ᤂᤠᤛᤧᤴᤗᤥ᤺ᤶᤒᤠ 11 - LIFOTNT

¹ ᤃᤡᤗᤠᤍᤒᤠ ᤕᤡᤵᤋᤠᤴ ᤗᤳᤇᤠ ᤔᤢᤰᤁᤧᤃᤢᤒᤠ ᤌᤱᤃᤧᤈᤥ᤺ᤰᤐᤠ ᤘᤕᤧ॥ ᤂᤢᤏᤧ᤹ ᤗᤳᤇᤠ ᤁᤧᤳᤏᤡᤔᤠ ᤗᤧᤵᤔᤠᤱᤒᤠ ᤃᤡᤗᤠᤍᤖᤧ ᤁᤢᤛ᤻ᤛᤠ ᤘᤕᤧ॥

² ᤁᤖ ᤃᤡᤗᤠᤍᤖᤧ ᤁᤢᤔᤣ᤺ᤳᤋᤡᤸᤗᤧᤀᤠᤱ ᤂᤢᤏᤧ᤹ ᤕᤖᤡᤰ ᤕᤧᤶᤒᤡᤳᤇᤠᤛᤠᤜᤠ᤹ ᤁᤳᤋᤢ ᤐᤡᤖᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤕᤡᤵᤋᤠᤴ ᤔᤧᤏᤠ᤺ᤳᤋᤢ ᤔᤧᤍᤣᤛᤢ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤣ ᤐᤠ᤺ᤸᤗᤧ ᤁᤢᤜᤡᤶᤔᤥ ᤂᤧᤏᤧ᤹ ᤁᤧᤗᤰᤂᤥᤔᤠ ᤌᤣᤀᤠᤱ ᤜᤥᤵ॥ ᤂᤧᤏᤧ᤹ᤃ ᤘᤣ᤹ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠᤏᤧ॥”

³ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤴᤓᤢ᤹ᤁᤢᤴᤛᤠ᤹ᤜᤠ᤹ᤗᤠᤶ ᤕᤡᤵᤋᤠᤴ ᤂᤧᤳᤇᤡᤱᤅᤠᤱ ᤋᤥᤒ ᤗᤠᤈᤣ᤹ᤀᤥ ᤕᤢᤱᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤁᤢᤓᤠ ᤁᤢᤏᤧᤜᤡ ᤁᤧᤜᤥᤵᤐᤠ ᤔᤏᤠᤜᤠ᤹ ᤂᤢᤏᤧ᤹ ᤁᤢᤃᤧᤖᤧᤰ ᤐᤡᤛᤠᤱ ᤔᤧᤈᤢᤵᤛᤧᤀᤠᤱ ᤂᤢᤏᤧ᤹ ᤔᤧᤍᤡᤶᤍᤢ॥

⁴ ᤁᤢᤓᤠ ᤕᤧᤶ ᤀᤣᤃᤠᤱ ᤀᤶᤔᤥᤏᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤌᤱᤅᤥ ᤔᤧᤓᤳᤋᤢᤛᤡ॥

⁵ ᤀᤠᤸᤗ ᤌᤱ ᤐᤥᤱᤔᤠ ᤜᤣ᤺ᤰᤋᤧᤸᤗᤧ ᤃᤡᤗᤠᤍᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ ᤋᤥᤒ ᤗᤠᤈᤣ᤹ᤀᤥ ᤕᤡᤵᤋᤠ᤺ᤸᤗᤧ ᤁᤢᤗᤠᤛᤧ ᤔᤧᤒᤣ॥

⁶ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤑᤧᤖᤧ᤹ᤀᤠᤱ ᤀᤠᤏᤡᤃᤣ ᤌᤰᤔᤥᤒᤠ ᤐᤥ᤺ᤰᤂᤧ᤹ ᤜᤧᤰᤁᤩᤠᤱ ᤀᤶᤔᤥᤏᤡᤜᤠ᤹ᤏᤢ ᤀᤠᤏᤡ᤹ ᤌᤱ ᤆᤥ᤺ᤰᤔᤠ ᤀᤠᤛᤢᤰ॥”

⁷ ᤁᤖ ᤕᤡᤵᤋᤠᤖᤧ ᤃᤡᤗᤠᤍᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤱᤃᤠ᤹ ᤀᤠᤃ᤻ᤈᤡ᤺ᤳᤋᤧᤀᤠᤱ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤔᤥᤗᤠᤶ ᤀᤠᤃ᤻ᤏᤠ᤺ᤳᤋᤧ ᤀᤠᤃ᤻ᤍᤣᤛᤧ॥ ᤀᤠᤸᤗ ᤋᤢᤰᤂᤣ ᤁᤧᤍᤢᤔᤡᤸᤗᤧ ᤂᤡᤏᤡ᤹ ᤌᤣᤀᤠᤱ ᤀᤠᤱᤃᤠ᤹ᤀᤥ ᤁᤧᤍᤩᤧ᤹ᤀᤡᤒᤠᤒᤣ᥅”

⁸ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤏᤡᤃᤧᤀᤥ ᤁᤧᤓᤧᤴᤏᤠᤱ ᤀᤶᤔᤥᤏᤡᤜᤠ᤹ᤏᤢ ᤌᤱ ᤁᤧᤈᤥ᤺ᤰᤏᤧᤓᤃᤪ. ᤀᤠᤏᤡᤃᤧᤀᤥ ᤂᤧᤏᤧ᤹ ᤃᤡᤗᤠᤍ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠ ᤆᤥ᤺ᤰᤁᤠᤛᤡᤃᤧ ᤜᤧᤰᤁᤩᤠᤱ ᤀᤠᤸᤗ ᤀᤠᤏᤡᤃᤣ ᤂᤧᤏᤧ᤹ ᤗᤧᤵᤔᤠᤱ ᤐᤳᤇᤡᤃᤧ॥”

⁹ ᤕᤡᤵᤋᤠᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤶᤔᤥᤏᤡᤜᤠ᤹ᤏᤢ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤕᤠᤵᤔᤡ ᤁᤧᤏᤢ᤺ᤰᤋᤡ ᤁᤧᤍᤣ᤹ᤖᤡ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤌᤠᤛᤢᤛᤡ ᤐᤡᤀᤠᤏᤧᤓᤃᤪ ᤌᤣ ᤛᤧᤰᤂᤠᤀᤣ ᤀᤠᤱᤃᤠ᤹ ᤂᤡᤏᤡ᤹ ᤕᤢᤰᤛᤠᤒᤠ ᤀᤠᤃ᤻ᤈᤥ᤺ᤰᤐᤡ᥅”

¹⁰ ᤃᤡᤗᤠᤍᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ᤖᤧ ᤕᤡᤵᤋᤠᤴ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤴ ᤀᤠᤏᤡ᤹ ᤗᤢᤶᤔᤥ ᤁᤧᤏᤡᤒᤠ ᤋᤥ᤺ᤴᤍᤡ ᤘᤠ᤹॥ ᤀᤠᤏᤡᤃᤣ ᤂᤢᤏᤧ᤹ᤀᤥ ᤔᤠᤱᤜᤧᤰᤁᤠᤛᤡᤃᤧᤀᤠᤱ ᤐᤠ᤺ᤳᤋᤢᤶᤒᤧ ᤀᤠᤏᤡᤃᤣ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤆᤥᤃᤢᤶᤒᤧ॥”

¹¹ ᤂᤧᤒᤩᤠᤱ ᤃᤡᤗᤠᤍᤒᤠ ᤁᤠᤵᤐᤥ ᤋᤢᤶᤛᤠᤜᤠ᤹ᤏᤢ ᤛᤥᤖᤡᤰ ᤕᤡᤵᤋᤠᤴ ᤐᤣ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤢᤴᤇᤡ᤹ ᤕᤢᤰᤛᤠᤒᤠ ᤏᤢ ᤌᤰᤔᤥᤒᤠ ᤔᤧᤈᤥᤃᤢ॥ ᤂᤶᤓᤩᤠᤱ ᤔᤡᤛ᤻ᤐᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤡᤵᤋᤠ᤺ᤸᤗᤧ ᤂᤢᤏᤧ᤹ ᤁᤧᤖᤧᤰ ᤁᤢᤒᤠ᤺ᤴᤜᤠ᤹ ᤕᤠᤶᤔᤥ ᤐᤠ᤺ᤳᤋᤢ॥

¹² ᤂᤧᤒᤩᤠᤱ ᤕᤡᤵᤋᤠ᤺ᤸᤗᤧ ᤀᤶᤔᤥᤏᤒᤠ ᤜᤠᤱᤅᤡᤴ ᤀᤰᤂᤣ ᤔᤧᤳᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. “ᤂᤧᤏᤧ᤹ ᤌᤣᤀᤠᤱ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤁᤧᤒᤥᤃᤧᤀᤠᤱ ᤀᤠᤏᤡᤃᤣ ᤗᤠᤈᤣᤴ ᤌᤱᤅᤥ ᤁᤧᤓᤳᤋᤢ᥅”

¹³ ᤀᤶᤔᤥᤏᤒᤠ ᤜᤠᤱᤅᤡᤸᤗᤧ ᤕᤡᤵᤋᤠ᤺ᤸᤗᤧ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤎᤥ᤺ᤰᤛᤡᤱ ᤔᤧᤎᤠᤅᤧᤸᤗᤧ ᤂᤧᤱᤜᤠ᤹ᤖᤧ ᤀᤷᤏᤥᤏ ᤘᤜ᤺ᤱᤗᤠᤶ ᤕᤒ᤻ᤒᤥᤁ ᤏᤢ ᤕᤷᤍᤏ ᤘᤜ᤺ᤱ ᤌᤠᤖᤡᤰᤐᤠ ᤀᤠᤏᤡᤃᤣ ᤗᤠᤈᤣᤴ ᤔᤧᤍᤣ᤹ᤖᤢ॥ ᤁᤴ ᤗᤠᤈᤣᤴ ᤔᤧᤱᤄᤣᤀᤣ ᤔᤧᤴᤎᤰᤁᤣ ᤀᤠᤏᤢ᤺ᤰᤋᤧ ᤀᤠᤒᤡᤖᤧ᤹॥”

¹⁴ ᤕᤡᤵᤋᤠ᤺ᤸᤗᤧ ᤀᤶᤔᤥᤏᤒᤠ ᤜᤠᤱᤅᤥ ᤏᤡᤛᤡᤃᤣᤰ ᤗᤧᤱ ᤕᤠᤶᤔᤥ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡᤖᤥ—

¹⁵ “ᤕᤡᤵᤋᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤴᤏᤠᤱ ᤔᤧᤴᤍᤣ᤹ᤖᤢᤴ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤺ᤴᤏᤠᤱ ᤔᤧᤴᤍᤣ᤹ᤖᤢᤴ॥

¹⁶ ᤁᤖ ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤎᤥ᤺ᤰᤛᤡᤱ ᤔᤧᤎᤠᤅᤧᤸᤗᤧ. ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤔᤧᤒᤥ᤺ᤰᤂᤧᤀᤠᤱ ᤜᤧ᤺ᤳᤋᤠᤱᤒᤠ ᤘᤖ᤺ᤱᤅᤥ ᤔᤧᤒᤣ ᤜᤧᤰᤁᤩᤠᤱ ᤁᤠᤍᤣᤛ ᤔᤧᤃᤧᤖᤧ॥

¹⁷ ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤡᤱᤛᤠᤒᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤀᤣᤍᤥᤔᤒᤠ ᤜᤠᤱᤅᤥ ᤔᤧᤒᤠᤱᤄᤢ ᤔᤧᤍᤣᤛᤢᤛᤡ. ‘ᤂᤧᤏᤧ᤹ ᤁᤧᤗᤠᤈᤣ᤹ᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤀᤠᤏᤡᤃᤣ ᤀᤠᤓᤠ᤺ᤰᤋᤧ᤹.’ ᤁᤖ ᤀᤣᤍᤥᤔᤒᤠ ᤜᤠᤱᤅᤡᤴ ᤂᤧᤶᤔᤠᤀᤣ ᤔᤧᤍᤧᤴᤍᤧᤴ॥ ᤂᤧᤱᤜᤠ᤹ᤖᤧ ᤔᤥᤀᤠᤒᤒᤠ ᤜᤠᤱᤅᤥᤀᤠᤱ ᤔᤧᤒᤠᤱᤄᤢᤛᤡ. ᤁᤖ ᤂᤢᤏᤧ᤹ᤀᤠᤱ ᤔᤧᤍᤧᤴᤍᤧᤴ॥ ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤁᤠᤍᤣᤛᤀᤥᤀᤣ ᤔᤧᤕᤢᤅᤧ॥

¹⁸ “ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤔᤧᤎᤠᤛᤡᤱ ᤀᤧᤍᤥᤔ ᤏᤢ ᤔᤥᤀᤠᤒ ᤗᤠᤈᤣ᤹ᤜᤠ᤹ ᤔᤧᤃᤒᤢᤀᤠᤱ ᤔᤥᤀᤠᤒ ᤏᤠᤱᤃᤧᤴ ᤗᤧᤵᤔᤠᤱ ᤔᤧᤃᤧᤖᤧ॥ ᤂᤧᤱᤜᤠ᤹ᤖᤧ ᤀᤷᤏᤥᤏ ᤘᤜ᤺ᤱ ᤏᤠᤎᤠ᤺ᤶᤒᤡ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ. ᤁᤖ ᤂᤧᤱᤜᤠ᤹ ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ᤀᤥᤃ ᤔᤧᤸᤗᤠᤛᤧᤴ. ᤌᤣᤀᤠᤱᤓᤧᤸᤗᤧ ᤀᤷᤏᤥᤏ ᤘᤜ᤺ᤱᤅᤡᤴ ᤔᤥᤀᤠᤒᤒᤠ ᤀᤡ᤺ᤴᤍᤥᤀᤥ ᤏᤧᤛ᤻ᤛᤧ॥

¹⁹ “ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤣᤛ᤻ᤒᤥᤏᤀᤥ ᤜᤠᤱ ᤁᤧᤈᤥ᤺ᤰᤐᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤧᤴ ‘ᤀᤠᤏᤡᤃᤣ ᤗᤠᤈᤣ᤹ᤀᤥ ᤁᤧᤵᤔᤠᤖᤧ ᤗᤠᤃᤡ ᤁᤧᤗᤠᤈᤣ᤹ᤀᤥᤗᤠᤶ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ᤹’ ᤗ᤹ᤖᤡᤰ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ॥

²⁰ ᤁᤖ ᤛᤡᤜᤥᤏᤖᤧ ᤀᤡᤛᤪᤠᤀᤡᤗᤡᤜᤠ᤹ ᤁᤢᤗᤠᤈᤣ᤹ᤀᤥᤗᤠᤶ ᤐᤥᤱᤔᤠᤀᤠᤱ ᤐᤣ᤺ᤰᤔᤠᤖᤧ ᤗᤠᤃᤡ ᤏᤛᤠᤴ ᤔᤧᤈᤥᤃᤢᤛᤡᤴ॥ ᤂᤢᤏᤧ᤹ ᤁᤧᤖᤧᤰ ᤁᤢᤔᤏᤠᤜᤠ᤹ ᤑᤢᤰᤂᤢᤛᤡ. ᤜᤧᤰᤁᤩᤠᤱ ᤕᤜᤛᤠᤀᤥ ᤛᤠ᤺ᤱᤃᤠᤜᤡᤶᤜᤠ᤹ ᤆᤥᤃᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥᤃᤧ॥

²¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤜᤥᤏᤧᤴ ᤏᤢ ᤂᤧᤸᤗᤧ ᤁᤧᤖᤧᤰ ᤁᤢᤔᤏᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ. ᤂᤶᤓᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡᤀᤠᤱ ᤂᤧᤴ ᤋᤧᤴᤏᤥ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤔᤧᤕᤢᤰᤋᤢ॥

²² ᤂᤧᤱᤜᤠ᤹ᤖᤧ ᤀᤷᤏᤥᤏ ᤘᤜ᤺ᤱᤗᤠᤶ ᤕᤒ᤻ᤒᤥᤁ ᤘᤜ᤺ᤱ ᤌᤠᤖᤡᤰ ᤏᤢ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤕᤷᤍᤏ ᤘᤜ᤺ᤱ ᤌᤠᤖᤡᤰᤁᤣ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤋᤧᤱᤃᤵᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡ॥

²³ “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤀᤣᤔᤥᤖᤡᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡ॥ ᤀᤠᤸᤗ ᤁᤴ ᤏᤢ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤣ ᤕᤢᤰ ᤁᤧᤃᤳᤋᤢ᤹᥅

²⁴ ᤂᤡᤏᤡ᤹ ᤔᤠᤱ ᤁᤔᤥᤛᤖᤧ ᤂᤡᤏᤡ᤹ ᤌᤣ ᤁᤧᤒᤡᤖᤡᤛᤠᤱ ᤁᤧᤍᤠ᤺ᤰᤋᤢᤶ᤹ ᤔᤣ᤺ᤶᤒᤡ᥅ ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤌᤣ ᤐᤡᤖᤡᤃᤧ ᤂᤧᤴᤏᤣ ᤋᤠ᤺ᤰᤋᤢᤶᤒᤧ॥

²⁵ ᤀᤠᤸᤗ ᤔᤥᤀᤠᤒᤒᤠ ᤜᤠᤱ ᤛᤡᤵᤐᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤁᤧᤴᤏᤢ᤺ᤸᤗᤧ ᤌᤣ ᤂᤧᤏᤧ᤹ ᤏᤢᤒᤠ ᤁᤧᤈᤥ᤺ᤰᤁᤠᤱᤒᤡ᥅ ᤀᤠᤓᤧᤸᤗᤧ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤂᤧᤔᤠ᤹ ᤆᤥᤃᤧᤀᤠᤱ ᤌᤱᤅᤥ ᤑᤳᤋᤢᤛᤡᤒᤣ᥅

²⁶ “ᤁᤡᤵ ᤛᤢᤶᤛᤡ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤜᤣᤛ᤻ᤒᤥᤏ. ᤀᤖᤥᤀᤣᤖ ᤏᤢ ᤂᤧᤴ ᤁᤧᤖᤧᤰ ᤐᤡᤛᤠᤱᤒᤠ ᤐᤠᤱᤈᤢᤶᤜᤠ᤹ᤀᤥ ᤜᤧᤰᤁᤩᤠᤱ ᤀᤷᤏᤥᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤔᤧᤕᤢᤅᤧ॥ ᤂᤧᤴ ᤕᤧᤶᤔᤥ ᤂᤡᤏᤡ᤹ ᤂᤧᤴ ᤕᤧᤰᤕᤰᤜᤠ᤹ ᤌᤣᤀᤠᤱ ᤁᤧᤴᤏᤢ᤺ᤰᤋᤢᤶᤔᤡᤶᤒᤠᤒᤣ᥅

²⁷ ᤀᤠᤏᤡᤃᤣ ᤂᤡᤏᤡ᤹ ᤗᤠᤃᤡ ᤌᤧᤔᤠᤀᤠᤱ ᤋᤠᤵᤑᤧ᤺ᤶᤒᤠ ᤆᤥᤃᤢᤶᤒᤧᤒᤠ ᤜᤥᤵ. ᤁᤖ ᤂᤡᤏᤡ᤹ ᤀᤠᤏᤡᤃᤣ ᤌᤱᤅᤥ ᤕᤠᤵᤔᤡ ᤁᤧᤓᤳᤋᤡᤀᤠᤱ ᤋᤠᤵᤑᤧ᤺ᤶᤒᤠ ᤁᤧᤈᤥᤃᤢᤶᤗ ᤁᤧᤘᤕᤡ॥ ᤕᤜᤘᤣ ᤍᤠᤱᤒᤧᤴ ᤂᤠᤛᤧᤴᤗᤥ᤺ᤶᤒᤠ ᤘᤠ᤹. ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤀᤡᤴᤒᤠ ᤕᤧᤴᤏᤥ ᤂᤠᤛᤧᤴ ᤆᤥᤃᤢᤖ॥”

²⁸ ᤁᤖ ᤕᤡᤵᤋᤠ᤺ᤸᤗᤧ ᤜᤠᤅᤢᤒᤠ ᤀᤡᤱᤄᤱᤅᤡᤴ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤅᤡᤸᤗᤧ ᤏᤡᤏᤡ ᤂᤧᤶᤄᤧᤶᤔᤠᤱ ᤔᤧᤗᤠᤵᤋᤢᤴᤗᤥ॥

ᤕᤡᤵᤋᤠᤖᤧ ᤁᤢᤔᤠᤱᤜᤧᤰ

²⁹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤕᤡᤵᤋᤠᤀᤥ ᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤃᤡᤗᤠᤍ ᤏᤢ ᤔᤏᤛ᤻ᤛᤣᤗᤠᤶ ᤐᤥ᤺ᤰᤂᤧᤖ ᤃᤡᤗᤠᤍᤒᤠ ᤔᤡᤛ᤻ᤐᤠᤗᤠᤶ ᤗ᤺ᤴᤍᤧᤀᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤏᤡ ᤋᤰᤗᤧᤱᤘᤠᤀᤥ ᤋᤃᤡ ᤐᤥᤖᤧᤖ ᤐᤣ॥

³⁰ ᤕᤡᤵᤋᤠ᤺ᤸᤗᤧ ᤁᤴ ᤔᤠᤱᤜᤧᤰᤁᤡᤴ ᤆᤥᤃᤢᤀᤠᤱ ᤕᤜᤘᤣ ᤍᤠᤱᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤶᤔᤥᤏᤡᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤁᤧᤎᤠᤛᤢᤛᤡᤏᤧᤓᤃᤪ.

³¹ ᤀᤠᤱᤃᤠ᤹ ᤀᤶᤔᤥᤏᤡᤜᤠ᤹ ᤏᤠ᤺ᤴᤍᤢᤱᤛᤡᤱᤅᤠᤱ ᤏᤢ᤺ᤱᤅᤠᤸᤗᤧ ᤀᤠᤱᤃᤠ᤹ ᤀᤠᤍᤢᤶᤛᤧ ᤀᤠᤜᤡᤶᤔᤥᤒᤠ ᤗᤠᤶᤎᤣ᤺ᤳᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤧᤴ ᤕᤜᤘᤣ ᤍᤠᤱᤒᤧᤸᤗᤧᤴᤏᤣ ᤐᤥᤱ᤹॥ ᤀᤠᤱᤃᤠ᤹ ᤂᤧᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤆᤥᤃᤢᤱ᤹॥”

³² ᤂᤧᤒᤩᤠᤱ ᤕᤡᤵᤋᤠᤴ ᤀᤶᤔᤥᤏᤡᤜᤠ᤹ ᤌᤱᤅᤥ ᤑᤵᤔᤠᤛᤡᤖᤧ ᤗᤠᤃᤡ ᤏᤠᤎᤠ᤺ᤶᤒᤡ ᤁᤠ᤺ᤰᤋᤢᤀᤠᤱ ᤐᤣ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤜᤢᤰᤁᤥ ᤌᤠᤛᤢᤛᤡ॥

³³ ᤂᤢᤏᤧ᤹ ᤀᤖᤥᤀᤣᤖᤗᤠᤶ ᤔᤡᤴᤏᤡᤋ ᤜᤧᤰᤁᤩᤠᤱ ᤜᤠᤒᤡᤗ-ᤁᤖᤔᤡᤔ ᤌᤠᤖᤡᤰ ᤏᤡᤒᤥᤱ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤏᤠ᤺ᤴᤍᤢᤛᤡ॥ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤶᤔᤥᤏᤡᤜᤠ᤹ ᤕᤢᤰᤁᤥ ᤔᤧᤍᤠᤖᤢᤛᤡᤖᤥ॥

ᤕᤡᤵᤋᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ

³⁴ ᤀᤠᤸᤗ ᤕᤡᤵᤋᤠᤴ ᤂᤢᤏᤧ᤹ ᤁᤢᤜᤡᤶ ᤔᤡᤛ᤻ᤐᤠ ᤏᤢ᤺ᤰᤂᤧᤸᤗᤧ. ᤂᤢᤏᤧ᤹ ᤋᤢᤶᤔᤠᤖᤧ ᤗᤠᤃᤡ ᤂᤡᤳᤇᤡᤱ ᤂᤡᤳᤇᤡᤱ ᤁᤧᤗ᤹ᤒᤠ ᤋᤠᤜᤡᤵᤜᤠ᤹ ᤜᤡᤵᤏᤢ ᤗᤠ᤺ᤱᤏᤢ ᤁᤧᤗ᤺ᤶᤔᤧᤱᤃ ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤣ ᤘᤕᤧᤖᤥ᥄ ᤁᤴ ᤂᤢᤏᤧ᤹ ᤁᤢᤛ᤻ᤛᤠ ᤗᤳᤌᤡᤰᤔᤠ ᤘᤕᤧ. ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤔᤧᤜᤥ᤺ᤵᤋᤧ॥

³⁵ ᤀᤠᤸᤗ ᤂᤢᤏᤧ᤹ ᤁᤴ ᤁᤢᤛ᤻ᤛᤠᤴ ᤏᤡᤛᤢᤀᤠᤱ ᤂᤢᤏᤧ᤹ ᤁᤢᤈᤠᤱᤅᤡᤴ ᤌᤧ᤺ᤰᤂᤢᤀᤠᤱ ᤔᤧᤳᤋᤢ. “ᤆᤡ᤺ᤳᤋᤧᤛᤩᤧᤖᤥ ᤀᤠᤛ᤻ᤛᤠᤀᤣ. ᤂᤧᤏᤧ᤹ᤃ ᤀᤠᤱᤃᤠ᤹ ᤀᤠᤏᤡᤱᤛᤠᤱ ᤐᤢᤃᤧᤖ ᤁᤧᤈᤥᤃᤢᤖᤥ᥄ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤁᤧᤍᤠᤖᤢᤀᤠᤱ ᤘᤠ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴᤏᤢ ᤗᤳᤇᤠ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤏᤢ᤺ᤰᤔᤠ ᤔᤧᤏᤢ᤹ᤏᤧᤴ॥”

³⁶ ᤂᤧᤸᤗᤧ ᤔᤧᤳᤋᤢ. “ᤀᤠᤶᤒᤦ. ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴᤏᤢ ᤔᤧᤱᤃᤧᤳᤋᤣ ᤔᤧᤴᤏᤢ᤹ᤔᤏᤠᤒᤠ ᤔᤠᤱᤜᤧᤰ ᤁᤧᤈᤥᤃᤢᤀᤠᤱ ᤘᤠ᤹॥ ᤂᤧᤏᤧ᤹ ᤂᤧᤴ ᤁᤢᤀᤡᤛᤡ᤺ᤰᤁᤣ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤏᤡᤱᤔᤡ ᤀᤶᤔᤥᤏᤡᤜᤠ᤹ᤀᤥ ᤁᤢᤗᤧᤰᤘᤠ ᤏᤢ᤺ᤰᤋᤢᤀᤠᤱ ᤘᤠ᤹॥

³⁷ ᤁᤖ ᤀᤠᤶᤒᤦ. ᤀᤠᤱᤃᤠ᤹ ᤗᤳᤇᤠ ᤐᤠ᤺ᤴᤗᤧ ᤗᤠᤃᤡ ᤐᤣᤗᤡ ᤑᤠᤰᤏᤧ. ᤗᤠ ᤏᤧᤳᤇᤡ ᤌᤠᤖᤡᤰ ᤀᤠᤱᤃᤠ᤹ ᤗᤧᤖᤠᤱᤍᤣᤛᤠᤱᤅᤧ᤹. ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤴᤍᤣᤱᤔᤠᤜᤠ᤹ᤏᤢ ᤁᤥ᤺ᤰᤔᤠᤜᤠ᤹ᤀᤥ ᤋᤠᤰᤁᤶᤔᤠ ᤘᤠ᤹ᤔᤠ ᤂᤥᤀᤠᤖ. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤡᤛᤠᤃᤧᤴ ᤔᤧᤴᤇᤡᤴ ᤘᤠ᤹ᤀᤠᤖ ᤛᤡᤀᤠᤒᤠᤀᤥ ᤔᤧᤖᤡᤱ ᤌᤰᤔᤠ ᤛᤢᤰᤁᤠᤖ॥”

³⁸ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤐᤣ᤺ᤰᤔᤠ ᤁᤧᤛᤢᤰ॥” ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤗᤠ ᤏᤧᤳᤇᤡᤖᤧ ᤗᤠᤃᤡ ᤗᤠᤶᤔᤧᤳᤋᤢᤍᤣᤛᤢ॥ ᤂᤢᤏᤧ᤹ ᤁᤢᤴᤈᤢᤶ ᤁᤢᤴᤍᤣ᤺ᤱᤔᤠᤜᤠ᤹ᤏᤢ ᤐᤣ. ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ᤀᤥ ᤂᤢᤏᤧ᤹ ᤛᤠᤔᤧᤱᤃᤳᤋᤣ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤘᤕᤧᤖᤀᤣ ᤛᤡᤔᤠ ᤁᤧᤒᤥᤱᤒᤠ ᤐᤠ᤺ᤴᤏᤥ ᤜᤠᤒᤧ ᤆᤡ᤺ᤰᤋᤧ॥

³⁹ ᤗᤠ ᤏᤧᤳᤇᤡ ᤀᤣᤃᤠᤱ ᤁᤢᤏᤢᤵᤔᤥ ᤂᤢᤏᤧ᤹ ᤁᤢᤶᤒᤠᤖᤥ ᤏᤢ᤺ᤰᤂᤧᤍᤩᤧ. ᤜᤧᤰᤁᤩᤠᤱ ᤕᤡᤵᤋᤠ᤺ᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤳᤋᤢ॥ ᤂᤧᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤀᤣ ᤘᤕᤧ॥ ᤁᤴ ᤕᤧᤶᤔᤠᤱ ᤁᤳᤌᤥ

⁴⁰ ᤀᤡᤛᤪᤠᤀᤡᤗᤒᤠ ᤔᤧᤴᤇᤢᤔᤠ ᤛᤠᤜᤠ᤹ ᤋᤱᤒᤣ ᤌᤰᤔᤠ ᤗᤡᤕᤠᤴ ᤌᤠᤖᤡᤰ ᤃᤡᤗᤠᤍᤡ ᤕᤡᤵᤋᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤏᤡᤱᤘᤠ᤹ᤛᤥᤰᤁᤥ ᤗᤠ᤺ᤰᤁᤠᤳ ᤐᤣ᤺ᤰᤔᤠ ᤛᤠᤰᤌᤡᤶ ᤐᤥ᤺ᤰᤂᤧᤖᤥ॥