ᤕᤠᤁᤢᤒ 4 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤒᤠᤅᤣ ᤐᤡᤀᤠᤛᤧᤶᤔᤧ᤹ᤀᤥ

¹ ᤂᤡᤏᤡ᤹ ᤗᤢᤶᤔᤥ ᤌᤧᤔᤠ᤺ᤸᤗᤧ ᤂᤣᤔᤠ ᤌᤰᤔᤠᤜᤠ᤹ ᤋᤠᤖᤢ᤹ᤒᤣ᥅ ᤂᤧᤱᤜᤠ᤹ᤃ ᤂᤡᤏᤡ᤹ ᤛᤡᤃᤠᤱ ᤌᤱ ᤁᤧᤈᤥ᤺ᤰᤐᤠ ᤑᤧᤴ ᤏᤡᤱᤘᤠ᤹ᤗᤠᤶ ᤗ᤺ᤶᤒᤠ ᤔᤣ᤺ᤶᤒᤡ᥅

² ᤂᤡᤏᤡ᤹ ᤂᤥᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤁᤧᤱᤄᤥᤛᤢᤶᤔᤡᤴ॥ ᤜᤧᤰᤁᤩᤠᤱ ᤂᤡ᤺ᤶᤒᤪᤠᤰ ᤁᤧᤈᤥᤃᤢᤶᤔᤠᤱ ᤔᤏᤠ ᤁᤧᤛᤧᤖᤢᤶᤛᤡᤶᤗᤥ॥ ᤜᤧᤰᤁᤣᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤂᤥᤔᤠ ᤁᤧᤴᤇᤢᤰᤋᤢᤶᤔᤡᤴ ᤜᤧᤰᤁᤩᤠᤱ ᤁᤧᤄᤣ᤹ᤀᤡ ᤁᤧᤎᤰᤋᤡ᤹॥ ᤀᤠᤸᤗᤛᤠᤱ ᤁᤧᤱᤄᤥᤛᤢᤶᤔᤡᤴ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤴᤏᤠ᤺ᤰᤋᤢᤶᤔᤡᤴᤗᤥ॥

³ ᤂᤡᤏᤡ᤹ ᤁᤧᤏᤠ᤺ᤰᤋᤢᤶ ᤁᤖ ᤁᤧᤱᤄᤥᤛᤢᤶᤔᤡᤴ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤑᤠ᤹ᤀᤠᤱ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤁᤧᤏᤠ᤺ᤰᤋᤢᤶᤗᤥ॥

⁴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤛᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤁᤧᤔᤧᤵᤐᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤐᤥᤱ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤁᤧᤔᤧᤵᤐᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤐᤥᤱᤗᤥ॥

⁵ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤀᤥ ᤕᤢᤰᤂᤢᤒᤠ ᤛᤣᤛᤣᤔᤠᤱᤅᤡᤸᤗᤧ ᤛᤠ᤹ᤖᤡᤰᤁᤣ ᤁᤢᤏᤠᤜᤧᤴ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤜᤏᤧᤖᤥ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅

⁶ ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤕᤠᤶᤔᤥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢ᤹. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤀᤳᤋᤢᤛᤡ᤹. ᤁᤖ ᤏ᤺ᤶᤏ᤺ᤶᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥”

⁷ ᤂᤧᤸᤗᤧᤆᤥᤃᤢᤸᤗᤧ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤒᤠᤅᤣ ᤐᤡᤀᤠᤛᤡᤶᤔᤧ᤹ᤀᤥ॥ ᤔᤠᤑᤧᤴᤛᤠᤶᤔᤡᤴ ᤀᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤂᤡᤏᤡ᤹ᤗᤠᤶ ᤔᤠ᤺ᤱᤄᤠ ᤂᤧᤳᤇᤡᤱᤗᤥ॥

⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤋᤩᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤂᤡᤏᤡ᤹ ᤐᤣᤛᤠᤱ ᤋᤠ᤺ᤖᤥ॥ ᤂᤡᤏᤡ᤹ ᤗᤠᤕᤥᤒᤠᤛᤣ. ᤗᤠᤕᤥ ᤆᤥ᤺ᤰᤔᤠ ᤗᤧᤖᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤜᤡᤸᤗᤡᤰᤗᤡᤰᤐᤠ ᤏᤡᤱᤘᤠ᤹ ᤁᤧᤃᤵᤐᤠᤛᤣ. ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤛᤣᤛᤣ ᤆᤥᤃᤧᤶᤔᤧ᤹ᤀᤥ

⁹ ᤗᤠᤕᤥ ᤁᤧᤈᤥᤃᤢᤶᤒᤠᤀᤥ ᤔᤧᤖᤡᤱ ᤌᤰᤋᤧᤶᤔᤧ᤹. ᤜᤠᤒᤧᤶᤔᤧ᤹ᤀᤥ॥ ᤂᤡᤏᤡ᤹ ᤀᤣ᤺ᤵᤔᤠᤴ ᤔᤧᤖᤡᤱ ᤌᤰᤔᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛ᤺ᤵᤔᤧᤴ ᤋᤢᤰᤂᤣᤀᤥ ᤗᤧᤰᤂᤧᤶᤔᤧ᤹ᤀᤥ॥

¹⁰ ᤍᤠᤱᤒᤠᤸᤗᤧ ᤁᤢᤍᤃᤡ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤓᤥᤛᤡ ᤁᤧᤒᤡᤖᤡ᤹ᤖᤥ॥

ᤆᤧᤱᤛᤡᤱᤔᤠ ᤔᤣ᤺ᤴ

¹¹ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤘᤣ᤹ᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥ ᤀᤠᤳᤋᤡᤴ ᤁᤢᤴᤛᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤑᤧᤴᤐᤠᤴ ᤐᤠ᤺ᤳ ᤀᤡᤃᤪ ᤀᤠᤳᤋᤡᤸᤗᤧ ᤁᤢᤴᤛᤠ᤹ ᤀᤠᤵᤋᤡᤰ ᤁᤢ᤺ᤳᤋᤢ᤹. ᤂᤧᤱᤃ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤠᤱ ᤛᤠᤶᤕᤥᤌᤡᤶᤔᤡᤴ ᤂᤠᤛᤧᤴ ᤗᤥ᤺ᤴᤍᤢ᤹ᤖᤥ॥ ᤀᤠᤸᤗ ᤛᤠᤶᤕᤥᤌᤡᤶᤔᤡᤴ ᤂᤠᤛᤧᤴ ᤁᤧᤗᤥ᤺ᤴᤍᤢ᤹ᤏᤧ ᤑᤠ᤹ᤃᤪ. ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤣ᤺ᤴ. ᤁᤖ ᤛᤠᤶᤕᤥᤌᤡᤶᤔᤡᤸᤗᤧᤴ ᤂᤠᤛᤧᤴᤗᤥ᤺ᤶᤒᤠ ᤁᤧᤒᤥᤱᤗᤥ॥

¹² ᤛᤠᤶᤕᤥᤌᤡᤶ ᤁᤧᤒᤡᤒᤠ ᤏᤢ ᤂᤠᤛᤧᤴᤍᤠᤱᤒᤠᤃ ᤌᤡᤰᤗᤰ ᤘᤠ᤹ᤖᤥ॥ ᤂᤢᤏᤧ᤹ᤏᤢᤀᤣ ᤋᤠᤱᤛᤧ᤺ᤵᤔᤠ ᤏᤢ ᤔᤧᤱᤔᤠ ᤔᤢᤰᤛᤠᤶ ᤘᤠ᤹ᤖᤥ॥ ᤁᤖ ᤂᤧᤏᤧ᤹ᤃ ᤀᤠᤒᤠᤅᤣ ᤐᤠᤱᤓᤣ᤹ᤛᤠᤒᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤧᤴ ᤜᤠ᤺ᤳᤏᤧᤒᤣ᥅

ᤋᤠᤕᤧᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤍᤡᤱ ᤗ᤹ᤔᤠ ᤔᤣ᤺ᤴ

¹³ ᤀᤠᤀᤡᤴ ᤀᤡᤃᤪ ᤋᤠ᤺ᤴᤍᤡᤰ ᤀᤠᤏᤡᤃᤣ ᤕᤧᤰᤕᤰᤌᤡᤰᤁᤥ ᤐᤡᤃᤡᤃᤧ᤹ᤀᤠᤱ ᤂᤧᤵᤔᤥ ᤋᤱᤒᤣᤎᤡᤰ ᤘᤕᤡᤃᤧ. ᤜᤧᤰᤁᤩᤠᤱ ᤗᤧᤱᤜᤱ ᤆᤥᤃᤢᤶᤒᤧ᤹ᤀᤠᤱ ᤕᤠᤱ ᤌᤃᤢᤶᤒᤧ᤹ ᤗ᤹ᤖᤡᤰ ᤁᤧᤒᤠ᤺ᤵᤐᤠᤛᤣ. ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ.

¹⁴ ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰ ᤌᤣ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤴᤏᤡᤛᤢᤶᤔᤡᤴᤗᤥ॥ ᤂᤡᤏᤡ᤹ ᤜᤡᤱᤔᤴᤏᤡᤱᤃ ᤛᤵᤑᤠᤎᤡᤰ ᤁᤧᤎᤠ᤺ᤵᤐᤠᤀᤠᤱ ᤁᤧᤔᤠᤒᤠ ᤁᤧᤒᤣ᤺ᤰᤐᤠ ᤋᤢᤱᤜᤡ᤺ᤰ ᤁᤢᤀᤡᤛᤡᤰ ᤆᤥᤰᤗᤥ॥

¹⁵ ᤂᤡᤏᤡ᤹ ᤜᤧᤰᤁᤣ ᤐᤠ᤺ᤵᤔᤠᤸᤗᤧ ᤁᤢᤗᤧᤰᤘᤠᤃ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤐᤥᤱᤏᤧ ᤑᤠ᤹ᤃᤪ ᤜᤡᤅᤡᤃᤧᤀᤠᤱ ᤀᤰᤂᤣ ᤜᤧᤰᤁᤣ ᤆᤥᤃᤢᤶᤒᤧ᤹ ᤐᤠ᤺ᤵᤔᤠ ᤁᤧᤒᤥᤱᤒᤠᤏᤧ ᤘᤕᤧ॥

¹⁶ ᤁᤖ ᤂᤡᤏᤡ᤹ᤃ ᤀᤠᤒᤠᤅᤣ ᤏᤡᤱᤛᤣ᤺ᤰᤁᤥᤏᤧ ᤀᤠᤱᤍᤡᤱ ᤁᤧᤗ᤹ᤖᤡᤀᤠᤱ ᤁᤧᤜᤧᤴᤏᤠ᤹ᤛᤡᤖᤥ॥ ᤂᤧᤴ ᤜᤧᤰᤋᤱᤒᤠ ᤁᤠᤰ ᤜᤧᤴᤇᤡᤱᤔᤠᤱᤃ ᤋᤠᤵᤑᤧ᤺ᤶᤒᤠ ᤐᤠ᤺ᤴᤗᤥ॥

¹⁷ ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤸᤗᤧ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤛ᤻ᤛᤢᤀᤠᤱᤛᤠᤱ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤂᤧᤸᤗᤧ ᤗᤠᤕᤥ ᤆᤥᤃᤢ᤹ᤖᤥ॥