ᤂᤠᤛᤧᤴᤗᤥ᤺ᤶᤒᤠ 10 - LIFOTNT

ᤋᤥᤗᤠᤴ ᤀᤡᤛᤪᤠᤀᤡᤗᤒᤠ ᤂᤠᤛᤧᤴᤗᤥ᤺ᤶᤒᤠ ᤐᤥᤱ᤹

¹ ᤀᤒᤡᤔᤣᤗᤣᤁᤖᤧ ᤁᤢᤕᤧᤶ ᤁᤧᤖᤧᤀᤠᤱ ᤀᤣᤃᤠᤱ ᤀᤡᤛ᤻ᤛᤠᤂᤠᤖᤖᤧ ᤗᤳᤇᤠ ᤁᤢᤔᤏᤠ. ᤐᤢᤘᤠᤖᤧ ᤁᤢᤛ᤻ᤛᤠ ᤍᤥᤍᤥᤖᤧ ᤁᤢᤶᤔᤧᤴᤇᤠ᤹. ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤒᤠ ᤛᤠᤔᤡᤖ ᤁᤧᤕᤢᤱᤒᤠ ᤋᤥᤗᤠᤴ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤐᤥᤃᤧ॥

² ᤂᤢᤏᤧ᤹ ᤏᤡᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤔᤠᤛᤡᤱᤅᤠᤱ ᤛᤠᤔᤡᤖᤀᤥ ᤔᤧᤈᤡᤰᤂᤢᤖᤥ॥

ᤕᤠᤀᤡᤖᤧᤴ ᤀᤡᤛᤪᤠᤀᤡᤗᤒᤠ ᤂᤠᤛᤧᤴᤗᤥ᤺ᤶᤒᤠ ᤐᤥᤱ᤹

³ ᤂᤢᤏᤧ᤹ ᤁᤢᤀᤣᤃᤠᤱ ᤃᤡᤗᤠᤍᤡ ᤕᤠᤀᤡᤖᤧᤴ ᤐᤥᤃᤧ॥ ᤂᤢᤏᤧ᤹ ᤏᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

⁴ ᤂᤢᤏᤧ᤹ ᤛᤢᤶᤒᤥᤱ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤘᤕᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤀᤍᤱᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤗᤠᤱᤔᤧᤄᤣᤃᤧ॥ ᤃᤡᤗᤠᤍ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤛᤢᤶᤒᤥᤱ ᤕᤧᤰᤕᤰᤜᤠ᤹ ᤏᤧᤛ᤻ᤛᤧ. ᤂᤧᤱᤜᤠ᤹ ᤀᤠᤀᤡᤴ ᤌᤠᤖᤡᤰ ᤜᤒ᤻ᤒᤠᤋ ᤕᤠᤀᤡᤖ ᤔᤧᤔᤧᤳᤋᤢ᤹॥

⁵ ᤕᤠᤀᤡᤖᤧᤴ ᤔᤠᤛᤡᤱᤅᤠᤱ ᤂᤢᤏᤧ᤹ ᤁᤠᤔᤥᤏᤀᤥ ᤔᤧᤈᤡᤰᤂᤢᤖᤥ॥

ᤀᤶᤔᤥᤏᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤕᤢᤰᤋᤢᤛᤡ

⁶ ᤕᤠᤶᤔᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤖᤠᤔ. ᤛᤡᤍᤥᤏ ᤏᤢ ᤔᤥᤀᤠᤒ ᤜᤧᤰᤁᤩᤠᤱ ᤀᤶᤔᤥᤏᤡᤜᤠ᤹ ᤏᤢ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤛᤠᤶᤔᤠᤱᤜᤠ᤹ ᤂᤧᤒᤩᤠᤱ ᤒᤠᤗ ᤏᤢ ᤀᤛ᤻ᤋᤥᤖᤣᤋ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤗᤧᤖᤢᤀᤠᤱ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤶᤔᤧᤳᤋᤢᤴ॥

⁷ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤁᤢᤛᤠᤰᤁᤧᤴ ᤐᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤐᤗᤡᤛ᤻ᤋᤡᤜᤠ᤹ ᤏᤢ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤛᤱᤄᤢᤍᤣᤛᤢᤛᤡ. ᤂᤧᤱᤜᤠ᤹ᤖᤧ ᤂᤧᤴ ᤋᤱᤒᤣᤀᤥ ᤀᤡᤛᤪᤠᤀᤡᤗᤡᤜᤠ᤹ ᤜᤡᤜᤥᤳ ᤆᤡᤜᤥᤳ ᤔᤧᤔᤧᤳᤋᤢᤛᤡ॥

⁸ ᤂᤧᤱᤜᤠ᤹ᤖᤧ ᤕᤷᤍᤏ ᤏᤠᤱᤃᤧᤴ ᤐᤡᤛᤠᤱ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤃᤡᤗᤠᤍᤀᤥ ᤁᤧᤕᤢᤱᤒᤠ ᤀᤡᤛᤪᤠᤀᤡᤗᤡᤜᤠ᤹ ᤌᤡᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ ᤌᤠᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤖ ᤔᤧᤘᤕᤧ॥

⁹ ᤂᤧᤒᤩᤠᤱ ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰ ᤒᤣᤏᤩᤠᤔᤡᤏ ᤏᤢ ᤀᤣᤑᤪᤠᤀᤡᤔᤒᤠ ᤜᤡᤶᤛᤕᤱᤜᤠ᤹ ᤌᤱᤅᤥ ᤑᤵᤔᤠᤛᤡᤖᤧ ᤗᤠᤃᤡ ᤀᤶᤔᤥᤏᤡᤜᤠ᤹ᤖᤧ ᤕᤷᤍᤏ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣᤀᤥ ᤔᤧᤎᤩᤧ॥

¹⁰ ᤜᤧᤰᤁᤩᤠᤱ ᤁᤢᤓᤠ᤹ᤖᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤔᤧᤓᤠᤰᤋᤢᤀᤠᤱ ᤔᤧᤔᤧᤳᤋᤢ. “ᤀᤠᤏᤡᤃᤣ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧ॥ ᤂᤧᤏᤧ᤹ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤧᤳᤋᤠᤛᤡᤃᤧᤀᤠᤱ ᤒᤠᤗ ᤔᤠᤱᤅᤡᤴ ᤛᤧᤘᤠ ᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧ॥”

¹¹ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤢᤛᤡ. “ᤔᤡᤛᤪᤡ. ᤀᤣᤔᤥᤖᤡ. ᤀᤶᤔᤥᤏᤡ. ᤐᤗᤡᤛ᤻ᤋᤡ.

¹² ᤛᤡᤍᤥᤏᤡ. ᤀᤔᤠᤗᤧᤁᤡ ᤏᤢ ᤔᤡᤍᤩᤠᤏᤡᤜᤠ᤹ ᤁᤧᤖᤧᤰᤗᤧ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡ. ᤜᤧᤰᤁᤩᤠᤱ ᤁᤢᤓᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤕᤠᤵᤔᤡ ᤐᤣᤗᤡ ᤁᤧᤓᤠᤰᤋᤡ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤔᤧᤛᤧ᤺ᤵᤏᤡᤱᤅᤡᤴᤒᤡ᥅

¹³ ᤁᤖ ᤂᤡᤏᤡ᤹ ᤕᤠᤵᤔᤡ ᤁᤧᤗᤧᤖᤡᤀᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ॥ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤕᤠᤶᤔᤥ ᤔᤧᤛᤧ᤺ᤵᤏᤡᤱᤅᤡᤴ॥

¹⁴ ᤐᤣᤃᤧᤶᤔᤧ᤹ᤀᤠᤱ ᤂᤡᤏᤡ᤹ ᤁᤧᤛᤣᤃᤢᤶᤛᤡᤶᤒᤠ ᤔᤠᤱᤜᤠ᤹ ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤋᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤋᤢᤰᤂᤣᤘᤠ ᤕᤧᤶᤔᤥ ᤁᤧᤶᤛᤧ᤺ᤵᤋᤡᤖᤖᤥ॥”

¹⁵ ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤔᤧᤳᤋᤢ. “ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧ॥ ᤂᤧᤏᤧ᤹ ᤀᤠᤏᤡᤃᤣ ᤀᤠᤰᤂᤣ ᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢ᤹ ᤜᤧᤰᤁᤣᤀᤣ ᤀᤥᤔᤧᤳᤋᤧ᤹॥ ᤁᤖ ᤀᤠᤸᤗ ᤀᤠᤏᤡᤃᤣ ᤀᤠᤛᤧ᤺ᤵᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧ॥”

¹⁶ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤗᤠᤈᤣ᤹ᤒᤠ ᤔᤠᤱᤜᤠ᤹ ᤔᤧᤗᤧᤖᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤴ ᤔᤠᤱᤛᤧᤘᤠ ᤔᤧᤔᤧᤳᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤸᤗᤛᤠᤱ ᤋᤢᤰᤂᤣ ᤗᤠᤰᤂᤣᤜᤠ᤹ ᤀᤥᤔᤧᤵᤔᤠ ᤔᤧᤛᤢᤰᤋᤢᤴ॥

¹⁷ ᤂᤧᤒᤩᤠᤱ ᤀᤶᤔᤥᤏᤡᤜᤠ᤹ ᤌᤱᤗᤧ ᤗᤠᤃᤡ ᤔᤧᤓᤢᤰᤂᤢᤛᤡᤀᤠᤱ ᤃᤡᤗᤠᤍᤀᤥ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤈᤥᤃᤧᤀᤠᤱ ᤔᤧᤏᤧᤛ᤻ᤛᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤃ ᤔᤧᤈᤢᤵᤛᤧᤀᤠᤱ ᤔᤡᤛ᤻ᤐᤠᤀᤥ ᤌᤰᤛᤢᤒᤠ ᤏᤧᤳᤏᤠ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥

¹⁸ ᤂᤧᤒᤩᤠᤱ ᤃᤡᤗᤠᤍᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤳᤋᤡᤴ ᤔᤏᤠ᤺ᤸᤗᤧ ᤋᤃᤡ ᤀᤶᤔᤥᤏᤡᤜᤠ᤹ ᤌᤱᤅᤥ ᤑᤳᤋᤢᤛᤡ ᤜᤠᤒᤠ ᤂᤢᤏᤧ᤹ᤀᤣ ᤃᤡᤗᤠᤍ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠ ᤐᤥᤱᤗᤥ॥”