ᤕᤠᤁᤢᤒ 3 - LIFOTNT

ᤗᤧᤛᤥ᤺ᤵᤐᤧᤴ ᤕᤢᤰᤁᤥ ᤁᤵᤔᤠ

¹ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤕᤖᤡᤰ ᤛᤡᤰᤛᤠᤶᤒᤠ ᤐᤥᤱᤔᤠ ᤔᤧᤃᤥ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤡᤰᤛᤠᤶᤒᤠᤜᤠ᤹ ᤘᤣ᤹ᤜᤠ᤹ᤏᤢ᤺ᤸᤗᤧ ᤁᤧᤛᤠᤰᤐᤠ ᤂᤠᤛᤧᤴᤏᤥ ᤀᤠᤎᤠ᤹᤺ ᤁᤧᤗ᤹ᤒᤠᤴ ᤁᤧᤏᤡᤛᤢᤶᤗᤥ॥

² ᤀᤠᤏᤡ᤹ ᤁᤧᤖᤧᤰ ᤕᤖᤡᤰ ᤐᤠ᤺ᤴᤜᤠ᤹ᤀᤥ ᤀᤠᤒᤣ᤺ᤴᤗᤥ. ᤁᤖ ᤀᤠᤳᤋᤡᤴ ᤔᤏᤠᤴ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤔᤧᤒᤣ᤺ᤴᤏᤡᤴᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤧᤸᤗᤧᤃ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤕᤢᤰᤁᤥ ᤁᤵᤔᤠ ᤛᤢᤰᤋᤢ᤹. ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥᤱᤗᤥ॥

³ ᤀᤴᤏᤡᤸᤗᤧ ᤁᤢᤔᤢᤖᤠᤀᤥ ᤆᤢᤰᤛᤠ ᤁᤖᤧᤗᤡᤴ ᤁᤣ᤺ᤵᤔᤠᤀᤠᤱ ᤂᤧᤴ ᤕᤶᤒᤠ ᤌᤰᤛᤠᤴ ᤀᤠᤳᤋᤠᤴ ᤋᤣ᤹ᤔᤠ ᤏᤡᤱᤘᤠ᤹ ᤀᤠᤈᤥᤃᤢᤶ ᤂᤧᤵᤔᤥᤀᤣ ᤋᤣ᤹ᤔᤠ ᤀᤠᤛᤢᤰᤋᤢᤶᤗᤥ॥

⁴ ᤜᤧᤰᤁᤣᤗ᤹ᤖᤡᤰᤁᤣ ᤘᤠᤗᤠᤎᤠᤴ ᤕᤶᤒᤠ ᤆᤥᤰ. ᤜᤧᤰᤁᤩᤠᤱ ᤕᤶᤒᤠ ᤛᤢᤖᤡᤳᤋᤡᤸᤗᤧ ᤔᤢ᤺ᤳᤋᤢ ᤋᤣ᤹ᤖᤢᤛᤠᤱ ᤘᤠᤍᤥ ᤆᤠ᤺ᤰᤐᤠᤸᤗᤧ ᤏᤠ ᤁᤳᤏᤠ ᤁᤧᤜᤡᤒᤠ ᤆᤢᤰᤛᤠ ᤛᤠᤔᤠ᤺ᤸᤗᤧ ᤘᤠᤗᤠᤎᤠᤴ ᤀᤠᤳᤋᤠᤴᤛᤠᤱ ᤋᤣ᤹ᤔᤠ ᤛᤢᤰᤋᤢ᤹ᤖᤥ॥

⁵ ᤜᤧᤰᤁᤣᤗ᤹ᤖᤡᤰᤁᤣ ᤗᤧᤛᤥ᤺ᤵᤐᤧᤴᤏᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤆᤢ᤺ᤰᤛᤠᤱ ᤁᤴ ᤕᤶᤒᤕᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤍᤡᤱ ᤗ᤹ᤖᤥ॥ ᤆᤢᤰᤛᤠ ᤔᤡᤛᤣ᤺ᤰᤁᤡᤸᤗᤧ ᤕᤶᤒᤠ ᤋᤠᤶᤓᤢᤱᤅᤡᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ ᤗ᤹ᤖᤡᤰ ᤀᤡ᤺ᤳᤋᤧᤶᤔᤧ᤹ᤀᤥ᥄

⁶ ᤜᤧᤰᤁᤣᤗ᤹ᤖᤡᤰᤁᤣ ᤗᤧᤛᤥ᤺ᤵᤐᤠᤱᤃ ᤔᤡ ᤜᤧᤰᤋᤱᤒᤠᤖᤥ॥ ᤁᤱᤃ ᤏᤠᤛᤡᤱᤃᤧᤴ ᤌᤰᤁᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤢᤱᤗᤥ॥ ᤂᤧᤴ ᤗᤧᤛᤥ᤺ᤵᤐᤠᤸᤗᤧ ᤔᤏᤠ᤺ᤸᤗᤧ ᤁᤠᤰ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤆᤡ᤺ᤴᤍᤢ᤹ᤀᤠᤱ ᤁᤢᤜᤡᤱᤔᤴᤏᤡᤴ ᤁᤧᤖᤧᤰ ᤔᤡᤎᤡᤰᤂᤢ᤹ᤖᤥ॥ ᤂᤧᤴ ᤔᤡᤱᤃ ᤂᤧᤔᤠᤕᤱᤛᤱᤗᤠᤶᤔᤣ ᤗ᤺ᤴᤗᤥ॥

⁷ ᤁᤠᤰ ᤐᤖᤡᤰᤐᤠ ᤌᤰᤛᤠᤐᤢᤛᤠ. ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤏᤢ ᤘᤠᤜᤱᤅᤥᤒᤠ ᤌᤰᤛᤠᤜᤠ᤹ ᤂᤢᤶᤔᤠ ᤛᤢᤰᤔᤧᤍᤧᤳᤗᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤄᤢᤶᤛᤢᤛᤡ᤹ᤖᤥ.

⁸ ᤁᤖ ᤗᤧᤛᤥ᤺ᤵᤐᤠᤱᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤂᤢᤶᤔᤠ ᤔᤧᤛᤢᤰᤋᤢᤴᤗᤥ॥ ᤁᤱᤃ ᤕᤢᤰᤁᤥ ᤁᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤋᤠᤵᤑᤧ᤺ᤶᤒᤠ ᤆᤥᤰ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤧᤛᤧᤵᤐᤠ ᤏᤡᤱᤅᤡᤸᤗᤧ ᤁᤢᤎᤡᤶᤒᤠ ᤆᤥᤰᤗᤥ॥

⁹ ᤒᤠ ᤁᤴ ᤗᤧᤛᤥ᤺ᤵᤐᤠᤸᤗᤧᤀᤣ ᤀᤠᤏᤡ᤹ ᤍᤠᤱᤒᤠ ᤏᤢ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤀᤠᤓᤥᤛᤢᤶ. ᤜᤧᤰᤁᤩᤠᤱ ᤒᤠ ᤁᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤒᤡ ᤁᤢᤀᤡᤳᤇᤠᤵᤐᤥ ᤆᤥᤃᤢᤛᤡᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠᤰᤔᤢᤖᤠ ᤀᤠᤔᤧᤳᤋᤢᤶᤛᤡᤶᤗᤥ॥

¹⁰ ᤜᤧᤰᤁᤣᤗ᤹ᤖᤡᤰ ᤗᤳᤇᤠ ᤔᤢᤖᤠᤀᤥᤗᤠᤶ ᤔᤢ᤹ᤀᤡᤛᤠᤶ ᤏᤢ ᤛᤠᤰᤔᤢᤖᤠᤴ ᤗ᤺ᤴᤗᤥ॥ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤰᤂᤣ ᤐᤥᤱᤔᤠᤃ ᤔᤧᤏᤢ᤹ᤏᤧᤴᤗᤥ॥

¹¹ ᤗᤳᤌᤡᤰ ᤘᤠᤒᤢᤴᤏᤥᤗᤠᤶ ᤁᤢᤈᤠ ᤁᤧᤏᤢ᤹ᤒᤠ ᤏᤢ ᤁᤧᤗᤠ᤺ᤰᤐᤠ ᤆᤫᤠ᤺ᤳᤋᤡᤴ ᤐᤢᤴᤒᤡ᥅

¹² ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤐ᤺ᤳᤇᤣ᤹ᤀᤡᤸᤗᤧ ᤁᤢᤒᤢᤱᤔᤥ ᤈᤤᤋᤢᤏᤧᤸᤗᤧ ᤁᤢᤛᤣ᤹ ᤌᤥ᤺ᤰᤐᤡ. ᤀᤡᤃᤪ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤔᤥ ᤐ᤺ᤳᤇᤣ᤹ᤀᤡᤴ ᤌᤥ᤺ᤰᤐᤡ᥅ ᤔᤧᤎᤥ᤺ᤰᤏᤧᤴᤗᤥ᥄ ᤜᤧᤰᤁᤩᤠᤱ ᤁᤧᤗᤠ᤺ᤰᤐᤠ ᤘᤠᤒᤢᤴᤏᤥᤗᤠᤶ ᤁᤢᤈᤠ ᤁᤧᤏᤢ᤹ᤒᤠ ᤆᤫᤠ᤺ᤳᤋᤡᤴ ᤔᤧᤒᤢᤴᤏᤧᤴᤗᤥ॥

ᤛᤧᤰᤂᤠᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤠ᤺

¹³ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤛᤡᤰᤁᤢᤶᤛᤠᤒᤠ ᤏᤢ ᤀᤡ᤺ᤳᤇᤡᤱᤛᤠᤶᤛᤠᤒᤠᤸᤗᤧ ᤏᤢᤒᤠ ᤁᤢᤜᤡᤱᤔᤴᤏᤥᤗᤠᤶ ᤜᤧᤰᤁᤩᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤁᤧᤍᤠᤒᤠ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤥ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤗᤠᤶ ᤀᤥᤛᤣ᤺ᤴᤎᤠᤰᤛᤡᤱᤗᤖᤥ॥

¹⁴ ᤁᤖ ᤂᤡᤏᤡ᤹ ᤋᤡᤱᤍᤡᤱᤃᤧᤴ ᤏᤠᤜᤧᤶᤔᤠ ᤏᤢ ᤀᤠᤒᤠᤅᤣᤖᤰ ᤏᤢ᤹ᤔᤠ ᤋᤠᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤈᤥᤃᤢᤶᤒᤠ ᤗᤠᤕᤥᤴ ᤀᤠᤱᤍᤡᤱ ᤁᤧᤗ᤹ᤖᤡᤖ ᤜᤧᤰᤁᤩᤠᤱ ᤀᤡᤱᤗᤧᤰ ᤁᤧᤒᤠᤖᤡᤖ ᤔᤧᤔᤠ᤹ᤖᤧᤶᤔᤡᤴᤏᤧ᤹ᤀᤥ॥

¹⁵ ᤀᤰᤋᤱᤒᤠ “ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤱᤃ” ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤣ᤺ᤴ. ᤁᤖ ᤀᤡᤰᤛᤠᤒᤠ ᤏᤢ ᤕᤠᤶᤏᤡᤱᤘᤠ᤹ᤒᤠ ᤆᤥᤰ. ᤜᤧᤰᤁᤩᤠᤱ ᤂᤧᤱᤃ ᤔᤠᤑᤧᤴᤛᤠᤶᤗᤠᤶ ᤋᤠ᤺ᤖᤥ॥

¹⁶ ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤏᤠᤜᤧᤶᤔᤠ ᤏᤢ ᤀᤠᤒᤠᤅᤣᤖᤰ ᤏᤢ᤹ᤔᤠ ᤋᤠᤔᤠ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠ ᤔᤧᤘᤠ᤹. ᤂᤧᤵᤔᤥ ᤕᤧᤔᤧᤴᤍᤱ ᤐᤠᤴ ᤏᤢ ᤁᤠᤰ ᤐᤖᤡᤰᤗᤧᤴ ᤑᤧᤴᤐᤠᤴ ᤐᤥᤱᤗᤥ॥

¹⁷ ᤁᤖ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤁᤠᤰᤏᤢ᤺ᤸᤗᤧ ᤋᤃᤡᤃ ᤛᤣᤛᤣᤒᤠ ᤆᤥᤰ. ᤜᤧᤰᤁᤩᤠᤱ ᤛᤏᤠᤖᤢᤱᤒᤠ. ᤗᤢᤶᤗᤢᤶᤒᤠ. ᤘᤣ᤹ᤜᤠ᤹ᤏᤢ ᤁᤧᤍᤱᤒᤠ. ᤗᤢᤱᤍᤢᤰ ᤁᤢᤎᤡᤶ. ᤏᤢᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤎᤡᤶ. ᤔᤏᤠ ᤔᤧᤴᤇᤧᤶᤔᤏᤠᤒᤠ ᤏᤢ ᤏᤛᤠ᤺ᤴᤛᤠᤒᤠ ᤆᤥᤰᤗᤥ॥

¹⁸ ᤛᤏᤠᤖᤢᤱ ᤁᤧᤍᤠ᤺ᤵᤐᤠᤜᤠ᤹ᤖᤧ ᤕᤠ᤹ᤖᤡ᤺ᤶᤒᤠᤴ ᤋᤣ᤺ᤶᤏᤠᤒᤠ ᤁᤢᤀᤡᤛᤡᤰ ᤛᤏᤠᤖᤢᤱᤅᤡᤴ ᤔᤧᤍᤣᤛᤢ᤹. ᤜᤧᤰᤁᤩᤠᤱ ᤕᤖᤡᤰ ᤁᤢᤈᤠ ᤔᤧᤛᤢᤵᤛᤢᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤕᤖᤡᤰ ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤛᤢᤵᤛᤢᤛᤡ᤹ᤖᤥ॥