ᤕᤛᤤᤕᤠ 6 - LIFOTNT

ᤕᤛᤤᤕᤠ᤺ᤸᤗᤧ ᤏᤡᤛᤢᤒᤠ ᤛᤢᤑᤥ ᤏᤢ ᤂᤥᤛᤢᤒᤠ ᤕᤢᤰ

¹ ᤀᤢᤈ᤻ᤈᤡᤕᤠᤜ ᤜᤠᤱᤅᤡᤴ ᤔᤠᤛᤡᤱᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤠᤴ ᤁᤣ᤺ᤶᤒᤠ ᤏᤢ ᤆᤠᤱᤈᤠᤱᤒᤠ ᤜᤠᤱᤕᤢᤰᤏᤠᤀᤥ ᤕᤢᤰ ᤆᤥ᤺ᤰᤏᤢ ᤕᤢᤅᤧᤒᤠ ᤀᤠᤱᤃᤠ᤹ ᤏᤡᤛᤢᤱ॥ ᤂᤢᤏᤧ᤹ ᤋᤧᤖᤧ ᤁᤧᤒᤵᤐᤠ ᤁᤢᤈᤠᤱ ᤋᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤸᤗᤧ ᤔᤠᤱᤜᤡᤶᤔᤧᤴ ᤛᤢ᤺ᤵᤋᤢᤀᤠᤱ ᤐᤳᤇᤧ॥

² ᤂᤢᤏᤧ᤹ ᤕᤢᤅᤧᤒᤠᤀᤥᤏᤢ ᤌᤠ᤺ᤱ ᤐᤡᤛᤠᤱ ᤔᤡ ᤜᤧᤰᤁᤣ ᤁᤧᤀᤥ᤺ᤵᤐᤠ ᤋᤢᤰᤛᤡ ᤋᤢᤰᤛᤡ ᤂᤢᤴᤇᤡ᤹ ᤗᤠᤵ ᤁᤧᤒᤵᤐᤠ ᤛᤖᤠᤑᤜᤠ᤹ ᤔᤧᤕᤧᤒᤧ॥ ᤏᤧᤳᤇᤡ ᤂᤢᤴᤇᤡ᤹ ᤗᤠᤵᤐᤧᤸᤗᤧ ᤂᤢᤴᤇᤡ᤹ ᤀᤠᤒᤠᤅᤣ ᤏᤠᤖᤠᤴ ᤔᤧᤍᤧᤵᤋᤢᤀᤠᤱ ᤐᤳᤇᤧ. ᤏᤧᤳᤇᤡ ᤂᤢᤴᤇᤡ᤹ ᤗᤠᤵᤐᤧᤸᤗᤧ ᤂᤢᤴᤇᤡ᤹ ᤀᤒᤠᤅᤣ ᤗᤠᤱᤜᤠ᤹ ᤔᤧᤍᤧᤵᤋᤢᤀᤠᤱ ᤐᤳᤇᤧ᤹ ᤜᤧᤰᤁᤩᤠᤱ ᤏᤧᤳᤇᤡ ᤗᤠᤵᤗᤧ ᤂᤧᤱᤜᤠ᤹ ᤔᤧᤒᤧᤖᤧᤖ ᤔᤧᤒᤳᤇᤧ॥

³ ᤜᤧᤰᤁᤩᤠᤱ ᤌᤡᤰᤗᤧ ᤘᤣ᤹ᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤂᤧᤱᤜᤠ᤹ ᤛᤠᤶᤔᤧᤗᤥᤖᤧᤖᤥ— “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤛᤣᤛᤣ. ᤛᤣᤛᤣ. ᤛᤣᤛᤣ ᤆᤥᤰᤗᤥ. ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤂᤢᤏᤧ᤹ ᤁᤢᤔᤡᤔᤡᤍᤡᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”

⁴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤔᤡᤍᤡᤱᤃᤧᤴ ᤛᤠᤶᤔᤧᤗᤥᤖᤧᤒᤠ ᤀᤡᤰᤗᤠ᤺ᤸᤗᤧ ᤆᤥᤃᤢᤸᤗᤧ ᤔᤠᤱᤜᤡᤶᤔᤥᤒᤠ ᤗᤠᤶᤎᤣ᤺ᤳᤜᤠ᤹ ᤏᤢ ᤐᤠᤱᤕᤰᤜᤠ᤹ ᤁᤧᤖᤧᤰ ᤕᤰᤂᤧ. ᤜᤧᤰᤁᤩᤠᤱ ᤔᤠᤱᤜᤡᤶᤔᤧᤴ ᤁᤧᤖᤧᤰ ᤔᤡ᤺ᤰᤂᤢᤸᤗᤧ ᤛᤎᤧᤰ ᤋᤡᤶᤛᤧ॥

⁵ ᤀᤠᤱᤃᤠ᤹ ᤐᤠ᤺ᤳᤋᤢᤱ. “ᤀᤠᤱᤃᤠ᤹ᤃ ᤆᤡ᤺ᤳᤋᤠᤱᤗᤰ ᤛᤩᤠᤱᤗᤥ᥄ ᤜᤧᤰᤁᤩᤠᤱ ᤀᤠᤸᤗ ᤀᤠᤱᤃᤠ᤹ᤃ ᤔᤧᤃᤠᤱᤒᤠ ᤐᤥ᤺ᤰᤂᤧ ᤗ᤹ᤖᤡᤰ ᤀ᤺ᤰᤋᤠᤱ᥄ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤃ ᤀᤠᤶᤒᤪᤠ᤺ᤸᤗᤧ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱ. ᤂᤧᤒᤩᤠᤱ ᤀᤠᤛᤢᤳᤌᤥ ᤐᤠᤴ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤘᤠ᤹ᤀᤠ. ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤜᤠᤱᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤜᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥”

⁶ ᤂᤧᤒᤩᤠᤱ ᤂᤧᤴ ᤔᤡ ᤜᤧᤰᤁᤣ ᤁᤧᤀᤥ᤺ᤵᤐᤠ ᤛᤖᤠᤑᤜᤠ᤹ᤀᤥ ᤌᤡᤰᤗᤧ ᤗᤠᤓᤡ᤺ᤳ ᤌᤡᤰ ᤕᤠᤱᤛᤡᤱᤅᤠᤱ ᤁᤧᤍᤡ᤺ᤵᤐᤠ ᤔᤡᤄᤠᤱᤃᤪᤥ᤺ᤰᤁᤧᤴ ᤐᤰᤂᤢ ᤜᤧᤰᤁᤩᤠᤱ ᤀᤠᤱᤃᤠ᤹ ᤘᤕᤠᤱᤒᤠᤍᤧᤴᤏᤥ ᤐᤧᤖᤧᤓᤧᤖᤧ॥

⁷ ᤂᤧᤸᤗᤧ ᤂᤧᤴ ᤔᤡᤄᤠᤱᤃᤪᤥ᤺ᤰᤁᤧᤸᤗᤧ ᤀᤠᤶᤒᤪᤠᤴ ᤆᤡᤳᤇᤢ ᤛᤢᤛᤢᤀᤠᤱ ᤔᤧᤳᤋᤠᤱ. “ᤀᤥᤔᤧᤳᤋᤧ᤹. ᤁᤸᤗᤧ ᤁᤧᤶᤒᤪᤠ᤺ᤴ ᤛᤢᤛᤢᤀᤠᤱ ᤘᤠ᤹॥ ᤀᤠᤸᤗ ᤁᤧᤓᤧᤴ ᤕᤠ᤺ᤶᤒᤰᤁᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤗᤠ᤺ᤳᤗᤠ᤺ᤳ ᤂᤧᤳᤋᤢᤍᤣᤛᤢ ᤁᤧᤒᤡᤖᤧ ᤜᤧᤰᤁᤩᤠᤱ ᤁᤧᤗᤠᤕᤥᤜᤠ᤹ ᤔᤕᤧᤀᤠᤱ ᤗᤧᤵᤔᤡ ᤐᤥ᤺ᤰᤂᤧ॥”

⁸ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤴ ᤀᤰᤂᤣ ᤗ᤹ᤖᤧᤒᤠ ᤀᤠᤱᤃᤠ᤹ ᤂᤧᤵᤛᤢᤱ. “ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤀᤡᤱᤄᤱ ᤁᤧᤛᤠᤒᤠ ᤜᤠᤳ ᤐᤠᤱᤄᤢᤱᤒᤣ᥄ ᤀᤠᤏᤡ᤹ ᤗᤠᤃᤡ ᤜᤠᤳ ᤐᤣ᤺ᤰᤐᤠᤒᤣ᥅” ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱ. “ᤀᤠᤍᤠᤱᤒᤣ. ᤀᤠᤱᤃᤠ᤹ ᤐᤣ᤺ᤰᤁᤠ᤹. ᤀᤠᤱᤃᤠ᤹ ᤐᤠᤱᤄᤠᤱᤅᤧ᤹ᤀᤥ॥”

⁹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱᤗᤥ. “ᤀᤥ᤺ᤰ. ᤐᤥᤃᤧᤀᤠᤱ ᤁᤴ ᤐᤠ᤺ᤴᤏᤡᤴ ᤀᤠᤔᤏᤠᤜᤠ᤹ ᤔᤧᤳᤋᤧᤛᤧ᤹ᤀᤥ. ‘ᤂᤡᤏᤡ᤹ ᤁᤧᤄᤧᤵᤛᤢᤶᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ. ᤂᤡᤏᤡ᤹ ᤀᤥᤃᤧᤔᤧᤳᤋᤢᤶᤛᤠᤱ ᤁᤧᤴᤏᤡᤛᤢᤶᤔᤡᤴᤗᤥ॥’

¹⁰ ᤂᤧᤏᤧ᤹ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤏᤢ ᤏᤧᤰᤂᤥᤴ ᤁᤧᤎᤢᤱᤒᤠ ᤆᤥᤃᤧ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤡᤰᤁᤧᤴ ᤋᤧᤵᤋᤧ ᤐᤡᤖᤧᤛᤧ᤹ᤀᤥ॥ ᤔᤣ᤺ᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤸᤗᤧ ᤔᤧᤏᤡᤛᤢᤖᤥ. ᤂᤢᤴᤇᤡ᤹ ᤏᤧᤓᤠᤰᤁᤡᤸᤗᤧ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤺ᤸᤗᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ. ᤜᤧᤰᤁᤩᤠᤱ ᤕᤠᤶᤔᤥ ᤂᤧᤱᤜᤠ᤹ ᤔᤧᤏᤢ᤺ᤱ ᤔᤧᤍᤠᤀᤠᤱ ᤔᤧᤘᤣ᤺ᤳᤗᤥ॥”

¹¹ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱ. “ᤀᤠᤍᤠᤱᤒᤠᤀᤣ. ᤀᤠᤰᤂᤧᤴ ᤕᤧᤶ ᤌᤠᤖᤡᤰ ᤁᤴ ᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ ᤆᤥᤃᤢᤱᤒᤠᤒᤣ᥄” ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤔᤧᤳᤋᤠᤱ. “ᤐᤠᤱᤈᤢᤶᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤅᤠᤱ ᤔᤧᤴᤇᤠᤶ ᤕᤠᤵᤔᤡ ᤔᤣ᤺ᤴᤏᤣ ᤆᤡᤈᤡ ᤂᤰᤂᤰ ᤔᤧᤶᤒᤥᤱᤅᤣ ᤌᤠᤖᤡᤰ ᤏᤢ ᤜᤡᤶᤎᤠ᤺ᤱᤜᤠ᤹ ᤔᤏᤠᤔᤧ᤺ᤴᤏᤣ ᤁᤢᤄᤠᤗᤧᤶ ᤔᤧᤶᤒᤥᤱᤅᤣ ᤌᤠᤖᤡᤰ. ᤜᤧᤰᤁᤩᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤆᤠᤜᤠ᤹ ᤂᤠᤵᤐᤢ ᤌᤩ᤺ᤱ ᤐᤥᤱᤅᤠᤱ ᤔᤧᤶᤔᤧᤰᤁᤣ ᤌᤠᤖᤡᤰ.

¹² ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤔᤠ᤺ᤱᤄᤠ ᤔᤧᤶᤒᤠᤱ ᤔᤧᤴᤍᤣᤛᤣ ᤌᤠᤖᤡᤰ ᤂᤧᤒᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗ ᤗᤠᤈᤣᤴ ᤔᤢᤖᤧᤰ ᤂᤠᤖᤧᤰ ᤐᤥᤱᤅᤠᤱ ᤀᤣ᤺ᤰᤛᤠᤍᤧᤴ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤴ ᤕᤠ᤺ᤶᤒᤁᤡᤴ ᤆᤥᤃᤧ᤹ᤀᤥ॥

¹³ ᤜᤧᤰᤁᤩᤠᤱ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤌᤡᤒᤥᤱᤗᤰ ᤕᤠᤖᤡᤰᤗᤰ ᤔᤏᤠᤜᤠ᤹ ᤔᤧᤍᤠᤱ ᤔᤧᤕᤠ᤺ᤰᤛᤠᤱ ᤕᤠᤶᤔᤥ ᤂᤧᤴ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤂᤠᤶᤐᤢ ᤌᤩ᤺ᤱ ᤔᤧᤈᤥᤃᤢᤛᤡᤖᤥ॥ ᤁᤖ ᤕᤜᤡᤒᤠ ᤀᤡᤃᤪ ᤁᤧᤛᤠᤰᤐᤠ ᤛᤡᤱᤒᤢᤱᤜᤠ᤹ ᤀᤠ᤺ᤵᤔᤠᤍᤧᤔᤠᤛᤠᤱ ᤁᤢᤔᤢ᤺ᤳᤜᤠ᤹ ᤕᤢᤱᤕᤠ᤺ᤰᤁᤠᤱ ᤂᤧᤴ ᤛᤡᤱᤔᤢ᤺ᤳᤜᤠ᤹ ᤕᤠᤶᤔᤥ ᤁᤢᤈ᤺ᤰ ᤗᤡᤱᤎᤠᤱᤒᤠ ᤁᤢᤀᤡᤛᤡᤰ ᤂᤧᤴ ᤛᤡᤱᤔᤢ᤺ᤳᤋᤡᤴ ᤛᤣᤛᤣ ᤕᤠ᤹ᤖᤡ᤺ᤶᤒᤠ ᤐᤥᤱᤅᤠᤱ ᤕᤠᤶᤔᤥ ᤐᤥᤎᤠᤱᤗᤥ॥”