ᤂᤠᤛᤧᤴᤗᤥ᤺ᤶᤒᤠ 12 - LIFOTNT

ᤕᤡᤵᤋᤠ ᤏᤢ ᤀᤣᤑᤪᤠᤀᤡᤔᤡᤜᤠ᤹

¹ ᤀᤣᤑᤪᤠᤀᤡᤔᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤔᤧᤓᤢᤰᤂᤢᤛᤡ. ᤜᤧᤰᤁᤩᤠᤱ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢᤀᤠᤱ ᤛᤠᤐᤥᤏ ᤔᤧᤒᤣ॥ ᤂᤧᤱᤜᤠ᤹ᤖᤧ ᤕᤡᤵᤋᤠᤴ ᤔᤧᤔᤧᤳᤋᤢ. “ᤀᤶᤔᤥᤏᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤁᤧᤒᤣ᤺ᤸᤗᤧ ᤀᤠᤏᤡᤃᤣ ᤌᤣᤀᤠᤱ ᤕᤠᤵᤔᤡ ᤁᤧᤴᤀᤢ᤺ᤳᤋᤧᤴ᥅ ᤀᤠᤏᤡᤃᤣ ᤂᤧᤏᤧ᤹ ᤏᤢ ᤁᤧᤜᤡᤶᤔᤡᤴᤏᤠᤱ ᤔᤡᤎᤡᤰᤂᤢᤶ ᤐᤡᤀᤠᤛᤡᤃᤧ॥”

² ᤕᤡᤵᤋᤠ᤺ᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤶᤔᤥᤏᤡᤜᤠ᤹ᤏᤢ ᤕᤶᤒᤠ ᤂᤧᤔᤠ᤹ ᤔᤧᤈᤥᤃᤧᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤀᤠᤓᤠ᤹ᤖᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤐᤣᤗᤡ ᤑᤠᤰᤏᤡᤱᤅᤠᤱ ᤘᤕᤧ॥ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤏᤡᤃᤣ ᤕᤠᤵᤔᤡ ᤋᤠᤱᤁᤧᤴᤇᤧ᤺ᤵᤋᤡᤴ॥

³ ᤂᤧᤒᤩᤠᤱ ᤀᤠᤏᤡᤃᤣ ᤂᤡᤏᤡ᤹ᤗᤠᤶ ᤌᤧᤔᤠᤀᤠᤱ ᤁᤢᤓᤠ᤹ ᤔᤧᤄᤥᤛᤢᤶᤒᤧᤴᤒᤠᤖᤧᤳᤇ ᤁᤧᤗ᤹ᤒᤠ ᤀᤠᤱᤃᤠ᤹ ᤏᤡᤛᤢᤱ. ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤜᤡᤱᤔᤧᤴ ᤁᤧᤛᤠᤰᤐᤥ ᤌᤠᤛᤢᤱᤅᤠᤱ ᤀᤶᤔᤥᤏᤡᤜᤠ᤹ ᤁᤠ᤺ᤰᤋᤢᤱᤛᤡᤱᤅᤠᤱ ᤐᤣᤃᤠᤱ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤛᤢᤛᤡ॥ ᤀᤠᤸᤗ ᤀᤠᤀᤡᤴ ᤂᤡᤏᤡ᤹ ᤌᤣᤀᤠᤱ ᤀᤠᤱᤃᤠ᤹ ᤌᤱᤅᤥ ᤑᤵᤔᤠᤖᤧ ᤗᤠᤃᤡ ᤁᤧᤍᤩᤧ᤹ᤀᤡᤒᤠᤒᤣ᥅”

⁴ ᤂᤧᤒᤩᤠᤱ ᤕᤡᤵᤋᤠ᤺ᤸᤗᤧ ᤃᤡᤗᤠᤍᤒᤠ ᤁᤧᤖᤧᤰ ᤔᤏᤠᤜᤠ᤹ ᤑᤢᤰᤂᤢᤛᤡᤀᤠᤱ ᤀᤣᤑᤪᤠᤀᤡᤔᤡᤜᤠ᤹ᤏᤢ ᤌᤰᤋᤧ॥ ᤃᤡᤗᤠᤍᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤜᤡᤵᤋᤢᤛᤡ. ᤌᤣᤀᤠᤱᤓᤧᤸᤗᤧ ᤀᤣᤑᤪᤠᤀᤡᤔᤡᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤘᤕᤧ. “ᤂᤡᤏᤡ᤹ ᤃᤡᤗᤠᤍᤡᤜᤠ᤹ᤃ ᤀᤣᤑᤪᤠᤀᤡᤔ ᤏᤢ ᤔᤏᤛ᤻ᤛᤣᤗᤠᤶ ᤁᤧᤄᤧᤳᤇᤡᤱᤒᤠᤀᤠᤱ ᤁᤧᤒᤣ᤺ᤰᤐᤠᤏᤡᤱᤗᤥ॥”

⁵ ᤃᤡᤗᤠᤍᤡᤜᤠ᤹ᤖᤧ ᤕᤷᤍᤏ ᤘᤜ᤺ᤱ ᤁᤢᤕᤠᤀᤥᤒᤠ ᤐᤡᤳᤗᤢᤱᤜᤠ᤹ ᤔᤧᤔᤧᤳᤇᤡᤱ. ᤜᤧᤰᤁᤩᤠᤱ ᤀᤣᤑᤪᤠᤀᤡᤔᤡᤜᤠ᤹ ᤐᤣ᤺ᤰᤔᤠ ᤔᤧᤶᤓᤠ᤺ᤰᤛᤡᤱᤅᤣ ᤔᤧᤎᤣ᤺ᤰᤋᤢ ᤔᤧᤕᤧᤵᤛᤢᤛᤡ॥ ᤀᤠᤸᤗ ᤁᤧᤄᤧᤳᤇᤡᤱᤒᤠ ᤁᤢᤓᤠ ᤀᤣᤑᤪᤠᤀᤡᤔᤡ ᤌᤡᤰᤗᤧ ᤏᤠᤎᤠ᤺ᤶᤒᤡ ᤁᤠ᤺ᤰᤔᤠᤀᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤧᤸᤗᤧ ᤃᤡᤗᤠᤍᤒᤠ ᤔᤏᤠᤜᤠ᤹ᤖᤧ ᤂᤧᤴ ᤛᤣ᤺ᤴᤔᤧᤍᤥᤛᤢ. “ᤌᤣ ᤂᤧᤏᤧ᤹ ᤀᤣᤑᤪᤠᤀᤡᤔᤡᤏᤧᤒᤡ᥅” ᤜᤧᤰᤁᤩᤠᤱ ᤂᤧᤸᤗᤧ “ᤔᤣ᤺ᤴ” ᤐᤠ᤺ᤳᤋᤢᤏᤧᤓᤃᤪ

⁶ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤜᤧᤰᤁᤣᤏᤧᤓᤃᤪ ‘ᤛᤡᤒ᤻ᤒᤥᤗᤣᤋ’ ᤐᤠ᤺ᤳᤋᤧ᤹॥” ᤂᤧᤸᤗᤧ ᤏᤢᤖᤡᤰ ᤗᤧᤱᤔᤠ ᤔᤧᤴᤇᤢᤰᤁᤣ “ᤆᤡᤒ᤻ᤒᤥᤗᤣᤋ” ᤐᤠ᤺ᤳᤋᤢᤏᤧᤓᤃᤪ. ᤂᤧᤱᤜᤠ᤹ᤖᤧ ᤂᤧᤴ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤐᤡᤳᤗᤢᤱᤜᤠ᤹ᤀᤥ ᤔᤧᤍᤧᤶᤛᤢᤀᤠᤱ ᤔᤧᤛᤧᤖᤢ॥ ᤂᤧᤴ ᤕᤧᤶᤔᤥ ᤀᤣᤑᤪᤠᤀᤡᤔᤒᤠ ᥊᥈.᥆᥆᥆ ᤔᤏᤠᤜᤠ᤹ ᤔᤧᤛᤧᤖᤢᤛᤡᤀᤠᤱ ᤘᤕᤧ॥

⁷ ᤕᤡᤵᤋᤠᤴ ᤋᤱᤒᤣ ᤋᤢᤰᤛᤡ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥ ᤂᤧᤒᤩᤠᤱ ᤃᤡᤗᤠᤍᤡ ᤕᤡᤵᤋᤠᤴ ᤔᤠᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤃᤡᤗᤠᤍᤒᤠ ᤗᤳᤇᤠ ᤕᤧᤰᤕᤰᤁᤥ ᤔᤧᤈᤡᤰᤂᤢᤖᤥ॥

ᤀᤡᤒ᤻ᤛᤠᤏ. ᤀᤣᤗᤥᤏ ᤏᤢ ᤀᤒ᤻ᤍᤥᤏ

⁸ ᤕᤡᤵᤋᤠᤴ ᤀᤣᤃᤠᤱ ᤒᤣᤌᤗᤧᤜᤧᤔᤒᤠ ᤀᤡᤒ᤻ᤛᤠᤏ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

⁹ ᤂᤢᤏᤧ᤹ ᤛᤢᤶᤒᤥᤱ ᤕᤧᤶᤒᤡᤳᤇᤠ ᤁᤢᤛ᤻ᤛᤠ ᤏᤢ ᤛᤢᤶᤒᤥᤱ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤧᤘᤕᤧ॥ ᤂᤢᤏᤧ᤹ ᤂᤧᤴ ᤛᤢᤶᤒᤥᤱ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤘᤣ᤹ ᤌᤠ᤺ᤰᤜᤠ᤹ᤏᤢ ᤔᤣ᤺ᤰᤂᤡᤶ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤗᤠᤃᤡ ᤛᤢᤶᤒᤥᤱ ᤔᤧᤴᤇ᤻ᤕᤠᤜᤠ᤹ ᤘᤣ᤹ ᤌᤠ᤺ᤰᤜᤠ᤹ᤗᤠᤶ ᤋᤠᤖᤢᤛᤡ॥ ᤂᤢᤏᤧ᤹ ᤏᤢᤛᤡ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

¹⁰ ᤂᤧᤒᤩᤠᤱ ᤂᤢᤏᤧ᤹ ᤔᤠᤛᤡᤱ. ᤜᤧᤰᤁᤩᤠᤱ ᤒᤣᤌᤗᤧᤜᤧᤔᤀᤥ ᤔᤧᤈᤡᤰᤂᤢᤖᤥ॥

¹¹ ᤀᤡᤒ᤻ᤛᤠᤏᤧᤸᤗᤧ ᤁᤢᤀᤣᤃᤠᤱ ᤈᤒᤢᤗᤢᤏᤒᤠ ᤀᤣᤗᤥᤏᤧᤴ ᤋᤱᤒᤣ ᤌᤡᤒᤥᤱ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

¹² ᤂᤧᤒᤩᤠᤱ ᤂᤧᤴ ᤔᤠᤛᤡᤱ. ᤜᤧᤰᤁᤩᤠᤱ ᤈᤒᤢᤗᤢᤏᤒᤠ ᤗᤠᤈᤣ᤹ ᤀᤕᤩᤠᤗᤥᤏᤀᤥ ᤔᤧᤈᤡᤰᤂᤢᤖᤥ॥

¹³ ᤂᤧᤴ ᤀᤣᤃᤠᤱ ᤐᤡᤖᤠᤋᤥᤏᤡ ᤜᤡᤸᤗᤣᤗᤖᤧ ᤁᤢᤛ᤻ᤛᤠ ᤀᤒ᤻ᤍᤥᤏᤧᤴ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

¹⁴ ᤂᤢᤏᤧ᤹ ᤗᤡᤒᤥᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤛᤢᤶᤒᤥᤱ ᤁᤢᤶᤔᤧᤴᤇᤠ᤹ ᤔᤧᤘᤕᤧ. ᤜᤧᤰᤁᤩᤠᤱ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤀᤍᤱᤜᤠ᤹ ᤔᤧᤕᤢᤰᤋᤢᤛᤡ॥ ᤂᤢᤏᤧ᤹ ᤕᤧᤳᤇᤡ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

¹⁵ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤔᤠᤛᤡᤱ. ᤜᤧᤰᤁᤩᤠᤱ ᤀᤔᤠᤗᤧᤁᤡᤜᤠ᤹ᤖᤧ ᤂᤢᤴᤇᤡ᤹ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤒᤠ ᤀᤣᤑᤪᤠᤀᤡᤔᤒᤠ ᤐᤡᤖᤠᤋᤥᤏᤀᤥ ᤔᤧᤈᤡᤰᤂᤢᤖᤥ॥