ᤕᤛᤤᤕᤠ 62 - LIFOTNT

¹ ᤛᤡᤕᤥᤏᤒᤠ ᤛᤠᤶᤕᤥᤏᤡᤔᤠᤴ ᤋᤠᤏᤠᤶᤔᤡᤴ ᤀᤥ᤺ᤵᤐᤠ ᤜᤧᤰᤁᤣ ᤔᤧᤴᤀᤥ᤺ᤳᤋᤣ ᤌᤠᤖᤡᤰ ᤕᤖᤢᤛᤗᤧ᤺ᤶᤒᤠ ᤛᤧᤴᤗᤵᤐᤡᤴ ᤔᤡᤈᤥᤳ ᤜᤧᤰᤁᤣ ᤜᤢᤖᤢᤖᤢ ᤋᤡ᤺ᤳᤋᤠᤱ ᤕᤢᤱᤗ ᤔᤧᤴᤏᤡᤀᤣ ᤌᤠᤖᤡᤰ ᤂᤧᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤛᤫᤠ᤺ᤳ ᤔᤧᤕᤢᤱᤀᤠᤸᤗᤥ. ᤂᤧᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤆᤰᤔᤧᤴᤗ᤹ᤀᤣ ᤋᤢᤘᤠ ᤆᤥᤃᤢᤱᤗᤥ॥

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤏᤧ᤹ ᤁᤧᤛᤠᤶᤕᤥᤏᤡᤔᤠᤴ ᤜᤧᤰᤁᤩᤠᤱ ᤁᤧᤖᤧᤰ ᤜᤠᤱᤜᤠ᤹ᤖᤧ ᤂᤧᤏᤧ᤹ ᤁᤧᤜᤠᤱᤘᤠ ᤁᤧᤔᤠᤱᤘᤠᤴ ᤔᤧᤏᤡᤛᤢᤖᤥ. ᤂᤧᤶᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤧᤘᤠ᤺ᤳᤋᤧᤒᤠ ᤁᤢᤛᤱ ᤔᤡᤱᤅᤡᤸᤗᤧ ᤂᤧᤏᤧ᤹ ᤁᤧᤀᤢ᤺ᤳᤗᤥ॥

³ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥ ᤔᤡᤔᤡᤍᤡᤱᤗᤧ ᤋᤡᤆ ᤏᤢ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤗᤳᤇᤠ ᤜᤠᤱ ᤋᤡᤘᤠᤈᤥ ᤁᤧᤒᤥᤱᤗᤥ॥

⁴ ᤂᤧᤏᤧ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ “ᤗᤠᤵᤔᤧᤓᤢᤛᤢᤔᤠ” ᤁᤧᤔᤧᤶᤔᤧᤳᤏᤧᤸᤗᤥ. ᤂᤧᤏᤧ᤹ ᤁᤧᤗᤠᤈᤣᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ “ᤆᤡᤈᤡ ᤂᤰᤂᤰ ᤁᤧᤒᤥᤱᤒᤠ” ᤔᤧᤶᤔᤧᤳᤋᤢᤸᤗᤥ॥ ᤁᤖ ᤂᤧᤏᤧ᤹ “ᤀᤠᤱᤃᤠ᤹ ᤂᤧᤴᤏᤢ ᤀᤠᤏᤡᤱᤘᤠ᤹ ᤋᤩᤧᤒᤠ” ᤁᤧᤶᤔᤧᤳᤗᤥ. ᤂᤧᤒᤩᤠᤱ ᤁᤧᤗᤠᤈᤣᤴ “ᤏᤡᤱᤘᤠ᤹ ᤋᤩᤧᤖ ᤔᤣ᤺ᤰᤂᤡᤶ ᤔᤧᤔᤧᤳᤋᤢᤒᤠ” ᤔᤧᤔᤧᤳᤋᤢᤖᤥ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ᤏᤢ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤧᤗᤠᤈᤣ᤺ᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤜᤡᤶᤛᤠᤒᤠ ᤁᤢᤀᤡᤛᤡᤰ ᤐᤥᤱᤗᤥ॥

⁵ ᤏᤠᤗᤡᤃᤧᤴ ᤌᤠᤱᤒᤧᤴᤏᤡᤸᤗᤧ ᤗᤳᤇᤠ ᤛᤡᤛᤠᤃᤧᤴ ᤔᤧᤴᤇᤢᤔᤠᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ᤖᤧ ᤂᤧᤏᤧ᤹ ᤔᤣ᤺ᤰᤂᤡᤶ ᤁᤧᤶᤔᤧᤳᤗᤥ॥ ᤔᤣ᤺ᤰᤂᤡᤶᤛᤠᤒᤧᤴ ᤁᤢᤔᤣ᤺ᤰᤂᤡᤶᤛᤠᤔᤧᤸᤗᤧ ᤁᤢᤗᤠᤃᤡ ᤐᤛ᤺ᤳᤛ᤺ᤳᤗᤥ. ᤂᤧᤶᤓᤗ᤹ᤖᤡᤰᤁᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤗᤠᤃᤡ ᤛ᤺ᤳᤗᤥ॥

⁶ ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤢᤱᤎᤠᤰᤜᤠ᤹ᤀᤥ ᤀᤡᤰᤁᤧᤃᤥᤒᤠᤜᤠ᤹ ᤕᤢᤰᤂᤢᤱᤛᤡᤱᤅᤠᤱ ᤔᤧᤕᤢᤱᤗᤥ॥ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤔᤏᤠᤛᤣ᥄ ᤂᤧᤱᤜᤠ᤹ᤃ ᤛᤧᤴᤍᤡᤰ ᤗᤧᤴᤍᤡᤰ ᤛᤫᤠ᤺ᤳ ᤔᤧᤴᤕᤢᤱᤏᤧᤸᤗᤥ. ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤁᤧᤓᤠᤰᤐᤠᤛᤣ. ᤂᤧᤏᤡ᤹ ᤔᤧᤏᤠ᤺ᤶᤔᤠᤛᤡᤴᤏᤧ᤹ᤀᤥ.

⁷ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤕᤠᤶᤔᤥ ᤆᤥᤃᤢᤀᤠᤱ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤂᤧᤴ ᤁᤢᤏᤠᤖᤠ ᤑᤥᤔᤠ ᤁᤧᤗᤠ᤹ᤒᤠ ᤕᤧᤰᤕᤰ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤏᤠ᤺ᤶᤛᤡᤱᤔᤠ ᤔᤧᤶᤓᤠ᤺ᤰᤋᤢᤸᤗᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤗᤳᤇᤠ ᤕᤶᤒᤠ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤢᤰᤛᤠᤶᤔᤡᤸᤗᤧ ᤂᤧᤴ ᤁᤧᤳᤋᤢᤖᤥ. “ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤁᤧᤈᤠᤜᤠ᤹ ᤁᤧᤏᤡᤱᤔᤡᤜᤠ᤹ ᤔᤧᤒᤡᤀᤠᤛᤡᤱᤅᤡᤸᤗᤥ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤧᤸᤗᤧᤰᤛᤣ᤹ ᤌᤡᤴ ᤔᤧᤱᤄᤥᤛᤢᤴᤗᤥ॥

⁹ ᤁᤖ ᤀᤠᤳᤋᤡᤴᤜᤠ᤹ᤖᤧ ᤕᤠ᤹ᤖᤡ᤺ᤶᤒᤠ ᤔᤧᤜᤣ᤹ᤖᤢᤀᤠᤱ ᤁᤢᤈᤠ ᤔᤧᤛᤢᤵᤛᤢ. ᤂᤧᤱᤜᤠ᤹ᤖᤧ ᤂᤧᤴ ᤁᤢᤈᤠᤴ ᤔᤧᤈᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖᤥ॥ ᤂᤧᤒᤩᤠᤱ ᤀᤠᤳᤋᤡᤴᤜᤠ᤹ᤖᤧ ᤆᤧᤸᤗᤧᤰᤛᤣ᤺ᤴ ᤔᤧᤓᤢᤰᤂᤢ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤣᤛᤣᤜᤡᤶ ᤗᤰᤂᤢᤶᤜᤠ᤹ᤀᤥ ᤂᤧᤴ ᤔᤧᤎᤢᤅᤢᤖᤥ॥

¹⁰ “ᤕᤖᤢᤛᤗᤧ᤺ᤶᤒᤠ ᤔᤏᤠᤛᤣ. ᤕᤧᤰᤕᤰᤁᤥᤗᤠᤶ ᤗ᤺ᤴᤍᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤡ᤹ ᤁᤧᤏᤢ᤺ᤱᤒᤠ ᤁᤧᤍᤠᤒᤠ ᤀᤠᤔᤏᤠᤜᤠ᤹ᤖᤧ ᤗᤠᤃᤡ ᤗᤳᤇᤠ ᤗᤠᤶ ᤆᤥᤃᤧᤶᤔᤧ᤹ᤀᤥ᥄ ᤗᤠᤶᤎᤡᤰ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤥ. ᤂᤧᤶᤔᤥᤒᤠ ᤗᤢᤱᤜᤠ᤹ ᤂᤧᤳᤋᤠᤶᤔᤧ᤹ᤀᤥ᥄ ᤗᤳᤇᤠ ᤔᤡᤰᤛᤣ᤺ᤴᤎᤡᤰ ᤗᤣ᤺ᤳᤋᤠᤶᤔᤧ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤖᤖᤥ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤀᤡᤱᤄᤱᤅᤡᤴ ᤁᤧᤖᤧᤰ ᤗᤠᤈᤣ᤹ᤀᤥ ᤜᤠᤰᤋᤢᤛᤡᤖᤥ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹ᤀᤥ. ᤂᤧᤏᤡ᤹ ᤛᤧᤴᤗᤵᤍᤠᤱᤒᤧᤴ ᤛᤧ᤺ᤵᤛᤧ ᤕᤢᤖ ᤐᤳᤗᤥ. ‘ᤀᤥᤔᤳᤋᤧᤶᤔᤧ᤹. ᤂᤢᤏᤧ᤹ ᤕᤢ᤺ᤸᤗᤧ ᤁᤢᤎᤢᤶᤄᤥᤴ ᤂᤢᤏᤧ᤹ᤏᤢ ᤛᤥᤖᤡᤰ ᤕᤢᤖᤢᤖ ᤐᤳᤗᤥ॥’”

¹² ᤂᤧᤏᤡ᤹ᤃ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤔᤏᤠᤛᤡᤖᤥ.” ᤜᤧᤰᤁᤩᤠᤱ “ᤕᤜᤘᤣ ᤍᤠᤱᤒᤧᤸᤗᤧ ᤌᤧ᤹ᤖᤢᤛᤡᤒᤠ ᤛᤢᤘᤠᤱ” ᤁᤧᤶᤔᤧᤳᤋᤡᤖᤥ॥ ᤕᤖᤢᤛᤗᤧ᤺ᤶᤔᤡᤴ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤕᤧᤰᤕᤰ” ᤜᤧᤰᤁᤩᤠᤱ “ᤗᤠᤵᤔᤧᤶᤓᤢᤛᤢᤶᤔᤠ ᤕᤧᤰᤕᤰ” ᤔᤧᤔᤧᤳᤋᤢᤖᤥ॥