᤁᤢᤴᤏᤢ᤺ᤵᤐᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤔᤣ᤺ᤳᤋᤡᤸᤗᤧ ᤁᤢᤕᤠᤰᤑᤠᤱᤅᤥ ᤐᤣ᤺ᤰᤔᤠ ᤀᤠᤏᤡᤱᤘᤠ᤹ ᤘᤠ᤹॥” ᤁᤖ ᤁᤢᤴᤏᤢ᤺ᤵᤐᤧᤸᤗᤧ ᤂᤢᤏᤧ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤴ॥

² ᤂᤢᤏᤧ᤹ ᤁᤢᤴᤏᤢ᤺ᤵᤐᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤂᤧᤴ ᤁᤧᤈᤡ᤺ᤳᤋᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ᤃ ᤔᤣ᤺ᤰᤂᤡᤛᤠᤒᤠ ᤁᤧᤴᤈᤢᤶᤔᤡᤴ ᤂᤢᤏᤧ᤹ ᤐᤡᤖᤢᤱᤍᤣᤛᤢᤱ॥ ᤂᤧᤸᤗᤧ ᤁᤢᤴᤛᤠ᤹ᤀᤡᤴ ᤂᤢᤏᤧ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤏᤢᤔᤠ ᤔᤧᤈᤥ᤺ᤰᤏᤧᤴᤏᤠᤱᤒᤡ᥅ ᤐᤖᤢᤔᤧᤸᤗᤧ ᤀᤠᤸᤗ ᤁᤢᤴᤛᤠ᤹ᤀᤡᤴ ᤋᤣ᤹ᤖᤧ᤹॥”

³ ᤁᤖ ᤛᤡᤔᤛᤥᤏᤖᤧ ᤔᤧᤳᤋᤢ. “ᤁᤴᤇᤗᤠᤶᤒᤠ ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ ᤁᤢᤗᤧᤰᤘᤠ ᤏᤢ᤺ᤰᤔᤠ ᤐᤡᤔᤠᤛᤡ ᤕᤢᤰ ᤁᤳᤋᤢᤱ᤹॥ ᤀᤠᤱᤃᤠ᤹ ᤛᤧᤰᤂᤠᤀᤣ ᤂᤧᤱᤜᤠ᤹ ᤁᤢᤓᤠ ᤜᤠᤴᤋᤡ ᤆᤥᤃᤢᤱᤛᤡᤱ᤹॥”

⁴ ᤂᤧᤒᤩᤠᤱ ᤂᤢᤏᤧ᤹ ᤐᤣᤀᤠᤱ ᤁᤡᤵ ᤛᤢᤶᤛᤡ ᤛᤩᤠᤗᤜᤠ᤹ ᤋᤧᤶᤛᤢᤛᤡ॥ ᤂᤢᤏᤧ᤹ ᤏᤧᤳᤏᤧᤳᤇᤡ ᤛᤩᤠᤗᤜᤠ᤹ᤖᤧ ᤂᤢᤴᤇᤡ᤹ ᤔᤡᤜᤠ᤹ ᤂᤣ᤺ᤰᤂᤢ ᤜᤧᤰᤁᤩᤠᤱ ᤏᤧᤳᤇᤡ ᤁᤢᤃᤠᤵ ᤌᤰᤔᤠ ᤂᤢᤴᤇᤡ᤹ ᤗᤢᤶᤔᤥ ᤋᤩᤠᤗᤥᤳ ᤌᤡᤰᤌᤡᤰ ᤂᤣ᤺ᤰᤂᤢ ᤐᤡᤖᤢᤛᤡ॥

⁵ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤂᤧᤴ ᤋᤩᤠᤗᤥ᤺ᤳᤜᤠ᤹ ᤜᤠ᤺ᤴᤍᤢ ᤜᤧᤰᤁᤩᤠᤱ ᤂᤧᤴ ᤛᤩᤠᤗᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤍᤢᤶᤒᤠᤀᤠᤱ ᤁᤧᤕᤧᤵᤐᤠ ᤀᤡᤰᤋᤠᤵᤐᤥ ᤗᤧᤖᤢᤍᤣᤛᤢᤛᤡ॥ ᤂᤧᤱᤜᤠ᤹ᤖᤧ ᤁᤧᤍᤢᤶᤒᤠᤀᤠᤱ ᤁᤧᤕᤧᤵᤐᤠ ᤁᤢᤈᤠᤜᤠ᤹ ᤜᤧᤰᤁᤩᤠᤱ ᤀᤡᤔᤧᤄᤣ᤺ᤰᤂᤢ ᤔᤧᤏᤧᤛ᤻ᤛᤢᤒᤠ ᤆᤠᤎ᤺ᤱᤔᤠᤜᤠ᤹ ᤛᤥᤛᤥᤖᤡᤰ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤏᤢ ᤐᤧ᤺ᤱᤘᤠᤗᤡ᤺ᤳᤇᤣ᤹ ᤛᤡᤱᤛᤣ᤹ᤀᤡᤰᤜᤠ᤹ᤀᤠᤱ ᤔᤡᤔᤧᤎᤡᤰᤂᤢ ᤔᤧᤍᤣᤛᤢ॥

⁶ ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤜᤠ᤺ᤳᤗᤧ ᤆᤥᤃᤢᤒᤠᤒᤣ᥅” ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤛᤡᤔᤛᤥᤏᤖᤧᤖᤥ. ᤌᤣᤀᤠᤱᤓᤧᤸᤗᤧ ᤋᤡᤶᤏᤠᤒᤠ ᤂᤢᤏᤧ᤹ ᤁᤢᤴᤏᤢ᤺ᤵᤐᤧᤸᤗᤧ ᤛᤡᤔᤛᤥᤏᤖᤧ ᤁᤢᤔᤣ᤺ᤳᤋᤡᤴ ᤔᤣ᤺ᤰᤂᤡᤶᤛᤠᤒᤧᤸᤗᤧ ᤁᤢᤴᤈᤢᤶᤔᤡᤴ ᤐᤡᤖᤢᤍᤣᤛᤢ॥ ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ ᤔᤧᤒᤣᤀᤠᤱ ᤂᤧᤴ ᤔᤧᤴᤇᤢᤔᤠᤴᤏᤢ ᤁᤢᤶᤒᤠ ᤔᤡᤔᤧᤎᤡᤰᤂᤢᤛᤡ॥”

⁷ ᤛᤡᤔᤛᤥᤏᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤁᤸᤗᤧ ᤁᤢᤗᤧᤰᤘᤠ ᤔᤧᤴᤜᤢᤱᤅᤣ ᤔᤧᤗᤧᤳᤏᤡᤱᤅᤡᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤠᤱᤜᤧᤰᤁᤠᤛᤡᤱᤅᤠᤱ ᤐᤠ᤺ᤳᤋᤢᤱ᤹॥”

⁸ ᤜᤧᤰᤁᤩᤠᤱ ᤂᤢᤏᤧ᤹ ᤆᤡᤎᤰ ᤆᤡᤎᤰ ᤌᤃᤢᤛᤡᤀᤠᤱ ᤕᤖᤡᤰ ᤛᤧᤖᤢᤛᤡ॥ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤌᤥ ᤌᤠᤛᤡᤱ ᤐᤣᤀᤠᤱ ᤀᤣᤋᤠᤔᤒᤠ ᤕᤠᤰᤐᤣ᤹ᤀᤥᤒᤠ ᤑᤢᤰᤁᤢᤀᤥ ᤕᤢᤱᤔᤠ ᤜᤣ᤺ᤰᤋᤧᤖᤥ॥

ᤛᤡᤔᤛᤥᤏᤖᤧ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤴᤍᤢᤛᤡ

⁹ ᤐᤗᤡᤛ᤻ᤋᤡᤜᤠ᤹ ᤌᤥ ᤔᤧᤎᤥ᤺ᤰᤛᤡᤱ ᤔᤧᤎᤠᤅᤧᤀᤠᤱ ᤕᤜᤢᤍᤠ ᤗᤠᤈᤣ᤹ᤀᤥ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢ. ᤜᤧᤰᤁᤩᤠᤱ ᤗᤜᤡ ᤕᤧᤰᤕᤰᤁᤡᤸᤗᤧ ᤁᤢᤕᤠᤀᤥ ᤔᤧᤛᤧᤛᤡᤱᤅᤠᤱ ᤔᤧᤕᤢᤅᤧ॥

¹⁰ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤀᤠᤏᤡᤃᤧᤏᤢ ᤌᤰᤛᤧ ᤁᤧᤎᤠᤅᤡᤒᤠᤒᤣ᥅” ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤛᤡᤔᤛᤥᤏᤧᤴ ᤀᤡᤄᤣ᤺ᤱᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤌᤠᤅᤡᤃᤧᤀᤠᤱ ᤘᤕᤡᤃᤧ᤹॥ ᤂᤢᤏᤧ᤹ ᤀᤠᤏᤡᤃᤣ ᤔᤧᤳᤋᤡᤃᤧᤒᤠ ᤜᤧᤰᤁᤣᤀᤣ ᤀᤠᤏᤡᤃᤣ ᤂᤧᤴ ᤔᤧᤳᤋᤢᤶᤒᤧ॥”

¹¹ ᤂᤧᤒᤩᤠᤱ ᤕᤜᤢᤍᤠᤒᤠ ᤜᤧᤴᤇᤡᤱ ᤛᤢᤶᤛᤡ ᤔᤏᤠᤜᤠ᤹ ᤀᤣᤋᤠᤔ ᤕᤠᤰᤐᤣ᤹ᤀᤥᤒᤠ ᤗᤢᤱᤑᤢᤰᤁᤥᤀᤥ ᤔᤧᤕᤧ॥ ᤂᤧᤱᤜᤠ᤹ᤖᤧ ᤛᤡᤔᤛᤥᤏᤧᤴ ᤔᤧᤔᤧᤳᤋᤢ. “ᤐᤗᤡᤛ᤻ᤋᤡᤜᤠ᤹ ᤀᤠᤏᤡ᤹ ᤕᤢᤰᤛᤠᤒᤠᤛᤡ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤏᤡᤛᤢᤀᤠᤱᤅᤣ ᤘᤠ᤹॥ ᤀᤠᤸᤗ ᤀᤥᤔᤧᤳᤋᤧ᤹. ᤂᤧᤏᤧ᤹ ᤀᤠᤏᤡᤃᤧᤏᤢ ᤌᤣ ᤁᤧᤈᤥᤃᤢᤒᤠᤒᤣ᥅” ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤌᤣ ᤔᤧᤔᤧᤳᤋᤠᤱᤅᤠᤱ ᤘᤕᤧ᤹. ᤀᤠᤱᤃᤠ᤹ᤀᤠᤱ ᤂᤧᤱᤜᤠ᤹ ᤜᤧᤰᤁᤣᤀᤣ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹॥”

¹² ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤂᤧᤏᤧ᤹ ᤂᤣ᤺ᤱᤔᤠᤀᤠᤱ ᤐᤗᤡᤛ᤻ᤋᤡᤜᤠ᤹ ᤜᤢᤰᤛᤢᤵᤔᤠᤛᤡᤖᤧ ᤗᤠᤃᤡ ᤋᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ᤹॥” ᤛᤡᤔᤛᤥᤏᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧᤓᤃᤪ. ᤂᤡᤏᤡ᤹ ᤀᤠᤵᤑᤣᤰ ᤀᤠᤱᤃᤠ᤹ ᤔᤧᤛᤧᤳᤋᤠᤛᤡᤃᤧᤴ ᤑᤠ᤹ᤀᤠᤱ ᤀᤠᤱᤃᤠ᤹ᤏᤢ ᤔᤠᤱᤜᤧᤰ ᤆᤥᤃᤧᤶᤔᤧ᤹॥”

¹³ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤥᤰ ᤐᤥᤱ᤹. ᤀᤠᤏᤡᤃᤧᤃ ᤂᤧᤏᤧ᤹ ᤀᤡᤄᤣ᤺ᤱᤅᤠᤛᤡᤃᤧᤖᤰ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤀᤠᤛᤡᤃᤧ॥ ᤀᤠᤏᤡᤃᤣ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤔᤧᤛᤧᤳᤋᤠᤛᤡᤃᤧᤴ᤹॥” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤛᤱ ᤌᤠᤰᤐᤠ ᤏᤧᤳᤇᤡᤖᤧ ᤀᤡᤔᤧᤄᤣ᤺ᤰᤂᤢ. ᤜᤧᤰᤁᤩᤠᤱ ᤕᤠᤰᤐᤣ᤹ᤀᤥᤒᤠ ᤗᤢᤱᤑᤢᤰᤁᤥᤀᤥᤗᤠᤶ ᤌᤠ᤺ᤱ ᤔᤧᤎᤠᤰᤋᤢ॥

¹⁴ ᤂᤢᤏᤧ᤹ ᤗᤜᤡ ᤁᤧᤵᤔᤠ ᤆᤥᤃᤧᤸᤗᤧ ᤐᤗᤡᤛ᤻ᤋᤡᤜᤠ᤹ ᤔᤧᤀ᤺ᤰᤋᤧᤖ ᤂᤢᤏᤧ᤹ ᤗᤧᤵᤔᤠᤱ ᤔᤧᤓᤧᤖᤧ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤡᤔᤥ ᤂᤢᤏᤧ᤹ᤀᤥ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢᤰ ᤐᤠᤂᤪᤠᤀᤥ ᤁᤧᤒᤵᤐᤠ ᤌᤠᤰᤐᤠᤜᤠ᤹ ᤔᤡᤃᤧᤍᤡᤰᤐᤠ ᤂᤡ ᤁᤢᤀᤡᤛᤡᤰ ᤛᤩᤠᤰ ᤘᤕᤠᤰ ᤐᤢ᤹ᤖᤧ॥

¹⁵ ᤂᤢᤏᤧ᤹ ᤀᤍᤱᤅᤡᤸᤗᤧ ᤗᤳᤇᤠ ᤁᤢᤔᤠᤱᤘᤠ ᤁᤢᤛᤡᤱᤍᤠᤱᤔᤠ ᤌᤡᤰ ᤂᤥᤛᤢ. ᤜᤧᤰᤁᤩᤠᤱ ᤂᤧᤴ ᤂᤵᤛᤢᤀᤠᤱ ᤜᤧᤴᤇᤡᤱ ᤌᤡᤰ ᤔᤏᤠᤜᤠ᤹ ᤜᤡᤵᤋᤢ ᤛᤧᤖᤢᤛᤡ॥

¹⁶ ᤂᤧᤒᤩᤠᤱ ᤛᤡᤔᤛᤥᤏᤖᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤍᤱᤅᤡᤸᤗᤧ ᤁᤢᤛᤡᤱᤍᤠᤱᤔᤧᤸᤗᤧ ᤀᤠᤱᤃᤠ᤹ ᤜᤧᤴᤇᤡᤱ ᤌᤡᤰ ᤔᤏᤠᤜᤠ᤹ ᤛᤧᤖᤢᤱᤛᤡᤱᤗᤥ. ᤀᤠᤱᤃᤠ᤹ ᤀᤍᤱᤅᤡᤸᤗᤧ ᤁᤢᤛᤡᤱᤍᤠᤱᤔᤧᤸᤗᤧ ᤂᤧᤱᤜᤠ᤹ ᤔᤧᤰᤂᤢᤱᤛᤡᤱᤅᤠᤱ ᤗᤢᤵᤛᤢᤱᤛᤡᤱᤗᤥ॥”

¹⁷ ᤁᤶᤓᤩᤠᤖᤡᤰ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤀᤍᤱᤅᤡᤸᤗᤧ ᤁᤢᤛᤡᤱᤍᤠᤱᤔᤧᤴ ᤗᤠᤵᤑᤢᤛᤢ॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤖᤠᤔᤋ-ᤗᤜᤡ ᤔᤧᤕᤢᤰᤂᤢ॥

¹⁸ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤘᤠᤔᤡ᤺ᤰᤋᤧ ᤜᤧᤰᤁᤩᤠᤱ ᤀ᤺ᤰᤋᤧᤀᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤧᤛᤧᤘᤠᤖᤥᤒᤧᤴ ᤁᤴ ᤕᤶᤒᤠ ᤌᤱᤅᤡᤴ ᤁᤧᤏᤠ᤺ᤶᤒᤠ ᤁᤧᤈᤥᤃᤢ. ᤜᤧᤰᤁᤩᤠᤱ ᤌᤣ ᤀᤠᤸᤗ ᤀᤠᤱᤃᤠ᤹ ᤘᤠᤔᤡ᤺ᤰᤔᤧᤸᤗᤧ ᤛᤡᤀᤠᤖᤒᤡ᥅ ᤌᤣ ᤁᤴ ᤜᤷᤍᤥ ᤔᤧᤴᤜᤧᤰᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤀᤠᤖᤒᤡ᥅”

¹⁹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤗᤜᤡᤀᤥ ᤐᤠᤰᤗᤢᤶ ᤁᤧᤗ᤹ᤒᤠ ᤋᤧᤴᤏᤡᤴ ᤆᤡᤖᤢᤀᤠᤱ ᤜᤧᤖᤢ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤆᤫᤠ᤺ᤳ ᤗ᤺ᤴᤍᤧ॥ ᤛᤡᤔᤛᤥᤏᤖᤧ ᤂᤧᤴ ᤆᤫᤠ᤺ᤳᤋᤡᤴ ᤌᤢᤅᤢᤀᤠᤱ ᤂᤢᤏᤧ᤹ ᤁᤢᤛᤰᤔᤠ ᤁᤧᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤶᤔᤥ ᤁᤢᤕᤠᤶ ᤆᤠᤱᤈᤠᤱᤒᤠ ᤐᤥ᤺ᤰᤂᤧ॥ ᤁᤸᤗᤧᤆᤥᤃᤢᤸᤗᤧ ᤗᤜᤡᤒᤠ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠᤴ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤠᤱ ᤀᤣᤏ-ᤜᤰᤁᤥᤖᤣ ᤔᤧᤔᤧᤳᤋᤢ॥

²⁰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤥ ᤛᤡᤔᤛᤥᤏᤧᤴ ᤋᤱᤒᤣ ᤏᤡᤒᤥᤱ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧᤖᤥ॥