ᤕᤛᤤᤕᤠ 8 - LIFOTNT

ᤔᤡᤰᤛᤣ᤺ᤴᤗᤧ ᤗᤠᤃᤡ ᤕᤛᤤᤕᤠ᤺ᤸᤗᤧ ᤁᤢᤛ᤻ᤛᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤗᤳᤇᤠ ᤕᤶᤒᤠ ᤛᤠᤵᤗᤠᤎᤡᤰ ᤕᤠᤱᤛᤡᤱᤅᤧ᤹ᤀᤠᤱ ᤂᤧᤵᤔᤥ ᤕᤶᤒᤕᤶᤒᤠ ᤛᤰᤁᤥ ‘ᤔᤜᤣᤖ-ᤛᤠᤗᤗ-ᤜᤠᤈ-ᤒᤈ’ ᤛᤠᤵᤋᤧ᤹॥

² ᤏᤛᤠ᤺ᤴᤛᤠᤒᤠ ᤔᤏᤠ ᤏᤧᤳᤇᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤢᤖᤡᤕᤠᤴ ᤏᤢ ᤒᤣᤖᤣᤁᤩᤠᤜᤖᤧ ᤁᤢᤛ᤻ᤛᤠ ᤈᤁᤖᤡᤕᤠᤴ ᤋᤠᤖᤧᤛᤧ᤹ᤀᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤏᤡᤒᤠ ᤋᤥ᤺ᤴᤍᤡ ᤕᤧᤵᤛᤧᤛᤧ᤹॥”

³ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤜᤡᤶᤛᤠᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤧᤴᤏᤢ ᤀᤡᤵᤛᤠᤱ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ ᤂᤧᤶᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤂᤧᤸᤗᤧ ᤁᤢᤔᤡᤱ ‘ᤔᤜᤣᤖ-ᤛᤠᤗᤗ-ᤜᤠᤈ-ᤒᤈ’ ᤕᤢᤰᤂᤧ᤹॥

⁴ ᤀᤅᤧ᤺ᤰᤘᤠ᤺ᤸᤗᤧ ‘ᤀᤠᤱᤃᤠ᤹ ᤀᤠᤶᤒᤠ’ ᤏᤢ ‘ᤀᤠᤱᤃᤠ᤹ ᤀᤠᤶᤔᤠ’ ᤐᤠ᤺ᤵᤔᤠ ᤗᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤍᤔᤛ᤻ᤁᤛᤒᤠ ᤕᤠᤱᤛᤠᤁᤢᤴᤎᤣᤴ ᤜᤠᤖᤠ ᤏᤠᤵᤐᤠ ᤜᤧᤰᤁᤩᤠᤱ ᤛᤠᤔᤖᤡᤕᤠᤗᤠᤶ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤀᤛ᤻ᤛᤢᤖᤒᤠ ᤜᤠᤱᤅᤧᤸᤗᤧ ᤑᤧᤳᤗᤠ᤺ᤴᤍᤢ ᤐᤡᤀᤠᤖᤥ॥”

ᤀᤛ᤻ᤛᤢᤖᤒᤠ ᤜᤠᤱᤅᤡᤸᤗᤧ ᤌᤱ ᤆᤥᤃᤢ

⁵ ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ.

⁶ “ᤁᤴ ᤔᤏᤠᤜᤠ᤹ᤖᤧ ᤏᤧᤏᤧᤀᤠᤱ ᤁᤧᤕᤢᤒᤠ ᤛᤡᤗᤥ ᤜ᤺ᤱᤃᤢᤀᤥᤒᤠ ᤆᤫᤠ᤺ᤳᤋᤧᤴ ᤔᤧᤏᤠ᤹ᤖᤢᤀᤠᤱ ᤖᤛᤡᤏ ᤏᤢ ᤐᤣᤁᤜ ᤜᤠᤱᤜᤠ᤹ᤏᤢ ᤔᤧᤛ᤺ᤳᤋᤧᤒᤠᤸᤗᤧ ᤆᤥᤃᤢᤸᤗᤧ.

⁷ ᤀᤠᤱᤃᤠ᤹ ᤍᤠᤱᤒᤧᤸᤗᤧ ᤀᤛ᤻ᤛᤢᤖᤒᤠ ᤐᤕᤶ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤕᤜᤢᤍᤠᤀᤥ ᤌᤱ ᤆᤥ᤺ᤰᤛᤧ ᤋᤠᤖᤢᤱᤛᤡᤱᤗᤥ॥ ᤕᤶᤒᤠ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤴ ᤁᤢᤱᤅᤡᤸᤗᤧ ᤆᤫᤠ᤺ᤳᤋᤡᤴ ᤀᤠᤳᤋᤠᤋᤠᤴᤏᤣ ᤛ᤺ᤰ ᤕᤢᤀᤠᤱ ᤁᤢᤕᤠ ᤁᤢᤍᤡᤱ ᤛᤎᤧᤰ ᤋᤡᤶᤒᤠ ᤜᤧᤰᤁᤣ ᤂᤧᤱᤜᤠ᤹ ᤋᤃᤡ ᤔᤧᤒᤥ ᤔᤧᤓᤧᤴᤗᤥ॥

⁸ ᤂᤧᤴ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳᤋᤡᤴ ᤐᤥᤀᤠᤱ ᤕᤜᤢᤍᤠ ᤌᤠᤖᤡᤰ ᤁᤢᤱᤅᤠᤱ ᤕᤢᤖᤥ॥ ᤂᤧᤴ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳᤋᤡᤴ ᤂᤧ᤹ᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤳᤗᤠᤀᤥ ᤌᤠᤖᤡᤰ ᤁᤧᤳᤗᤥ. ᤂᤧᤸᤗᤧ ᤜᤶᤓᤧ ᤔᤧᤳᤋᤢᤒᤠ ᤁᤢᤗᤠᤵᤐᤡᤸᤗᤧ ᤗᤠᤈᤣᤴ ᤁᤧᤖᤧᤰ ᤋᤧᤵᤋᤢᤖᤥ. ᤀᤡᤶᤔᤠᤏᤢᤀᤣᤗᤀᤣ᥄”

⁹ ᤔᤧᤴᤇᤠᤶ ᤛᤢᤘᤠᤱᤛᤣ. ᤋᤧᤴᤎᤱ ᤆᤥ᤺ᤰᤔᤠ ᤀᤢᤘᤠ ᤆᤥᤃᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤁᤡᤛᤠᤶᤔᤧ᤹ᤀᤠᤱ ᤕᤰᤂᤧᤶᤔᤧ᤹ᤀᤥ᥄ ᤔᤠ᤺ᤱᤄᤠ ᤔᤠ᤺ᤱᤄᤠ ᤁᤧᤏᤧᤒᤠ ᤗᤠᤈᤣ᤹ᤛᤣ. ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤠᤶᤔᤧ᤹ᤀᤥ. ᤂᤧᤒᤩᤠᤱ ᤂᤡᤏᤡ᤹ ᤕᤱᤔᤠ᤹ ᤁᤧᤖᤧᤶᤔᤧ᤹ᤀᤥ᥄ ᤌᤱ ᤌᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ. ᤂᤧᤶᤒᤩᤠᤱ ᤑᤢᤳᤗᤢᤶ ᤌᤩ᤺ᤱ ᤐᤥ᤺ᤰᤂᤠᤶᤔᤧ᤹ᤀᤥ᥄

¹⁰ ᤀᤠᤰᤂᤣᤀᤠᤱ ᤌᤱ ᤌᤰᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤠᤶᤔᤧ᤹ᤀᤥ. ᤁᤖ ᤂᤧᤴ ᤁᤢᤗᤡᤱᤍᤥ ᤔᤧᤃᤧᤳᤏᤧᤴᤗᤥ॥ ᤂᤧᤏᤡ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤐᤠ᤺ᤴᤜᤠ᤹ ᤕᤢᤰᤂᤠᤶᤔᤧ᤹ᤀᤥ. ᤁᤖ ᤂᤧᤴ ᤔᤠᤒᤣᤰ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤏᤢ ᤘᤠ᤹ᤖᤥ॥

ᤕᤜᤘᤣ ᤍᤠᤱᤒᤧᤴ ᤁᤡᤖᤧᤶᤔᤧ᤹ᤀᤥ

¹¹ ᤕᤜᤘᤣ ᤍᤠᤱᤒᤧᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧ ᤁᤴ ᤔᤏᤠᤜᤠ᤹ ᤗᤠᤱᤔᤧᤄᤣ᤺ᤰᤐᤠ ᤗᤠᤶᤔᤥ ᤗᤠᤱᤔᤧᤄᤣᤃᤧᤴᤏᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹ᤖᤥ.

¹² “ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤧᤶᤓᤴᤏᤥ ᤂᤡᤏᤡ᤹ ᤔᤧᤒᤳᤇᤧᤶᤔᤡᤴᤏᤧ᤹ᤀᤥ ᤜᤧᤰᤁᤩᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤃᤡᤖᤢ᤹. ᤂᤧᤴᤏᤢ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥

¹³ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤛᤣᤛᤣᤒᤠ ᤆᤥ᤺ᤰᤁᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤏᤡ᤹ ᤏᤡᤱᤘᤠ᤹ ᤁᤳᤋᤧᤶᤔᤧ᤹ᤀᤥ॥ ᤂᤧᤏᤡ᤹ᤃ ᤀᤠᤱᤃᤠ᤹ᤏᤢ ᤁᤡᤔᤠ ᤐᤥᤱᤗᤥ ᤂᤧᤏᤡ᤹ᤃ ᤀᤠᤱᤃᤠ᤹ᤀᤣ ᤕᤠᤵᤔᤡ ᤁᤧᤃᤡᤖᤡᤖ ᤐᤥᤱᤗᤥ॥

¹⁴ ᤀᤠᤱᤃᤠ᤹ᤃ ᤛᤧ᤺ᤵᤛᤡᤱᤍᤧᤴ ᤐᤥᤱᤅᤠᤖᤥ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤛᤣᤛᤣᤒᤠ ᤆᤥ᤺ᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤍᤥ᤺ᤰᤋᤥ᤺ᤰᤐᤠ ᤗᤢᤱ ᤜᤧᤰᤁᤣ ᤗ᤹ᤀᤠᤖᤥ॥ ᤀᤠᤱᤃᤠ᤹ ᤕᤜᤢᤍᤠ. ᤀᤡᤛᤪᤠᤀᤡᤗ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤐᤠ ᤔᤏᤠᤜᤠ᤹ ᤆᤧᤴᤏᤥ ᤁᤧᤎᤠᤒᤠ ᤁᤢᤛᤡᤱ ᤗ᤹ᤀᤠᤖᤥ॥

¹⁵ ᤕᤖᤡᤰ ᤔᤧᤍᤥ᤺ᤰᤁᤠᤱ ᤔᤧᤃᤧᤱ. ᤂᤧᤱᤜᤠ᤹ ᤔᤧᤈᤥᤴᤗᤥ ᤜᤧᤰᤁᤩᤠᤱ ᤑᤢᤳᤗᤢᤶ ᤌᤩ᤺ᤱ ᤔᤧᤒᤥᤱᤗᤥ. ᤂᤧᤱᤜᤠ᤹ ᤆᤧᤴᤏᤥ ᤔᤧᤎᤠ᤹᤺ ᤜᤧᤰᤁᤩᤠᤱ ᤔᤧᤍᤧᤶᤛᤢᤛᤡᤖᤥ॥”

ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠᤃᤧᤔᤧᤵᤐᤠᤜᤠ᤹ ᤛᤠᤶᤍᤡᤱ

¹⁶ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤀᤡᤱᤄᤱᤜᤠ᤹ ᤂᤧᤏᤡ᤹ ᤀᤠᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤧᤈᤡᤰᤂᤢᤶᤔᤠᤱ ᤁᤧᤛᤧ᤺ᤵᤋᤢᤶ ᤁᤧᤃᤳᤋᤢᤶᤗ ᤐᤥᤱᤗᤥ॥

¹⁷ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤗᤠᤶ ᤆᤡᤳᤗᤡ ᤏᤠᤖᤠ ᤁᤧᤈᤡᤱᤒᤠ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ ᤜᤠᤱᤄᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤥᤀᤣ ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤕᤢᤰᤂᤢᤱᤗᤥ॥

¹⁸ ᤀᤠᤱᤃᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤠᤱᤒᤠ ᤀᤠᤛ᤻ᤛᤠᤜᤠ᤹ ᤀᤠᤶᤓᤠ ᤁ᤹ᤕᤥᤀᤣ ᤘᤕᤡᤃᤧ॥ ᤀᤠᤏᤡᤃᤧᤃ ᤛᤡᤕᤥᤏ ᤁᤥ᤺ᤰᤔᤠᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤀᤠᤱ ᤁᤧᤕᤢᤱᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤀᤥ ᤐᤠᤱᤄᤡᤃᤧᤒᤠ ᤔᤡᤰᤛᤣ᤺ᤴᤍᤡᤃᤧ॥

¹⁹ ᤁᤖ ᤔᤏᤠᤜᤠ᤹ᤖᤧᤃ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠᤃᤧᤔᤧᤵᤐᤠ ᤏᤢ ᤁᤡᤳᤆᤠᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤛᤢᤈᤠ ᤏᤠ᤺ᤰᤋᤠᤶᤛᤡᤶᤔᤧ᤹ ᤑᤠ᤹ᤀᤠᤱ ᤂᤧᤏᤡ᤹ ᤁᤧᤶᤔᤧᤳᤋᤡ᤹॥ ᤜᤧᤰᤁᤣ᤺ᤸᤗᤧ “ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣ᤺ᤰᤔᤠᤀᤠᤱ ᤛᤣ᤺ᤴᤍᤥᤔᤠ ᤔᤧᤒᤥᤱᤏᤧᤶᤒᤡ᥅ ᤁᤢᤜᤡᤱᤘᤧᤳᤜᤠ᤹ᤖᤧ ᤗᤠᤃᤡ ᤁᤧᤛᤡᤒᤠᤜᤠ᤹ ᤌᤣᤀᤠᤱ ᤛᤣ᤺ᤴᤍᤥᤔᤠᤛᤡᤒᤣ᥅”

²⁰ ᤂᤧᤏᤡ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤠᤶᤛᤡᤶᤔᤧ᤹. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤡ᤹ ᤌᤧᤔᤠ ᤁᤧᤜᤢ᤹ᤖᤡᤀᤠᤱ ᤘᤠ᤹. ᤏᤢᤖᤡᤰᤁᤠᤱ ᤂᤧᤵᤛᤠᤶᤔᤧ᤹᥄ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠᤃᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹᥄ ᤂᤧᤱᤜᤠ᤹ᤖᤧ ᤂᤧᤏᤡ᤹ ᤌᤣ ᤁᤧᤶᤔᤧᤳᤋᤡᤛᤠᤱ. ᤂᤧᤏᤡ᤹ ᤗᤠᤃᤡ ᤏᤢᤒᤠ ᤔᤧᤒᤥᤱᤏᤧᤴᤗᤥ॥”

ᤋᤢᤰᤂᤣ ᤆᤠᤔᤠ ᤕᤧᤶ

²¹ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤔᤧᤈᤠ ᤜᤧᤰᤁᤩᤠᤱ ᤛᤠᤰᤁᤧᤸᤗᤧ ᤋᤖᤢᤛᤡᤀᤠᤱ ᤗᤠᤈᤣ᤹ᤀᤥ ᤋᤠᤰᤔᤧᤃᤴᤏᤠᤱ ᤔᤧᤘᤠ᤹॥ ᤂᤧᤱᤜᤠ᤹ ᤛᤠ᤹ᤖᤡᤰ ᤛᤠᤰᤁᤧᤸᤗᤧ ᤋᤖᤢᤛᤡ᤹ ᤂᤧᤶᤒᤩᤠᤱ ᤂᤢᤴᤇᤡ᤹ ᤔᤡᤖᤠᤱᤒᤠ ᤐᤡ᤺ᤱᤅᤠᤱ ᤔᤧᤘᤠ᤹ᤀᤡᤸᤗᤧ ᤂᤢᤴᤇᤡ᤹ ᤕᤠ᤺ᤰᤗᤧ᤹. ᤂᤧᤒᤩᤠᤱ ᤌᤠ᤺ᤱ ᤀᤥᤔᤧᤔᤀᤠᤱ ᤂᤢᤴᤇᤡ᤹ ᤜᤠᤱᤅᤡᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱ ᤔᤧᤍᤣᤛᤢᤛᤡ ᤛᤠᤱᤃᤪᤠ ᤔᤧᤔᤧᤳᤋᤢᤛᤡ᤹॥

²² ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ ᤐᤡᤛᤠᤱ ᤀᤥᤔᤧᤔᤧᤳᤋᤢ᤹. ᤁᤖ ᤂᤧ᤹ᤕᤥ ᤋᤢᤰᤂᤣ. ᤂᤠᤔᤠᤰᤔᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤏᤡᤱᤛᤠᤱ ᤐᤢᤰᤔᤠᤖᤰ ᤔᤧᤏᤡᤛᤢ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤠᤔᤠᤰᤗᤢᤶᤒᤠ᤺ᤳᤋᤥ ᤔᤧᤜᤥ ᤔᤧᤗᤠ᤺ᤳᤗᤥ॥