ᤕᤛᤤᤕᤠ 58 - LIFOTNT

ᤛᤧᤰᤂᤠᤒᤠ ᤋ᤺ᤰᤏᤧᤳ

¹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤌᤢᤳᤌᤢᤖᤡ᤺ᤵᤐᤠᤸᤗᤧ ᤕᤶᤒᤠ ᤁᤢᤀᤡᤰᤗᤠᤴ ᤁᤢᤀᤡᤛᤡᤰ ᤂᤧᤏᤡ᤹ ᤛᤠ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤶᤔᤧ᤹ᤀᤥ᥄ ᤀᤠᤱᤃᤠ᤹ ᤀᤠᤔᤏᤠ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤔᤧᤳᤋᤠᤶᤛᤡᤶᤔᤧ᤹ᤀᤥ᥄

² ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤌᤡᤰᤕᤠ᤺ᤴᤎᤰ ᤔᤧᤃᤥ᤺ᤳᤋᤠᤖᤥ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ ᤂᤧᤴ ᤁᤧᤈᤥ᤺ᤰᤐᤠ ᤏᤢ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤔᤧᤶᤓᤣ᤺ᤶᤔᤏᤠᤒᤠ ᤁᤖ ᤀᤠᤱᤃᤠ᤹ ᤀᤠᤗᤠᤶᤔᤡᤴ ᤏᤠ᤺ᤵᤔᤠ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤛᤢᤘᤠᤱ ᤜᤧᤰᤋᤱᤒᤠᤀᤣ ᤂᤧᤱᤜᤠ᤹ ᤏᤡᤔᤧᤍᤧᤳᤗᤥ॥ ᤂᤧᤱᤜᤠ᤹ᤖᤧ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ ᤏᤡ᤺ᤴᤎᤥᤖᤧ ᤐᤠ᤺ᤴᤜᤠ᤹ ᤔᤧᤏᤠ᤺ᤰᤁᤠᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡ᤺ᤳᤋᤠᤱ ᤋᤠᤖ ᤑᤠ᤹ᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤒᤠ ᤏᤡᤍᤧᤳᤗᤥ॥

³ ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤠᤏᤡᤃᤣ ᤋ᤺ᤰᤏᤧᤳ ᤕᤢᤅᤡᤃᤧᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤌᤣᤀᤠᤱ ᤁᤧᤴᤏᤡᤛᤢᤶᤒᤠᤒᤣ᥅ ᤀᤠᤏᤡᤃᤣ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤡᤃᤧᤖᤥ. ᤜᤧᤰᤁᤩᤠᤱ ᤂᤧᤏᤡ᤹ ᤌᤣᤀᤠᤱ ᤏᤡᤏᤡ ᤁᤧᤴᤗᤠᤵᤋᤢᤶᤒᤠᤒᤣ᥅’ ᤜᤧᤰᤁᤣᤛᤠᤱ ᤂᤡᤏᤡ᤹ ᤋ᤺ᤰᤏᤧᤳ ᤁᤧᤕᤢᤅᤡᤒᤠ ᤕᤧᤴᤏᤥ ᤂᤡᤏᤡ᤹ ᤀᤠᤒᤠᤅᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤴᤗᤰ ᤁᤧᤈᤥᤃᤢᤶᤗᤥ॥ ᤂᤧᤶᤒᤩᤠᤱ ᤂᤡᤏᤡ᤹ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤒᤡᤒᤠᤜᤠ᤹ ᤁᤧᤖᤧᤰ ᤁᤧᤄᤢᤶᤛᤢᤶ ᤁᤧᤛᤧᤖᤢᤶᤛᤡᤶᤗᤥ॥

⁴ ᤂᤡᤏᤡ᤹ ᤋ᤺ᤰᤏᤧᤳ ᤁᤧᤕᤢᤅᤡᤒᤠ ᤕᤧᤴᤏᤥ ᤂᤣᤔᤠ ᤏᤢ ᤌᤰᤔᤠᤀᤥ ᤐᤣ᤺ᤰᤗᤥ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤳᤋᤠᤛᤡᤖ ᤜᤢᤰᤁᤧᤕᤠᤰᤁᤠᤛᤡᤖᤥ॥ ᤂᤡᤏᤡ᤹ ᤀᤠᤀᤡᤴ ᤜᤧᤰᤋᤱᤒᤠ ᤋ᤺ᤰᤏᤧᤳ ᤁᤧᤕᤢᤅᤡᤀᤠᤱ ᤂᤡᤏᤡ᤹ ᤀᤡᤰᤗᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤧᤶᤍᤧᤳ ᤑᤠ᤹ᤀᤠᤱ ᤏᤡᤱᤛᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥

⁵ ᤌᤣ ᤀᤠᤱᤃᤠ᤹ ᤛᤣᤃᤢᤱᤒᤠ ᤋ᤺ᤰᤏᤧᤳᤋᤡᤴ ᤜᤠᤒᤠ ᤀᤰᤋᤱᤒᤠᤖᤰᤐᤡ᥅ ᤔᤏᤠᤴ ᤌᤣ ᤌᤡᤰᤕᤠ᤺ᤴᤗᤰ ᤏ᤺ᤶᤏ᤺ᤶᤒᤠ ᤐᤥᤱᤒᤠᤒᤡ᥅ ᤌᤣ ᤔᤡᤰᤗᤠᤴ ᤁᤢᤛᤡᤱ ᤌᤧᤃᤣᤰᤐᤠᤴ ᤀ᤺ᤰᤂᤢᤶ ᤔᤧᤵᤔᤠ ᤜᤧᤰᤁᤩᤠᤱ ᤛᤡ᤺ᤱᤃᤥ ᤆᤠᤱ ᤆᤠᤱᤔᤠ ᤏᤢ ᤂᤠᤵᤐᤢ ᤜᤢ᤺ᤳᤇᤡᤱᤔᤠᤀᤠᤱᤗᤰ ᤏ᤺ᤶᤏ᤺ᤶ ᤀᤠᤒᤥᤱᤒᤠᤒᤡ᥅ ᤌᤣ ᤜᤠᤒᤠ ᤁᤴ ᤂᤧᤏᤡ᤹ ᤋ᤺ᤰᤏᤧᤳ ᤕᤢᤱᤔᤠ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤋᤠ᤺ᤰᤋᤢᤒᤠ ᤕᤧᤴ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶᤒᤡ᥅

⁶ “ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴᤏᤡᤸᤗᤧ ᤀᤡᤄᤣ᤺ᤱᤜᤠ᤹ ᤑᤠ᤺ᤱᤔᤠ. ᤂᤧ᤺ᤵᤛᤡᤱᤅᤡᤸᤗᤧ ᤌᤠᤰᤐᤠᤴ ᤑᤠ᤺ᤱᤔᤠ. ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠ ᤔᤧᤕᤢᤰᤋᤢᤛᤡᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ. ᤁᤧᤖᤧᤰ ᤀ᤺ᤰᤛᤡᤱᤜᤠ᤹ ᤀᤧᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤛᤣᤃᤢᤱᤒᤠ ᤋ᤺ᤰᤏᤧᤳᤋᤡᤴ ᤜᤠᤒᤠ ᤁᤴ ᤔᤣ᤺ᤶᤒᤡ᥅

⁷ ᤁᤵᤔᤏᤠᤒᤠ ᤆᤠᤔᤠ ᤁᤢᤈᤠᤜᤠ᤹ ᤁᤢᤛᤡᤰ ᤁᤧᤗᤠ᤺ᤰᤐᤠᤜᤠ᤹ ᤐᤡᤔᤠᤛᤡ. ᤜᤧᤰᤁᤩᤠᤱ ᤜᤡᤶᤎᤠ᤺ᤱ ᤔᤧᤱᤃᤵᤔᤏᤠᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤢᤱᤔᤠᤍᤧᤴ ᤐᤡᤔᤠᤛᤡ— ᤗᤧᤰᤆᤠᤒᤢᤎᤢᤰ ᤁᤧᤘᤠ᤹ᤒᤠᤜᤠ᤹ ᤏᤡᤔᤠᤛᤡᤀᤠᤱ ᤋᤣᤳ ᤆᤠᤰᤔᤠᤛᤡ. ᤂᤧᤒᤩᤠᤱ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ ᤛ᤺ᤱᤜᤠ᤹ᤗᤠᤶ ᤆᤡᤱᤛᤡᤱᤔᤠ ᤔᤣ᤺ᤴ. ᤔᤣ᤺ᤶᤒᤡ᥅

⁸ ᤂᤧᤒᤩᤠᤱ ᤂᤧᤏᤡ᤹ ᤀᤥ᤺ᤳᤋᤡ᤺ᤴ ᤋᤠᤏᤠᤶ ᤜᤧᤰᤁᤣ ᤀᤥ᤺ᤳᤗ᤺ᤴᤗᤥ. ᤜᤧᤰᤁᤩᤠᤱ ᤂᤧᤏᤡ᤹ ᤁᤧᤃᤠ᤺ᤴᤍᤡᤒᤠ ᤕᤠᤱᤄᤣ᤺ᤰᤜᤠ᤹ ᤜᤠᤖᤠᤀᤣ ᤏᤢ᤹ᤖᤥ॥ ᤂᤡᤏᤡ᤹ ᤛᤠᤶᤕᤥᤏᤡᤔᤠᤸᤗᤧ ᤗᤠᤶ ᤁᤧᤗᤥᤛᤡᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠ᤺ᤸᤗᤧ ᤀᤣᤃᤠᤱᤗᤠᤶᤒᤠ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤖᤥ॥

⁹ ᤂᤡᤏᤡ᤹ ᤐᤣᤗᤡ ᤁᤧᤓᤠᤰᤋᤢᤶᤔᤡᤸᤗᤧ ᤂᤢᤏᤧ᤹ ᤏᤢᤃᤵ ᤁᤧᤒᤡᤖᤡᤖᤥ. ᤂᤧᤏᤡ᤹ ᤐᤠ᤺ᤴᤃᤧᤛᤠ᤺ᤳᤋᤢᤶᤔᤡᤸᤗᤧ ᤂᤢᤏᤧ᤹ ᤐᤠ᤺ᤴᤃᤧᤛᤠ᤺ᤳᤋᤡᤖᤥ॥ “ᤂᤡᤏᤡ᤹ ᤔᤏᤠ ᤋᤢᤰᤂᤣ ᤆᤠ᤺ᤵᤔᤠ. ᤔᤏᤠ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ. ᤜᤧᤰᤁᤩᤠᤱ ᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤁᤧᤖᤧᤰ ᤑᤧᤴ ᤐᤠ᤺ᤴᤜᤠ᤹ ᤁᤧᤗᤧᤖᤢᤶ ᤁᤧᤍᤣᤛᤢᤶᤏᤧᤓᤃᤪ.

¹⁰ ᤁᤢᤛᤡᤰ ᤁᤧᤗᤠ᤺ᤰᤐᤧᤴ ᤂᤡᤏᤡ᤹ ᤁᤢᤈᤠ ᤁᤧᤒᤡᤖᤢᤶᤏᤧᤓᤃᤪ ᤜᤧᤰᤁᤩᤠᤱ ᤁᤧᤛᤠᤰᤐᤠ ᤁᤧᤍᤢᤶᤒᤠᤜᤠ᤹ ᤁᤧᤓᤠ᤹ᤖᤢᤶᤛᤡᤶᤔᤏᤧᤓᤃᤪ ᤂᤡᤏᤡ᤹ ᤀᤥ᤺ᤳᤋᤡ᤺ᤴ ᤂᤠᤔᤠᤰᤔᤠᤗᤠᤶ ᤀᤥ᤺ᤳᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤂᤡᤖᤡᤒᤠ ᤂᤠᤔᤠᤰᤔᤧᤴ ᤗᤧᤴᤍᤡᤰᤐᤠ ᤂᤠᤀᤥ᤺ᤵᤔᤠᤴ ᤁᤢᤀᤡᤛᤡᤰ ᤐᤥᤱᤗᤥ॥

¹¹ ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤗᤠᤶᤃᤧᤗᤥᤛᤡᤖᤥ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤏᤠᤶᤃᤧᤗᤠ᤺ᤱᤒᤠ ᤋᤧᤴᤜᤠ᤹ᤀᤥᤀᤠᤱ ᤏᤢᤒᤠ ᤐᤠ᤺ᤴᤜᤠ᤹ᤖᤧ ᤂᤧᤏᤡ᤹ ᤏᤡᤱᤘᤠ᤹ ᤋᤠᤖ ᤆᤥᤃᤢᤖᤥ॥ ᤂᤧᤶᤒᤩᤠᤱ ᤂᤧᤏᤡ᤹ ᤕᤧᤵᤐᤠ ᤗᤢᤱᤛᤡᤜᤠ᤹ ᤁᤧᤎᤢᤶᤒᤠ ᤆᤥᤃᤢ ᤁᤧᤒᤡᤖᤡᤖᤥ. ᤆᤫᤠ᤺ᤳᤋᤡᤸᤗᤧ ᤐᤕᤥ ᤕᤥᤖᤢᤖ ᤘᤠᤖᤱᤔᤏᤠᤒᤠ ᤛᤡᤱᤛᤣ᤹ᤀᤡᤰ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤔᤧᤴᤈᤵᤔᤏᤠᤒᤠ ᤘᤠᤒᤢᤴᤍᤠᤰᤘᤠ ᤜᤧᤰᤋᤱᤒᤠ ᤁᤧᤒᤥᤰᤂᤡᤖᤥ॥

¹² ᤂᤡᤏᤡ᤹ ᤔᤏᤠᤜᤠ᤹ᤖᤧ ᤁᤧᤗᤢ᤺ᤶᤒᤠ ᤁᤧᤎᤢᤵᤐᤠ ᤜᤡᤶᤐᤠᤱᤕᤰᤜᤠ᤹ ᤕᤠᤶᤔᤥ ᤔᤧᤈᤥᤃᤢᤖᤥ. ᤛᤠ᤹ᤖᤡᤰ ᤀᤢ᤺ᤴᤇᤥ᤺ᤶᤒᤠ ᤜᤡᤶᤕᤢᤰᤏᤠᤜᤠ᤹ ᤂᤧᤱᤜᤠ᤹ᤖᤧ ᤕᤠᤶᤔᤥ ᤔᤧᤓᤥ᤺ᤰᤂᤢᤖ॥ ᤂᤡᤏᤡ᤹ ‘ᤁᤧᤗᤢ᤺ᤶᤒᤠ ᤗᤢᤱᤎᤠᤰᤜᤠ᤹ ᤁᤧᤛᤧᤵᤐᤠ ᤏᤢ ᤕᤢᤱᤔᤠ ᤜᤡᤶᤜᤠ᤹ᤖᤧ ᤗᤠᤃᤡ ᤗᤠᤶ ᤕᤠᤶᤔᤥ ᤁᤢᤛᤱ ᤁᤧᤈᤥ᤺ᤰᤐᤠ’ ᤁᤧᤶᤔᤧᤳᤋᤡᤖᤥ॥”

ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤀᤠᤛᤢᤳᤌᤥ ᤆᤥ᤺ᤰᤔᤠ ᤔᤣ᤺ᤴ

¹³ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤂᤧᤏᤡ᤹ ᤛᤣᤛᤣ ᤁᤧᤃᤳᤋᤢᤶᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤒᤠᤅᤣ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤁᤧᤴᤈᤥᤃᤢᤶᤔᤡᤴᤏᤧᤓᤃᤪ. ᤀᤠᤱᤃᤠ᤹ ᤀᤠᤛᤣᤛᤣ ᤕᤧᤴᤏᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶ ᤂᤧᤒᤩᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤳᤋᤡᤀᤠᤱ ᤔᤠ᤺ᤱᤄᤠ ᤁᤧᤶᤒᤣᤃᤡᤴᤏᤧᤓᤃᤪ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤕᤠ᤺ᤶᤒᤰ ᤁᤧᤴᤈᤥᤃᤡᤴᤏᤠᤱ ᤂᤧᤴ ᤕᤧᤴᤏᤡᤴ ᤀᤡᤱᤎᤠᤱ ᤁᤧᤒᤡᤖᤢᤶᤏᤧᤓᤃᤪ

¹⁴ ᤀᤠᤱᤃᤠ᤹ᤀᤥ ᤏᤡᤱᤘᤠ᤹ ᤋᤠᤔᤠ ᤐᤠ᤺ᤴᤜᤠ᤹ ᤁᤧᤄᤥᤛᤢᤶᤗᤥ. ᤀᤠᤱᤃᤠ᤹ ᤂᤡᤏᤡ᤹ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤔᤡᤱᤛᤥ ᤀᤡᤱᤎᤠᤱ ᤐᤡᤏᤡᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤌᤠ᤺ᤰᤌᤧᤒᤠ ᤕᤠᤁᤢᤒᤧᤴ ᤐᤡᤖᤢᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤛᤠᤓ᤺ᤱᤈᤠ ᤐᤡᤏᤡᤱᤅᤠᤱ ᤁᤧᤛ᤺ᤳᤋᤡᤖᤥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ॥”