ᤕᤛᤤᤕᤠ 53 - LIFOTNT

¹ ᤔᤏᤠᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢᤛᤡᤖᤥ. “ᤀᤠᤏᤡᤃᤣ ᤀᤡᤱᤄᤱᤅᤡᤴ ᤜᤠ᤺ᤳᤗᤧ ᤏᤛᤠᤴ ᤆᤥᤃᤢᤀᤠᤱ ᤘᤠ᤹ᤒᤣ᥅ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤜᤠᤳ ᤀᤥ᤺ᤴᤔᤧᤎᤠᤰᤋᤢᤀᤠᤱ ᤘᤠ᤹ᤒᤣ᥅

² ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤧᤘᤠᤖᤥᤒᤧᤴ ᤂᤢᤏᤧ᤹ ᤁᤢᤒᤣᤛᤠᤱ ᤆᤡᤏ᤹ᤏ᤹ᤒᤠ ᤕᤠ᤺ᤴᤏᤡᤸᤗᤧ ᤁᤢᤏ᤺ᤰ ᤜᤧᤰᤁᤣ ᤜᤧᤰᤁᤩᤠᤱ ᤁᤢᤜᤣᤍᤩᤠ᤹ ᤂᤠᤶᤒᤠᤱᤅᤥᤗᤠᤶ ᤁᤧᤗ᤺ᤶᤒᤠ ᤛᤡᤱᤛᤠᤵ ᤁᤢᤛᤡᤱ ᤐᤥᤖᤧᤖᤥ॥ ᤂᤢᤏᤧ᤹ ᤏᤢᤒᤠ ᤁᤢᤏᤠᤖᤢᤶᤓᤢᤱ ᤜᤥ᤺ᤵᤋᤧᤖᤥ. ᤂᤢᤏᤧ᤹ ᤁᤢᤏᤠᤖᤠᤀᤥ ᤀᤠᤏᤡᤃᤣ ᤛᤡᤖᤠ᤹ᤃᤧᤎᤠᤱᤒᤠ ᤐᤠᤴ ᤌᤣᤀᤠᤱ ᤜᤥ᤺ᤵᤋᤧᤖᤥ॥

³ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤔᤧᤈᤡ᤺ᤳᤋᤢᤀᤠᤱ ᤘᤕᤧᤖᤥ ᤜᤧᤰᤁᤩᤠᤱ ᤔᤧᤏᤠ᤹ᤖᤢᤖᤥ. ᤂᤢᤏᤧ᤹ ᤋᤢᤰᤂᤣ ᤏᤢ ᤕᤧᤳᤋᤢᤰᤂᤣᤜᤠ᤹ ᤌᤖᤢᤖᤥ॥ ᤜᤠ᤺ᤳᤗᤧᤀᤠᤱ ᤂᤢᤏᤧ᤹ ᤀᤥᤔᤧᤔᤧᤳᤋᤢᤸᤗᤥ. ᤀᤠᤏᤡᤃᤣ ᤂᤢᤏᤧ᤹ ᤌᤣ ᤜᤧᤰᤋᤱᤒᤠᤀᤠᤱ ᤔᤧᤗᤣ᤺ᤳᤋᤢᤶᤒᤧᤸᤗᤥ॥

⁴ “ᤛᤧᤰᤂᤠᤀᤣ ᤂᤢᤏᤧ᤹ ᤀᤠᤏᤡ᤹ ᤋᤢᤰᤂᤣᤴ ᤌᤖᤢᤖᤥ. ᤀᤠᤏᤡ᤹ ᤕᤧᤳᤋᤢᤰᤂᤣᤜᤠ᤹ ᤁᤢᤕᤢᤍᤣ᤹ᤖᤢᤖᤥ॥ ᤁᤖ ᤂᤢᤏᤧ᤹ ᤋᤢᤔᤢᤒᤠ ᤕᤧᤳᤋᤢᤰᤂᤣᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤒᤠ ᤑᤠ᤹ᤀᤠᤱ ᤀᤠᤏᤡ᤹ ᤀᤠᤀᤡ᤺ᤳᤋᤢᤶᤗᤥ॥

⁵ ᤁᤖ ᤂᤢᤏᤧ᤹ᤃ ᤀᤠᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤔᤧᤎᤢᤒᤢᤖᤥ. ᤀᤠᤏᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤋᤧ᤺ᤶᤓᤢᤰ ᤆᤩᤧᤖᤥ॥ ᤂᤢᤏᤧ᤹ ᤂᤢᤶᤍᤡᤱ ᤂᤥᤛᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤛᤏᤠᤖᤢᤱ ᤏᤢ᤹ᤔᤠ ᤋᤠᤔᤠ ᤀᤠᤄᤥᤛᤢᤶᤗᤥ. ᤂᤢᤏᤧ᤹ ᤋᤧ᤺ᤶᤓᤢᤰᤁᤡᤸᤗᤧ ᤁᤠ᤺ᤴᤍᤧᤒᤠᤀᤥ ᤀᤠᤏᤡ᤹ ᤀᤠᤘᤣ᤺ᤳᤋᤧᤖᤥ॥

⁶ ᤀᤠᤏᤡ᤹ ᤁᤧᤖᤧᤰ ᤗᤠᤶ ᤁᤧᤒᤥ᤺ᤵᤐᤠ ᤔᤧᤸᤗᤢᤰᤜᤠ᤹ ᤜᤧᤰᤋᤱᤒᤠ ᤀᤠᤘᤕᤧᤖᤥ. ᤀᤠᤏᤡ᤹ ᤀᤠᤒᤠᤅᤣ ᤗᤠᤶᤔᤥ ᤗᤠᤱ ᤀᤠᤄᤣᤃᤧᤖᤥ. ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤈᤥᤃᤢᤶᤒᤠ ᤗᤠᤕᤥᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤛᤶᤎᤠᤱ ᤆᤢᤰᤋᤧᤖ ᤕᤠ᤺ᤴᤍᤢᤖᤥ॥

⁷ “ᤂᤢᤏᤧ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤖᤥ ᤁᤖ ᤂᤧᤱᤜᤠ᤹ ᤁᤧᤖᤧᤰ ᤌᤖᤢᤀᤠᤱ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤖᤥ. ᤂᤢᤏᤧ᤹ ᤁᤢᤶᤒᤪᤠᤀᤥᤗᤠᤶ ᤗᤳᤇᤠ ᤐᤠ᤺ᤴᤛᤢᤳᤗᤠᤎᤡᤰᤁᤠᤱ ᤔᤧᤒᤠ᤺ᤳᤋᤢᤴᤗᤥ॥ ᤛᤧᤵᤔᤠ ᤔᤧᤈᤥᤃᤢᤒᤠ ᤔᤧᤸᤗᤢᤰ ᤁᤢᤛᤡᤱ ᤁᤢᤶᤒᤪᤡᤰ ᤏ᤺ᤱᤔᤠ ᤔᤧᤀᤡ᤺ᤳᤋᤢᤒᤠ ᤔᤧᤸᤗᤢᤰ ᤁᤢᤛᤡᤱ ᤂᤢᤏᤧ᤹ ᤁᤢᤶᤒᤪᤠ ᤔᤧᤓᤠ᤺ᤰᤂᤢᤸᤗᤥ॥

⁸ ᤂᤢᤏᤧ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤖᤥ ᤜᤧᤰᤁᤩᤠᤱ ᤂᤢᤶᤍᤡᤱ ᤔᤧᤒᤡᤖᤢᤀᤠᤱ ᤛᤧᤳᤇᤧ ᤔᤧᤍᤣ᤹ᤖᤢᤖᤥ॥ ᤂᤧᤒᤩᤠᤱ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤔᤣ᤺ᤴᤏᤣ ᤛᤩᤧᤖᤥ ᤑᤠ᤹ᤀᤠᤱ ᤜᤠ᤺ᤳᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤒᤣ᥅ ᤌᤣᤀᤠᤱᤓᤧᤸᤗᤧ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤖᤥ. ᤂᤢᤏᤧ᤹ᤃ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤔᤧᤎᤃᤢᤖᤥ॥

⁹ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤂᤢᤏᤧ᤹ ᤀᤡᤐᤢᤱᤅᤥ ᤔᤧᤏᤧᤛ᤻ᤛᤢᤖᤥ. ᤕᤠᤱᤛᤠ ᤁᤢᤴᤎᤣᤛᤠᤒᤠᤜᤠ᤹ᤏᤢ ᤔᤧᤈᤡᤰᤂᤢᤖᤥ ᤜᤧᤰᤁᤣᤛᤠᤱ ᤂᤢᤏᤧ᤹ ᤀᤠᤓᤧᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ. ᤂᤢᤏᤧ᤹ᤃ ᤀᤠᤓᤧᤸᤗᤧᤀᤠᤱ ᤀᤡᤱᤗᤧᤰ ᤐᤠᤴ ᤔᤧᤒᤠ᤺ᤳᤋᤢᤴᤗᤥ॥

¹⁰ “ᤁᤖ ᤂᤢᤏᤧ᤹ ᤂᤠ᤺ᤶᤔᤠ ᤏᤢ ᤋᤢᤰᤂᤣ ᤌ᤺ᤵᤐᤠᤱᤔᤠᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ ᤘᤕᤧᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤁᤢᤜᤡᤱᤔᤴᤏᤡᤴ ᤂᤢᤏᤧ᤹ᤏᤢ ᤕᤠᤶᤔᤥ ᤋᤱᤔᤠᤖᤧ ᤗᤠᤃᤡ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤆᤥᤃᤢᤖᤥ॥ ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤏᤡᤛᤢᤛᤡᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤠᤰ ᤆᤠ᤹ᤖᤥ॥ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ᤗᤠᤶᤒᤠ ᤁᤢᤗᤡᤱᤍᤥ ᤁᤧᤳᤗᤥ॥

¹¹ ᤁᤧᤛᤠᤰᤐᤠ ᤕᤧᤳᤋᤢᤰᤂᤣ ᤋᤢᤔᤢᤀᤠᤱ ᤀᤣᤃᤠᤱ ᤂᤢᤏᤧ᤹ ᤁᤴ ᤁᤧᤖᤧᤰ ᤏᤡᤔᤠ ᤂᤥᤛᤢᤖᤥ ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤋᤠᤖᤥ॥ ᤛᤠᤶᤕᤥᤒᤠ ᤀᤠᤛᤧᤘᤠᤖᤥᤒᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤛᤠᤶᤕᤥᤒᤠ ᤆᤥᤃᤢᤛᤡᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥᤜᤠ᤹ ᤁᤢᤕᤢᤖᤥ॥

¹² ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤢᤏᤧ᤹ ᤗᤳᤇᤠ ᤔᤡᤱᤛᤥ ᤀᤡᤱᤎᤠᤱᤗᤧ ᤕᤢᤰᤏᤠᤍᤧᤴ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤔᤢᤰᤁᤢᤶᤛᤠᤒᤠᤜᤠ᤹ᤏᤢ ᤂᤢᤏᤧ᤹ ᤁᤢᤗᤰ ᤑ᤺ᤰᤂᤢᤀᤠᤱ ᤜᤠ᤺ᤳᤋᤢᤛᤡᤖᤥ. ᤂᤢᤏᤧ᤹ ᤀᤠᤒᤠᤅᤣ ᤋᤧᤴᤍᤧᤀᤠᤱᤅᤣ ᤂᤢᤏᤧ᤹ ᤁᤢᤜᤡᤱᤔᤴᤏᤡᤴ ᤛᤡᤍᤢᤱᤈᤓᤠ ᤆᤥᤃᤢᤖᤥ. ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤏᤢ ᤁᤢᤍᤱᤒᤠ ᤐᤥ᤺ᤰᤂᤧᤖᤥ॥ ᤂᤢᤏᤧ᤹ ᤕᤖᤡᤰ ᤗᤠᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤁᤢᤕᤢᤖᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤗᤧᤵᤔᤡ ᤔᤧᤄᤥᤛᤢᤖ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤖᤥ॥”