ᤕᤛᤤᤕᤠ 55 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤘᤠ ᤁᤧᤔᤡᤒᤠᤜᤠ᤹ ᤀᤢ᤺ᤳᤋᤢᤛᤡ

¹ “ᤁᤧᤖᤧᤰ ᤁᤢᤘᤠ ᤁᤧᤔᤡ᤺ᤰᤐᤠᤛᤣ. ᤆᤫᤠ᤺ᤳ ᤁᤧᤏᤧᤒᤠᤍᤧᤴᤏᤥ ᤋᤩᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤕᤠᤱ ᤔᤧᤱᤃᤵᤔᤏᤠᤒᤠᤜᤠ᤹ᤀᤠᤱ ᤋᤩᤧᤶᤔᤧ᤹ᤀᤥ ᤂᤧᤒᤩᤠᤱ ᤀᤡᤅᤧᤶᤔᤧ᤹ᤀᤠᤱ ᤌᤢᤅᤧᤶᤔᤧ᤹ᤀᤥ॥ ᤕᤠᤱ ᤔᤣ᤺ᤴᤏᤣᤀᤣ ᤋᤩᤧᤶᤔᤧ᤹ᤀᤥ. ᤂᤧᤶᤒᤩᤠᤱ ᤕᤠᤱ ᤔᤣ᤺ᤴᤏᤣ ᤏᤢ ᤁᤢᤔᤧᤸᤗᤢᤱ ᤔᤣ᤺ᤴᤏᤣᤀᤣ ᤛᤣᤈᤱᤘᤠᤴ ᤏᤢ ᤐᤡᤳᤏᤢᤴ ᤀᤡᤅᤧᤶᤔᤧ᤹ᤀᤥ॥

² ᤂᤖᤧ᤺ᤱ ᤔᤣ᤺ᤶᤒᤠ ᤐᤠ᤺ᤴᤏᤥ ᤌᤣᤀᤠᤱ ᤕᤠᤱ ᤆᤠᤃᤧᤛᤥ᤺ᤰᤂᤢᤶᤒᤠᤒᤣ᥅ ᤜᤧᤰᤁᤩᤠᤱ ᤛᤡᤰᤔᤧᤴᤀᤣ᤺ᤵᤔᤏᤠᤒᤠ ᤐᤠ᤺ᤴᤏᤥ ᤌᤣᤀᤠᤱ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤁᤧᤈᤥᤃᤡᤒᤠᤒᤣ᥅ ᤏᤢᤖᤡᤰᤁᤠᤱ ᤂᤧᤵᤛᤠᤶᤔᤧ᤹. ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤠᤒᤠ᤺ᤴᤏᤡᤴ ᤂᤧᤵᤛᤠᤶᤔᤧ᤹ᤀᤥ. ᤂᤧᤒᤩᤠᤱ ᤀᤠᤳᤋᤡᤴ ᤁᤢᤈᤠᤴ ᤏᤢᤒᤠ ᤆᤥᤰ ᤀᤠᤶᤓᤠ ᤂᤧᤴ ᤆᤠᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤁᤢᤈᤠᤃᤧᤏᤢ᤹ᤒᤠ ᤁᤢᤈᤠᤜᤠ᤹ ᤁᤧᤈᤠᤶᤔᤠᤱ ᤂᤡᤏᤡ᤹ ᤛᤰᤔᤠᤛᤠᤶᤔᤡᤴ ᤁᤢᤏᤡᤱᤘᤠ᤹ ᤋᤠᤖᤥ॥

³ “ᤂᤧᤶᤔᤠᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤥ ᤋᤩᤧᤶᤔᤧ᤹ᤀᤥ. ᤂᤧᤵᤛᤠᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤜᤡᤱᤗᤖᤥ॥ ᤀᤠᤱᤃᤠ᤹ ᤂᤧᤏᤡ᤹ᤏᤢ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤔᤠᤱᤜᤢᤵ ᤆᤥᤃᤢᤱᤗᤥ. ᤍᤠᤀᤢᤍᤧᤴᤏᤢ ᤔᤠᤱᤜᤢᤵ ᤆᤥᤃᤢᤱᤒᤠ ᤀᤠᤑᤠᤸᤗᤧᤀᤠᤱ ᤔᤧᤴᤏᤢᤵᤏᤠᤒᤠ ᤔᤡ᤺ᤶᤈᤡᤴ ᤂᤧᤏᤡ᤹ ᤐᤡᤏᤡᤱᤗᤥ॥

⁴ ᤀᤠᤱᤃᤠ᤹ ᤂᤢᤏᤧ᤹ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤋᤥ᤺ᤴᤍᤡ ᤁᤧᤒᤡᤒᤠ ᤆᤥᤃᤢᤱᤒᤠᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤢᤏᤧ᤹ ᤗᤠᤶᤗᤥᤒᤠ ᤆᤥᤃᤢᤱᤗᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤆᤥᤃᤢᤱᤗᤥ॥

⁵ ᤀᤠᤸᤗ ᤂᤧᤏᤡ᤹ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤀᤢ᤺ᤳᤋᤢᤶᤛᤡᤶᤗᤥ— ᤌᤡᤰ ᤕᤧᤶᤔᤥ ᤂᤧᤱᤜᤠ᤹ᤖᤧ ᤂᤧᤏᤡ᤹ ᤁᤢᤛᤡᤱ ᤁᤧᤔᤧᤴᤏᤡ᤺ᤳᤋᤡᤸᤗᤥ. ᤁᤖ ᤀᤠᤸᤗ ᤂᤧᤱᤜᤠ᤹ ᤂᤡᤏᤡ᤹ᤏᤢ ᤑᤢᤳᤇᤡᤱᤔᤠᤖᤧ ᤗᤠᤃᤡ ᤔᤧᤗᤥᤰ ᤔᤧᤍᤠᤖᤥ᥄ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠᤸᤗᤧ ᤂᤡᤏᤡ᤹ ᤔᤡᤔᤡᤍᤡᤱ ᤆᤥ᤺ᤰᤏᤡᤱᤅᤠᤱ ᤘᤠ᤹ᤖᤥ॥”

⁶ ᤕᤜᤘᤣ ᤍᤠᤱᤒᤧᤴ ᤂᤥᤔᤠ ᤛᤢᤰᤋᤧᤳᤗ ᤑᤠ᤹ᤀᤠᤱ ᤁᤥ᤺ᤳᤋᤧᤶᤔᤧ᤹ᤀᤥ ᤂᤧᤒᤩᤠᤱ ᤂᤢᤏᤧ᤹ ᤏᤡ᤺ᤳᤋᤠᤱ ᤘᤠ᤹ᤀᤡᤸᤗᤧᤛᤠ ᤋᤢᤔᤧᤶᤔᤧ᤹ᤀᤥ॥

⁷ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤀᤠᤒᤠᤅᤣ ᤁᤢᤗᤠᤶᤔᤡᤴ ᤏᤠ᤺ᤵᤔᤠ ᤏᤠ᤹ᤖᤢᤖᤖᤥ ᤜᤧᤰᤁᤩᤠᤱ ᤗᤠᤕᤥ ᤁᤧᤈᤥ᤺ᤰᤐᤠᤸᤗᤧ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤗᤧᤖᤢᤍᤣᤛᤢᤖᤖᤥ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤗᤧᤵᤛᤠᤱ ᤏᤢ᤺ᤱᤗᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤖᤥ॥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤡᤛᤠᤱ ᤂᤧᤴ ᤜᤡᤛᤡᤱᤗᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤠᤶᤒᤠᤴ ᤔᤧᤴᤜᤢᤱᤅᤣ ᤗᤧᤵᤔᤡ ᤐᤡᤖᤢᤖᤥ॥

⁸ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤀᤡ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠ ᤐᤠ᤺ᤴᤜᤠ᤹ ᤔᤣ᤺ᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤠ᤺ᤳᤋᤢᤶᤒᤠ ᤗᤠᤶᤜᤠ᤹ ᤀᤠᤗᤠᤶ ᤔᤣ᤺ᤸᤗᤥ॥

⁹ ᤋᤠᤱᤛᤠᤱᤒᤧᤴ ᤀᤡᤰᤛᤠ ᤂᤠᤶᤒᤣ᤺ᤰᤏᤢ᤺ᤸᤗᤧ ᤌᤠ᤺ᤱ ᤐᤳᤗᤥ. ᤂᤧᤶᤓᤗ᤹ᤖᤡᤰᤁᤣ ᤀᤠᤱᤃᤠ᤹ ᤀᤠᤗᤠᤶᤜᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥᤰᤗᤥ॥

¹⁰ “ᤋᤠᤱᤛᤠᤰᤐᤥᤗᤠᤶ ᤘᤜᤡᤳ ᤏᤢ ᤏᤠ᤺ᤱ ᤌᤠᤛᤢᤖᤥ ᤜᤧᤰᤁᤣᤛᤠᤱ ᤂᤧᤴ ᤕᤠᤱᤎᤠ᤺ᤱ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤸᤗᤥ. ᤁᤖ ᤂᤠᤶᤒᤠᤱᤅᤡᤴ ᤘᤓᤡ᤺ᤴᤍᤢᤀᤠᤱ ᤆᤠ ᤗᤡᤱᤗ ᤕᤠ᤺ᤴᤍᤢᤖᤥ. ᤂᤧᤒᤩᤠᤱ ᤆᤠ ᤁᤧᤜᤣ᤹ᤒᤠᤸᤗᤧ ᤗᤠᤃᤡ ᤕᤠ᤹ᤖᤡ᤺ᤶᤒᤠ ᤏᤢ ᤆᤠᤔᤠ ᤁᤢᤈᤠ ᤐᤡᤖᤢᤖᤥ.

¹¹ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤀᤠᤒᤠ᤺ᤴᤈᤠ᤺ᤰᤁᤡᤴᤏᤠᤱ ᤐᤥᤱᤗᤥ॥ ᤂᤧᤴ ᤀᤠᤒᤠ᤺ᤴᤈᤠ᤺ᤰᤁᤡᤴ ᤌᤣᤏᤠᤎᤣ ᤕᤠᤱᤏᤠ ᤀᤠᤱᤃᤠ᤹ᤀᤥ ᤔᤧᤏᤢ᤺ᤱᤏᤧᤸᤗᤥ. ᤁᤖ ᤀᤠᤱᤃᤠ᤹ ᤆᤥ᤺ᤰᤔᤠ ᤁᤥ᤺ᤳᤋᤢᤱᤒᤠ ᤕᤠ᤺ᤶᤒᤰᤁᤡᤴ ᤂᤧᤸᤗᤧ ᤆᤥᤃᤢᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤐᤠᤱᤄᤢᤱᤒᤠᤴ ᤂᤧᤸᤗᤧ ᤁᤢᤗᤡᤱᤍᤥ ᤁᤧᤳᤋᤢᤖᤥ॥

¹² ᤂᤡᤏᤡ᤹ ᤏᤡᤱᤘᤠ᤹ ᤋᤠᤀᤠᤱ ᤁᤧᤒᤣᤃᤡᤖᤥ. ᤜᤧᤰᤁᤩᤠᤱ ᤛᤏᤠᤖᤢᤱᤅᤠᤱ ᤗᤠᤶ ᤁᤧᤶᤗᤥᤛᤡᤖᤥ॥ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ ᤂᤡᤏᤡ᤹ ᤐᤡᤛᤠᤱ ᤛᤠᤶᤔᤧᤗᤥᤖᤥ. ᤂᤧᤶᤒᤩᤠᤱ ᤋᤧᤶᤒᤣ᤹ᤀᤥ ᤁᤧᤕᤢᤱᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤖᤧ ᤜᤡᤵᤗᤠ ᤔᤧᤜᤡᤵᤋᤢᤖᤥ॥

¹³ ᤂᤶᤒᤩᤠᤱ ᤋᤡᤱᤅᤡᤸᤗᤧ ᤁᤢᤗᤧᤰᤘᤠ ᤀᤠ᤺ᤱ ᤗᤡᤱᤗᤥ. ᤛᤣᤷᤍᤠ᤺ᤰᤔᤠᤸᤗᤧ ᤁᤢᤗᤧᤰᤘᤠ ᤑᤢᤱ ᤁᤧᤓᤧᤰᤐᤠ ᤛᤡᤱᤒᤢᤱ ᤗᤡᤱᤗᤥ॥ ᤂᤧᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱ ᤋᤡ᤺ᤵᤔᤠᤖᤧ ᤗᤠᤃᤡ ᤐᤥᤱᤗᤥ. ᤂᤧᤴ ᤀᤠᤓᤧᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠ ᤛᤍᤠᤍᤡᤱᤗᤧ ᤗᤠᤃᤡ ᤔᤡᤰᤛᤣᤴ ᤐᤥᤱᤗᤥ॥”