ᤂᤠᤛᤧᤴᤗᤥ᤺ᤶᤒᤠ 1 - LIFOTNTᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤍᤥᤏᤡ-ᤒᤣᤈᤣᤁᤧᤴ ᤔᤧᤍᤧᤶᤛᤢ 1 ᤕᤜᤥᤛᤢᤴ ᤔᤠᤛᤡᤱᤅᤠᤱ ᤀᤣᤃᤠᤱ ᤀᤠᤳᤋᤡᤴ ᤌᤠ᤺ᤰᤜᤠ᤹ᤖᤧ ᤋᤃᤡ ᤁᤏᤠᤏᤡᤜᤠ᤹ ᤑᤵᤔᤠᤛᤡ ᤐᤥᤱ᤹ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤔᤧᤍᤥᤛᤢ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰᤜᤠ᤹ᤖᤧ ᤔᤧᤓᤳᤋᤢᤖ॥ ᤀᤠᤱᤃᤠ᤹ ᤂᤧᤴ ᤗᤠᤈᤣᤴ ᤂᤢᤴᤇᤡ᤹ ᤜᤢᤰᤛᤢᤵᤋᤢᤱᤛᤡᤱᤅᤠᤱ ᤏᤧᤖᤥ॥” 3 ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ ᤛᤡᤔᤡᤕᤥᤏᤡᤜᤠ᤹ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤣ ᤗᤰᤁᤥ ᤁᤧᤎᤠᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤀᤠᤏᤡᤃᤧᤏᤢ ᤌᤥ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤁᤏᤠᤏᤡᤜᤠ᤹ᤏᤢ ᤀᤠᤏᤡ᤹ ᤌᤱ ᤆᤥᤃᤡ॥ ᤂᤧᤒᤩᤠᤱ ᤀᤠᤏᤡᤃᤧᤀᤠᤱ ᤂᤡᤏᤡ᤹ ᤗᤰᤁᤥ ᤁᤧᤎᤠᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ᤏᤢ ᤌᤥ ᤐᤣᤃᤡᤃᤧ᤹॥” ᤁᤸᤗᤧᤆᤥᤃᤢᤸᤗᤧ ᤛᤡᤔᤡᤕᤥᤏᤡᤜᤠ᤹ ᤂᤧᤱᤜᤠ᤹ᤏᤢ ᤌᤥ ᤔᤧᤒᤣ॥ 4 ᤂᤧᤒᤩᤠᤱ ᤌᤱ ᤆᤥ᤺ᤰᤛᤧ ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰᤜᤠ᤹ ᤋᤃᤠᤱ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤏᤠᤏᤡᤜᤠ᤹ ᤏᤢ ᤐᤖᤡᤈ᤻ᤈᤡᤜᤠ᤹ ᤂᤧᤱᤜᤠ᤹ ᤜᤢᤰᤛᤢᤵᤋᤢᤛᤡ॥ ᤂᤧᤱᤜᤠ᤹ᤖᤧ ᤒᤣᤈᤣᤁᤀᤥ ᤜᤧᤴᤇᤡᤱ ᤌᤡᤒᤥᤱ ᤔᤏᤠᤜᤠ᤹ ᤔᤧᤛᤧᤖᤢᤛᤡ॥ 5 ᤂᤧᤱᤜᤠ᤹ᤖᤧ ᤂᤧᤵᤔᤥ ᤀᤍᤥᤏᤡ-ᤒᤣᤈᤣᤁᤧᤴ ᤔᤧᤍᤢᤔᤢᤀᤠᤱ ᤂᤧᤱᤜᤠ᤹ ᤌᤱ ᤔᤧᤈᤥᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤏᤠᤏᤡ ᤏᤢ ᤐᤖᤡᤈ᤻ᤈᤡᤜᤠ᤹ ᤔᤧᤏᤠ᤺ᤴᤍᤢᤛᤡ॥ 6 ᤀᤍᤥᤏᤡ-ᤒᤣᤈᤣᤁᤧᤴ ᤂᤧᤳᤇᤡᤱ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤺ᤳᤋᤢᤀᤠᤱ ᤔᤧᤍᤧᤶᤛᤢ. ᤂᤶᤓᤩᤠᤱ ᤂᤢᤏᤧ᤹ ᤁᤢᤜᤢᤰᤔᤠ ᤏᤢ ᤁᤢᤗᤠᤱᤔᤠᤜᤠ᤹ ᤔᤧᤄᤰᤋᤢ ᤔᤧᤒᤡᤖᤢ॥ 7 ᤀᤍᤥᤏᤡ-ᤒᤣᤈᤣᤁᤖᤧ ᤐᤠ᤺ᤳᤋᤢ. “ᤁᤢᤜᤢᤰᤔᤠ ᤏᤢ ᤁᤢᤗᤠᤱᤔᤠ ᤔᤧᤄᤰᤋᤢ ᤔᤧᤒᤡᤖᤢᤛᤡᤒᤠ ᤏᤢᤒᤥᤱ ᤜᤠᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤈᤠ ᤆᤠᤔᤠ ᤆᤵᤋᤧᤴ ᤛᤡᤃᤠᤱ ᤆᤠᤈᤡ᤹ᤜᤠ᤹ ᤛᤣ᤺ᤰᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤘᤕᤧ॥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤕᤠᤱᤒᤠ ᤜᤧᤰᤁᤣᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹॥” ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤕᤖᤢᤛᤗᤧᤔᤀᤥ ᤔᤧᤓᤧᤳᤋᤢᤀᤠᤱ ᤂᤢᤏᤧ᤹ ᤂᤧᤵᤔᤥᤀᤣ ᤛᤩᤧᤖᤥ॥ 8 ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤕᤖᤢᤛᤗᤧᤔᤀᤥ ᤌᤱ ᤔᤧᤈᤥᤃᤢᤀᤠᤱ ᤂᤧᤴ ᤜᤢᤰᤁᤠᤵ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤥ ᤔᤡ ᤔᤧᤕᤠᤰᤋᤢ॥ 9 ᤂᤧᤴ ᤀᤣᤃᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤗᤠᤱᤃᤧᤳ ᤗᤧᤵᤔᤠᤱ ᤔᤧᤎᤠᤛᤡᤱ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ. ᤏᤣᤃᤣᤘᤀᤥ ᤏᤢ ᤋᤧᤶᤒᤣ᤹ᤀᤥ ᤁᤧᤕᤢᤱᤒᤠ ᤁᤏᤠᤏᤡᤜᤠ᤹ᤏᤢ ᤌᤱ ᤔᤧᤈᤥᤃᤧ॥ 10 ᤂᤧᤱᤜᤠ᤹ᤖᤧ ᤜᤣᤒᤪᤥᤏ ᤁᤧᤕᤢᤱᤒᤠ ᤁᤏᤠᤏᤡᤜᤠ᤹ ᤔᤧᤓᤳᤋᤢᤛᤡ. ᤜᤧᤰᤁᤩᤠᤱ ᤛᤣᤛᤤ. ᤀᤜᤡᤔᤏ ᤏᤢ ᤋᤸᤔᤤᤴ ᤔᤧᤏᤠ᤺ᤴᤍᤢ॥ (ᤜᤣᤒᤪᤥᤏᤖᤧ ᤋᤃᤡᤒᤠ ᤁᤢᤔᤡᤱ ᤁᤡᤷᤕᤋ-ᤀᤷᤒᤠ ᤏᤧᤛ᤻ᤛᤧᤖᤥ॥) 11 ᤂᤧᤵᤔᤥᤗᤠᤶ ᤂᤧᤱᤜᤠ᤹ ᤍᤒᤡᤖ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤥᤀᤥ ᤋᤃᤡ ᤔᤧᤒᤣᤀᤠᤱ ᤔᤧᤓᤳᤋᤢᤛᤡ॥ (ᤍᤒᤡᤖᤖᤧ ᤋᤃᤡᤒᤠ ᤁᤢᤔᤡᤱ ᤁᤡᤷᤕᤋ-ᤛᤣᤐᤣᤖ ᤏᤧᤛ᤻ᤛᤧ)॥ 12 ᤜᤧᤰᤁᤩᤠᤱ ᤁᤠᤗᤣᤒᤖᤧ ᤐᤠ᤺ᤳᤋᤢ. “ᤜᤠ᤺ᤳᤗᤧ ᤁᤡᤷᤕᤋ-ᤛᤣᤐᤣᤖᤧᤴ ᤑᤳᤋᤢᤀᤠᤱ ᤜᤢᤰᤁᤠᤵ ᤆᤥᤃᤢ᤹. ᤂᤧᤴᤏᤢ ᤀᤠᤛ᤻ᤛᤠ ᤔᤧᤴᤇᤡᤴ ᤀᤰᤛᤠᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢᤱ᤹॥” 13 ᤂᤧᤒᤩᤠᤱ ᤁᤠᤗᤣᤒᤖᤧ ᤁᤢᤴᤛᤠ᤹ ᤁᤏᤈᤖᤧ ᤁᤢᤛ᤻ᤛᤠ ᤀᤥᤳᤏᤡᤀᤣᤗᤖᤧ ᤂᤧᤴ ᤜᤢᤰᤁᤠᤵ ᤆᤥᤃᤢ॥ ᤜᤧᤰᤁᤩᤠᤱ ᤁᤠᤗᤣᤒᤖᤧ ᤁᤢᤛ᤻ᤛᤠ ᤔᤧᤴᤇᤡᤴ ᤀᤰᤛᤠᤴ ᤂᤧᤴᤏᤢ ᤔᤣ᤺ᤰᤂᤡᤶ ᤔᤧᤳᤋᤢ॥ 14 ᤀᤠᤸᤗ ᤌᤡᤰᤕᤠᤴ ᤀᤰᤛᤠᤴ ᤀᤥᤳᤏᤡᤀᤣᤗᤖᤥ ᤋᤩᤧ. ᤜᤧᤰᤁᤣ᤺ᤸᤗᤧ ᤁᤢᤶᤒᤠ ᤁᤢᤗᤰ ᤌᤡᤰ ᤗᤠᤈᤣ᤹ ᤏᤠ᤺ᤰᤔᤠᤖᤧ ᤗᤠᤃᤡ ᤀᤥᤳᤏᤡᤀᤣᤗᤖᤧ ᤂᤧᤴ ᤜᤢᤛᤢ॥ ᤀᤠᤸᤗ ᤁᤢᤀᤍᤱᤅᤥᤗᤠᤶ ᤂᤧᤴ ᤌᤠᤛᤡᤱᤅᤡᤸᤗᤧ ᤁᤠᤗᤣᤒᤖᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤆᤠᤜᤠ ᤁᤧᤈᤥᤃᤧ᥅” 15 ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤗᤳᤇᤠ ᤐᤧᤘᤠ ᤐᤡᤖᤠᤱᤅᤧ᤹॥ ᤂᤧᤏᤧ᤹ ᤏᤣᤃᤣᤒᤀᤥ ᤀᤠᤱᤃᤠ᤹ ᤗᤠᤈᤣ᤹ ᤁᤧᤒᤡᤖᤠᤱᤒᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠᤜᤠ᤹ᤀᤠᤱ ᤐᤡᤖᤠᤱᤅᤧ᤹॥” ᤁᤸᤗᤧᤆᤥᤃᤢᤸᤗᤧ ᤁᤠᤗᤣᤒᤖᤧ ᤂᤢᤏᤧ᤹ ᤌᤥᤛᤔᤠ ᤏᤢ ᤕᤥᤛᤔᤠ ᤏᤧᤵᤔᤠᤱ ᤆᤫᤠ᤺ᤳ ᤘᤠᤒᤢᤴᤍᤠᤰᤘᤠᤜᤠ᤹ ᤐᤡᤖᤢᤖᤥ॥ 16 ᤔᤥᤛᤠ᤺ᤸᤗᤧ ᤁᤢᤴᤏᤢ᤺ᤵᤐᤠᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ. ᤁᤣᤏᤡᤜᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤂᤧᤒᤰᤛᤡᤱᤜᤠ᤹ᤖᤧᤴ ᤕᤧᤰᤕᤰᤁᤥᤗᤠᤶ ᤀᤠᤖᤠᤍ ᤏᤡ᤺ᤳᤋᤠᤱᤒᤠ ᤏᤣᤃᤣᤘᤀᤥ ᤁᤧᤏᤧᤒᤠ ᤕᤜᤢᤍᤠᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤔᤧᤒᤣ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤏᤢ ᤕᤢᤱᤔᤠ ᤔᤧᤜᤣ᤺ᤰᤋᤧ॥ 17 ᤂᤧᤴ ᤀᤣᤃᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤑᤢ᤹ᤏᤢᤛᤠᤜᤠ᤹ ᤛᤡᤔᤡᤕᤥᤏᤡᤜᤠ᤹ᤏᤢ ᤔᤧᤒᤣᤀᤠᤱ ᤛᤐᤋ ᤁᤧᤕᤢᤱᤒᤠ ᤁᤏᤠᤏᤡᤜᤠ᤹ ᤔᤧᤓᤳᤋᤢᤛᤡ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤜᤥᤷᤔᤠ ᤔᤧᤕᤢᤰᤂᤢ॥ 18 ᤕᤜᤢᤍᤠ᤺ᤸᤗᤧ ᤃᤠᤈᤠ. ᤀᤛ᤻ᤁᤗᤥᤏ ᤏᤢ ᤀᤣᤁᤪᤥᤏ ᤕᤧᤰᤕᤰᤜᤠ᤹ ᤜᤧᤰᤁᤩᤠᤱ ᤁᤒᤪᤡᤱ ᤐᤡᤛᤠᤱᤒᤠ ᤏᤢ ᤐᤠᤱᤈᤢᤶᤜᤠ᤹ᤀᤠᤱ ᤔᤧᤳᤇᤡᤱ॥ 19 ᤕᤜᤘᤣ ᤍᤠᤱᤒᤧᤴ ᤕᤜᤢᤍᤠᤒᤠ ᤔᤏᤠᤜᤠ᤹ᤏᤢ ᤘᤕᤧ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣᤴ ᤔᤧᤕᤢᤰᤋᤢ॥ ᤁᤖ ᤏᤧᤏᤧᤒᤠᤍᤧᤴᤏᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤏᤠ᤺ᤵᤔᤠᤍᤣᤔᤠ ᤔᤧᤴᤇᤢᤰᤋᤢᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤑᤧᤴᤈᤣ᤹ ᤀᤴᤗᤠᤎᤠᤜᤠ᤹ ᤔᤧᤃᤳᤋᤢ॥ 20 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤁᤠᤗᤣᤒᤧᤴ ᤜᤣᤒᤪᤥᤏᤧᤴ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤏᤠᤁᤖᤧ ᤛᤢᤶᤛᤡ ᤁᤢᤛ᤻ᤛᤠᤜᤠ᤹ ᤂᤧᤴ ᤗᤠᤈᤣ᤹ᤗᤠᤶ ᤏᤠ᤺ᤳᤋᤢᤍᤣᤛᤢᤛᤡ॥ 21 ᤁᤖ ᤒᤣᤏᤩᤠᤔᤡᤏᤡᤜᤠ᤹ᤖᤧ ᤕᤖᤢᤛᤗᤧ᤺ᤶᤒᤠ ᤕᤒᤢᤛᤡᤜᤠ᤹ ᤔᤧᤴᤏᤠ᤺ᤳᤋᤢᤴ ᤔᤧᤴᤍᤣᤛᤢᤛᤡᤴ॥ ᤁᤸᤗᤧᤆᤥᤃᤢᤸᤗᤧ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤕᤖᤢᤛᤗᤧ᤺ᤶᤔᤥ ᤕᤒᤢᤛᤡᤜᤠ᤹ ᤒᤣᤏᤩᤠᤔᤡᤏᤡᤜᤠ᤹ᤏᤢ ᤔᤧᤕᤢᤱᤗᤥ॥ ᤕᤥᤛᤣᤑᤖᤧ ᤒᤣᤌᤣᤗᤗᤧᤴ ᤏᤠ᤺ᤴᤍᤢᤒᤠ 22 ᤕᤥᤛᤣᤑᤖᤧ ᤁᤢᤎᤠ᤺ᤰᤁᤥᤒᤠ ᤔᤏᤠᤜᤠ᤹ᤖᤧ ᤒᤣᤌᤣᤗ ᤕᤧᤰᤕᤰᤁᤡᤴ ᤔᤧᤓᤳᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤏᤢ ᤘᤕᤧ॥ 23 ᤂᤧᤱᤜᤠ᤹ᤖᤧ ᤒᤣᤌᤣᤗᤀᤥ ᤌᤥ᤺ᤶᤈᤡᤒᤠᤜᤠ᤹ ᤔᤧᤒᤠᤱᤄᤢᤛᤡ॥ (ᤋᤃᤡ ᤒᤣᤌᤣᤗᤖᤧ ᤁᤢᤔᤡᤱ ᤗᤢᤈ ᤏᤧᤛ᤻ᤛᤧ). 24 ᤁᤴ ᤌᤥ᤺ᤶᤈᤡᤒᤠᤜᤠ᤹ᤖᤧ ᤔᤏᤠᤎᤡᤰ ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤖ ᤐᤳᤇᤧᤒᤠ ᤔᤧᤏᤡᤛᤢᤀᤠᤱ ᤂᤧᤴ ᤔᤧᤔᤧᤳᤋᤢ. “ᤕᤧᤰᤕᤰᤁᤥ ᤀᤠᤰᤂᤣᤗ᤹ᤖᤡᤰ ᤗᤠ᤺ᤵᤔᤠᤒᤣ ᤀᤠᤏᤡᤃᤣ ᤀᤠᤔᤧᤳᤋᤧ᤹ᤀᤠ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤏᤧ᤹ ᤏᤢᤖᤡᤰ ᤔᤧᤳᤋᤠᤛᤡᤃᤧ॥” 25 ᤁᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤕᤧᤰᤕᤰᤁᤥ ᤀᤠᤰᤂᤣᤗ᤹ᤖᤡᤰ ᤗᤠ᤺ᤵᤔᤠ ᤐᤥᤱ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤥ᤺ᤴᤎᤠᤰᤋᤢᤛᤡ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡ. ᤁᤖ ᤂᤧᤴ ᤔᤏᤠᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ ᤌᤣᤀᤠᤱ ᤔᤧᤶᤔᤧᤳᤋᤢᤛᤡᤴ॥ 26 ᤂᤧᤴ ᤔᤏᤠᤴ ᤜᤡᤳᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤐᤣ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤵᤔᤥ ᤗᤳᤇᤠ ᤕᤧᤰᤕᤰ ᤆᤥᤃᤢᤀᤠᤱ ᤂᤧᤸᤗᤧ ᤁᤢᤔᤡᤱ ᤗᤢᤈ ᤕᤢᤰᤂᤢ॥ ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤀᤠᤀᤡᤴ ᤌᤠᤖᤡᤰ ᤜᤠᤒᤠ ᤂᤧᤴ ᤏᤧᤖᤥ॥ 27 ᤁᤖ ᤔᤏᤛ᤻ᤛᤣᤒᤠ ᤔᤏᤠᤜᤠ᤹ᤖᤧ ᤒᤣᤌ-ᤛᤠᤏ. ᤋᤠᤏᤠᤁ. ᤍᤥᤖ. ᤕᤡᤒᤗᤠᤔ ᤜᤧᤰᤁᤩᤠᤱ ᤔᤃᤡᤍ᤻ᤍᤥ ᤏᤢ ᤁᤢᤄᤡᤖᤡᤒᤠ ᤐᤠᤱᤈᤢᤶᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ ᤔᤧᤴᤏᤠ᤺ᤴᤋᤢᤴ ᤔᤧᤴᤍᤣᤛᤢᤛᤡᤴ॥ ᤌᤣᤀᤠᤱᤓᤧᤸᤗᤧ ᤁᤏᤠᤏᤡᤜᤠ᤹ᤖᤧ ᤂᤧᤴ ᤋᤧᤴᤜᤠ᤹ᤀᤥ ᤜᤠᤒᤠ ᤔᤧᤶᤔᤢᤴᤏᤣ ᤕᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ॥ 28 ᤀᤠᤸᤗ ᤕᤠᤱᤛᤡ ᤀᤡᤛᤪᤠᤀᤡᤗᤡᤜᤠ᤹ ᤔᤢᤰᤛᤠᤶᤛᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤃᤡ ᤛᤠᤰᤁᤧᤸᤗᤧᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡ. ᤁᤖ ᤂᤧᤱᤜᤠ᤹ᤖᤧ ᤂᤧᤱᤜᤠ᤹ ᤁᤧᤖᤧᤰ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤠ᤺ᤳᤋᤢᤴ ᤔᤧᤴᤍᤣᤛᤢᤛᤡᤴ॥ 29 ᤃᤣᤈᤣᤖᤀᤥ ᤁᤧᤕᤢᤱᤒᤠ ᤁᤏᤠᤏᤡᤜᤠ᤹ ᤀᤣᤑᤪᤠᤀᤡᤔᤖᤧ ᤔᤧᤏᤠ᤺ᤳᤋᤢᤛᤡᤴ. ᤂᤧᤸᤗᤧᤆᤥᤃᤢᤸᤗᤧ ᤁᤏᤠᤏᤡᤜᤠ᤹ ᤃᤣᤈᤣᤖᤀᤥ ᤂᤢᤴᤇᤡ᤹ᤏᤢ ᤛᤥᤖᤡᤰ ᤔᤧᤕᤢᤅᤧ ᤔᤧᤃᤖᤧ॥ 30 ᤈᤒᤢᤗᤢᤏᤖᤧ ᤁᤡᤋᤪᤥᤏ ᤏᤢ ᤏᤜᤗᤥᤗᤒᤠ ᤁᤏᤠᤏᤡᤜᤠ᤹ ᤔᤧᤏᤠ᤺ᤳᤋᤢᤴ ᤔᤧᤍᤣᤛᤢᤛᤡᤴ. ᤂᤧᤸᤗᤧᤆᤥᤃᤢᤸᤗᤧ ᤁᤏᤠᤏᤡᤜᤠ᤹ ᤂᤢᤴᤇᤡ᤹ᤏᤢ ᤛᤥᤖᤡᤰ ᤔᤧᤕᤢᤅᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤱᤜᤠ᤹ ᤛᤠᤰᤁᤧᤸᤗᤧᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡ॥ 31 ᤀᤠᤛᤣᤖᤖᤧ ᤀᤰᤁᤥ. ᤛᤡᤍᤥᤏ. ᤀᤜᤗᤠᤒ. ᤀᤰᤈᤡᤒ. ᤜᤣᤗᤘᤠ. ᤀᤐᤣᤁ ᤏᤢ ᤖᤜᤥᤒ ᤁᤧᤕᤢᤱᤒᤠᤜᤠ᤹ ᤔᤧᤏᤠ᤺ᤳᤋᤢᤴ ᤔᤧᤍᤣᤛᤢᤛᤡᤴ॥ 32 ᤁᤶᤓᤗ᤹ᤖᤡᤰ ᤀᤠᤛᤣᤖᤡᤜᤠ᤹ ᤁᤏᤠᤏᤡ ᤕᤰᤕᤢᤱᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤕᤢᤅᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤱᤜᤠ᤹ ᤔᤧᤴᤏᤠ᤺ᤳᤋᤢᤴ ᤔᤧᤴᤍᤣᤛᤢᤛᤡᤴ॥ 33 ᤏᤵᤋᤠᤗᤡᤖᤧ ᤒᤣᤌ-ᤛᤣᤔᤣᤛ ᤏᤢ ᤒᤣᤌ-ᤀᤏᤠᤋᤒᤠ ᤕᤰᤕᤢᤱᤒᤠᤜᤠ᤹ ᤔᤧᤴᤏᤠ᤺ᤳᤋᤢᤛᤡᤴ. ᤁᤖ ᤂᤧᤵᤔᤥᤒᤠ ᤁᤏᤠᤏᤡᤜᤠ᤹ᤏᤢ ᤔᤧᤕᤢᤅᤧ. ᤜᤧᤰᤁᤩᤠᤱ ᤒᤣᤌ-ᤛᤣᤔᤣᤛ ᤕᤰᤕᤢᤱᤒᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠᤰᤁᤧᤸᤗᤧᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤒᤥ᤺ᤰᤂᤧ॥ 34 ᤀᤣᤔᤥᤖᤡᤜᤠ᤹ᤖᤧ ᤍᤠᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤔᤧᤏᤠ᤺ᤳᤋᤢᤔᤧᤍᤣᤛᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤧᤏᤧᤒᤠᤍᤧᤴᤏᤥ ᤕᤢᤔᤠ ᤔᤧᤶᤓᤠ᤺ᤰᤋᤢᤛᤡᤴ॥ 35 ᤀᤣᤔᤥᤖᤡᤜᤠ᤹ᤖᤧ ᤜᤣᤖᤣᤛ ᤁᤥ᤺ᤰᤔᤠ. ᤀᤕᤩᤠᤗᤥᤏ ᤏᤢ ᤛᤠᤸᤒᤡᤔᤀᤥ ᤔᤧᤶᤔᤢᤴᤏᤣ ᤕᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤁᤖ ᤕᤥᤛᤣᤑᤖᤧ ᤁᤢᤎᤠ᤺ᤰᤜᤠ᤹ ᤂᤧᤱᤜᤠ᤹ᤀᤥ ᤔᤢᤰᤛᤠᤶᤛᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤀᤠᤱ ᤂᤢᤴᤇᤡ᤹ ᤗᤠᤃᤡ ᤛᤠᤰᤁᤧᤸᤗᤧᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤈᤥᤃᤢᤛᤡ॥ 36 ᤀᤣᤍᤥᤔᤡᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤴ ᤀᤁᤪᤒ᤻ᤒᤡᤔᤒᤠ ᤌᤠᤶᤔᤠᤱᤒᤠᤗᤠᤶ ᤛᤣᤗᤠ ᤌᤠᤖᤡᤰᤏᤢ᤺ᤸᤗᤧᤀᤠᤱ ᤏᤠ ᤕᤠᤱᤄᤢᤀᤠᤱ ᤏᤧᤛ᤻ᤛᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.