ᤕᤛᤤᤕᤠ 61 - LIFOTNT

ᤆᤥ᤺ᤰᤕᤢᤶᤓᤥ ᤂᤥᤔᤠ ᤛᤢᤏᤠᤀᤡᤱ

¹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤧᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤛᤢᤏᤠᤀᤡᤱ ᤀᤡᤱᤓᤥᤔᤠᤛᤡᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤛᤣ᤺ᤴᤍᤠᤱᤅᤠᤱ ᤘᤠ᤹ᤖᤥ॥ ᤏᤡᤱᤘᤠ᤹ ᤁᤧᤍᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤘᤣ᤺ᤶᤔᤠᤖᤧ ᤗᤠᤃᤡ. ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤠᤜᤠ᤹ ᤗᤧᤵᤔᤠᤛᤡᤖᤧ ᤗᤠᤃᤡ ᤂᤧᤒᤩᤠᤱ ᤀᤡᤄᤣ᤺ᤱᤅᤥ ᤁᤧᤎᤠᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤀᤢᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤱᤃᤠ᤹ ᤐᤠᤱᤄᤠᤱᤅᤠᤱ ᤘᤠ᤹ᤖᤥ॥

² ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤛᤧ᤺ᤵᤔᤠᤛᤡ ᤜᤧᤰᤁᤩᤠᤱ ᤏᤡᤱᤔᤡᤜᤠ᤹ ᤜᤠᤖᤡ ᤆᤠ᤺ᤵᤔᤠᤛᤡ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤀᤢᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤀᤠᤱᤃᤠ᤹ ᤐᤠᤱᤄᤠᤱᤒᤠᤖᤥ॥ ᤔᤧᤖᤡᤱ ᤁᤧᤎᤰᤐᤠ ᤁᤧᤜᤠ᤺ᤵᤐᤠ ᤁᤧᤈᤡ᤺ᤱᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤠᤱᤄᤠᤱᤒᤠᤖᤥ॥

³ ᤛᤡᤕᤥᤏ ᤕᤧᤰᤕᤰᤁᤥ ᤔᤧᤖᤡᤱ ᤁᤧᤎᤰᤐᤠᤜᤠ᤹ ᤂᤠᤵᤐᤢ᤺ᤸᤗᤧ ᤁᤢᤗᤧᤰᤘᤠ ᤐᤄᤧᤶ ᤁᤧᤄᤧᤶᤒᤠ ᤋᤡᤆ ᤂᤢᤏᤧ᤹ ᤐᤡᤖᤢᤛᤡᤖᤥ. ᤔᤧᤖᤡᤱ ᤌᤰᤔᤠᤖᤧ ᤁᤢᤗᤧᤰᤘᤠ ᤛ᤺ᤵᤔᤠ ᤀᤣ᤺ᤵᤔᤠᤖᤧ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤛᤡᤖᤥ. ᤏᤡᤱᤛᤠᤱ ᤁᤧᤜᤥᤵᤐᤠᤜᤠ᤹ ᤏᤠᤖᤠᤑᤥᤔᤠ ᤛᤠᤶᤗᤥ ᤐᤡᤖᤢᤛᤡᤖᤥ. ᤂᤢᤴᤇᤡ᤹ ᤛᤠᤶᤕᤥᤏᤡᤔᤠᤀᤥ ᤂᤧᤱᤜᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤁᤢᤔᤡᤔᤡᤍᤡᤱᤗᤧ ᤗᤠᤃᤡ ᤗᤣ᤺ᤳᤋᤢᤛᤡᤀᤠᤱ ᤘᤕᤧᤒᤠ ᤕᤶᤒᤠ ᤕᤜᤡᤒᤠ ᤛᤡᤱᤒᤢᤱ ᤁᤢᤀᤡᤛᤡᤰ ᤔᤧᤒᤥᤱᤗᤥ॥

⁴ ᤂᤧᤱᤜᤠ᤹ᤖᤧ ᤋᤃᤡᤒᤠ ᤐᤠᤱᤕᤰᤜᤠ᤹ ᤕᤠᤶᤔᤥ ᤔᤧᤛᤧᤳᤋᤢ ᤔᤧᤈᤥᤃᤢᤖᤥ. ᤁᤧᤕᤶᤒᤠ ᤁᤧᤗᤢ᤺ᤶᤒᤠ ᤋᤧᤴᤜᤠ᤹ ᤕᤠᤶᤔᤥ ᤔᤧᤈᤥᤃᤢᤖᤥ. ᤕᤖᤡᤰ ᤕᤧᤶᤔᤠᤱᤎᤥ ᤁᤧᤗᤢ᤺ᤶᤒᤠᤀᤠᤱ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤂᤧᤱᤜᤠ᤹ᤖᤧ ᤕᤠᤶᤔᤥ ᤔᤧᤛᤧᤳᤋᤢ ᤔᤧᤈᤥᤃᤢᤖᤥ॥

⁵ ᤀᤠᤔᤏᤠᤛᤣ. ᤘᤣ᤹ ᤗᤠᤈᤣ᤹ᤗᤠᤶ ᤕᤢᤱᤛᤧ ᤁᤧᤍᤠᤜᤠ᤹ᤖᤧ ᤂᤡᤏᤡ᤹ ᤁᤧᤔᤧᤸᤗᤢᤰ ᤁᤧᤔᤧ᤺ᤴᤍᤠᤜᤠ᤹ ᤆᤠᤔᤧᤖᤠᤶᤛᤢᤛᤡᤖᤥ. ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤀᤡᤰᤋᤠᤵ ᤜᤧᤰᤁᤩᤠᤱ ᤁᤧᤈᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥

⁶ ᤜᤧᤰᤁᤩᤠᤱ ᤂᤡᤏᤡ᤹ ᤕᤜᤘᤣ ᤍᤠᤱᤒᤠᤀᤥ ᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤶᤔᤧᤳᤋᤡᤖᤥ. ᤂᤡᤏᤡ᤹ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤑᤠ᤹ᤀᤠᤱ ᤔᤡᤱ ᤁᤧᤶᤘᤠ᤺ᤳᤋᤡᤖᤥ॥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤴ ᤂᤡᤏᤡ᤹ ᤁᤧᤈᤠᤶᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤀᤥᤀᤣ ᤂᤡᤏᤡ᤹ ᤏᤧᤒᤥ ᤐᤥᤖᤥ॥

⁷ ᤂᤡᤏᤡ᤹ ᤏᤢ᤺ᤶᤔᤠᤛᤡᤔᤠ ᤏᤢ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤜᤠ᤹ ᤀᤠᤸᤗ ᤏᤢᤒᤧᤖᤥ. ᤂᤡᤏᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤔᤡᤱᤛᤥ ᤀᤡᤱᤎᤠᤱ ᤏᤢ ᤕᤠᤱᤛᤠᤁᤢᤴᤎᤣᤴ ᤏᤧᤳᤇᤡᤗᤧᤱ ᤕᤠᤖᤡᤰ ᤕᤖᤡᤰ ᤐᤥᤱᤗᤥ ᤂᤧᤶᤒᤩᤠᤱ ᤂᤡᤏᤡ᤹ ᤛ᤺ᤵᤔᤠ ᤀᤣ᤺ᤵᤔᤧᤴ ᤀᤠᤓᤧᤸᤗᤧᤀᤠᤱ ᤔᤧᤏᤢᤵᤏᤧᤸᤗᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤀᤠᤛᤡᤖᤠ᤹ ᤌᤠᤱᤗᤥ. ᤔᤏᤠ ᤋᤢᤰᤂᤣ ᤆᤠ᤺ᤵᤔᤠ ᤏᤢ ᤁᤢ᤹ᤀᤡᤓᤧᤶᤔᤧᤴ ᤀᤠᤱᤃᤠ᤹ ᤆᤡ᤺ᤳᤋᤢᤱᤗᤥ॥ ᤏᤛᤠ᤺ᤴᤛᤠᤒᤠ ᤐᤥᤱᤅᤠᤀᤠᤱ ᤀᤠᤔᤏᤠᤜᤠ᤹ ᤌᤢᤶᤄᤥ ᤐᤡᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤗᤳᤇᤠ ᤏᤢᤵᤔᤧᤴᤍᤡᤱ ᤔᤠᤱᤜᤢᤵ ᤆᤥᤃᤢᤱᤗᤥ॥

⁹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ᤖᤧ ᤔᤡᤱ ᤋᤡ᤺ᤳᤗᤥ॥ ᤂᤧᤱᤜᤠ᤹ ᤀᤠᤱᤃᤠ᤹ᤀᤣ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤁᤧᤏᤡᤒᤠ ᤁᤧᤖᤧᤰᤗᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥”

¹⁰ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤥ ᤛᤠ᤹ᤖᤡᤰ ᤛ᤺ᤳᤋᤠᤖᤥ. ᤀᤠᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤕᤠᤶᤛᤠᤶᤔᤡᤴ ᤛᤠ᤹ᤖᤡᤰ ᤛ᤺ᤳᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤜᤧᤰᤁᤣ ᤔᤣ᤺ᤰᤂᤡᤶᤛᤠᤒᤧᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤆᤥ᤺ᤰᤋᤢᤒᤠ ᤜᤧᤰᤁᤣ. ᤜᤧᤰᤁᤩᤠᤱ ᤔᤣ᤺ᤰᤂᤡᤶᤛᤠᤔᤧᤴ ᤀᤠᤒᤠᤅᤣ ᤛᤠᤶᤔᤩᤠᤱ ᤕᤢᤵᤐᤠ ᤘᤠ᤺ᤳᤇᤡᤱᤒᤠ ᤜᤧᤰᤁᤣ ᤂᤢᤏᤧ᤹ ᤛᤧᤴᤗᤵᤗᤧᤴ ᤆᤠᤱ ᤆᤠᤰᤋᤠᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤛᤠᤶᤕᤥᤏᤡᤔᤠ ᤆᤠᤱᤅᤡᤸᤗᤧ ᤋᤧᤵᤋᤠᤱᤅᤠᤱ ᤘᤠ᤹ᤖᤥ॥

¹¹ ᤌᤣᤀᤠᤱᤓᤧᤸᤗᤧ ᤂᤠᤶᤒᤣ᤺ᤰᤔᤠᤸᤗᤧ ᤛᤡᤱᤛᤣ᤹ ᤗᤡᤱᤗ ᤕᤠ᤺ᤴᤍᤢᤖᤥ. ᤜᤧᤰᤁᤩᤠᤱ ᤛᤡᤱᤛᤣ᤹ ᤀᤡᤰᤁᤡᤸᤗᤧ ᤕᤠ᤹ᤖᤡ᤺ᤶᤒᤠ ᤗᤡᤱᤗ ᤆᤥᤃᤢᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤒᤠ ᤏᤢ ᤏᤠᤖᤠᤑᤥᤔᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤖᤥ॥