ᤕᤛᤤᤕᤠ 57 - LIFOTNTᤀᤡᤛᤪᤠᤀᤡᤗᤒᤠ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤂᤠᤛᤧᤴ ᤌᤠ᤹᤺ 1 ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤔᤧᤰᤗᤥ. ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤴ ᤜᤠ᤺ᤳᤗᤧᤀᤠᤱ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤋᤢᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ ᤔᤧᤓᤥ᤺ᤰᤂᤢ ᤔᤧᤍᤣ᤹ᤖᤢᤛᤡᤖᤥ. ᤁᤖ ᤁᤧᤍᤠᤒᤠ ᤋᤢᤰᤂᤣᤗᤠᤶ ᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤛᤠᤶᤕᤥᤒᤠᤜᤠ᤹ ᤔᤧᤓᤥ᤺ᤰᤂᤢ ᤔᤧᤍᤣ᤹ᤖᤢᤛᤡᤒᤠ ᤑᤠ᤹ᤀᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ 2 ᤁᤢᤍᤥ᤺ᤵᤔᤠ ᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤏᤢ᤹ᤔᤠᤍᤠᤔᤠᤀᤥ ᤔᤧᤗᤠ᤺ᤳᤗᤥ. ᤂᤧᤱᤜᤠ᤹ ᤔᤧᤛᤡ᤺ᤸᤗᤧ ᤂᤧᤱᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤔᤧᤄᤥᤛᤢᤖ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤁᤖ ᤔᤠᤱᤍᤣ᤺ᤶᤔᤧᤸᤗᤧ ᤁᤢᤛ᤻ᤛᤠᤛᤣ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤏᤢ ᤑᤧᤰᤁᤧᤗᤠ᤹ᤔᤧᤸᤗᤧ ᤁᤢᤎᤡᤴᤍᤠᤱ ᤛᤠᤕᤥᤒᤥᤖᤠᤛᤣ. ᤁ᤹ᤕᤥ ᤋᤩᤧᤶᤔᤧ᤹ᤀᤥ᥄ 4 ᤂᤡᤏᤡ᤹ ᤜᤠᤳ ᤁᤧᤃᤧ᤹ᤖᤢᤶ ᤁᤧᤛᤠ᤺ᤳᤋᤢᤶᤒᤣ᥅ ᤂᤡᤏᤡ᤹ ᤀᤠᤳᤋᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤔᤢᤖᤠᤴ ᤁᤧᤘᤧᤛᤢᤶᤗ ᤂᤡᤏᤡ᤹ ᤗᤧᤛᤥ᤺ᤵᤐᤠᤴ ᤁᤧᤗ᤺ᤳᤋᤢᤶᤒᤣ᥅ ᤌᤣ ᤂᤡᤏᤡ᤹ ᤐᤡᤑᤩᤢᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤏᤡᤱ ᤔᤣ᤺ᤶᤒᤡ᥅ 5 ᤕᤜᤡᤒᤠ ᤛᤡᤱᤒᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤏᤢ ᤁᤢᤛᤡᤃᤠᤱ ᤜᤧᤰᤁᤩᤠᤱ ᤁᤧᤖᤧᤰ ᤜᤢᤶᤒᤧᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤁᤧᤎᤢᤰᤋᤡᤖᤥ॥ ᤂᤡᤏᤡ᤹ ᤀᤠᤒᤠᤅᤣ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤘᤜ᤺ᤱ ᤏᤢ ᤕᤠᤰᤐᤣ᤹ᤑᤡ᤺ᤵᤔᤠᤜᤠ᤹ᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤧᤈᤥᤃᤢᤶᤛᤡᤶᤗᤥ॥ 6 ᤏᤧᤘᤠᤗᤠᤜᤠ᤹ᤀᤥᤒᤠ ᤘᤖᤧᤱᤗᤧᤱᤒᤠ ᤗᤢᤱᤜᤠ᤹ ᤂᤡᤏᤡ᤹ ᤔᤠᤱᤛᤡᤖᤥ. ᤂᤧᤱᤜᤠ᤹ ᤂᤧᤏᤡ᤹ ᤆᤧᤸᤗᤧᤰᤛᤣᤸᤗᤧ ᤛᤣᤈ᤺ᤱᤘᤠᤴ ᤏᤢ ᤁᤢᤈᤠᤴ ᤛᤡᤍᤢᤱᤈᤓᤠ ᤁᤧᤍᤥ᤺ᤶᤍᤢᤶᤔᤠᤱ ᤛᤧᤘᤠ ᤁᤧᤔᤧᤳᤋᤢᤶᤛᤡᤗᤥ॥ ᤀᤠᤱᤃᤠ᤹ᤃ ᤔᤣ᤺ᤴ. ᤂᤧᤱᤜᤠ᤹ᤀᤣ. ᤂᤡᤏᤡ᤹ ᤗᤰᤗᤥ. ᤀᤰᤋᤱᤒᤠ ᤐᤠ᤺ᤴᤜᤠ᤹ᤖᤧ ᤀᤠᤏᤡᤱᤘᤠ ᤋᤠᤖᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ 7 ᤁᤣ᤺ᤶᤒᤠ ᤏᤢ ᤆᤠᤱᤈᤠᤱᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤀᤥ ᤂᤡᤏᤡ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤡᤖᤥ. ᤂᤧᤳᤌᤥ ᤂᤡᤏᤡ᤹ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤁᤧᤒᤣᤃᤡᤖᤥ॥ 8 ᤂᤡᤏᤡ᤹ ᤗᤠᤶᤎᤣᤳ ᤏᤢ ᤗᤠᤶᤎᤣ᤺ᤳᤐᤢᤱᤅᤡᤸᤗᤧ ᤁᤢᤀᤣᤃᤠᤱ ᤂᤧᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤛᤣ᤺ᤴᤏᤡᤴ ᤁᤧᤕᤢᤰᤂᤢᤶᤗᤥ॥ ᤀᤠᤱᤃᤠ᤹ ᤕᤠᤵᤔᤡ ᤁᤧᤗᤧᤖᤡᤀᤠᤱ ᤂᤧᤏᤡ᤹ ᤀᤡᤵᤏᤠ᤺ᤴ ᤜᤸᤗᤧᤰ ᤁᤧᤜᤴᤍᤢᤶᤗᤥ᥄ ᤂᤡᤏᤡ᤹ ᤂᤧᤵᤔᤥ ᤁᤧᤗᤠᤛᤡᤖᤥ॥ ᤂᤧᤒᤩᤠᤱ ᤗᤧᤰᤆᤠ᤹ᤒᤢᤎᤢᤰ ᤁᤧᤈᤥ᤺ᤰᤁᤠᤛᤡᤖᤥ. ᤂᤢᤴᤇᤡ᤹ ᤀᤡᤵᤏᤠ᤺ᤴ ᤂᤧᤏᤡ᤹ ᤛᤡᤖᤠ᤹ᤌᤠᤅᤧᤀᤠᤱ ᤂᤧᤱᤜᤠ᤹ᤏᤢ ᤔᤠᤱᤜᤧᤰ ᤁᤧᤈᤥᤃᤢᤶᤗᤥ. ᤜᤧᤰᤁᤩᤠᤱ ᤂᤧᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤆᤠ᤹ᤒᤢᤎᤢ᤺ᤰᤁᤡᤴ ᤀᤥᤃᤧᤔᤧᤳᤋᤢᤶᤗᤥ॥ 9 ᤔᤥᤗᤥᤂ ᤔᤠᤱᤅᤡᤸᤗᤧ ᤁᤢᤍᤃᤡ ᤂᤡᤏᤡ᤹ ᤛᤠ᤹ᤖᤡᤰ ᤁᤢᤏᤠᤶᤃᤧᤏᤢ᤹ᤒᤠ ᤏᤡ᤺ᤱᤃᤣᤴ ᤁᤧᤜᤢ᤺ᤳᤋᤠᤛᤡᤀᤠᤱ ᤁᤧᤒᤣᤃᤡᤖᤥ॥ ᤜᤠᤱᤗᤠᤀᤡᤱᤒᤠᤜᤠ᤹ ᤂᤡᤏᤡ᤹ ᤛᤡᤖᤠ᤹ ᤁᤧᤎᤠᤱᤒᤠ ᤔᤠᤱ ᤁᤥ᤺ᤳᤇᤧ ᤛᤠ᤹ᤖᤡᤰ ᤔᤠ᤺ᤱᤄᤠ ᤔᤠ᤺ᤱᤄᤠ ᤁᤧᤒᤠᤱᤄᤢᤶᤛᤡᤶᤗᤥ. ᤂᤧᤒᤩᤠᤱ ᤂᤡᤏᤡ᤹ᤃ ᤂᤧᤔᤠᤕᤱᤛᤱ ᤌᤠᤖᤡᤰᤁᤠᤱ ᤁᤧᤒᤠᤱᤄᤢᤶᤛᤡᤶᤗᤥ॥ 10 ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤒᤠᤅᤣ ᤁᤧᤏᤠᤛᤡᤖᤥ. ᤁᤖᤛᤠᤱ ᤂᤡᤏᤡ᤹ ᤜᤧᤰᤁᤣ ᤆᤥ᤺ᤰᤔᤠ ᤁᤧᤸᤗᤧᤖᤢᤔᤡᤴᤗᤥ॥ ᤕᤠᤶᤃᤧᤛᤡᤱᤒᤠ ᤏᤠᤘᤠ ᤀᤡ᤺ᤳᤗᤠᤜᤠ᤹ᤖᤧ ᤛᤰᤔᤠ ᤀᤠᤒᤡᤖᤥ ᤜᤧᤰᤁᤩᤠᤱ ᤀᤠᤑᤠᤸᤗᤧᤀᤠᤱ ᤔᤧᤴᤎᤢᤶᤏᤠ ᤀᤠᤶᤒᤥᤱᤏᤧᤴ ᤁᤧᤗ᤹ᤖᤡᤖᤥ॥” 11 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤂᤡᤏᤡ᤹ ᤕᤱᤔᤠ ᤁᤡᤔᤠᤀᤥ ᤁᤧᤎᤠᤒᤠ ᤁᤴ ᤔᤠᤱᤜᤠ᤹ ᤜᤠ᤺ᤳᤇᤡᤀᤠᤱ ᤀᤠᤱᤃᤠ᤹ ᤀᤡᤱᤗᤧᤰ ᤐᤠᤴ ᤕᤠᤵᤔᤡ ᤁᤧᤔᤧᤳᤋᤡ ᤂᤧᤒᤩᤠᤱ ᤛᤃᤵ ᤕᤠᤵᤔᤡ ᤏᤡᤱᤘᤠ᤹ ᤁᤧᤓᤣ᤺ᤳᤇᤡᤒᤠᤒᤣ᥅ ᤌᤣ ᤀᤠᤱᤃᤠ᤹ ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤕᤖᤡᤰ ᤕᤧᤶ ᤌᤠᤖᤡᤰ ᤛᤫᤠ᤺ᤳ ᤕᤢᤱᤅᤠᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤕᤠᤵᤔᤡ ᤁᤧᤗᤧᤖᤧᤒᤠᤒᤡ᥅ 12 ᤀᤠᤏᤡᤃᤣ ᤆᤩᤠ ᤆᤥᤃᤢᤶᤒᤧᤛᤠᤱ ᤂᤧᤴ ᤁᤢᤍᤥ᤺ᤵᤔᤠᤀᤣ ᤆᤥᤰ ᤑᤠ᤹ᤀᤠᤱ ᤂᤧᤏᤡ᤹ ᤁᤧᤀᤡ᤺ᤳᤋᤢᤶᤗᤥ ᤁᤖ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤴ ᤏᤡᤎᤠ᤺ᤵᤗ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤂᤧᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤁᤢᤓᤠ᤹ ᤐᤡᤔᤠ ᤁᤧᤴᤇᤢᤰᤋᤡᤴᤗᤥ॥ 13 ᤂᤡᤏᤡ᤹ ᤀᤠᤓᤠ᤹ᤖᤧ᤹ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ. ᤂᤡᤏᤡ᤹ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤂᤧᤏᤡ᤹ ᤁᤧᤶᤛᤧ᤺ᤵᤋᤡᤖᤖᤥ॥ ᤛᤠᤶᤔᤡ᤺ᤳᤌᤡᤰ ᤛᤢᤀᤡᤰ ᤗ᤹ᤀᤡᤸᤗᤧ ᤂᤧᤱᤜᤠ᤹ ᤑᤧᤛᤢ ᤋᤣ᤹ᤖᤢᤛᤡᤖᤥ. ᤁᤖ ᤀᤠᤱᤃᤠ᤹ᤀᤥ ᤏᤡᤱᤘᤠ᤹ ᤁᤧᤕᤢᤱᤒᤠᤜᤠ᤹ᤖᤧᤃ ᤀᤠᤗᤠᤈᤣᤴ ᤗᤰ ᤔᤧᤄᤥᤛᤢᤖᤥ ᤜᤧᤰᤁᤩᤠᤱ ᤀᤠᤛᤣᤛᤣ ᤁᤥ᤺ᤰᤔᤠᤴ ᤕᤢᤰ ᤔᤧᤈᤥᤃᤢᤖᤥ॥” ᤏᤢ᤹ᤔᤠᤍᤠᤔᤠ ᤏᤢ ᤁᤢᤓᤠ᤹ᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ 14 ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤥ ᤁᤧᤏᤧᤒᤠ ᤀᤠᤄᤄᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤳᤋᤠᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ᤀᤥ ᤔᤧᤏᤢ᤺ᤱᤗᤖᤥ᥄ ᤗᤠᤶ ᤋᤕᤠᤶᤔᤧ᤹. ᤗᤠᤶ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤥ᥄ 15 ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤌᤠ᤺ᤱ ᤁᤧᤕᤢᤱᤒᤠ. ᤛᤣᤛᤣ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥ ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤏᤢ ᤛᤣᤛᤣᤒᤠᤍᤧᤴᤏᤥ ᤕᤢᤱᤅᤠᤖᤥ ᤁᤖ ᤕᤠᤶᤛᤠᤶᤔᤥ ᤏ᤺ᤶᤏ᤺ᤶᤒᤠ ᤏᤢ ᤗᤠᤕᤥᤗᤠᤶ ᤁᤧᤜᤡ᤺ᤴᤇᤡᤱᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤛᤧᤀᤠᤱ ᤂᤧᤱᤜᤠ᤹ᤏᤢ ᤘᤠ᤹ᤀᤠᤖᤥ॥ 16 ᤀᤠᤱᤃᤠ᤹ ᤀᤠᤓᤧᤸᤗᤧᤛᤠᤱ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤔᤧᤒᤥᤱᤅᤠᤴᤗᤥ. ᤜᤧᤰᤁᤩᤠᤱ ᤁᤢᤕᤠᤰ ᤁᤧᤗᤧ᤹ᤒᤠ ᤔᤧᤒᤥᤱᤅᤠᤴᤗᤥ. ᤔᤧ᤺ᤴᤏᤡ᤺ᤸᤗᤧᤃ ᤀᤠᤱᤃᤠ᤹ ᤀᤠᤍᤃᤡ ᤀᤠᤱᤃᤠ᤹ ᤏᤠᤘᤠᤃᤧᤴ ᤆᤀᤡᤳ ᤆᤥᤃᤢᤱᤒᤠ— ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤏᤠᤕᤥᤒᤠ ᤐᤥ᤺ᤰᤂᤧᤒᤠᤖᤥ॥ 17 ᤀᤠᤱᤃᤠ᤹ᤖᤰ ᤆᤥᤃᤢᤱ ᤐᤠ᤺ᤳᤋᤢᤱ ᤁᤧᤗ᤹ᤒᤠ ᤂᤧᤸᤗᤧ ᤗᤠᤕᤥ ᤀᤡᤛ᤻ᤛᤣ᤺ᤱᤒᤠ ᤁᤢᤏᤡᤱᤘᤠ᤺ᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤕᤠᤰ ᤗᤧ᤹ᤖᤧᤀᤠᤱ ᤘᤕᤠᤱᤗᤥ॥ ᤀᤠᤱᤃᤠ᤹ ᤂᤧᤴ ᤂᤢᤶᤍᤡᤱ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤠᤖᤠᤴ ᤆᤡᤰᤂᤢᤱᤗᤥ॥ ᤁᤖᤛᤠᤱ ᤂᤧᤴ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤀᤠᤒᤠᤅᤣ ᤁᤢᤗᤠᤶᤔᤡᤴ ᤏᤠ᤺ᤵᤔᤠ ᤔᤧᤗᤧᤖᤢᤴᤗᤥ॥ 18 ᤀᤠᤱᤃᤠ᤹ ᤂᤧᤸᤗᤧ ᤁᤢᤘᤠ᤹ᤔᤠ ᤁᤢᤒᤣ᤺ᤰᤔᤠ ᤗᤠᤶᤜᤠ᤹ ᤏᤡᤛᤢᤱᤗᤥ. ᤁᤖ ᤀᤠᤱᤃᤠ᤹ ᤂᤧᤴ ᤘᤣ᤺ᤴᤍᤢᤱᤗᤥ॥ ᤀᤠᤱᤃᤠ᤹ ᤂᤧᤴ ᤗᤠᤶᤗᤥᤛᤢᤱᤗᤥ. ᤜᤧᤰᤁᤩᤠᤱ ᤕᤠᤶᤔᤥ ᤀᤠ᤺ᤴᤇᤡᤱᤔᤠ ᤐᤡᤖᤢᤱᤗᤥ. 19 ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤔᤧᤖᤡᤱ ᤁᤧᤎᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤏᤠᤖᤠᤑᤥᤔᤠ ᤐᤠ᤺ᤴᤜᤠ᤹ ᤗ᤺ᤵᤔᤠᤖᤧ ᤗᤠᤃᤡ. ᤔᤠ᤺ᤱᤄᤠ ᤏᤢ ᤏᤡ᤺ᤳᤋᤠᤱ ᤁᤧᤕᤢᤱᤒᤠᤜᤠ᤹ᤖᤧ ᤏᤧᤵᤔᤠᤱ ᤛᤏᤠᤖᤢᤱ ᤏᤢ᤹ᤔᤠ ᤋᤠᤔᤠ ᤐᤥᤱᤗᤖᤥ. ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤘᤣ᤺ᤴᤍᤢᤱᤛᤡᤱᤗᤥ” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 20 ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤃ ᤘᤠᤓᤧᤸᤗᤧᤱ ᤁᤧᤒᤥ᤺ᤰᤐᤠ ᤘᤖ᤺ᤱ ᤁᤢᤀᤡᤛᤡ᤺ᤰᤛᤡᤖᤥ. ᤂᤧᤱᤜᤠ᤹ ᤛᤫᤠ᤺ᤳ ᤘᤠ᤹ᤔᤠ ᤔᤧᤴᤇᤢᤰᤏᤧᤴᤗᤥ. ᤂᤧᤴ ᤆᤫᤠ᤺ᤳᤋᤡᤸᤗᤧ ᤔᤠᤰᤂᤢᤴᤍᤩᤠ ᤏᤢ ᤗᤧᤰᤘᤠᤴ ᤗᤠ᤺ᤰᤁᤠᤳ ᤗᤠᤵᤑᤢᤛᤢᤖᤥ॥ 21 “ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠᤴ ᤆᤡᤈᤡ ᤕᤧᤶᤕᤧᤶ ᤔᤧᤒᤥᤱᤏᤧᤴᤗᤥ” ᤑᤠ᤹ᤀᤠᤱ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.