ᤂᤠᤛᤧᤴᤗᤥ᤺ᤶᤒᤠ 14 - LIFOTNT

ᤛᤡᤔᤛᤥᤏ ᤏᤢ ᤋᤡᤶᤏᤠᤒᤠ ᤔᤧᤴᤇ᤻ᤕᤠ

¹ ᤛᤡᤔᤛᤥᤏᤧᤴ ᤋᤡᤶᤏᤠ ᤗᤧᤵᤔᤠᤱ ᤕᤥ ᤌᤠᤛᤡᤱ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤐᤗᤡᤛ᤻ᤋᤡ ᤔᤧᤴᤇᤢᤔᤠᤎᤡᤰ ᤁᤢᤔᤡᤰ ᤗᤠᤛᤧ॥

² ᤀᤠᤸᤗ ᤂᤢᤏᤧ᤹ ᤏᤢ᤺ᤰᤂᤧ ᤌᤠᤅᤧᤀᤠᤱ ᤁᤢᤶᤒᤠ ᤁᤢᤶᤔᤠᤛᤡ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤋᤡᤶᤏᤠᤀᤥ ᤐᤗᤡᤛ᤻ᤋᤡ ᤔᤧᤴᤇᤢᤔᤠ ᤌᤡᤰ ᤀᤠᤔᤡᤰ ᤗᤠᤛᤧᤀᤠᤱ ᤘᤠ᤹. ᤀᤠᤱᤃᤠ᤹ ᤂᤧᤴᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤀᤥᤔᤧᤳᤋᤧ᤹॥”

³ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤌᤣ ᤀᤠᤏᤡ᤹ ᤀᤠᤵᤑᤣᤰ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤁᤧᤏᤢ᤹ᤔᤠ ᤀᤠᤏᤡ᤹ ᤁᤠ᤹ᤀᤡᤀᤥ ᤀᤡᤃᤪ ᤀᤠᤏᤡ᤹ ᤔᤏᤠᤜᤠ᤹ᤀᤥ ᤜᤠ᤺ᤳᤋᤠᤱ ᤔᤧᤴᤇᤢᤔᤠ ᤜᤥ᤺ᤵᤐᤡ᥅ ᤜᤧᤰᤁᤩᤠᤱ ᤜᤷᤍᤥ ᤔᤧᤴᤜᤧᤰᤔᤏᤠ ᤐᤗᤡᤛ᤻ᤋᤡᤜᤠ᤹ᤀᤥᤒᤠ ᤔᤧᤴᤇᤢᤔᤠᤴ ᤂᤧᤏᤧ᤹ ᤔᤣ᤺ᤳ ᤋᤠ᤺ᤵᤔᤠ ᤐᤥᤱᤒᤠᤒᤡ᥅” ᤁᤖ ᤛᤡᤔᤛᤥᤏᤖᤧ ᤁᤢᤶᤒᤠ ᤁᤢᤶᤔᤠᤛᤡ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤧᤴ ᤔᤧᤴᤇᤢᤔᤠᤴᤏᤣ ᤀᤠᤛᤡᤖᤠ᤹ᤌᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤴᤏᤣ ᤌᤠᤰᤋᤧᤶ ᤀᤠᤒᤡᤖᤧᤶᤔᤧ᤹॥” ᤂᤧᤴᤏᤣ ᤀᤠᤱᤃᤠ᤹ ᤀᤠᤗᤠᤃᤡ ᤗᤠ᤹ᤖᤢ᤹॥

⁴ ᤁᤖ ᤁᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰ ᤘᤠ᤹ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤘᤕᤧᤛᤡ॥ ᤂᤧᤴ ᤕᤧᤶᤔᤥ ᤐᤗᤡᤛ᤻ᤋᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠ ᤔᤧᤘᤕᤧ. ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤛᤢᤕᤧᤶ ᤀᤥᤔᤧᤳᤋᤢᤖ ᤘᤕᤧ॥

⁵ ᤛᤡᤔᤛᤥᤏᤧᤴ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤏᤢ ᤋᤡᤶᤏᤠ ᤗᤧᤵᤔᤠᤱ ᤕᤥ ᤌᤠᤛᤡᤱ. ᤜᤧᤰᤁᤩᤠᤱ ᤀᤠᤸᤗ ᤂᤧᤱᤜᤠ᤹ ᤂᤧᤵᤔᤥᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤔᤧᤃᤧᤖᤧᤸᤗᤧ ᤌᤧᤰᤋᤢᤰ ᤗᤳᤇᤠ ᤁᤧᤘᤧᤶᤒᤠ ᤂᤡᤖᤡᤱᤒᤠ ᤌᤡᤰ ᤜᤢ᤺ᤰᤋᤧᤖ ᤛᤡᤔᤛᤥᤏᤧᤴ ᤗᤧᤵᤔᤠᤱ ᤑᤧᤖᤧ॥

⁶ ᤂᤡᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤧᤴ ᤛᤡᤔᤛᤥᤏᤀᤥ ᤆᤄᤵ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢᤰᤁᤥ ᤌᤣᤀᤠᤱ ᤔᤧᤃᤳᤋᤢᤴᤇᤠᤱ ᤂᤢᤏᤧ᤹ ᤂᤧᤴ ᤌᤧᤖᤡᤱᤒᤧᤴ ᤗᤳᤇᤠ ᤔᤧ᤺ᤴᤍᤛᤠ᤺ᤳ ᤁᤢᤀᤡᤛᤡᤰ ᤋᤧᤖᤧᤰ ᤘᤖᤧᤰ ᤌᤧ᤺ᤰᤂᤢ॥ ᤁᤖ ᤂᤢᤏᤧ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤢᤶᤒᤠ ᤁᤢᤶᤒᤠᤛᤡ ᤔᤧᤔᤧᤳᤋᤢᤛᤡᤴ॥

⁷ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤥ ᤌᤠᤛᤡᤱᤅᤠᤱ ᤂᤧᤴ ᤔᤧᤴᤇᤢᤔᤠᤴᤏᤢ ᤋᤠ᤹ᤈᤧᤰᤂᤧ. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠᤴ ᤂᤢᤏᤧ᤹ ᤏᤠᤏᤢ᤹ᤖᤢ॥

⁸ ᤁᤢᤓᤠ ᤕᤧᤴ ᤀᤣᤃᤠᤱ ᤂᤧᤴ ᤔᤣ᤺ᤰᤂᤡᤶ ᤔᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤠᤶᤔᤥ ᤕᤥ ᤌᤠᤛᤡᤱ॥ ᤂᤧᤴ ᤁᤢᤛᤡᤘᤧᤳ ᤌᤧᤖᤡᤱᤒᤧᤴ ᤁᤢᤀᤥᤔᤧᤳᤇᤧ ᤗᤠᤶᤔᤥᤗᤠᤶ ᤂᤢᤏᤧ᤹ ᤂᤧᤳᤏᤠ ᤗᤧᤵᤔᤠᤱ ᤐᤣ. ᤜᤧᤰᤁᤩᤠᤱ ᤂᤧᤵᤔᤥ ᤁᤢᤛᤡᤘᤧᤳ ᤌᤧᤖᤡᤱᤒᤧᤸᤗᤧ ᤁᤢᤎᤰᤁᤥ ᤂᤢᤏᤧ᤹ ᤛᤰᤘᤠ ᤐᤴᤈᤩᤠᤱᤔᤠ ᤛᤥᤖᤡᤰᤐᤠ ᤛᤰᤘᤠᤗᤧᤰ ᤌᤡᤰ ᤏᤡᤛᤢ॥

⁹ ᤂᤢᤏᤧ᤹ ᤛᤰᤘᤠᤄᤢᤴ ᤕᤃᤢᤀᤠᤱ ᤁᤢᤜᤢᤰᤁᤡᤴ ᤗᤠᤃᤢᤖ ᤐᤣ॥ ᤀᤠᤸᤗ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤖᤥ ᤁᤧᤖᤧᤍᤩᤧᤀᤠᤱ ᤂᤢᤴᤇᤡ᤹ᤀᤠᤱ ᤁᤢᤓᤠ ᤛᤰᤘᤠᤄᤢ ᤐᤡᤖᤢᤛᤡ. ᤂᤧᤒᤩᤠᤱ ᤂᤢᤴᤇᤡ᤹ᤀᤠᤱ ᤆᤩᤧᤛᤢ॥ ᤁᤖ ᤂᤢᤏᤧ᤹ ᤂᤧᤴ ᤛᤰᤘᤠᤄᤢᤴ ᤁᤢᤛᤡᤘᤧᤳ ᤌᤧᤖᤡᤱᤒᤥᤗᤠᤶ ᤕᤃᤢᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤂᤧᤱᤜᤠ᤹ ᤔᤧᤔᤧᤳᤋᤢᤴᤇᤡᤴ॥

¹⁰ ᤀᤠᤸᤗ ᤂᤢᤏᤧ᤹ ᤁᤢᤶᤒᤠ ᤂᤧᤴ ᤔᤧᤴᤇᤢᤔᤠᤴ ᤀᤥᤔᤧᤳᤇᤧ ᤕᤥ ᤐᤣ. ᤜᤧᤰᤁᤩᤠᤱ ᤔᤣ᤺ᤰᤂᤡᤶᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤌᤡᤶ ᤁᤢᤀᤡᤛᤡᤰ ᤛᤡᤔᤛᤥᤏᤖᤧ ᤂᤧᤵᤔᤥ ᤛᤠᤓ᤺ᤱᤈᤠ ᤆᤠ᤺ᤳᤋᤢᤛᤡ॥

¹¹ ᤀᤠᤸᤗ ᤂᤢᤏᤧ᤹ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤥᤛᤣ᤺ᤴᤎᤠᤰᤛᤡᤱ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤛᤢᤶᤒᤥᤱ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤘᤠ᤹ᤔᤠᤖᤧ ᤗᤠᤃᤡ ᤔᤧᤍᤠᤖᤢᤛᤡ॥

¹² ᤛᤡᤔᤛᤥᤏᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤂᤡᤏᤡ᤹ ᤗᤳᤇᤠ ᤀᤠᤵᤋᤥ ᤋᤧᤶᤏᤡᤱ᤹॥ ᤁᤴ ᤏᤢᤛᤡ ᤕᤧᤴᤏᤥᤒᤠ ᤛᤠᤓ᤺ᤱᤈᤠ ᤕᤧᤶᤔᤥ ᤂᤡᤏᤡ᤹ ᤀᤠᤵᤋᤥ᤺ᤸᤗᤧ ᤁᤢᤒᤣᤴ ᤜᤶᤔᤠ ᤁᤧᤛᤢᤰᤋᤢᤶᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤛᤢᤶᤒᤥᤱ ᤁᤢᤓᤠᤰ ᤆᤡᤖᤡᤰ ᤏᤢ ᤛᤢᤶᤒᤥᤱ ᤁᤢᤃᤠᤵ ᤆᤠᤱ ᤐᤡᤏᤡᤱ᤹॥

¹³ ᤁᤖ ᤂᤡᤏᤡ᤹ ᤂᤧᤴ ᤀᤠᤵᤋᤥ᤺ᤸᤗᤧ ᤁᤢᤒᤣᤴ ᤜᤶᤔᤠ ᤁᤧᤴᤇᤢᤰᤋᤢᤶᤔᤡᤴᤏᤧᤓᤃᤪ ᤂᤡᤏᤡ᤹ ᤀᤠᤱᤃᤠ᤹ ᤛᤢᤶᤒᤥᤱ ᤁᤢᤓᤠᤰ ᤆᤡᤖᤡᤰ ᤏᤢ ᤛᤢᤶᤒᤥᤱ ᤆᤠᤱᤔᤠ ᤆᤠᤱ ᤀᤠᤃ᤻ᤒᤡᤖᤡᤖ ᤐᤥᤱ᤹॥” ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤗᤢ ᤐᤥᤱ᤹. ᤀᤠᤵᤋᤥᤴ ᤀᤠᤏᤡᤃᤣ ᤂᤧᤵᤛᤢᤶ ᤛᤠ᤹ᤖᤢᤶᤒᤧ॥”

¹⁴ ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤀᤠᤈᤠᤈᤠᤒᤠᤗᤠᤶ ᤆᤠᤔᤠ ᤗ᤺ᤴᤍᤧᤖᤥ. ᤁᤧᤎᤢᤶᤒᤠᤗᤠᤶ ᤁᤧᤗᤡᤶᤒᤠ ᤗ᤺ᤴᤍᤧᤖᤥ॥” ᤛᤢᤶᤕᤠᤴ ᤁᤢᤏᤢᤵᤔᤥ ᤌᤠᤖᤡᤰᤛᤠᤱ ᤂᤧᤱᤜᤠ᤹ᤖᤧ ᤂᤧᤴ ᤀᤠᤵᤋᤥᤴ ᤁᤢᤒᤣ ᤜᤶᤔᤠ ᤔᤧᤴᤇᤢᤰᤋᤢᤴ॥

¹⁵ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤛᤡᤔᤛᤥᤏᤖᤧ ᤁᤢᤔᤣ᤺ᤳᤋᤡᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤕᤧᤶᤒᤠ᤺ᤴ ᤗᤧᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤋᤥᤴ ᤜᤴᤍᤢ ᤐᤡᤖᤡᤃᤧᤖ. ᤔᤣ᤺ᤴᤏᤧᤓᤃᤪ ᤀᤠᤏᤡᤃᤣ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤜᤡᤶᤔᤡᤴ ᤔᤡ᤺ᤸᤗᤧ ᤔᤡᤎᤡᤰᤂᤢᤶᤍᤣᤛᤢᤶᤒᤧ॥ ᤌᤣ ᤂᤧᤏᤡ᤹ ᤀᤠᤏᤡᤃᤣ ᤕᤠᤱᤛᤠᤁᤢᤴᤎᤣᤜᤠ᤹ ᤏᤠᤵᤔᤠᤖᤧ ᤗᤠᤃᤡ ᤕᤠᤵᤔᤡ ᤁᤧᤀᤢ᤺ᤳᤋᤧᤒᤠᤒᤡ᥅”

¹⁶ ᤂᤧᤒᤩᤠᤱ ᤛᤡᤔᤛᤥᤏᤖᤧ ᤁᤢᤔᤣ᤺ᤳᤋᤡᤴ ᤂᤢᤏᤧ᤹ ᤁᤢᤍᤃᤡ ᤜᤠᤒᤧ ᤆᤡ᤺ᤰᤋᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤱᤃᤠ᤹ ᤁᤧᤈᤡ᤺ᤳᤋᤠᤖᤥ॥ ᤂᤧᤏᤧ᤹ ᤀᤠᤱᤃᤠ᤹ ᤗᤢᤱᤔᤠ᤹ ᤁᤧᤴᤍᤢᤰᤁᤠᤴ॥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤵᤋᤥ ᤁᤧᤍᤧᤶᤛᤢᤛᤡᤀᤠᤱ ᤘᤠ᤹. ᤁᤖ ᤂᤧᤴ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗ ᤔᤧᤴᤕᤠ᤺ᤴᤏᤣ ᤁᤧᤃᤳᤋᤠ॥” ᤂᤢᤏᤧ᤹ ᤁᤢᤔᤣ᤺ᤳᤋᤧᤴ ᤔᤧᤳᤋᤢ. “ᤀᤠᤱᤃᤠ᤹ᤃ ᤀᤠᤶᤒᤠ ᤀᤠᤶᤔᤠᤛᤡᤀᤠᤱ ᤂᤧᤴ ᤔᤧᤶᤔᤧᤳᤇᤡᤱᤅᤣ ᤁᤳᤋᤢᤱᤛᤡᤱ॥ ᤂᤧᤏᤧ᤹ ᤌᤣᤀᤠᤱ ᤔᤧᤳᤏᤧᤒᤣ᥅”

¹⁷ ᤁᤖ ᤛᤠᤓ᤺ᤱᤈᤠ᤺ᤸᤗᤧᤴ ᤏᤢᤛᤡ ᤕᤧᤴ ᤔᤧᤶᤔᤠ᤺ᤳᤋᤣ ᤌᤠᤖᤡᤰ ᤂᤧᤴ ᤂᤢᤏᤧ᤹ ᤁᤢᤍᤃᤡ ᤆᤰᤔᤧᤸᤗ᤹ᤀᤣ ᤜᤠᤒᤧᤀᤠᤱ ᤕᤢᤅᤧ॥ ᤁᤸᤗᤧᤆᤥᤃᤢᤸᤗᤧ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤧᤴ ᤛᤠ᤹ᤖᤡᤰ ᤜᤠᤍᤡᤱ ᤌᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤔᤣ᤺ᤳᤋᤡᤴ ᤆᤧᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ ᤆᤧᤰᤋᤢᤛᤡ॥

¹⁸ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤏᤠᤶᤎᤠᤔᤠᤏᤢ᤺ᤸᤗᤧ ᤋᤃᤡ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤛᤡᤔᤛᤥᤏᤧᤴ ᤀᤰᤂᤣ ᤔᤧᤔᤧᤳᤋᤢᤖᤥ. “ᤛᤰᤘᤠᤄᤢᤏᤢ᤺ᤸᤗᤧ ᤌᤣ᤺ᤴ ᤗᤡᤶᤔᤠᤱᤒᤣ᥅ ᤌᤧᤖᤡᤱᤒᤧᤴᤏᤢ᤺ᤸᤗᤧ ᤌᤣ᤺ᤴ ᤌᤢᤶᤔᤠᤱᤒᤣ᥅” ᤛᤡᤔᤛᤥᤏᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤱᤃᤠ᤹ ᤀᤠᤃᤖ᤺ᤱ ᤐᤡᤵᤔᤠ᤺ᤴ ᤁᤧᤴᤎᤥ᤺ᤰᤂᤢᤶᤔᤡᤴᤒᤠ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤁᤴ ᤀᤠᤵᤋᤥ᤺ᤰᤁᤡᤴ ᤜᤶᤔᤠ ᤁᤧᤴᤇᤢᤰᤋᤢᤶᤏᤧᤴᤒᤠ ᤘᤕᤧᤖᤥ॥”

¹⁹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤡᤔᤥ ᤛᤡᤔᤛᤥᤏᤀᤥ ᤕᤧ ᤜᤧᤰᤁᤩᤠᤱ ᤂᤢᤏᤧ᤹ ᤕᤥ ᤀᤛ᤻ᤁᤗᤥᤏ ᤌᤠᤛᤡᤱ ᤕᤧ. ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤛᤢᤶᤒᤥᤱ ᤔᤏᤠᤜᤠ᤹ ᤛᤧᤖᤢᤛᤡ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤡᤃᤰᤘᤠᤜᤠ᤹ ᤑᤧᤴᤍᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤱᤜᤠ᤹ ᤂᤧᤴ ᤀᤠᤵᤋᤥ ᤁᤧᤜᤶᤒᤠ ᤔᤏᤠᤜᤠ᤹ ᤐᤡᤖᤢᤛᤡ॥ ᤁᤖ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤌᤥ ᤐᤣ॥

²⁰ ᤔᤣ᤺ᤰᤂᤡᤶᤛᤠᤒᤧᤴᤏᤢ ᤁᤧᤘᤠ᤹ᤒᤠ ᤔᤏᤠᤴ ᤛᤡᤔᤛᤥᤏᤖᤧ ᤁᤢᤔᤣ᤺ᤳᤋᤡᤴ ᤔᤧᤒᤡᤖᤢᤖᤥ॥