ᤕᤛᤤᤕᤠ 56 - LIFOTNT

ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤛᤧᤴᤗᤵ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤁᤢᤍᤥ᤺ᤵᤔᤠ ᤂᤠᤛᤧᤴᤗᤥᤶᤔᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ. ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤗᤠᤶ ᤂᤥᤔᤠ ᤁᤧᤒᤥᤱᤒᤠ ᤛᤧᤴᤗᤵᤐᤡᤴ ᤏᤡ᤺ᤳᤋᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤶᤕᤥᤏᤡᤔᤠᤴ ᤜᤠᤖᤠᤀᤣ ᤀᤥᤛᤣ᤺ᤴᤎᤠᤱ ᤐᤥᤱᤗᤥ॥

² ᤀᤠᤳᤋᤡᤸᤗᤧ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤔᤧᤶᤓᤣ᤺ᤴᤏᤣ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤜᤠ᤺ᤳᤗᤧ ᤁᤢᤜᤢᤰᤁᤡᤴ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤗᤠ᤺ᤳᤗᤠᤳ ᤁᤳᤋᤢ᤹. ᤂᤧᤴ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ॥”

³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ᤏᤢ ᤁᤧᤍᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤸᤗᤖᤥ. “ᤛᤧᤰᤂᤠᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤥᤗᤠᤶ ᤀᤠᤱᤃᤠ᤹ ᤗᤠ᤺ᤳᤗᤠᤳ ᤆᤥ᤺ᤰᤁᤠᤖᤥ॥” ᤀᤠᤳᤋᤡᤴ ᤛᤡᤱᤃᤠᤖᤢᤸᤗᤧᤀᤠᤱ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤸᤗᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤠᤱᤃᤠ᤹ᤃ ᤁᤧᤜᤣᤒᤠ ᤛᤡᤱᤒᤢᤱᤀᤠᤖᤥ॥”

⁴ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤠᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹. ᤀᤠᤱᤃᤠ᤹ ᤀᤠᤛᤡᤖᤠ᤹ ᤁᤧᤎᤠᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤜᤧᤰᤁᤩᤠᤱ ᤀᤠᤔᤠᤱᤜᤢᤵᤜᤠ᤹ ᤌᤎᤵ ᤔᤧᤸᤗ᤹ᤀᤣ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤛᤡᤱᤃᤠᤖᤢᤜᤠ᤹

⁵ ᤀᤠᤱᤃᤠ᤹ ᤀᤠᤜᤡᤶᤔᤥ ᤏᤢ ᤂᤧ᤹ᤕᤥᤒᤠ ᤗᤢᤱᤎᤠᤰᤜᤠ᤹ ᤛᤡᤃᤠᤱ ᤀᤠᤛ᤻ᤛᤠ ᤀᤠᤀᤣᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ᤛᤥᤰ ᤆᤥᤃᤢᤱᤛᤡᤱᤗᤥ॥ ᤂᤧᤒᤩᤠᤱ ᤂᤧᤱᤜᤠ᤹ ᤏᤢᤒᤠ ᤔᤡᤱ ᤐᤡᤖᤢᤱᤛᤡᤱᤗᤥ. ᤂᤧᤱᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤶᤔᤠᤔᤏᤠᤒᤠ ᤔᤡᤱ ᤐᤡᤖᤢᤱᤛᤡᤱᤗᤥ॥

⁶ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤋᤱᤛᤡᤱᤛᤧ ᤁᤧᤍᤠᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠ. ᤂᤢᤏᤧ᤹ ᤁᤢᤛᤧᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤂᤢᤏᤧ᤹ ᤔᤡ᤺ᤶ ᤁᤧᤔᤧᤵᤐᤠ. ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤁᤧᤒᤥᤱᤒᤠ. ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤏᤢ ᤁᤢᤔᤠᤱᤜᤢᤵᤐᤡᤴ ᤏᤢᤖᤡᤰ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤔᤧᤳᤋᤢᤛᤡᤖᤥ.

⁷ ᤀᤠᤱᤃᤠ᤹ ᤛᤡᤕᤥᤏ ᤏᤢ ᤛᤣᤛᤣᤒᤠ ᤁᤥ᤺ᤰᤔᤠᤀᤥ ᤋᤠ᤺ᤳᤏᤡᤱᤗᤥ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤍᤥ᤺ᤴᤍᤢᤶᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤠ᤺ᤰᤋᤢᤱᤗᤥ॥ ᤀᤠᤱᤃᤠ᤹ ᤀᤠᤜᤡᤶᤔᤧᤴ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤣᤗᤡ ᤑᤠᤰᤔᤠ ᤜᤡᤶ ᤐᤥᤱᤗᤥ॥”

⁸ ᤀᤡᤛᤪᤠᤀᤡᤗᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡᤒᤠᤜᤠ᤹ ᤁᤧᤓᤢᤱᤒᤠ. ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥᤃᤢᤖᤥ. “ᤁᤧᤈᤢᤶᤒᤠ ᤁᤧᤈᤢ᤺ᤵᤐᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤸᤗᤛᤠᤱ ᤆᤢᤶᤔᤠ ᤁᤧᤒᤥᤱᤒᤠᤜᤠ᤹ ᤀᤠᤱᤃᤠ᤹ ᤛᤢᤵᤛᤢᤱᤛᤡᤱᤗᤥ॥”

ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤖᤧᤴ ᤀᤠᤵᤋᤡᤰ

⁹ ᤏᤧᤏᤧᤒᤠᤍᤧᤴᤏᤥ ᤁᤧᤘᤠ᤹ᤒᤠ ᤁᤧᤖᤧᤰ ᤌᤰᤛᤠᤛᤣ. ᤋᤩᤧᤶᤔᤧ᤹ᤀᤥ. ᤋᤠᤶᤓᤢᤱᤅᤥᤒᤠ ᤁᤧᤖᤧᤰ ᤌᤰᤛᤠᤛᤣ. ᤋᤩᤧᤶᤔᤧ᤹ᤀᤠᤱ ᤆᤩᤧᤶᤔᤧ᤹ᤀᤥ᥄

¹⁰ ᤀᤡᤛᤪᤠᤀᤡᤗᤒᤠ ᤁᤶᤒᤪᤠᤱᤒᤠᤜᤠ᤹ ᤔᤡᤰᤑ᤺ᤶᤒᤠ ᤔᤧᤈᤥᤰᤗᤥ. ᤂᤧᤱᤜᤠ᤹ ᤁᤧᤖᤧᤰ ᤛᤡᤰᤁᤢᤶ ᤏᤡᤱᤘᤠ᤹ ᤔᤣ᤺ᤴᤏᤣᤒᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ ᤜᤔᤠ ᤔᤧᤴᤇᤢᤰᤔᤏᤠᤒᤠ ᤁᤧᤒᤠ ᤁᤥ᤺ᤳᤆᤥ ᤁᤢᤛᤡᤰ ᤔᤧᤗ᤹ᤖᤥ. ᤜᤠᤒᤠ ᤗᤧᤶᤒᤧᤳ ᤏᤧᤔᤠ ᤏᤢ ᤀᤡᤶᤔᤠᤖᤰ ᤂᤢᤴᤇᤡ᤹ ᤛᤡᤖᤠ᤹ᤎᤠᤱᤗᤥ॥

¹¹ ᤂᤧᤱᤜᤠ᤹ᤃ ᤛᤠ᤹ᤖᤡᤰ ᤂᤢᤴᤇᤡ᤹ ᤛᤡᤰᤁᤧᤗᤠ᤺ᤰᤐᤠ ᤁᤥ᤺ᤳᤆᤥᤛᤡᤖᤥ. ᤂᤧᤱᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤱᤄᤠᤏᤧᤴᤗᤥ. ᤂᤧᤱᤜᤠ᤹ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤧ᤺ᤴᤍᤠ ᤐᤡᤳ ᤁᤧᤃᤶᤒᤠᤛᤡᤖᤥ॥ ᤂᤧᤱᤜᤠ᤹ ᤁᤧᤖᤧᤰ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤶᤔᤥ ᤗᤠᤱᤔᤧᤄᤣ᤺ᤰᤁᤠᤱ ᤔᤧᤘᤠ᤹ᤖᤥ. ᤁᤧᤖᤧᤰᤗᤧ ᤀᤠᤒᤠᤅᤣ ᤂᤢᤴᤇᤡ᤹ ᤏᤢᤒᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ᤖᤰ ᤔᤧᤃᤥ᤺ᤳᤋᤢᤖᤥ॥

¹² ᤂᤧᤱᤜᤠ᤹ ᤁᤧᤖᤧᤰᤗᤧ ᤔᤧᤒᤠ᤺ᤳᤋᤢᤖᤥ. “ᤋᤩᤧᤶᤔᤧ᤹. ᤀᤠᤱᤃᤠ᤹ ᤆᤧᤸᤗᤧᤰᤛᤣ᤹ ᤌᤡ ᤋᤠ᤺ᤵᤔᤠ ᤀᤠᤒᤠᤱᤄᤧ᤹ᤀᤥ᥄ ᤌᤡᤀᤠᤱ ᤛᤢᤰᤛᤢᤰ ᤌᤢᤅᤢᤶᤗᤥ᥄ ᤋᤠ᤺ᤴᤍᤡᤰᤁᤠᤱ ᤀᤠᤀᤡᤴᤒᤠ ᤕᤧᤴ ᤜᤧᤰᤁᤣᤀᤣ ᤐᤥᤱᤗᤥ ᤀᤡᤃᤪ ᤀᤠᤀᤡᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤢᤒᤠ ᤐᤥᤱᤗᤥ॥”