ᤕᤛᤤᤕᤠ 9 - LIFOTNTᤛᤏᤠᤖᤢᤱ ᤁᤧᤍᤠ᤺ᤵᤐᤠ ᤜᤠᤱ 1 ᤜᤧᤰᤁᤣᤛᤠᤱ ᤂᤧᤴ ᤂᤠᤔᤠᤰᤔᤠ ᤕᤧᤶᤔᤡᤴ ᤏᤢ ᤏᤡᤱᤛᤠᤶᤔᤡᤴ ᤕᤖᤡᤰ ᤁᤣ᤺ᤸᤗᤡᤰ ᤔᤧᤒᤣ᤺ᤰᤏᤧᤴ॥ ᤁᤧᤖᤧᤰᤏᤢ᤺ᤸᤗᤧ ᤋᤃᤡᤃ ᤂᤢᤏᤧ᤹ ᤈᤒᤗᤢᤏ ᤗᤠᤈᤣᤴ ᤏᤢ ᤏᤠᤵᤋᤠᤗᤡ ᤗᤠᤈᤣᤴ ᤏ᤺ᤶᤏᤧᤛᤡᤖ ᤕᤠ᤺ᤴᤍᤢᤛᤡ. ᤁᤖ ᤁᤧᤍᤠᤒᤠ ᤕᤧᤶᤔᤥᤃ ᤂᤢᤏᤧ᤹ ᤕᤷᤍᤏ ᤘᤜ᤺ᤱ ᤏᤢ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤁᤧᤏᤧᤒᤠ ᤃᤠᤗᤡᤗᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤧᤱᤃᤵᤐᤡᤴ ᤀᤡᤱᤎᤠᤱ ᤐᤡᤖᤢᤖᤥ— 2 ᤂᤠᤔᤠᤰᤔᤥ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤜᤠ᤹ᤖᤧ ᤗᤳᤇᤠ ᤕᤶᤒᤠ ᤀᤥ᤺ᤳᤋᤡᤎᤡᤰ ᤔᤧᤏᤡᤛᤢᤀᤠᤱ ᤘᤠ᤹ᤖᤥ॥ ᤂᤧᤴ ᤛᤡᤔᤧᤸᤗᤧ ᤏᤠᤶᤀᤡ᤺ᤰᤂᤱᤅᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤂᤧᤴ ᤀᤥ᤺ᤳᤋᤡ᤺ᤸᤗᤧ ᤌᤥ᤹ᤖᤢᤀᤠᤱ ᤘᤠ᤹ᤖᤥ॥ 3 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤂᤧᤴ ᤛᤢᤘᤠᤱᤅᤡᤴ ᤕᤖᤡᤰ ᤔᤧᤒᤥ᤺ᤴᤍᤧᤖ ᤁᤧᤕᤠ᤺ᤴᤍᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤁᤴ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤆᤠᤛᤢᤶᤔᤠ ᤕᤧᤶᤔᤥ ᤐᤛ᤺ᤳ ᤔᤧᤛ᤺ᤵᤐᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛ᤺ᤵᤔᤧᤴ ᤁᤧᤓᤥᤛᤢ ᤁᤧᤒᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤌᤰᤛᤢᤒᤠᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤓ᤺ᤰᤛᤢᤸᤗᤧ ᤔᤧᤛ᤺ᤵᤐᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤔᤧᤀ᤺ᤰᤗ ᤔᤧᤛ᤺ᤳᤗᤥ॥ 4 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤗᤡ᤺ᤵᤐᤠ ᤂᤧ᤺ᤵᤛᤡᤱᤅᤡᤴ ᤁᤧᤀᤧᤰᤂᤢ ᤁᤧᤒᤡᤖᤢᤛᤡᤖᤥ ᤜᤧᤰᤁᤩᤠᤱ ᤋᤧ᤺ᤶᤓᤢᤰᤁᤡᤴ ᤛᤩᤠᤰ ᤘᤕᤠᤰ ᤁᤧᤓᤢ᤹ᤖᤢ ᤁᤧᤒᤡᤖᤢᤛᤡᤀᤠᤱ ᤘᤠ᤹ᤖᤥ॥ ᤕᤖᤡᤰ ᤕᤧᤴ ᤋᤃᤡ ᤔᤡᤎᤩᤠᤏ ᤗᤠᤈᤣ᤹ᤒᤠ ᤌᤰᤛᤢᤒᤠᤜᤠ᤹ ᤁᤧᤏᤠ᤺ᤴᤍᤢᤛᤡᤒᤠ ᤜᤧᤰᤁᤣᤀᤣ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤧᤕᤢᤰᤐᤠ ᤏᤢ ᤋᤢᤰᤂᤣ ᤁᤧᤈᤠ᤺ᤵᤐᤠ ᤛᤢᤘᤠᤱᤜᤠ᤹ ᤁᤧᤏᤠ᤺ᤴᤍᤢᤛᤡᤀᤠᤱ ᤘᤠ᤹ᤖᤥ॥ 5 ᤋᤧᤴᤎᤱᤅᤥ ᤁᤧᤖᤧᤰ ᤌᤰᤛᤢᤒᤠᤜᤠ᤹ᤖᤧ ᤔᤧᤈᤠᤰᤂᤢᤒᤠ ᤂᤢᤴᤇᤡ᤹ ᤗᤠᤱᤛᤢ᤺ᤵᤜᤠ᤹ ᤏᤢ ᤔᤠᤰᤂᤡ᤹ᤀᤥ ᤛ᤹ᤔᤏᤠᤒᤠ ᤁᤧᤖᤧᤰ ᤆᤠᤱᤜᤠ᤹ ᤔᤡᤎᤡᤱᤔᤠᤖᤧ ᤗᤠᤃᤡ ᤔᤧᤓᤢᤰᤂᤢᤖᤥ ᤜᤧᤰᤁᤩᤠᤱ ᤔᤡᤀᤥ ᤜᤠ᤺ᤶᤔᤠᤖᤧ ᤗᤠᤃᤡ ᤏᤡ᤺ᤱᤃᤣ᤹ ᤐᤥᤱᤗᤥ॥ 6 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤗᤠᤃᤡ ᤗᤳᤇᤠ ᤕᤧᤶᤒᤡᤳᤇᤠᤛᤠ ᤀᤅᤧ᤺ᤰᤘᤠᤎᤡᤰ ᤛᤠᤘᤠ᤺ᤴᤇᤡᤱᤅᤠᤱ ᤘᤠ᤹ᤖᤥ॥ ᤀᤠᤏᤡ᤹ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤀᤠᤶᤒᤡᤖᤧᤀᤠᤱ ᤘᤠ᤹ᤖᤥ ᤂᤢᤏᤧ᤹ᤀᤣ ᤀᤠᤏᤡ᤹ ᤛᤶᤎᤠᤱ ᤕᤢᤰ ᤆᤥᤃᤢᤖᤥ॥ ᤂᤢᤏᤧ᤹ ᤏᤡᤱᤘᤠ᤹ ᤁᤧᤔᤠᤒᤠ ᤛᤢᤈᤠᤍᤠᤱᤒᤠ. ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ. ᤏᤢᤵᤔᤧᤴᤍᤡᤱ ᤐᤠᤏᤢᤍᤡᤱ ᤐᤠ. ᤜᤧᤰᤁᤩᤠᤱ ᤛᤏᤠᤖᤢᤱᤃᤧᤴ ᤜᤠᤱᤛᤠ ᤔᤧᤔᤧᤳᤋᤢᤖᤥ॥ 7 ᤂᤢᤏᤧ᤹ ᤕᤢᤰ ᤆᤥᤃᤢᤒᤠ ᤔᤢᤰᤛᤠᤶᤔᤡᤴ ᤜᤠᤒᤠ ᤆᤰᤔᤧᤸᤗ᤹ᤀᤣ ᤐᤥᤀᤠᤱ ᤐᤳᤗᤥ. ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤀᤠᤓᤧᤸᤗᤧᤛᤠᤱ ᤛᤏᤠᤖᤢᤱ ᤏᤢ ᤏᤢ᤹ᤔᤠᤍᤠᤔᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤠ᤺ᤰ ᤍᤠᤀᤢᤍᤖᤧ ᤁᤢᤀᤣᤃᤠᤱ ᤁᤧᤍᤠᤒᤠ ᤜᤠᤱᤅᤡᤱᤃ ᤂᤢᤏᤧ᤹ᤀᤣ ᤐᤥᤱᤗᤥ॥ ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤏᤢ ᤛᤠᤶᤕᤥᤒᤠᤴ ᤛᤥᤖᤡᤰ ᤆᤥᤃᤢᤀᤠᤱ ᤜᤠᤱᤕᤢᤰ ᤆᤥᤃᤢᤖᤥ॥ ᤂᤧᤴ ᤕᤧᤶᤔᤠᤱᤎᤥ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤖᤥ ᤕᤜᤘᤣ ᤍᤠᤱᤒᤠ ᤔᤢᤰᤛᤠᤶᤍᤠᤱᤒᤧᤸᤗᤧ ᤁᤢᤛᤡᤰᤛᤶᤔᤧᤸᤗᤧ ᤁᤴ ᤐᤠ᤺ᤴᤏᤡᤴ ᤁᤢᤗᤡᤱᤍᤥ ᤁᤧᤳᤋᤢᤖᤥ॥ ᤀᤡᤛᤪᤠᤀᤡᤗᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ 8 ᤕᤜᤘᤣ ᤍᤠᤱᤒᤧᤸᤗᤧ ᤕᤠᤁᤢᤒᤖᤧ ᤁᤢᤍᤰᤗᤧᤱᤘᤠᤀᤥ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤛᤶᤍᤠᤱ ᤆᤢᤰᤗᤥ॥ 9 ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤛᤠᤔᤖᤡᤕᤠᤒᤠ ᤔᤏᤠᤜᤠ᤹ᤖᤧ ᤜᤠᤖᤠᤀᤣ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤗ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤀᤥ ᤕᤶᤒᤠ ᤔᤧᤗᤧᤱᤛᤡᤱᤅᤠᤱ ᤔᤧᤒᤠ᤺ᤳᤋᤢᤖᤥ. 10 “ᤂᤠᤶᤗᤧᤰᤜᤠ᤹ ᤗᤢ᤺ᤴᤍᤧᤀᤠᤱ ᤏᤧᤖᤥ. ᤁᤖ ᤀᤠᤏᤡᤃᤣ ᤗᤰᤔᤏᤠᤒᤠ ᤗᤢᤱᤜᤠ᤹ᤖᤧ ᤕᤠᤶᤔᤥ ᤛᤧᤳᤋᤢᤶᤒᤧᤖᤥ॥ ᤂ᤺ᤰᤛᤧ᤹ ᤛᤡᤱᤒᤢᤱᤜᤠ᤹ ᤔᤧᤍᤠᤅᤢ ᤔᤧᤛᤥ᤺ᤴᤍᤢᤀᤠᤱ ᤏᤧᤖᤥ. ᤁᤖ ᤀᤠᤏᤡᤃᤣ ᤂᤧᤸᤗᤧ ᤁᤢᤗᤧᤰᤘᤠ ᤏᤢᤒᤠ ᤛᤠᤶᤔᤠᤱᤛᤡᤱᤜᤠ᤹ ᤗᤣ᤺ᤳᤋᤢᤶᤒᤧᤖᤥ॥” 11 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤖᤛᤡᤏᤖᤧ ᤁᤢᤏᤡᤱᤔᤡᤜᤠ᤹ ᤁᤧᤎᤢᤶᤒᤠ ᤆᤥᤃᤢᤛᤡᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤂᤢᤏᤧ᤹ ᤜᤢᤛᤢᤛᤡᤀᤠᤱ ᤘᤠ᤹ᤖᤥ॥ 12 ᤀᤖᤠᤔᤡᤜᤠ᤹ᤖᤧ ᤋ᤹ᤀᤡ ᤏᤠᤱᤃᤧᤴ ᤐᤡᤛᤠᤱᤗᤠᤶᤒᤠ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤏᤠᤶᤎᤠ ᤐᤡᤛᤠᤱᤗᤠᤶᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤜᤠ ᤔᤧᤔᤧᤳᤋᤢᤀᤠᤱ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ ᤔᤧᤗᤖᤢ ᤔᤧᤍᤣᤛᤢᤛᤡᤖᤥ॥ ᤁᤶᤓᤩᤠᤖᤡᤰᤁᤠᤱᤛᤠᤱ ᤂᤢᤏᤧ᤹ ᤁᤢᤛᤡᤰᤁᤧᤴ ᤔᤧᤴᤈᤡᤵᤐᤣ ᤘᤠ᤹ᤖᤥ. ᤂᤧᤒᤩᤠᤱ ᤀᤠᤸᤗᤛᤠᤱ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤂᤧᤱᤜᤠ᤹ ᤛᤠ᤺ᤵᤛᤢᤛᤡᤀᤠᤱ ᤐᤳᤗᤥ॥ 13 ᤁᤴ ᤔᤏᤠᤜᤠ᤹ᤖᤧ ᤁᤶᤓᤩᤠᤖᤡᤰ ᤋᤸᤗᤡᤰ ᤂᤢᤶᤍᤡᤱ ᤔᤧᤄᤥᤛᤢᤛᤠᤱ ᤂᤧᤱᤜᤠ᤹ ᤔᤧᤴᤜᤡᤴᤏᤧ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤗᤧᤵᤔᤠᤱ ᤔᤧᤴᤜᤡᤛᤡᤱᤅᤣ ᤔᤧᤘᤠ᤹ᤖᤥ॥ 14 ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤌᤡᤰᤕᤧᤴᤗᤧ ᤀᤡᤛᤪᤠᤀᤡᤗᤗᤠᤶᤒᤠ ᤁᤢᤎᤧᤃᤣᤰ ᤏᤢ ᤁᤢᤔᤡᤴ ᤜᤧᤰᤁᤩᤠᤱ ᤂᤧᤒᤰᤛᤡᤱ ᤐᤥᤖᤠ᤺ᤰᤜᤠ᤹ ᤏᤢ ᤛᤡᤍᤠᤰᤐᤠᤜᤠ᤹ ᤆᤠᤰᤗᤧ ᤂᤰᤋᤢᤍᤣᤛᤢᤖᤥ॥ 15 ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤁᤢᤎᤧᤃᤣ᤺ᤰᤛᤡᤖᤥ. ᤜᤧᤰᤁᤩᤠᤱ ᤀᤡᤱᤗᤧᤰ ᤐᤠᤴ ᤁᤧᤜᤢ᤹ᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤢᤔᤡᤛᤡᤖᤥ॥ 16 ᤌᤣᤀᤠᤱᤓᤧᤸᤗᤧ ᤗᤠᤶᤗᤥᤒᤠᤜᤠ᤹ᤖᤧ ᤔᤏᤠᤜᤠ᤹ ᤗᤠᤶ ᤔᤧᤓᤥ᤺ᤳᤋᤢᤛᤡᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤰᤔᤠᤛᤡᤔᤠ ᤗᤠᤶᤔᤥ ᤗᤠᤶᤔᤧᤗᤥᤛᤢᤛᤡᤀᤠᤱ ᤔᤧᤘᤠ᤹ᤖᤥ॥ 17 ᤂᤧᤸᤗᤧᤆᤥᤃᤢᤸᤗᤧ ᤍᤠᤱᤒᤠᤴ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ᤏᤢ ᤔᤧᤛ᤺ᤳᤏᤧᤴᤗᤥ. ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ ᤏᤢ ᤆᤢᤱᤈᤡᤃᤧᤴ ᤕᤧᤳᤇᤠᤒᤠ ᤕᤧᤳᤇᤠᤔᤠᤜᤠ᤹ᤀᤠᤱ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤧᤈᤥᤰᤗᤥ. ᤂᤧᤒᤩᤠᤱ ᤋᤠᤵᤑᤧ᤺ᤶᤒᤠ ᤐᤠᤴ ᤏᤢ ᤀᤡᤱᤗᤧᤰᤁᤣ ᤐᤠᤴ ᤔᤧᤒᤠ᤺ᤳᤗᤥ॥ ᤀᤠᤸᤗᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤁᤧᤴ ᤔᤧᤴᤈᤡᤵᤐᤣ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤜᤠᤒᤠ ᤛᤠ᤺ᤵᤛᤢᤛᤡᤀᤠᤱ ᤐᤳᤗᤥ॥ 18 ᤏᤡᤛ᤻ᤛᤣᤛᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤔᤡ᤺ᤸᤗᤧ ᤔᤡᤔᤧᤍᤡᤰᤗᤥ. ᤜᤧᤰᤁᤩᤠᤱ ᤂᤧᤴ ᤔᤡ᤺ᤸᤗᤧ ᤛᤣᤷᤍᤠ᤺ᤰᤔᤠᤜᤠ᤹ ᤏᤢ ᤋᤡᤱᤜᤠ᤹ ᤔᤡᤍᤡᤰᤁᤠᤱ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥ ᤂᤧᤴ ᤔᤡ᤺ᤸᤗᤧ ᤋᤠᤶᤓᤢᤱᤅᤥᤒᤠ ᤐᤥ᤺ᤰᤗᤠᤜᤠ᤹ ᤔᤡᤎᤡᤰᤛᤢᤀᤠᤱ ᤂᤧ᤹ᤕᤥᤏᤢ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤴ ᤋᤠᤱᤛᤠᤱᤒᤧᤳᤌᤠ᤺ᤱ ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤔᤡ᤺ᤰᤂᤢᤴ ᤜᤠ᤺ᤱᤃᤢ ᤜᤠ᤺ᤱᤃᤢ ᤗ᤹ᤒᤣ᤺ᤰᤗᤥ॥ 19 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤔᤏᤠᤜᤠ᤹ ᤔᤡ ᤜᤠ᤺ᤶᤔᤠ ᤋᤡᤱᤃᤪᤣᤰ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤔᤧᤴᤍᤢᤰᤋᤢᤛᤡᤴᤗᤥ॥ 20 ᤂᤧᤱᤜᤠ᤹ᤖᤧ ᤆᤢᤰᤘᤠ ᤗᤧᤵᤔᤠᤱ ᤔᤧᤗᤖᤢᤖᤥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤠ᤺ᤰᤗᤥ॥ ᤂᤧᤱᤜᤠ᤹ᤖᤧ ᤑᤧᤱᤘᤠ ᤗᤧᤵᤔᤠᤱ ᤔᤧᤈᤖᤥ. ᤁᤖᤛᤠᤱ ᤂᤢᤴᤇᤡ᤹ ᤛᤡᤰᤔᤧᤀᤣ᤺ᤵᤋᤢᤴᤗᤥ॥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤁᤠ᤹ᤀᤡ ᤛᤥ᤹ᤎᤥ᤺ᤰᤜᤠ᤹ᤀᤠᤱ ᤔᤧᤈᤛᤡᤖᤥ॥ 21 ᤀᤣᤑᤪᤠᤀᤡᤶᤔᤡᤸᤗᤧ ᤁᤢᤎᤠ᤺ᤰᤜᤠ᤹ ᤏᤢ ᤔᤏᤛ᤻ᤛᤣ᤺ᤸᤗᤧ ᤁᤢᤎᤠ᤺ᤰᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥᤰᤗᤥ. ᤜᤧᤰᤁᤩᤠᤱ ᤕᤠᤱᤛᤡ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥᤱᤅᤠᤱ ᤕᤜᤢᤍᤠᤴ ᤔᤧᤓᤳᤋᤢᤖᤥ॥ ᤁᤖᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤔᤠᤴ ᤔᤧᤴᤈᤡ᤺ᤰᤁᤣ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤛᤠ᤺ᤵᤛᤢᤛᤡᤀᤠᤱᤅᤣ ᤐᤳᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.