ᤕᤛᤤᤕᤠ 7 - LIFOTNT

ᤀᤠᤜᤠᤈ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤀᤡᤱᤄᤱ

¹ ᤀᤢᤈ᤻ᤈᤡᤕᤠᤜᤖᤧ ᤁᤢᤶᤔᤧᤴᤇᤠ᤹. ᤕᤥᤋᤠᤔᤧᤸᤗᤧ ᤁᤢᤛ᤻ᤛᤠ ᤀᤠᤜᤠᤈᤧᤴ ᤕᤜᤢᤍᤠ ᤜᤠᤱᤈᤢᤶᤔᤥᤒᤠ ᤜᤠᤱ ᤘᤕᤧᤸᤗᤧ ᤀᤖᤠᤔ ᤗᤠᤈᤣ᤹ᤀᤥᤒᤠ ᤜᤠᤱ ᤖᤛᤡᤏᤧᤴ ᤏᤢ ᤀᤡᤛᤪᤠᤀᤡᤗᤀᤥᤒᤠ ᤜᤠᤱ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤌᤱ ᤆᤥ᤺ᤰᤛᤧ ᤑᤧᤖᤧᤛᤡ. ᤁᤖ ᤂᤧᤱᤜᤠ᤹ᤖᤧ ᤌᤱ ᤏᤠ᤺ᤶᤔᤠ ᤔᤧᤛᤢᤰᤋᤧᤇᤢᤴ॥

² ᤜᤧᤰᤁᤩᤠᤱ. “ᤀᤡᤛᤪᤠᤀᤡᤗᤖᤧ ᤀᤖᤠᤔᤧᤴᤏᤢ ᤏᤠᤍᤱ ᤆᤥᤃᤢ” ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤍᤠᤀᤢᤍᤧᤸᤗᤧ ᤁᤢᤜᤡᤶᤛᤕᤱᤅᤥ ᤁᤧᤖᤧ॥ ᤜᤧᤰᤁᤩᤠᤱ ᤛᤢᤖᤡ᤺ᤳᤋᤡᤸᤗᤧ ᤐᤥ᤺ᤰᤗᤠᤀᤥᤒᤠ ᤛᤡᤱᤒᤢᤱᤜᤠ᤹ ᤘᤠ᤺ᤴᤍᤢᤒᤠ ᤁᤢᤀᤡᤛᤡᤰ ᤀᤠᤜᤠᤈ ᤜᤠᤱᤅᤡᤴ ᤏᤢ ᤁᤢᤔᤏᤠᤜᤠ᤹ ᤂᤢᤴᤇᤡ᤹ ᤁᤡᤔᤧᤸᤗᤧ ᤌᤧᤃᤰᤁᤰᤏᤠ ᤔᤧᤕᤰᤂᤧ॥

³ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤛᤤᤕᤠᤴ ᤔᤧᤳᤋᤢ. “ᤀᤠᤸᤗ ᤀᤠᤒᤠᤅᤣ ᤁᤧᤛ᤻ᤛᤠ ᤛᤠᤷᤕᤠᤛᤢᤒᤧᤴ ᤋᤣ᤹ᤖᤧᤀᤠᤱ ᤌᤥᤛᤔᤠ ᤘᤖᤰᤁᤥᤒᤠ ᤘᤠᤗᤠᤶᤔᤥ ᤐᤣᤃᤧ᤹. ᤀᤡᤃᤪ ᤆᤠᤱ ᤘᤠᤃᤧᤜᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤐᤩᤠᤱᤛᤡᤀᤥᤒᤠ ᤔᤠᤖᤠᤶᤔᤥ ᤐᤣᤃᤧ᤹ᤀᤠᤱ ᤀᤠᤜᤠᤈᤧᤴ ᤋᤢᤔᤧ᤹॥

⁴ ᤜᤧᤰᤁᤩᤠᤱ ᤁᤧᤏᤡᤱᤘᤠ᤹ ᤛᤢᤖᤥ᤺ᤴ ᤔᤧᤗ᤹ᤖᤧᤴᤏᤧ᤹ ᤔᤧᤳᤋᤧ᤹॥ ᤛᤡᤖᤡᤕᤠᤒᤠ ᤜᤠᤱ ᤖᤣᤛᤡᤏ ᤏᤢ ᤖᤔᤗᤩᤠᤜᤖᤧ ᤁᤢᤛ᤻ᤛᤠ ᤐᤣᤁᤜ᤺ᤸᤗᤧ ᤂᤢᤴᤇᤡ᤹ ᤔᤡ ᤜᤧᤰᤋᤱᤒᤠ ᤛᤡᤰᤐᤥ᤺ᤰᤔᤠᤗᤠᤶ ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ ᤑᤠ᤹ᤀᤠᤱ ᤂᤧᤴ ᤔᤧᤳᤋᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡ ᤜᤧᤰᤋᤱᤒᤠ ᤛᤡᤰᤁᤧᤴ ᤔᤡ᤺ᤰᤂᤥ᤹ ᤛᤢ᤺ᤱᤃᤢ ᤛᤢ᤺ᤱᤃᤢ ᤁᤧᤗ᤹ᤒᤠ ᤔᤡᤎᤰᤐᤢ ᤏᤧᤳᤇᤡ ᤕᤠᤖᤡᤰᤁᤠᤱ ᤁᤧᤀᤠ᤺ᤵᤐᤠ ᤔᤧᤈᤥᤰᤏᤧᤴ॥

⁵ ᤀᤖᤠᤔᤒᤠ ᤜᤠᤱᤅᤧᤴ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤅᤧᤴ ᤌᤡᤰᤜᤢᤵ ᤐᤥ᤺ᤰᤂᤧᤛᤡᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤀᤰᤋᤱᤒᤠ ᤆᤧᤶᤓᤴ ᤆᤥᤃᤧᤛᤢᤀᤠᤱ ᤘᤠ᤹ᤛᤡ.

⁶ ‘ᤀᤠᤏᤡ᤹ ᤕᤜᤢᤍᤠ ᤜᤠᤱᤈᤢᤶᤔᤡᤴᤏᤢ ᤌᤱ ᤆᤥᤃᤡ॥ ᤂᤧᤴ ᤗᤠᤈᤣᤴ ᤁᤢᤗᤰ ᤁᤢᤗᤰ ᤆᤥᤃᤢᤶᤔᤠᤱ ᤑ᤺ᤰᤂᤢᤶ. ᤂᤧᤒᤩᤠᤱ ᤋᤠᤒᤣᤗᤖᤧ ᤁᤢᤛ᤻ᤛᤠᤴ ᤂᤧ᤹ᤕᤥ ᤜᤠᤱ ᤕᤢᤰᤋᤡᤱ ᤆᤥᤃᤢᤶ॥’

⁷ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤱᤗᤥ— “ᤁᤴ ᤀᤠᤓᤧᤸᤗᤧᤀᤠᤱ ᤔᤧᤒᤥᤱᤏᤧᤴᤗᤥ. ᤁᤴ ᤐᤥᤱᤔᤠᤀᤣ ᤔᤧᤛᤢᤰᤏᤧᤴᤗᤥ॥

⁸ ᤌᤣᤀᤠᤱᤓᤧᤸᤗᤧ ᤀᤖᤠᤔ ᤗᤠᤈᤣ᤹ᤀᤡᤴ ᤁᤸᤗᤧ ᤁᤢᤜᤠᤱᤐᤠᤱ ᤍᤔᤛ᤻ᤁᤛᤧᤴᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤧᤈᤥᤰᤏᤧᤸᤗᤥ॥ ᤜᤧᤰᤁᤩᤠᤱ ᤍᤔᤛ᤻ᤁᤛᤧᤴ ᤖᤛᤡᤏ ᤜᤠᤱᤅᤡᤴᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤧᤈᤥᤰᤏᤧᤴᤗᤥ ᤀᤡᤛᤪᤠᤀᤡᤗᤧᤴ ᤋᤢᤰᤐᤥᤱᤅᤠᤱ ᤅᤠᤛᤡ ᤋᤱᤒᤣᤖᤧᤛᤠ ᤁᤢᤔᤡᤱᤅᤣ ᤔᤠᤖ ᤕᤠᤖᤡᤰ ᤆᤢᤈᤢᤰᤛᤠ ᤗᤠᤈᤣ᤹ᤀᤥ ᤐ᤺ᤱᤒᤣ᤺ᤰᤗᤥ॥

⁹ ᤀᤡᤛᤪᤠᤀᤡᤗ ᤗᤠᤈᤣᤴ ᤁᤸᤗᤧ ᤁᤢᤜᤠᤱᤐᤠᤱ ᤛᤠᤔᤖᤡᤕᤠ᤺ᤴᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤧᤈᤥᤰᤏᤧᤴᤗᤥ. ᤜᤧᤰᤁᤩᤠᤱ ᤛᤠᤔᤖᤡᤕᤠ ᤜᤠᤱᤐᤠᤱᤅᤡᤴ ᤁᤸᤗᤧ ᤁᤢᤜᤠᤱ ᤖᤔᤗᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤐᤣᤁᤜ᤺ᤴᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤧᤈᤥᤰᤏᤧᤴᤗᤥ॥ ᤂᤧᤏᤧ᤹ ᤁᤧᤏᤛᤠ᤺ᤴᤏᤧᤴ ᤁᤧᤎᤢᤶᤒᤠ ᤔᤧᤈᤥᤰᤏᤧᤴᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ॥”

ᤀᤡᤶᤔᤠᤏᤢᤀᤣᤗᤖᤧ ᤁᤢᤔᤡᤰᤛᤣ᤺ᤴ

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤜᤠᤈᤧᤴ ᤕᤠᤶᤔᤥ ᤔᤧᤳᤋᤢ.

¹¹ “ᤂᤧᤔᤠᤕᤱᤛᤱ ᤕᤥ ᤗᤠᤶ ᤀᤡᤃᤪ ᤋᤠᤱᤛᤠᤱᤒᤥ ᤌᤥ ᤗᤠᤶᤛᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠ᤺ᤰᤁᤡᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤳᤇᤠ ᤔᤡᤰᤛᤣᤴ ᤌᤡᤰ ᤏᤠ᤺ᤰᤋᤧ᤹॥”

¹² ᤁᤖ ᤀᤠᤜᤠᤈᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤜᤧᤰᤁᤣᤗ᤹ᤖᤡᤰ ᤔᤡᤰᤛᤣᤴ ᤔᤧᤏᤠ᤺ᤰᤅᤠᤴ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤴ ᤁᤢᤏᤡᤱᤘᤠ᤹ ᤔᤧᤛᤠ᤹ᤀᤠᤴ॥”

¹³ ᤜᤧᤰᤁᤣ᤺ᤸᤗᤧ ᤕᤛᤤᤕᤠ᤺ᤸᤗᤧ ᤔᤧᤳᤋᤢᤛᤡ. “ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤛᤣ. ᤀᤠᤸᤗ ᤂᤧᤵᤛᤧᤶᤔᤧ᤹᥄ ᤌᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤛᤡᤌ᤺ᤵᤔᤧᤴ ᤁᤧᤛᤠ᤹ᤖᤢᤶᤛᤠᤱ ᤂᤧᤏᤡ᤹ ᤏᤡᤱᤘᤠ᤹ ᤔᤧᤍᤩᤧᤏᤧᤶᤒᤡ᥅ ᤌᤣ ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤛᤡᤌ᤺ᤵᤔᤧᤴᤏᤠᤱ ᤁᤧᤛᤠ᤹ᤖᤢᤶᤒᤡ᥅

¹⁴ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤂᤧᤏᤡ᤹ ᤗᤳᤇᤠ ᤔᤡᤰᤛᤣᤴ ᤌᤡᤰ ᤁᤧᤒᤡᤖᤡ᤹॥ ᤀᤥᤔᤧᤳᤋᤧᤶᤔᤧ᤹. ᤔᤧᤴᤇ᤻ᤕᤠᤎᤡᤰ ᤔᤧᤴᤇᤢᤰᤔᤠ ᤐᤥᤱ ᤜᤧᤰᤁᤩᤠᤱ ᤂᤧᤸᤗᤧ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ᤹ ᤜᤧᤰᤁᤩᤠᤱ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤡᤱ ᤀᤡᤶᤔᤠᤏᤢᤀᤣᤗ ᤐᤥᤱ॥

¹⁵ ᤏᤢᤒᤠ ᤐᤠ᤺ᤴᤏᤡᤴ ᤛᤣ᤺ᤰᤔᤠ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤏᤠ᤹ᤔᤠ ᤁᤢᤛᤡᤱ ᤏᤡ᤺ᤵᤔᤠ ᤜᤣ᤺ᤰᤋᤢᤀᤠᤱ ᤁᤴ ᤜᤡᤴᤈᤠ᤹ ᤆᤢᤰᤐᤧᤸᤗᤧ ᤏᤢᤍᤠᤰᤘᤠᤴ ᤏᤢ ᤛᤰᤘᤠᤄᤢᤴ ᤆᤖᤥ॥

¹⁶ ᤁᤖ ᤂᤢᤏᤧ᤹ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤑᤠ᤹ᤀᤠᤱ ᤁᤢᤛᤡᤱᤏᤡ᤺ᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤡ᤹ ᤂᤧᤴ ᤋᤸᤗᤡᤰ ᤁᤧᤃᤡᤖᤢᤶᤛᤡᤶᤒᤠ ᤀᤡᤛᤪᤠᤀᤡᤗᤒᤠ ᤏᤢ ᤀᤖᤠᤔᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤔᤢᤖᤧᤰ ᤂᤠᤖᤧᤰ ᤏᤢ ᤆᤡᤈᤡ ᤂᤰᤂᤰ ᤔᤧᤈᤥᤃᤢ॥

¹⁷ “ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤏᤢ ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤶᤒᤠ ᤋᤢᤰᤂᤣ ᤗᤠᤰᤂᤣ ᤋᤠᤖᤢ᤹॥ ᤜᤧᤰᤁᤩᤠᤱ ᤛᤥᤗᤥᤔᤏᤖᤧ ᤁᤢᤜᤠᤱᤈᤢᤶᤔᤡᤴ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤏᤧᤳᤇᤡ ᤜᤠᤱᤈᤢᤶᤔᤥ ᤐ᤺ᤰᤂᤧᤒᤠ ᤋᤱᤒᤣᤀᤠᤱ ᤁᤳᤌᤥ ᤐᤥ᤺ᤰᤂᤧᤒᤠ ᤜᤡᤴᤎᤥ᤺ᤰᤜᤠ᤹ᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤁᤡᤔᤧᤴ ᤜᤠᤖᤠᤀᤣ ᤁᤧᤏᤡᤛᤢ ᤁᤧᤍᤢᤔᤢ᤹॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤛ᤻ᤛᤢᤖᤒᤠ ᤁᤧᤀᤠ᤺ᤵᤐᤠ ᤜᤠᤱᤅᤡᤸᤗᤧ ᤕᤖᤡᤰ ᤁᤢᤎᤰᤛᤢᤒᤠᤜᤠ᤹ ᤋᤠᤖᤢᤛᤡ᤹॥”

¹⁸ “ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤥᤛᤔᤠ ᤔᤡᤛᤪ ᤗᤠᤈᤣ᤹ᤀᤥᤒᤠ ᤌᤰᤛᤢᤒᤠᤜᤠ᤹ ᤏᤢ ᤀᤛ᤻ᤛᤢᤖ ᤗᤠᤈᤣ᤹ᤀᤥᤒᤠ ᤌᤰᤛᤢᤒᤠᤜᤠ᤹ ᤔᤧᤍᤠᤖ ᤑᤠ᤹ᤀᤠᤱ ᤂᤩᤥ᤺ᤰᤘᤠᤗᤠᤶᤒᤠ ᤀᤢ᤺ᤳᤋᤢᤛᤡ᤹॥ ᤂᤧᤱᤜᤠ᤹ᤖᤧ ᤛᤡᤈᤠᤜᤠ᤹ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤃᤒᤪᤡᤱ ᤁᤧᤶᤒᤴᤏᤠᤱ ᤛᤰᤘᤠᤜᤠ᤹ ᤁᤢᤀᤡᤛᤡᤰ ᤁᤧᤶᤛᤡᤰᤁᤠᤱ ᤁᤧᤶᤛᤧᤳ॥

¹⁹ ᤂᤧᤱᤜᤠ᤹ ᤔᤧᤍᤠᤀᤠᤱ ᤁᤧᤖᤧᤰ ᤆᤡᤜᤢ᤹ᤜᤢ᤹ᤒᤠ ᤕᤠᤰᤁᤣ᤺ᤰᤜᤠ᤹. ᤕᤠᤰᤐᤣ᤹ ᤑᤡ᤺ᤵᤔᤠᤜᤠ᤹. ᤁᤧᤖᤧᤰ ᤋᤡᤱᤃᤪᤣᤰ ᤗᤠᤜᤠ᤹ᤀᤥ ᤏᤢ ᤁᤧᤖᤧᤰ ᤆᤫᤠ᤺ᤳ ᤘᤠᤗᤠᤶᤜᤠ᤹ᤀᤥ ᤔᤧᤕᤢᤱᤛᤡᤱ᤹॥

²⁰ “ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤏᤠᤎᤠ᤺ᤶᤒᤡᤗᤠᤶ ᤀᤛ᤻ᤛᤢᤖᤒᤠ ᤜᤠᤱᤅᤡᤴ ᤑᤧᤳᤋᤢ᤹. ᤂᤧᤴ ᤌᤧᤃᤣᤰ ᤏ᤺ᤱᤔᤧᤴ ᤜᤧᤰᤋᤱᤒᤠ ᤆᤥᤰ॥ ᤂᤧᤸᤗᤧ ᤂᤡᤏᤡ᤹ ᤌᤧᤃᤣᤰ ᤔᤢᤖᤡᤰᤁᤡᤴ. ᤂᤡᤏᤡ᤹ ᤗᤠᤱ ᤔᤢᤖᤡᤰᤁᤡᤴ ᤜᤧᤰᤁᤩᤠᤱ ᤔᤢᤎᤥ᤹ᤀᤡᤴ ᤏ᤺ᤰᤂᤢᤀᤠᤱ ᤏᤠᤎᤠᤛᤢ ᤁᤧᤒᤡᤖᤡ᤹॥

²¹ “ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤔᤏᤠᤎᤡᤰᤗᤧ ᤁᤖ᤺ᤱ ᤐᤡᤳ ᤌᤡᤰ ᤏᤢ ᤔᤧ᤺ᤴᤍᤠ ᤏᤧᤳᤇᤡᤖᤰ ᤜᤡᤱᤄᤢᤛᤡ᤹

²² ᤜᤧᤰᤁᤩᤠᤱ ᤂᤧᤴ ᤐᤡᤳ ᤏᤢ ᤔᤧ᤺ᤴᤍᤠᤗᤠᤶ ᤕᤖᤡᤰ ᤐᤡᤳᤏᤢ ᤕᤢᤒᤠᤸᤗᤧ ᤆᤥᤃᤢᤸᤗᤧ ᤆᤠᤔᤠᤖᤧ ᤗᤠᤃᤡ ᤏᤢᤍᤠᤰᤘᤠᤀᤠᤱ ᤘᤠ᤹॥ ᤂᤧᤒᤩᤠᤱ ᤗᤠᤈᤣ᤹ᤀᤥ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰᤗᤧ ᤏᤢᤍᤠᤰᤘᤠ ᤏᤢ ᤛᤰᤘᤠᤄᤢ ᤔᤧᤈᤖᤥ॥

²³ “ᤂᤧᤴ ᤕᤧᤶᤔᤥ ᤜᤧᤴᤇᤡᤱ ᤌᤡᤰ ᤁᤢᤀᤠ᤺ᤳ ᤕᤢᤵᤐᤠ ᤁᤧᤕᤠ᤺ᤵᤐᤠ ᤜᤧᤴᤇᤡᤱ ᤌᤡᤰ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱ ᤁᤧᤕᤢᤱᤒᤠ ᤏᤢᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤛᤣᤷᤍᤠ᤺ᤰᤔᤠ ᤏᤢ ᤁᤢᤍᤡᤱ ᤁᤧᤕᤢᤱᤒᤠ ᤑᤢᤱᤜᤠ᤹ ᤗᤡᤱᤛᤧᤀᤠᤱ ᤛᤎᤧᤰ ᤋᤡᤶᤛᤧ॥

²⁴ ᤛᤣᤷᤍᤠ᤺ᤰᤔᤠ ᤏᤢ ᤁᤢᤍᤡᤱ ᤕᤢᤱᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤂᤧ᤹ᤕᤥ ᤋᤥᤱ ᤗᤡ ᤔᤧᤕᤠᤱᤛᤡᤱᤅᤠᤱ ᤛᤠ ᤀᤠᤵᤛᤧ ᤔᤧᤒᤣ᤺ᤰ॥ ᤜᤧᤰᤁᤩᤠᤱ ᤗᤠᤈᤣᤴ ᤁᤧᤖᤧᤰ ᤋᤡᤱᤃᤪᤣᤰ ᤏᤢ ᤁᤢᤍᤡᤱ ᤁᤧᤕᤢᤱᤒᤠ ᤑᤢᤱᤗᤧ ᤋᤡᤶ॥

²⁵ ᤁᤠ᤺ᤱᤅᤧᤸᤗᤧ ᤀ᤺ᤰᤔᤏᤠᤒᤠ ᤁᤧᤖᤧᤰ ᤁᤥ᤺ᤰᤔᤠ ᤌᤧᤃᤢᤜᤠ᤹ᤀᤥ ᤛᤣᤷᤍᤠ᤺ᤰᤔᤠ ᤏᤢ ᤋᤡᤱᤅᤧᤴ ᤁᤧᤃᤡᤖᤢᤶᤒᤠᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤂᤧᤏᤡ᤹ ᤂᤧ᤹ᤕᤥ ᤁᤧᤶᤒᤣᤃᤡᤴ. ᤁᤖ ᤂᤧᤴ ᤋᤧᤴᤜᤠ᤹ ᤐᤡᤳ ᤛᤠ᤺ᤱᤘᤠ ᤆᤠᤖᤠᤶᤔᤠᤍᤧᤴ ᤏᤢ ᤔᤧᤸᤗᤢᤰ ᤁᤧᤗᤥ᤺ᤰᤐᤠᤀᤠᤱ ᤁᤧᤘᤠ᤹ᤒᤠᤍᤧᤴ ᤐᤥᤱᤗᤥ॥”