ᤕᤛᤤᤕᤠ 59 - LIFOTNT

ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤀᤠᤵᤋᤡᤰ

¹ ᤂᤧᤵᤛᤧᤶᤔᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤂᤡᤏᤡ᤹ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤧᤒᤠ ᤜᤥᤵᤗᤥ. ᤂᤢᤏᤧ᤹ ᤁᤢᤴᤓᤠᤰᤁᤡᤴ ᤂᤡᤏᤡ᤹ ᤐᤣᤗᤡ ᤁᤧᤓᤠᤰᤋᤢᤶᤒᤧᤴ ᤂᤧᤶᤔᤠ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤧᤒᤠ ᤜᤥᤵᤗᤥ॥

² ᤂᤡᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤏᤠᤖᤠᤴ ᤂᤡᤏᤡ᤹ᤗᤠᤶᤒᤠ ᤌᤣ᤺ᤰᤋᤢᤀᤠᤱ ᤐᤳᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤐᤣᤗᤡᤴ ᤔᤧᤄᤧᤵᤛᤢᤴᤗᤥ. ᤂᤡᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤗᤠ᤺ᤳᤗᤠ᤺ᤳ ᤁᤧᤒᤥᤰᤂᤡᤖᤥ॥

³ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤜᤢᤰᤁᤡᤴ ᤔᤠᤰᤂᤡᤸᤗᤧ ᤏᤢ ᤂᤡᤏᤡ᤹ ᤜᤢᤰᤆᤥᤴ ᤀᤠᤵᤋᤡᤰᤁᤡᤸᤗᤧ ᤌᤡ᤹ᤖᤢᤀᤠᤱ ᤐᤳᤗᤥ. ᤂᤡᤏᤡ᤹ ᤔᤢᤖᤠ᤺ᤸᤗᤧ ᤀᤡᤱᤗᤧᤰᤁᤣ ᤐᤠᤴ ᤏᤢ ᤂᤡᤏᤡ᤹ ᤗᤧᤛᤥ᤺ᤵᤐᤠᤸᤗᤧ ᤋᤠᤵᤑᤧ᤺ᤶᤒᤠ ᤐᤠᤴ ᤐᤠ᤺ᤳᤋᤢᤖᤥ॥

⁴ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤐᤥᤱᤔᤠ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ. ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤛᤧᤴᤏᤡᤴ ᤀᤡᤱᤗᤧᤰᤐᤠ ᤆᤥᤰᤗᤥ॥ ᤂᤧᤱᤜᤠ᤹ᤖᤧᤃ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤔᤧᤒᤡᤖᤢᤖᤥ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤐᤠᤴ ᤐᤥᤱᤗᤥ॥

⁵ ᤂᤧᤱᤜᤠ᤹ᤖᤧᤃ ᤋᤠᤱᤒᤢ ᤀᤛᤣ᤺ᤰᤁᤧᤸᤗᤧ ᤁᤢᤎᤡ᤺ᤴᤏᤧᤴ ᤔᤧᤃᤢᤵᤋᤢᤖᤥ. ᤜᤧᤰᤁᤩᤠᤱ ᤂᤠᤶᤍᤠ᤺ᤰᤐᤧᤸᤗᤧ ᤁᤢᤀᤡ᤺ᤴ ᤔᤧᤃᤧᤛᤢᤖᤥ॥ ᤂᤧᤱᤜᤠ᤹ᤖᤧ ᤔᤧᤃᤢᤵᤋᤢᤒᤠ ᤌᤡ᤺ᤴᤏᤧᤴ ᤀᤠᤳᤋᤡᤴᤜᤠ᤹ᤖᤧ ᤔᤧᤈ᤹᤺ ᤂᤧᤱᤜᤠ᤹ ᤁᤧᤖᤧᤰ ᤔᤧᤛᤡᤖᤖᤥ. ᤂᤧᤒᤩᤠᤱ ᤂᤧᤴ ᤜᤧᤵᤔᤧᤸᤗᤧ ᤂᤧᤶᤔᤥᤏᤢ ᤀᤛᤣ᤺ᤰᤛᤠ ᤔᤧᤗ᤺ᤴᤗᤥ॥

⁶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤸᤗᤧ ᤋᤣᤳᤆᤠᤱ ᤑᤔᤠ ᤛᤢᤰᤔᤧᤍᤧᤳᤏᤧᤴᤗᤥ. ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤐᤠ᤺ᤴᤜᤠ᤹ᤖᤧ ᤀᤠᤒᤠᤅᤣ ᤋᤧᤵᤛᤡᤱᤔᤠ ᤔᤧᤴᤇᤢᤰᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤃ ᤗᤠᤕᤥᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤠᤷᤔᤧᤴᤍᤰ ᤕᤠ᤺ᤶᤒᤰ ᤆᤥ᤺ᤰᤔᤧᤴ ᤂᤢᤴᤇᤡ᤹ ᤜᤢᤰᤁᤥ ᤐᤳᤗᤥ॥

⁷ ᤂᤧᤱᤜᤠ᤹ ᤗᤠᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧᤗᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤛᤧᤔᤠ ᤔᤧᤈᤠᤳᤗᤥ॥ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤗᤠᤕᤥᤒᤠ ᤏᤡᤱᤘᤠ᤹ᤖᤥ. ᤗᤢᤱᤔᤠ᤹ ᤁᤧᤜᤡ᤺ᤶᤒᤠᤴ ᤏᤢ ᤛᤡᤔᤠ ᤔᤧᤰᤔᤧᤴ ᤂᤢᤴᤇᤡ᤹ ᤗᤠᤶ ᤐᤥᤱᤗᤥ॥

⁸ ᤂᤧᤱᤜᤠ᤹ᤖᤧ ᤛᤏᤠᤖᤢᤱ ᤗᤠᤶᤔᤡᤴ ᤁᤢᤛᤣ᤺ᤴ ᤔᤧᤴᤏᤡᤛᤢᤴᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤠᤖᤠᤶᤔᤥ ᤁᤢᤍᤥ᤺ᤵᤔᤠ ᤂᤠᤛᤧᤴ ᤜᤥᤵᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤖᤠᤶᤜᤠ᤹ ᤐᤧᤷᤃᤧᤰ-ᤘᤷᤃᤧᤰ ᤔᤧᤈᤥᤃᤢᤀᤠᤱ ᤏᤧᤖᤥ. ᤂᤧᤴ ᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤋᤱᤔᤠ ᤛᤏᤠᤖᤢᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

ᤔᤏᤠᤜᤠ᤹ ᤗᤠᤕᤥᤗᤠᤶ ᤔᤧᤏᤢᤱ

⁹ ᤁᤸᤗᤧᤆᤥᤃᤢᤸᤗᤧ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤡᤴ ᤀᤠᤏᤡ᤹ᤗᤠᤶ ᤔᤠ᤺ᤱᤄᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤛᤠᤶᤕᤥᤒᤠ ᤐᤠ᤺ᤴᤏᤡᤸᤗᤧ ᤀᤠᤏᤡ᤹ ᤛᤡ᤹ᤔᤠ ᤀᤠᤴᤇᤢᤰᤏᤧᤴᤗᤥ ᤀᤠᤏᤡ᤹ ᤂᤠᤃᤧᤀᤥ᤺ᤵᤐᤠ ᤗᤠᤶᤔᤡᤴ ᤀᤥᤀᤠᤔᤧᤳᤋᤢᤶᤗᤥ. ᤁᤖ ᤁᤧᤖᤧᤰ ᤂᤠᤃᤧᤔᤠᤰᤐᤠ ᤆᤥᤰᤗᤥ॥ ᤀᤥ᤺ᤳᤋᤡ᤺ᤸᤗᤧ ᤗᤠᤶᤔᤡᤴ ᤀᤠᤜᤰᤛᤢᤶᤗᤥ. ᤁᤖ ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤂᤠᤔᤠᤰᤔᤥ ᤗᤠᤱᤀᤠᤄᤣ᤺ᤰᤗᤥ᥄

¹⁰ ᤔᤡᤰᤑ᤺ᤶᤒᤠ ᤔᤏᤠᤴ ᤁᤢᤛᤡᤱ ᤗᤢᤱᤎᤠᤰᤁᤡᤴ ᤀᤠᤛᤵᤛᤢᤶᤗᤥ. ᤁᤢᤔᤡᤰ ᤁᤧᤜᤥᤵᤐᤠ ᤔᤏᤠᤜᤠ᤹ ᤜᤧᤰᤁᤣ ᤀᤠᤒᤠᤅᤣ ᤗᤠᤶᤔᤡᤴ ᤀᤠᤏᤡ᤹ ᤛᤛᤵ ᤛᤛᤵ ᤗ᤹ᤖᤡᤰ ᤀᤠᤛᤵᤛᤢᤶᤗᤥ॥ ᤕᤢ᤺ᤴᤇᤡᤰ ᤁᤢᤛᤡᤱ ᤗᤧᤴᤍᤡᤰ ᤔᤛᤣᤖᤠ ᤀᤠᤏᤡ᤹ ᤀᤠᤍᤥᤰᤗᤥ. ᤁᤧᤎᤢᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤢᤛᤡᤘᤧᤳ ᤜᤧᤰᤁᤣ ᤀᤠᤗ᤹ᤖᤥ॥

¹¹ ᤀᤠᤏᤡ᤹ ᤁᤧᤖᤧᤰ ᤔᤠ᤹᤺ᤕᤢᤴ ᤜᤧᤰᤁᤣ ᤜᤠᤃᤠ᤺ᤰ ᤜᤠᤃᤠ᤺ᤰ ᤀᤠᤗ᤹ᤖᤥ. ᤜᤧᤰᤁᤩᤠᤱ ᤛᤠᤵᤐᤧᤋᤪᤢ᤺ᤰᤔᤠᤴ ᤜᤧᤰᤁᤣ ᤋᤢ᤺ᤰ ᤋᤢ᤺ᤰ ᤀᤠᤗ᤹ᤖᤥ॥ ᤀᤠᤏᤡ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤀᤠᤃᤥ᤺ᤳᤋᤢᤶᤗᤥ. ᤁᤖ ᤀᤠᤏᤡ᤹ ᤀᤠᤳᤋᤡᤀᤠᤱ ᤀᤠᤱᤄᤥᤛᤢᤶᤏᤧᤴ. ᤛᤧᤴᤗᤵ ᤂᤥᤔᤠ ᤗᤠᤶ ᤀᤠᤜᤰᤛᤢᤶᤗᤥ. ᤁᤖ ᤂᤧᤴ ᤀᤠᤏᤡ᤹ᤗᤠᤶ ᤔᤠ᤺ᤱᤄᤠ ᤘᤠ᤹ᤖᤥ॥

¹² ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤑᤧᤴᤕᤠ᤺ᤶᤒᤰᤜᤠ᤹ ᤁᤧᤏᤡᤔᤥ ᤕᤖᤡᤰ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤸᤗᤧ ᤀᤠᤏᤡᤃᤣ ᤗᤠᤕᤥᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤡᤖᤢᤖᤥ॥ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤏᤡᤛᤢᤶᤒᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤑᤧᤴᤕᤠ᤺ᤶᤒᤰᤜᤠ᤹ ᤋᤧᤴᤍᤡᤱ ᤆᤥᤃᤢᤶᤒᤧᤖᤥ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥ᤺ᤰᤔᤠ ᤏᤢ ᤀᤠᤏᤡᤃᤣ ᤀᤵᤔᤠ ᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ. ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏᤢ᤺ᤰᤂᤡᤃᤧᤀᤠᤱ ᤏᤡᤱᤄᤢᤶ ᤏᤢ ᤐᤡᤑᤩᤢᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ. ᤂᤧᤒᤩᤠᤱ ᤀᤠᤏᤡᤃᤣ ᤏᤡᤱᤘᤠ᤺ᤸᤗᤧ ᤐᤠ᤺ᤳᤋᤢᤒᤠ ᤀᤡᤱᤗᤧᤰ ᤐᤠ᤺ᤳᤋᤢᤶᤒᤧᤀᤠᤱ ᤘᤠ᤹ᤖᤥ॥

¹⁴ ᤁᤸᤗᤧᤆᤥᤃᤢᤸᤗᤧ ᤂᤠᤛᤧᤴᤏᤡᤴ ᤀᤣᤃᤠᤱ ᤗᤧᤵᤔᤠᤱ ᤔᤧᤄᤧᤳᤋᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤛᤠᤶᤕᤥᤒᤠ ᤐᤠ᤺ᤴᤏᤡᤴ ᤔᤠ᤺ᤱᤄᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤛᤧᤰᤂᤠᤴ ᤔᤠᤖᤠᤶᤔᤥ ᤋᤥ᤺ᤰᤋᤧᤀᤠᤱ ᤘᤠ᤹ᤖᤥ. ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤏᤡᤛ᤻ᤛᤣᤴ ᤛᤡᤃᤠᤱ ᤗᤠ᤺ᤵᤔᤠ ᤔᤧᤛᤢᤰᤏᤧᤴᤗᤥ॥

¹⁵ ᤛᤧᤰᤂᤠᤴ ᤛᤠ᤹ᤖᤡᤰ ᤛᤢ᤺ᤴᤗᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤗᤧᤵᤐᤠᤜᤠ᤹ ᤛᤠᤘᤠᤃᤧᤶᤒᤧᤸᤗᤧ ᤁᤢᤜᤢᤰᤁᤥ ᤔᤧᤎᤠᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤛᤢᤀᤠᤱ ᤘᤠ᤹ᤖᤥ ᤂᤧᤒᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤜᤥᤵᤐᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤖᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤛᤧ᤺ᤵᤋᤢᤛᤡ

¹⁶ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤜᤥ᤺ᤵᤗᤧᤳᤇ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤛᤢᤖᤥ. ᤜᤧᤰᤁᤩᤠᤱ ᤐᤠ᤺ᤴᤍᤱᤛᤠᤒᤠ ᤜᤠ᤺ᤳᤋᤠᤱ ᤔᤧᤜᤥᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤖᤥ॥ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤢᤰᤛᤠᤶᤔᤡᤸᤗᤧ ᤂᤧᤸᤗᤧ ᤗᤠᤃᤡ ᤛᤧᤴᤗᤵ ᤋᤠᤖᤢᤖᤥ. ᤂᤧᤒᤩᤠᤱ ᤂᤢᤏᤧ᤹ᤀᤣ ᤁᤢᤛᤠᤶᤕᤥᤒᤠ ᤕᤠ᤺ᤶᤒᤰᤁᤧᤸᤗᤧ ᤂᤧᤴ ᤋᤰᤋᤢᤖᤥ॥

¹⁷ ᤛᤠᤶᤕᤥᤏᤡᤔᤠᤴ ᤂᤢᤏᤧ᤹ ᤛᤱᤒᤵᤔᤥᤒᤠ ᤛᤧ᤺ᤵᤆᤠᤱ ᤜᤧᤰᤁᤣ ᤆᤠᤰᤂᤢᤖᤥ ᤜᤧᤰᤁᤩᤠᤱ ᤛᤧᤴᤗᤵᤐᤡᤴ ᤌᤧᤃᤣ᤺ᤰᤁᤥ ᤂᤢ᤺ᤱᤔᤏᤠᤒᤠ ᤋᤠᤱᤄᤢ᤺ᤰ ᤁᤢᤀᤡᤛᤡᤰ ᤂᤢ᤺ᤰᤂᤢᤖᤥ॥ ᤂᤢᤏᤧ᤹ ᤁᤢᤗᤧᤰᤘᤠ ᤜᤢᤱᤔᤧᤴ ᤆᤠᤱ ᤁᤢᤀᤡᤛᤡᤰ ᤆᤠᤰᤂᤢᤖᤥ ᤜᤧᤰᤁᤩᤠᤱ ᤛᤡᤰᤛᤶᤔᤧᤴ ᤜᤧᤶᤒᤠᤖᤡ ᤁᤢᤀᤡᤛᤡᤰ ᤜᤧᤵᤛᤡᤱᤗᤥ॥

¹⁸ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤱᤜᤠ᤹ ᤁᤢᤗᤧᤰᤘᤠ ᤏᤢ᤺ᤰᤋᤢ ᤐᤡᤖᤢᤛᤡᤖᤥ. ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤁᤢᤛᤠᤰᤁᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤛᤶᤎᤠᤱ ᤁᤢᤗᤧᤰᤘᤠ᥄ ᤘᤠᤃᤵᤂᤣ᤺ᤱ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤁᤢᤗᤧᤰᤘᤠ ᤏᤢ᤺ᤰᤋᤢ ᤐᤡᤖᤢᤛᤡᤖᤥ॥

¹⁹ ᤏᤠᤶᤎᤠ ᤐᤡᤛᤠᤱᤒᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤀᤡᤱᤎᤠᤱ ᤔᤧᤒᤡᤖᤢᤖᤥ. ᤜᤧᤰᤁᤩᤠᤱ ᤋ᤹ᤀᤡ ᤏᤠᤱᤃᤧᤴ ᤗᤧᤵᤛᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤡᤔᤡᤍᤡᤱ ᤔᤧᤒᤡᤖᤢᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳ ᤜᤧᤰᤁᤣ ᤕᤢᤖᤥ. ᤂᤧᤴ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤰᤔᤠ᤺ᤸᤗᤧ ᤛᤢ᤺ᤴᤍᤢ ᤕᤢᤖᤢᤖᤥ॥

²⁰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤠᤒᤠᤅᤣ ᤗᤠᤕᤥᤗᤠᤶ ᤁᤧᤏᤢ᤺ᤱᤒᤠ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤁᤧᤎᤧ᤹ᤒᤧᤴ ᤛᤡᤕᤥᤏᤀᤥ ᤕᤢᤀᤠᤖ ᤐᤳᤋᤠᤖᤥ॥

²¹ “ᤜᤧᤰᤁᤩᤠᤱ ᤂᤧᤏᤡ᤹ᤏᤢ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤀᤠᤶᤓᤠ ᤁᤴ ᤐᤥᤱ᤹॥ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤧᤏᤡ᤹ ᤛᤶᤎᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤏᤡ᤹ ᤔᤢᤖᤠᤀᤥ ᤁᤣ᤺ᤳᤋᤢᤱ ᤐᤡᤏᤡᤱᤅᤠᤱ ᤘᤠ᤹. ᤂᤧᤴ ᤀᤠᤒᤠ᤺ᤴᤈᤠ᤺ᤰᤁᤡᤴ ᤂᤧᤏᤧ᤹ ᤁᤧᤶᤒᤪᤠᤀᤥᤗᤠᤶ. ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤀᤥᤗᤠᤶ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ᤖᤧ ᤔᤢᤖᤠᤀᤥᤗᤠᤶ ᤀᤠᤸᤗᤀᤠᤱᤎᤥ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤓᤧᤸᤗᤧᤀᤠᤱ ᤔᤧᤔᤠᤏᤧᤸᤗᤥ॥”