ᤕᤛᤤᤕᤠ 60 - LIFOTNT

ᤛᤡᤕᤥᤴᤗᤧ ᤁᤢᤔᤡᤔᤡᤍᤡᤱ

¹ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤔᤏᤠᤛᤣ. ᤐᤥᤃᤧᤶᤔᤧ᤹ᤀᤠᤱ ᤏᤠᤶ ᤁᤢᤀᤡᤛᤡᤰ ᤀᤥ᤺ᤳᤋᤠᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤡᤏᤡ᤹ ᤛᤶᤎᤠᤱ ᤀᤥ᤺ᤳᤋᤧᤀᤠᤱ ᤐᤳᤗᤥ᥄

² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤘᤣ᤹ᤛᤔᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤠᤔᤠᤰᤔᤧᤸᤗᤧ ᤛᤢ᤺ᤵᤋᤢᤛᤡᤖᤥ. ᤁᤖ ᤂᤡᤏᤡ᤹ ᤛᤶᤍᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤥ᤺ᤳᤋᤡᤴ ᤀᤥ᤺ᤳᤗᤥ. ᤂᤢᤏᤧ᤹ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤂᤧᤏᤧ᤹ᤏᤢ ᤘᤠ᤹ᤖᤥ॥

³ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ ᤁᤧᤀᤥ᤺ᤳᤋᤡᤀᤥ ᤔᤧᤍᤠᤖᤥ ᤜᤧᤰᤁᤩᤠᤱ ᤜᤠᤱᤜᤠ᤹ ᤂᤧᤏᤧ᤹ ᤁᤢᤛᤱ ᤁᤧᤕᤧᤴᤏᤡᤸᤗᤧ ᤑᤡᤷᤗᤡ ᤁᤧᤗᤧᤰᤐᤠ ᤀᤥ᤺ᤳᤋᤡᤀᤥ ᤔᤧᤍᤠᤖᤥ॥

⁴ ᤁᤧᤔᤡᤰᤁᤧᤴ ᤜᤴᤍᤧ᤹ᤀᤠᤱ ᤁᤧᤖᤧᤰ ᤐᤡᤛᤠᤱ ᤀᤥᤔᤧᤳᤋᤧ᤹ᤀᤥ. ᤂᤧᤱᤜᤠ᤹ ᤁᤧᤖᤧᤰ ᤔᤧᤓᤢᤱᤛᤡᤱᤅᤠᤱ ᤂᤧᤏᤧ᤹ᤀᤥ ᤔᤧᤍᤠᤖᤥ॥ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤔᤠ᤺ᤱᤄᤠᤗᤠᤶ ᤔᤧᤍᤠᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤀᤅᤧ᤺ᤰᤘᤠ ᤁᤢᤛᤡᤱ ᤜᤢᤰᤁᤥ ᤔᤧᤒᤰᤂᤢ ᤔᤧᤍᤠᤖᤢᤛᤡᤖᤥ॥

⁵ ᤂᤧᤒᤩᤠᤱ ᤂᤧᤏᤧ᤹ ᤁᤴ ᤁᤧᤏᤡᤛᤢᤀᤠᤱ ᤁᤧᤀᤥ᤺ᤵᤐᤠ ᤁᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛ᤺ᤳᤋᤠᤱ ᤁᤧᤏᤡᤱᤘᤠ᤹ ᤐᤍᤠᤍᤠᤖᤥ॥ ᤘᤖ᤺ᤱᤅᤥᤒᤠ ᤕᤠᤱᤛᤠᤁᤢᤴᤎᤣᤴ ᤂᤧᤏᤧ᤹ ᤗᤧᤵᤛᤠᤱ ᤔᤧᤍᤠᤖᤢᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤏᤧ᤹ᤀᤥ ᤔᤧᤍᤠᤖᤢᤖᤥ॥

⁶ ᤀᤢᤔᤣ ᤗᤢᤵᤜᤠ᤹ᤖᤧ. ᤔᤡᤎᤩᤠᤏ ᤏᤢ ᤀᤣᤵᤐᤠ ᤗᤠᤈᤣ᤹ᤒᤠ ᤁᤰ ᤁᤧᤃᤢᤒᤠ ᤀᤢᤔᤣᤜᤠ᤹ᤖᤧ ᤂᤧᤏᤧ᤹ ᤁᤧᤗᤠᤈᤣᤴ ᤔᤧᤎᤡᤶᤛᤢᤖᤥ॥ ᤛᤣᤒᤠ ᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖ ᤛᤠᤶᤔᤩᤠᤱ ᤏᤢ ᤛᤠᤱᤛᤡᤱ ᤛᤢᤰᤐᤠ ᤔᤧᤓᤧᤳᤋᤢᤀᤠᤱ ᤔᤧᤓᤧᤴᤗᤥ॥

⁷ ᤁᤣᤍᤠᤖᤒᤠ ᤁᤧᤖᤧᤰ ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵᤜᤠ᤹ ᤂᤧᤏᤧ᤹ᤀᤥ ᤔᤧᤈᤢᤶᤗᤥ. ᤏᤠᤒᤠᤕᤥᤋᤒᤠ ᤁᤧᤖᤧᤰ ᤔᤧᤸᤗᤢᤰᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳᤗᤥ. ᤂᤧᤱᤜᤠ᤹ ᤛᤡᤍᤢᤱᤈᤓᤠ ᤜᤧᤰᤁᤣ ᤂᤢᤏᤧ᤹ᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤋᤠ᤺ᤰᤔᤠ ᤕᤠᤖᤢᤛᤡᤒᤠ ᤔᤧᤒᤥᤱᤗᤥ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤜᤡᤶᤔᤧᤴ ᤀᤠᤸᤗᤛᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥᤃᤢᤖᤥ॥

⁸ ᤂᤠ᤹ᤔᤡᤳ ᤁᤢᤛᤡᤱ ᤁᤧᤒᤧᤒᤠ ᤁᤧᤍᤠᤒᤠ ᤜᤧᤰᤁᤩᤠᤱ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤵᤐᤥ ᤁᤧᤒᤧᤒᤠ ᤁᤴ ᤜᤠ᤺ᤵᤐᤣ᥅

⁹ ᤁᤢᤳᤆᤠ᤹ᤀᤣ ᤘᤠᤃᤵᤂᤠᤶᤔᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤏᤧ᤹ ᤀᤥᤔᤧᤔᤧᤳᤋᤢᤖᤥ. ᤋᤃᤡ ᤗᤧᤱᤜᤱ ᤁᤧᤈᤥ᤺ᤰᤐᤠ ᤕᤶᤒᤠ ᤘᤠᤗᤠᤎᤠᤜᤠ᤹ ᤔᤧᤕᤧᤵᤗᤥ॥ ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤃᤡ. ᤀᤡᤃᤪ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤛᤥ ᤀᤡᤱᤎᤠᤱᤗᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤴᤇᤢᤔᤠᤜᤠ᤹ ᤂᤢᤴᤇᤡ᤹ ᤛᤠᤶᤔᤩᤠᤱ ᤕᤢᤵᤐᤠᤏᤢ ᤛᤥᤖᤡᤰ ᤔᤠ᤺ᤱᤄᤠ ᤔᤠ᤺ᤱᤄᤠᤗᤠᤶ ᤔᤧᤍᤠᤖᤢᤛᤡᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤠᤱᤘᤠ ᤁᤢᤔᤠᤱᤘᤠᤖᤧ ᤁᤧᤃᤠᤵᤋᤧᤀᤠᤱ ᤘᤠ᤹ᤖᤥ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤔᤧᤳᤋᤢᤖᤥ. “ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤁᤧᤗᤢᤱᤎᤠᤰᤁᤡᤴ ᤕᤠᤶᤔᤥ ᤔᤧᤛᤧᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳᤗᤥ॥ ᤀᤠᤱᤃᤠ᤹ ᤀᤠᤛᤠᤰᤁᤧᤴ ᤐᤥᤃᤧᤸᤗᤧ ᤂᤧᤏᤧ᤹ ᤜᤡᤵᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤔᤥ ᤂᤧᤏᤧ᤹ ᤗᤢᤱᤔᤠ᤹ ᤋᤢᤰᤏᤧᤖᤥ॥

¹¹ ᤂᤧᤏᤧ᤹ ᤁᤧᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤀᤠᤓᤧᤸᤗᤧᤛᤠᤱ ᤜᤱᤒᤧᤳ ᤐᤳᤗᤥ. ᤂᤧᤏᤧ᤹ᤀᤥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤋᤠ᤺ᤵᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤜᤠᤖᤡᤃᤧᤍᤠᤒᤠ ᤜᤠᤱᤜᤠ᤹ ᤋᤠ᤺ᤵᤔᤠᤛᤡᤖᤧ ᤗᤠᤃᤡ ᤂᤧᤴ ᤗᤠᤶᤎᤣ᤺ᤳᤜᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤓᤧᤸᤗᤧᤀᤠᤱ ᤔᤧᤴᤇᤢᤒᤢᤴᤗᤥ॥

¹² ᤁᤖ ᤂᤧᤏᤧ᤹ ᤀᤡᤱᤎᤠᤱ ᤔᤧᤶᤒᤡᤔᤏᤠᤒᤠ ᤛᤢᤘᤠᤱᤜᤠ᤹ ᤗᤳᤇᤠ ᤔᤣ᤺ᤴᤏᤣ ᤔᤧᤔᤧᤰᤗᤥ. ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤥ॥

¹³ “ᤗᤣᤒᤏᤠᤏ ᤗᤠᤈᤣ᤹ᤒᤠ ᤜᤠᤱᤘᤠ ᤔᤠᤱᤘᤠᤴ ᤂᤧᤏᤧ᤹ᤀᤥ ᤋᤠᤖᤥ— ᤀᤠ᤺ᤱᤜᤠ᤹. ᤛᤢᤰᤐᤠ ᤛᤡᤱᤜᤠ᤹ ᤏᤢ ᤛᤠᤶᤔᤠᤱᤛᤡᤱᤜᤠ᤹ ᤀᤠᤱᤃᤠ᤹ ᤀᤠᤛᤣᤛᤣ ᤜᤡᤶᤔᤡᤴ ᤏᤢᤒᤠ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤍᤠᤖᤢᤖᤥ. ᤜᤧᤰᤁᤩᤠᤱ ᤛᤧᤘᤠ ᤔᤧᤈᤥ᤺ᤰᤁᤠᤒᤠ ᤛᤣᤛᤣ ᤜᤡᤶᤔᤡᤴ ᤔᤡᤔᤡᤍᤡᤱᤒᤠ ᤆᤥᤃᤢᤱᤗᤥ॥

¹⁴ ᤂᤧᤏᤧ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤔᤧᤏ᤺ᤶᤛᤡᤱᤅᤠᤱ ᤂᤧᤏᤧ᤹ᤀᤥ ᤔᤧᤍᤠᤖᤥ. ᤂᤧᤏᤧ᤹ ᤁᤧᤈᤡ᤺ᤵᤐᤠᤜᤠ᤹ ᤁᤧᤖᤧᤰ ᤁᤧᤗᤠᤱᤅᤥ ᤀ᤺ᤰᤂᤢᤶ ᤔᤧᤓᤴᤇᤡᤱᤗᤥ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤰᤕᤰ. ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰ ᤛᤡᤕᤥᤏ ᤁᤧᤶᤔᤧᤳᤗᤥ॥

¹⁵ “ᤀᤠᤸᤗᤀᤠᤱᤎᤥ ᤜᤠ᤺ᤳᤗᤧᤀᤠᤱ ᤁᤢᤏᤠᤔᤧᤴᤇᤠ᤹ ᤁᤧᤔᤧᤶᤔᤧᤳᤏᤧᤸᤗᤥ. ᤂᤧᤏᤧ᤹ ᤀᤠᤳᤋᤡᤸᤗᤧᤀᤠᤱ ᤁᤧᤸᤗᤧᤳᤏᤧᤴᤗᤥ— ᤂᤧᤏᤧ᤹ ᤁᤧᤶᤗᤧᤖᤧᤒᤠ ᤏᤢ ᤆᤡᤈᤡ ᤂᤰᤂᤰ ᤁᤧᤒᤥᤱᤒᤠ ᤕᤧᤰᤕᤰ ᤁᤧᤶᤒᤥᤱᤏᤧᤸᤗᤥ॥ ᤂᤧᤏᤧ᤹ ᤕᤶᤒᤠ ᤏᤢ ᤏᤢᤒᤠ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤛ᤺ᤳᤛ᤺ᤵᤐᤠᤍᤧᤴ ᤆᤥ᤺ᤰᤏᤧᤖᤥ॥

¹⁶ ᤜᤠᤱᤔᤠᤸᤗᤧ ᤁᤢᤏᤢ ᤁᤧᤎᤢᤱᤒᤠ ᤀᤅᤧ᤺ᤰᤘᤠ ᤜᤧᤰᤁᤣᤀᤣ ᤔᤢᤰᤛᤠᤶᤛᤠᤒᤠ ᤜᤠᤱᤜᤠ᤹ ᤏᤢ ᤔᤢᤰᤁᤧᤃᤢᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤏᤧ᤹ ᤆᤠᤜᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤀᤥ ᤁᤧᤏᤡᤱᤘᤠ᤹ ᤁᤧᤶᤍᤠ ᤁᤧᤶᤒᤡᤖᤥ॥ ᤀᤠᤱᤃᤠ᤹. ᤕᤜᤘᤣ ᤍᤠᤱᤒᤠ. ᤁᤧᤛᤧᤴᤗᤵᤍᤠᤱᤒᤠ. ᤂᤧᤒᤩᤠᤱ ᤂᤧᤏᤧ᤹ ᤁᤧᤎᤧ᤹ᤒᤠ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤢᤰᤛᤠᤶᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱᤃᤧᤏᤡ᤺ᤳᤋᤢᤖᤥ॥

¹⁷ “ᤀᤠᤱᤃᤠ᤹ ᤁᤠᤛᤠ᤺ᤸᤗᤧ ᤁᤢᤗᤧᤰᤘᤠ ᤛᤠᤶᤔᤩᤠᤱ. ᤑᤧᤴᤈᤣᤸᤗᤧ ᤁᤢᤗᤧᤰᤘᤠ ᤕᤢᤵᤐᤠ. ᤛᤡᤱᤅᤡᤸᤗᤧ ᤁᤢᤗᤧᤰᤘᤠ ᤁᤠᤛᤠ. ᤜᤧᤰᤁᤩᤠᤱ ᤗᤢᤱᤅᤡᤸᤗᤧ ᤁᤢᤗᤧᤰᤘᤠ ᤑᤧᤴᤈᤣ᤹ ᤋᤠᤖᤢᤱ ᤐᤡᤏᤡᤱᤗᤥ॥ ᤂᤧᤏᤧ᤹ ᤁᤧᤗᤠᤶᤗᤥᤒᤠᤸᤗᤥ ᤛᤏᤠᤖᤢᤱ ᤋᤠᤖᤢᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤠᤱᤕᤢᤰᤐᤠᤀᤥ ᤛᤠᤶᤕᤥᤏᤡᤔᤠᤴ ᤋᤠᤖᤢᤱᤗᤥ॥

¹⁸ ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤠᤷᤔᤧᤴᤍᤰ ᤆᤥ᤺ᤰᤔᤠ ᤐᤠ᤺ᤴᤜᤠ᤹ ᤂᤧᤶᤔᤧᤍᤧᤳᤏᤧᤴᤗᤥ. ᤂᤧᤏᤧ᤹ ᤁᤧᤀᤡ᤺ᤴᤍᤥᤀᤥ ᤋᤠᤵᤑᤧ᤺ᤶᤒᤠ ᤏᤢ ᤔᤧᤰᤔᤠᤛᤡᤔᤠ ᤂᤧᤶᤔᤧᤍᤧᤳᤏᤧᤸᤗᤥ॥ ᤗᤢᤱᤎᤠᤰᤁᤡᤸᤗᤧ ᤕᤧᤰᤕᤰᤁᤡᤴ ᤛᤧ᤺ᤵᤋᤢᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤏᤧ᤹ ᤋᤠᤱᤛᤧ᤺ᤵᤏᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤋᤠᤱᤛᤧ᤺ᤵᤏᤧᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤠᤖᤠ ᤁᤧᤓᤥᤛᤢᤖᤥ॥

¹⁹ “ᤀᤠᤸᤗᤀᤠᤱᤎᤥ ᤗᤧᤴᤍᤡᤰ ᤏᤠᤶᤔᤡᤸᤗᤧ ᤂᤧᤏᤧ᤹ ᤌᤥ᤹ᤔᤠ ᤔᤧᤒᤥᤱᤏᤧᤴᤗᤥ. ᤜᤧᤰᤁᤩᤠᤱ ᤗᤧᤴᤍᤡᤰ ᤗᤠᤒᤧᤸᤗᤧ ᤂᤧᤏᤧ᤹ ᤌᤥ᤹ᤔᤠ ᤔᤧᤒᤥᤱᤏᤧᤸᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤛᤍᤠᤍᤡᤱᤒᤠ ᤂᤧᤏᤧ᤹ ᤁᤧᤗᤠᤃᤡ ᤀᤥ᤺ᤳᤋᤡ ᤐᤥᤱᤅᤠᤖᤥ. ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤸᤗᤧ ᤁᤢᤀᤥ᤺ᤳᤋᤡ᤺ᤸᤗᤧ ᤁᤧᤎᤥ᤹ᤖᤥ॥

²⁰ ᤂᤧᤏᤧ᤹ ᤁᤧᤏᤠᤶᤔᤡᤴ ᤀᤠᤑᤠᤸᤗᤧᤀᤠᤱ ᤔᤧᤎᤠᤏᤧᤴᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤒᤧᤴᤏᤠᤱ ᤆᤢ᤺ᤰᤐᤠ ᤔᤧᤒᤥᤱᤏᤧᤴᤗᤥ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤍᤠᤍᤡᤱᤒᤠ ᤁᤧᤀᤥ᤺ᤳᤋᤡ ᤐᤥᤱᤅᤠᤖᤥ. ᤁᤧᤔᤧᤖᤡᤱ ᤌᤰᤔᤠ ᤕᤧᤴᤏᤡᤴ ᤏᤢᤵᤗᤥ॥

²¹ ᤂᤧᤒᤩᤠᤱ ᤁᤧᤖᤧᤰ ᤁᤧᤔᤏᤠᤜᤠ᤹ ᤛᤠᤶᤕᤥᤒᤠ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤛᤍᤠᤍᤡᤱᤗᤧ ᤗᤠᤃᤡ ᤔᤧᤔᤧᤳᤇᤡᤱᤗᤥ॥ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠᤖᤧ ᤗᤠᤃᤡ. ᤀᤠᤱᤃᤠ᤹ ᤂᤧᤱᤜᤠ᤹ ᤛᤡᤱᤒᤢᤱ ᤁᤢᤀᤡᤛᤡᤰ ᤂᤧᤵᤔᤥ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤗᤣ᤺ᤳᤋᤢᤱᤛᤡᤱᤒᤠᤖᤥ॥

²² ᤂᤧᤏᤡ᤹ ᤗᤢᤶᤔᤥ ᤛᤢ᤺ᤸᤗᤡᤰ ᤁᤧᤘᤠ᤹ᤒᤠᤜᤠ᤹ ᤜᤧᤴᤇᤡᤱ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤐᤠᤴ ᤔᤢᤰᤛᤠᤶᤛᤠᤒᤠ ᤛᤢᤘᤠᤱ ᤐᤥᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠᤖᤥ. ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤁᤴ ᤐᤠ᤺ᤴᤜᤠ᤹ ᤜᤠᤖᤠᤀᤣ ᤆᤥᤃᤢᤱᤗᤥ॥”