ᤕᤛᤤᤕᤠ 66 - LIFOTNTᤂᤠᤛᤧᤴ ᤏᤢ ᤏᤡᤱᤛᤠᤱ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤀᤠᤱᤃᤠ᤹ ᤀᤠᤜᤠᤱᤕᤢᤰᤏᤠᤖᤥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤀᤠᤱᤃᤠ᤹ ᤀᤠᤗᤠᤱ ᤋᤥ᤹ᤓᤣ᤺ᤳᤗᤥ. ᤀᤠᤸᤗ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤏᤡ᤹ ᤀᤠᤰᤋᤱᤒᤠ ᤜᤡᤶ ᤏᤢ ᤀᤠᤱᤃᤠ᤹ ᤕᤢᤱᤔᤠᤖᤧ ᤗᤠᤃᤡ ᤀᤠᤰᤋᤱᤒᤠ ᤐᤖᤡᤰᤐᤠᤍᤧᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤒᤣ᥅ 2 ᤌᤣ ᤁᤴᤜᤠ᤹ ᤁᤧᤖᤧᤰ ᤀᤠᤱᤃᤠ᤹ᤀᤣ ᤀᤠᤜᤢᤰᤁᤡᤸᤗᤧ ᤆᤥᤃᤢᤱᤒᤠ ᤜᤧᤰᤁᤩᤠᤱ ᤁᤴᤜᤠ᤹ ᤁᤶᤓᤗ᤹ᤖᤡᤰ ᤐᤥ᤺ᤰᤂᤧᤒᤠ ᤔᤣ᤺ᤶᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ “ᤜᤠᤳ ᤁᤢᤏᤡᤱᤘᤠ᤹ᤀᤥ ᤏ᤺ᤶᤏ᤺ᤶᤒᤠ ᤏᤢ ᤆᤢᤱᤈᤡᤃᤧᤴ ᤆᤥᤰ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤀᤠᤱᤃᤠ᤹ ᤂᤧᤴ ᤀᤡᤱᤎᤠᤱ ᤐᤡᤖᤢᤱᤗᤥ॥ 3 ᤁᤖ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤶᤔᤡᤴ ᤔᤧᤛᤣᤃᤢᤀᤠᤱ ᤔᤧᤘᤠ᤹ᤖᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤀᤠᤒᤠᤅᤣ ᤂᤢᤴᤇᤡ᤹ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰᤜᤠ᤹ᤀᤥ ᤛ᤺ᤳᤗᤥ॥ ᤁᤢᤶᤒᤠᤒᤠ ᤐᤡᤳ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤧᤱᤃ ᤔᤏᤠ ᤁᤧᤛᤧᤵᤐᤠ ᤜᤧᤰᤋᤱᤒᤠᤖᤥ॥ ᤌᤢ᤺ᤶᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤧᤱᤃ ᤁᤥ᤺ᤳᤆᤥ᤺ᤸᤗᤧ ᤁᤢᤏᤡ᤺ᤱᤔᤠ ᤁᤧᤀᤧᤱᤒᤠ ᤁᤢᤀᤡᤛᤡ᤺ᤰᤗᤥ॥ ᤜᤠ᤺ᤳᤗᤧ ᤁᤢᤈᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢ᤹. ᤂᤧᤱᤃ ᤑᤠᤰᤁᤡᤸᤗᤧ ᤁᤢᤔᤠᤰᤂᤡ᤹ ᤁᤧᤍᤥᤶᤒᤠ ᤁᤢᤀᤡᤛᤡ᤺ᤰᤗᤥ॥ ᤀᤠᤳᤋᤡᤸᤗᤧ ᤛᤠᤱᤛᤡᤱ ᤛᤢᤰᤐᤠ ᤜᤠ᤺ᤴᤍᤢ. ᤂᤧᤱᤃ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠ ᤜᤧᤰᤋᤱᤒᤠᤖᤥ॥ 4 ᤁᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤧᤴᤏᤢ ᤂᤧᤱᤜᤠ᤹ ᤔᤧᤃᤡ. ᤜᤠᤒᤠ ᤂᤧᤴ ᤋᤢᤰᤂᤣ ᤗᤠᤰᤂᤣᤜᤠ᤹ᤀᤣ ᤂᤧᤱᤜᤠ᤹ᤖᤧ ᤔᤧᤍᤢᤔᤢᤖ ᤕᤠ᤺ᤴᤍᤢᤱᤛᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤠ᤺ᤴᤇᤠ᤺ᤳᤋᤢᤱᤛᤡᤱᤅᤡᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤢᤃᤵ ᤔᤧᤶᤒᤡᤖᤠᤱᤅᤧᤴᤗᤥ॥ ᤀᤠᤱᤃᤠ᤹ ᤐᤠᤖᤠᤱᤅᤡᤸᤗᤧ ᤜᤠ᤺ᤳᤗᤧᤀᤠᤱ ᤂᤧᤶᤄᤧᤶ ᤔᤧᤸᤗᤠᤵᤋᤢᤴᤗᤥ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤏᤡᤛᤢᤱ. ᤂᤧᤱᤜᤠ᤹ᤖᤧ ᤜᤠᤒᤠ ᤂᤧᤴᤏᤣ ᤔᤧᤈᤥᤃᤢᤖᤥ. ᤂᤧᤒᤩᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤛᤡᤖᤠ᤹ ᤔᤧᤎᤠᤱᤏᤧᤴ. ᤀᤠᤶᤓᤠ ᤂᤧᤴ ᤂᤧᤱᤜᤠ᤹ᤖᤧ ᤔᤧᤛᤣᤃᤢᤖᤥ॥” 5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤏᤥ ᤁᤧᤃᤡᤒᤠ ᤁᤧᤕᤱᤒᤠᤛᤣ. ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤵᤛᤠᤶᤔᤧ᤹ᤀᤥ. “ᤀᤠᤔᤡᤱᤅᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡᤀᤠᤱ ᤁᤧᤶᤛᤧᤴᤍᤡᤖᤥ॥ ᤂᤧᤒᤩᤠᤱ ᤁᤡᤏᤠ᤺ᤴᤍᤡ ᤔᤧᤒᤠ᤺ᤳᤗ ᤂᤡᤏᤡ᤹ ᤀᤰᤂᤣ ᤁᤧᤶᤔᤧᤳᤋᤡᤖᤥ. ‘ᤕᤜᤘᤣ ᤍᤠᤱᤒᤧᤴ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤆᤥ᤺ᤰᤐᤧᤴ ᤂᤢᤏᤧ᤹ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤛᤧ᤺ᤵᤋᤡᤖᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤛ᤺ᤳᤋᤡᤒᤧᤴ ᤀᤠᤏᤡᤃᤣ ᤀᤥᤔᤧᤵᤔᤠ ᤂᤥᤛᤢᤶᤒᤧᤖᤖᤥ’ ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠ᤺ᤳᤌᤡ ᤐᤣ᤺ᤰᤗᤥ॥ 6 ᤂᤧᤵᤛᤠᤶᤔᤧ᤹᥄ ᤕᤧᤰᤕᤰᤁᤥᤗᤠᤶ ᤁᤧᤍᤠᤒᤠ ᤜᤕᤱ ᤁᤡᤸᤗᤡᤱᤅᤡᤴ. ᤔᤠᤱᤜᤡᤶᤔᤥ ᤂᤧᤶᤍᤧᤳᤗ ᤐᤳᤗᤥ. ᤂᤧᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤏᤡᤱᤔᤡᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤸᤗᤧ ᤁᤧᤗ᤺ᤶᤒᤠ ᤁᤢᤀᤡᤰᤗᤠᤖᤥ᥄ 7 “ᤀᤠᤱᤃᤠ᤹ ᤀᤠᤛᤣᤛᤣ ᤕᤧᤰᤕᤰᤁᤡᤱᤃ ᤁᤶᤓᤍᤠᤱᤔᤠ ᤗᤳᤇᤠ ᤔᤧᤴᤇᤢᤔᤠ ᤜᤧᤰᤋᤱᤔᤠ ᤆᤥᤰᤗᤥ. ᤂᤧᤸᤗᤧ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤔᤧᤴᤕᤠᤱᤅᤣ ᤀᤅᤧ᤺ᤰᤘᤠ ᤁᤳᤋᤢᤖᤥ॥ 8 ᤀᤰᤋᤱᤒᤠ ᤐᤠᤴ ᤜᤠ᤺ᤳᤗᤧ ᤂᤧᤵᤛᤢᤀᤠᤱ ᤘᤠ᤹ᤒᤣ᥅ ᤁᤶᤍᤠᤱᤒᤠ ᤐᤠᤴ ᤀᤠᤳᤋᤡᤸᤗᤧ ᤏᤡᤛᤢᤀᤠᤱ ᤘᤠ᤹ᤒᤣ᥅ ᤌᤣ ᤌᤡᤰᤕᤠ᤺ᤴᤗᤧ ᤗᤳᤇᤠ ᤗᤠᤈᤣ᤹ ᤐᤥᤱᤔᤠ ᤛᤢᤰᤐᤡ᥅ ᤀᤡᤃᤪ ᤛᤵᤑᤠᤎᤡᤰᤗᤧ ᤗᤳᤇᤠ ᤔᤧᤴᤇᤠᤶ ᤛᤢᤘᤠᤱ ᤗ᤺ᤵᤔᤠ ᤛᤢᤰᤔᤧᤍᤧᤵᤐᤡ᥅ ᤜᤧᤰᤁᤣᤛᤠᤱ ᤛᤡᤕᤥᤏᤧᤸᤗᤧᤃ ᤛᤠᤍᤢᤱᤅᤡᤸᤗᤧ ᤕᤠᤱᤄᤢᤏᤢᤔᤧ᤺ᤴᤏᤣ ᤀᤅᤧ᤺ᤰᤘᤠᤜᤠ᤹ ᤁᤳᤋᤢᤛᤡᤖᤥ॥ 9 ᤀᤠᤔᤏᤠᤜᤠ᤹ ᤛᤠᤘᤠ᤺ᤴᤇᤡᤱᤔᤠ ᤕᤧᤶ ᤌᤠᤖᤡᤰ ᤁᤧᤍᤠᤖᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤔᤠ ᤔᤧᤓᤠ᤺ᤰᤁᤠᤛᤡᤱᤅᤡᤴ ᤑᤠ᤹ᤀᤠᤱ ᤔᤧᤀᤡ᤺ᤳᤋᤠᤶᤔᤡᤴᤏᤧ᤹ᤀᤥ” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 10 “ᤕᤖᤢᤛᤗᤧ᤺ᤶᤔᤡᤴᤏᤢ ᤛ᤺ᤳᤋᤠᤶᤔᤧ᤹ᤀᤥ. ᤂᤧᤴ ᤕᤧᤰᤕᤰᤁᤡᤴ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤖᤧᤰᤗᤧ ᤀᤠᤸᤗᤥᤀᤣ ᤂᤧᤴᤏᤢ ᤏᤡᤱᤘᤠ᤹ ᤕᤧᤕᤧ ᤔᤧᤳᤋᤠᤶᤔᤧ᤹ᤀᤥ᥄ ᤂᤧᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤁᤧᤎᤰᤐᤠ ᤁᤧᤖᤧᤰ. ᤂᤧᤸᤗᤧ ᤁᤢᤗᤠᤃᤡ ᤏᤡᤱᤘᤠ᤹ ᤋᤠᤛᤠᤶᤔᤧ᤹ᤀᤥ᥄ 11 ᤗᤳᤇᤠ ᤀᤅᤧ᤺ᤰᤘᤠᤴ ᤁᤢᤶᤔᤠᤖᤧ ᤁᤢᤏᤢ᤺ᤴ ᤌᤢᤅᤢᤸᤗᤧ ᤛ᤺ᤵᤐᤠ ᤁᤢᤀᤡᤛᤡᤰ ᤂᤧᤴ ᤏᤢ᤹ᤍᤠ᤺ᤸᤗᤧ ᤂᤡᤏᤡ᤹ ᤁᤧᤛ᤺ᤳᤋᤡᤖᤥ॥” 12 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤂᤡᤏᤡ᤹ ᤀᤠᤓᤧᤸᤗᤧᤀᤠᤱ ᤔᤧᤴᤜᤣᤔᤏᤠᤒᤠ ᤘᤜ᤺ᤱ ᤁᤢᤀᤡᤛᤡᤰ ᤏᤢ᤹ᤔᤠᤍᤠᤔᤠ ᤐᤡᤏᤡᤱᤗᤥ॥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤃᤢᤱᤒᤠ ᤁᤧᤕᤢᤒᤠ ᤘᤜ᤺ᤱ ᤁᤢᤀᤡᤛᤡᤰ ᤂᤧᤏᤡ᤹ᤀᤥ ᤛᤰ ᤋᤠᤖᤥ॥ ᤂᤡᤏᤡ᤹ᤃ ᤁᤢᤶᤔᤠᤖᤧ ᤁᤢᤛ᤻ᤛᤠᤴ ᤗᤢᤱᤔᤠ᤹ ᤋᤢᤰᤋᤢᤒᤠ ᤜᤧᤰᤁᤩᤠᤱ ᤁᤢᤓᤰᤋᤠᤱᤅᤥ ᤕᤢᤰᤂᤢᤀᤠᤱ ᤕᤶᤒᤠ ᤆᤥᤃᤢᤒᤠ ᤀᤅᤧ᤺ᤰᤘᤠ ᤜᤧᤰᤋᤱᤒᤠ ᤁᤧᤒᤥᤰᤂᤡᤖᤥ॥ 13 ᤁᤢᤶᤔᤠᤖᤧ ᤀᤅᤧ᤺ᤰᤘᤠᤴ ᤜᤠᤱᤜᤠᤱ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤂᤡᤏᤡ᤹ ᤜᤠᤱᤜᤠᤱ ᤔᤧᤳᤏᤡᤱᤗᤥ॥ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤜᤠᤱᤜᤠᤱ ᤁᤧᤗ᤹ᤖᤡᤖᤥ॥” 14 ᤀᤰᤂᤣ ᤐᤥᤱᤒᤠ ᤂᤧᤏᤡ᤹ ᤁᤧᤏᤡᤛᤢᤶᤔᤠᤱ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤁᤧᤛ᤺ᤳᤋᤡᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤕᤠᤴ ᤜᤧᤰᤁᤣ ᤆᤡᤏ᤹ᤏ᤹ᤏᤠ ᤁᤧᤒᤥᤖᤡᤖᤥ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠᤴ ᤁᤧᤄᤧᤶᤒᤠᤜᤠ᤹ ᤑᤠ᤹ᤖᤢᤛᤡᤖᤥ ᤁᤖ ᤁᤢᤏᤡᤱᤔᤡᤜᤠ᤹ ᤛᤡᤰ ᤀᤥᤛᤣ᤺ᤴᤎᤠᤰᤋᤢᤛᤡ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ 15 ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤴ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤏᤢ ᤕᤢᤖ ᤐᤳᤗᤥ. ᤜᤧᤰᤁᤩᤠᤱ ᤁᤢᤀᤴᤗᤠᤎᤠᤜᤠ᤹ᤃ ᤛᤢᤖᤡᤳ ᤁᤣᤈᤱ ᤀᤡᤰᤛᤡᤱᤒᤠ ᤜᤧᤰᤁᤣ ᤗ᤹ᤖᤥ॥ ᤂᤢᤏᤧ᤹ ᤁᤢᤛᤡᤰ ᤐᤥ᤺ᤰᤔᤧᤴ ᤁᤢᤛ᤻ᤛᤠᤰᤁᤧᤴᤏᤡᤴ ᤀᤡᤛᤣ᤺ᤱ ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠ ᤁᤢᤓᤧ᤺ᤰᤔᤧᤴ ᤔᤡᤖᤠ᤺ᤰᤏᤢ ᤕᤢᤖᤢᤖᤥ॥ 16 ᤌᤣᤀᤠᤱᤓᤧᤸᤗᤧ ᤔᤡ ᤏᤢ ᤋᤠᤓᤣᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤛᤡᤒᤠᤜᤠ᤹ ᤕᤖᤡᤰ ᤔᤧᤒᤥᤱᤗᤥ॥ 17 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤏᤠᤘᤠᤀᤡᤳᤗᤠ ᤔᤠᤱᤄᤔᤠᤖᤧ ᤗᤠᤃᤡ ᤛᤢᤳᤌᤥ ᤁᤧᤈᤥ᤺ᤰᤛᤡᤱᤒᤠ. ᤁᤢᤍᤡ᤺ᤰ ᤁᤢᤍᤡ᤺ᤰ ᤔᤠᤱᤎᤠ᤺ᤴᤜᤠ᤹ᤀᤥ ᤁᤧᤒᤣ᤺ᤰᤐᤠ ᤜᤧᤰᤁᤩᤠᤱ ᤑᤠᤰ. ᤛᤢᤒᤠ ᤏᤢ ᤘᤣ᤹ ᤛᤡᤰᤁᤧᤗᤧᤱᤒᤠ ᤁᤢᤈᤠ ᤁᤧᤈᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠᤛᤡᤔᤧᤴ ᤏᤡ᤺ᤳᤋᤠᤱ ᤋᤠᤖ ᤐᤳ॥ 18 ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤂᤢᤴᤇᤡ᤹ ᤏᤡᤱᤘᤠᤴ ᤏᤢ ᤕᤠ᤺ᤶᤒᤰᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ॥ ᤀᤠᤱᤃᤠ᤹ ᤁᤧᤖᤧᤰ ᤐᤠ᤺ᤴᤍᤠᤱ ᤏᤢ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤑᤢᤱᤛᤧ ᤕᤢᤀᤠᤖ ᤐᤳᤋᤠ॥ ᤂᤧᤱᤜᤠ᤹ ᤁᤧᤖᤧᤰ ᤔᤧᤈᤢᤶ ᤔᤧᤈᤢ᤺ᤳᤋᤠᤱ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤔᤧᤏᤡᤛᤢ᤹॥ 19 “ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤳᤇᤠ ᤔᤡᤰᤛᤣ᤺ᤴᤎᤡᤰ ᤐᤡᤖᤢᤱᤛᤡᤱ᤹॥ ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ᤀᤥ ᤁᤢᤓᤠ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤀᤠᤱᤃᤠ᤹ ᤀᤠᤔᤡᤱ ᤋᤡ᤺ᤵᤐᤠ. ᤆᤥᤃᤢᤱᤒᤠ ᤕᤠ᤺ᤶᤒᤰᤜᤠ᤹. ᤀᤠᤔᤢᤰᤛᤠᤶᤔᤡᤴ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤀᤠ ᤑᤠ᤹ᤀᤠᤱ ᤔᤧᤱᤄᤧᤶᤔᤣ ᤁᤧᤘᤠ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤏᤢ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥ ᤐᤠᤱᤄᤢᤱᤛᤡᤱ᤹. ᤀᤡᤃᤪ ᤋᤠᤷᤛᤡᤛ. ᤗᤡᤒᤡᤕᤠ ᤏᤢ ᤋᤥᤱ ᤗᤡ ᤕᤠᤱᤔᤠ ᤁᤧᤗᤧᤒᤠ ᤔᤏᤠ ᤁᤧᤕᤢᤱᤒᤠ ᤗᤢᤍ ᤏᤢ ᤋᤢᤒᤗ ᤂᤧᤶᤒᤩᤠᤱ ᤃᤪᤡᤛ ᤗᤠᤈᤣ᤹ᤜᤠ᤹ᤀᤥ ᤐᤠᤱᤄᤢᤱᤛᤡᤱ᤹॥ ᤁᤴ ᤗᤠᤈᤣ᤹ᤜᤠ᤹ᤀᤥ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤆᤥ᤺ᤰᤁᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤢᤘᤠ ᤔᤧᤈᤥᤃᤢ᤹॥ 20 ᤂᤧᤶᤒᤩᤠᤱ ᤂᤧᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤂᤡᤏᤡ᤹ ᤁᤧᤖᤧᤰ ᤑᤢ᤹ᤏᤢᤛᤠ᤹ᤜᤠ᤹ ᤀᤴᤜᤠ᤹. ᤀᤴᤗᤠᤎᤠᤜᤠ᤹. ᤗᤠᤎᤠᤜᤠ᤹. ᤀᤍᤱᤜᤠ᤹ ᤏᤢ ᤀᤢᤔᤣᤜᤠ᤹ᤀᤥ ᤁᤰ ᤔᤧᤈᤥᤃᤢᤀᤠᤱ ᤀᤠᤱᤃᤠ᤹ ᤀᤠᤛᤣᤛᤣ ᤁᤥ᤺ᤰᤔᤠ ᤕᤖᤢᤛᤗᤧ᤺ᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤜᤧᤰᤁᤣ ᤔᤧᤍᤠᤖᤢ᤹॥ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧᤴ ᤛᤡᤍᤢᤱᤈᤓᤠᤜᤠ᤹ ᤛᤢᤳᤌᤥ ᤂᤵᤐᤩᤠᤀᤥ ᤔᤧᤕᤠᤰᤋᤢᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤁᤴᤜᤠ᤹ ᤔᤧᤍᤠᤖᤢᤛᤡ᤹॥ 21 ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤢᤶᤔᤥ ᤁᤢᤓᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡ ᤐᤥᤱᤔᤠᤖᤧ ᤗᤠᤃᤡ ᤛᤣᤃᤢᤱᤛᤡᤱ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 22 “ᤀᤠᤱᤃᤠ᤹ ᤀᤠᤔᤢᤰᤛᤠᤶᤗᤠᤶ ᤁᤢᤛᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤏᤢ ᤁᤢᤛᤱ ᤋᤠᤱᤛᤠᤱᤒᤧᤴ ᤌᤎᤵ ᤔᤧᤸᤗ᤹ᤀᤣ ᤐᤰᤁᤴ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤏᤢ ᤂᤡᤏᤡ᤹ ᤔᤡᤱᤅᤡᤴ ᤀᤠᤓᤧᤸᤗᤧᤛᤠᤱ ᤜᤠᤒᤠ ᤘᤠ᤹ᤖᤥ॥ 23 ᤗᤠᤍᤢᤵ ᤌᤰᤔᤠ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤛᤧᤘᤠ ᤔᤧᤳᤇᤧ ᤁᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤔᤧᤍᤠᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 24 “ᤂᤧᤱᤜᤠ᤹ ᤔᤧᤗ᤺ᤴᤏᤠᤱ ᤔᤧᤒᤣ᤺ᤰᤁᤡᤸᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤁᤧᤛᤡᤒᤠ ᤌᤰᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤥ॥ ᤂᤧᤴ ᤁᤧᤛᤡᤒᤠ ᤌᤰᤜᤠ᤹ ᤁᤧᤈᤠᤒᤠ ᤑᤣ᤹ᤒᤠ᤺ᤳᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤇᤡᤏᤧᤴᤗᤥ ᤜᤧᤰᤁᤩᤠᤱ ᤂᤧᤴ ᤆᤣᤎᤰᤜᤠ᤹ ᤁᤧᤀᤥ᤹ᤒᤠ ᤔᤡᤴ ᤀᤠᤓᤧᤸᤗᤧᤀᤠᤱ ᤔᤧᤛᤡᤏᤧᤴᤗᤥ. ᤂᤧᤴ ᤏᤡᤃᤧᤍᤧᤵᤐᤧᤴ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠ᤹ᤖᤡᤰ ᤛᤡᤰᤁᤧᤗᤧ᤺ᤱᤒᤠ ᤐᤥᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.