ᤕᤛᤤᤕᤠ 54 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ

¹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢ᤹. “ᤕᤖᤢᤛᤗᤧ᤺ᤶᤔᤣ. ᤂᤧᤏᤧ᤹ ᤛᤠᤔᤧᤱᤃᤵᤔᤏᤠᤔᤠ ᤔᤧᤴᤇᤢᤔᤠ ᤁᤢᤛᤡᤱ ᤁᤧᤘᤕᤧᤖᤥ. ᤁᤖ ᤀᤠᤸᤗ ᤂᤧᤏᤧ᤹ ᤛ᤺ᤵᤔᤠᤀᤠᤱ ᤛᤠᤶᤗᤥᤔᤠ ᤏᤢ ᤀ᤺ᤰᤔᤠ ᤁᤧᤛᤢᤰᤗᤥ. ᤌᤣᤀᤠᤱᤓᤧᤸᤗᤧ ᤜᤡᤶᤎᤰᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠᤜᤠ᤹ᤏᤢ᤺ᤸᤗᤧ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ ᤕᤖᤡᤰ ᤔᤧᤒᤥᤱᤗᤥ॥

² “ᤂᤧᤏᤧ᤹ ᤁᤧᤕᤠᤱᤎᤥ᤺ᤰᤔᤠ ᤛᤠ᤺ᤱᤃᤠᤜᤡᤶᤔᤧᤴ ᤑᤥᤛᤧ᤹ᤀᤥ. ᤁᤧᤛᤠ᤺ᤱᤃᤠᤜᤡᤶᤔᤧᤸᤗᤧ ᤁᤢᤄᤠᤵᤔᤧᤴ ᤕᤶᤒᤠ ᤂᤡᤱᤛᤧ᤹ᤀᤥ. ᤂᤧᤸᤗᤧ ᤁᤢᤄᤣ᤺ᤱᤔᤠ ᤌᤠᤰᤐᤠᤜᤠ᤹ ᤁᤣ᤺ᤶᤒᤠ ᤆᤥᤃᤧ᤹ᤀᤥ. ᤜᤧᤰᤁᤩᤠᤱ ᤁᤡᤸᤗᤠᤜᤠ᤹ ᤔᤧᤶᤔᤢᤴᤏᤣ ᤜᤠᤰᤋᤧ᤹ᤀᤥ॥

³ ᤌᤣᤀᤠᤱᤓᤧᤸᤗᤧ ᤕᤖᤡᤰ ᤁᤧᤒᤥᤱᤅᤠᤱ ᤆᤢᤰᤘᤠ ᤏᤢ ᤑᤧᤱᤘᤠ ᤁᤧᤒᤥᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤎᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤴᤇᤡ᤹ ᤔᤧᤕᤢᤱᤒᤠᤍᤧᤴᤏᤥᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖᤥ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠ ᤋᤧᤴᤜᤠ᤹ᤀᤥ ᤔᤧᤕᤢᤱᤗᤥ॥

⁴ “ᤔᤧᤃᤡᤛᤧᤴᤏᤧ᤹. ᤂᤧᤏᤧ᤹ ᤛᤡᤖᤡᤱᤔᤔᤥ ᤌᤠᤔᤠ ᤔᤧᤒᤥᤱᤏᤧᤸᤗᤥ. ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤋᤧᤸᤗᤧ ᤔᤧᤱᤃᤡᤀᤥ. ᤂᤧᤏᤧ᤹ ᤆᤢᤰᤔᤠ ᤁᤧᤶᤒᤥᤱᤏᤧᤸᤗᤥ॥ ᤂᤧᤏᤧ᤹ ᤁᤧᤘᤧᤴᤏᤧᤸᤗᤧᤒᤠ ᤏᤢ᤺ᤶᤔᤧᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤖᤥ. ᤜᤧᤰᤁᤩᤠᤱ ᤔᤣᤔᤣᤍᤢᤔᤠ ᤁᤧᤒᤥ᤺ᤰᤂᤧᤒᤠ ᤀᤡᤱᤍᤥᤴ ᤂᤧᤏᤧ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤸᤗᤥ॥

⁵ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤠᤴ ᤁᤧᤜᤡᤶᤛᤠᤒᤠᤖᤥ. ᤂᤢᤏᤧ᤹ ᤁᤢᤔᤡᤱᤃ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤖᤥ॥ ᤀᤡᤛᤪᤠᤀᤡᤗᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤎᤧ᤹ᤒᤠᤖᤥ. ᤂᤢᤏᤧ᤹ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤡᤱᤘᤠ᤹ᤑᤢᤔᤠᤱ ᤔᤧᤔᤧᤳᤋᤢᤖᤥ॥

⁶ ᤔᤧᤏᤠ᤹ᤖᤢᤔᤠ ᤏᤢ ᤁᤢᤏᤡᤱᤘᤠ᤹ ᤋᤢᤰᤂᤣ ᤁᤧᤈᤠᤔᤠ. ᤔᤧᤴᤇ᤻ᤕᤠ ᤘᤕᤧᤸᤗᤧ ᤔᤣ᤺ᤰᤂᤡᤶ ᤁᤧᤒᤥᤱᤔᤠ ᤜᤧᤰᤁᤩᤠᤱ ᤋᤠ᤺ᤴᤍᤡ ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤔᤠ ᤔᤣ᤺ᤳ ᤜᤧᤰᤁᤣᤀᤣ ᤂᤧᤏᤧ᤹ ᤁᤧᤴᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤕᤠᤶᤔᤥ ᤁᤧᤀᤢ᤺ᤳᤗᤥ.” ᤂᤧᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹॥

⁷ “ᤛᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤏᤠ᤹ᤏᤧᤀᤠᤱ ᤘᤕᤧᤖᤥ. ᤁᤖ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤏᤧᤀᤠᤱ ᤕᤠᤶᤔᤥ ᤋᤠ᤺ᤳᤏᤧᤖᤥ॥

⁸ ᤀᤠᤱᤃᤠ᤹ ᤀᤠᤛᤡᤰ ᤀᤕᤠᤰ ᤗ᤹ᤖᤧᤸᤗᤧ ᤛᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ᤗᤠᤶ ᤗᤠ᤺ᤳᤗᤠ᤺ᤳ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤗᤥ. ᤁᤖ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤔᤡ᤺ᤶᤈᤡ ᤀᤥ᤺ᤴᤎᤠᤰᤏᤧᤀᤠᤱ ᤗᤢᤱᤔᤠ᤹ ᤋᤢᤰᤏᤧᤖᤥ.” ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤎᤧ᤹ᤒᤠᤸᤗᤧ ᤐᤠ᤺ᤳᤋᤢ᤹॥

⁹ “ᤁᤱᤃ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤜ᤺ᤸᤗᤧ ᤁᤢᤕᤧᤶᤔᤥᤒᤠ ᤕᤧᤴᤜᤠ᤹ ᤁᤢᤛᤡᤰ ᤗ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤘᤍᤵᤔᤧᤸᤗᤧ ᤕᤠᤶᤔᤥ ᤔᤧᤔᤧᤱᤅᤠᤴ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤕᤠᤱᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤸᤗᤀᤠᤱᤎᤥ ᤂᤧᤏᤧ᤹ᤏᤢ ᤀᤠᤛᤠᤰᤁᤧᤴ ᤔᤧᤓᤥᤱᤅᤠᤸᤗᤥ. ᤀᤠᤱᤃᤠ᤹ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤔᤧᤓᤧ᤺ᤰᤏᤧᤴ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤠ᤹ᤖᤥ॥

¹⁰ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤔᤧᤕᤰᤂᤢ ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ ᤔᤧᤄᤧᤳᤋᤢᤖᤥ ᤜᤧᤰᤁᤣᤛᤠᤱ ᤀᤠᤑᤠᤸᤗᤧᤀᤠᤱ ᤔᤧᤴᤏᤢᤵᤏᤠᤒᤠ ᤔᤡ᤺ᤶᤈᤡ ᤔᤧᤵᤔᤠ ᤔᤧᤗᤧᤳᤏᤧᤸᤗᤥ. ᤀᤠᤱᤃᤠ᤹ ᤆᤥᤃᤢᤱᤒᤠ ᤛᤏᤠᤖᤢᤱᤗᤧᤴ ᤔᤠᤱᤜᤢᤵᤐᤡᤴᤏᤠᤱ ᤔᤧᤱᤃᤧᤵᤔᤏᤠᤒᤠ ᤔᤧᤒᤥᤱᤏᤧᤸᤗᤥ.” ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

ᤁᤧᤍᤠᤒᤠ ᤕᤧᤶᤔᤥ ᤕᤖᤢᤛᤗᤧᤔ

¹¹ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤕᤖᤢᤛᤗᤧ᤺ᤶᤔᤣ. ᤋᤢᤰᤂᤣ ᤗᤠᤰᤂᤣ ᤁᤧᤍᤢᤶᤒᤠᤀᤠᤱ ᤁᤧᤕᤠᤰᤐᤠ. ᤜᤠᤱᤜᤠᤱ ᤁᤧᤔᤧᤵᤐᤠ ᤏᤢ ᤁᤧᤓᤠ᤹ᤒᤠ ᤜᤠ᤺ᤳᤋᤠᤱ ᤁᤧᤜᤥᤵᤐᤠ ᤕᤧᤰᤕᤰ. ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤔᤠᤱᤗᤢᤱ ᤏᤢ ᤁᤢᤓᤡᤱᤗᤢᤱᤅᤡᤸᤗᤧ ᤂᤧᤏᤧ᤹ ᤁᤧᤗᤢᤱᤎᤠᤰᤁᤡᤸᤗᤧ ᤁᤢᤒᤢᤱ ᤕᤢᤰᤂᤢᤱᤗᤥ॥

¹² ᤀᤠᤱᤃᤠ᤹ ᤂᤧᤏᤧ᤹ ᤁᤧᤈᤱᤜᤡᤶᤜᤠ᤹ ᤁᤧᤀᤥ᤺ᤵᤐᤠ ᤁᤢᤜᤧ᤺ᤳᤗᤠ ᤜᤡᤸᤗᤡ᤺ᤸᤗᤧ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤕᤶᤒᤠ ᤁᤧᤗᤠᤶᤎᤣ᤺ᤵᤐᤠᤜᤠ᤹ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤗᤢᤱᤗᤠᤶ ᤆᤥᤃᤢᤱᤗᤥ ᤂᤧᤒᤩᤠᤱ ᤁᤧᤖᤧᤰ ᤐᤡᤛᤠᤱᤒᤠ ᤁᤧᤗᤢᤱᤎᤠᤰᤜᤠ᤹ ᤔᤠᤱᤗᤢᤱ ᤀᤡᤛ᤻ᤛᤣ᤺ᤱ ᤛᤧᤳᤋᤢᤱᤗᤥ॥

¹³ ᤂᤧᤏᤧ᤹ ᤁᤧᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤒᤠᤅᤣ ᤏᤡᤛᤠᤶ ᤜᤢ᤹ᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤢ᤹ᤔᤧᤍᤠᤖ ᤕᤠ᤺ᤴᤍᤢᤱᤛᤡᤱᤗᤥ॥

¹⁴ ᤂᤠᤛᤧᤴ ᤆᤥ᤺ᤰᤔᤠ ᤏᤢ ᤛᤠᤶᤕᤥᤒᤠ ᤐᤠ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤎᤢᤶᤒᤠ ᤁᤧᤒᤥᤱᤗᤥ. ᤔᤏᤠᤖᤧ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠ ᤏᤢ ᤁᤡᤔᤠ ᤕᤱᤔᤠᤗᤠᤶ ᤁᤡᤔᤠ ᤔᤧᤒᤥᤱᤏᤧᤸᤗᤥ॥

¹⁵ ᤁᤢᤓᤠᤖᤧ ᤂᤧᤏᤧ᤹ ᤁᤧᤶᤛ᤹ ᤁᤧᤶᤓᤳᤋᤡᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ ᤔᤢᤖᤠ ᤔᤧᤳᤋᤢᤱᤛᤡᤱᤒᤠ ᤔᤣ᤺ᤸᤗᤥ. ᤂᤧᤏᤧ᤹ᤏᤢ ᤌᤱ ᤁᤧᤈᤥ᤺ᤰᤐᤠᤜᤠ᤹ ᤜᤠᤖᤡᤔᤧᤍᤠᤖᤥ॥

¹⁶ “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤁᤣ ᤐᤠ᤺ᤳᤋᤢ᤹. ‘ᤀᤥᤔᤧᤳᤋᤧ᤹ᤀᤥ. ᤔᤡᤍ᤺ᤳ ᤁᤧᤔᤢ᤺ᤵᤐᤠ ᤏᤢ ᤂᤈᤢᤶᤄᤕᤠ ᤁᤧᤈᤥ᤺ᤰᤐᤠ ᤑᤧᤴᤃᤧᤎᤰᤐᤧᤴ ᤀᤠᤱᤃᤠ᤹ᤀᤣ ᤆᤥᤃᤢᤱᤒᤠᤖᤥ॥ ᤜᤧᤰᤁᤩᤠᤱ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤧᤴᤏᤠᤱ ᤀᤠᤱᤃᤠ᤹ᤀᤣ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤱᤒᤠᤖᤥ॥

¹⁷ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤀᤠᤰᤋᤱᤒᤠ ᤑᤧᤈᤢᤶᤓᤧᤕᤠᤖᤧᤀᤠᤱ ᤂᤧᤏᤧ᤹ ᤏᤠ᤺ᤶᤔᤠ ᤁᤧᤴᤇᤢᤰᤏᤧᤸᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤔᤏᤠᤜᤠ᤹ ᤂᤧᤏᤧ᤹ ᤕᤠᤱᤏᤠ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤛᤡᤖᤥ॥ ᤁᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤠᤱᤛᤠ ᤁᤢᤴᤎᤣᤖᤧᤴ ᤗᤰᤗᤥ. ᤂᤧᤒᤩᤠᤱ ᤀᤠᤱᤃᤠ᤹ᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤷᤔᤠ᤺ᤱᤃᤡ ᤜᤠᤒᤠ ᤁᤴᤗᤥ॥’”