ᤕᤛᤤᤕᤠ 65 - LIFOTNTᤂᤠᤛᤧᤴ ᤏᤢ ᤛᤧᤴᤗᤵ 1 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤔᤧᤃᤥ᤺ᤳᤋᤠᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤠᤱᤗᤥ ᤁᤖ ᤂᤧᤱᤜᤠ᤹ᤖᤧ ᤔᤧᤱᤃᤥ᤺ᤳᤋᤠᤱᤅᤡᤴᤗᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤄᤥᤀᤠᤖ ᤑᤠ᤹ᤀᤠᤱ ᤕᤠᤖᤡᤵ ᤘᤕᤠᤱᤗᤥ ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤂᤥᤔᤠ ᤏᤡᤱᤘᤠ᤹ᤀᤣ ᤔᤧᤴᤈᤥᤃᤢᤴᤗᤥ॥ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤕᤠᤵᤔᤡ ᤐᤣᤗᤡ ᤔᤧᤶᤓᤠᤰᤔᤏᤠᤒᤠ ᤛᤢᤘᤠᤱᤜᤠ᤹ ‘ᤀᤠᤱᤃᤠ᤹ ᤁ᤹ᤕᤥ ᤘᤠ᤹ᤀᤠ’ ᤑᤠ᤹ᤀᤠᤱ ᤔᤧᤳᤋᤢᤱᤛᤡᤱᤗᤥ॥ 2 ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤗᤠᤶᤍᤠ᤺ᤰᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤓᤧᤸᤗᤧᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤰ. ᤀᤠᤶᤓᤠ ᤂᤧᤴ ᤔᤧᤈᤥᤃᤢᤖᤥ ᤂᤧᤒᤩᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤶᤔᤥ ᤗᤠᤱᤔᤧᤄᤣ᤺ᤰᤗᤥ॥ 3 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤣᤛᤣᤒᤠ ᤑᤢᤱᤀᤡᤰᤋᤠᤵᤜᤠ᤹ᤀᤥ ᤀᤠᤍᤃᤡᤀᤣ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢᤀᤠᤱ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠ᤹ᤖᤥ॥ ᤂᤧᤱᤜᤠ᤹ᤖᤧ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤖᤥ॥ 4 ᤂᤧᤱᤜᤠ᤹ ᤀᤡᤐᤢᤱᤜᤠ᤹ ᤛᤡᤃᤠᤱ ᤔᤧᤕᤢᤱᤗᤥ ᤜᤧᤰᤁᤩᤠᤱ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤀᤡᤰᤗᤰᤘᤠ ᤋᤧᤴᤜᤠ᤹ᤀᤥ ᤔᤧᤀᤡᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤑᤠᤰᤛᤠ ᤔᤧᤈᤖᤥ ᤜᤧᤰᤁᤩᤠᤱ ᤀᤠᤛᤢᤳᤌᤥ ᤁᤢᤈᤠᤴ ᤂᤵᤐᤩᤠᤀᤥ ᤔᤧᤎᤥ᤺ᤰᤋᤢᤀᤠᤱ ᤔᤧᤈᤖᤥ॥ 5 ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡᤖᤥ. ‘ᤂᤧᤏᤡ᤹ ᤀᤠᤏᤡᤃᤣ ᤐᤣᤛᤠᤱ ᤔᤧᤍᤩᤧᤶᤔᤡᤴᤏᤧ᤹ᤀᤥ॥ ᤂᤧᤏᤡ᤹ᤏᤢ᤺ᤸᤗᤧ ᤀᤠᤏᤡᤃᤣ ᤛᤣᤛᤣᤒᤠ ᤆᤥᤃᤡᤃᤧᤖᤥ᥄’ ᤜᤧᤰᤋᤱᤒᤠ ᤔᤏᤠᤜᤠ᤹ ᤏᤠᤛᤡᤌ᤺ᤵᤔᤠ ᤔᤧᤛᤢᤰᤁᤠᤛᤡᤱᤅᤡᤴᤗᤥ. ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤗᤧᤴᤍᤡᤰ ᤏᤠᤶᤎᤠᤎᤠ ᤁᤧᤜᤠ᤹ᤒᤠ ᤜᤧᤰᤁᤩᤠᤱ ᤏᤡᤱᤗᤧ᤹ᤗᤧ᤹ ᤁᤧᤗ᤹ᤒᤠ ᤔᤡ᤺ᤰᤂᤥ᤹ ᤜᤧᤰᤋᤱᤒᤠᤛᤡᤖᤥ॥ 6 ᤂᤧᤱᤜᤠ᤹ ᤀᤠᤰᤋᤱᤒᤠ ᤐᤖᤡᤰᤗᤧᤴ ᤂᤢᤶᤍᤡᤱ ᤐᤡᤔᤠᤛᤡ ᤐᤥᤱ. ᤀᤠᤱᤃᤠ᤹ ᤋᤃᤡᤀᤣ ᤏᤡᤱᤛᤣᤰ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤛᤠᤵᤗᤠᤀᤥ ᤛᤠᤵᤋᤢᤱ ᤛᤢᤖᤢᤱᤅᤠᤱ ᤐᤳᤗᤥ॥ ᤀᤠᤱᤃᤠ᤹ ᤀᤠᤸᤗ ᤛᤫᤠ᤺ᤳ ᤔᤧᤕᤢᤱᤀᤠᤸᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ॥ 7 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤁᤢᤗᤧᤰᤘᤠ ᤜᤢᤅᤢᤱᤗᤥ॥ ᤂᤧᤱᤜᤠ᤹ᤖᤧ ᤁᤥ᤺ᤰᤔᤠᤀᤥᤒᤠ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤀᤠᤱ ᤘᤠ᤹ᤖᤥ ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤔᤧᤒᤠᤖᤧᤀᤠᤱ ᤘᤠ᤹ᤖᤥ॥ ᤁᤧᤒᤣ᤺ᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤴ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥” 8 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤖ ᤀᤠᤱᤃᤠ᤹ ᤂᤧᤴ ᤁᤧᤖᤧᤰ ᤔᤧᤔᤧᤰᤂᤢᤱᤅᤡᤴᤗᤥ ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤆᤧᤸᤗᤧᤰᤛᤣ᤹ ᤁᤢᤒᤈᤠᤜᤠ᤹ᤀᤥ ᤏᤢᤒᤠ ᤆᤧᤸᤗᤧᤰᤛᤣ᤹ ᤁᤢᤈᤠ᤹ᤀᤠᤱ ᤂᤥᤍᤧᤳᤗᤥ ᤜᤧᤰᤁᤩᤠᤱ ᤁᤢᤓᤠᤖᤧ ᤔᤧᤒᤠ᤺ᤳᤋᤢ᤹. ‘ᤂᤧᤱᤜᤠ᤹ ᤗᤠᤵᤔᤧᤓᤢᤛᤧᤶᤔᤡᤴᤏᤧ᤹ᤀᤥ— ᤁᤢᤓᤠ ᤆᤧᤸᤗᤧᤰᤛᤣ᤹ ᤁᤢᤈᤠ᤹ᤜᤠ᤹ ᤏᤢᤒᤠ ᤆᤥᤰᤗᤥ᥄’ ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤔᤧᤰᤂᤢᤱᤛᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗᤛᤠᤱ ᤛᤧᤰᤂᤠᤒᤠ ᤀᤠᤛᤧᤘᤠᤖᤥᤒᤠᤜᤠ᤹ ᤔᤧᤘᤠ᤹ᤖᤥ॥ 9 ᤀᤠᤱᤃᤠ᤹ ᤀᤠᤗᤠᤈᤣᤴ ᤗᤰ ᤐᤡᤔᤠᤛᤡᤖᤧ ᤗᤠᤃᤡ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤏᤢ ᤕᤜᤢᤍᤠᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤀᤠᤱᤃᤠ᤹ ᤋᤠᤱᤄᤢᤱᤛᤡᤱᤗᤥ. ᤛᤣᤃᤢᤱᤛᤡᤱᤒᤠᤜᤠ᤹ᤖᤧᤀᤣ ᤂᤧᤴᤗᤰ ᤔᤧᤄᤥᤛᤢᤖᤥ. ᤜᤧᤰᤁᤩᤠᤱ ᤀᤠᤛᤧᤘᤠᤖᤥᤒᤠᤜᤠ᤹ ᤂᤧᤵᤔᤥ ᤔᤧᤕᤢᤱᤗᤥ॥ 10 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤃᤥ᤺ᤳᤋᤠᤖᤥ ᤜᤧᤰᤁᤩᤠᤱ ᤏᤠᤶᤎᤠ ᤐᤡᤛᤠᤱ ᤛᤠᤖᤥᤏᤒᤠ ᤋᤧᤶᤒᤣ᤺ᤴ ᤂᤧᤒᤩᤠᤱ ᤏᤠᤶᤃᤧᤴ ᤐᤡᤛᤠᤱ ᤀᤠᤁᤥᤖᤒᤠ ᤛᤣ᤺ᤱᤄᤠ᤺ᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰ ᤏᤢ ᤐᤡᤳ ᤆᤠᤖᤠᤶᤔᤠᤍᤧᤴ ᤐᤥᤱᤗᤥ॥ 11 “ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤗᤧᤵᤐᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤣᤛᤣ ᤛᤡᤕᤥᤏ ᤁᤥ᤺ᤰᤔᤠᤴ ᤏᤡᤏᤡ ᤔᤧᤴᤗᤠᤵᤋᤢᤴᤗᤥ. ᤜᤧᤰᤁᤩᤠᤱ ᤋ᤹ᤕᤠᤴ ᤀᤥᤃᤧᤔᤧᤵᤐᤠ ᤃᤠᤍ ᤏᤢ ᤔᤣᤏᤡ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤖᤥ. 12 ᤂᤡᤏᤡ᤹ ᤋᤫᤠᤒᤥ ᤀᤠᤛᤧᤳᤛᤧᤵᤐᤠ ᤛᤡᤔᤧᤴ ᤛᤠᤵᤋᤢᤱ ᤐᤡᤏᤡᤱᤅᤠᤱ ᤐᤳᤗᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤠ᤺ᤴᤇᤠ᤺ᤳᤏᤡᤱᤅᤡᤸᤗᤧ ᤂᤡᤏᤡ᤹ ᤁᤧᤶᤒᤠᤖᤡᤴᤗᤥ ᤜᤧᤰᤁᤩᤠᤱ ᤐᤠᤖᤠᤱᤅᤡᤸᤗᤧ ᤀᤠᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤏᤧᤴᤗᤥ॥ ᤂᤡᤏᤡ᤹ ᤏᤡᤏᤡᤒᤠ ᤗᤠᤕᤥ ᤁᤧᤈᤥᤃᤢᤶᤗᤥ ᤜᤧᤰᤁᤩᤠᤱ ᤆᤡ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤁᤧᤛᤣᤃᤢᤶᤗᤥ॥” 13 ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤈᤖᤥ. ᤁᤖ ᤂᤡᤏᤡ᤹ᤃ ᤛᤠᤰᤔᤧᤴᤈᤠ ᤁᤧᤕᤢᤅᤡᤖᤥ॥ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤎᤢᤅᤢ. ᤁᤖ ᤂᤧᤏᤡ᤹ᤃ ᤘᤠᤔᤡ᤺ᤰᤗᤥ. ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹ ᤔᤧᤛ᤺ᤳᤋᤠᤱ ᤛᤥᤛᤥ᤺ᤳ ᤗᤖᤠᤱ ᤔᤧᤈᤥᤰᤗᤥ. ᤁᤖ ᤂᤡᤏᤡ᤹ ᤏᤠᤎᤠᤖᤥ॥ 14 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠᤜᤠ᤹ ᤏᤡᤱᤘᤠ᤹ᤀᤥ ᤔᤧᤛ᤺ᤳᤋᤠᤱ ᤛᤠᤶᤔᤧᤗᤥᤖᤥ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤀᤠᤱ ᤁᤧᤜᤠᤒᤡᤖᤥ. ᤂᤧᤒᤩᤠᤱ ᤕᤠᤶᤛᤠᤶᤔᤥ ᤏᤡᤱᤘᤠ᤹ ᤋᤢᤰᤁᤠᤱ ᤀᤢ᤺ᤰᤁᤠᤱ ᤀᤢ᤺ᤰ ᤁᤧᤜᤠᤒᤡᤖᤥ॥ 15 ᤀᤠᤱᤃᤠ᤹ ᤛᤣᤃᤢᤱᤛᤡᤱᤒᤠ ᤀᤠᤔᤏᤠᤜᤠ᤹ᤖᤧ ᤂᤡᤏᤡ᤹ ᤔᤡᤱᤅᤡᤴ ᤛᤠᤱᤃᤪᤠ ᤔᤠᤱᤍᤣ ᤐᤠᤴ ᤔᤧᤒᤠ᤺ᤳᤋᤡᤸᤗᤧ ᤔᤧᤕᤠᤅᤢᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤡ᤹ ᤁᤧᤛᤧᤖᤡᤖᤥ. ᤁᤖ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ ᤘᤣ᤹ ᤔᤡᤱ ᤐᤡᤖᤢᤛᤡᤖᤥ॥ 16 ᤀᤠᤳᤋᤡᤸᤗᤧ ᤁᤴ ᤗᤠᤈᤣ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤔᤡᤴ ᤀᤢᤘᤠ ᤆᤥᤃᤢ᤹. ᤂᤧᤸᤗᤧ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤀᤰᤂᤣ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤴ ᤗᤠᤈᤣ᤹ᤀᤥ ᤔᤠᤱᤃᤧᤜᤧᤰᤛᤡᤱᤒᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤋᤃᤡᤒᤠ ᤋᤢᤰᤂᤣᤜᤠ᤹ ᤔᤠᤒᤣ᤺ᤰᤁᤠᤱ ᤏᤡᤱᤘᤠ᤹ ᤔᤢ᤺ᤴᤗᤥ॥” ᤁᤢᤛᤱ ᤏᤠᤘᤠᤃᤧᤴ ᤆᤀᤡ᤺ᤳ 17 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤁᤢᤛᤱ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤏᤢ ᤁᤢᤛᤱ ᤋᤠᤱᤛᤠᤱᤒᤠ ᤆᤥᤃᤢᤱᤗᤥ. ᤁᤧᤒᤣ᤺ᤰᤐᤠ ᤕᤧᤶᤔᤥᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤔᤧᤒᤥᤱᤏᤧᤴᤗᤥ॥ 18 ᤀᤠᤱᤃᤠ᤹ ᤆᤩᤠ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱ. ᤂᤧ᤹ᤕᤥ ᤂᤡᤏᤡ᤹ ᤀᤠᤓᤧᤸᤗᤧᤛᤠᤱ ᤛ᤺ᤳᤋᤠᤶᤔᤧ᤹ᤀᤥ ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤠᤛᤠᤶᤔᤧ᤹ᤀᤥ॥ ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱᤒᤠ ᤁᤢᤛᤱ ᤕᤖᤢᤛᤗᤧ᤺ᤶᤔᤥ ᤏᤡᤱᤘᤠ᤹ ᤋᤠᤔᤠ ᤐᤠ᤺ᤴᤜᤠ᤹ᤖᤧ ᤁᤢᤎᤡᤶ ᤐᤥᤱᤗᤥ ᤂᤧᤶᤒᤩᤠᤱ ᤂᤧ᤹ᤕᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤐᤛ᤺ᤳ ᤔᤧᤛ᤺ᤳᤗᤥ॥ 19 ᤕᤖᤢᤛᤗᤧᤔ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤠᤱᤃᤠ᤹ ᤀᤠᤒᤠᤅᤣᤀᤠᤱ ᤛ᤺ᤳᤋᤠᤖᤥ. ᤂᤧᤵᤔᤥ ᤜᤠ᤺ᤵᤔᤠ ᤆᤡ᤺ᤱᤔᤠ ᤏᤢ ᤀᤠᤓᤠ᤹ᤖᤧ᤹ ᤁᤧᤗ᤹ᤒᤠ ᤀᤡᤰᤗᤠ ᤂᤧᤶᤔᤧᤍᤧᤳᤏᤧᤴᤗᤥ॥ 20 “ᤀᤅᤧ᤺ᤰᤘᤠᤜᤠ᤹ ᤔᤧᤈᤢ᤺ᤰᤗᤀᤣ ᤔᤧᤴᤇᤡᤏᤧᤴᤗᤥ. ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤌᤠ᤺ᤰ ᤆᤠ᤹ᤖ ᤌᤠᤖᤡᤰ ᤔᤧᤜᤡᤱᤗᤥ॥ ᤁᤡᤵ ᤌᤡᤰ ᤋᤱᤒᤣ᤹ ᤁᤧᤃᤧᤵᤐᤠᤜᤠ᤹ ᤌᤠᤱᤒᤧᤴ ᤗᤣ᤺ᤵᤔᤠᤛᤡ ᤐᤥᤱᤗᤥ. ᤂᤧᤴᤏᤢ᤺ᤸᤗᤧ ᤋᤃᤡ ᤁᤧᤛᤡᤒᤠᤜᤠ᤹ᤃ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤒᤠ ᤑᤠ᤹ᤀᤠᤱ ᤀᤡ᤺ᤵᤔᤠ ᤐᤥᤱᤗᤥ॥ 21 ᤂᤧᤱᤜᤠ᤹ᤖᤧ ᤜᤡᤶ ᤔᤧᤈᤥᤃᤢᤀᤠᤱ ᤂᤧ᤹ᤕᤥ ᤔᤧᤕᤢᤱᤗᤥ. ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤔᤧᤗᤣ᤺ᤳᤋᤢᤀᤠᤱ ᤂᤧᤸᤗᤧ ᤁᤢᤈᤠ᤹ᤀᤡᤴ ᤔᤧᤈᤖᤥ॥ 22 ᤂᤧᤱᤜᤠ᤹ᤖᤧ ᤜᤡᤶᤜᤠ᤹ ᤔᤧᤈᤥᤃᤢᤀᤠᤱ ᤀᤠᤑᤣᤰ ᤔᤧᤕᤢᤱᤗᤥ. ᤘᤣ᤹ᤜᤠ᤹ ᤔᤧᤗᤠ᤺ᤳᤋᤠᤱ ᤔᤧᤴᤕᤢᤱᤏᤧᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤗᤣ᤺ᤳᤋᤢᤒᤠ ᤀᤡᤰᤋᤠᤵᤜᤠ᤹ ᤀᤠᤒᤠᤅᤣ ᤔᤧᤈᤖᤥ ᤘᤣ᤹ᤜᤠ᤹ᤖᤧ ᤔᤧᤴᤈᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤛᤡᤱᤒᤢᤱᤅᤡᤴ ᤀᤡᤖᤡᤰ ᤜᤡᤱᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤆᤠ᤹ᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤛᤣᤃᤢᤱᤛᤡᤱᤒᤠᤜᤠ᤹ᤖᤧ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤕᤖᤡᤰ ᤕᤧᤴ ᤌᤠᤖᤡᤰ ᤔᤧᤛ᤺ᤳᤗᤥ॥ 23 ᤂᤧᤱᤜᤠ᤹ᤖᤧ ᤜᤢᤰᤔᤧᤕᤠᤰᤋᤢᤒᤠ ᤕᤠ᤺ᤶᤒᤰᤁᤥ ᤂᤧᤱᤜᤠ᤹ ᤁᤢᤗᤡᤱᤍᤥ ᤔᤧᤃᤧᤳᤗᤥ ᤂᤧᤶᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠ ᤕᤧᤶᤒᤡᤳᤇᤠᤛᤠᤜᤠ᤹ ᤁᤧᤛᤠᤰᤐᤠ ᤋᤢᤰᤂᤣᤀᤥ ᤔᤧᤴᤎᤠᤏᤧᤴᤗᤥ॥ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤁᤧᤍᤠᤒᤠ ᤕᤧᤴᤏᤥ ᤛᤍᤠᤍᤡᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤗᤥ॥ 24 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤐᤣᤗᤡ ᤑᤠᤰᤔᤠᤏᤢ᤺ᤸᤗᤧ ᤋᤃᤡ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤺ᤰᤁᤠᤒᤠ ᤐᤠ᤺ᤴᤜᤠ᤹ ᤐᤡᤖᤢᤱᤛᤡᤱᤗᤥ॥ 25 ᤐᤖᤠᤒᤠᤜᤠ᤹ ᤏᤢ ᤌᤢ᤺ᤶᤒᤠᤜᤠ᤹ᤖᤧ ᤗᤳᤇᤠᤍᤧᤴᤏᤥ ᤛᤥᤖᤡᤰ ᤁᤢᤈᤠ ᤔᤧᤈᤖᤥ. ᤁᤣᤒᤠᤜᤠ᤹ᤖᤧ ᤐᤡᤳᤜᤠ᤹ᤖᤧ ᤔᤧᤈᤒᤠ ᤁᤢᤀᤡᤛᤡᤰ ᤁᤢᤜᤣᤍᤩᤠ᤹ ᤕᤠ᤹ᤗᤠᤱᤅᤡᤴ ᤔᤧᤈᤖᤥ॥ ᤁᤖ ᤀᤛᤣ᤺ᤰᤜᤠ᤹ᤖᤧ ᤂᤠᤶᤜᤡ᤺ᤰᤁᤧᤴ ᤔᤧᤈᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤛᤣᤛᤣ ᤀᤠᤃᤥ᤺ᤰᤔᤠᤀᤥ ᤋᤠᤵᤑᤧ᤺ᤶᤒᤠ ᤐᤠᤴ ᤌᤣᤀᤠᤱ ᤔᤧᤴᤈᤥᤃᤢᤴᤗᤥ.” ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.