ᤕᤛᤤᤕᤠ 63 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤠ᤺ᤴᤍᤢᤛᤡ

¹ ᤀᤣᤍᤥᤔᤒᤠ ᤒᤥᤈᤪᤠ ᤕᤧᤰᤕᤰᤗᤠᤶ ᤜᤧ᤺ᤰᤁᤱᤃᤱᤒᤠ ᤆᤠ᤺ᤶᤔᤏᤠᤒᤠ ᤆᤠᤱ ᤁᤧᤈᤠᤱᤒᤠᤀᤠᤱ ᤁᤧᤓᤧᤶᤒᤧᤴ ᤜᤠ᤺ᤳᤏᤡᤒᤣ᥅ ᤜᤠᤱᤘᤠ ᤔᤠᤱᤘᤠ ᤁᤧᤕᤠᤰᤐᤠ ᤋᤣᤳ ᤏᤢ ᤂᤢᤏᤧ᤹ ᤁᤢᤔᤢᤰᤛᤠᤶᤔᤥ ᤋᤃᤠᤱ ᤁᤧᤓᤧᤶᤒᤠᤖ ᤁᤧᤒᤵᤐᤧᤴ ᤜᤠ᤺ᤳᤐᤣ᥅ “ᤁᤧᤛᤧᤴᤗᤵᤐᤡᤴ ᤀᤢᤘᤠ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤀᤣᤖᤥ᥄ ᤋᤠᤱᤛᤧ᤺ᤵᤔᤠ ᤔᤢᤰᤛᤠᤶ ᤁᤧᤃᤵᤐᤠ ᤕᤜᤘᤣ ᤍᤠᤱᤒᤧᤱᤃ ᤀᤠᤱᤃᤠ᤹ᤀᤣᤖᤥ᥄”

² ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ. ᤆᤧᤸᤗᤧᤰᤛᤣ᤹ ᤁᤧᤏᤢᤰᤐᤧᤸᤗᤧ ᤁᤢᤍᤣ᤺ᤳᤋᤡᤴ ᤜᤧᤰᤁᤣ ᤂᤧᤏᤧ᤹ ᤁᤧᤈᤠᤱᤅᤡᤴ ᤌᤣᤀᤠᤱ ᤜᤧ᤺ᤳ ᤗ᤹ᤒᤠᤒᤣ᥅

³ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤆᤧᤸᤗᤧᤰᤛᤣ᤹ ᤜᤧᤰᤁᤣ ᤀᤣ᤺ᤵᤛᤢᤱᤛᤡᤱᤗᤥ. ᤀᤠᤱᤃᤠ᤹ ᤑᤠ᤹ᤔᤠᤖᤧ ᤗᤠᤃᤡ ᤜᤠ᤺ᤳᤋᤠᤱ ᤔᤧᤍᤧᤴᤏᤧᤴᤗᤥ॥ ᤀᤠᤛᤠᤰᤁᤧᤴᤏᤡᤸᤗᤧ ᤂᤧᤱᤜᤠ᤹ ᤋᤥ᤹ᤖᤢᤛᤡᤱᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤠᤰᤂᤡᤸᤗᤧ ᤁᤧᤖᤧᤰ ᤀᤠᤈᤠᤱᤜᤠ᤹ ᤐᤡᤳᤋᤢᤖᤥ॥

⁴ ᤌᤣᤀᤠᤱᤓᤧᤸᤗᤧ ᤁᤢᤗᤧᤰᤘᤠ ᤜᤢᤱᤔᤠ ᤕᤧᤴ ᤀᤠᤏᤡᤱᤘᤠ᤹ᤀᤥ ᤘᤕᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤧ᤹ᤔᤠᤛᤡ ᤋᤱᤒᤣᤴ ᤋᤩᤧᤀᤠᤱ ᤘᤠ᤹ᤖᤥ॥

⁵ ᤀᤥᤔᤕᤠᤱ. ᤁᤖ ᤜᤠ᤺ᤳᤗᤧᤀᤠᤱ ᤑᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ. ᤁᤧᤓᤠ᤹ᤒᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤔᤧᤜᤥ᤺ᤵᤋᤧᤒᤠ ᤏᤡᤛᤢᤱᤅᤠᤱ ᤀᤠᤏᤡᤱᤘᤠ᤹ ᤔᤕᤧᤖᤥ. ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤔᤢᤰᤛᤠᤶᤔᤡᤸᤗᤧ ᤂᤧᤱᤜᤠ᤹ ᤛᤧᤴᤗᤵ ᤐᤡᤖᤢᤱᤛᤡᤱᤗᤥ. ᤂᤧᤒᤩᤠᤱ ᤀᤠᤛᤠᤰᤁᤧᤴᤏᤡᤸᤗᤧ ᤀᤠᤱᤃᤠ᤹ ᤑᤠ᤹ᤖᤠᤱᤗᤥ॥

⁶ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤥ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤥ᤹ᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤔᤕᤢᤛᤡᤒᤠ ᤜᤧᤰᤁᤣ ᤂᤢᤴᤇᤡ᤹ ᤗᤠᤱᤜᤠ᤹ ᤀᤧᤳᤇᤡᤱᤅᤠᤱ ᤂᤠᤶᤒᤠᤱᤅᤥ ᤔᤧᤈᤥᤴᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤂᤠᤶᤒᤠᤱᤅᤥ ᤘᤍᤣ᤺ᤴᤍᤢᤱᤗᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤏᤢ᤹ᤔᤠ ᤋᤠᤔᤠ ᤐᤡᤖᤢᤛᤡ᤹

⁷ ᤕᤜᤘᤣ ᤍᤠᤱᤒᤧᤸᤗᤧ ᤆᤰᤔᤧᤸᤗ᤹ᤀᤣᤒᤠ ᤁᤢᤔᤡ᤺ᤶᤈᤡᤴ ᤐᤠ᤺ᤳᤋᤢᤱᤗᤥ. ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤢᤱᤗᤥ॥ ᤂᤢᤏᤧ᤹ ᤁᤢᤗᤢᤱᤔᤠᤍᤢᤰᤔᤠ ᤏᤢ ᤆᤰᤔᤧᤸᤗ᤹ᤀᤣᤒᤠ ᤁᤢᤔᤡ᤺ᤶᤈᤡᤸᤗᤧ ᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥

⁸ ᤂᤢᤏᤧ᤹ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤛᤡᤖᤥ. ᤂᤧᤴᤜᤠ᤹ᤖᤧ ᤀᤠᤱᤃᤠ᤹ ᤀᤡᤱᤔᤧᤸᤗᤧᤰᤁᤠᤴᤗᤥ” ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤧᤴᤗᤵᤍᤠᤱᤒᤠ ᤐᤥ᤺ᤰᤂᤧᤖᤥ॥

⁹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤋᤢᤰᤂᤣᤀᤥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤃᤧᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤂᤧᤱᤜᤠ᤹ ᤌᤧ᤹ᤖᤢᤛᤡᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ ᤜᤧᤰᤁᤩᤠᤱ ᤏᤢᤖᤡᤰ ᤔᤧᤳᤋᤢᤛᤡᤖᤥ ᤜᤧᤰᤁᤩᤠᤱ ᤔᤧᤸᤗᤢᤱ ᤜᤢᤅᤢᤀᤠᤱ ᤂᤧᤱᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡᤖᤥ. ᤂᤧᤒᤩᤠᤱ ᤀᤢᤏᤠᤜᤢᤖᤡᤒᤠ ᤁᤧᤖᤧᤰ ᤕᤧᤴᤏᤥ ᤂᤢᤏᤧ᤹ ᤂᤧᤱᤜᤠ᤹ ᤁᤢᤕᤢᤛᤡᤖᤥ॥

¹⁰ ᤁᤖᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤁᤢᤛᤣᤛᤣ ᤕᤠᤶᤛᤠᤶᤔᤡᤴ ᤁᤢᤏᤡᤱᤘᤠ᤹ ᤋᤢᤃᤧᤖ ᤔᤧᤕᤠ᤺ᤴᤍᤢᤖᤥ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡ ᤐᤥ᤺ᤰᤂᤧᤖᤥ. ᤂᤶᤒᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤂᤧᤱᤜᤠ᤹ᤏᤢ ᤌᤰᤋᤧᤖᤥ॥

¹¹ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤁᤢᤕᤧᤴᤏᤡᤴ ᤏᤢ ᤁᤢᤔᤏᤠᤜᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤛᤡᤖᤥ. ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧᤖᤥ. “ᤔᤥᤛᤠ᤺ᤴᤏᤢ ᤛᤥᤖᤡᤰ ᤔᤧᤸᤗᤢᤰᤁᤶᤒᤠ ᤁᤢᤀᤡᤛᤡᤰ ᤘᤖ᤺ᤱᤅᤥᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤧᤴ ᤀᤠᤳᤋᤡ ᤘᤠ᤹ᤒᤣ᥅ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤘᤠ᤹ᤛᤧ ᤛᤣᤛᤣᤔᤠᤱ ᤁᤧᤒᤠᤱᤒᤧᤴ ᤀᤠᤳᤋᤡ ᤘᤠ᤹ᤒᤣ᥅

¹² ᤔᤥᤛᤠ᤺ᤸᤗᤧ ᤁᤢᤜᤢᤰᤁᤡᤴ ᤑᤥ᤺ᤰᤂᤢᤸᤗᤧ ᤔᤢᤰᤛᤠᤶ ᤀᤥᤛᤣ᤺ᤴᤍᤠᤱ ᤁᤧᤈᤥᤰᤐᤧᤴ. ᤘᤖ᤺ᤱᤅᤡᤴ ᤂᤢᤴᤇᤡ᤹ ᤋᤃᤡ ᤏᤧᤳᤇᤡᤗᤰᤁᤥ ᤁᤧᤓ᤺ᤱᤒᤧᤴ. ᤛᤍᤠᤍᤡᤱᤗᤧ ᤗᤠᤃᤡ ᤁᤢᤔᤡᤱ ᤁᤧᤍᤡ᤺ᤵᤐᤠ ᤁᤧᤈᤥᤰᤐᤧᤴ ᤀᤠᤳᤋᤡ ᤘᤠ᤹ᤒᤣ᥅

¹³ ᤘᤖ᤺ᤱᤅᤡᤸᤗᤧ ᤁᤢᤛᤡᤃᤠᤱᤗᤠᤶ ᤂᤧᤴᤜᤠ᤹ ᤗᤠᤶᤃᤧᤗᤥᤒᤧᤴ ᤀᤠᤳᤋᤡ ᤘᤠ᤹ᤒᤣ᥅” ᤂᤧᤱᤜᤠ᤹ᤃ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤧᤗᤥ᤺ᤰᤐᤠ. ᤀᤠᤑᤠᤸᤗᤧᤀᤠᤱ ᤂᤢᤴᤇᤡ᤹ ᤗᤠᤱ ᤔᤧᤴᤍᤥ᤺ᤰᤏᤠᤒᤠ ᤀᤴᤜᤠ᤹ ᤜᤧᤰᤁᤣ ᤔᤧᤗ᤹ᤖᤥ॥

¹⁴ ᤐᤡᤳᤜᤠ᤹ ᤌᤰᤛᤠᤜᤠ᤹ ᤛᤣ᤺ᤱᤄᤠᤀᤥ ᤆᤠᤔᤧᤖᤠᤶᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤂᤧᤱᤜᤠ᤹ ᤏᤠ᤺ᤶᤛᤡᤱᤔᤠ ᤐᤡᤖᤢᤛᤡᤖᤥ॥ ᤂᤧᤶᤓᤗ᤹ᤖᤡᤰᤁᤣ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤡᤱᤅᤧᤴ ᤔᤡᤔᤡᤍᤡᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖᤥ॥

ᤁᤢᤓᤠ᤹ᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ

¹⁵ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤥᤔᤧᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤏᤢ ᤛᤣᤛᤣᤍᤧᤴ ᤜᤧᤰᤁᤩᤠᤱ ᤔᤡᤔᤡᤍᤡᤱᤃᤧᤴ ᤜᤠᤱᤕᤢᤰᤏᤠᤗᤠᤶᤒᤠ ᤕᤥ ᤀᤥᤔᤕᤧ᤹ᤀᤥ॥ ᤂᤧᤏᤧ᤹ ᤁᤧᤛᤡᤰᤛᤶᤔᤠᤴ ᤏᤢ ᤁᤧᤔᤢᤰᤛᤠᤶᤔᤡᤴ ᤀᤠᤳᤋᤡ ᤐᤣᤒᤣ᥅ ᤂᤧᤏᤧ᤹ ᤁᤧᤏ᤺ᤶᤏ᤺ᤶ ᤗ᤹ᤔᤠᤴ ᤏᤢ ᤀᤠᤏᤡᤃᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤋᤧᤒᤠᤴ ᤀᤠᤳᤋᤡ ᤘᤠ᤹ᤒᤣ᥅

¹⁶ ᤁᤖ ᤂᤧᤏᤧ᤹ᤃ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤏᤧᤖᤥ. ᤀᤠᤏᤡᤃᤣ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤔ ᤏᤢ ᤀᤡᤛᤪᤠᤀᤡᤗᤖᤧ ᤕᤠᤵᤔᤡ ᤔᤧᤴᤍᤠ᤺ᤰᤋᤡᤃᤧᤴᤇᤠᤱ. ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤏᤧᤖᤥ. ᤂᤧᤏᤧ᤹ ᤁᤧᤔᤡᤱᤅᤧᤴ ᤀᤢᤏᤠᤜᤢᤖᤡᤀᤠᤱᤎᤥᤀᤣ ᤀᤠᤏᤡᤃᤣ ᤁᤧᤎᤧ᤹ᤒᤠᤖᤥ॥

¹⁷ ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤔᤠᤖᤠᤶᤔᤥᤗᤠᤶ ᤌᤣᤀᤠᤱ ᤀᤠᤏᤡᤃᤣ ᤋᤠᤵᤁᤧᤒᤧ᤹ᤒᤠ ᤕᤠᤵᤔᤡ ᤁᤧᤈᤥ᤺ᤰᤐᤠᤒᤣ᥅ ᤜᤧᤰᤁᤩᤠᤱ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤶᤒᤡᤔᤠᤖᤧ ᤗᤠᤃᤡ ᤌᤣᤀᤠᤱ ᤀᤠᤏᤡᤃᤣ ᤏᤡᤱᤘᤠᤴ ᤐᤠᤴ ᤔᤧᤱᤄᤧᤶᤏᤠᤒᤠ ᤁᤧᤈᤥᤃᤢᤒᤠᤒᤣ᥅ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤗᤠᤃᤡ. ᤁᤧᤗᤰᤁᤧᤄᤥᤒᤠ ᤀᤠᤒᤠᤅᤣ ᤁᤧᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤏᤢ᤺ᤰᤂᤧ᤹ᤀᤥ॥

¹⁸ ᤂᤧᤏᤧ᤹ ᤁᤧᤛᤣᤛᤣ ᤔᤏᤠᤜᤠ᤹ᤖᤧ ᤛᤵᤑᤠᤖᤧ ᤗᤠᤃᤡᤖᤰ ᤁᤧᤛᤣᤛᤣᤍᤧᤴᤏᤡᤴ ᤗᤰ ᤔᤧᤄᤥᤛᤢᤖᤥ. ᤁᤖ ᤀᤠᤸᤗᤥᤃ ᤀᤠᤏᤡᤃᤣ ᤏᤡᤱᤔᤡᤜᤠ᤹ᤖᤧ ᤂᤧᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤖᤥ॥

¹⁹ ᤀᤢᤏᤠᤜᤢᤖᤡᤀᤠᤱᤎᤥᤀᤣ ᤀᤠᤏᤡᤃᤧᤃ ᤂᤧᤏᤧ᤹ ᤁᤧᤔᤏᤠᤍᤡᤃᤧᤖᤥ. ᤁᤖ ᤂᤧᤏᤧ᤹ ᤀᤠᤏᤡᤃᤣ ᤛᤶᤎᤠᤱ ᤕᤢᤰ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤖᤥ. ᤀᤠᤏᤡᤃᤧᤃ ᤂᤧᤏᤧ᤹ ᤁᤧᤔᤡᤱᤅᤥᤗᤠᤶ ᤔᤧᤴᤀᤢ᤺ᤳᤋᤣ ᤘᤕᤡᤃᤧᤖᤥ॥