ᤂᤠᤛᤧᤴᤗᤥ᤺ᤶᤒᤠ 13 - LIFOTNTᤛᤡᤔᤛᤥᤏᤧᤴ ᤛᤠᤘᤠ᤺ᤴᤇᤡᤱ 1 ᤕᤠᤶᤔᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ॥ 2 ᤍᤠᤏᤖᤧ ᤁᤢᤎᤠ᤺ᤰᤁᤥ ᤛᤥᤖᤠ ᤁᤧᤕᤢᤱᤒᤠ ᤔᤏᤠᤎᤡᤰ ᤘᤕᤧ. ᤂᤢᤏᤧ᤹ ᤁᤢᤔᤡᤱ ᤔᤠᤏᤥᤜ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣ᤺ᤳᤋᤡᤴ ᤛᤠᤔᤧᤱᤃᤵᤔᤏᤠᤔᤠ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠ᤺ᤳᤋᤠᤱ ᤁᤢᤛ᤻ᤛᤠᤁᤢᤀᤣ ᤔᤧᤜᤥ᤺ᤵᤋᤧ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤂᤧᤴ ᤔᤧᤴᤇᤢᤔᤠᤀᤥ ᤀᤥ᤺ᤴᤎᤠᤰᤛᤡᤱᤅᤠᤱ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤛᤠᤔᤧᤱᤃᤵᤔᤏᤠᤔᤠ ᤁᤧᤈᤥᤰ ᤜᤧᤰᤁᤩᤠᤱ ᤜᤠ᤺ᤳᤋᤠᤱ ᤁᤧᤛ᤻ᤛᤠᤁᤧᤀᤣ ᤔᤧᤜᤥᤵ. ᤁᤖ ᤂᤧᤏᤧ᤹ ᤔᤧᤴᤇᤢᤰᤔᤠ ᤁᤧᤒᤥᤱᤅᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤧᤃᤳᤋᤢ᤹॥ 4 ᤀᤠᤸᤗ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧ᤹. ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤀᤡᤃᤪ ᤘᤣ᤹ ᤀᤠᤔᤔᤒᤠ ᤜᤧᤴᤕᤠ ᤔᤧᤎᤢᤅᤧᤴᤏᤧ᤹. ᤜᤧᤰᤁᤩᤠᤱ ᤀᤠᤳᤋᤡᤴ ᤐᤖᤡᤰᤗᤧᤴ ᤀᤠᤛᤢᤳᤌᤥ ᤁᤢᤈᤠᤀᤠᤱ ᤔᤧᤴᤈᤠᤀᤧ᤹. 5 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤔᤧᤴᤇᤢᤰᤔᤠ ᤁᤧᤒᤥᤱᤅᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤧᤃᤳᤋᤢ᤹॥ ᤂᤧᤸᤗᤧ ᤁᤢᤎᤧᤃᤣᤰ ᤀᤡ᤺ᤴ ᤔᤧᤏ᤺ᤰᤂᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤛᤠᤘᤠ᤺ᤴᤇᤡᤱᤒᤠ ᤕᤧᤶᤔᤠᤱᤎᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤣ᤺ᤰ ᤛᤧᤶᤔᤏᤠᤒᤠ ᤏᤠᤈᤡᤖᤡ ᤐᤥᤱ᤹॥ ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤛᤧᤶᤔᤠ ᤜᤣ᤺ᤰᤋᤢᤛᤡ᤹॥” 6 ᤂᤧᤴ ᤔᤧᤴᤇᤢᤔᤠᤴ ᤐᤣᤀᤠᤱ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤀᤰᤂᤣ ᤔᤧᤳᤋᤢᤀᤠᤱ ᤆᤧᤰᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤌᤡᤰ ᤀᤠᤱᤃᤠ᤹ᤀᤥ ᤋᤩᤧ॥ ᤂᤢᤏᤧ᤹ ᤁᤢᤏᤠᤖᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤁᤢᤏᤠᤖᤠ ᤜᤧᤰᤋᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤀᤥᤔᤧᤵᤔᤧᤸᤗᤧ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤆᤥᤃᤧ॥ ᤂᤢᤏᤧ᤹ ᤀᤠᤳᤋᤡᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤣ᤺ᤴᤔᤧᤴᤍᤥᤒᤠ. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤁᤢᤔᤡᤱᤅᤡᤴ ᤀᤠᤱᤃᤠ᤹ ᤔᤧᤔᤧᤳᤋᤠᤱᤅᤡᤴ॥ 7 ᤁᤖ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. ‘ᤂᤧᤏᤧ᤹ ᤔᤧᤴᤇᤢᤰᤔᤠ ᤁᤧᤒᤥᤱᤅᤠᤱ ᤗᤳᤇᤠ ᤕᤧᤶᤒᤡᤳᤇᤠᤛᤠ ᤁᤧᤃᤳᤋᤢ᤹॥ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤀᤡᤃᤪ ᤘᤣ᤹ ᤀᤠᤔᤔᤒᤠ ᤜᤧᤴᤕᤠ ᤔᤧᤎᤢᤅᤧᤴᤏᤧ᤹. ᤜᤧᤰᤁᤩᤠᤱ ᤀᤠᤳᤋᤡᤴ ᤀᤠᤛᤢᤳᤌᤥ ᤁᤢᤈᤠᤀᤠᤱ ᤔᤧᤈᤩᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤆᤢᤰᤐᤧᤴ ᤛᤠᤘᤠ᤺ᤴᤇᤡᤱᤒᤠ ᤕᤧᤴᤏᤠᤱᤎᤥ ᤁᤢᤛᤡᤔᤠ ᤕᤧᤴ ᤌᤠᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤣ᤺ᤰ ᤛᤧᤶᤔᤏᤠᤒᤠ ᤏᤠᤈᤡᤖᤡ ᤐᤥᤱ᤹॥’” 8 ᤂᤧᤒᤩᤠᤱ ᤔᤠᤏᤥᤜᤖᤧ ᤕᤜᤘᤣ ᤍᤠᤱᤒᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤐᤣᤗᤡ ᤑᤠᤰᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤐᤣᤗᤡ ᤑᤠᤰᤏᤧ. ᤂᤧᤏᤧ᤹ ᤁᤧᤒᤠᤱᤄᤢᤒᤠ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤁᤢᤔᤏᤠᤴ ᤕᤠᤶᤔᤥ ᤌᤡᤰᤗᤧᤱ ᤀᤠᤴᤇᤡᤃᤧᤀᤥ ᤋᤠᤖᤖᤥ. ᤜᤧᤰᤁᤩᤠᤱ ᤂᤧᤴ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤜᤡᤱᤔᤠ ᤁᤢᤶᤔᤠᤖᤧ ᤗᤠᤃᤡ ᤀᤠᤴᤇᤡᤃᤣ ᤌᤣ ᤆᤥ᤺ᤰᤔᤠ ᤐᤥᤱ᤹ ᤂᤧᤴ ᤐᤠ᤺ᤴᤏᤡᤴ ᤀᤠᤴᤇᤡᤃᤣ ᤔᤧᤳᤇᤡᤃᤧᤖᤖᤥ॥” 9 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤏᤥᤜᤖᤧ ᤁᤢᤒᤣᤗᤡᤴ ᤂᤧᤵᤛᤢ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤀᤡᤰᤋᤠᤵᤐᤥ ᤁᤧᤕᤢᤱᤔᤠ ᤁᤧᤃᤶᤔᤠ ᤂᤧᤴ ᤔᤧᤴᤇᤢᤔᤠᤀᤥ ᤕᤠᤶᤔᤥ ᤕᤧ॥ ᤂᤢᤏᤧ᤹ ᤁᤢᤕᤧᤶᤒᤠ᤺ᤴ ᤂᤢᤏᤧ᤹ᤏᤢ ᤜᤥ᤺ᤵᤋᤧ॥ 10 ᤔᤧᤴᤇᤢᤔᤠᤴ ᤂᤡᤔᤥ ᤗᤥ᤺ᤰᤋᤧᤖ ᤐᤣᤀᤠᤱ ᤔᤠᤏᤥᤜ᤺ᤴ ᤔᤧᤳᤋᤢ. “ᤂᤧᤸᤗᤧ ᤕᤠ᤺ᤴᤍᤡᤰ ᤁᤧᤍᤠᤒᤠ ᤂᤧᤴ ᤔᤏᤠᤴ ᤕᤠᤶᤔᤥ ᤀᤠᤱᤃᤠ᤹ᤀᤥ ᤋᤩᤧᤀᤠᤱ ᤘᤠ᤹᥄” 11 ᤔᤠᤏᤥᤜ᤺ᤴ ᤂᤡᤔᤥ ᤂᤧᤴ ᤁᤢᤔᤣ᤺ᤳᤋᤧᤴᤏᤢ ᤐᤣ ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤋᤢᤔᤢᤀᤠᤱ ᤔᤧᤳᤋᤢ. “ᤌᤣ ᤀᤠᤱᤃᤠ᤹ ᤀᤠᤔᤣ᤺ᤳᤋᤧᤴᤏᤢ ᤜᤧᤏᤠ ᤁᤧᤔᤒᤠᤴ ᤂᤧᤏᤧ᤹ᤀᤣᤏᤧᤒᤡ᥅” ᤂᤧᤸᤗᤧ ᤐᤠ᤺ᤳᤋᤢ. “ᤀᤥᤘᤠ. ᤀᤠᤱᤃᤠ᤹ᤀᤣᤖᤥ॥” 12 ᤔᤠᤏᤥᤜᤖᤧ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤁᤧᤳᤋᤡᤸᤗᤧ. ᤂᤧᤴ ᤆᤢᤰᤐᤧᤸᤗᤧ ᤀᤠᤰᤋᤱᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱᤒᤣ ᤜᤧᤰᤁᤩᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱᤒᤣ᥅” 13 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤏᤥᤃᤵ ᤐᤡᤖᤢᤀᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤁᤧᤖᤧᤰ ᤂᤧᤏᤧ᤹ ᤁᤧᤔᤣ᤺ᤳᤋᤡᤸᤗᤧ ᤀᤡ᤺ᤳᤋᤢᤖ ᤏᤠ᤺ᤳᤋᤢᤖ ᤐᤥᤱ᤹॥ 14 ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤥᤗᤠᤶ ᤁᤧᤗ᤺ᤶᤒᤠ ᤌᤧᤔᤠᤀᤠᤱ ᤂᤢᤏᤧ᤹ ᤆᤠᤔᤠ ᤛᤠ᤹ᤔᤠ ᤔᤧᤏᤢ᤹ᤏᤧᤴ॥ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤀᤡᤃᤪ ᤀᤠᤔᤔᤒᤠ ᤌᤧᤔᤠᤀᤠᤱ ᤌᤢᤱᤔᤠ ᤔᤧᤏᤢ᤹ᤏᤧᤴ॥ ᤀᤠᤛᤢᤳᤌᤥ ᤁᤢᤈᤠ ᤌᤧᤔᤠᤀᤠᤱ ᤂᤢᤏᤧ᤹ ᤆᤠᤔᤠ ᤔᤧᤏᤢ᤹ᤏᤧᤴ॥ ᤀᤠᤱᤃᤠ᤹ ᤌᤣ ᤏᤠ᤺ᤳᤋᤢᤱᤅᤠᤱ ᤘᤠ᤹ ᤂᤧᤱᤜᤠ᤹ ᤁᤧᤖᤧᤰ ᤂᤢᤏᤧ᤹ ᤆᤥᤃᤢᤖ ᤐᤥᤱ᤹॥” 15 ᤔᤠᤏᤥᤜᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤔᤧᤳᤋᤢ. “ᤛᤵᤑᤠᤎᤡᤰ ᤀᤠᤳᤇᤡᤃᤧᤏᤢ ᤘᤕᤧ᤹. ᤜᤧᤰᤁᤩᤠᤱ ᤀᤠᤳᤇᤡᤃᤧ ᤂᤧᤏᤧ᤹ ᤁᤧᤗᤠᤃᤡ ᤔᤧ᤺ᤴᤍᤛᤠ᤺ᤳ ᤌᤡᤰ ᤛᤠ ᤌᤥ᤺ᤰᤛᤢᤃᤧᤖᤥ॥” 16 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤔᤧᤳᤋᤢ. “ᤂᤧᤴᤇᤡ᤹ ᤀᤠᤱᤃᤠ᤹ ᤗᤠᤶᤀᤠᤃ᤻ᤛᤠᤰᤛᤠᤱ ᤂᤧᤴᤇᤡ᤹ ᤁᤧᤍᤥ᤺ᤴᤇᤢᤒᤠ ᤁᤢᤈᤠᤴ ᤔᤧᤈᤠᤀᤠᤴ॥ ᤁᤖ ᤂᤧᤴᤇᤡ᤹ ᤌᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤛᤢᤏᤧᤓᤃᤪ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤕᤠᤖᤡᤵ ᤆᤥᤃᤧᤳᤇᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤂᤧᤴ ᤋᤥ᤺ᤴᤍᤧᤳᤇᤧ᤹॥” ᤜᤧᤰᤁᤣᤛᤠᤱ ᤔᤠᤏᤥᤜᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤑᤠ᤹ᤀᤠᤱ ᤂᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤴ॥ 17 ᤂᤧᤒᤩᤠᤱ ᤔᤠᤏᤥᤜᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤔᤡᤱ ᤌᤧᤔᤠᤒᤣ᥅ ᤂᤧᤏᤧ᤹ ᤁᤧᤒᤠ᤺ᤴᤈᤠ᤺ᤰᤁᤡᤴ ᤁᤧᤳᤋᤡᤸᤗᤧ ᤀᤠᤴᤇᤡᤃᤣ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤘᤠ᤹॥” 18 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤛᤣ᤺ᤴᤍᤥᤔᤠ ᤁᤧᤀᤠ᤺ᤴᤇᤡᤱᤒᤠᤒᤣ᥅ ᤁᤴ ᤔᤡᤱᤅᤡᤴ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰ॥” 19 ᤂᤧᤒᤩᤠᤱ ᤔᤠᤏᤥᤜᤖᤧ ᤔᤧ᤺ᤴᤍᤛᤠ᤺ᤳᤋᤡᤴ ᤏᤢ ᤏᤡᤱᤘᤠ᤹ᤗᤠᤶᤒᤠᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤕᤠᤱᤛᤡᤱᤅᤠᤱ ᤗᤢᤱᤈᤱᤅᤥ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤔᤠᤏᤥᤜ ᤏᤢ ᤂᤢᤏᤧ᤹ ᤁᤢᤔᤣ᤺ᤳᤋᤡᤸᤗᤧ ᤀᤥᤔᤧᤳᤋᤢᤛᤡᤀᤠᤱ ᤐᤳᤇᤧᤛᤡᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ॥ 20 ᤀᤠᤸᤗ ᤂᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤔᤡᤎᤢᤱ ᤔᤡᤖᤠ᤺ᤰ ᤐᤥᤃᤧ. ᤂᤧᤒᤩᤠᤱ ᤔᤡᤎᤢᤱ ᤔᤡᤖᤠ᤺ᤰᤁᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤌᤠ᤺ᤱ ᤗᤧᤵᤔᤠᤱ ᤐᤣ॥ ᤁᤴ ᤏᤡᤛᤧᤳᤇᤢᤀᤠᤱ ᤔᤠᤏᤥᤜ ᤏᤢ ᤂᤢᤏᤧ᤹ ᤁᤢᤔᤣ᤺ᤳᤋᤡᤴ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤑᤴᤏᤧᤳᤇᤡ॥ 21 ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤁᤢᤔᤠᤱᤗᤠᤀᤡᤱᤒᤧᤴ ᤔᤠᤏᤥᤜ ᤏᤢ ᤂᤢᤏᤧ᤹ ᤁᤢᤔᤣ᤺ᤳᤋᤥ ᤕᤠᤶᤔᤥ ᤀᤥ᤺ᤴᤔᤧᤎᤠᤰᤛᤡᤱᤅᤧᤴ. ᤜᤧᤰᤁᤩᤠᤱ ᤔᤠᤏᤥᤜᤖᤧ ᤂᤧᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠ ᤀᤡᤱᤒᤠᤖᤧᤳᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢ॥ 22 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣ᤺ᤳᤋᤡᤴ ᤔᤧᤳᤋᤢ. “ᤛᤧᤰᤂᤠᤛᤠᤱ ᤀᤠᤴᤇᤡ᤹ ᤀᤠᤛᤡᤛᤡ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤴᤇᤡ᤹ ᤀᤠᤏᤡᤛᤧᤳᤇᤢᤀᤠᤱ ᤘᤠ᤹॥” 23 ᤁᤖ ᤂᤢᤏᤧ᤹ ᤁᤢᤔᤣ᤺ᤳᤋᤧᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤴᤇᤡ᤹ ᤛᤧᤵᤔᤠᤀᤣ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤒᤠ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤀᤠᤴᤇᤡ᤹ ᤜᤢᤰᤁᤥᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤏᤢ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤔᤧᤍᤠ᤺ᤰᤋᤢᤶᤒᤠ ᤘᤕᤧ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤠᤵᤔᤡ ᤀᤥ᤺ᤴᤔᤧᤎᤠᤰᤋᤧᤶᤒᤠ ᤀᤡᤃᤪ ᤔᤧᤒᤠ᤺ᤳᤋᤢᤶᤒᤠ ᤘᤕᤧ॥” 24 ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤀᤠᤱ ᤛᤡᤔᤛᤥᤏ ᤔᤡᤱ ᤘᤠ᤺ᤳᤋᤢ॥ ᤂᤧᤴ ᤀᤅᤧ᤺ᤰᤘᤠᤴ ᤐᤥᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢ॥ 25 ᤜᤧᤰᤁᤩᤠᤱ ᤂᤢᤏᤧ᤹ ᤛᤥᤖᤠ ᤏᤢ ᤀᤣᤛ᤻ᤋᤥᤗᤖᤧ ᤁᤢᤗᤢᤶᤔᤥ ᤁᤧᤏᤧᤒᤠ ᤔᤜᤏᤣᤜ-ᤍᤠᤏᤀᤥ ᤕᤢᤅᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤂᤢᤏᤧ᤹ ᤌᤢᤰᤔᤠ ᤜᤣ᤺ᤰᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.