ᤕᤛᤤᤕᤠ 64 - LIFOTNT1 ᤋᤠᤱᤛᤠᤱᤒᤧᤴ ᤁᤧᤎᤧ᤺ᤰᤂᤢᤀᤠᤱ ᤌᤣᤀᤠᤱ ᤁᤧᤴᤎᤠᤛᤡᤱᤅᤧᤴᤒᤠᤒᤣ᥅ ᤏᤠᤱᤈᤱ ᤗᤢᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤡᤛᤧᤔᤧᤴᤗᤥ ᤜᤧᤰᤁᤩᤠᤱ ᤁᤡᤔᤧᤸᤗᤧ ᤌᤧᤃᤰᤁᤰᤏᤠ ᤔᤧᤕᤰᤂᤧᤔᤧᤴᤗᤥ॥ 2 ᤔᤡ᤺ᤸᤗᤧ ᤛᤡᤱᤔᤢᤈᤡ᤹ᤜᤠ᤹ ᤜᤠ᤹ᤖᤢᤖᤥ ᤜᤧᤰᤁᤩᤠᤱ ᤆᤫᤠ᤺ᤳᤋᤡᤴ ᤗᤠᤰᤋᤢᤒᤠ ᤜᤧᤰᤁᤣ. ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤁᤧᤔᤡᤱᤅᤡᤴ ᤔᤧᤵᤔᤠᤛᤡᤖᤧ ᤗᤠᤃᤡ. ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ ᤁᤧᤒᤣᤛᤠᤱ ᤔᤧᤕᤱᤗ ᤑᤠ᤹ᤀᤠᤱ ᤁ᤹ᤕᤥ ᤌᤠᤛᤡᤱᤅᤧ᤹ᤀᤥ॥ 3 ᤂᤧᤏᤧ᤹ ᤁᤡᤵᤔᤠ ᤁᤧᤄᤢᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢ ᤑᤠ᤹ᤀᤠᤱ ᤀᤠᤏᤡᤃᤣ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤒᤠᤀᤣ ᤜᤥ᤺ᤵᤋᤧᤖᤥ. ᤂᤧᤒᤩᤠᤱ ᤂᤧᤏᤧ᤹ ᤁ᤹ᤕᤥ ᤁᤧᤎᤠᤛᤡᤱᤗᤥ. ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱ ᤏᤠᤱᤈᤱᤗᤢᤱᤜᤠ᤹ ᤌᤢᤖᤢᤵᤗᤢᤵᤏᤠ ᤕᤰᤂᤧᤖᤥ॥ 4 ᤂᤧᤏᤧ᤹ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤁᤧᤘᤠ᤹ ᤑᤠ᤹ᤀᤠᤱ ᤀᤢᤏᤠᤜᤢᤖᤡᤀᤠᤱᤎᤥᤀᤣ ᤜᤠ᤺ᤳᤗᤧᤀᤠᤱ ᤜᤧᤰᤁᤩᤠᤱ ᤀᤠᤓᤧᤸᤗᤧᤀᤠᤱ ᤔᤧᤴᤏᤡᤀᤣ ᤔᤧᤱᤄᤧᤶᤔᤣ ᤘᤠ᤹ᤖᤥ॥ ᤂᤧᤏᤧ᤹ᤀᤥᤗᤠᤶ ᤀᤥᤃᤧᤔᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖᤥ॥ 5 ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤜᤧᤰᤁᤩᤠᤱ ᤁᤧᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤂᤧᤏᤧ᤹ ᤁᤧᤓᤠ᤹ᤖᤢᤛᤡᤖᤥ॥ ᤂᤧᤏᤧ᤹ ᤀᤠᤏᤡᤃᤧᤏᤢ ᤁᤧᤛᤡᤰ ᤐᤥᤃᤧ ᤁᤖ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤖᤥ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤗᤠᤕᤥᤒᤠᤀᤣ ᤘᤕᤡᤃᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤛᤧ᤺ᤵᤛᤡᤱᤔᤠ ᤛᤢᤰᤋᤡᤃᤧᤒᤠᤒᤣ᥅ 6 ᤁᤧᤖᤧᤰ ᤀᤠᤛᤢᤳᤌᤥ ᤔᤏᤠ ᤜᤧᤰᤋᤱᤒᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤁᤧᤖᤧᤰ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤁᤢᤍᤪᤧᤰ ᤆᤠᤱ ᤜᤧᤰᤋᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤀᤠᤏᤡᤃᤣ ᤁᤧᤖᤧᤰ ᤋᤧᤳᤗᤠᤑᤧᤰᤘᤠ ᤁᤢᤀᤡᤛᤡᤰ ᤀᤡᤗᤧᤔᤡᤄᤧᤖᤡᤃᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤕᤥᤸᤗᤧ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤜᤧᤰᤁᤣ ᤐᤰᤂᤡ ᤋᤣ᤹ᤖᤡᤃᤧᤖᤥ॥ 7 ᤀᤠᤳᤋᤡᤴᤏᤠᤱ ᤋᤢᤘᤠ ᤆᤥ᤺ᤰᤛᤧ ᤂᤧᤏᤧ᤹ ᤗᤧᤵᤔᤠᤱ ᤔᤧᤜᤡᤛᤡᤅᤡᤸᤗᤥ. ᤀᤠᤳᤋᤡᤴᤜᤠ᤹ᤀᤠᤱ ᤂᤧᤏᤧ᤹ᤀᤥ ᤁᤢᤓᤠ᤹ ᤏᤠ᤺ᤰᤛᤧ ᤔᤧᤶᤒᤣ᤺ᤰᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤏᤠᤖᤠᤴ ᤀᤠᤏᤡᤃᤧᤗᤠᤶ ᤁᤧᤈᤡᤰᤂᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤕᤠᤵᤔᤡ ᤁᤢᤛᤢᤶ ᤔᤧᤴᤍᤶᤏᤠᤒᤠ ᤁᤧᤈᤥᤃᤧᤀᤠᤱ ᤘᤠ᤹ᤖᤥ॥ 8 ᤜᤧᤰᤁᤣᤛᤠᤱ ᤀᤠᤸᤗ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤏᤧᤖᤥ॥ ᤀᤠᤏᤡᤃᤣ ᤂᤠᤶᤍᤡᤃᤧ. ᤜᤧᤰᤁᤩᤠᤱ ᤂᤧᤏᤧ᤹ᤃ ᤁᤥᤶᤓᤠ᤺ᤸᤗᤩᤠᤏᤧᤖᤥ. ᤁᤧᤖᤧᤰ ᤂᤧᤏᤧ᤹ ᤁᤧᤜᤢᤰᤁᤡᤸᤗᤧ ᤕᤠᤵᤔᤡ ᤁᤧᤈᤥᤃᤧᤒᤠ ᤕᤠ᤺ᤶᤒᤰᤛᤡᤃᤧᤖᤥ॥ 9 ᤕᤜᤘᤣ ᤍᤠᤱᤒᤠᤀᤣ. ᤛᤠ᤹ᤖᤡᤰ ᤁᤧᤛᤡᤰ ᤔᤧᤒᤥᤃᤧᤴᤏᤧ᤹ᤀᤥ. ᤀᤠᤏᤡᤃᤣ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤋᤡᤒᤣᤗᤠᤒᤣ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤴᤏᤧ᤹ᤀᤥ॥ ᤐᤣᤗᤡ ᤑᤠᤰᤁᤠᤛᤡᤃᤧ. ᤀᤠᤏᤡᤃᤣ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤁᤧᤖᤧᤰ ᤂᤧᤏᤧ᤹ ᤁᤧᤔᤏᤠᤍᤡᤃᤧᤖᤥ॥ 10 ᤂᤧᤏᤧ᤹ ᤁᤧᤛᤣᤛᤣ ᤕᤧᤰᤕᤰᤜᤠ᤹ ᤔᤢᤖᤧᤰ ᤂᤠᤖᤧ᤺ᤰᤐᤠ ᤜᤠ᤺ᤳᤋᤠᤱ ᤁᤧᤜᤥ᤺ᤵᤐᤠᤍᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤛᤡᤕᤥᤏᤧᤴᤏᤠᤱ ᤔᤢᤖᤧᤰ ᤂᤠᤖᤧ᤺ᤰᤐᤠ ᤜᤠ᤺ᤳᤋᤠᤱ ᤁᤧᤜᤥ᤺ᤵᤐᤠᤍᤧᤴ ᤐᤥ᤺ᤰᤂᤧᤖᤥ. ᤕᤖᤢᤛᤗᤧ᤺ᤶᤔᤡᤴ ᤌᤣᤀᤠᤱ ᤁᤧᤜᤥᤵᤐᤠ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤖᤥ॥ 11 ᤀᤠᤏᤡᤃᤣ ᤐᤠᤎᤧᤒᤠ ᤛᤢᤎᤧᤒᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤠᤖᤠ ᤔᤧᤓᤥᤛᤢᤒᤠ ᤀᤠᤏᤡᤃᤣ ᤛᤣᤛᤣ ᤏᤢ ᤔᤡᤔᤡᤍᤡᤱᤃᤧᤴ ᤔᤠᤱᤜᤡᤶᤔᤡᤴ ᤔᤡᤍᤡᤃᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤛᤡᤖᤠ᤹ ᤁᤧᤎᤠᤱᤒᤠ ᤗᤣ᤺ᤳᤋᤢᤶᤒᤧᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤁᤢᤕ᤺ᤰᤘᤧᤳ ᤐᤥ᤺ᤰᤂᤧᤀᤠᤱ ᤏᤧᤖᤥ॥ 12 ᤕᤜᤘᤣ ᤍᤠᤱᤒᤠᤀᤣ. ᤁᤴᤜᤠ᤹ ᤁᤧᤖᤧᤰ ᤐᤥ᤺ᤰᤂᤧᤀᤠᤱ ᤌᤣ ᤂᤧᤏᤧ᤹ ᤀᤣᤃᤠᤱ ᤀᤣᤃᤠᤱ ᤁᤧᤏᤢ᤺ᤱᤒᤡ᥅ ᤌᤣ ᤂᤧᤏᤧ᤹ ᤛᤫᤠ᤺ᤳ ᤁᤧᤘᤠ᤹ᤀᤠᤱ ᤀᤠᤏᤡᤃᤣ ᤌ᤺ᤵᤔᤠᤀᤣ ᤛᤢᤰᤔᤧᤴᤍᤧᤵᤔᤏᤠᤒᤠ ᤋᤢᤰᤂᤣ ᤕᤠᤵᤔᤡ ᤁᤧᤈᤠ᤺ᤵᤐᤡ᥅ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.